Ö:: من و په‌پوله

نووسینی: شێروان بێ دڵ

ئه‌ی په‌پوله‌ی جوان بۆچی داماوی ؟
بۆچی نافڕی بۆ په‌شۆکاوی ؟
جاران مه‌سکه‌نت باخ و گوڵزار بوو
خواردنت شیله‌ی گوڵی به‌هار بوو
له‌چی ڕه‌نجاوی ؟ بۆچی داماوی ؟
نازانم بۆچی باڵت تێک ناوه‌ ؟
دڵی ناسکت به‌چی سووتاوه‌ ؟
ئێستا هاوڕێته‌ خه‌م ، ئه‌ندێشه‌ی شه‌و
له‌سه‌ر گه‌ڵا و چڵ بۆ ناکه‌ی کۆچ ڕه‌و ؟
ناشێ تۆش وه‌ک من هێلانه‌ت نه‌بێ
له‌و خاکه‌ گه‌وره‌ شوێنێکت نه‌بێ
خۆزگه‌ ئه‌مزانی بۆچی په‌شێوی ؟
بۆ وه‌کو جاران باڵ نابزێوی ؟
له‌ ناو زیندانی په‌پوله‌ی جوان
وه‌ک من غه‌ریبی به‌بێ نیشتیمان
که‌سه‌یر ئه‌که‌یت دونیات پڕ خه‌مه‌
له‌سه‌ر لێوانت بزه‌ زۆر که‌مه‌
جار جار فرمێسک ئه‌ڕژێنی به‌تاو
دڵت شاد نیه‌ ئه‌تۆی ده‌رکراو
وه‌ره‌ با هه‌ردوو ببینه‌ هاوڕێ
بێ قه‌یران بژین بێ خه‌م و گرێ
باڵه‌فڕکێ که‌  بۆ ئاسمانی جوان
بگه‌ڕێ به‌دوای خاکی نیشتیمان
کاتێک ماندوو بوویت دێمه‌ ژوور سه‌رت
چاووم تێک ئه‌نێم منیش له‌گه‌ڵت
ئینجا ئه‌فڕین له‌دونیای خه‌یاڵ
من به‌ هۆنراوه‌ تۆش به‌شه‌قه‌ی باڵ

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.