:: وه‌ڵامێک بۆ "ئاوڕدانه‌وه‌یه‌ک‌ [ی‌ چه‌واشه‌کارانه] له‌ گرفتی‌ نێوخۆیی‌ حیزبی‌ دێمۆکرات"
 

وه‌ڵامێک بۆ "ئاوڕدانه‌وه‌یه‌ک‌ [ی‌ چه‌واشه‌کارانه] له‌ گرفتی‌ نێوخۆیی‌ حیزبی‌ دێمۆکرات"
(به‌شى پێنجه‌م)
فه‌لسه‌فه‌ى وجوودیى پاوانخوازان: "به‌شى خۆم بۆخۆم، به‌شى تۆش ده‌خۆم"

 "ئاوڕدانه‌وه‌"ى قۆڵى پاوانخوازى حیزبى دیموکرات له‌ درێژه‌ى ره‌تکردنه‌وه‌ى داواکانى نامه‌ 20 خاڵییه‌که‌ى ئۆپۆزیسۆنى نێوخۆدا باس له‌ دوو خاڵى سه‌رنجڕاکێش ده‌کا و ده‌ڵێ: "ئایا به‌ڕاى ئه‌و چه‌ند کادر و ئه‌ندامه‌ چى دیکه‌ پێویست به‌وه‌ ناکا حیزب له‌و پێناوه‌دا [دابین بوونى دیموکراسى و ئازادی و خه‌باتى نوێ و سه‌رده‌میانه‌ى حیزب بۆ به‌ره‌وپێشبردنى کۆمه‌ڵگا و ...] خه‌بات بکا و چونکه‌ ئه‌وان ده‌نگى خه‌ڵکیان له‌گه‌ڵ نیه‌، ده‌بێ حیزب بۆ پاراستنى مه‌سڵه‌حه‌ت و به‌رژه‌وه‌ندى ئه‌وان، ببێ به‌ دیوه‌خانى چه‌ند ریش سپىیه‌ک؟!!؟!" (زه‌قکردنه‌وه‌ى وشه‌کان له‌ لایه‌ن ئێمه‌وه‌یه‌).

ئاشکرایه‌ که‌ سه‌رانى ئه‌م قۆڵه‌ تا ئێستاش نایانهه‌وێ دان به‌وه‌دابنێن که‌ حه‌ره‌که‌تێک که‌ بۆ راستکردنه‌وه‌ى حیزبى دیموکرات و سنوور دانان له‌ به‌رده‌م پاوانخوازیى ئه‌وان وه‌ڕێ که‌وتوه‌ زۆر له‌ ناڕه‌زایه‌تى ده‌ربڕینى " چه‌ند کادر و ئه‌ندام" به‌رینتره‌. ئه‌وان واده‌زانن خه‌ڵک وه‌ک سه‌رده‌مانى پێشوو ئاگایان له‌ زۆر رووداو و گرفتى نێوخۆیى حیزبه‌کان نیه‌ و ئه‌گه‌ر بشیانهه‌وێ شتێک له‌باره‌ى حیزبێک بزانن ئه‌وه‌ چاویان بڕیوه‌ته‌ زارى ده‌مڕاسته‌کان و نووسینى قه‌ڵه‌مبه‌ده‌ستانى سه‌رانى ئه‌و حیزبانه‌ و هه‌رچی‌یه‌ک بیڵێن باوه‌ڕیان پێ ده‌که‌ن. به‌ڵام لێکدانه‌وه‌ و نووسینى خاوه‌ن نه‌زه‌رانى کوردستان له‌ سێ مانگى رابردوودا ده‌رىخست که‌ ئه‌م بۆچوونه‌ هه‌ڵه‌یه‌ و له‌ سایه‌ى پێشکه‌وتنى تێکنۆلۆژیى پێوه‌ندىیه‌کان و وشیاریى سیاسی و رۆشنبیریى گشتىدا، هیچ راستىیه‌ک له‌ خه‌ڵک ناشاردرێته‌وه‌. هه‌ر بۆیه‌ ئه‌م هه‌وڵه‌ که‌ ده‌یه‌وێ ناڕازییانى حیزب به‌ چه‌ند کادر و پێشمه‌رگه‌ نیشان بدا، بێ فایده‌یه‌. له‌وه‌ش بێ که‌لکتر ئه‌وه‌یه‌ که‌ حه‌ره‌که‌تى ئۆپۆزیسیۆنى نێوخۆی حیزبى دیموکرات وه‌ک هه‌وڵدانى به‌ڕێز عه‌بدوڵڵا حه‌سه‌ن زاده‌ بۆ وه‌ده‌ستهێنانه‌وه‌ى پۆستى سکرتێری گشتى پێشان بدرێ. ئه‌گه‌ر "ئه‌و چه‌ند کادر و پێشمه‌رگه‌"یه‌ که‌ به‌ نوێنه‌رایه‌تیى ئۆپۆزیسیۆنى نێوخۆى حیزبى دیموکرات نامه‌ى 7/5/1385یان ئیمزا کردوه‌، هه‌ر خۆیان بان و له‌ زۆر ئۆرگان و کۆمیته‌ و به‌شه‌کانى حیزبى دیموکرات له‌ کوردستان و وڵاته‌ جۆاروجۆره‌کانى جیهان‌دا، له‌ سه‌رانى پاوانخواز لایه‌نگر و پشتیوانیان زیاتر نه‌با، هه‌م ده‌سه‌ڵاتبه‌ده‌ستانى حیزب ئه‌وه‌نده‌ دیموکرات و دڵفراوان نه‌بوون که‌ به‌ که‌متر له‌ ده‌رکردنیان له‌ حیزب رازى بن، هه‌م جێبه‌جێکردنى نیاز و مه‌به‌سته‌کانیان له‌ هه‌موو جآیه‌ک له‌گه‌ڵ به‌رهه‌ڵستى‌یه‌کى ئه‌وتۆ به‌ره‌وڕوو نه‌ده‌بوو که‌ زۆر شتیان لىَ پووچه‌ل بێته‌وه‌. ته‌نانه‌ت ئه‌گه‌ر ئه‌م قسه‌یه‌ تۆزقاڵێکیش له‌ راستىیه‌وه‌ نزیک بێ، ئه‌م خه‌مخۆره‌ رواڵه‌تییانه‌ى دیموکراسى و ئازادى و ئه‌م به‌ناو ئاڵاهه‌ڵگرانه‌ى خه‌باتى نوێ و سه‌رده‌میانه‌ که‌ گوایه‌ ده‌یانه‌وێ "کۆمه‌ڵگا له‌ پێوه‌ندی‌یه‌ دواکه‌وتووه‌کان ده‌رباز" بکه‌ن، حه‌ق  ئه‌وه‌بوو بزانن که‌ ره‌وایى و به‌حه‌قبوونى ویست و داخوازى ئه‌ندامانى حیزب یا تاکه‌کانى کۆمه‌ڵ، نه‌ک به‌ زۆرى و که‌میى ژماره‌ى داواکاران، به‌ڵکوو به‌ گونجان و یه‌کدیگر بوونیان له‌گه‌ڵ مافه‌ دیاریکراوه‌کانى ئه‌وان، پێوانه‌ ده‌کرێ.

وه‌ک پێشتر گوترا، ملنه‌دانى سه‌رانى ئه‌م قۆڵه‌ بۆ داننان به‌ بوونى لایه‌نى دیکه‌ له‌ نێو حیزب‌دا بۆ ئه‌وه‌یه‌ هیچ "تعهد"ێکیان نه‌که‌وێته‌ مل و ناچار به‌ ره‌چاوکردنى مافه‌کانى که‌سانى به‌رامبه‌ریان نه‌بن. ئه‌وان راست ناکه‌ن که‌ ده‌ڵێن کێشه‌یان له‌گه‌ڵ وشه‌ى "ئۆپۆزیسیۆن" هه‌یه‌ چونکه‌ ئه‌گه‌ر لایه‌نى به‌رامبه‌ریان ناوى دیکه‌شى له‌سه‌ر بێت، مادام داواى به‌شدار بوون له‌ بڕیاردان و به‌ڕێوه‌بردنى حیزب‌دا ده‌کا و ده‌یه‌وێ به‌قه‌را نفووز و سه‌نگى خۆى له‌م حیزبه‌دا رۆڵى هه‌بێ، هه‌ر قبووڵیان نیه‌. دیاره‌ له‌سه‌رێکه‌وه‌ ناهه‌قیشیان نیه‌ که‌ ئه‌وه‌نده‌ زه‌نده‌قیان له‌م داوایه‌ چووه‌. ئه‌وان عومرێکه‌ کار بۆ رۆژێکى وا ده‌که‌ن که‌ حیزبى دیموکرات بکه‌ن به‌ پاوانى خۆیان و هه‌رچى له‌ده‌ستیان هاتوه‌ بۆ ئه‌م مه‌به‌سته‌ ئه‌نجامیان داوه‌. ئێستا چلۆن ئه‌م ده‌سکه‌وته‌ به‌ نرخه‌ى ده‌سته‌به‌ندى و بڕیارشکێنى به‌فیرۆ بده‌ن و شه‌ریک و برابه‌ش بۆ خۆیان قایل بن ؟!

به‌ڵام له‌ هه‌مووى ئه‌وانه‌ سه‌یرتر باسکردنیان یا نیگه‌رانییان له‌ بوونى حیزبى دیموکرات به‌ دیوه‌خانى سه‌رۆک عه‌شیره‌ته‌کان یا دیوه‌خانى چه‌ند ریش‌سپىیه‌که‌. سه‌یر بوونى ئه‌م قسه‌یه‌ له‌وه‌دایه‌ که‌ سه‌ره‌ڕاى ئه‌م هه‌موو درۆشمه‌ى ئه‌و به‌ڕێزانه‌ له‌ باره‌ى پره‌نسیبه‌ دیموکراتیکه‌کان و سه‌روه‌ریى یاسا و سه‌لاحییه‌تى ئۆرگانه‌کانى حیزب ده‌یده‌ن، به‌داخه‌وه‌ له‌دواى کۆنگره‌ى سێهه‌مى حیزبه‌وه‌ هیچ کات به‌قه‌ت ئێستا ته‌کڕه‌وى و سه‌ره‌ڕۆیى به‌سه‌ر حیزب‌دا زاڵ نه‌بووه‌. ئه‌مه‌ش پێش هه‌موو شتێک ده‌گه‌رَێته‌وه‌ سه‌رخۆپىَزۆرى وخۆبه‌میحوه‌رزانینى سه‌رۆکى قۆڵى ده‌سه‌ڵاتدارو، فه‌ردپه‌رستیى به‌ ئه‌نقه‌ست په‌ره‌پێدراو له‌ لایه‌ن ده‌وروبه‌ره‌که‌یه‌وه‌. ئه‌م خۆ به‌میحوه‌رزانین و خۆپه‌رستى و ته‌ک‌ڕه‌وىیه‌ى سه‌رۆکى قۆڵه‌که‌ به‌ راده‌یه‌که‌ که‌ نه‌ک هه‌ر بڕیار و پره‌نسیبه‌کان و ئۆرگانه‌ سه‌لاحیه‌تداره‌کانى حیزب، به‌ڵکوو حیزبى دیموکرات له‌ ته‌واوه‌تى خۆىدا،له‌ نێاز و مه‌به‌سته‌کانى خۆى، به‌بچووکتر ده‌زانێ. گێڕانه‌وه‌ى ئه‌م نموونه‌ تازه‌یه‌ ده‌توانێ راستیى ئه‌م قسه‌یه‌تان تاڕاده‌یه‌ک بۆ ده‌ربخا:له‌ یه‌کێک له‌ دانێشتنه‌کانى نێوان دوو هه‌یئه‌تى ئۆپۆزیسێۆنى نێوخۆ و باڵى ده‌سه‌ڵاتدار له‌ مانگى گه‌ڵاوێزى ئه‌م ساڵادا کاک مسته‌فا هیجرى کاتێک برێارشکێنى و ده‌سته‌به‌ندىیه‌کانى پێش کۆنگره‌ى 13ى خۆى له‌ پێناوى گه‌یشتنى به‌ پۆستى سکرتێرێى به‌ چاودا درایه‌وه‌، گوتى: "ئه‌گه‌ر مه‌به‌ست له‌ عه‌هد و په‌یمان شکێنى ئه‌وه‌یه‌ که‌ من به‌رامبه‌ر به‌ لیسته‌که‌ (گه‌ڵاڵه‌ى هه‌ڵبژاردن) کردم ئه‌وه‌ ده‌بێ بڵێم من عه‌هد و په‌یمانم له‌ به‌رامبه‌ر جووڵانه‌وه‌ هه‌یه‌. بۆ من زۆر ته‌بیعییه‌‌ ئه‌گه‌ر بزانم حیزبى دیموکرات به‌ که‌لک نایه‌ له‌ گه‌ڵی نه‌بم. عه‌هد و په‌یمانى من له‌گه‌ڵ میلله‌ته‌که‌م و جووڵانه‌وه‌که‌مه‌...".

بڕواننه ‌ئه‌م  روانێنه‌ خۆپه‌رستانه‌ و هه‌ر له‌و کاته‌دا "بانێک و دوو هه‌وایه‌"! ئه‌گه‌ر ئێستا که‌سانێک له‌نێو حیزب‌دا به‌رامبه‌ر به‌ بڕیارێکی جیاوازیدانه‌رانه‌ى ئۆرگانێک یا به‌رپرسێک ناڕه‌زایه‌تى ده‌رببڕن، ئه‌وه‌ به‌ برێارشکێن و بێ پره‌نسێب و دژى دیموکراسى ده‌ناسێندرێن. به‌ڵام ئه‌گه‌ر کاک مسته‌فا ته‌شخیسى‌دا که‌ برێارى به‌تێکراى ده‌نگى په‌سندکراوى کۆنگره‌ى 12 له‌ باره‌ى مه‌نع کردنى ده‌سته‌به‌ندیى نهێنی، یا گه‌ڵاڵه‌ى به‌تێکڕاى ده‌نگ په‌سندکراوى کۆمیته‌ى ناوه‌ندى بۆ هه‌ڵبژاردن، مه‌به‌سته‌کانى ئه‌و، دابێن ناکه‌ن و ئاره‌زووى بوونه‌وه‌ به‌ سکرتێرى لێ وه‌دوا ده‌خه‌ن، مافى ئه‌وه‌ى هه‌یه‌ برێاره‌که‌ و گه‌ڵاڵه‌که‌ هیچ، به‌ڵکوو حیزبى دیموکراتیشى بۆ وه‌لا بنێ. دیاره‌ به‌ پێچه‌وانه‌ى ئیدیعاى "ئاوڕدانه‌وه‌"، نوێنه‌رانى ئۆپۆزیسێۆن له‌م دانێشتنانه‌دا زۆر قسه‌ و وه‌ڵامى مه‌نێقییان بۆ سه‌رانى قۆڵى ده‌سه‌ڵاتدار هه‌بوو. یه‌ک له‌و قسانه‌ ئه‌وه‌بوو که‌ به‌ کاک مسته‌فا گوترا ئه‌گه‌ر جه‌نابت بۆت هه‌بێ هه‌ست به‌ "وحى" بکه‌ى و له‌پێناوى ئه‌م جۆره‌ رێساڵه‌ته‌ى به‌رهه‌مى زه‌ینى خۆت‌دا، هه‌قى ئه‌وه‌ت هه‌بێ برێارى کۆنگره‌ و کۆمیته‌ى ناوه‌ندى بخه‌یه‌ ژێر پێت، هیچ ماناى نێه‌ ئه‌و هه‌قه‌ بۆ خه‌ڵکى دیکه‌ نه‌بێ. تۆ ده‌بوایه‌ رێزت له‌ برێارى کۆنگره‌ و کۆمیته‌ى ناوه‌ندى گرتبا. به‌ڵام به‌داخه‌وه‌ چونکه‌ به‌رێوه‌بردنى له‌ به‌رژه‌وه‌ندى شه‌خسێت‌دا نه‌بوو، نه‌تکرد و ئێستا پێچه‌وانه‌که‌ى داوا ده‌که‌ى، ئه‌وێش له‌ حاڵێک‌دا که‌ ئۆرگانه‌کان زۆربه‌ى ئه‌و برێارانه‌ى ده‌یده‌ن له‌ به‌رژه‌وه‌ندى جه‌ناحى ده‌سه‌ڵاتدار دان.

بێ گۆمان له‌ دیوه‌خانى سه‌رۆک عه‌شیره‌ته‌کانێش‌دا، ئه‌گه‌ر سه‌رۆک عه‌شیره‌ت قسه‌یه‌کى واى کرد یا کارێکى واى ئه‌نجام‌دا که‌ به‌ زیانى گشتیى عه‌شیره‌ته‌که‌ى یا نه‌ته‌وه‌که‌ى ته‌واو ببوو، عه‌شیره‌ته‌که‌ بۆیان هه‌یه‌ سه‌رکۆنه‌ى بکه‌ن و داواى لێبکه‌ن هه‌ڵه‌که‌ى خۆى راست بکاته‌وه‌ و تووشى له‌مه‌ خراپتریان نه‌کا. به‌ڵام "له‌ ئه‌مڕۆ"ى حیزبى دیموکرات‌دا، سکرتێر بێ ئه‌وه‌ى حیسێبێک بۆ ده‌فته‌رى سێاسى بکا، نامه‌یه‌کى سه‌رانسه‌ر بێ حورمه‌تى به‌ گه‌لێ کورد،ته‌ئیید ده‌کاو به‌ خراپترێن شێوه‌‌ وه‌ڵامى ده‌داته‌وه‌. کاتێکێش ده‌نگى ناڕه‌زایه‌تى به‌دژى نێوه‌رۆکى ناسێاسى و جێگای داخى ئه‌م وه‌ڵامه‌ له‌نێوخۆ و ده‌ره‌وه‌ى حیزب به‌رزده‌بێته‌وه‌، نه‌ نووسه‌رى وه‌ڵامه‌که‌ ئاماده‌یه‌ له‌ بورجى عاجى خۆى دابه‌زێ و به‌جۆرێک ئه‌م هه‌ڵه‌یه‌ى خۆى راست بکاته‌وه‌، نه‌ که‌س له‌ "مه‌حره‌مان" و ده‌وروبه‌ره‌که‌ى ده‌وێرن یا ئیجازه‌ به‌خۆیان ده‌ده‌ن له‌سه‌ر ئه‌م هه‌ڵه‌یه‌، لێی بپرسنه‌وه‌. له‌مه‌ش سه‌یروسه‌مه‌ره‌تر ئه‌وه‌یه‌ به‌رێوه‌به‌رانى دیکه‌ى قۆڵى ده‌سه‌ڵاتدار که‌ له‌باره‌ى ئاغاى نه‌زمى ئه‌فشاره‌وه‌ پرسێاریان لێده‌کرێ، هیچى تێدا ناهێڵنه‌وه‌ و وه‌ک مه‌مانان باسى شووێنێست بوون و بێ رێزیى ناوبراو به‌ "مقدسات"ى نه‌ته‌وه‌ى کورد ده‌که‌ن، به‌ڵام که‌ ده‌چنه‌ سه‌ر وه‌ڵامى کاک مسته‌فا هیجرى به‌ نامه‌ى ئه‌و شووێنێسته‌، ده‌ڵێن کاک مسته‌فا باشترێن وه‌ڵامى داوه‌ته‌وه‌! ئێستا گیانى عه‌شایرى و دواکه‌وتووانه‌ به‌سه‌ر ئه‌م پێوه‌ندىیه‌ى قۆڵ و سه‌رۆکه‌که‌ىدا زاڵه‌ یا رێوشوێنه‌ دیموکراتیک و شارستانى و مۆدێرنه‌کان، با خوێنه‌ران خۆیان وه‌ڵام بده‌نه‌وه‌.

"ئاوڕدانه‌وه‌" که‌ ده‌چته‌ سه‌ر ره‌تدانه‌وه‌ى خاڵى حه‌وته‌مى نامه‌ى ئۆپۆزیسێۆنى نێوخۆ، دیسان قۆڵى پاوانخواز له‌ جێگای حیزب داده‌نێ و ده‌ڵێ حیزب باوه‌ڕى قووڵى به‌ خه‌بات و چاڵاکێى دوو توێژی لاوان و ژنان هه‌یه‌، "چۆن بێ لوتفیان له‌گه‌ڵ ده‌کا؟!" پاشان بۆ سه‌لماندنى قسه‌ى نووسه‌رانى، پشت به‌ فیلمى هه‌ڵگیراو له‌ کۆبوونه‌وه‌ى به‌رێوه‌به‌رێى گشتیى یه‌کێه‌تیى لاوان له‌ مانگى خه‌رمانان‌دا ده‌به‌ستێ، که‌ گوایه‌ له‌م کۆبوونه‌وه‌یه‌دا ده‌رکه‌وتوه‌ "به‌رپرسى لاوان و چه‌ند که‌سێکى نزیک به‌ ئه‌و، له‌ کاروباره‌کان‌دا که‌ند و کۆسپیان پێک هێناوه‌‌". ده‌رکه‌وتوه‌ که‌ "به‌رپرسى لاوان به‌ رێنوێنێى که‌سانێک له‌وانه‌ى ئه‌و 20 خاڵه‌یان ئیمزاکردوه‌ و له‌راستیدا به‌ ده‌ستێوه‌ردانى ئه‌و که‌مینه‌یه‌ى کادر و ئه‌ندامانى حیزب، گێره‌‌ و کێشه‌ له‌ ره‌وتى کاره‌کانى لاوان‌دا پێک هاتوه‌".

خۆزگه‌ نووسه‌رانى "ئاوڕدانه‌وه‌" و سێنارێۆنووسانى نێوحیزبى دیموکرات بۆ سه‌لماندنى ئه‌و تاوانانه‌ى ده‌یانده‌نه‌ پاڵا ئۆپۆزیسێۆنى نێوخۆى حیزب، له‌ جیاتى پشت به‌ستن به‌ فیلمى هه‌ڵگیراو، پشتیان به‌ راستی و به‌ڵگه‌ی بڕواپێکراو به‌ستبا. چونکه‌ وه‌ک بۆ خۆشیان ده‌زانن ئه‌م فیلمانه‌ى هه‌ر له‌ سێنارێۆکه‌یانه‌وه‌ تا ده‌ستنێشانکردنى ده‌رهێنه‌ر، ئه‌کته‌ره‌کان، فیلم هه‌ڵگران و دیارێکردنى کات و شوێنى ته‌سوێرکردنیان، هه‌مووى به‌ پێى نه‌خشه‌ و به‌رنامه‌ى خۆیان بووه‌، رووى زۆر مه‌جلیسانیان نێه‌. ئۆپۆزیسێۆنى نێوخۆ له‌ نامه‌ى 7ى گه‌ڵاوێزدا داواى له‌ قۆڵى ده‌سه‌ڵاتدار کردوه‌ بێ لوتفى له‌گه‌ڵ یه‌کێه‌تىیه‌کانى لاوان و ژنان نه‌که‌ن و واز له‌ کارشکێنى و ده‌ستێوه‌ردانى کاروباره‌کانیان بێنن. که‌چى سێنارێۆنووسانى قۆڵى پاوانخواز له‌ مانگى خه‌رمانان‌دا که‌وتوونه‌ خۆ فیلمێک بۆ به‌رپه‌رچدانه‌وه‌ى ئه‌م داوایه‌ى ئۆپۆزیسێۆن به‌رهه‌م بێنن، ئه‌وێش به‌هۆى کوڕى یه‌کێک له‌ نووسه‌رانى "ئاوڕدانه‌وه‌" که‌ چ هه‌ڵبژێرانى وه‌ک موشاوێرى به‌رێوه‌به‌رى له‌ دواى کۆنگره‌ى 3ى لاوان و چ هه‌ڵبژێرانى بۆ ئه‌ندامه‌تیى به‌رێوه‌به‌رىیه‌کانى پێشووى یه‌کێه‌تیى لاوان، به‌ڵگه‌ی جه‌ناحى ره‌فتار نه‌کردنى ئه‌و به‌رێوه‌به‌رێیانه‌ بووه‌. له‌ کۆنگره‌ى یه‌که‌مه‌وه‌ تا ئێستا، له‌ حاڵێک‌دا قۆڵى پاوانخواز هه‌موو جارێ هه‌وڵى ئه‌وه‌ى بووه‌ که‌سانى به‌ستراوه‌ به‌خۆى به‌سه‌ر به‌رێوه‌به‌رێى گشتیى یه‌کێه‌تیى لاوان‌دا زاڵ بکا و قه‌تیش سه‌رنه‌که‌وتوه‌، به‌ده‌نه‌ و به‌رێوه‌به‌رێى یه‌کێه‌تیى لاوان ئاگایانه‌ و به‌ هه‌ست به‌ به‌رپرسایه‌تى، ژماره‌یه‌کى به‌رچاو له‌وانى وه‌ک ئه‌ندامى به‌رێوه‌به‌رى و راوێژکاری به‌رێوه‌به‌رى هه‌ڵابژاردوه‌. ئه‌م نێازپاکىیه‌ى زۆرایه‌تیى لاوانى دیموکرات له‌ کاتێک‌دا بووه‌ که‌ ئه‌گه‌ر که‌مینه‌ى به‌ستراوه‌ به‌ قۆڵى پاوانخواز ده‌ستى رۆیشتبا، هیچ کات ئه‌مه‌ى نه‌ده‌کرد.

به‌ڵام سه‌رانى قۆڵى پاوانخواز له‌ دواى کۆنگره‌ى سێزده‌وه‌ برێاریان داوه‌ نه‌ک هه‌ر هه‌موو ئۆرگانه‌کانى حیزب، به‌ڵکوو رێکخراوه‌کانى لاوان و ژنانێش به‌ ته‌واوى بێننه‌ ژێر چۆکى خۆیان. کاتێک به‌ رێگاى جۆراوجۆردا نه‌یان‌توانى رێبه‌رایه‌تیى هه‌ڵبژێردراوى کۆنگره‌ بکه‌ن به‌ فه‌رمانبه‌رى بێ ئه‌م لا و ئه‌ولاى خۆیان، هه‌وڵیان‌دا به‌ بێ رێزدانان بۆ پێڕه‌وى نێوخۆ و برێار و په‌سندکراوه‌کانى کۆنگره‌ى یه‌کێه‌تیى لاوان و رێبه‌رێى هه‌ڵبژێردراوى کۆنگره‌، ناوه‌ند و به‌رێوه‌به‌رێى تایبه‌ت به‌ خۆیان له‌پێش‌دا له‌ ده‌ره‌وه‌ى وڵات پێک بێنن. شانبه‌شانى ئه‌مه‌ش به‌رپرس و به‌رێوه‌به‌رێى یه‌کێه‌تیى لاوان له‌ کوردستانیان خسته‌ژێرفشار که ‌یا ته‌سلیمى نێاز و مه‌به‌سته‌کانیان بن، یا چاوه‌ڕوانى  چاره‌نووسێکى وه‌ک چاره‌نووسى یه‌کێه‌تیى لاوان له‌ ئورووپابن.

چۆنێه‌تیى پێکهاتنى کۆنفرانسى لاوانى ئورووپا له‌ دانمارک (2005) و چۆنێه‌تیى به‌رێوه‌چوونى کۆنفرانسى یه‌کێه‌تیى لاوان له‌ سوئێد (ره‌زبه‌رى 2006) که‌ به‌ ئه‌نقه‌ست لاوانى سه‌ربه‌ قۆڵى ده‌سه‌ڵاتداریان بۆ بانگ کرابوو، ئه‌م راستییه‌ ده‌سه‌لمێنن که‌ سکرتێرى "گشتى"، به‌رپرسى نوێنه‌رایه‌تیى حیزب له‌ ده‌ره‌وه‌ى وڵات و قۆڵى ده‌سه‌ڵاتدار به‌گشتى ئاگایانه‌ و به‌ به‌رنامه‌ کاریان بۆ بێ سه‌ڵاحیه‌ت کردنى به‌رێوه‌به‌رێى هه‌ڵبژێردراوى کۆنگره‌ کردوه‌. فشارى سه‌رۆکى ئه‌م قۆڵه‌ بۆسه‌ر سکرتێرى یه‌کێه‌تیى لاوان و ده‌ستێوه‌ردانه‌کانى له‌ کاروبارى نێوخۆى ئه‌و رێکخراوه‌دا گه‌یشته‌ جێگایه‌ک که‌ بۆ سه‌پاندنى وێسته‌کانى خۆى به‌سه‌ر سکرتێر و به‌رێوه‌به‌رێى گشتىدا، له‌ ژووره‌که‌ى خۆى کۆبوونه‌وه‌ى پێ ده‌کردن و مه‌به‌سته‌کانى خۆى به‌ سکرتێرى یه‌کێه‌تیى لاوان دیکته‌ و ئیمزا ده‌کرد. به‌ ئه‌مرى سکرتارێا (سکرتێر) و ته‌نانه‌ت به‌ بێ ئاگادارێى به‌رپرسى کۆمیسێۆنى چاپه‌مه‌نى و به‌رپرسى سایتى "کوردستان میدیا"، بۆ ماوه‌ى نزیک به‌ دوو حه‌وتوو لینکى سایتى ناوه‌ندیى یه‌کێه‌تیى لاوانى دیموکرات له‌ سایتى "کوردستان میدیا" هه‌ر له‌ژێر ئه‌م ناوه‌دا کرایه‌ لینکى کۆمیته‌ى سوئێد(ى یه‌کێه‌تیى لاوانى سه‌ر به‌ قۆڵى خۆیان).دیاره‌ ماوه‌یه‌ک بۆ خه‌واندنه‌وه‌ى توڕه‌یى سه‌رچاوه‌گرتوو له‌م کاره‌،قبوولیان کرد شته‌که‌ وه‌ک هه‌وه‌لێی لێ بکرێته‌وه‌.به‌ڵام ئه‌وه‌ بۆ چه‌ند حه‌وتوو ده‌چىَ ئه‌م کاره‌یان دووپات کردۆته‌وه‌!

سکرتێر و زۆرێنه‌ى رێبه‌رێى حیزبى دیموکرات ده‌یانه‌وێ له‌ پاوانخوازى و خۆسه‌پێنىدا، نه‌ک له‌ دیموکراتبوون و رێزگرتن له‌ پره‌نسێبه‌ له‌مێژینه‌کانى حیزبى دیموکرات‌دا، ببن به‌ سه‌رمه‌شق بۆ لاوانى دیموکرات. سه‌رنج بده‌نه‌ ئه‌م ره‌فتاره‌ و له‌گه‌ڵ ئیدیعاکانیان له‌باره‌ى نوێخوازى و جه‌وانگه‌رایى و خه‌باتى سه‌رده‌میانه‌ به‌راوردیان بکه‌ن. له‌ ره‌زبه‌رى ئه‌مساڵ‌دا له‌ سوئید که‌سانى به‌ستراوه‌ به‌ خۆیان له‌ کۆمیته‌ى حیزبى و یه‌کێه‌تیى لاوان‌دا ده‌نگ دا تا کۆبوونه‌وه‌یه‌کى خۆمانه‌ و به‌بێ به‌شدارێى زۆربه‌ى ئه‌و ئه‌ندامانه‌ى به‌ نامه‌حره‌میان ده‌زانى، پێک بێنن و به‌رێوه‌به‌رىیه‌کى به‌ دڵى قۆڵى ده‌سه‌ڵاتدار بێننه‌ سه‌ر کار و ته‌نانه‌ت له‌ نێگابانه‌کانى به‌رده‌رگا بۆ پێشگیرى له‌ هاتنى ئه‌ندامانى نامه‌حره‌م و میوانانى نه‌خوازراو که‌لکیان وه‌رگرت. به‌ڵام کاتێک کۆنفرانسێکى یه‌کێه‌تیى لاوان له‌ نۆروێژ به‌ موافه‌قه‌تى به‌رێوه‌به‌رى گشتیى یه‌کێه‌تیى لاوان، پێک هات و بانگه‌واز کرابوو هه‌موو ڵایه‌ک تێىدا به‌شدار بن، قۆڵى زۆرێنه‌ى حیزب نه‌ک هه‌ر نه‌یهێشت هه‌موو لا تێىدا به‌شدار بن، به‌ڵکوو به‌رێوه‌به‌ران و ته‌نانه‌ت میوانانى حیزبی ئه‌م کۆنفرانسه‌شى سزادا. له‌ نۆروێژ ئه‌ندامى به‌رێوه‌به‌رێى گشتیى یه‌کێه‌تیى لاوان و هه‌ڵبژێراوى کۆنگره‌، له‌سه‌ر پێکهێنانی کۆنفرانسى رێکخراوه‌که‌ى خۆى که‌ موافه‌قه‌تى به‌رێوه‌به‌رێى گشتیشى له‌سه‌ر بووه‌، له‌ حیزب ده‌رده‌کرێ، به‌ڵام له‌ فینڵاند هاورێیه‌کی حیزبى که‌ قه‌ت ئه‌ندامى یه‌کێه‌تیى لاوانێش نه‌بووه‌، پێى ده‌سپێردرێ کۆنفرانسى یه‌کێه‌تیى لاوان به‌ بێ موافه‌قه‌تى به‌رێوه‌به‌رێى گشتى و ته‌نانه‌ت به‌ بێ به‌شدارێى به‌رپرس و زۆربه‌ى ئه‌ندامانى کۆمیته‌ى به‌رێوه‌به‌رێىیه‌کێه‌تیى لاوان له‌و وڵاته‌ پێک بێنێ!

      زۆرێنه‌ى رێبه‌رێى ئه‌مڕۆى حیزبى دیموکرات به‌م کرده‌وه‌ و ره‌فتارانه‌ى بێجگه‌ له‌ خۆسه‌پێنى و جیاوازیدانان ده‌توانێ چ شتێکى دیکه‌ فێری ئه‌و لاوانه‌ بکا که‌ له‌ ده‌ورى یه‌کێه‌تیى لاوانى دیموکراتى کوردستان کۆ بوونه‌وه‌؟ دیاره‌ سه‌رۆکى پاوانخوازان و ئه‌و چه‌ند که‌سه‌ى له‌گه‌ڵ ئه‌ودا برێارى یه‌کڵاکردنه‌وه‌ى حیسێبى خۆیان له‌گه‌ڵ یه‌کێه‌تیى لاوانى دیموکراتیان داوه‌ و که‌وتوونه‌ ته‌مبێکردن و تۆڵه‌ستاندنه‌وه‌ له‌ پارێزه‌رانى سه‌ربه‌خۆیى ته‌شکێڵاتیى ئه‌و رێکخراوه‌یه‌، بۆخۆشیان ده‌زانن ئه‌وه‌ى له‌و پێوه‌ندىیه‌دا کردوویانه‌ و ده‌یکه‌ن له‌گه‌ڵ هیچ ئوسوولێک‌دا ناگونجێ، بۆیه‌ هه‌تا ئێستاش نه‌یانوێراوه‌ به‌ ره‌سمى و راشکاوى برێاره‌کانى خۆیان رابگه‌یه‌نن. بۆ وێنه‌ سکرتێرى ئێستاى یه‌کێه‌تیى لاوانیان له‌ کۆبوونه‌وه‌یه‌کى چه‌ند که‌سى سه‌رانى قۆڵدا، له‌و پۆسته‌ لابردوه‌، به‌ڵام پاش تێپه‌رێنى زیاتر له‌ مانگێک هێشتا به‌خۆیان نه‌گوتوه‌! یه‌کێک له‌ خۆشیان که‌ ئه‌ندامى ده‌فته‌رى سیاسی حیزبه‌، کردووه‌ به‌ چاوه‌دێر به‌ سه‌ر به‌ به‌رێوه‌به‌رێى گشتیى یه‌کێه‌تى لاوان‌دا، دیاره‌ نه‌ک بۆ راگوێزتنى لوتفى هه‌رچى زیاترى ئه‌م قۆڵه‌ بۆ نێو یه‌کێه‌تیى لاوان، به‌ڵکوو بۆ زاڵکردنى ئۆتۆرێته‌ى پاوانخوازان به‌سه‌ر ئه‌م رێکخراوه‌دا. روون نێه‌ ئه‌و به‌رێزانه‌ که‌ ئه‌وه‌نده‌ لافى پاراستنى ئوسوول و پره‌نسێبه‌کان لێده‌ده‌ن به‌پێى کام ئه‌سل و پره‌نسێب رێگه‌ به‌ خۆیان ده‌ده‌ن ئه‌ندامان و به‌رپرسانى یه‌کێه‌تیى لاوان سزا بده‌ن و ئه‌ندامى حیزبى سه‌باره‌ت به‌ به‌شدارى له‌ کۆنفرانسى یه‌کێه‌تیى لاوان له‌ حیزب ده‌ربکه‌ن. به‌رپرسى نوێنه‌رایه‌تیى حیزب له‌ ده‌ره‌وه‌ى وڵات یا ئه‌ندامانى ده‌فته‌رى سیاسی سه‌ربه‌م قۆڵه‌ چ نیازێکى خێریان هه‌یه‌ که‌ به‌ جیا و به‌تایبه‌تى له‌گه‌ڵ ئه‌ندامانى به‌رێوه‌به‌رێى گشتى پێوه‌ندى ده‌گرن و داواى لابردن و هێنانه‌‌ سه‌رکارى ئه‌م و ئه‌ویان لێده‌که‌ن و له‌م پێوه‌ندىیه‌دا به‌ڵێنی جۆراوجۆریان پێ ده‌ده‌ن؟ ئه‌مانه‌ لوتف باراندن به‌سه‌ر یه‌کێه‌تیى لاوان‌دان یا ده‌ستێوه‌ردان به‌ مه‌به‌ستى داگیرکردنى سه‌نگه‌ره‌ له‌گیران نه‌هاتووه‌کان به‌ هه‌رنرخێک؟!

نووسه‌رانى "ئاوڕدانه‌وه‌" به‌وهۆیه‌وه‌ که‌ نه‌ نێازى داننان به‌ راستییه‌کانیان هه‌یه‌ و نه‌ به‌ڵگه‌‌یه‌کى قایمیان بۆ ره‌تکردنه‌وه‌ى داواکانى ئۆپۆزیسێۆنى نێوخۆ هه‌یه‌، زۆر زوو ده‌که‌ونه‌ ده‌سته‌وه‌ستانى و به‌ تاوانبارکردنى ئۆپۆزیسێۆن به‌ چه‌واشه‌کارى، یا پازدان به‌سه‌ر مه‌سه‌له‌که‌دا، یان پتر له‌سه‌ر نه‌ڕۆیشتن له‌به‌ر مه‌سله‌حه‌تى حیزبى، خۆیان ده‌رباز ده‌که‌ن. بۆ وێنه‌ به‌سه‌ر خاڵى 8ى نامه‌ى ئۆپۆزیسێۆن‌دا بازیان‌داوه‌ که‌ ده‌ڵێ "به‌ روونى دیاره‌ که‌ کارى ته‌شکێڵاتى له‌گه‌ڵ هاورێیانى نێوخۆى وڵات و دنێاى ده‌ره‌وه‌ش که‌وتۆته‌ ژێر ته‌ئسێرى بێروباوه‌ڕى جه‌ناحى." ئه‌مه‌ راستییه‌که‌ و ناتوانن حاشاى لێبکه‌ن. ئه‌وان ده‌یانه‌وێ ته‌شکێڵاتى حیزبێش له‌ پاوانى خۆیان‌دا بێ، ئه‌ندامانى حیزب ته‌نیا ئه‌وان ببێنن و قسه‌ له‌وان ببێسن و بێروڕا و بۆچوونى لایه‌نى به‌رامبه‌ریان گوێ لێ نه‌بێ، تا ئه‌و شتانه‌ى له‌ غه‌یابى لایه‌نى به‌رامبه‌ر و له‌ دژى ئه‌وان پێیان گوتوون، سپى نه‌کرێنه‌وه‌. شتێکى سروشتىیه‌ مه‌به‌ستیان له‌ پاوانکردنى ئه‌م بواره‌ش ئه‌وه‌یه‌، هه‌ر که‌س له‌ خزمه‌ت مه‌به‌سته‌ جه‌ناحىیه‌کانیان‌دا نه‌بوو، با له‌ ته‌شکێڵاتى حیزب‌دا زۆرێش چاڵاک بێ، بێخه‌نه‌ په‌راوێز. که‌سانێکێش که‌ بۆ مه‌به‌سته‌ جه‌ناحىیه‌کانیان هه‌وڵ ده‌ده‌ن، مه‌یدانى پتر و ئیمتیازى زیاتریان بده‌نێ. بڵاوکردنه‌وه‌ى "ئاوڕدانه‌وه‌یه‌ک له‌ گرفتى نێوخۆیى حیزبى دیموکرات" له‌پێشدا له‌ نێو ته‌شکێڵاتى نهێنی حیزب‌دا و بڵاوکردنه‌وه‌ى زۆر ده‌نگۆ و شتى ناراستی دیکه‌ لاى ئه‌ندامانى حیزب له‌دژى به‌رێوه‌به‌رانى ئۆپۆزیسێۆنى نێوخۆ، ده‌رى ده‌خا که‌ سه‌رانى ئه‌و قۆڵه‌، ته‌شکێڵاتى حیزبێش بۆ به‌ره‌وپێشبردنى مه‌به‌سته‌ جه‌ناحىیه‌کانیان به‌کار دێنن. جیاوازیدانانى به‌ ئاشکراشیان له‌ نێوان ئه‌و ئه‌ندامه‌ نهێنییانه‌ى تووشى راکردن له‌ ئێران و گیرسانه‌وه‌ له‌ هه‌رێمى کوردستانى عێراق ده‌بن، به‌ڵگه‌‌یه‌کى دیکه‌یه‌ بۆ سه‌لماندنى راستیى قسه‌ى ئێمه‌‌. ئه‌وانه‌ که‌ گومانى نزیکى له‌ ئۆپۆزیسێۆنى نێوخۆیان لێده‌کرێ، ماڵیان پێنادرێ، به‌ڵام بۆ که‌سانێک که‌ له‌ خۆیان به‌ نزیکى بزانن، ده‌ستبه‌جێ خه‌میان لێده‌خۆن. نموونه‌ له‌باره‌ى جیاوازیدانان له‌ نێوان ئه‌و دوو ده‌سته‌یه‌ له‌ ئه‌ندامان یه‌کجار زۆرن که‌ به‌وه‌نده‌ قه‌ناعه‌ت ده‌که‌ین.

سه‌باره‌ت به‌ خاڵى پێوه‌ندیدار به‌ بابه‌تى ته‌له‌وێزیۆنێش، "ئاوڕدانه‌وه‌" بێجگه‌ له‌ تاوانبارکردنى ئۆپۆزیسێۆن به‌ شتى بێ بنه‌ما و چه‌واشه‌کارى و،" خۆبواردن له‌ هه‌رقسه‌یه‌ک له‌به‌ر مه‌سڵه‌حه‌تى حیزبى"، هیچى دیکه‌ى پێ نێه‌. یه‌ک له‌و تاوانانه‌ى له‌ زۆر بۆنه‌دا داویانه‌ته‌ پاڵ لایه‌نگرانى ئۆپۆزیسێۆنى نێوخۆ ئه‌وه‌یه‌ که‌ راپۆرتیان له‌ کارمه‌ندانى سه‌ر به‌ تیشک تی ڤی داوه‌ که‌ ئه‌م ته‌له‌وێزیۆنه‌ هى حیزبى دیموکراته‌. سه‌رانى ئه‌م قۆڵه‌ بۆخۆیان وه‌خت و بێوه‌خت و له‌ راگه‌یه‌نه‌ گشتىیه‌کان‌دا، تیشک تی ڤی نه‌ک  وه‌ک به‌رهه‌مى هه‌وڵى چه‌ندین ساڵه‌ى هه‌موو حیزبى دیموکرات، به‌ڵکوو وه‌ک ده‌سکه‌وتێکى ئه‌م قۆڵه‌ ده‌ناسێنن و ده‌یانه‌وێ له‌ ئاست هه‌موو هه‌ڵه‌ و کرده‌وه‌ زیانباره‌کانى دوو ساڵ و نێوى رابردوودا، به‌ رووى خۆیانه‌وه‌ى بگرن. واته‌ بۆخۆیان له‌ هه‌موو که‌س زیاتر ئه‌م قسه‌یان بڵاوکردۆته‌وه‌ که‌ ئه‌م ته‌له‌وێزیۆنه‌ هى حیزبى دیموکرات و راست هى ئه‌وانێشه‌، به‌ڵام ئه‌گه‌رلایه‌نگرانى ئۆپۆزیسێۆن بڵێن ئه‌م ته‌له‌وێزیۆنه‌ هى حیزبى دیموکراته‌ به‌ تاوان له‌سه‌ریان ده‌نووسن.

خۆبواردنى ئه‌وان له‌ چوونه‌ نێو داواکه‌ى ئۆپۆزیسێۆنى نێوخۆ له‌ باره‌ى ته‌له‌وێزیۆنه‌وه‌، بێ هۆ نێه‌. ئه‌وان ده‌زانن ئه‌گه‌ر قسه‌ى لێ نه‌که‌ن و ده‌ستى لێ نه‌ده‌ن باشتره‌. چونکه‌ شته‌که‌ له‌وه‌ ده‌رچووه‌ بشاردرێته‌وه‌. یه‌کێک له‌ نووسه‌رانى "ئاوڕدانه‌وه‌" که‌ به‌رواڵه‌ت به‌رپرسى "تیشک تی ڤی"یه‌، بۆ خۆى دانى به‌وه‌ داناوه‌ که‌ کاک شاهۆ جوابى ناداته‌وه‌ و چى خۆى پێىخۆش بێ ده‌یکا. سه‌رۆکى ئه‌م قۆڵه‌ش کاتێک له‌ دواى سه‌فه‌رى ئه‌مساڵى پرسێارى لێکرا بۆچى له‌ حاڵێکدا هه‌م له‌نێوخۆ و هه‌م له‌ ده‌ره‌وه‌ى وڵات یادى 17 ساڵه‌ى تیرۆرى دوکتور قاسملوو به‌ شێوه‌‌یه‌کى باش کرایه‌وه‌، هیچ په‌یامێکت له‌ رێگاى تیشک تی ڤییه‌وه‌ به‌م بۆنه‌یه‌وه‌ نه‌نارد، گوتى من په‌یامم نارد به‌ڵام نازانم بۆچى ته‌له‌وێزیۆنى تیشک بڵاوى نه‌کرده‌وه‌. ئه‌گه‌ر ئه‌م قسه‌یه‌ راست بێ ماناى ئه‌وه‌یه‌ کاک شاهۆ، نه‌ک هه‌ر وه‌ڵامى "جێگرى سکرتێر"، به‌ڵکوو وه‌ڵامى خودى سکرتێرێش ناداته‌وه‌. دیاره‌ ئه‌گه‌رێکى دیکه‌ش ئه‌وه‌یه‌ که‌ په‌یامه‌که‌ شیاوى بڵاوبوونه‌وه‌ نه‌بووبێ، جا له‌به‌ر چى؟ نازانێن.

قسه‌ى ئۆپۆزیسێۆن ئه‌وه‌یه‌ که‌ "له‌ دانانى پێرسۆنێلێ ته‌له‌وێزیۆنێش‌دا وه‌ک هه‌موو شته‌کانى دیکه‌ گیانى جه‌ناحى و جه‌ناحبازى زاڵه‌، هه‌ر بۆیه‌ پێوێسته‌ سه‌رپه‌رستىیه‌کى کارزان و لێوه‌شاوه‌‌ و هاوبه‌ش بۆ کارى ته‌له‌وێزیۆن دابنرێ". به‌ڵام ده‌بێ بگوترێ وه‌ک له‌م مانگانه‌ى دواییدا دیتراوه‌ ته‌نانه‌ت له‌ بڵاوکردنه‌وه‌ى هێندێک له‌ به‌رنامه‌کانێش‌دا بۆ وێنه‌ ئه‌و وتووێژانه‌ى له‌گه‌ڵ هاورێیانى حیزبى کراون، گیانى جه‌ناحى زاڵه‌. زۆر له‌ بێنه‌ران بۆ خۆیان هه‌ستیان به‌ زاڵبوونى ئه‌و گیانه‌ کردوه‌ و ره‌خنه‌ و سه‌رنجى خۆیان به‌ رێبه‌رێى حیزب راگه‌یاندوه‌.

ئه‌گه‌ر "ئاوڕدانه‌وه‌" به‌ ئه‌نقه‌ست و له‌به‌ر پێ نه‌بوونى وه‌ڵامێک که‌ رووى مه‌جلیسى خوێنه‌رانى هه‌بێ، له‌ چوونه‌ سه‌ر هێندێک خاڵا خۆى بواردوه‌، ئێمه‌‌ به‌و بۆنه‌یه‌وه‌ که‌ له‌ به‌شه‌کانى دیکه‌ى ئه‌م وه‌ڵامه‌دا، که‌م و زۆر ئاماژه‌مان به‌ نێوه‌رۆکى ئه‌و خاڵانه‌ کردوه‌ (وه‌ک خاڵى 10 و خاڵى 11)، خۆ له‌ دووپاتکردنه‌وه‌یان ده‌پارێزین. به‌ڵام سه‌باره‌ت به‌ خاڵى 12، هه‌ر ئه‌وه‌نده‌ به‌ نووسه‌رانى "ئاوڕدانه‌وه‌" ده‌ڵێین ئه‌گه‌ر راست ده‌که‌ن فه‌رموون ئه‌و نموونه‌ زۆرانه‌ ناوبه‌رن که‌ کارتان به‌ که‌سانێک سپاردوه‌ و وه‌ریان نه‌گرتوه‌. بۆ خوێنه‌رانێشى روون بکه‌نه‌وه‌ ئه‌و کاره‌ى به‌و که‌سانه‌تان سپاردوون و وه‌ریان نه‌گرتوون، چین؟ و ئه‌و کارانه‌ش که‌ به‌وان بوون و لێتان وه‌رگرتوونه‌وه‌ کامانه‌ن؟ با روون بێته‌وه‌ "کارى شیاو"ى ته‌شخیس دراو له‌ لایه‌ن ئۆرگانى سه‌ڵاحییه‌تدار که‌ ئێوه‌‌ کردووتانه‌ به‌ وێردى زارى خۆتان، تا چ راده‌یه‌ک له‌گه‌ڵا توانا و ئه‌زموون و لێهاتووێى و که‌سایه‌تیى بێکارکراوه‌کان گونجاون؟

سه‌باره‌ت به‌ خاڵى 13 که‌ "ئاوڕدانه‌وه‌" ده‌ڵێ وشه‌به‌وشه‌ى درۆ و چه‌واشه‌کارى و عه‌وامفه‌رێبىیه‌ و هیچى دیکه‌، ئێمه‌‌ نه‌ک نووسه‌رانى "ئاوڕدانه‌وه‌"، به‌ڵکوو هه‌موو هاورێیه‌کی حیزبی راستگۆ و به‌وێژدان به‌ شاهید ده‌گرێن که‌ ئایانێازى ئه‌م قۆڵه‌ له‌ دابه‌شینى کار و پۆسته‌کان و ده‌ستێوه‌ردانى ئایین نامه‌کان‌دا بێجگه‌ له‌ "به‌ده‌سته‌وه‌ گرتنى ناسروشتیى زۆرایه‌تیى زۆربه‌ى ئۆرگانه‌کان و جێگیرکردنى مۆره‌کانى خۆیان له‌ کومیته‌ و کومیسێۆنه‌کان‌دا و گۆرێنى ئایین نامه‌کان به‌جۆرێک که‌ له‌گه‌ڵا ئه‌م مه‌به‌ستانه‌دا بگونجێن، شتێکى دیکه‌ بووه‌. ئه‌وان ئایین نامه‌ى هه‌ر ئۆرگانێکیان به‌و دیده‌وه‌ که‌ ئه‌گه‌ر که‌سانێکى له‌ جه‌ناحى به‌رامبه‌رى لێیه‌، بێخه‌نه‌ په‌راوێز و، برێاردان به‌ده‌ست خۆیان بێ، ئاماده‌کردوه‌ و به‌و هۆیه‌وه‌ش که‌ زۆرێنه‌ى کومیته‌ى ناوه‌ندییان پێ بووه‌، چى له‌ به‌رژه‌وه‌ندیان ‌دا بووه‌، په‌سندیان کردوه‌. ئێمه‌‌ ته‌نیا سکرتارێا به‌ نموونه‌ دێنینه‌وه‌‌ که‌ پێشتر چۆن بووه‌ و ئێستا چى به‌سه‌ر هاتوه‌ (هه‌ر بۆ ئه‌وه‌ى نامه‌حره‌مى لێ نه‌مێنێ، یا به‌ رواڵه‌ت نامه‌حره‌مى لێبێ به‌ڵام به‌کرده‌وه‌ هیچ کاره‌ بێ). جا کاتێک وه‌زعى شوێنێک که‌ سکرتێر کارى لێ ده‌کا و ئیددیعاش ده‌کا سه‌ر به‌ هیچ قۆڵێک نێه‌، ئه‌مه‌ بێ، وه‌زعى ئۆرگانه‌کانى دیکه‌ روونه‌.

نووسه‌رانى "ئاوڕدانه‌وه‌" کاتێک چوونه‌ته‌ سه‌ر خاڵى 14، له‌ بێریان نه‌بووه‌ پرسێارێک له‌ خۆیان بکه‌ن و بڵێن باشه‌ ئێمه‌‌ سه‌ره‌ڕاى ئه‌و هه‌موو به‌خۆ هه‌ڵگوتنه‌مان له‌ باره‌ى مافخوازى و ئازادیخوازى و دڵسۆزى بۆ خه‌باتى ئه‌مڕۆى نه‌ته‌وه‌ى کورد، له‌و جێگایه‌‌ که‌ باس له‌ خاکى باب و باپێرانمان و بێ رێزى به‌ ئاڵا و نه‌خشه‌ى کوردستان و سمکۆ و قازى محه‌ممه‌د دێته‌گۆرێ "کام تا ڵام" زمانمان، ببوورن قه‌ڵه‌ممان نه‌گه‌ڕاوه‌ و یه‌ک حه‌رفیشمان له‌ باره‌ى خاڵى 13ى نامه‌ى ئۆپۆزیسێۆن نه‌هێناوه‌‌ته‌ سه‌ر کاغه‌ز. ئه‌دى بۆچى ئاوا به‌ درێژی له‌سه‌ر خاڵى 14 که‌ هه‌مووى چوار دێره‌‌ بڕۆین؟!

"ئاوڕدانه‌وه‌" باسکردنى ئۆپۆزیسێۆنى نێوخۆ له‌ "ته‌وازون" به‌ نێشانه‌یه‌کى دیکه‌ى بێ باوه‌رێى به‌ دیموکراسى و هه‌ڵبژاردن"ناو ده‌با. ئه‌گه‌ر ئه‌م قسه‌یه‌ راست بێ ئه‌وان به‌رچاوترێن نموونه‌ى بێ باوه‌ڕى به‌ دیموکراسێ و هه‌ڵبژاردنن، چونکه‌ هه‌ر له‌ کۆنگره‌ى ده‌یه‌مه‌وه‌ تا کۆنگره‌ى 13، له‌ ئاکامى هه‌ڵبژاردنه‌کان، به‌و هۆیه‌وه‌ که‌ بۆخۆیان زۆرێنه‌ نه‌بوون، ناڕازى بوون و وه‌زاڵه‌هاتبوون. ئه‌وه‌ له‌ حاڵێکدا بوو که‌ له‌ هه‌ڵبژاردنى کۆنگره‌کانى پێشتردا جیاوازیى رێژه‌ی ئه‌ندامانى هه‌ر دوو لا له‌ رێبه‌رىدا به‌ تایبه‌تى له‌ ئاستى ئه‌ندامانى ئه‌سلیى کۆمیته‌ى ناوه‌ندىدا یه‌کجار که‌م بوو. زۆر له‌ پۆسته‌ گرنگ و کلیدىیه‌کانێش ده‌درا به‌ که‌مینه‌ى رێبه‌رى. ره‌نگه‌ هیچ شتێک وه‌ک ئه‌م داوایه‌ى ئۆپۆزیسێۆنى نێوخۆ، ئیدیعاکانى ئه‌وان به‌تاڵ نه‌کاته‌وه‌ که‌ "ئێمه‌‌ ئاماده‌ین زۆرێنه‌ى ئێستاى رێبه‌رى، جێگای پێشووى خۆى له‌ رێبه‌رێى هه‌ڵبژێردراوى یه‌کێک له‌ کۆنگره‌کانى 10 و 11 و 12دا به‌ هه‌موو شتێکه‌وه‌ بدا به‌ که‌مینه‌ى ئێستاى رێبه‌رى". بۆچى به‌ڵاى ئه‌م پێشنێاره‌دا ناچن و خۆى لێ که‌ڕ ده‌که‌ن؟ چونکه‌ خۆیان ده‌ناسن و ده‌زانن ئه‌مه‌ له‌گه‌ڵ ستراتیژیی ئه‌وان که‌ پاوانکردنى حیزبى دیموکراته‌، ناگونجێ.

"ئاوڕدانه‌وه‌" پاشان چۆته‌ نێو شیرێنکارێى ئه‌ده‌بى و که‌ڵامى و، ته‌ئوێلێکی به‌رواڵه‌ت نێشتمانپه‌روه‌رانه‌ و خه‌باتگێڕانه‌ به‌ڵام له‌ راستیدا هه‌ڵپه‌رستانه‌ى له‌ زاراوه‌ى "حێه‌ اسد" (به‌شى شێر) کردوه‌ و ده‌ڵێ "ئایا بوون به‌ ئه‌ندامى رێبه‌رى له‌م حیزبه‌دا شانازیى مێژووێى و نه‌ته‌وه‌یى و وه‌ئه‌ستۆگرتنى ئه‌رکێکى پێرۆز و دژواره‌ یان به‌ڕاى ئه‌و هاورێیانه‌ که‌ڵاکى قوربانىیه‌ که‌ ده‌ڵێن به‌شى شێر بۆ فڵان دانراوه‌!!"  ئه‌م لێکدانه‌وه‌یه‌ نێشانه‌ى بێگانه‌یى له‌ گه‌ڵ ئه‌ده‌ب و واتاناسى و به‌ کاربردنى زاراوه‌ ناسراوه‌کانه‌.داهێنه‌رى ئه‌م ته‌ئوێله‌ عه‌نتیکه‌یه‌ کاک ته‌یموور مسته‌فایىیه‌. له‌و به‌رێزه‌ ده‌پرسێن ئه‌گه‌ر ئه‌ندامه‌تى له‌ رێبه‌رێى حیزبى دیموکرات‌دا شانازیى مێژووێى و وه‌ئه‌ستۆگرتنى ئه‌رکێکى پێرۆزه‌ که‌ بێگومان وایه‌، جه‌نابت و هاوقۆڵانت بۆچى نه‌تانوێست به‌ رێگاى ساڵم و به‌دوور له‌ ده‌سته‌به‌ندیى نهێنی وباندبازى پێى بگه‌ن؟ بۆچى ده‌سته‌به‌ندیى نهێنی و گه‌له‌کۆمه‌کێتان کرد بۆ ئه‌وه‌ى که‌سانێکى دیار له‌م "شانازىیه‌ مێژووێىیه‌ و وه‌ئه‌ستۆگرتنى ئه‌رکى پێرۆز" بێ به‌ش بکه‌ن؟ هۆى چیه‌ ئه‌گه‌ر که‌سانێکى دیکه‌ له‌ بێبه‌شکرانى به‌ ئه‌نقه‌ست له‌م شانازىیه‌ مێژووێىیه‌ ناڕازى بوون و داوایان کرد له‌ لێهاتووێى و توانایان که‌لک وه‌ربگیرێ و گوتیان با پاشماوه‌ى راوێژکارانی کۆمیته‌ى ناوه‌ندى له‌ لایه‌نى به‌رامبه‌رتان بن، ئه‌وکات ئه‌م "شانازىیه‌ مێژووىیه‌" و ئه‌و "وه‌ئه‌ستۆگرتنه‌ى ئه‌رکى پێرۆز" ده‌بێ به‌ کورسى و مه‌قام و به‌رامبه‌ره‌کانتان به‌ کورسى ته‌ڵه‌ب و مه‌قامخواز تاوانبار ده‌که‌ن؟ بۆچى ناوکه‌ى سه‌ره‌کێى زه‌وتکه‌رانى ئه‌و "شانازىیه‌ مێژووێى" و ئه‌و "ئه‌رکه‌ پێرۆز"انه‌ تاقمێکی دیارێکراو له‌ خاڵۆزا و پوورزا و ئاواڵزاوا و ئامۆزاکانن؟!

له‌باره‌ى ئه‌و به‌نده‌ له‌ خاڵى 14 که‌ ده‌ڵێ "جێی خاڵی کاک خالید عه‌زیزى له‌ کۆمیته‌ى ناوه‌ندى‌دا بدرێ به‌ ئۆپۆزیسێۆن و دیارێکردنى نه‌فه‌ره‌که‌ش به‌ خۆى بسپێردرێ"، "ئاوڕدانه‌وه‌" ده‌ڵێ "ئه‌وه‌ جێی خاڵی کاک خالید نێه‌ و کورسىیه‌کىئیرسى نێه‌". جارێ هه‌ر به‌بێ ئه‌وه‌ى زۆر دوور که‌وێنه‌وه‌ نووسه‌رانى "ئاوڕدانه‌وه‌" ئه‌و شته‌ى بۆخۆیان به‌ "وه‌ئه‌ستۆگرتنى ئه‌رکى پێرۆز" و "شانازیى مێژووێى"یان داده‌نا، که‌ یه‌کى دیکه‌ داواى کرد کردیان به‌ کورسى!

به‌ڵام سه‌یره‌که‌ هه‌ر له‌وه‌دا نێه‌. هه‌ر ئه‌و به‌رێزانه‌ ئه‌م رسته‌یان بۆ که‌سانى ساوێلکه‌ به‌ جۆرێکى سه‌یرتر له‌م ته‌ئوێله‌ى بۆ "به‌شى شێر" کردوویانه‌، لێکداوه‌ته‌وه‌ و گوتوویانه‌ ئه‌وانه‌ داواده‌که‌ن ئێستا که‌ کاک خالید خۆى ئیستیعفاى داوه‌، هه‌ر بۆخۆى که‌سێکى دیکه‌ بکا به‌ ئه‌ندامى کۆمیته‌ى ناوه‌ندى له‌ جیاتى خۆى! دیاره‌ ئه‌و لێکدانه‌وه‌یان به‌ ئه‌نقه‌ست بڵاوکردۆته‌وه‌،ئه‌گینا ده‌زانن مه‌به‌ست ئه‌وه‌یه‌ هه‌روا که‌ هه‌ڵبژێرانى دوو که‌س (هه‌ر یه‌که‌ى له‌ جه‌ناحێک) له‌ ده‌ره‌وه‌ى وڵات به‌ ئه‌ندامێکی کۆمیته‌ى ناوه‌ندى له‌ پلینۆمى پێنجه‌م به‌رهه‌مى رێککه‌وتنى ئه‌و دوو جه‌ناحه‌ بوو، ئێستا که‌ کاک خالیدیان ناچار به‌ ئیستیعفا کردوه‌، ئه‌ندامێکی دیکه‌ى کۆمیته‌ى ناوه‌ندى له‌ ده‌ره‌وه‌ى وڵات، له‌ ئۆپۆزیسێۆن هه‌ڵاببژێردرێ.

له‌باره‌ى ئیستیعفاى کاک خالید عه‌زیزىیه‌وه‌ش ده‌بێ بگوترێ، ملدانى زۆرێنه‌ى رێبه‌رى بۆ هه‌ڵبژاردنى ناوبراو به‌ ئه‌ندامى کۆمیته‌ى ناوه‌ندى له‌ پلینۆمىشه‌شه‌م دا، له‌ رووى ناچارىیه‌وه‌ و بۆ هێورکردنه‌وه‌ى ئه‌و ناڕه‌زایه‌تىیه‌ بوو که‌ ئه‌وکات به‌ره‌و رووى سه‌رانى ئه‌م قۆڵه‌ ببۆوه‌. هه‌ر بۆیه‌ هێشتا پلینۆمى دواتر به‌سه‌ردا نه‌هاتبوو که‌ ئه‌م "ئیمتیاز"ه‌ نه‌خوازراوه‌ى دابوویان به‌ لایه‌نى به‌رامبه‌ر، به‌ سه‌یرکردنى کاک خالید وه‌ک که‌سێکى "نامه‌حره‌م" و له‌ په‌راوێزدا هێشتنه‌وه‌ی، وه‌ریان گرته‌وه‌. به‌ڵا سکرتێر به‌ رواڵه‌ت داواى لێکرد ئیستیعفاکه‌ى وه‌ربگرێته‌وه‌، به‌ڵام نه‌ هه‌وڵىدا ئه‌و گرفتانه‌ چاره‌سه‌ر بکا که‌ کاک خالیدیان ناچار به‌ نووسێنى ئیستیعفاکردوه‌، نه‌ له‌گه‌ڵ هاتنه‌وه‌ى ناوبراو بۆ پلینۆم و باس له‌ هۆیه‌کانى نووسێنى ئیستیعفانامه‌، ره‌زامه‌ندیى ده‌ربڕى. ئه‌و قسه‌یه‌ راسته‌ که‌ ئه‌ندامى کۆمیته‌ى ناوه‌ندى بۆ به‌رێوه‌بردنى پۆستێک هه‌ڵاده‌بژێردرێ. به‌ڵام لێره‌دا قسه‌که‌ى خۆیان وه‌بێر دێنینه‌وه‌‌ و ده‌ڵێین ئایا به‌ڕاى ئه‌وان له‌حیزبى دیموکرات‌دا که‌سى لێهاتوو و شایسته‌ بۆ ئه‌م پۆسته‌ له‌نێو ئه‌و چه‌ند که‌سه‌دا نه‌بێ که‌ ئێوه‌‌ مه‌به‌ستتانه‌، په‌یدا نابێ؟

لێره‌دا چه‌ند شتێک له‌ ئیستیعفانامه‌که‌ى کاک خالید عه‌زیزى ده‌خه‌ینه‌ به‌رچاوى خوێنه‌ران تا بزانن ئه‌م هۆیانه‌ چن که‌ مه‌یدان له‌ که‌سانى لێوه‌شاوه‌‌ و به‌ که‌لک له‌نێو حیزبى دیموکرات‌دا ته‌نگ ده‌که‌ن و چ که‌سانێک به‌ ئه‌نقه‌ست ئه‌م وه‌زعه‌ ده‌خوڵقێنن:

پلینۆمی پێنجمی ک ن به‌ گۆێره‌ی بریاری کۆنگره‌ی سێزده‌، کاک شاهۆو منی وه‌ک دوو ئه‌ندامی کۆمیته‌ی ناوه‌ندی له‌ ده‌ره‌وه‌ی وڵات دیاری کرد.

1- تا ئه‌و جێگه‌یه‌ی پێوه‌ندی به‌ منه‌وه‌ هه‌بو، من وام چاوه‌ڕوان ده‌کرد که‌ رێبه‌ری حیزب به‌ مه‌شوه‌ره‌ت له‌گه‌ڵ جۆم ئه‌رک و به‌رپرسایه‌تی منیش به‌ گۆێره‌ی شاره‌زایی و به‌ له‌به‌ر چاوگرتنی لانی که‌می ویست و عه‌لاقه‌ی خۆم دیاری ده‌کا. به‌ڵام، به‌ داخه‌وه‌ پێش ئه‌وه‌ی من بکرێم به‌ ئه‌ندامی ک ن، به‌ش و ئه‌رکیشیان بۆ دیاری کردبوم، واته‌ به‌شی ئینتشارات. ته‌نانه‌ت بێ مه‌شوه‌ره‌ت له‌ گه‌ڵ من ئه‌ندامانی ئه‌و به‌شه‌س دیاری کرابون. به‌شێک که‌ چوارىیوه‌ و نێوه‌رۆک و به‌رنامه‌ی کاری بۆ رێبه‌ری، بۆ من وئه‌ندامانی ئه‌و به‌شه‌ش به‌ته‌واوی نارون بوو. 

2- من ده‌مزانی که‌ دیاری کردنی من وه‌ک به‌رپرسی ئه‌و به‌شه‌، ئه‌ویش به‌و شێوه‌یه‌ی که‌ له‌ خاڵی 1 ئاماژه‌م پێکردووه‌، به‌و مه‌به‌سته‌ نه‌ بووه‌ که‌ له‌ شاره‌زایی و ئه‌زمونی من بۆ کاری حیزب له‌ جێگه‌ی خۆم که‌ڵک وه‌ربگیرێت.  سه‌ره‌ڕای هه‌موی ئه‌ راستییانه‌، به‌ پێچه‌وانی ویستی خۆم وته‌نیا له‌به‌ر به‌رژه‌وه‌ندی حیزب و زۆرتریش ئه‌و راستییانه‌، که‌ فه‌زای نێوخۆیی حیزب ئارم بێته‌وه‌ و کاره‌کانیش له‌ ده‌ره‌وه‌ وه‌گه‌ڕ بکه‌ون، و به‌ هیوای باشتر بوونی میکانیزمی سازمانده‌هی و ئیداره‌ی ده‌ره‌وه‌ی وڵات ئه‌و ئه‌رکه‌م قه‌بووڵ کرد. 

3- پێم خۆشه‌ ئه‌و ڕاستێ ده‌ستنیشان بکه‌م که‌ له‌ ماوه‌ی چه‌ند ساڵی رابردودا که‌ کارو مه‌ئمووریه‌ت و به‌رپرسایه‌تی حیزبیم بووه‌، هه‌رگیز کارم هه‌ر گیز کارم نه‌کردووه‌، یان شه‌رو ده‌سته‌به‌ندیم نه‌کردووه‌ بۆ ئه‌وه‌ی ببم به‌ ئه‌ندامی کن . مه‌به‌ستی سه‌ره‌کی من له‌ قه‌بووڵ کردنی ئه‌نامه‌تی ک ن ئه‌وه‌و بووه‌ که‌ چۆن به‌ گوێره‌ی توانایی خۆم له‌و پۆسته‌ که‌ڵک وه‌رگرم بۆ ئه‌وه‌ی منیش له‌ راده‌ی خۆمدا کار بکه‌م بۆ ئارام کرنه‌وه‌ و " سالم سازی" فه‌زای نێوخۆی حیزب. فه‌زایه‌ک که‌ هه‌مو لایه‌ک هه‌ست به‌ ئه‌منییه‌تی سیاسی، حقوقی و فه‌ردی بکه‌ن.

4- به‌ڵام، به‌ داخه‌وه‌ و زۆر به کورتی، شێوه‌ی ئیداری ده‌ره‌وه‌ی وڵات و میکانیزمی بریاردانی ئه‌و ماوه‌یه‌ جورێک بووه‌ که‌ هیچ مه‌جالی ده‌ور و ده‌نگ اکاری، بۆمن وه‌ک ئه‌ندامی ک ن نه‌هێشتبۆوه‌.  له‌ و که‌ش و هه‌وایه‌دا من دوو رێگام له‌ پێش بوو. یان  کار کردن به‌ قیمه‌تی شه‌ڕو کێشه‌، ئه‌ویش به‌و شێوه‌ ناخۆشه‌ی که‌ ئێستا که‌م و زۆر له‌ نێو حیزب باوه‌، یان واز هێنان له‌ به‌رپرسایه‌تی. دیاره‌ من وازهێنانم هه‌ڵبژارد. هه‌ر چه‌ند له‌ کاری حیزبیدا من پێم وانییه‌ که‌ ده‌بێت هه‌مو کارێک و هه‌مو که‌سێک به‌ دڵی من بێت.

براتان خالید عه‌زیزی 2005.10.20

 وه‌ک زۆرجارى دیکه‌ش گوتومانه‌ مه‌به‌ست له‌و نامه‌یه‌ى ئۆپۆزیسێۆنى نێوخۆ بۆ رێزدار هیجرى و قۆڵه‌که‌ى ئه‌وه‌یه‌ که‌ حیزبى دیموکرات ببێته‌ هى هه‌مووان و هه‌موو لا هه‌ست به‌ "مشارکت" له‌ به‌رێوه‌بردن و برێاردان له‌ حیزبه‌که‌یان‌دا بکه‌ن. وه‌ختایه‌ک زۆرێنه‌ى رێبه‌رێى ئه‌م حیزبه‌ نه‌یهه‌وێ له‌ هیچ کاروبارێک‌دا به‌رامبه‌ره‌که‌ى بکا به‌ شه‌رێک، راست به‌ناوى "داکۆکى له‌ سه‌ڵاحییه‌تى کومیته‌ى ناوه‌ندى" و "پێشگیرى له‌ پێشێلکرانى پره‌نسێبه‌کانى حیزب" خۆى وه‌ک تاقه‌ برێارده‌ر و به‌رێوه‌به‌رى حیزب دێڵێته‌وه‌ و، گوێى بێستنى هیچ داوایه‌کى مه‌نتیقیشى نابێ. هه‌ر له‌ وه‌ڵامدانه‌وه‌یان به‌ خاڵه‌کانى ئه‌م داوانامه‌یه‌دا ده‌رى ده‌خه‌ن که‌ تا سه‌ر ئێسقان پاوانخوازن و، ئه‌و هه‌مووه‌ پایه‌ندییه‌ رواڵه‌تىیه‌یان بۆ ئه‌ساسنامه‌ و پره‌نسێبه‌کانى حیزب، بۆ زاڵکردنى ته‌ک ده‌نگى و یه‌کده‌ستى به‌سه‌ر حیزب‌دایه‌ نه‌ک بۆ داکۆکى له‌ دیموکراسێى نێوخۆیى و پاراستنى مافه‌ حیزبى و ته‌شکێڵاتىیه‌کانى ئه‌ندامانى حیزب. ئه‌گینا له‌ کاتێک‌دا هیچ که‌سى به‌ستراوه‌ به‌ خۆیان نه‌ماوه‌ که‌ له‌ ماوه‌ى ئه‌م دووساڵ و نێوه‌دا کار و پۆستى شیاویان پێ نه‌سپاردبێ و له‌ حاڵێک‌دا زۆربه‌ى ئه‌و که‌سانه‌ى به‌ ئه‌نقه‌ست خستوویاننه‌ په‌راوێز، چه‌ندین ساڵه‌ کاروبارى ئه‌م حیزبه‌ به‌رێوه‌ ده‌به‌ن و تواناى خۆیان سه‌لماندوه‌، دیارێکردنى چه‌ند راوێژکاری کۆمیته‌ى ناوه‌ندى له‌ ئۆپۆزیسێۆن، به‌راستی شتێکى ئه‌وه‌نده‌ گرنگ و چاره‌نووسسازه‌؟! ئه‌گه‌ر نێگه‌رانى تێکچوونى ئارایشى سه‌نده‌لێیه‌کانى کۆنگره‌ى داهاتوو نێن و هیچ باکێکتان له‌ ئاکامه‌کانى دیموکراسى و هه‌ڵبژاردن نێه‌، به‌شدارکردنى ئۆپۆزیسێۆنى نێوخۆ له‌ به‌رێوه‌بردنى کاروبارى ئه‌م حیزبه‌دا چ زیانێک به‌وان ده‌گه‌یه‌نێ. ئه‌وه‌ش که‌ "ئاوڕدانه‌وه‌" واده‌نوێنێ ئۆپۆزیسێۆن ده‌یه‌وێ راوێژکاران ته‌نیا له‌و که‌سانه‌ هه‌ڵاببژێردرێن که‌ نامه‌که‌یان ئیمزا کردوه‌، چه‌واشه‌کارىیه‌کى به‌ ئه‌نقه‌سته‌. مه‌به‌ست له‌ ئۆپۆزیسێۆنى نێوخۆ هه‌موو ئه‌و که‌سانه‌ن که‌ قۆڵى ده‌سه‌ڵاتدار به‌ نامه‌حره‌م و بێگانه‌یان ده‌زانێ. ئاشکراشه‌ ئه‌و جۆره‌ که‌سانه‌ سه‌دان به‌رامبه‌رى ئه‌و 25 که‌سه‌ن که‌ نامه‌که‌یان ئیمزا کردوه‌. به‌ڵام ئه‌گه‌ر مه‌به‌ست ئه‌و 25 که‌سه‌ش بێ، بۆچى ئه‌و که‌سانه‌ که‌ زۆربه‌ى هه‌ره‌ زۆریان ئه‌زموونى چه‌ندین ساڵ به‌رێوه‌بردنى زۆر پۆست و به‌رپرسایه‌تیى گرنگیان له‌م حیزبه‌دا هه‌یه‌، ناتوانن ببنه‌ هۆى به‌هێز بوونى کۆمیته‌ى ناوه‌ندى؟هه‌ر وه‌ها ئه‌گه‌ر قۆڵى ده‌سه‌ڵاتدار به‌رعۆده‌ بێ پاشماوه‌ى راوێژکارانی کۆمیته‌ى ناوه‌ندى له‌وان هه‌ڵ بژێرێ، بۆچى سه‌ڵاحییه‌تى کۆمیته‌ى ناوه‌ندى ده‌چێته‌‌ ژێر پرسێار؟ شتێکى سروشتىیه‌ کۆمیته‌ى ناوه‌ندى دوو به‌شه‌، به‌شێکی سه‌ر به‌ قۆڵى ده‌سه‌ڵاتداره‌ و، قۆڵه‌که‌ى هه‌ر چۆنێک ئیراده‌ بکا، ئه‌و به‌شه‌ له‌ قسه‌ى ناچێته‌‌ ده‌ر. لایه‌نى به‌رامبه‌رێش له‌ کۆمیته‌ى ناوه‌ندىدا، چ سه‌ر به‌ قۆڵێکى دیارێکراو بن، چ بێلایه‌ن، هیچکامیان دژى "مشارکت"دانى ئه‌ندامه‌ هه‌ڵاوێردراو وله‌ په‌راوێزخراوه‌کانىحیزب له‌ برێاردان و به‌رێوه‌بردنى کاروباره‌کان‌دا نێن. هه‌ر له‌ دوا کۆبوونه‌وه‌کانى هه‌یئه‌ته‌کانى ئۆپۆزیسێۆنى نێوخۆ و قۆڵى ده‌سه‌ڵاتدار (رۆژى 5شه‌ممه‌ 25ى خه‌زه‌ڵوه‌ر)دا بوو که‌ سه‌رانى ئه‌م قۆڵه‌ دانیان به‌وه‌دانا ئه‌گه‌ر ئه‌م دوو هه‌یئه‌ته‌ رێک بکه‌ون کۆمیته‌ى ناوه‌ندى له‌ قسه‌یان ناچێته‌‌ده‌ر و ئاکامىرێککه‌وتنه‌کان ته‌سوێب ده‌کا.

له‌باره‌ى ئه‌و ئاکامه‌شه‌وه‌ که‌ "ئاوڕدانه‌وه‌" له‌ پێوه‌ندى له‌گه‌ڵا به‌ندى "ج"ى خاڵى چوراده‌هه‌م‌دا هه‌ڵى هێنجاوه‌‌، ده‌ڵێین ئه‌وه‌ فه‌لسه‌فه‌ى وجوودیى پاوانخوازانه‌ که‌ "به‌شى خۆم بۆخۆم، به‌شى تۆش ده‌خۆم". دڵواىئۆپۆزیسێۆنى نێوخۆ، نه‌ک زێده‌‌خوازى و خواردنى به‌شى به‌رامبه‌ر، به‌ڵکوو ئه‌وه‌یه‌ که‌ به‌شه‌که‌ى و خۆشى به‌ به‌شه‌که‌یه‌وه‌، نه‌خورێ و له‌ راستیدا خه‌باتى نێوخۆیى بۆ مانه‌وه‌ له‌حیزب‌دا ده‌کا. مه‌سه‌له‌که‌ ئه‌وه‌یه‌ ته‌رکێبى به‌رێوه‌به‌رێى هه‌ر ئۆرگانێک ره‌نگدانه‌وه‌ى ته‌رکێبى ژێرکۆما یا رێکخراوه‌ حیزبىیه‌که‌ بێ، نه‌ک ئه‌وه‌ زۆرێنه‌ى ئه‌ندامان له‌ هه‌ر ڵایه‌ک بن، زۆرایه‌تى و به‌رپرسایه‌تیى به‌رێوه‌به‌رىیه‌که‌ هه‌ر به‌ قۆڵى پاوانخواز بێ! ئه‌مه‌ش شتێک نێه‌ هه‌ر که‌س له‌گه‌ڵ ئه‌لف و بێى دیموکراسى ئاشنا بێ، تێى نه‌گا!

دیاره‌ "ئاوڕدانه‌وه‌" به‌ڵاى خاڵه‌کانى دیکه‌ى نامه‌ى ئۆپۆزیسێۆن‌دا تیژ تێپه‌رێوه‌ و له‌باره‌ى ئه‌وانێشه‌وه‌ بێجگه‌ له‌ ئینکارى راستی و تاوانبارکردنى ئۆپۆزیسێۆن، قسه‌ى دیکه‌ى نێه‌. له‌ باسى خاڵى نۆزده‌هه‌میش‌دا ده‌ڵێ "له‌ رادیۆ و رۆژنامه‌ و ته‌له‌وێزیۆنى حیزب‌دا ده‌بێ سێاسه‌ته‌کانى حیزبى دیموکرات بڵاو بکرێته‌وه‌ و ده‌بێ ده‌نگى ئازادیخوازى و مافخوازیى نه‌ته‌وه‌که‌مان بن، نه‌ک بێر و بۆچوونى جیناحىیان تێدا بڵاوبکرێنه‌وه‌!!" به‌ڵام هه‌ر به‌ ئه‌مرى سه‌رۆکى نووسه‌رانى ئه‌م "ئاوڕدانه‌وه‌"یه‌ و هه‌ر به‌ برێارى خۆیان رێگه‌ نه‌دراوه‌ زۆر بابه‌ت که‌ له‌ سه‌داسه‌د له‌ خزمه‌ت سێاسه‌ته‌کانى حیزبى دیموکرات‌ و ده‌نگى ئازادیخوازى و مافخوازیى نه‌ته‌وه‌که‌مان‌دا بوون، له‌ رۆژنامه‌ و چاپه‌مه‌نێى حیزبدا بڵاو ببنه‌وه‌. په‌یامى به‌رێز عه‌بدوڵڵا حه‌سه‌ن‌زاده‌ بۆ کۆنفرانسێک له‌باره‌ى کورد له‌ ئوسترالیا، وتارێکى دیکه‌ى ئه‌و به‌رێزه‌ به‌ داکۆکى له‌ به‌یاننامه‌ى کۆمیته‌ى ناوه‌ندیى حیزب به‌ بۆنه‌ى 60 ساڵه‌ى دامه‌زرانى کۆمار، له‌به‌ر به‌رچاوته‌نگیى ئێوه‌‌ له‌ رۆژنامه‌دا سانسۆر کران یا  له‌به‌ر دژایه‌تییان له‌گه‌ڵا سێاسه‌ته‌کانى حیزب و ناته‌با بوونیان له‌گه‌ڵا ئازادیخوازى و مافخوازیى نه‌ته‌وه‌که‌مان؟ له‌ حاڵێک‌دا قسه‌کانى سه‌رۆکى قۆڵه‌که‌تان له‌ ساڵۆنى گشتیدا هه‌م وه‌ک به‌خشنامه‌ وبه‌ تایپ کراوى بۆ ئۆرگانه‌کان نارد و هه‌م له‌ "تێکۆشه‌ر"دا بڵاوتان کرده‌وه‌، قسه‌ى به‌رێزان حه‌سه‌ن‌زاده‌ و که‌سایه‌تىیه‌کانى دیکه‌ى ئۆپۆزیسێۆنى نێوخۆتان له‌ سه‌ر ئه‌و قسانه‌ى کاک مسته‌فا هیجرى، له‌ هیچ کوێدا بڵاو نه‌کرده‌وه‌ و ته‌نانه‌ت ئاماده‌ نه‌بوون کاسێتێک له‌ قسه‌کانیان بده‌نه‌وه‌ به‌خۆى. بۆچى له‌ ماڵپه‌ره‌کانى حیزب‌دا، هیچ شوێنه‌وارێکتان له‌ نووسێن و وتووێژ و لێدوانه‌کانى سکرتێرى پێشووى حیزب و زۆر بابه‌تى دیکه‌ى که‌سانێک له‌ ئۆپۆزیسێۆن نه‌هێشت؟

لێره‌دا به‌ پێوێستى ده‌زانێن به‌ ئاگادارى هه‌موو ئه‌ندامان و ئۆگرانى حیزبى دیموکرات و هه‌روه‌ها بێروڕاى گشتیى بگه‌یه‌نێن که‌ ئۆپۆزیسێۆنى نێوخۆى حیزبى دیموکرات له‌ درێژه‌ی دوا هه‌وڵه‌کانى بۆ سه‌پاندنى یه‌کرێزى به‌سه‌ر قۆڵى پاوانخوازداو، به‌ سه‌رنجدان به‌ "حساسێت"ى یه‌کجار زۆرى ئه‌وان به‌ خاڵى 14ى نامه‌که‌ که‌ سێ داواى به‌ مه‌به‌ستى قه‌ره‌بوو کردنه‌وه‌ى به‌شێک له‌ نابه‌رامبه‌رىیه‌که‌یان و پێکهێنانه‌‌وه‌ى  جۆرێک ته‌وازوون له‌ رێبه‌رێى تێدایه‌، هه‌روه‌ها چونکه‌ ئامانجى ئۆپۆزیسێۆن جێگیرکردنى میکانێزمى پێکه‌وه‌ بوونه‌ نه‌ک وه‌رگرتنى پۆستى "مشاورت" بۆ به‌رێوه‌به‌رانى، راى گه‌یاند که‌ واز له‌م خاڵه‌ دێنێ، به‌ڵام له‌سه‌ر جێبه‌جێ بوونى جه‌وهه‌ر و نێوه‌رۆکى خاڵه‌کانى دیکه‌ پێ داده‌گرێ. به‌ڵام به‌و هۆیه‌وه‌ که‌ جه‌وهه‌رى زۆربه‌ى داواکانى دیکه‌ش هه‌ر له‌ دژایه‌تى له‌گه‌ڵا پاوانخوازى و یه‌کده‌ست کردنى حیزب‌دان،سه‌رانى ئه‌و قۆڵه‌ ئاماده‌ نه‌بوون چاره‌نووسى به‌رژه‌وه‌نده‌کانى خۆیان به‌ قوربانى گه‌ڕانه‌وه‌ى یه‌کێه‌تى و یه‌کرێزى بۆ نێو حیزبى دیموکرات بکه‌ن.  

درێژه‌ی هه‌یه‌    

 

ئۆپۆزیسێۆنى نێوخۆى

حیزبێ دیموکراتى کوردستانى ئێران

1385.09.02

2006.11.23

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

www.giareng.com
All rights reserved 2005.