Ö:: حیزبی دێموکراتی کوردستان- ئێران له‌ سویس و مژده‌ی سه‌رکه‌وتنی کۆنفرانس

کۆمیته‌ی حیزبی دێموکراتی کوردستان- ئێران له‌ وڵاتی سویس

حیزبی دێموکراتی کوردستان- ئێران له‌ سویس و مژده‌ی سه‌رکه‌وتنی کۆنفرانس.  
به‌ڕێوه‌چونی سه‌رکه‌وتوانه‌ی کۆنفرانسی ته‌شکیلاتی حیزبی دێموکراتی کوردستان- ئێران  له‌ وڵاتی سویس به‌ به‌شداری زۆربه‌ی ئه‌ندامانی حیزبه‌ خۆویسته‌که‌مان، حیزبی قازی، قاسملوو، شه‌ره‌فکه‌ندی و تێکڕای شه‌هیده‌ نه‌مره‌کانی حیزب و گه‌ل.

جێگای وه‌بیر هێنانه‌وه‌یه‌ دوای ئه‌وه‌ی کاره‌ساتی نه‌خوازراو به‌سه‌ر حیزبه‌ که‌ماندا، واته‌ داسه‌پاند‌نی له‌تبوون له‌ لایان به‌ڕێزانی زۆرینه‌ی کۆمیته‌ی ناوه‌ندی به‌ سه‌ر حیزبی دێموکراتی کوردستانی ئێران دا، ئه‌ندامانی حیزبی دێموکراتی کوردستان-ئێران بۆ ده‌ست پێکردنه‌وه‌ی سه‌رله‌نوێی کاروو تێکۆشانه‌کانیان و تیماری زامێک که‌ تیغی پاوانخوازی و ته‌ک ڕه‌وی له‌ جه‌سته‌ی حیزبه‌ ماندوو نه‌ناسه‌که‌مان (یادگاری به‌نرخی ڕێبه‌ره‌ شه‌هیدکانمان و تێکڕای شه‌هیدانی حیزب و گه‌ل)ی کردبوو، ڕۆژی 2006.12.14 له‌ کۆبونه‌وه‌یه‌کی ئه‌ندامانی دڵسۆزی حیزب، بڕیار له‌سه‌ر گرتنی کۆبونه‌وه‌یه‌کی به‌رین به‌ مه‌به‌ستی هه‌ڵبژاردنی کۆمیته‌یه‌کی کاتی(موه‌قه‌ت) له‌ وڵاتی سویس درا. له‌ کۆبه‌نه‌وه‌ی ئاماژه‌ پێکراودا، هه‌یئه‌تێک  بۆ هه‌ستان به‌و ئه‌رکه‌ دیاری کرا. سه‌ره‌نجام، به‌ خۆشیه‌وه‌ له‌ ڕۆژی 2006.12.23 کۆبونه‌وه‌ی به‌رین بۆ ئه‌ندامانی حیزبی دێموکراتی کوردستان- ئێران له‌ شاری بیل له‌وڵاتی سویس  پێکهات که‌ به‌هۆی به‌شداری ڕێژه‌یه‌کی به‌رچاو له‌ ئه‌ندامان له‌و کۆبونه‌وه‌یه‌دا  به‌ تێکڕای ده‌نگی به‌شداران، کۆبونه‌وه‌ی ئاماژه‌ پێکراو وه‌ک کۆنفڕانس دیاری کرا. شایانی باسه‌   که‌ که‌سایه‌تی هه‌ڵسور، تێکۆشه‌ر و ناسراوی کوردی ئێرانی، ئه‌ندازیار ئاسۆ پیرۆتی دامه‌زرێنه‌ر و ڕێکخه‌ری یه‌که‌م ته‌شکیلات و کۆمیته‌ی حیزبی دێموکراتی کوردستانی ئێران له‌ ساڵی 1989 له‌ وڵاتی سویس بۆ کۆنفرانسی ناوبراو به‌ ڕسمی بانگهێشتن کرابوو که‌ له‌گه‌ڵ پێشوازی گه‌رمی به‌شداربوان به‌ره‌و ڕووبوو.  له‌ ژێره‌وه‌ پوخته‌یه‌ک له‌  ڕاپۆرتی کۆنفرانس  به‌ ئاگاداری خوێنه‌رانی  به‌ڕێز ده‌گه‌یێنین.

1- سه‌ره‌تای کۆنفرانسه‌که‌ خوێندنه‌وه‌ی سرودی نه‌ته‌وایه‌تی ئه‌ی ڕه‌قیب ‌بوو.

2- به‌ ده‌قیقه‌یه‌ک به‌ بێده‌نگی وه‌ستان ڕێز له‌ گیانی پاکی شه‌هیدان گیرا.

 3- خوێندنه‌وه‌ی به‌یاننامه‌ی حیزبی دێموکڕات کوردستان-ئێران، سه‌باره‌ت به‌ ڕووداوی نه‌خوازراو، به‌ڵام داسه‌پاو به‌سه‌ر حیزبه‌ تێکۆشه‌ره‌که‌ماندا، واته‌ له‌تبوونی حیزبی دێموکراتی کوردستانی ئێران.

4- خوێندنه‌وه‌ی هێڵه‌ گشتییه‌کان که‌ له‌لایان ئه‌ندامانی به‌شدار له‌ کۆنفرانسدا پێشوازی به‌رچاوی لێکرا و وه‌ک خاڵێکی به‌هێز بۆ‌ داهاتووی حیزب و گه‌له‌که‌مان  هه‌ڵسه‌نگێندرا.

5- ئه‌م به‌شه‌ ته‌رخان کرابوو بۆ گوێ گرتن له‌ نه‌زه‌ر و بیروو بۆ چون و ڕه‌خنه‌ و ڕێنوێنییه‌کانی به‌شداران. جێگای ئاماژه‌ پێکردنه‌  که‌ وته‌ به‌نرخه‌کانی ئه‌ندازیاز و مامۆستای به‌توانا کاک ئاسۆ پیرۆتی ڕنگ و واتایه‌کی تایبه‌تی به‌ ئه‌و به‌شه‌ له‌به‌رنامه‌که‌ به‌خشی.

6- دواین به‌ش له‌ کۆنفرانس ته‌رخانکرابوو بۆ‌ هه‌ڵبژاردنی ئه‌ندامانی کۆمیته‌ی حیزبی دێموکراتی کوردستان-ئ ێران له‌ وڵاتی سویس، که‌ له‌ حاڵ و هه‌وایه‌کی سالم و دێموکڕاتیک دا به‌ به‌شداری ده‌یان که‌س له‌ئه‌ندامانی ته‌شکیلاتی حیزب به‌ڕێوه‌چوو. له‌ ئاکامی هه‌ڵبژرادند.،ا 5 که‌س، وه‌ک ئه‌ندامانی کۆمیته‌ی حیزبی دێموکراتی کوردستان-ئێران هه‌ڵبژێردران، هه‌ر له‌ ئاکامی هه‌ڵبژاردنی ئاماژه‌ پێکراودا 2 که‌س وه‌ک ئه‌ندامانی جێگر به‌وه‌ده‌ست هێنانی ده‌نگی متمانه‌ی پێویست هه‌ڵبژێردران. دوای کۆتای هاتنی سه‌رکه‌وتوانه‌ی هه‌ڵبژاردن، ئه‌ندامانی هه‌ڵبژێردراو بۆ کۆمیته‌ له‌ کۆبونه‌وه‌یه‌کی تایبه‌ت و هه‌ڵبژاردنێکی جیادا که‌سێکیان وه‌ک به‌رپرسی کۆمیته‌ هه‌ڵبژارد. هیوای سه‌رکه‌وتن بۆ هه‌موو ئه‌ندامانی کۆمیته‌ و هه‌موو ئه‌ندامان و دۆستانی حیزب له‌ پێناو مافخوازی گه‌لیی کورددا ده‌خوازین.

به‌ هیوای سه‌رکه‌وتنی گه‌لی هه‌رده‌م زیندووی کورد به‌سه‌ر دوژمنانی ئاشتی و ئازادیدا و وه‌ده‌ست هێنانی شانزی هه‌رچی زیاتر بۆ حیزبی دێموکراتی کوردستان له‌ گۆره‌پانی ئه‌وخه‌باته‌ ڕه‌واو به‌رحه‌قه‌دا.

کۆمیته‌ی حیزبی دێموکراتی کوردستان- ئێران له‌ وڵاتی سویس

 2 ی به‌فرانباری 1385ی هه‌تاوی سویس




 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.