Ö:: به‌یاننامه‌ی هاوبه‌شی لاوان و ژنان له ده‌ره‌وه‌ی ولات به بۆنه‌ی یادی شه‌سته‌مین ساڵوه‌گه‌ڕی کۆماری کوردستان

یه‌کیه‌تی لاوانی دێمۆکراتی کوردستانی ئێران

کچان و کورانی تێکۆشه‌ر!
هاونیشتمانانی به‌رێز!
دووی رێبه‌ندانی ئه‌م ساڵ شێست ساڵی ته‌واو به‌سه‌ر دامه‌زراندنی ده‌وڵه‌تی جمهووری کوردستان‌ له شاری مهاباد تێده‌په‌ڕێت. دامه‌زراندنی  کۆماری کوردستان له مێژووی بزوتنه‌وه‌ی رزگاری خوازانه‌ی نه‌ته‌وه‌ی کورد‌دا به نوخته گۆڕانێکی گه‌وره به حیساب دێت. دامه‌زراندنی کۆماری کوردستان له زۆر باره‌وه جێگای لێورد بوونه‌وه‌و تێڕامانه.

ئه‌م کۆماره له باری سیاسی‌یه‌وه توانی باوه‌ڕ به‌خۆبوونێکی گه‌وره به مروڤی کورد ببه‌خشێت و هاوکات خه‌باتی شارستانی و پێشکه‌وتوانه به بزوتنه‌وه‌ی کورد بدات و بۆ یه‌که‌م جار له مێژوودا به به‌رنامه و پلانی دارێژراو کوردی پارچه‌کانی دیکه‌ی کوردستان له ده‌سه‌ڵاتی ڕامیاری‌دا به‌شدار بکات. ئه‌م ره‌هه‌نده یه‌کێک له به‌هێزترین خاڵه‌کانی کۆماری کوردستانه که گه‌شه‌دان به رۆحی دێمۆکراتیکی کوردستانی به‌ره‌و ژوور هه‌ڵکشاند و به‌رزی کردوه‌وه.

له باری کولتوری و زمانه‌وانی و هونه‌ری‌یه‌وه، ناوچه‌کانی ژێر ده‌سه‌ڵاتی کۆمار په‌ره‌یان سه‌ند و  زمانی کوردی گیانێکی وه‌به‌ر هاته‌وه‌و ئه‌ده‌بیات و زمانی کوردی گه‌شه‌ی باشی به‌ خۆوه بینی و به‌شێکی به‌رچاو له رۆژنامه‌وان و شاعیران و نوسه‌رانی کورد و ته‌نانه‌ت ڕیبه‌رانی هه‌ڵکه‌وتوی پارچه‌کانی دیکه‌ی کوردستان هه‌ر له سایه‌ی کۆماری کوردستان له شاری مهاباد که‌سایه‌تیان شکلی گرت و دوایه که‌سانی سه‌ر به‌ده‌ره‌وه‌و ناسراویان لێده‌رچوو.

یه‌کێکی دیکه له هه‌و‌ڵه‌کانی کۆماری کوردستان پێک هێنانی ناوه‌ند و رێکخراوی مه‌ده‌نی و دێمۆکراتیک بوو، دامه‌زراندنی یه‌کیه‌تی ژنانی دێمۆکراتی کوردستانی ئێران و یه‌کیه‌تی لاوانی دێمۆکراتی کوردستانی ئێران، به‌شێک له‌م هه‌وڵه وشیارانه‌ی کاربه‌ده‌ستانی کۆماری کوردستان بووه.

ئێستا ئیدی کۆماری کوردستان وه‌کوو ئه‌ستێره‌ێکی گه‌شی ئاسمانی بزوتنه‌وه‌ی رزگاری خوازانه‌ی نه‌ته‌وه‌ی کورد ده‌دره‌وشێته‌وه‌و بۆته به‌شێکی گرینگ و پڕ شانازی له مێژووی سیاسی خه‌ڵکی کوردستان‌دا. ئه‌وه‌تا ده‌بینین که کیژان و لاوانی تێکۆشه‌ر له سه‌راسه‌ری دونیا ئه‌م یاده مه‌زنه رێز ده‌گرن و له خه‌باتی بێ وچاندان بۆ پێک هێنانه‌وه‌ی ئامانجه به‌رزه‌کانی کۆماری کوردستان.

ئێمه له‌م یاده پیرۆزه‌دا وێرای پیرۆزبایی کردنی خۆمان له خه‌ڵکی کوردستان به‌ گشتی و تێکۆشه‌رانی حیزبی دێمۆکراتی کوردستانی ئێران، پێک هێنه‌رو خولقێنه‌ری کۆماری کوردستان و رێبه‌ری بزوتنه‌وه‌ی کورد له کوردستانی ئێران ، هاوکات په‌یمان نوێ ده‌که‌ینه‌وه که تاکوو وه‌دی هێنانی ئامانجه‌کانی کۆماری کوردستان له تێکۆشان و خه‌بات کۆڵ ناده‌یین و وه‌کوو ڕابردوو وه‌فادار به ئامانجه به‌رزه‌کانی کۆمار ده‌مێنینه‌وه.

سڵاو له یادی شێسته‌مین ساڵوه‌گه‌ری کۆماری کوردستان
سڵاو له پێشه‌وا قازی یه‌که‌مین سه‌رۆک کۆمار کورد
سه‌رکه‌وێ خه‌باتی میللی دێمۆکراتیکی کورد
د‌ه‌سته‌ی نوێنه‌رایه‌تی گشتی یه‌کیه‌تی لاوانی دێمۆکراتی کوردستانی ئێران له ده‌ره‌وه‌ی وڵات
یه‌کیه‌تی ژنانی دێمۆکراتی کوردستانی ئێران له ده‌ره‌وه‌ی وڵات
2ی ڕیبه‌ندانی ساڵی 2705ی کوردی
به‌رانبه‌ر به 22 01 2006ی زایینی

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.