Ö:: هۆ داره‌به‌ن.....!

نووسینی: خالید شه‌یدا

هۆ داره‌به‌ن.....!
خۆزگه‌م به‌ نیسی ئێوارانت
كه‌ له‌ ژێرت دا
ژوانم ده‌گرت
ده‌ستم ده‌خسته‌
ناو كه‌زیه‌ زێرینه‌كانی
ئه‌و كچه‌ و
قژ و په‌رچه‌مم بۆن ده‌كرد
به‌ په‌نجه‌كانیشم
مه‌مكۆڵه‌م هه‌ڵده‌گڵۆفین
به‌ لێوه‌كانیشم
كوڵمه‌كانم ماچ ده‌كرد
ئاخ داره‌به‌ن
له‌وه‌تی له‌ ڕه‌گه‌وه‌
هه‌ڵكێشراوی
شوێنه‌واریشت دیار نی یه‌
نیسیشت هه‌ر نه‌ماوه‌
خۆ تۆ داڵده‌ی دڵدارانی
ئێوارانی ئه‌م ناوه‌ بووی
جێی ماچوو موچیی
كور و كچانی
وه‌رزی هاوینان و به‌هاران بووی
منی عاشق
خوشه‌ویستی كچێكم
له‌ ناو دڵ دا سه‌وز بوو بوو
ئه‌و كچه‌ی كاتێ خۆی
دڵی لێ داگیر كردم
نامده‌زانی له‌ كوێ
له‌ ژێر كام نیسی كامه‌ داره‌
له‌گه‌ڵی دا ژوان بگرم
نامده‌زانی چۆن و
له‌ كوێ قژ و په‌رچه‌می
بۆن بكه‌م
كوڵمه‌ و لێوه‌كانی
ماچ بكه‌م
ئای داره‌به‌ن
خۆزگه‌م به‌و ساتانه‌ی
كه‌ له‌ ژێر نیست دا داده‌نیشتم
تا ئه‌و ده‌هات
چاوه‌ڕێ بووم
تا خور ئاوا ده‌بوو
سه‌ری به‌ شانم ده‌كرد
منیش بۆنی
قژ و په‌رچه‌مم ده‌كرد
پڕی ناو ده‌مم ماچ ده‌بوو
ئاخ هه‌زاران ئاخ
له‌م ڕۆژانه‌ی لێم به‌ سه‌ر چوو
نایبینمه‌وه‌ جارێكی تر
ڕۆژانی تر
وا ته‌مه‌ن چوو....
نووسینی: خالید شه‌یدا
هانۆڤه‌ر

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.