Ö:: نامه‌یه‌ک بۆ حدک- ئێران

 

نامه‌یه‌ک بۆ حدک- ئێران
پشتیوانی کۆمه‌ڵێک که‌سایه‌تی سیاسی له‌ حیزبی دیمۆکراتی کوردستان - ئێران
به‌ڕيزان،
ويڕای
ڕێز و سڵاو، به‌داخه‌وه‌ هه‌واڵی له‌تبوونی حدکا له‌م کاته‌ ناسکه‌دا سه‌ردێڕی هه‌واڵه‌کانه‌. قه‌یرانی ناوخۆیی حیزب له‌ماوه‌ی چه‌ند ساڵی رابڕدوودا بێگۆمان توانای هه‌ره‌ زۆری ئه‌م حیزبه‌ی به‌فێڕۆ دابوو. ئه‌وه‌ش ببوه‌ مایه‌ی نیگه‌رانی و هۆی پێناخوشبوونی دوستان و یارانی ئه‌م حیزبه‌.

به‌یاننامه‌ و بڵاوکراوه‌کانی که‌مینه‌ی کۆمیته‌ی ناوه‌ندی حدکا و ره‌وتی رێفۆرمخۆازان، پێشانده‌ری هه‌وڵ و تێکوشانی بێوچانی ئێوه‌ی به‌ڕێزه‌ بۆ ده‌ربازبوون له‌م دۆخه‌ ئاڵۆزه‌. گه‌رچی له‌تبوون و دووبه‌ره‌کی له‌ هێزێکی سیاسی کوردستانیدا ته‌نیا ویستی نه‌یارانی کورده‌، به‌ڵام له‌ مێژوودا زۆرجاران جێابوونه‌وه‌ سه‌ره‌تای یه‌کگرتنه‌وه‌ی هۆشمه‌ندانه‌یه‌.
ئێمه‌ هیوادارین ئه‌م له‌تبوونه‌ ته‌کانێک بێت به‌ره‌و یه‌کگرتنه‌وه‌. نه‌ک یه‌کگرتنه‌وه‌یه‌کی ر‌واڵه‌تی له‌سه‌ر‌ پێکهاتن بۆ دابه‌شینی کورسی و هێز، به‌ڵکو یه‌کگرتنه‌وه‌یه‌کی به‌رفراوان له‌سه‌ر چاره‌کردنی که‌مایه‌سییه‌کانی سه‌ره‌کی حدکا و تێکخستنه‌وه‌ی بنه‌ماڵه‌ی گه‌وره‌ی حیزب به‌ هه‌موو لایه‌نه‌کانییه‌وه‌ له‌سه‌ر بنه‌مای کۆنسێپتێکی روون بۆ دابین کردنی سه‌روه‌ری نه‌ته‌وه‌یی.

هه‌روه‌ک له راگه‌یه‌ندراوه‌کانی که‌مینه‌ی کۆمیته‌ی ناوه‌ندی و ره‌وتی رێفۆرمخۆازاندا هاتووه‌، حدکا پێویستییه‌کی هه‌ره‌ گرنگی هه‌یه‌ به‌ نۆێژه‌نکردنه‌وه‌ی حیزب و شێوازی سه‌رده‌مانه‌ی حیزبایه‌تی. پێخۆشحاڵی خۆمان به‌وه‌ ده‌رده‌بڕین که‌ به‌شێک له‌ حدکا ئێستا گه‌یشتۆته‌ سه‌ر ئه‌م قه‌ناعه‌ته‌ که‌ له‌مێژبوو دڵسۆزانی نه‌ته‌وه‌ی کورد چ به‌ نووسراوه‌ و چ به‌ ووته‌ به‌ ئێوه‌ی به‌ڕێزیان راگه‌یاندبوو.

ئێمه‌ش به‌هیوای زۆره‌وه‌ بۆ وه‌دیهێنانی ئه‌م ئامانجه‌ پاڵپشتی له‌ ئێوه‌ی به‌ڕێز ده‌که‌ین و له‌ بارودۆخی ئێستادا به‌وه‌ شاد ده‌بین که‌ ئێوه‌ بتوانن له‌سه‌ر بنه‌مایه‌کی هۆشمه‌ندانه‌ و زانستیانه‌ به‌ره‌و به‌هێزکردن و یه‌کگرتنه‌وه‌ی یه‌کجاری حدکا هه‌نگاو بنێن.

ئێوه‌ی به‌ڕێز له‌ هه‌مووکه‌س باشتر ده‌زانن که‌ قه‌یرانه‌ په‌یتاپه‌یتاکانی ناوخۆی حیزب، دابڕین و ده‌رکردن و له‌تبوونه‌کانی رابڕدوو، هۆی بنچینه‌یی هه‌بووه‌ و ده‌گه‌ڕێته‌وه‌ سه‌ر مێژوو و رێباز و شێوازی رێکخڕاوه‌یی حدکا که‌ له‌سه‌ر هێره‌می ده‌سه‌ڵات له‌سه‌ره‌وه‌ڕا داڕشتڕاوه‌. ئه‌مه‌ش به‌رهه‌می بارودووخ و قۆناخێکی تایبه‌تی بووه‌ که‌ تێکڕای هێزه‌ کورداستانییه‌کانی گرتۆته‌وه‌ و گرفتاری ئه‌م داوه‌ جاڵجاڵۆکه‌ییه‌ی کردوون.

هیوادارین ئێوه‌ی به‌ڕێز به‌ره‌و ده‌رچوون له‌م گیروگرفتانه‌ هه‌نگاو بنێن و نه‌بن به‌ دووپاتکه‌ره‌وه‌ی ئاڵوگۆڕه‌ رواڵه‌تییه‌کان و هه‌مدیسان پاش ئه‌هوه‌ن بوونه‌وه‌ له‌سه‌ر کورسی ده‌سه‌ڵات تووشی په‌نگاو خۆاردنه‌وه‌ بن.

ئێمه‌ به‌ دڵێکی ئاواڵه‌وه‌ پشتیوانی خۆمان بۆ ده‌رباز بوون له‌م قه‌یرانه‌‌ ئاڕاسته‌ی ئێوه‌ی به‌ڕێز ده‌که‌ین و هیواداری سه‌رکه‌وتن و یه‌کگرتنه‌وه‌ی ته‌واوی حدکا ین.

به‌سپاسه‌وه:

تاهیر حیکمه‌ت
کامران ئه‌مین ئاوه‌
تاهیر
به‌ڕهون
حۆسین به‌خشی
مه‌نسور
سێدقی
حه‌سه‌ن ماوه‌ڕانی
بێهروز
ئه‌نساری

20.12.2006  ئاڵمانیا
 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.