دامه‌زرانی
کۆماری کوردستان له مێژووی پڕ له کاره‌سات و خویناوی گه‌لی کوردستان دا
وه‌کوو رووداوێکی سیاسی گرینگ سه‌یر ده‌کرێ و ئه‌مرۆ دوای تێپه‌ر بوونی شێست
ساڵ به سه‌ر دامه‌زرانی دا، جێگا و پێگه‌ی ئه‌و کۆماره جوانه مه‌رگه بۆ
نه‌ته‌وه‌ی کورد گرینگێکی تایبه‌تی هه‌یه.
تاکوو ئێستا به شێوه‌ی جۆراوجۆرله سه‌ر شانازیه‌کان و ده‌سکه‌وته‌کانی سیاسی
و فه‌رهه‌نگی و کۆمه‌ڵایه‌تی و کاریگه‌ری کۆمار به سه‌ر گه‌له‌که‌مانه دا
نوسراوه.
بیرو بۆ چوونی جیاواز له سه‌ر هۆ کاره‌کانی پێک هاتنی کۆمار و ئه‌و هه‌ڵ و
مه‌رجه‌ی که تێدا ڕاگه‌یه‌ندراو و په‌یوه‌ندی کۆمار به‌ولاتانی
ده‌وروبه‌ره‌وه و به سه‌رکه‌وتۆانی شه‌ری دووهه‌می جیهانی و هۆکاره‌کانی تێک
چوونی کۆمارباس کراوه.
هێندێک له بۆ چونه‌کان ده‌لێن کۆماری مه‌هاباد، هیندێکیش ده‌لێن کۆماری کوردستان. ئه‌و بۆ چونانه ده‌کرێ له بواری سیاسی، مێژوویی و ئاکادیمی لێک جیا بکرێته‌وه. به‌لام هه‌موویان یه‌ک راستی ده‌ر ده‌خه‌ن، ئه‌ویش ئه‌وه‌یه که دامه‌زرانی کۆمارێکی کوردی له‌و سه‌رده‌مه دا بۆ کورد ده‌سکه‌وتێکی سیا سی و مێژوویی گرینگه و داوی شێست ساڵ داگیرکه‌ران ئێستا ش هه‌ولیان ئه‌وه‌یه که دامه‌زرانی کۆمار به ده‌سکردی بێگانه دابنێن، به تایبه‌ت ده‌وله‌تی فاشیست و داگیرکه‌ری فارس.
ئه‌گه‌ر چاوێک له‌ونوسراوانه که به نێو مێژووی ئێران نوسراون بکه‌ین، بۆمان
ده‌رده‌که‌وێ که هه‌موویان چه‌ند فاشیستانه هێرشیان کردۆته سه‌رکۆمار و
پێشه‌وا شه‌هیده‌که‌ی، قازی محه‌ممه‌د و کردویانه به " نۆکه‌ری " روسه‌کان.
من نامهه‌وێ برۆمه‌وه سه‌ر هۆیه‌کانی شکانی کۆمار و لاوازییه‌کانی و
خه‌یانه‌ته‌کانی ژوماره‌یه‌ک له ئاغاکان و له عه‌شیره‌ته‌کان.
ئه‌وه‌ی خالی یه‌کجار گرینگه به بروای من کوردستانی بوونی کۆمار
بوو. به‌شداری و فیداکاری کورده‌کانی پارچه‌کانی دیکه‌ی کوردستان و ته‌نانه‌ت
شه‌هید بوون بۆ پارێزگاری له مانه‌وه‌ی کۆمار شاهیدی زیندون ئه‌و بۆچونه.
نموونه‌ی زیندوو، به‌شداری بارزانیه‌کان به سه‌رۆکایه‌تی خودا لێخۆشبوو ژێنراڵ
بارزانی بوو.
کۆمار سه‌ره‌رای ئه‌وه‌ی له بواری خاکه‌وه به شێکی بچووکی له خاکی رۆژهه‌لاتی کوردستان داگیر کرد بوو و نه‌یتوانی بوو به هۆی جۆراجۆر په‌ڵ‌وپۆی بۆ ناوچه‌کانی دیکه باوێ، به‌ڵام قیبله‌ی هیوا و هۆمێدی به میلێۆن کوردی بێ به‌ش و چه‌وساوه بوو له سه‌راسه‌ری کوردستانی گه‌وره دا.
لێره دا چه‌ندین پرسیارێک دێته پێش، ئه‌ویش ئه‌وه‌یه که ئایا ئێمه‌ی کورد به گشتی و هێزه سیاسیه کانی کوردستان به تایبه‌تی توانیویانه ده‌رس له‌و هه‌ڵه ناوخۆیانه و ئه‌و لاوازیانه‌ی که بوونه هۆی رووخانی کۆمار وه‌رگرن؟
ئایا
له دوای شێست ساڵ به سه‌ر تێپه‌ر بوونی ته‌مه‌نی کۆمار کورد توانیویانه کورد
له جیهانی مۆدێرنی ئه‌مرۆ دا وه‌کوو نه‌ته‌وه پێناسه بکهن و ئالاکه‌ی له
نه‌ته‌وه یه‌کگرتۆکان بشه‌کێته‌وه؟
بێگومان وه‌ڵامی ئه‌و پرسیاره بۆ هه‌موو که‌س ئاشکرایه، ئه‌ویش نایه!!!
به‌ڵام بۆ له داوی شیست ساڵ خه‌باتی بێ وچانی سیاسی و چه‌کداری و به دانی
هه‌زاران قوربانی و وێران بوونی به سه‌دان گوندی کوردستان و راگوێزتنی
هه‌زاران کورد له سه‌ر زێد و نیشتمانیان له لایه‌ن سوپای داگیر که‌ری
کوردستان، ئێستاشی له گه‌ڵ بێ کورد و کوردستان هه‌روا بێ پێناسه‌ن و ئێستاش
هه‌ر به ئێرانی، تورکی وعێراقی و سوری ناومان ده‌به‌ن؟
ئایا
به راستی هێزه‌کانی سیاسی کوردستان تاکوو ئێستا توانیویانه پێناسه‌یه‌کی روون
له داگیرکه‌ر بخه‌نه روو، هه‌وڵیان داوه به سیاسیه‌‌ته‌کانیان ناسیۆنالیزمی
کوردی به واتای ته‌واوی وشه دروست بکهن؟
ئایا بۆ بیره‌وه‌ری کۆماری جوانه‌مه‌رگماندا هه‌موو ساڵێ له ٢ ی رێبه‌نداندا،
شایی و هه‌لپه‌رکێ ده‌توانێ کۆمارێکی دیکه‌مان بۆ دروست بکاته‌وه و یان پتر
هه‌ست و سۆزی عاتیفی خۆمان ده‌رده‌بڕین ؟
یادی دامه‌زرێنه‌ران وشه‌هیدانی کۆماری کوردستان به‌رزو پیرۆز بێ.
لوقمان زه‌هرایی
