Ö:: ئێعدام کرانی گیراوێکی دیکه‌ی خه‌ڵکی شاری سه‌رده‌شت

ماڵپه‌ری گیاره‌نگ

مه‌سعود شۆکه‌ ته‌مه‌ن 37 ساڵ کوڕی محه‌ممه‌د خه‌ڵکی گوندی گه‌وه‌لان له‌ ناوچه‌ی سه‌رده‌شت پاش تێپه‌ر کردنی 9 ساڵ و چوار مانگ زیندانی، ڕۆژی 11ی به‌فرانبار له‌ گرتووخانه‌ی ورمێ له‌ سێداره‌ درا.
ناوبراو له‌ گه‌ڵ دوو که‌سی دیکه‌ به‌ ناوه‌کانی عه‌زیز خه‌ڵکانی خه‌ڵکی بێران و سه‌لاح مه‌حموودی خه‌ڵکی گوندی گه‌وه‌لان به‌ تاوانی کوشتنی یه‌کێک له‌ پیاوانی سه‌ر به‌ حکومه‌ت له‌ زیندانی ورمێ دا وه‌ک زیندانی ڕاگیرا بوون.

دوای گیرانی ئه‌و سێ که‌سه‌ زۆر زوو حوکمی ئێعدامیان بۆ دیاری کرا، دوای تێپه‌ر کردنی 9 ساڵ و چوار مانگ ئه‌وه‌ حوکمی ئێعدامه‌کان ئه‌مڕۆ به‌ڕێوه‌ ده‌به‌ن. شایانی باسه‌ که‌ له‌ ڕۆژی 27ی مانگی سه‌رماوه‌ز دا عه‌زیز خه‌لکانی له‌ سێداره‌ درا بوو و ئێستا مه‌ترسی ئێعدام له‌ سه‌ر نه‌فه‌ری سێهه‌م به‌ ناوی سه‌لاح مه‌حموودی هه‌یه‌ و چاره‌نووسی ناوبراویش وه‌ک چاره‌نووسی دوو ئێعدام کراوه‌که‌ی دیکه‌ ده‌بێت هه‌ر بۆیه‌ پێویسته‌ که‌ هێز و ڕێکخراوه‌ خێر خواز و به‌شه‌ر دۆسته‌کان و ڕێکخراوی مافی مرۆڤ زووتر ده‌ست به‌ ناره‌زایه‌تی بکه‌ن و پێش به‌ ئێعدامی نه‌فه‌ری سێهه‌م بگرن.

جه‌سته‌ی ئێعدام کراوی مه‌سعوود شۆکه‌ ته‌حویلی بنه‌ماڵه‌که‌ی درا بۆوه‌ و بنه‌ماڵه‌که‌شیان له‌ نێو ده‌ریایه‌ک خه‌م و په‌ژاره‌ دا له‌ شوێنی له‌ دایک بوونی خۆی به‌ خاکیان سپارد.

با به‌ هه‌موو لایه‌ک کاره‌ ناپه‌سه‌ند و به‌ دوور له‌ ئاستی مرۆڤایه‌تی له‌ قاو بده‌ین و نه‌هێڵین که‌ چیدی ڕق و نه‌فره‌تی کۆماری ئیسلامی به‌ سه‌ر خه‌ڵکی کوردستان و لاوانی کوردستان دا برژێ و چیدی گه‌لی کورد به‌ ناوی یاسای بێ نێوه‌رۆکی کۆماری ئیسلامی بێ حورمه‌تی و گاڵته‌جاڕی پێ نه‌کرێ و خوێنی لاوانی کوردی زیاتر نه‌رژێ.

بێ ده‌نگی له‌ ئاست ئه‌م شێوه‌ کارانه‌ دا کاره‌سات و تاوانی زۆرتری لێ ده‌که‌وێته‌وه‌.

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.