Ö:: وته‌کانی به‌رێز مامۆستا له‌ 26ی سه‌رماوه‌ز له‌‌ رێوره‌سمی‌ رۆژی‌ پێشمه‌رگه‌ی‌ كوردستان دا

سه‌رچاوه‌: ماڵپه‌ری کوردستان و کورد

وته‌کانی به‌رێز مامۆستا له‌ 26ی سه‌رماوه‌ز له‌‌ رێوره‌سمی‌ رۆژی‌ پێشمه‌رگه‌ی‌ كوردستان دا
پێشمه‌رگه‌ی‌ ئه‌مڕۆ هه‌ڵگری‌ نوێترین بیرو باوه‌ڕی‌ سه‌رده‌مه‌
رووداوی‌ نه‌خوازراوی‌ له‌تبوونی‌ حیزب ده‌بێ‌ بكه‌ینه‌ده‌سپێكی‌ له‌ دایك بوونه‌وه‌یه‌كی‌ تازه‌ بۆ حیزبی‌ دیمۆكراتی‌ كوردستان
هاورێیانی‌ خۆشه‌ویست!
خوشك و برا به‌ڕێزه‌كان!
پێشمه‌رگه‌ دێرین و جه‌وان و تازه‌ پێگه‌یشتووه‌كان، پێشمه‌رگه‌كانی‌ دوارۆژ!
سڵاوتان لێ بێت، سڵاو له‌ 26ی‌ سه‌رماوه‌ز، رۆژی‌ پێشمه‌رگه‌ی‌ كوردستان، سڵاو له‌ "كه‌مایه‌تیی" حیزبی‌ دیمۆكراتی‌ كوردستان كه‌ عه‌رز و به‌ر هه‌ڵیناگرێ‌و جێی‌ نابێته‌وه‌!

به‌ بۆنه‌ی‌ 26ی‌ سه‌رماوه‌ز، رۆژی‌ پێشمه‌رگه‌ی‌ كوردستانه‌وه‌، له‌ ئێوه‌ له‌ هه‌موو پێشمه‌رگه‌كانی‌ كوردستان له‌ هه‌ر جێیه‌ك‌ و له‌ هه‌ر پارچه‌یه‌كی‌ كوردستان و سه‌ر به‌ هه‌ر حیزبێكی‌ سیاسی‌ بن، له‌ بنه‌ماڵه‌ی‌ پێشمه‌رگه‌كان، له‌ بنه‌ماڵه‌ی‌ شه‌هیدان و له‌ هه‌موو خه‌ڵكی‌ پێشمه‌رگه‌ په‌روه‌ری‌ كوردستان پیرۆزبایی‌ ده‌كه‌م.

سڵاو له‌ پێشمه‌رگه‌، ئه‌وانه‌ی‌ سه‌ریان له‌ رێگای‌ ئامانجیان دانا، ئه‌وانه‌ی‌ له‌ رێگای‌ خه‌باتدا نوقوستان، كه‌م ئه‌ندام یان بریندار بوون، ئه‌وانه‌ی‌ به‌ سڵامه‌تی‌ و سه‌ربه‌رزی‌ هه‌ر ئێستا له‌ مه‌یدانی‌ خه‌باتدا ئاماده‌ن ئه‌گه‌ر پێویست بوو ئه‌وانیش وه‌كوو پێشمه‌رگه‌كانیان گیانیان به‌خت بكه‌ن.

سڵاو له‌ سێ‌ رێبه‌ری‌ پێشمه‌رگه‌ و سێ‌ پێشمه‌رگه‌ی‌ رێبه‌ر، شه‌هیدانی‌ نه‌مر پێشه‌وا قازی‌ محه‌ممه‌د، دوكتور عه‌بدولره‌حمان قاسملوو، دوكتور محه‌ممه‌د سادق شه‌ره‌فكه‌ندی‌. سڵاو له‌ هه‌موو ئه‌و رێبه‌رانه‌ی‌ كه‌ شانبه‌شانی‌ پێشمه‌رگه‌ چوونه‌ سه‌نگه‌ری‌ خه‌باته‌وه‌ و له‌ په‌نا پێشینه‌كان گیانیان له‌ پێناوی‌ كوردستاندا به‌خت كرد.

هه‌موومان ده‌زانین كه‌ ئه‌مساڵ ده‌بێته‌ بیست و سێهه‌مین ساڵ كه‌ جه‌ژنی‌ پێشمه‌رگه‌ له‌ رۆژی‌ 26ی‌ سه‌رماوه‌زدا ده‌گرین. به‌ كورتی‌ ئیشاره‌یه‌ك به‌و موناسه‌به‌ته‌ به‌جێیه‌. پاش چه‌ند ساڵ خه‌باتی‌ مه‌رحه‌له‌ی ئێستامان له‌ ساڵی‌ 1363دا كه‌وتینه‌ سه‌ر ئه‌و فكره‌ كه‌ ده‌بێ‌ رۆژێك بۆ رێزگرتن له‌ پێشمه‌رگه‌ دابنرێ‌.

زۆرمان بیر كرده‌وه‌، زۆر عه‌مه‌لیاتی‌ گه‌وره‌ و پڕ شانازی‌ هه‌بوون كه‌ بیانكه‌ینه‌ رۆژی‌ پێشمه‌رگه‌ی‌ كوردستان. له‌ پاشان هه‌رچی‌ بیرمان كرده‌وه‌ عه‌مه‌لیاته‌كان زۆر بوون، ئیفتخاراته‌كان زۆر بوون، پێمان وابوو ئه‌گه‌ر یه‌كیان هه‌ڵبژێرین ره‌نگه‌ هێزه‌كانی‌ دیكه‌، ناوچه‌كانی‌ دیكه‌ی‌ خۆیان به‌ مه‌غدوور بزانن. سه‌ره‌نجام هاورێیه‌كی‌ ده‌فته‌ری‌ سیاسی‌ پێشنیاری‌ كرد، با ئێمه‌ رۆژی‌ 26ی‌ سه‌رماوه‌ز بكه‌ینه‌ رۆژی‌ پێشمه‌رگه‌. چونكی‌ ئه‌گه‌ر به‌ مه‌عنا واقیعییه‌كه‌ی‌ بڵێین رۆژی‌ 26ی‌ سه‌رماوه‌ز ئه‌و رۆژه‌یه‌ كه‌ بۆ یه‌كه‌م جار ئاڵای‌ كوردستانی‌ تێدا هه‌ڵكراوه‌. پێشمه‌رگه‌ هه‌ڵگری‌ ئه‌و ئاڵایه‌یه‌، هه‌ڵگری‌ په‌یامی‌ ئه‌و ئاڵایه‌یه‌، پارێزه‌ری‌ ئه‌و ئاڵایه‌یه‌، كه‌ وابێ‌ زۆر به‌ جێیه‌ له‌ نێو هه‌موو رۆژه‌كاندا ئه‌و رۆژه‌ به‌ رۆژی‌ پێشمه‌رگه‌ی‌ كوردستان دیاری‌ بكه‌ین. به‌ خۆشی‌ یه‌وه‌ ئه‌و پێشنیاره‌ هه‌م له‌ ده‌فته‌ری‌ سیاسی‌، هه‌م له‌ كومیته‌ی‌ ناوه‌ندی‌دا په‌سند كرا. له‌و ساوه‌ تا ئه‌مڕۆ هه‌موو ساڵی‌ خه‌ڵكی‌ كوردستان هه‌ر كه‌سه‌و له‌ شوێنی‌ خۆی‌ و به‌ پێی‌ مه‌وقیعییه‌تی‌ خۆی‌ له‌ رۆژی‌ پێشمه‌رگه‌ی‌ كوردستاندا رێز له‌ پێشمه‌رگه‌ ده‌گرن، رێز له‌ فیداكاری‌یه‌كانیان ده‌گرن، رێز له‌ شه‌هیده‌كان و بنه‌ماڵه‌ی‌ شه‌هیده‌كانیان ده‌گرن، رێز له‌ بنه‌ماڵه‌ی‌ پێشمه‌رگه‌ ده‌گرن.

هه‌موو ده‌زانین، به‌ تایبه‌تی‌ ئه‌وانه‌ی‌ له‌ نێو خه‌ڵكدا دژین كه‌ بنه‌ماڵه‌ی‌ پێشمه‌رگه‌ گوڵی‌ سه‌رسه‌به‌دی‌ كۆمه‌ڵی‌ كورده‌وارین‌و، سه‌ربه‌رزن به‌ پێشمه‌رگه‌كانیان. ئه‌وه‌ی‌ بۆ پێشمه‌رگه‌ ده‌كرێ‌، ئه‌وه‌ی‌ بۆ بنه‌ماڵه‌ی‌ پێشمه‌رگه‌ ده‌كرێ‌ به‌شێكی‌ كه‌مه‌ له‌و پاداشه‌ی‌ كه‌ موسته‌حه‌قی‌ پێشمه‌رگه‌یه‌. پێشمه‌رگه‌ زۆر له‌وه‌ زیاتر هه‌ڵ‌ده‌گرێ‌. پێشمه‌رگه‌ ئه‌و كه‌سه‌یه‌ كه‌ بێ‌ ئه‌وه‌ی‌ چاوی‌ له‌ پاداشێك ، ته‌نانه‌ت له‌ ئافه‌رین و سپاسێكیش بێ گیان له‌ سه‌ر به‌ری‌ ده‌ست داده‌نێ‌ بو پاراستنی‌ ده‌سكه‌وته‌كانی‌ گه‌ل، بۆ یه‌ده‌ست هێنانی‌ ئاوات و ئامانجه‌كانی‌ میلله‌تی‌ خۆی‌. پێشمه‌رگه‌ ئه‌و كه‌سه‌یه‌ كه‌ حافیز و رپارێزه‌ری‌ ماڵ و گیان و نامووسی‌ خه‌ڵكه‌، گیان به‌خت ده‌كا بۆ وه‌ده‌ستهێنانی‌ ئاواته‌كانی‌ میلله‌تی‌ كورد، له‌ پاشانیش فیداكاری‌ ده‌كا بۆ پاراستنی‌.

ره‌نگه‌ هێندێك كه‌سمان هه‌بن كه‌ پێیان وابێ‌ ئێسته‌ ده‌ورانی‌ پێشمه‌رگه‌ به‌ سه‌ر چووه‌، چونكی‌ ئێمه‌ له‌ حاڵه‌تی‌ خه‌باتی‌ چه‌كدارانه‌دا نین، ئه‌وه‌ بۆچوونێكی‌ نادروسته‌. هه‌تا ئه‌و وه‌خته‌ی‌ زۆڵم و زۆر هه‌یه‌ هه‌موو رۆژێ‌ ئیحتیمالی‌ هه‌یه‌ كه‌ وه‌ختێكی‌ دیكه‌ له‌ هه‌لوومه‌رجێكی‌ دیكه‌دا پێشمه‌رگه‌ دیسان سه‌نگه‌ری‌ خه‌بات ( خه‌باتی‌ چه‌كدارانه‌ش ) ئاوه‌دان بكاته‌وه‌ بۆ دیفاع له‌ ماف و ئازادییه‌كانی‌ خه‌ڵكی‌ كوردستان. هه‌ر وه‌كوو حیزبه‌كه‌مان و رێبه‌ری‌ شه‌هیدمان دكتور قاسملوو له‌ ئه‌وه‌ڵین رۆژه‌كانی‌ ده‌ست پێكردنی‌ خه‌باتی‌ چه‌كدارانه‌ یان باشتر بڵێم دیفاعی‌ چه‌كدارانه‌دا كوتی‌:"خه‌باتی‌ چه‌كدارانه‌ شێوه‌یه‌ك له‌ خه‌بات نیه‌ كه‌ ئێمه‌ هه‌ڵمان بژاردبێ‌، دوژمنانی‌ ئازادی‌ به‌ سه‌ر ئێمه‌یاندا سه‌پاندوه‌ " چونكی‌ ئێمه‌ ئاشتیخوازین، پێشمان خوَشه‌ ئاواته‌كان و ئامانجه‌كانمان به‌ رێگای‌ ئاشتیخوازانه‌دا وه‌دی‌ بێن.به‌ڵام ئه‌و رۆژه‌ی‌ كه‌ پێویسته‌ له‌ پێناوی‌ ئامانجه‌كانماندا بمرین، كیژان و لاوانی‌ كورد له‌ مردن سڵ ناكه‌نه‌وه‌. بۆیه‌ ره‌نگه‌ جارێكی‌ دیكه‌ش ئه‌وه‌ بێته‌ پێشێ‌. هیوادارین مه‌نتیق ئه‌وه‌نده‌ زاڵ بێت، رۆحی‌ سه‌رده‌م ئه‌وه‌نده‌ زاڵ بێت كه‌ پێشمه‌رگه‌ مه‌جبوور نه‌بێ‌ چه‌كدارانه‌ بچێته‌ سه‌نگه‌ره‌وه‌. به‌ڵام ئه‌گه‌ر ئه‌وه‌شیان نه‌بوو ئه‌ركی‌ پێشمه‌رگه‌ ته‌واو نابێ‌. پێشمه‌رگه‌ ده‌بێ‌ ده‌سكه‌وته‌كانی‌ بزووتنه‌وه‌ی‌ كورد بپارێزی‌، بۆ پاراستنیان دیسان ده‌بێ‌ چه‌ك له‌ شان ئاماده‌ی‌ خه‌بات بێ‌. له‌ هه‌مووی‌ گرنگتر ئه‌وانه‌ خراپ له‌ پێشمه‌رگه‌ حاڵی‌ بوون كه‌ پێیان وایه‌ ئه‌ركی‌ پێشمه‌رگه‌ فه‌قه‌ت چه‌ك له‌شان كردن و خه‌باتی‌ چه‌كدارانه‌یه‌، پێشمه‌رگه‌، به‌ تایبه‌تی‌ پێشمه‌رگه‌ی‌ ئه‌مڕۆ هه‌ڵگری‌ نوێترین بیرو باوه‌ڕی‌ سه‌رده‌مه‌، پێشمه‌رگه‌ی‌ ئه‌مڕۆ پێشمه‌رگه‌ مه‌یدانی‌ سازه‌نده‌گی، مه‌یدانی‌ درووست كردن، مه‌یدانی‌ نوێكردن و نوێ بوونه‌وه‌یه‌. پێشمه‌رگه‌ له‌ هه‌موو مه‌جاله‌كانی‌ ژیاندا ده‌بێ‌ پێشڕه‌و بێ‌. ئه‌و ناوه‌ پێرۆزه‌ به‌ خۆڕایی‌ بۆ پێشمه‌رگه‌ دانه‌ندراوه‌. له‌ هه‌موو مه‌جالێكدا پێشمه‌رگه‌یه‌، یه‌عنی‌ ئه‌گه‌ر پێویست بوو مه‌رگی‌ وه‌پێش مه‌رگی‌ گه‌له‌كه‌ی‌ ده‌خا بۆ ئه‌وه‌ی‌ گه‌له‌كه‌ی‌ به‌ سه‌ربه‌ستی‌ و سه‌ربه‌رزی‌ بژی‌.

هاورێیان، خوشكان، برایان، عه‌زیزان!
ئه‌مساڵ رۆژی‌ پێشمه‌رگه‌ی‌ كوردستان له‌ گه‌ڵ دیارده‌یه‌كی‌ تازه‌ به‌ره‌و روویه‌. له‌و ساڵۆنه‌دا كه‌ دانیشتووین ـ هه‌ر چه‌نده‌ ساڵۆن و ده‌ورووبه‌ری‌ ساڵۆن، مه‌وج ده‌دا له‌ ئینسان ـ به‌ڵام به‌شێك له‌ ره‌فیقه‌كانی‌ ساڵانی‌ رابردوومان له‌ ته‌نیشتی‌ خۆمان نابینین. ده‌زانم بۆ هیچتان ئه‌وه‌ دڵخواز نه‌بووه‌، هه‌روه‌ها بۆ خه‌ڵكی‌ كوردستانیش شتێكی‌ وا دڵخواز نه‌بووه‌. به‌ڵام بۆچی‌ حیزبه‌كه‌مان تووشی‌ ئه‌و رۆژه‌ بوو. له‌ كاتێكدا میلله‌ته‌كه‌مان له‌ هه‌موو وه‌ختان پتری‌ ئیحتیاج به‌ یه‌كریزی‌ و پێكه‌وه‌ بوون هه‌یه‌، حیزبی‌ دیموكراتی‌ كوردستان دوچاری‌ له‌ت بوونێك هاتوه‌. لێره‌دا ده‌مهه‌وێ‌ به‌ كورتی‌ ئاوڕێك له‌و مه‌سه‌له‌یه‌ بده‌مه‌وه‌، له‌ حاڵه‌تی‌ ئێستادا زۆر له‌ خه‌ڵكی‌ بۆیان پرسیاره‌ كه‌ ئه‌م حیزبه‌ بۆ دوچاری‌ ئه‌و رۆژه‌ بوو.

ته‌بیعه‌ته‌ن لایه‌نی‌ موقابیلی‌ ئێمه‌ش هه‌وڵ ده‌دا كه‌ ته‌قسیری‌ ئه‌م له‌تبوونه‌ بخاته‌ گه‌ردنی‌ ئێمه‌وه‌. به‌ڵام حه‌قیقه‌ت ئه‌وه‌یه‌ له‌ 12 ساڵ له‌مه‌وبه‌ره‌وه‌ كه‌ حیزبی‌ دیموكرات پاش له‌تبوونێكی‌ كه‌ تێی‌ كه‌وتبوو توانی‌ ریزه‌كانی‌ یه‌كخاته‌وه‌، وه‌كوو ئه‌و وه‌ختی‌ ناومان لێنا بنه‌ماڵه‌ی‌ گه‌وره‌ی‌ حیزبی‌ دیموكراتی‌ كوردستان وه‌سه‌ریه‌ك بخاته‌وه‌، له‌و كاته‌وه‌ ئه‌وانه‌ی‌ كه‌ موخالیفی‌ یه‌كریزیی‌ حیزبی‌ دیمۆكراتی‌ كوردستان بوون به‌رنامه‌یان هه‌بوو بۆ ئه‌وه‌ی‌ ئه‌م حیزبه‌ جارێكی‌ دیكه‌ دوچاری‌ له‌تبوون بكه‌نه‌وه‌. له‌ دوو ساڵ له‌مه‌و به‌ره‌وه‌ و كه‌مێكیش زیاتر، یه‌عنی‌ له‌و كاته‌وه‌ كه‌ ئه‌و هاورێیانه‌مان ئیحساسیان كرد كه‌ زۆرایه‌تیی‌ كۆنگره‌یان به‌ ده‌سته‌وه‌یه‌ به‌ردی‌ بناغه‌ی‌ له‌تبوونێكی‌ وه‌ك ئه‌ورۆیان دانا. ئێمه‌ به‌ هه‌ست كردن به‌ به‌رپرسایه‌تی‌یه‌وه‌ هه‌موو هه‌وڵێكمان دا بۆ ئه‌وه‌ی‌ پێش به‌ له‌تبوونی‌ حیزب بگرین یان باشتر بڵێین یه‌كڕیزیی‌ بگێڕینه‌وه‌ بۆ نێو ریزه‌كانی‌ حیزبی‌ دیموكراتی‌ كوردستان. به‌ڵام زۆر تێ‌كۆشاین و كه‌م سه‌ركه‌وتین، چونكه‌ ئه‌وان بڕیاری‌ خۆیان دابوو. مه‌سه‌له‌كه‌ش هه‌ر ئه‌ونده‌ نه‌بوو كه‌ ئه‌و هاورێیانه‌ هه‌وڵیان دابوو نه‌ك موخالیفانیان، ئه‌وانه‌ی‌ كه‌ له‌ فارسی‌ پێیان ده‌ڵێن "دگراندیشان" ئه‌وانه‌ش له‌ په‌راوێز بخه‌ن، به‌ڵكوو ئه‌م حیزبه‌یان تووشی‌ هێندێك هه‌ڵه‌ی‌ سیاسی‌ كردبوو، هێندێك لادان له‌ پڕه‌نسیپه‌كانی‌ كردبوو، كه‌ له‌ به‌ر ئه‌وه‌ی‌ ئوسوولی‌ دێموكراتیك له‌ حیزبدا به‌ ته‌واوی‌ پێشێل كرابوو ئیمكانی‌ راستكردنه‌وه‌ی‌ ده‌گه‌ڵ هه‌موو هه‌وڵ و ته‌قه‌لایه‌كی‌ دڵسۆزانه‌ی‌ ئێمه‌ نه‌بوو. چونكی‌ هه‌موو جۆره‌ موشاره‌كه‌تێك، هه‌موو جۆره‌ ئیستفاده‌یه‌ك له‌ فیكر و بیری‌ هاوڕێیانیان له‌ لایه‌ن وانه‌وه‌ مه‌ردوود بوو.

ئه‌وان كه‌ زۆرایه‌تییان له‌ كومیته‌ی‌ ناوه‌ندی‌ دا پێ بوو له‌ دیموكراسی‌ ته‌نیا یه‌ك ته‌فسیریان هه‌بوو، ئه‌ویش ئه‌وه‌یه‌، كه‌مایه‌تی‌ ده‌بێ‌ تابعی‌ زۆرایه‌تی‌ بێ‌. ئێمه‌ زۆرمان هاوار كرد بابه‌ زۆرایه‌تیی‌ كومیته‌ی‌ ناوه‌ندیتان هه‌یه‌ موباره‌كتان بێ‌، به‌ڵام ئه‌وه‌ڵه‌ن كه‌مایه‌تی‌ و زۆرایه‌تی‌ به‌ هیچ جۆر به‌و مانایه‌ نیه‌، له‌ پاشان دیموكراسی‌ هه‌ر ئه‌وه‌ نیه‌ كه‌ كه‌مایه‌تی‌، پێره‌وی‌ له‌ زۆرایه‌تیی‌ بكات، ئه‌وه‌ ئاخرین ره‌وشت و سروشتی‌ دیموكراسییه‌. ئێمه‌ دیموَكراسیمان ته‌نیا له‌ موقابیل دیكتاتۆری‌ دا نیه‌، دیكتاتۆری‌ فه‌ردیمان هه‌یه‌، دیكتاتۆری‌ كه‌مایه‌تیمان هه‌یه‌، دیكتاتۆریی‌ زۆرایه‌تیمان هه‌یه‌، جا ئه‌و جار دیموكراسیمان هه‌یه‌. ئه‌وه‌ی‌ ئێوه‌ ئێعمالی‌ ده‌كه‌ن دیموَكراسی‌ نیه‌ به‌ڵكوو دیكتاتۆریی‌ زۆرایه‌تیی‌ كومیته‌ی‌ ناوه‌ندییه‌، نه‌ك زۆرایه‌تی‌ حیزبیش.

وه‌ختێك هه‌وڵه‌كانمان له‌و پێناوه‌دا هه‌موویان تووشی‌ شكست بوون، هه‌وڵی‌ دڵسۆزان (هه‌م له‌ نێو حیزب هه‌م له‌ ده‌ره‌وه‌ی‌ حیزب، هه‌وڵی‌ حیزبه‌ سیاسییه‌كانی‌ كوردستان، هه‌وڵی‌ پارڵمانتاران ، هه‌وڵی‌ شه‌خسییه‌ته‌ كورده‌كان، هه‌مووی‌ له‌ عه‌رزی‌ درا، ئێمه‌ ناچار بووین كه‌ ته‌سمیمێكی‌ دیكه‌ بگرین، ته‌سمیم به‌ چی‌؟، نه‌ به‌ جیابوونه‌وه‌ ـ ئیستلاحێكی‌ زۆر نادروسته‌ كه‌ گوایه‌ ژماره‌یه‌ك جیابوونه‌وه‌، ئه‌ویش ماشه‌ڵلا به‌و ته‌عبیره‌ی‌ كه‌ ده‌گوترێ‌: ژماره‌یه‌ك كادر و پێشمه‌رگه‌ی‌ حیزبی‌ دیموكراتی‌ كوردستان جیابوونه‌وه‌ (ئه‌وه‌ ده‌بینن ئه‌و ژماره‌یه‌)!! ئێمه‌ ناچار بووین كه‌ ئه‌و له‌تبوونه‌ قبووڵ بكه‌ین، بۆ؟! چونكی‌ ئێمه‌ ده‌زانین زۆر به‌ داخه‌وه‌ حیزبه‌كه‌مان فه‌له‌ج ببوو، باسی‌ شوعار ناكه‌ین، شۆعار هیچ نیه‌. به‌ڵام له‌ عه‌مه‌لدا ئه‌م حیزبه‌ فه‌له‌ج ببوو، تواناكانی‌ ئه‌م حیزبه‌ی‌ سه‌رفی‌ كێشه‌ی‌ نێو خۆیی‌ بوون هه‌رچی‌ هه‌وڵیشماندا كه‌ تواناكانمان ئازاد كه‌ین له‌ چوارچێوه‌ی‌ حیزبی‌ واحیددا، هه‌وڵه‌كانمان تێكه‌ڵ بكه‌ین بۆ به‌ره‌نگار بوونه‌وه‌ی‌ موخالیفان و دوژمنانی‌ ماف و ئازادییه‌كانی‌ میلله‌تی‌ كورد سه‌رنه‌كه‌وتین. بۆیه‌ مه‌جبوور بووین ئه‌و له‌ت بوونه‌ قبووڵ بكه‌ین، بۆ ئه‌وه‌ی‌ تواناكانمان ئازاد بكه‌ین.

به‌ ئیجازه‌ی‌ هاوڕێیانی‌ رێبه‌ریی‌ حیزب، له‌ پشتی‌ ئه‌م تریبوونه‌وه‌، به‌ قه‌د ئه‌وه‌نده‌ی‌ كه‌ ئێمه‌ به‌شمان به‌ خه‌تای‌ له‌تبوونی‌ حیزبه‌وه‌ هه‌یه‌ داوای‌ لێبووردن له‌ هه‌موو كۆمه‌ڵانی‌ خه‌ڵكی‌ كوردستان ده‌كه‌م. به‌ڵام هه‌ر له‌و كاته‌دا به‌ كۆمه‌ڵانی‌ خه‌ڵكی‌ كوردستان با ئه‌و ته‌عه‌هوده‌ بسپێرین ـ هه‌موومان ـ كه‌ به‌ هه‌وڵ و تێكۆشانمان به‌ یه‌كریزی‌ و یه‌كگرتنمان، به‌ شه‌و و شه‌ونخوونیمان، به‌ كردنه‌وه‌ی‌ ده‌رگاكانمان به‌ره‌و رووی‌ فكره‌ تازه‌كان، ئینسانه‌ هه‌ڵبژارده‌كانی‌ كۆمه‌ڵ كارێك بكه‌ین، ئه‌م رووداوه‌ ببێته‌ له‌ دایك بوونه‌وه‌یه‌كی‌ تازه‌ بۆ حیزبی‌ دیمۆكراتی‌ كوردستان، كارێك بكه‌ین نائۆمێدی‌ جێگای‌ خۆی‌ بدات به‌ ئۆمێد و گه‌ش بینی‌ ، فرمێسكه‌كان ببێت به‌ قاقا. ئه‌من له‌و پێوه‌ندییه‌دا له‌ لایه‌ن خۆم و هاورێیانی‌ رێبه‌رایه‌تیی‌ حیزبه‌وه‌ ـ كه‌ شانازی‌ ئه‌وه‌یان به‌ من دا ئه‌من لێره‌ وتاری‌ ئه‌وان پێشكه‌ش بكه‌م ـ سپاسی‌ ته‌ك ته‌كی‌ ئێوه‌ ده‌كه‌م كه‌ هه‌م له‌ فشار بۆ سه‌ر ئه‌و زۆرینه‌ی‌ رێبه‌رایه‌تیی‌دا، بۆ ئه‌وه‌ی‌ ته‌سلیم بێ‌ به‌ یه‌كڕیزی‌ حیزب و پێكه‌وه‌ هێشتنه‌وه‌ی‌ ئه‌م حیزبه‌، هه‌م له‌وه‌دا یه‌كده‌نگ بوون، خۆڕاگر بوون له‌ گه‌ڵ هه‌موو ئه‌و فشاره‌ی‌ له‌ سه‌ریان بوو، له‌به‌رامبه‌ر له‌ په‌راوێز خستن، مجازات كردن، به‌ملاوئه‌ولادا دان، مقاوم بوون و مانه‌وه‌، هه‌م له‌و چه‌ند رۆژه‌دا كه‌ به‌ سه‌ر له‌تبوونی‌ حیزبدا تێده‌په‌رێ‌ ئه‌وپه‌ری‌ مه‌سئولییه‌تیان له‌ خۆیان نیشان داوه‌، ئه‌و په‌ری‌ بزرگواریان له‌ خۆیان نیشان داوه‌. نه‌یانهێشتوه‌ شتێك رووبدا كه‌ كۆمه‌ڵانی‌ خه‌ڵكی‌ كوردستان لێی‌ نیگه‌رانن.

جار و بار له‌ هاوڕێ پێشمه‌رگه‌كانم بیستوه‌ كه‌ پێیان وابووه‌ ئه‌وه‌ ته‌سلیم بوونه‌ و زه‌عفه‌ و ئه‌وه‌... ، نه‌خیر ئه‌وه‌ "بزرگوار"ی‌یه‌. شه‌ڕ به‌ هه‌موو ترسنۆكێك هه‌ڵ‌دایسێ‌، به‌ڵام سولح به‌ پیاوانی‌ گه‌وره‌ ده‌پارێزرێ‌. هه‌موو ئینسانێكی‌ ـ هه‌رچه‌ند چووكه‌ڵه‌ش ـ ده‌توانی‌ تۆڵه‌ بستێنی‌، به‌ڵام گوزه‌شت كاری‌ ئینسانه‌ گه‌وره‌كانه‌.

ئێمه‌ ئه‌و حیزبه‌ له‌ نوێ‌ درووست ده‌كه‌ینه‌وه‌، ده‌یگێرینه‌وه‌ سه‌ر رێبازی‌ پێشكه‌وتووانه‌ی‌ خۆی‌ كه‌ حیزبی‌ دیموكراتی‌ كوردستانی‌ له‌ كۆنه‌وه‌ تا ئێستا پێ ناسراوه‌.

ئێمه‌ ئازادیی‌ ده‌ربڕین، ئازادیی‌ نه‌زه‌ران له‌ نێو ریزه‌كانی‌ حیزب‌دا، هه‌روا كه‌ پره‌نسیپی‌ حیزبه‌ و هه‌روه‌كوو كۆنگره‌كانی‌ 10 و 11 و 12 بڕیاریان له‌سه‌ر داوه‌، له‌ نێو حیزبدا بۆ هه‌موو تاكه‌كان و بۆ هه‌موو گرووپه‌كان ته‌زمین ده‌كه‌ین. ئێمه‌ پێشوازی‌ له‌ هه‌موو فكرێكی‌ تازه‌ ده‌كه‌ین، هه‌موو بیرێكی‌ تازه‌ و ئیده‌یه‌كی‌ تازه‌ موناقه‌شه‌ ده‌كه‌ین، ئیجازه‌ی‌ موناقه‌شه‌ی‌ ئازادی‌ پێ‌ده‌ده‌ین تا باشترین نه‌تیجه‌ گونجاو ده‌گه‌ڵ‌ ده‌سكه‌وته‌كانی‌ عه‌سری‌ ئه‌مرۆی‌ لێ‌ به‌ده‌ست بێنین.

ئه‌م حیزبه‌ هی‌ هه‌مووانه‌، به‌ هه‌مووانه‌وه‌ جوانه‌، ئه‌و شوعاره‌ی‌ ئێمه‌ له‌مێژه‌ هه‌ڵ‌مانگرتوه‌، ده‌بێ‌ ئه‌م حیزبه‌ له‌ هه‌موو تواناكانی‌، له‌ هه‌موو نه‌وعه‌ جۆراوجۆری‌یه‌كانی‌ به‌ قازانجی‌ حیزب كه‌ڵك وه‌ربگرێ‌، بێ‌ له‌به‌رچاوگرتنی‌ جینس، مه‌نته‌قه‌، دین، مه‌زهه‌ب و هه‌ر جۆراوجۆری‌یه‌كی‌ دیكه‌.

هه‌روه‌كوو له‌ پێڕه‌وی‌ نێوخۆی‌ حیزبیش‌دا هه‌یه‌، سه‌ره‌ڕۆیی‌‌و ته‌كڕه‌وی‌ له‌ حیزب‌دا جێی‌ نیه‌ و جارێك بۆ هه‌میشه‌ ده‌بێ‌ ماڵائاوایی‌ له‌ حیزبی‌ دیمكراتی‌ كوردستان بكات. ده‌بێ‌ هه‌موو بڕیاره‌كانمان نه‌تیجه‌ی‌ ئیراده‌ی‌ موشته‌ره‌كمان بێت.

ئێمه‌ ده‌بێ‌ موتابقی‌ رووحی‌ عه‌سر له‌ شه‌فافییه‌ت كه‌ڵك وه‌ربگرین، سیاسه‌ته‌كانمان، بڕیاره‌كانمان بۆ خه‌ڵك روون بن، بنه‌مای‌ روونیان هه‌بێ‌، له‌ ئیراده‌ی‌ خه‌ڵكه‌وه‌ سه‌رچاوه‌ بگرن، له‌ خزمه‌تی‌ قازانجه‌كانی‌ میلله‌تی‌ خۆمان‌دا بن. ده‌بێ‌ رێز بۆ ئازادیی‌ بیر و قه‌ڵه‌م و ئه‌ندیشه‌ دابنێین. ده‌بێ‌ پیاوان و ژنانی‌ به‌توانا و لێزان، نه‌ك هه‌ر سه‌ركوت نه‌كه‌ین، به‌ڵكوو ده‌ستیان بگرین و كۆمه‌كیان بكه‌ین، وا بكه‌ین كه‌ حیزبه‌كه‌مان وه‌پێش بخه‌ن. حیزبێك كه‌ بیهه‌وێ‌ نوێ‌ بێته‌وه‌، ده‌بێ‌ به‌ رووحی‌ نوێ‌ ته‌غزیه‌ بكرێ‌.

ئێمه‌ ده‌زانین كه‌ حیزبی‌ دیموكرات ـ ئه‌مه‌یان به‌ داخه‌وه‌ ـ له‌ كۆنه‌وه‌ تائێستا له‌گه‌ڵ‌ موشاره‌كه‌تی‌ كه‌می‌ ژنان له‌ ئیداره‌ی‌ ئه‌م حیزبه‌دا، له‌ به‌ڕێوه‌به‌ریی‌ ئه‌م حیزبه‌دا به‌ره‌وڕوویه‌، ئێمه‌ موته‌عه‌هیدین، له‌سه‌رمانه‌ میكانیزمێك دروست بكه‌ین كه‌ به‌شداریی‌ ژنان له‌ ئیداره‌ی‌ حیزب‌دا، له‌ ئۆرگانه‌كانی‌ به‌ڕێوه‌به‌ری‌دا ته‌زمین بكات، به‌ شوعار نا، به‌ میكانیزم.

ئه‌گه‌ر هه‌ر به‌ پێوانه‌ كۆنه‌كان عه‌مه‌ل بكه‌ین، هه‌تا ریش‌سپی‌یه‌كی‌ وه‌كوو من و كاك جه‌لیل و ره‌فیقه‌كانی‌ دیكه‌ هه‌بن ره‌نگه‌ رێگا به‌ لاوه‌كان نه‌ده‌ین بێنه‌ نێو رێبه‌ریی‌ حیزبه‌وه‌ و فكری‌ تازه‌ بێنه‌ نێو ئه‌و رێبه‌ری‌یه‌وه‌، كه‌وابێ‌ ده‌بێ‌ بۆ ئه‌وانیش ئێمه‌ میكانیزم دروست بكه‌ین كه‌ ته‌زمین بكه‌ین حه‌تمه‌ن لاوان و خوێنی‌ تازه‌، خوێنی‌ تازه‌ نه‌ك هه‌ر له‌به‌ر ئه‌وه‌ی‌ لاوه‌، له‌به‌ر ئه‌وه‌ی‌ هه‌م لاوه‌، هه‌م بیری‌ نوێی‌ پێیه‌، هه‌موو لاوێك بیری‌ تازه‌ی‌ پێ‌نیه‌ و هه‌موو پیرێكیش بیری‌ كۆنی‌ پێ‌نیه‌، به‌ڵام لاوانی‌ تازه‌ پێ‌گه‌یشتوو و شۆڕشگێڕ به‌ بیری‌ تازه‌وه‌ ده‌بێ‌ ته‌زمین بكه‌ین كه‌ بێن له‌ رێبه‌ریی‌ ئه‌م حیزبه‌دا نه‌قش بگێڕن.

ئه‌وه‌مان پێ‌ راسته‌ كه‌ قازانجی‌ كۆمه‌ڵ‌، قازانجی‌ گشتی‌ موقه‌دده‌مه‌ له‌سه‌ر قازانجی‌ تاك به‌ڵام له‌ ئینسانان پێك دێ‌، له‌ تاكه‌كان پێك دێ‌، ئێمه‌ ده‌بێ‌ ته‌زمین بكه‌ین كه‌ تاك، (فه‌رد) شه‌خسیه‌تی‌ خۆی‌ هه‌بێ‌، خۆی‌ ببینێته‌وه‌ له‌م حیزبه ‌دا و له‌ كۆمه‌ڵی‌ ئاینده‌ی‌ كورده‌واری‌دا، ده‌بێ‌ ئازادیی‌ تاك بپارێزین تا ئه‌و جێ‌یه‌ی‌ ئازادیی‌ تاكێكی‌ دیكه‌ ده‌خاته‌ خه‌ته‌ره‌وه‌ یا قازانجی‌ گشتی‌ ده‌خاته‌ ژێرپێ‌، ده‌نا ده‌بێ‌ ئه‌و ئازادی‌یه‌ هه‌م به‌ تاك بده‌ین هه‌م به‌ گرووپ بده‌ین.

زۆر له‌مێژه‌ ئێمه‌ هه‌وڵێكمان هه‌بووه‌ كه‌ ئه‌و كه‌سانه‌ی‌ به‌ ده‌لایلێك له‌ حیزبی‌ دێمۆكرات دوور كه‌وتوونه‌وه‌ یا له‌ جێ‌دا ئینسانی‌ موسته‌قیل بوون، له‌ ده‌وری‌ حیزبه‌ سیاسی‌یه‌كان نه‌بوون، له‌ ده‌روی‌ ئه‌م حیزبه‌ كۆ بكه‌ینه‌وه‌ كه‌ به‌داخه‌وه‌ هه‌موو وه‌ختێك له‌گه‌ڵ‌ كارشكێنی‌ به‌ره‌وڕوو بووه‌. ئێمه‌ باوه‌ش بۆ ئه‌وانه‌ ده‌كه‌ینه‌وه‌، بانگهێشتنیان ده‌كه‌ین، پێشوازییان لێ‌ ده‌كه‌ین كه‌ بێن ـ ئه‌گه‌ر پێیان خۆش بوو له‌نێو ریزه‌كانی‌ حیزبدا كاربكه‌ن و سازمان بدرێن ـ پێیان خۆش نه‌بوو له‌ دایره‌یه‌كی‌ گه‌وره‌تر له‌ حیزب‌دا و بۆ قازانجێك و بۆ ئامانجێكی‌ گه‌وره‌تر له‌ ئامانج و شوعاری‌ ستراتێژیكی‌ حیزب هه‌وڵ‌ بده‌ن.

هه‌ڵوێستمان به‌رانبه‌ر به‌ كۆماری‌ ئیسلامیی‌ ئێران وه‌ك خۆیه‌تی‌، نه‌گۆڕه‌. ئه‌و رێژیمه‌ به‌ رێژیمێكی‌ دژی‌ ئینسانی‌ ده‌زانین، به‌ دوژمنی‌ ماف و ئازادی‌یه‌كانی‌ میلله‌تی‌ كورد و هه‌موو گه‌لانی‌ ئێرانی‌ ده‌زانین. خه‌باتمان بۆ گۆڕینی‌ ئه‌و نیزامه‌ به‌ نیزامێكی‌ دیموكراتیك و ئینسانی‌ له‌ هه‌موو شێوه‌كانی‌ مومكین‌دا به‌ پێی‌ هه‌لومه‌رج ئیدامه‌ ده‌ده‌ین.

سیاسه‌تی‌ ئه‌م رێژیمه‌ له‌ باره‌ی‌ تیرۆریزم و تیرۆریزمپه‌روه‌ری‌یه‌وه‌، له‌باری‌ دوژمنایه‌تی‌ ده‌گه‌ڵ‌ ئاشتیی‌ ناوچه‌یی‌ و جیهانی‌یه‌وه‌، له‌باره‌ی‌ خۆچه‌كداركردنه‌وه‌ و به‌ تایبه‌تی‌ خۆچه‌كداركردن به‌ چه‌كی‌ ئه‌تۆمی‌یه‌وه‌ به‌ ته‌واوی‌ مه‌حكووم ده‌كه‌ین.

كۆماری‌ ئیسلامی‌ له‌ حاڵێكدا به‌ میلیارد دۆڵار خه‌رجی‌ وه‌ده‌ست هێنانی‌ سیلاحی‌ ئه‌تۆمی‌ ده‌كا كه‌ خه‌ڵكه‌كه‌مان ته‌نانه‌ت بۆ نانیش به‌شێكی‌ زۆری‌ موحتاجه‌. زیاتر له‌ یه‌ك له‌سێی‌ خه‌ڵكی‌ وڵاته‌كه‌مان له‌ژێر خه‌تی‌ فه‌قردا ده‌ژی‌، له‌ وڵاتێكی‌ ده‌وڵه‌مه‌نددا. هه‌ر ئه‌و رۆژانه‌ گوێتان لێیه‌ هه‌موو مایه‌حتاجی‌ ژیان گران بووه‌ ته‌نانه‌ت نانیش كه‌ خواردنی‌ سه‌ره‌كیی‌ هه‌موو ئینسانه‌كانه‌.

به‌رانبه‌ر به‌ هێزه‌ كوردستانی‌یه‌كان، ئێمه‌ هێزه‌ سیاسی‌یه‌كانی‌ كوردستان ـ له‌ كوردستانی‌ ئێران ـ ئه‌و هێزه‌ سیاسی‌یانه‌ی‌ ناسراون، ئه‌و هێزه‌ سیاسی‌یانه‌ی‌ كه‌ خه‌ت و رێبازی‌ سیاسی‌یان روونه‌، هه‌موویان به‌ دۆست و هاوكار و هاوپه‌یمانی‌ خۆمان ده‌زانین. هه‌موو هه‌وڵه‌كانمان ده‌خه‌ینه‌ كار بۆ ئه‌وه‌ی‌ له‌ زووترین وه‌ختی‌ مومكین‌دا ده‌گه‌ڵیان به‌ ته‌وافوق بگه‌ین له‌سه‌ر پێك هێنانی‌ یه‌كگرتنێكی‌ كوردستانی‌ ـ جا له‌ چوارچێوه‌ی‌ به‌ره‌دا، یا له‌ چوارچێوه‌ی‌ ناوێك‌دا كه‌ له‌سه‌ری‌ پێك دێین ـ پێمان وایه‌ ئه‌وه‌ زه‌رووره‌تی‌ موباره‌زه‌یه‌. له‌مێژه‌ ئه‌وه‌مان گوتوه‌، ئه‌وه‌ تازه‌ نیه‌، گوتوومانه‌ حیزبی‌ ئێمه‌ بۆ ئه‌وه‌ی‌ له‌ ئاڵوگۆڕه‌كانی ئاینده‌ی‌ ئێران‌دا كه‌ چاوه‌ڕوان ده‌كرێ‌، بتوانێ‌ نه‌خشی‌ خۆی‌ بگێڕێ‌ ده‌بێ‌ له‌ چه‌ند بواردا هه‌وڵ‌ بدا: پێش هه‌مووان ریزه‌كانی‌ خۆی‌ پته‌و بكا، له‌ پاشان ریزی‌ خۆی‌ و هێزه‌ كوردستانی‌یه‌كان پته‌و بكا، ئه‌مجار ده‌گه‌ڵ‌ ئه‌و هێزانه‌ی‌ كه‌ بۆ وه‌دیهێنانی‌ ئامانجه‌كانی‌ به‌شێك له‌ میلله‌تانی‌ ئێران تێ‌ده‌كۆشن هاوكاری‌ بكات، دواتر له‌ سه‌تحی‌ ئێران‌دا له‌گه‌ڵ‌ هێزه‌ نیشتمانپه‌روه‌ره‌كان هاوكاری‌ بكا. ده‌بێ‌ له‌ هه‌مووی‌ ئه‌و بوارانه‌دا هه‌وڵ‌ بده‌ین و خۆمان به‌ موته‌عه‌هید ده‌زانین. پێش هه‌مووانیش ـ دیاره‌ ئه‌وه‌ی‌ وه‌پێشمان خستووه‌ ئه‌ویان موهیممه‌ ـ ریزه‌كانی‌ خۆمان پته‌و بكه‌ین بۆ ئه‌وه‌ی‌ له‌ هه‌موو حیساباتێكدا وه‌زنی‌ خۆمان دابنێین وه‌ك حیزبی‌ دیموكراتی‌ كوردستان.

هێزه‌ سیاسی‌یه‌كانی‌ دیكه‌ی‌ كورد له‌ هه‌موو به‌شه‌كانی‌ كوردستان‌دا به‌ دۆست و برا و هاوپه‌یمان ده‌زانین. پیرۆزبایی‌ له‌ ده‌سكه‌وته‌كانی‌ میلله‌تی‌ كورد له‌ كوردستانی‌ گه‌رمێن ـ به‌ قه‌ولی‌ كورده‌واریی‌ خۆمان ـ ده‌كه‌ین و ده‌ستخۆشیان پێ‌ده‌ڵێین. له‌ پێوه‌ندی‌یه‌كانمان‌دا حیسابێكی‌ تایبه‌تی‌ بۆ ئه‌و به‌شه‌ی‌ كوردستان، به‌ تایبه‌تی‌ بۆ دوو هێزی‌ سه‌ره‌كی‌ كه‌ له‌ واقیع‌دا ده‌سه‌ڵاتی‌ كوردستانیش به‌ ده‌ره‌جه‌ی‌ یه‌كه‌م له‌ ده‌ستی‌ ئه‌واندایه‌، حیسابێكی‌ تازه‌ بۆ ئه‌و دوو هێزه‌ ده‌كه‌ین. ئه‌زموونی‌ كوردستانی‌ عێراق هه‌م به‌ مایه‌ی‌ شانازیی‌ هه‌موو میلله‌تی‌ كورد ده‌زانین، هه‌م به‌ ته‌جره‌به‌یه‌ك و نموونه‌یه‌كی‌ باش ده‌زانین بۆ چاره‌سه‌ریی‌ مه‌سه‌له‌ی‌ كورد له‌ به‌شه‌كانی‌ دیكه‌ی‌ كوردستان‌دا. ئێمه‌ شانازی‌ ده‌كه‌ین كه‌ كورد له‌ عێراق‌دا نه‌خشێكی‌ وه‌ده‌س هێناوه‌ كه‌ ئێستێ‌ نه‌ك هه‌ر چاره‌نووسی‌ به‌شی‌ ئه‌ساسی‌ له‌ كوردستانی‌ به‌ده‌سته‌وه‌یه‌، به‌ڵكوو بۆته‌ مشوورخۆر و خه‌مخۆری‌ هه‌موو عێراقی‌یه‌كانیش، هه‌موو عێراقی‌یه‌كانیش چاویان له‌ هه‌وڵ‌ و ته‌قه‌لای‌ كورده‌كانه‌ كه‌ بۆ گه‌یشتن به‌ دوارۆژێكی‌ رووناكتر كۆمه‌كیان بكه‌ن.

ئێمه‌ پێمان‌وایه‌ كه‌ بزووتنه‌وه‌ی‌ كورد له‌گه‌ڵ‌ ئه‌وه‌ی كه‌ هه‌لومه‌رجی‌ جیاوازی‌ هه‌یه‌، له‌ هه‌ر وڵاتێك‌دا نوقته‌ی‌ هاوبه‌شی‌ زۆرن، له‌گه‌ڵ‌ هه‌مووی‌ ئه‌وانه‌دا ده‌كرێ‌ و ده‌بێ‌ هێزه‌ سیاسی‌یه‌كانی‌ كوردستان پێكه‌وه‌ هاوكاری‌ بكه‌ن له‌سه‌ر هێندێك شت رێك كه‌ون بۆ ئه‌وه‌ی‌ كورد بتوانێ‌ به‌ تایبه‌تی‌ له‌ كۆڕ و كۆمه‌ڵه‌ جیهانی‌یه‌كان‌دا به‌ یه‌ك ده‌نگ قسه‌ بكات و خه‌ڵك تێ‌بگات كه‌ كورد چی‌ ده‌وێت. تۆزێك به‌ولاوه‌تر ده‌چم، ئه‌وه‌ كوفر نیه‌ زۆر جارمان گوتوه‌ و ئه‌وه‌مان له‌ رێبه‌ری‌ شه‌هید و گه‌وره‌مان دوكتور قاسملوو بۆ به‌جێ‌ماوه‌ كه‌ ده‌ڵێ‌ "ئه‌گه‌ر رۆژێك كوردستان یه‌ك بگرێته‌وه‌ ئه‌وه‌ جیابوونه‌وه‌ نیه‌ ئه‌وه‌ یه‌كگرتنه‌وه‌یه‌"، به‌ڵێ‌ یه‌كگرتنه‌وه‌ی‌ كوردستان هه‌قی‌ موسه‌لله‌می‌ میلله‌تی‌ كورده‌ و كورد نابێ‌ له‌ ترسی‌ ئه‌وه‌ی‌ پێی‌ بڵێن "جوداییخواز" واز له‌و هه‌قه‌ی‌ بێنێ‌، ده‌بێ‌ داوای‌ بكات، ده‌بێ‌ كاری‌ بۆ بكات و ده‌بێ‌ كۆمه‌ڵانی‌ خه‌ڵكی‌ دنیایه‌، بیروڕای‌ گشتیی‌ جیهانی‌ و ته‌نانه‌ت ده‌وڵه‌ته‌كانیش حاڵی‌ بكات. به‌ قه‌ولی‌ هه‌ژاری‌:

ئه‌گه‌ر كوردیش ببن به‌ پیاو وه‌ك گــه‌لانی‌ خودا پــــێداو
هــیچ زیانی‌ بۆ پــه‌ز نـابێ‌ كه‌س له‌ لای‌ خوا ناحه‌ز نابێ‌

ئازیزان!

بۆ ئه‌وه‌ی‌ قسه‌كانم له‌وه‌ی‌ زیاتر درێژ نه‌بنه‌وه‌، سه‌عی‌ ده‌كه‌م هێندێك شت به‌ كورتی‌ به‌سه‌ریان‌دا تێپه‌ڕم. هه‌ڵوێسته‌ سیاسی‌یه‌كانی‌ ئێمه‌ به‌شێكیان هه‌ر ئێستا به‌ناوی‌ "هێڵه‌ گشتی‌یه‌كان" بڵاو بوونه‌ته‌وه‌، له‌مه‌ودواش هه‌موو رۆژێ‌ ئێمه‌ ئیزهاری‌ نه‌زه‌ر ده‌كه‌ین، مه‌وزیع ده‌گرین له‌ سه‌ر مه‌سایلی‌ سیاسی‌، ئێوه‌ ته‌عقیبیان ده‌كه‌ن و لێیان ئاگادار ده‌بن. كورته‌ی‌ قسه‌ ئه‌وه‌یه‌:

ئێمه‌ ده‌مانهه‌وێ‌ ئه‌م حیزبه‌ نوێ‌ بكه‌ینه‌وه‌. پێمان خۆش بوو حیزبی‌ دیموكراتێكی‌ یه‌كپارچه‌ نوێ‌ بكه‌ینه‌وه‌، به‌ڵام ئه‌گه‌ر ئێستا نه‌مانتوانیوه‌ ئه‌وه‌ بكه‌ین، ئه‌و حیزبی‌ دیموكراتی‌ كوردستانه‌ی‌ كه‌ ئێستا بۆخۆمان تێیدا تێ‌ده‌كۆشین ده‌بێ‌ به‌ هه‌وڵ‌ و هیممه‌تی‌ هه‌مووان بكه‌ینه‌ ئه‌و حیزبه‌ كه‌ میلله‌تی‌ كورد چاوه‌ڕوانیه‌تی‌، كه‌ میلله‌تی‌ كورد ئومێدی‌ پێ‌به‌ستوه‌.

به‌ڵام پێم خۆشه‌ لێره‌دا له‌ پێوه‌ندی‌ له‌گه‌ڵ‌ هاوڕێیانی‌ پێشوومان دا هێندێك شت بڵێم، هه‌روه‌كوو گوتم ئێمه‌ پێمان خۆش نه‌بوو دووچاری‌ ئه‌و رۆژه‌ی‌ بین و له‌ نه‌تیجه‌ی‌ به‌داخه‌وه‌ نه‌وعێك پاوانخوازی‌ و بڵێین راوه‌ستان له‌سه‌ر هه‌ڵوێسته‌كانی‌ خۆیان ئێمه‌ تووشی‌ ئه‌و رۆژه‌ بووین. به‌ڵام ئێستا كه‌ وامان لێ‌ هاتوه‌ ئێمه‌ پێمان خۆشه‌ ئه‌و شتانه‌ له‌نێو خۆمان‌دا ره‌عایه‌ت بكه‌ین. پێش هه‌موو شتێك ئێمه‌ ده‌بێ‌ پێوه‌ندیمان له‌گه‌ڵ‌ وان، له‌گه‌ڵ‌ به‌رپرسه‌كان و رێبه‌ره‌كانیان تا ده‌گاته‌ پێشمه‌رگه‌ی‌ ساده‌، ده‌بێ‌ خۆش بێ‌. ئه‌گه‌ر سه‌دجار جوابی‌ سڵاومان نه‌ده‌نه‌وه‌، ئێمه‌ سه‌لامیان لێ‌ده‌كه‌ین. سه‌لام وشه‌یه‌كی‌ عه‌ڕه‌بی‌یه‌ به‌ مه‌عنای‌ ئاشتی‌یه‌، به‌ڵێ‌ ئێمه‌ له‌گه‌ڵ‌ ئه‌وان حه‌ز له‌ ئاشتی‌ ده‌كه‌ین، ئه‌وان دوژمنی‌ ئێمه‌ نین، خۆمان به‌ دوژمنی‌ ئه‌وان نازانین و ئه‌وانیش به‌ دوژمنی‌ خۆمان نازانین. له‌ پاشان پێم خۆشه‌ تكا بكه‌م كه‌ هه‌موومان زمانمان، قه‌ڵه‌ممان خاوێن بێ‌ له‌ هه‌ر حه‌مله‌یه‌كی‌ ناشیرین بۆ سه‌ر ئه‌وان. ئێمه‌ ده‌بێ‌ فه‌زایه‌ك بخوڵقێنین ـ زیاتریش مه‌سئولییه‌ته‌كه‌ی‌ له‌سه‌ر ئێمه‌یه‌ ـ لێتان نه‌شارمه‌وه‌ خه‌ڵكی‌ كوردستانیش ئه‌و مه‌سئولییه‌ته‌ی‌ ده‌خاته‌ سه‌رشانی‌ ئێمه‌ كه‌ ده‌بێ‌ ئێمه‌ فه‌زایه‌ك بخوڵقێنین ـ ئه‌گه‌ر نه‌مانتوانیوه‌ پێكه‌وه‌ له‌نێو یه‌ك حیزب‌دا خه‌بات بكه‌ین، سبه‌ینێ‌ له‌ به‌ره‌یه‌ك‌دا پێكه‌وه‌ هاوكاری‌ بكه‌ین.

له‌ مقابله‌ی‌ سیاسی‌دا، ئه‌وه‌ شێوه‌یه‌كی‌ زۆر مه‌زمووم و ناشیرینه‌ كه‌ پیاو هه‌ر حه‌مله‌ بكاته‌ سه‌ر خه‌ڵكی‌ ئه‌وه‌ی كه‌ ئێستا ئه‌و هاوڕێیانه‌مان ده‌یكه‌ن.  ته‌لویزیۆنێك كه‌ به‌ زه‌حمه‌تی‌ هه‌موومان و به‌ كاری‌ هه‌موومان پێك هاتوه‌ ئێستا شه‌و و رۆژه‌كه‌ی‌ به‌شێكی‌ زۆری‌ بۆ ئه‌وه‌ ته‌رخان ده‌كرێ‌ كه‌ به‌دگۆیی‌ ئێمه‌ی‌ له‌سه‌ر بكرێ‌. له‌ پاشان هێندێك شتی‌ وا ده‌نووسن یان ده‌ڵێن كه‌ به‌داخه‌وه‌ فڕی‌ به‌ سه‌ر هه‌قیقه‌ته‌وه‌ نیه‌.

ئێمه‌ لێره‌دا هه‌ر ئه‌وه‌ ده‌ڵێین، ئه‌و هاوڕێیانه‌مان ئه‌گه‌ر باوه‌ڕیان به‌ سیحه‌تی‌ قسه‌كانی خۆیان هه‌یه‌ با مل بۆ ئه‌وه‌ راكێشن هه‌ر له‌ ته‌له‌ویزیۆنی‌ تیشك مونازیره‌یه‌ك، دوو مونازیره‌ بكه‌ین. قسه‌ی‌ خۆمان بۆ خه‌ڵكی‌ بكه‌ین. با مل بۆ ئه‌وه‌ راكێشن كه‌ نه‌واره‌كانی‌ كۆنگره‌ی‌ سێزده‌ ـ كه‌ پێیان وایه‌ ئه‌وان هی‌ كۆنگره‌ی‌ سێزده‌ن و ئێمه‌ بێگانه‌ین له‌ كۆنگره‌ی‌ سێزده‌ ـ كۆنگره‌ی‌ سێزده‌ هه‌مووی‌ هی‌ ئێمه‌یه‌، شته‌ سیاسی‌یه‌كانیشی‌ هه‌مووی‌ هی‌ ئێمه‌ن، كه‌وابێ‌ كۆنگره‌ی‌ سێزده‌ ئێمه‌ قبووڵمانه‌، هه‌موو بڕیاره‌كانیشمان قبووڵه‌، حه‌تا بڕیارێكی‌ خراپی‌ كه‌ تێیدا درا بۆ سانترالیزه‌كردنی‌ حیزب ( بۆ ئه‌وه‌ی‌ درێژ نه‌بێته‌وه‌ ناچمه‌ سه‌ری‌) ئه‌ویشمان چونكی‌ بڕیاری‌ كۆنگره‌ بوو قبووڵمان كردوه‌. با ئه‌و نه‌وارانه‌ هه‌موو بڵاو بكه‌نه‌وه‌ تا خه‌ڵك بزانێ‌ كۆنگره‌ی‌ سێزده‌ به‌رهه‌می‌ فكر و كاری‌ كێ‌ بووه‌.

له‌ به‌ربه‌ره‌كانێی‌ سیاسی‌دا ئه‌و كه‌سه‌ هجووم ده‌كاته‌ سه‌ر خه‌ڵكی‌ كه‌ قسه‌ی‌ نیه‌ خۆی‌ پێ‌ بناسێنێ‌، خۆی‌ پێ‌ ته‌عریف بكا. ئێمه‌ قسه‌مان هه‌یه‌ بۆ خه‌ڵكی‌، قسه‌مان هه‌یه‌ خۆی‌ پێ‌ ته‌عریف بكه‌ین. له‌و ململانێیه‌دا ئه‌و كه‌سه‌ نایباته‌وه‌ كه‌ قسه‌ی‌ كاڵتر ده‌كا، كه‌ جنێوی‌ گه‌وره‌تر ده‌دا، كه‌ بوختان ده‌كا. ئه‌و كه‌سه‌ به‌ره‌نده‌یه‌ كه‌ شتی‌ ئوسوولی‌ مه‌تره‌ح ده‌كا، شتی‌ وا ده‌ڵێ‌ كه‌ خه‌ڵك تێی‌ بگا، خه‌ڵك قبووڵی‌ بێ‌. كه‌وابێ‌ ئێمه‌ نابێ‌ بكشێین به‌ دوای‌ ئه‌وه‌دا. له‌و پێوه‌ندی‌یه‌دا پێم خۆشه‌ جارێكی‌ دیكه‌ له‌ پێوه‌ندی‌ له‌گه‌ڵ‌ ئه‌و باسانه‌دا كه‌ له‌ ئینتێرنێت دێنه‌ گۆڕێ‌ قسه‌ی‌ خۆم و به‌ ئیجازه‌ی‌ هاوڕێیانی‌ رێبه‌ریی‌ حیزب، قسه‌ی‌ هه‌مووان بكه‌م. ئێمه‌ هه‌روه‌كوو زۆرجاری‌ دیكه‌ وتوومانه‌ ئه‌و جۆره‌ نووسینه‌ سه‌خیفانه‌ له‌ ته‌ره‌ف هه‌ر كه‌سه‌وه‌ بن مه‌حكووم ده‌كه‌ین، پێمان وایه‌ زۆر شت له‌ دژی‌ ئه‌و هاوڕێیانه‌ی‌ دیكه‌مان ده‌گوترێ كه‌ كاری‌ دڵسۆزان نیه‌، ره‌نگه‌ دوژمنانمان بیكه‌ن بۆ ئه‌وه‌ی‌ ئه‌وان وابزانن ئێمه‌ كردوومانه‌. ئێمه‌ له‌ هه‌مووی‌ بێزارین. له‌م تریبوونه‌وه‌ جارێكی‌ دیكه‌ راده‌گه‌یه‌نم هه‌ر شتێكی‌ به‌ بێ‌ناو له‌ سایته‌كانی‌ ئینتێرنێت بڵاو بێته‌وه‌ كه‌ هجووم و قسه‌ی‌ ناشیرینی‌ تێدایه‌ ئێمه‌ وه‌ك حیزبی‌ دیموكراتی‌ كوردستان لێی‌ بێزار و بێ‌به‌رین.

له‌ كۆتایی‌دا جارێكی‌ دیكه‌ به‌و بۆنه‌وه‌ پیرۆزبایی‌ له‌ ئێوه‌ و له‌ هه‌موو پێشمه‌رگه‌كان ده‌كه‌م.

ـ سڵاو له‌ 26ی‌ سه‌رماوه‌ز رۆژی‌ پێشمه‌رگه‌ی‌ كوردستان

ـ سڵاو له‌ هه‌وڵ‌ و هیممه‌ت و فیداكاریی‌ پێشمه‌رگه

ـ سڵاو له‌ گیانی‌ پاكی‌ شه‌هیدان، به‌تایبه‌ت شه‌هیدانی‌ رێبه‌ر، قازی‌، قاسملوو و شه‌ره‌فكه‌ندی

ـ سڵاو له‌ خه‌ڵكی‌ پێشمه‌رگه‌په‌روه‌ر و دیموكرات په‌روه‌ری‌ كوردستان

ـ سڵاو له‌ حیزبی‌ دیموكراتی‌ كوردستان

ـ ئێوه‌ش هه‌ر ساغ و سه‌ربه‌رز و سه‌ركه‌وتوو بن.

زۆر سپاس


 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.