Ö:: دیدارێکی هاوبه‌ش له‌ نێوان نوینه‌رانی حیزبه‌ کوردستانی‌یه‌کان له‌شاری "لینشۆپینگ"ی وڵاتی سوئێد

حیزبی دێموکراتی کوردستان .سوئێد/ کۆمیته‌ی لینشۆپینگ

دیدارێکی هاوبه‌ش له‌ نێوان نوینه‌رانی حیزبه‌ کوردستانی‌یه‌کان له‌شاری "لینشۆپینگ"ی وڵاتی سوئێد
له‌سه‌ر بانگهێشتنی کۆمیته‌ی لینشۆپینگی حیزبی دێموکراتی کوردستان، سه‌عات 17.00 ئێواره‌ی ڕۆژی سێ‌شه‌ممه‌  23.01.2007 کۆبوونه‌وه‌یه‌کی هاوبه‌ش له‌ نێوان کاک نافع هروری نوێنه‌ری پارتی دیموکراتی کوردستان، کاک ناسح قادر نوێنه‌ری یه‌کیه‌تیی نیشتیمانی کوردستان، کاک محه‌ممه‌د کوردی، مام حوسێن و کاک عومه‌ر که‌بابی له‌ کۆمه‌ڵه‌ی زه‌حمه‌تکێشانی کوردستان، کوێستان بابایی به‌رپرسی یه‌کیه‌تیی لاوانی دێموکراتی کوردستانی ئێران له‌ لینشۆپینگ، کاک عه‌لی شه‌م به‌رپرسی کۆمه‌ڵه‌ی که‌م ئه‌ندامان و به‌ساڵداچوان و کاک که‌ریم ڕه‌حمانپور و مام که‌ریم نستانی له‌ یه‌کیه‌تیی کوردان کۆبوونه‌وه‌یه‌کی هاوبه‌ش پێکهات.

کۆبوونه‌وه‌که‌ به‌ ده‌قیقه‌یه‌ک بێده‌نگی بۆ ڕێزگرتن له‌ گیانی پاکی شه‌هیدان ده‌ستی پێکرد، پاشان کاک مه‌ریوان نستانی به‌رپرسی کۆمیته‌ی حیزب له‌ شاری لینشۆپینگ به‌گه‌رمی به‌خێرهاتنی به‌شدارانی کۆبوونه‌وه‌که‌ی کرد و سوپاسی کردن که‌ به‌شداری کۆبوونه‌وه‌که‌یان کردووه‌، پاشان له‌ باسێکی کورت دا ئاوڕی له‌ گیروگرفته‌ نێوخۆیی‌یه‌کانی حیزبی دێموکراتی کوردستانی ئێران دایه‌وه‌ و باسی له‌ به‌فێڕۆ چوونی هه‌وڵی هه‌موو ئه‌ندامان و دۆستان و دڵسۆزانی حیزب کرد، که‌ له‌ ئاکامی مل نه‌دانی زۆرینه‌ی ڕێبه‌ری پێشوو و سوربوونی له‌سه‌ر یه‌کده‌ستکردنی حیزب و پاوانخوازی له‌حیزبدا، ئێمه‌ ناچاربووین له‌تبوونی حیزب قه‌بوڵ بکه‌ین و تێکۆشانی خۆمان له‌ ڕیزه‌کانی حیزبی دێموکراتی کوردستان دا درێژه‌ پێبده‌ین، هه‌روه‌ها به‌ڕێزیان ئاماژه‌ی به‌وه‌کرد که‌ ئێمه‌ له‌ حیزبی دێموکراتی کوردستان دا هه‌موو تواناکانمان بۆ دژایه‌تیی له‌گه‌ڵ دوژمنی ڕاسته‌قینه‌ی گه‌له‌که‌مان واته‌ کۆماری ئیسلامی به‌کار دێنین و به‌هیچ جۆر هاوسه‌نگه‌رانی پێشوومان به‌ ڕه‌قیب و نه‌یار نازانین.

له‌به‌شێکی دیکه‌ی باسه‌کاندا به‌ڕێز کاک حه‌مه‌ ڕه‌سوڵ که‌ریمی ئه‌ندامی هه‌یئه‌تی ئیجرایی کۆمیته‌ی حیزب له‌ وڵاتی سوئێد، باسێکی به‌پێزی له‌سه‌ر هێڵه‌ گشتی‌یه‌کانی ڕێبازی ئێمه‌ پێشکه‌ش کرد و ژماره‌‌یه‌ک له‌ خاڵه‌کانی به‌وردی شیکردنه‌وه‌.
به‌شی دووهه‌می کۆبوونه‌وه‌که‌ ته‌رخانکرابوو بۆ باس و گفتوگۆ سه‌باره‌ت به‌ قسه‌کانی هه‌ردوو به‌ڕێزان کاک حه‌مه‌ره‌سوڵ که‌ریمی و کاک مه‌ریوان نستانی، نوێنه‌رانی حیزب و ڕێکخراوه‌کانی دۆستمان پێناخۆشبوونی خۆیان له‌ له‌تبوونی حیزبی دێموکراتی کوردستانی ئێران ده‌ربڕی و له‌هه‌مان کاتدا جه‌ختیان له‌ سه‌ر هاوکاری و پێوه‌ندی نێوان حیزبه‌ کوردستانی‌یه‌کان کرده‌وه‌، هه‌روه‌ها چه‌ند پرسیارێکیان هێنایه‌ گۆڕێ که‌ له‌لایه‌ن نوێنه‌رانی حیزبه‌وه‌ له‌و کۆبوونه‌وه‌یه‌دا وه‌ڵامیان درایه‌وه‌، له‌ دوابه‌شی کاری کۆبوونه‌وه‌که‌دا کۆمیته‌ی لینشۆپینگی حیزب پێشنیاری پێکهێنانی کۆمیته‌ی هاوکاری له‌ نێوان هێزه‌ سیاسی‌یه‌ کوردستانی‌کانیان هێنایه‌ گۆڕێ و له‌گه‌ڵ پێشوازی به‌شداران به‌ره‌وڕوو بوو و به‌ کرده‌یه‌کی باشیان له‌ قه‌ڵه‌مدا، بڕیاردرا له‌ دانیشتنه‌کانی داهاتوودا له‌و پێوه‌ندی‌یه‌دا گفتوگۆی زیاتر بکرێ. تێبینی:

هه‌موو به‌ڕێزانی به‌شدار نوێنه‌رایه‌تیی حیزب و ڕێکخراوه‌کانی خۆیانیان ده‌کرد له‌ شاری لینشۆپینگ دا.

حیزبی دێموکراتی کوردستان

سوئێد/ کۆمیته‌ی لینشۆپینگ

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.