Ö:: راگه‌یه‌ندراوی ره‌وتی‌ رێفۆرمی‌ حیزبی‌ دیمۆکراتی‌ کوردستان_ ئێران

ره‌وتی‌ رێفۆرمی حیزبی‌ دیمۆکراتی‌ کوردستانی‌ ئێران

راگه‌یه‌ندراوی ره‌وتی‌ رێفۆرمی‌ حیزبی‌ دیمۆکراتی‌ کوردستان_ ئێران

خه‌ڵکی‌ خه‌باتکار و خۆڕاگری‌ کوردستان!

ئه‌ندامان و لایه‌نگرانی‌ حیزبی‌ دیمۆکراتی‌ کوردستانی‌ ئێران!

له‌ کاتێکدا که‌ ئاسۆی‌ سه‌رکه‌وتن و سه‌ربه‌ستی‌ نه‌ته‌وه‌ی‌ کورد له‌ هه‌ر چوار پارچه‌ی‌ کوردستان ئه‌مرۆکه‌ روناکییه‌کی‌ هیوابه‌خشی‌ پێوه‌دیاره‌ و ئه‌ستێره‌ی‌ به‌ختی‌ داگیرکه‌رانی‌ وڵاته‌که‌مان رووی‌ له‌ کووژانه‌وه‌ و کزی‌ ناوه‌ ، نه‌ته‌وه‌ی‌ کورد له‌ رۆژهه‌َلاتی‌ کوردستان و حیزبی‌ دیمۆکراتی‌ کوردستانی‌ ئێران  له‌گه‌ڵ دۆخێکی‌ نه‌خوازراو  و دوژمن په‌سه‌نددا به‌ره‌وروو بوونه‌ که‌ بۆته‌ هۆی‌ ترس و دڵه‌ڕاوکێی‌ خه‌ڵکی‌ کورد سه‌باره‌ت به‌ چاره‌نووسی‌ حیزب و خه‌باته‌که‌یان. وه‌ک له‌ راگه‌یه‌ندراوی‌ پێشوودا باسمان کرد ، کێشه‌و و ململانێی‌ نامه‌عریفی‌ و ناپیرۆزی‌ نێوان باڵه‌کانی‌ حیزبی‌ دێمۆکرات ئاکامێکی‌ هه‌ره‌ خراپ و تاڵی‌ لێکه‌وته‌وه‌ که‌ ئه‌ویش که‌رت بوونی‌ حیزب و جیایی‌ بوو. له‌ هیچ که‌س شاراوه‌ نیه‌ که‌ له‌ت بوونی‌ حیزبێکی‌ مه‌زن و خۆشه‌ویستی‌ وه‌ک حیزبی‌ دیمۆکرات چ خه‌سارێکی‌ گه‌وره‌یه‌ بۆ کورد و بزووتنه‌وه‌ نه‌ته‌وایه‌تییه‌که‌ی‌ له‌ رۆژهه‌لاتی‌ کوردستان . بۆیه‌ ئێمه‌ش وه‌ک ره‌وتی‌ رێفۆرمی‌ حیزبی‌ دیمۆکراتی‌ کوردستانی‌ ئێران ئه‌وپه‌ری‌ ناره‌زایه‌تی‌ خۆمان به‌رانبه‌ر به‌و رووداوه‌ ناخۆشه‌ ده‌ربرَ ی‌ و دیسان جه‌ختی‌ له‌ سه‌ر ده‌که‌ینه‌وه‌ که‌ ئه‌و له‌ت بوونه‌ جه‌رگی‌ هه‌موو کوردێکی‌ دڵسۆزی‌ بریندار کردوه‌ و به‌شێک له‌ خه‌ڵکی‌ کوردستان و لایه‌نگرانی‌ حیزبی‌ بێزار و دڵسارد کردوته‌وه‌. به‌ڵام ئه‌مه‌ رێگای‌ خه‌باته‌ و  هه‌وراز و نشێوی‌ تێدایه‌، مرۆڤی‌ به‌ باوه‌ر و خۆراگری‌ ده‌وێ‌ که‌ هه‌وراز ماندووی‌ نه‌کات و نشێویش نه‌یترسێنێ‌. به‌ تایبه‌ت که‌ له‌ خه‌باتی‌ شۆرشگێریدا به‌ وره‌بوون و به‌رخۆدان ره‌مزی‌ سه‌رکه‌وتن و سه‌رفه‌رازییه‌ . شۆرشگێر ئه‌و مرۆڤه‌ وریا و شێلگیره‌یه‌ که‌ ئازایانه‌ باری‌ ناله‌باری‌ ئێستا ره‌ت ده‌کاته‌وه‌ و له‌ خۆبردووانه‌ دێته‌ گۆره‌پانی‌ شۆڕشه‌وه‌. ئه‌و مرۆڤه‌ هوشیاره‌ باش ده‌زانێ‌ که‌ ره‌وتی‌ شۆڕش ته‌نگ و چه‌ڵه‌مه‌ی‌ تێدایه‌ و رۆژی‌ خۆش و ناخۆشی‌ هه‌یه‌، به‌ڵام له‌ یه‌ک شت دڵنیایه‌، که‌ ئه‌ویش سه‌رکه‌وتن و گه‌یشتن به‌ ئامانجه‌. شۆرشگێری‌ راسته‌ قینه‌ نه‌ به‌ سه‌رکه‌وتن له‌ خۆبایی‌ ده‌بێت و نه‌ ل رۆژی‌ شکستدا ئه‌ژنۆی‌ شل ده‌بێت و کۆڵ ده‌دات. بۆیه‌ له‌ت بوون و خه‌سارێکی‌ له‌و چه‌شنه‌ش که‌ له‌ حیزبی‌ دیمۆکراتی‌ کوردستانی‌ ئێراندا روویدا نابێ‌ شۆرشگێرانی‌ دیمۆکرات ناهومێد و تووشی‌ خه‌م ساردیان بکات، له‌ت بوون ده‌توانێ‌ رووانێکی‌ تازه‌ی‌ لێبکه‌وێته‌وه‌ ، رووانێک که‌ گه‌شه‌ و هه‌ڵدانی‌ پێوه‌ دیار بێت ، به‌ڵام مه‌رجی‌ رووانه‌وه‌ی‌ پاش جیابوونه‌وه‌ هه‌بوونی‌ خۆڕاگری‌ و ویستی‌ گۆڕان و نوێبوونه‌وه‌یه‌، هه‌بوونی‌ ئه‌و ئیراده‌ به‌ هێزه‌یه‌ که‌ ده‌یه‌وێ‌ له‌ سه‌ر هه‌ردی‌ سووتاو  مه‌زرایه‌کی‌ شین چێ‌ بکات و له‌ سه‌ر وێرانه‌ بناغه‌ی‌ کۆشک دابنێ‌. بۆیه‌ ئێمه‌ش له‌گه‌ڵ ده‌ڕبرینی‌ ناره‌زایه‌تیی‌ خۆمان له‌و باروودۆخه‌ ناخۆشه‌ی‌ ئێستای‌ حیزب، ئه‌وه‌ش راده‌گه‌یه‌نین که‌ قه‌ت واز له‌ خه‌بات ناهێنین و درێژه‌ به‌ حیزبایه‌تیمان ده‌ده‌ین. له‌گه‌ڵ ئه‌وه‌ی‌ که‌ رێز بۆ خه‌باتی‌ هه‌موو تاکێکی‌ سه‌ربه‌خۆ داده‌نین به‌ڵام پێمان وایه‌ حیزب ئه‌و دیارده‌ مۆدێرنه‌یه‌ که‌ ده‌توانێ‌ هیزه‌  خه‌باتگێڕ و هاوبیره‌کان رێک بخات ومۆبیلیزه‌یان بکات.

  

ئازیزان!

له‌ ماوه‌ی‌ نێوان پێش پلینۆنۆمی‌ 5ی‌ پاش کۆنگره‌ی‌ سێزده‌ی‌ حیزب تا 15/9/1385 که‌ به‌ داخه‌وه‌ راگه‌یه‌ندراوی‌ جیابوونه‌وه‌ی‌ باڵی‌ که‌مینه‌ی‌ حیزب بڵاو بووه‌وه‌، ره‌وتی‌ رێفۆرمی‌ حیزبی‌ دیمۆکراتی‌ کوردستانی‌ ئێران توانی‌ له‌گه‌ڵ پاراستنی‌ سه‌ربه‌خۆیی‌ خۆی‌، سیاسه‌تی‌ بێلایه‌نیه‌کی‌ چالاک بگرێته‌ به‌ر و سه‌ره‌رای‌ زه‌ختێک که‌ خرابووه‌ سه‌ری‌، تێکه‌ڵ به‌و ده‌سته‌به‌ندیانه‌ی‌ نێو حیزب نه‌بێت، به‌ڵام پاش له‌ت بوونی‌ حیزب و بڵاو بوونه‌وه‌ی‌ راگه‌یه‌ندراوی‌ جیابوونه‌وه‌ی‌ لایه‌نه‌کان، که‌وتینه‌ به‌رده‌م دۆخێکی‌ تازه‌ و نه‌خوازراوه‌وه‌ که‌ ده‌بوو یا پاڵ به‌ یه‌کێک له‌و لایه‌نانه‌ی‌ حیزبه‌وه‌ بدین که‌ ئێستا دوو حیزبی‌ جیاواز بوون یان رێگایه‌کی‌ دیکه‌ بگرینه‌ به‌ر و واز له‌ حیزبی‌ دیمۆکرات بێنبن. پاش شرۆڤه‌ و تاوتوێ‌ کردنی‌ رێگاکانی‌ به‌رده‌ممان به‌و ئاکامه‌ گه‌یشتین که‌ واز له‌ حیزبی‌ دیمۆکرات نه‌هێنین و دیسان له‌ ریزه‌کانی‌ ئه‌و حیزبه‌دا درێژه‌ به‌ خه‌بات بده‌ین، به‌ڵام حیزبی‌ دیمۆکرات له‌ت ببوو و ئێمه‌ ده‌با یه‌کیانمان هه‌ڵبژاردبا، ئه‌مه‌ش له‌ خۆیدا دووڕێیانێکی‌ دژوار بوو، بۆیه‌ به‌ مه‌به‌ستی‌ چاره‌سه‌ر کردنی‌ ئه‌م کێشه‌یه‌ میکانیزمێکی‌ سێ‌ به‌شیمان په‌سه‌ند کرد که‌ بریتی بوون له‌ :

 

1- لێکدانه‌وه‌ی‌ کرده‌وه‌ و هه‌ڵوێسته‌کانی‌ هه‌ر دوو لایه‌ن و لۆژیکی‌ زاڵ به‌سه‌ر بۆچوونه‌کانیاندا.

2- گه‌ڵاڵه‌ کردنی‌ کۆمه‌ڵێک میکانیزم و پێشنیاری‌ چاکسازی‌ بۆ پێشکه‌ش کردن به‌ لایه‌نه‌کان و شرۆڤه‌ی‌ وڵامه‌کانیان. ( ده‌قی‌ پێشنیاره‌کان له‌ کۆتایی‌ راگه‌یه‌ندراوه‌که‌دا هاتووه‌ ).

3- سه‌ردانی‌ هه‌ردوو لایه‌ن و دیالۆگ له‌گه‌ڵیان.

بۆ ئه‌و مه‌به‌سته‌ رۆژی‌ هه‌ینی‌ 17/9/1385 سه‌ردانی‌ هه‌ردووک به‌رێزان مامۆستا عه‌بدوڵڵا حه‌سه‌ن زاده‌ و کاک مسته‌فا هیجری مان کرد و گه‌ڵاڵه‌ پێشنیارییه‌که‌مان پێشکه‌ش کردن ، له‌ ئاکامی‌ ئه‌و دانیشتنانه‌دا، پاش تاوتوێ‌ کردنی‌ وڵامه‌کانی‌ هه‌ردوولا، له‌ سه‌ر بنه‌مای‌ بوونی‌ کۆمه‌ڵێک پره‌نسیپی‌ وه‌ک قبول کردنی‌ بیروبۆچوونی‌ به‌ تاک وبه‌ کۆمه‌ڵی‌ جیاواز ، خوێندنه‌وه‌یه‌کی‌ نوێ‌ و سه‌رده‌میانه‌ بۆ دیمۆکراسی‌ و ئازادی‌ راده‌ربڕین، گرینگیدانێکی‌ زۆرتر به‌ بیری‌ نه‌ته‌وه‌یی‌ و پێویستی‌ چاکسازی‌ له‌ حیزبدا، به‌و ئه‌نجامه‌ گه‌یشتین که‌ ئه‌گه‌ری‌ پێکهاتنمان له‌گه‌ڵ باڵی‌ که‌مینه‌ی‌ کومیته‌ی‌ ناوه‌ندی‌ پێشووی‌ حیزبی‌ دیمۆکراتی‌ کوردستانی‌ ئێران واته‌ حیزبی‌ دیمۆکراتی‌ کوردستان_ ئێران زیاتره‌ و  تێگه‌یشتنێکی‌ زۆرترمان لێک هه‌یه‌. بۆیه‌ رۆژی‌ شه‌ممه‌ 18/9/1385 بڕیاری‌ یه‌کلایی که‌ره‌وه‌ی‌ خۆمان سه‌باره‌ت به‌ درێژه‌دانی‌ خه‌بات له‌گه‌ڵ تێکۆشه‌رانی‌ حیزبی‌ دیمۆکراتی‌ کوردستان_ ئێران دا  و به‌ کرده‌وه‌ چووینه‌ ریزی‌ ئه‌ندامانی‌ ئه‌و حیزبه‌وه‌. دیاره‌ ئه‌مه‌ش به‌ هیچ شێوه‌یه‌ک به‌ واتای‌ دژایه‌تیمان له‌گه‌ڵ باڵه‌که‌ی‌ دیکه‌ی‌ حیزبدا نیه‌، به‌ڵکوو له‌گه‌ڵ ئه‌وه‌یکه‌ بۆچوونه‌کانمان له‌سه‌ر کۆمه‌لێک بابه‌تی‌ سیاسی‌ و رێکخراوه‌یی‌ جیاواز بوون، به‌ڵام ئێمه‌ رێز له‌و جیاوازییه‌ و خه‌باتی‌ ئه‌و هاورێیانه‌ و هه‌موو تێکۆشه‌رێکی‌ کورد ده‌گرین.            

سه‌رکه‌وێ‌ بزووتنه‌وه‌ی‌ رزگاری‌ خوازانه‌ی‌ نه‌ته‌وه‌ی‌ کورد

سڵاو له‌ خه‌ڵکی‌ خۆڕاگری‌ کوردستان

بژی‌ حیزبی‌ دیمۆکراتی‌ کوردستان_ئێران 

سڵاو له‌ گیانی‌ پاکی‌ هه‌موو شه‌هیدانی‌ کورد به‌ تایبه‌ت قازی‌ و قاسملوو و شه‌ره‌فکه‌ندی‌

ره‌وتی‌ رێفۆرمی‌ حیزبی‌ دیمۆکراتی‌ کوردستان_ ئێران

2006.12.09

 

کۆمه‌ڵه‌ پێشنیاری‌ ره‌وتی‌ رێفۆرمی‌ حیزبی‌ دیمۆکراتی‌ کوردستانی‌ ئێران بۆ چاکسازی‌ و گۆڕان له‌ حیزب دا

 

ئا: به‌شی‌ پێکهاته‌یی‌

1 – جیاکردنه‌وه‌ی‌ دوو به‌شی‌ سیاسی‌ و نیزامی‌

به‌ پێی‌ سرووشتی‌ کار و گیانی‌ زاڵ‌ به‌ سه‌ر ئه‌و دوو به‌شه‌دا کۆکردنه‌وه‌ و تێکه‌ڵاوکردنی‌ ئه‌و دوو به‌شه‌ له‌ ئۆرگانێک دا و له‌ ژێر ناوی‌ سیاسی‌ _ نیزامی‌ ده‌بێته‌ هۆی‌ تێکچوونی‌ هاوڕێکی‌ و لاوازیی‌ پراکتیکی‌ له‌ هه‌ر دووکیان دا.

به‌شی‌ نیزامی‌ بۆ پاراستنی‌ هاوڕێکیی‌ رێکخراوه‌یی‌ خۆی‌ پێویستی‌ به‌ سانترالیزمێکی‌ به‌هێزه‌ ، له‌ کاتێک دا که‌ به‌شی‌ سیاسی‌ بۆ زیندوویی‌ و چالاکبوون ده‌بێ‌ سیستمێکی‌ دیسانتراڵه‌ی‌ به‌ سه‌ردا زاڵ‌ بێت.

ئه‌گه‌ر بکرێ‌ به‌شی‌ نیزامی‌ ده‌بێ‌ له‌ سنووره‌کان نزیک بکرێته‌وه‌، یان لانیکه‌م شوێنی‌ مانه‌وه‌ی‌ ئه‌و دوو به‌شه‌ لێک جیا بکرێنه‌وه‌. بۆ ئه‌م مه‌به‌سته‌ ده‌توانرێ‌ به‌شی‌ نیزامی‌ له‌ چوارچێوه‌ی‌ ئه‌رته‌شێکی‌ حیرفه‌یدا رێک بخرێ‌.

بۆ ئه‌وه‌ی‌ که‌ هه‌ر دوو به‌ش له‌ به‌ڕێوه‌به‌ری‌ و داڕشتنی‌ سیاسه‌ته‌کانی‌ حیزبدا رۆڵ و کاریگه‌رییان هه‌بێت پێویسته‌ که‌ پێکهاته‌ی‌ رێبه‌رایه‌تی‌ له‌ هه‌ر دوو به‌شه‌که‌ بێت. به‌ چه‌شنێک که‌ سێ‌ له‌ سه‌ر چواری‌ ئه‌ندامانی‌ رێبه‌ری‌ له‌ به‌شی‌ سیاسی‌ بن.

 

2- دابه‌شکردنی‌ ده‌سه‌ڵات به‌ شێوه‌ی‌ فیدڕالیزمێکی‌ نێورێکخراوه‌یی‌

بۆ ئه‌م مه‌به‌سته‌ پێکهێنانی‌ سیستمی‌ تۆڕی‌ (شبکه‌ی‌)، واته‌ دانی‌ سه‌ڵاحییه‌تی‌ بڕیاردانی‌ سه‌ربه‌خۆ به‌ ئۆرگان و کومیته‌کان (جگه‌ له‌و بڕیاره‌ ستراتژیکانه‌ی‌ که‌ پێوه‌ندییان به‌ سیاسه‌ته‌ گشتییه‌کانی‌ حیزبه‌وه‌ هه‌یه‌ و له‌ چوارچێوه‌ی‌ ده‌سه‌ڵاتی‌ کومیته‌ ناوه‌ندیدان) ده‌بێ‌ ره‌چاو بکرێ‌ و ئه‌ندامانی‌ کومیته‌ ناوه‌ندی‌ به‌ ئه‌رکی‌ ئیداری‌ و خزمه‌تگوزارییه‌وه‌ خه‌ریک نه‌کرێن.

 

3 – که‌مکڕه‌نگ کردنه‌وه‌ی‌ سیستمی‌ که‌مپی‌

کۆکردنه‌وه‌ی‌ نه‌فه‌راتی‌ زۆر له‌ که‌مپه‌کان دا هه‌م کارایی‌ دێنێته‌ خواره‌وه‌ و هه‌م تێچوو ده‌باته‌ سه‌رێ‌.

له‌ باردوخۆی‌ خه‌باتی‌ ئێستای‌ ئێمه‌دا پێویسته‌ که‌سانی‌ پسپۆڕ و لێهاتوو بۆ راپه‌ڕاندنی‌ ئه‌رکه‌ حیزبییه‌کان ته‌نیا به‌ قه‌ده‌ر پێویست له‌ که‌مپه‌کان دا کۆ بکرێنه‌وه‌ و له‌ باری‌ مادییه‌وه‌ به‌ ته‌واوی‌ دابین بکرێن تا بتوانن به‌ بێ‌ که‌ڵکه‌ڵه‌ی‌ ماددی‌ فریای‌ کاری‌ سیاسی‌ و هزری‌ بکه‌ون. ده‌نا ئه‌وانی‌ دیکه‌ به‌ و تایبه‌ت ئه‌و که‌سانه‌ی‌ پسپۆڕییه‌کی‌ ئه‌وتۆیان نیه‌ پێویسته‌ بۆ دوو مه‌به‌ستی‌ دیکه‌ ئه‌رکیان بۆ دیاری‌ بکرێ‌.

یه‌که‌م: ئه‌و به‌شه‌ی‌ که‌ ده‌توانن بگه‌ڕێنه‌وه‌ بۆ ناوخۆی‌ کوردستان بۆ کاری‌ رێکخستن په‌روه‌رده‌ بکرێن و بنێردرێنه‌وه‌.

دووهه‌م:  ئه‌و که‌سانه‌ی‌ که‌ ناتوانن بگه‌ڕێنه‌وه‌ ناوخۆ، به‌ مه‌به‌ستی‌ پێکهێنانی‌ لابی‌ یا بۆ ده‌ره‌وه‌ی‌ وڵات به‌ڕێ‌ بکرێن یان له‌ باشووری‌ کوردستان بۆ وه‌ده‌ستهێنانی‌ کار، ئاسانکاریان بۆ بکرێ‌، به‌ڵام به‌و مه‌رجه‌ی‌ که‌ وه‌ک ئه‌ندامی‌ حیزب بمێننه‌وه‌ و مانگانه‌ یان ساڵانه‌ به‌شێکی‌ دیاریکراو له‌ داهاتیان بۆ حیزب بگه‌ڕێننه‌وه‌.

 

4 – دانانی‌ راوێژکار بۆ ده‌فته‌ری‌ سیاسی‌ و سکرتێری‌ گشتی‌

به‌ پێی‌ ئه‌وه‌ی‌ که‌ کۆبوونه‌وه‌کانی‌ ده‌فته‌ری‌ سیاسی‌ حه‌وتووانه‌یه‌ و بڕیاره‌کانی‌ پێویستی‌ به‌ لێکدانه‌وه‌یه‌کی‌ ورد و خێرایه‌ ده‌بێ‌ بۆ هه‌ر کام له‌ بواره‌کانی‌ سیاسی‌، نیزامی‌، ئه‌منییه‌تی‌، پڕوپاگه‌نده‌، ئابووری‌، کۆمه‌ڵایه‌تی‌ و ... راوێژکاری‌ پسپۆڕی‌ خۆی‌ هه‌بێ‌ که‌ به‌پێی‌ بابه‌تی‌ باسی‌ کۆبوونه‌وه‌کانی‌ ده‌فته‌ری‌ سیاسی‌ پسپۆڕانی‌ تایبه‌ت به‌و بابه‌ته‌ بتوانن به‌شداری‌ کۆبوونه‌وه‌ی‌ ده‌فته‌ری‌ سیاسی‌ بن.

سکرتێر وه‌ک که‌سایه‌تی‌ یه‌که‌می‌ حیزب بۆ لێکدانه‌وه‌ی‌ ورد و گرتنی‌ هه‌ڵوێستی‌ دروست _ به‌ تایبه‌تی‌ له‌ کاته‌ هه‌ستیاره‌کان دا _ پێویسته‌ له‌ هه‌رکام له‌و بوارانه‌ی‌ که‌ له‌ سه‌ره‌وه‌ ئاماژه‌یان پێکرا راوێژکاری‌ تایبه‌تی‌ خۆی هه‌بێ‌.

 

5- دیاریکردنی‌ پێوه‌ری‌ زانستی‌ بۆ به‌ربژێرانی‌ رێبه‌رایه‌تی‌

به‌مه‌به‌ستی‌ هه‌ڵبژاردنی‌ رێبه‌رایه‌تییه‌کی‌ شاره‌زا و لێهاتوو پێویسته‌ پێوه‌رێک بۆ هه‌ڵبژێرانی‌ رێبه‌رایه‌تی‌ دیاری‌ بکرێ‌ بێگومان ئه‌م پێوه‌ره‌ ده‌بێ‌ پێوه‌رێکی‌ زانستی‌ واته‌ راده‌ی‌ توانایی‌ هزری‌ و لێهاتوویی‌ سیاسی‌ بێ‌. بۆ ئه‌م مه‌به‌سته‌ پێویسته‌ کومیته‌ی‌ ناوه‌ندی‌ لێژنه‌یه‌ک له‌ که‌سانی‌ پسپۆڕ بۆ دیاریکردنی‌ پێوه‌ره‌کان ده‌ستنیشان بکات.

 

6 – به‌ هێزکردن و نوێکردنه‌وه‌ی‌ راگه‌یاندن له‌ هه‌موو به‌شه‌کان دا

راگه‌یاندنێکی‌ به‌هێز و نوێ‌ له‌ بارودۆخی‌ ئه‌مڕۆی‌ کورددا ده‌بێ‌ خاوه‌نی‌ سێ‌ تایبه‌تمه‌ندی‌ سه‌ره‌کی‌ بێ‌:

یه‌که‌م: له‌ باری‌ ته‌کنیکی‌ و جوانکارییه‌وه‌ بتوانێ‌ سه‌رنجی‌ زۆرینه‌ی‌ کۆمه‌ڵگا بۆ لای‌ خۆی‌ راکێشێت

دووهه‌م: گیانێکی‌ نه‌ته‌وه‌یی‌ پێوه‌دیار بێ‌ و به‌ دوور بێت له‌ هه‌ر چه‌شنه‌ دۆگماتیزمێکی‌ حیزبی‌

سێهه‌م: به‌رپرسان و کارگێڕانی‌ به‌دوور له‌ هه‌ر تێبینییه‌کی‌ تاکه‌که‌سی‌، گرووپی‌ و ناپسپۆرانه‌ هه‌ڵبژێردرێن(دیاری‌ بکرێن).

 

7 – وه‌رگرتنی‌ ئه‌ندام له‌ پارچه‌کانی‌ دیکه‌ی‌ کوردستان و گرینگی‌ دان به‌ کاری‌ رێکخستن له‌و به‌شانه‌دا به‌ بێ‌ ده‌ستێوه‌ردان له‌ کاروباری‌ ئه‌و پارچانه‌ و ته‌نیا به‌ مه‌به‌ستی‌ به‌هێزکردنی‌ حیزب.

 

8 – پێکهێنانی‌ هه‌ندێک ناوه‌ند و رێکخراوه‌ی‌ سیاسی‌ پشتیوان له‌ نێوخۆ و ده‌ره‌وه‌ی‌ کوردستان دا بۆ راپه‌ڕاندن و جێ‌ به‌ جێ‌ کردنی‌ ئه‌و ئه‌رک و سیاسه‌تانه‌ی‌ که‌ حیزب به‌ هه‌ر هۆیه‌ک راسته‌وخۆ توانای‌ به‌ ئاکام گه‌یاندنیانی‌ نیه‌.

 

9 – کۆکردنه‌وه‌ و بایه‌خدان به‌ هه‌موو ئه‌و که‌سانه‌ی‌ که‌ به‌ چه‌شنێک له‌ حیزب زیز بوونه‌ یان دوور خراونه‌ته‌وه‌.

 

10 – پێکهێنانی‌ لێژنه‌یه‌ک له‌و کادره‌ به‌ ساڵداچووانه‌ی‌ حیزب که‌ خاوه‌نی‌ ئه‌زموونی‌ به‌ڕێوه‌به‌رین و به‌ هۆی‌ ته‌مه‌نی‌ زۆر به‌رپرسیاره‌تییان نه‌ماوه‌ به‌ مه‌به‌ستی‌ راوێژکاری‌ و هه‌روه‌ها دیاریکردنی‌ میکانیزمێک که‌ بتوانن کاریگه‌ر و چاوه‌دێر بن.

 

11 – پێکهێنانی‌ لێژنه‌ی‌ راوێژکاری‌ له‌ نێوخۆ و ده‌ره‌وه‌ی‌ کوردستان دا

بۆ ئه‌وه‌ی‌ که‌ بڕیاره‌کانی‌ رێبه‌رایه‌تی‌ حیزب سه‌باره‌ت به‌ هه‌ڵوێست گرتن و چالاکی‌ له‌ نێوخۆ و ده‌ره‌وه‌ی‌ کوردستان گونجاو له‌ گه‌ڵ‌ راستییه‌کاندا بێت ،به‌ مه‌به‌ستی‌ قه‌ره‌بوو کردنه‌وه‌ی‌ بۆشایی‌ بوونی‌ راسته‌وخۆ له‌ نێوخۆی‌ وڵات دا راوێژ له‌گه‌ڵ‌ پسپۆڕانی‌ حیزبی‌ و ده‌ره‌وه‌ی‌ حیزبی‌ بکرێ‌.

 

12 – دانانی‌ رێژه‌یه‌کی‌ دیاریکراو بۆ ژنان له‌ رێبه‌رایه‌تیدا به‌ مه‌به‌ستی‌ هه‌ڵاواردنی‌ پۆزه‌تیڤ

دیاره‌ لێره‌دا مه‌به‌ست له‌ "دیاریکردن" له‌ به‌رچاوگرتنی‌ لانیکه‌مێکه‌ که‌ پێویسته‌ ببێت ده‌نا ئه‌گه‌ر رێژه‌ی‌ ژنانی‌ لێهاتوو له‌ حیزب دا زۆر بوو ئه‌م رێژه‌یه‌ ده‌توانێ‌ له‌م لانیکه‌مه‌ زیاتر بێ‌.

 

13 – دیاریکردنی‌ میکانیزمێک بۆ ئه‌وه‌ی‌ پێکهاته‌ی‌ رێبه‌ری‌ له‌ هه‌ر دوو نه‌وه‌ی‌ گه‌نج و به‌ئه‌زموون هه‌ڵبژێردرێت.

 

14 – گۆڕانکاری‌ له‌ سیستمی‌ رێکخستنی‌ نهێنی‌ دا

ئا: گرینگی‌ دان به‌ کاری‌ نیوه‌ ئاشکرا له‌ چوارچێوه‌ی‌ کۆڕ و رێکخراوه‌ مه‌ده‌نییه‌کان دا

ب: رێکخستنی‌ به‌شێک له‌ ئه‌ندامانی‌ نهێنی‌ به‌ شێوه‌ی‌ پیشه‌یی‌ (پێویسته‌ به‌شی‌ رێکخستنی‌ نهێنی‌ حیزب له‌ هه‌ر شارێک دا به‌شێک له‌ ئه‌ندامانی‌ نهێنی‌ حیزب له‌ باری‌ ماددیه‌وه‌ به‌ ته‌واوه‌تی‌ دابین بکات که‌ بێ‌ که‌ڵکه‌ڵه‌ی‌ ماڵی‌ کاتی‌ خۆیان بۆ کاری‌ حیزبی‌ ته‌رخان بکه‌ن، واته‌ کاری‌ حیزبی‌ ببێته‌ پیشه‌ی‌ سه‌ره‌کییان نه‌ک پیشه‌یه‌کی‌ لاوه‌کی‌. دیاره‌ ئه‌و که‌سانه‌ بۆ داپۆشینی‌ چالاکی‌ حیزبی‌ خۆیان ده‌بێ‌ کارێکی‌ لاوه‌کی‌ و رواڵه‌تییان هه‌بێت.

ج: په‌روه‌رده‌کردنی‌ ئه‌ندامانی‌ نهێنی‌ له‌ باری‌ سیاسی‌، پڕوپاگه‌نده‌، ئه‌منییه‌تی‌، چه‌کداری‌ و ته‌کنیکی‌ نوێی‌ پێوه‌ندی‌ به‌ شێوازێکی‌ نوێ‌ و مۆدێڕن، هه‌روه‌ها ته‌یار کردنیان به‌ ئامێر و که‌ره‌سته‌ی‌ نوێ‌ و پێویست.

د: دانی‌ ده‌سه‌ڵات و به‌رپرسایه‌تی‌ به‌ ئه‌ندامانی‌ نهێنی‌ و رێکخستنیان له‌ هه‌ر شوێکنێک دا به‌ پێی‌ گونجان و له‌ سه‌ر تێبینی‌ خۆیان.

س: ده‌ستنیشان کردنی‌ که‌ناڵێکی‌ پێوه‌ندیکردن به‌ شێوه‌ی‌ راسته‌وخۆ له‌ نێوان ئه‌ندامان و حیزب دا.

 

15 – خوێندنه‌وه‌یه‌کی‌ روون و سه‌رده‌مییانه‌ له‌ دیمۆکراسی‌

دیمۆکراسی‌ به‌و شێوه‌یه‌ی‌ که‌ تا ئێستا له‌ پێڕه‌و و پڕۆگرامی‌ حیزبی‌ ئێمه‌دا باسی‌ لێوه‌کراوه‌ خوێندنه‌وه‌یه‌کی‌ ته‌واو کلاسیکه‌ که‌ له‌ سه‌ر بنه‌مای‌ ده‌نگی‌ زۆرینه‌ راوه‌ستاوه‌ و دیکتاتۆڕی‌ زۆرایه‌تی‌ لـێ‌ ده‌که‌وێته‌وه‌. له‌ کاتێکدا که‌ له‌ دیمۆکراسی‌ نوێ‌ و مۆدێڕن که‌ به‌ دیمۆکراسی‌ رێککه‌وتنانه‌ (توافقی‌) ده‌ناسرێ، زۆرینه‌ هه‌موو ده‌سه‌ڵاتی‌ ناکه‌وێته‌ ده‌ست و پاراستنی‌ مافی‌ که‌مینه‌ وه‌ک بنه‌مایه‌ک ره‌چاو ده‌کرێ‌.

له‌ سیستمێکی‌ ئه‌وتۆدا هه‌موو بیر و رایه‌کی‌ جیاواز چ له‌ چوارچێوه‌ی‌ تاک و چ له‌ چوارچێوه‌ی‌ کۆمه‌ڵدا به‌ فه‌رمی‌ ده‌ناسرێ و ماف و ئازادییه‌کانیان گه‌ره‌نتی‌ ده‌کرێن.

 

16 – پێڕه‌وکردنی‌ سیستمی‌ فیدرالیزمی‌ نێو رێکخراوه‌یی‌ له‌ هه‌ڵبژاردن دا

یه‌کێک له‌ هۆکاره‌کانی‌ سه‌رهه‌ڵدان و گه‌وره‌بوونه‌وه‌ی‌ کێشه‌کانی‌ حیزب ئه‌و شێوه‌ هه‌ڵبژاردنه‌یه‌ که‌ مافی‌ هه‌ر چه‌شنه‌ بڕیارێکی‌ یه‌ک لایه‌نانه‌ به‌ زۆرینه‌ ده‌دا و ره‌وایی‌ به‌ ده‌سه‌ڵاتی‌ بێ‌ سنووری‌ ده‌نگی‌ زۆرینه‌ ده‌دات. به‌ پێی‌ ئه‌و سیستمه‌ هه‌ڵبژاردنه‌ی‌ که‌ ئێستا له‌ حیزبی‌ ئێمه‌دا باوه‌ زۆرینه‌ بۆی‌ هه‌یه‌ هه‌موو ئه‌ندامانی‌ کۆنگره‌ و رێبه‌ری‌ له‌ باڵی خۆی‌ هه‌ڵبژێرێت و هه‌ر چه‌شنه‌ بڕیارێک به‌ سه‌ر که‌مینه‌دا بسه‌پێنێت. ئه‌گه‌ر به‌ کرده‌وه‌ له‌ کۆنگره‌کانی‌ حیزبدا به‌ ده‌گمه‌ن شتی‌ وا روویدابێت هۆکاره‌که‌ی‌ بۆ میکانیزمێکی‌ نافه‌رمی‌ ده‌گه‌ڕێته‌وه‌ که‌ نه‌یویستووه‌ حیزب تووشی‌ کێشه‌ و ئاڵۆزی‌ ببێت، ده‌نا پێڕه‌و و پڕۆگرامی‌ حیزب رێگای‌ هه‌ر چه‌شنه‌ بڕیارێک به‌ زۆرینه‌ ده‌دات و هه‌روه‌ها سیستمی‌ هه‌ڵبژاردنی‌ ئۆرگانی‌ که‌ له‌ ماوه‌ی‌ چه‌ند کۆنگره‌ی‌ رابردوودا  له‌ حیزبدا به‌ڕێوه‌چووه‌ خه‌سارێکی‌ زۆری‌ له‌ شایسته‌ سالاری‌ و پسپۆڕگه‌رایی‌ له‌ نێوحیزبدا داوه‌. به‌مشێوه‌یه‌ که‌ به‌رپرسی‌ ئۆرگانه‌کان یان به‌رپرسی‌ ئۆرگانی‌ سیاسی‌ _ نیزامی‌ که‌ له‌ بواری‌ رێکخستن دا ئۆرگانی‌ دایکه‌، له‌ وه‌رگرتن و دابه‌شکردنی‌ نه‌فه‌رات له‌ ئۆرگانه‌کان دا، به‌رژه‌وه‌ندی‌ باڵ‌ و لایه‌ن له‌ سه‌رووی‌ به‌ژه‌وه‌ندی‌ حیزب و شایسته‌ سالارییه‌وه‌ داده‌نێن. واته‌ تێبینیان له‌ وه‌رگرتنی‌ نه‌فه‌ردا خودی‌ و ناخودی‌ بوونه‌ نه‌ک شاره‌زایی‌ و ناشاره‌زایی‌، بۆیه‌ بۆ چاره‌سه‌رکردنی‌ ئه‌م کێشه‌یه‌ پێویسته‌ سیستمی‌ هه‌ڵبژاردن بگۆڕدڕێ‌ بۆ شێوه‌یه‌کی‌ فێدرالی‌ (رێژه‌یی‌ و گشتی‌). مه‌به‌ست ئه‌وه‌یه‌ ئه‌و گرووپ و لایه‌نانه‌ی‌ که‌ بوونیان له‌ حیزب دا به‌ فه‌رمی‌ ناسراوه‌ به‌ پێی‌ رێژه‌ی ئه‌و ده‌نگانه‌ی‌ که‌ له‌ هه‌ڵبژاردن دا هێناویانه‌ته‌وه‌ بتوانن نوێنه‌رانی‌ خۆیان بۆ کۆنگره‌ و دواتریش بۆ رێبه‌راتی‌ هه‌ڵبژێرن. (دیاره‌ ئه‌مه‌ وه‌ک ئاماژه‌مان پێکرد پێویستی‌ به‌ مه‌رجێکی‌ سه‌ره‌کی‌ هه‌یه‌ که‌ ئه‌ویش پێناسه‌کردنی‌ لایه‌ن و گرووپه‌کان به‌ بیر و پڕۆگرام له‌ لایه‌ن خۆیانه‌وه‌ و به‌ فه‌رمی‌ ناسینیان له‌ پێڕه‌و و پڕۆگرامی‌ حیزبدایه‌) هه‌ڵبژاردنه‌که‌ش پێویسته‌ له‌ شێوازی‌ ئۆرگانی‌ بێته‌ ده‌ر و کۆنفڕانسه‌کانی‌ کادر و پێشمه‌رگه‌ له‌ ئاستی‌ گشتی‌ و سه‌رتاسه‌ری‌ حیزب دا به‌ڕێوه‌ بچن.

 

17 – به‌ فه‌رمی‌ ناسینی‌ رێفراندۆم

رێفراندۆم (راپرسی‌) میکانیزمێکه‌ بۆ ده‌ربازکردنی‌ سیستمی‌ سیاسی‌ له‌ کاتی‌ قه‌یران دا.

هه‌رکات که‌ سیستمی‌ سیاسی‌ و به‌ڕێوه‌به‌ری‌ له‌ سه‌ر کێشه‌ یان بابه‌تێک ده‌سته‌وه‌ستان و تووشی‌ ناکۆکی‌ و چه‌ند ده‌نگی‌ بن و بڕیاریان بۆ نه‌درێت بۆ چاره‌سه‌رکردنی‌ قه‌یرانه‌کان په‌نا بۆ ده‌نگی‌ خه‌ڵک (رێفراندۆم) ده‌به‌ن. به‌ڵام به‌داخه‌وه‌ ئه‌م مێکانیزمه‌ دیمۆکراتیکه‌ له‌ پێڕه‌و و پڕۆگرامی‌ ئێمه‌دا دانی‌ پێدا نه‌نراوه‌. له‌ کاتێکدا که‌ له‌ زۆر قۆناغی‌ قه‌یراناوی‌ وه‌ک ئه‌م قۆناغه‌ دواییه‌ی‌ حیزب که‌ له‌تبوون و پارچه‌ پارچه‌بوونی‌ لـێ‌ که‌وته‌وه‌، ده‌یتوانی‌ یه‌کێک له‌ باشترین مێکانیزمه‌کان بێ‌ بۆ چاره‌سه‌رکردنی‌ کێشه‌کان.

 

ب: به‌شی‌ سیاسی‌ و دیپلۆماسی‌

1 – راڤه‌ و شیکردنه‌وه‌ی‌ تایبه‌تمه‌ندییه‌کانی‌ فێدرالیزمی‌ جوگرافیایی‌ و نه‌ته‌وه‌یی‌ له‌ سه‌ر بنه‌مای‌ مێژوویی‌ و گونجاو له‌گه‌ڵ‌ بارودۆخی‌ کوردستان و ئێران.

پێش هه‌موو شتێک بۆ جێ‌ به‌ جێ‌ کردنی‌ ئه‌م خاڵه‌ پێویسته‌ چوارچێوه‌ و سنووری‌ جوگرافیایی‌ رۆژهه‌ڵاتی‌ کوردستان به‌ وردی‌ دیاری‌ بکرێت.

2 – پێویستی‌ زاڵبوونی‌ گوتاری‌ حیزب به‌ سه‌ر پڕۆسه‌ی‌ سیاسی‌ کوردستان دا له‌ رێگای‌ خوێندنه‌وه‌ی‌ تایبه‌تی‌ حیزب بۆ کێشه‌ سیاسییه‌کانی‌ کوردستان، ئێران و جیهان و هه‌روه‌ها هه‌ندێک چه‌مکی‌ وه‌ک ناسیۆنالیزم و دێمۆکراسی‌.

3 – خوێندنه‌وه‌ی‌ وردی‌ هه‌لومه‌رجی‌ سیاسی‌ و کۆمه‌ڵایه‌تی‌ ئه‌مڕۆی‌ کوردستان به‌ مه‌به‌ستی‌ پلان دانان بۆ شێوه‌ خه‌باتی‌ جه‌ماوه‌ری‌ و مه‌ده‌نی‌.

4 – گۆڕینی‌ شێوازی‌ خه‌بات

به‌ پێی‌ ئه‌وه‌ی‌ که‌ هه‌نووکه‌ سیستمی‌ خه‌باتی‌ حیزب هه‌مان سیستمی‌ خه‌بات له‌ شاخ و ده‌یه‌ی‌ شه‌سته‌کانه‌ وڵامده‌ری‌ بارودۆخی‌ خه‌بات له‌ ئێستای‌ کوردستان دا نیه‌، پێشتر هێزی‌ سه‌ره‌کی‌ شۆڕش  خه‌ڵکی‌ گوند و ده‌وروبه‌ری‌ شاره‌کان بوون که‌چی‌ ئێستا دانیشتووانی‌ شاره‌کان و به‌ تایبه‌تی‌ توێژی‌ خوێنده‌وار و رووناکبیری‌ کۆمه‌ڵگا هێزی‌ سه‌ره‌کی‌ شۆڕشن. بۆیه‌ له‌ شێوازی‌ خه‌باتی‌ ئێستامان دا پێویسته‌ گرینگی‌ و قورساییه‌کی‌ زیاتر به‌ شاره‌کان بدرێن. له‌ لایه‌کی‌ دیکه‌شه‌وه‌ پێویسته‌ شه‌ڕی‌ چه‌کداری‌ له‌ کوردستانه‌وه‌ بۆ هه‌موو به‌شه‌کانی‌ ئێران په‌ره‌ پێ‌ بدرێ‌ بۆ ئه‌وه‌ی‌ که‌ ته‌نیا کوردستان زه‌ره‌رمه‌ندی‌ ئه‌و شه‌ڕه‌ داسه‌پاوه‌ نه‌بێت.

5 – دامه‌زراندنی‌ پێوه‌ندی‌ و نزیکبوونه‌وه‌ له‌ زلهێزه‌ جیهانی‌ و ناوچه‌ییه‌کان (به‌ تایبه‌ت ئه‌مریکا و بریتانیا و ئیسرائیل) به‌ له‌ به‌رچاو گرتنی‌ به‌رژه‌وه‌ندییه‌کانی‌ بزووتنه‌وه‌ی‌ کورد و حیزبی‌ دیموکرات.

6 – گۆڕینی‌ ئامانجی‌ دوارۆژ

تا ئێستاش سوسیالیزمی‌ دیمۆکراتێک وه‌ک ئامانجی‌ دوارۆژ له‌ پێڕه‌و و پڕۆگرامی‌ حیزب دا ماوه‌ته‌وه‌، له‌ کاتێک دا که‌ هه‌لومه‌رجی‌ ناوه‌کی‌ و ده‌ره‌کی‌ به‌ پێچه‌وانه‌ی‌ ئه‌و بیرۆکه‌یه‌ له‌ گۆڕاندایه‌. بێگومان سوسیالیزمی‌ دێمۆکراتیک له‌ سه‌رده‌مێک دا که‌ رێبه‌ری‌ مه‌زنمان دوکتور قاسملووی‌ شه‌هید هێنایه‌ ئاراوه‌، یه‌کێک له‌ گونجاوترین بیرۆکه‌کانی‌ ئه‌و کات بوو که‌ ده‌یتوانی‌ له‌ هه‌ژمۆنی‌ بیرۆکه‌ی‌ سوسیالیزمی‌ ئارایی‌ (موجود) که‌م بکاته‌وه‌.

به‌ڵام ئێستا و پاش هه‌ڵوه‌شانه‌وه‌ی‌ یه‌کێتی‌ سۆڤییه‌ت و هه‌ره‌ستهێنانی‌ جیهانی‌ دوو جه‌مسه‌ری‌ له‌ کاتێک دا که‌ له‌ ئاستی‌ جیهانیدا سوسیالیزم جێگه‌ و پێگه‌ی‌ خۆی‌ دۆڕاندووه‌ و سه‌رمایه‌داری‌ و لیبڕالیزم هه‌ژموونی‌ خۆیان به‌ سه‌ر سیستمی‌ ئابووری‌ و هزریی‌ ئه‌مڕۆی‌ جیهان دا سه‌پاندووه‌ و له‌ ئاستی‌ نێوخۆیی‌ کوردستانیشدا نه‌ته‌وه‌خوازی‌ و ناسیۆنالیزم بۆته‌ گوتاری‌ زاڵی‌ کومه‌ڵگا، بیرۆکه‌ی‌ سوسیالیزمی‌ دیمۆکراتێک چیدیکه‌ وڵامده‌ری‌ خه‌باتی‌ ئه‌م سه‌رده‌مه‌مان نیه‌. بۆیه‌ پێویسته‌ بیر له‌ بیرۆکه‌یه‌کی‌ دیکه‌ی‌ وه‌ک ناسیۆنالیزمی‌ دێمۆکراتێک یان پێکهێنانی‌ ده‌وڵه‌تێکی‌ دێمۆکراتێکی‌ کوردی‌ وه‌ک ئامانجی‌ دوارۆژ بکرێته‌وه‌.

له‌م پێناوه‌دا پێویسته‌ دیپلۆماسی‌ و گوتاری‌ حیزبی‌ له‌ ژێر هه‌ژمونی‌ چه‌پ و ئاخێوی‌ سوسیالیستی‌ بێته‌ده‌ر، واته‌ گوتاری‌ حیزبی‌ ببێته‌ گوتارێکی‌ نه‌ته‌وه‌یی‌ و دیپلۆماسیش له‌ پێناو به‌رژه‌وه‌ندییه‌کانی‌ بزووتنه‌وه‌ی‌ کورددا بکرێت.

7 – خوێندنه‌وه‌ی‌ روون و سه‌رده‌مییانه‌ بۆ ناسیۆنالیزمی‌ کوردی‌

وه‌ک له‌ خاڵه‌کانی‌ پێشوودا باسمان کرد گوتاری‌ نه‌ته‌وه‌یی‌ بۆته‌ گوتاری‌ زاڵی‌ رووناکبیری‌ له‌ کۆمه‌ڵگای‌ ئه‌مڕۆی‌ کوردستان دا بۆیه‌ پێویسته‌ حیزبی‌ دێمۆکرات وه‌ک ئاڵاهه‌ڵگری‌ خه‌باتی‌ نه‌ته‌وه‌یی‌ له‌ رۆژهه‌ڵاتی‌ کوردستان خوێندنه‌وه‌یه‌کی‌ روون و سه‌رده‌مییانه‌ی‌ بۆ ناسیۆنالیزمی‌ کوردی‌ هه‌بێت و بواره‌کانی‌ گه‌شه‌ و په‌ره‌ئه‌ستاندنی‌ خۆش بکات. بۆ ئه‌م مه‌به‌سته‌ پێویسته‌ چه‌ند تێبینییه‌کی‌ گرینگ له‌ به‌رچاو بگیردرێ‌:

ئا: دوورکه‌وتنه‌وه‌ له‌ ئێرانچێتی‌ و ناوچه‌گه‌ری‌ و خه‌ستکردنه‌وه‌ی‌ بیری‌ نه‌ته‌وه‌یی‌

ب: شڕۆڤه‌ی‌ بنه‌ماکانی‌ ناسیۆنالیزمی‌ کوردی‌ و چه‌مکی‌ نه‌ته‌وه‌ی‌ کورد

ج: هێرش بۆ سه‌ر بنه‌ما هزرییه‌کانی‌ شۆڤینیزمی‌ فارس و تابۆی‌ سه‌روه‌ری‌ و پیرۆزیی‌ ئێران

د: هێنانه‌ به‌رباسی‌ راشکاوانه‌ و پلانمه‌ندی ده‌وڵه‌تی‌ کوردی‌

8 – نزیک بوونه‌وه‌ له‌ هێزه‌ کوردییه‌کانی‌ هه‌ر چوارپارچه‌ی‌ کوردستان و هاریکاریکردن له‌گه‌ڵیان، هه‌م وه‌ک پێوه‌ندی‌ نێوان دوو حیزب و هه‌م له‌ رێگای‌ پێکهێنانی‌ هاوپه‌یمانی‌ یا به‌ره‌یه‌کی‌ کوردستانییه‌وه‌.

9 – پێکهێنانی‌ به‌ره‌یه‌کی‌ به‌هێزی‌ کوردستانی‌ له‌گه‌ڵ‌ هێزه‌ کوردییه‌کانی‌ رۆژهه‌ڵاتی‌ کوردستان.

10 – دامه‌زراندنی‌ ناوه‌ندێکی‌ لێکۆڵینه‌وه‌ی‌ ئێستراتیژێک به‌ مه‌به‌ستی‌ شڕۆڤه‌ی‌ زانستییانه‌ی‌ کێشه‌ سیاسییه‌کان و رێنوێنیی‌ رێبه‌رایه‌تی‌ حیزب.

11 – لێکدانه‌وه‌ی‌ کێشه‌ سیاسیه‌کان به‌ دوور له‌ دۆگماتیزم و ئایدیۆلۆژیای‌ ته‌سکی‌ حیزبی‌.

12 – واقعبینی‌ هه‌موو جارێک نه‌بێته‌ کۆسپ بۆ لێکدانه‌وه‌ی‌ ئازایانه‌ی‌ رووداوه‌کان و داهێنان

مرۆڤی‌ شۆڕشگێڕ سیاسه‌ت له‌ پێناو شۆڕشدا ده‌کات نه‌ک شۆڕش له‌ پێناو سیاسه‌تدا، واته‌ شۆڕشگێڕ ئه‌و مرۆڤه‌ گۆڕانخوازه‌یه‌ که‌ واقعی‌ ئێستا و بارودۆخی‌ ئارایی‌ قبووڵ‌ ناکات و به‌رهه‌ڵستی‌ ده‌بێته‌وه‌ و هه‌وڵ‌ ده‌دات واقعی‌ ئێستا به‌ ئاراسته‌ی‌ ئیده‌که‌ی‌ دا بگۆڕێ‌.

که‌وابوو شۆڕشگێڕ جیاوازه‌ له‌گه‌ڵ‌ ئه‌و سیاسه‌توانه‌ی‌ که‌ له‌ واقع و هه‌لومه‌رجی‌ ئاراییدا گه‌مه‌ ده‌کات. به‌ کورتی‌ شۆڕشگێڕ له‌ پێناو ئامانجه‌کانی‌ شۆڕشدا گه‌لێک جار دژ به‌ هه‌موو واقع و واقعبینییه‌ک راده‌وه‌ستێ‌.

13 – وازهێنان له‌ سیاسه‌تی‌ شه‌پۆل سواری‌

حیزبێکی‌ شۆڕشگێڕی‌ وه‌ک حیزبی‌ دیمۆکرات پێویسته‌ له‌ ره‌وتی‌ رووداو و کێشه‌کانی‌ کوردستان دا رۆڵی‌ پێشه‌نگ و داهێنه‌ر ببینێت نه‌ک شه‌پۆل سوار.

14 – پشت نه‌به‌ستنی ته‌نیا به‌ هێزی‌ ده‌ره‌کی‌

بۆ هه‌ر حیزبێکی‌ شۆڕشگێڕ که‌ بیهه‌وێت له‌ نێو هاوکێشه‌ سیاسییه‌کاندا خاوه‌ن  سه‌نگ و قورسایی‌ بێت پێویسته‌ پێش ئه‌وه‌ی‌ که‌ پشت به‌ هه‌ر هێزێکی‌ ده‌ره‌کی‌ ببه‌ستێ‌ جێگه‌ و پێگه‌ی‌ خۆی‌ له‌ نێو خه‌ڵکه‌که‌یدا قاییم بکات و پێش له‌ هه‌موو شتێک پشت به‌ ئیراده‌ی‌ نه‌ته‌وه‌که‌ی‌ خۆی‌ ببه‌ستێت.

15 – پێوه‌ندی‌ کردن به‌ که‌سایه‌تییه‌ سه‌ربه‌خۆه‌کان و رێکخراوه‌ مه‌ده‌نییه‌کان له‌ ناوخۆ و ده‌ره‌وه‌ی‌ کوردستان.

16 – هه‌بوونی‌ پلاتفۆڕمی‌ کورتخایه‌ن و درێژخایه‌ن له‌ کاری‌ سیاسی‌ و دیپلۆماسیدا و که‌ڵک وه‌رگرتن له‌ که‌سانی‌ پسپۆڕ بۆ ئه‌م مه‌به‌سته‌.

 

 

ج: به‌شی‌ په‌روه‌رده‌یی‌

1 – گۆڕینی‌ سیستمی‌ په‌روه‌رده‌ی‌ فێرگه‌ بۆ شێوازێکی‌ نوێ‌ له‌ رێگه‌ی‌ گۆڕین و نوێکردنه‌وه‌ی‌ وانه‌کان له‌ بابه‌ت و نێوه‌رۆکدا و که‌ڵک وه‌رگرتن له‌ که‌سانی‌ پسپۆڕ و شاره‌زا بۆ مامۆستایه‌تی‌.

2 – گرینگیدان به‌ په‌روه‌رده‌ی‌ سیاسی‌ و هزری‌ ئه‌ندامان وبنه‌ماڵه‌کانیان و پێگه‌یاندنیان به‌ تایبه‌ت له‌ بواری‌ نه‌ته‌وه‌ییدا.

3 – دانانی‌ به‌رنامه‌ بۆ کاتی‌ بێکاری‌  پێشمه‌رگه‌کان و سه‌رقاڵکردنیان به‌ سه‌رگه‌رمیی‌ سالمی‌ وه‌ک خوێندن و وه‌رزش و...

4 – گرینگی‌ دان به‌ خوێندنی‌ پێشمه‌رگه‌کان و ئاسانکاری‌ بۆ خوێندنیان له‌ قوتابخانه‌ و زانکۆدا.

5 – پێکێهانی‌ کۆڕ و سیمینار بۆ که‌سانی‌ شاره‌زا و پسپۆر له‌ نێو که‌مپه‌کانی‌ حیزب دا و به‌شداریی‌ رێبه‌رایه‌تی‌ له‌م کۆبوونه‌وانه‌دا و به‌کار هێنانی‌ تێبینی‌ ئه‌و که‌سانه‌ به‌ پێی‌ ئیمکان له‌ کاروباری‌ حیزبیدا.

6 – خوێندنه‌وه‌یه‌کی‌ نوێ‌ بۆ کێشه‌ی‌ ژنان و پێوه‌ندییه‌ کۆمه‌ڵایه‌تییه‌کانن.

 

ره‌وتی‌ رێفۆرمی حیزبی‌ دیمۆکراتی‌ کوردستانی‌ ئێران

2006.12.09

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.