Ö:: به گوڵێك به‌هار نایه، به‌ڵام به‌بێ گوڵیش به‌هار نایه!

نووسینی: ئاسۆی حه‌سه‌ن زاده

به گوڵێك به‌هار نایه، به‌ڵام به‌بێ گوڵیش به‌هار نایه! (په‌یڤێك بۆ ئازیزانم له ئه‌نجوومه‌نی قه‌ڵه‌م)
هه‌ر له‌ رۆژی یه‌كه‌می له‌تبوونی‌ حیزبی دێموكڕاتی كوردستانی ئێرانه‌وه تا ئێستاش كه ته‌نیاچه‌‌ند حه‌وتوو به‌سه‌ر ئه‌و رووداوه‌ ناخۆشه‌دا تێ‌ده‌په‌ڕێ و تێكۆشه‌رانی حیزبی دێموكڕاتی كوردستان - ئێران له باشووری كوردستان هێشتا سه‌رگه‌رمی كۆمه‌ڵێك مه‌سه‌له‌ی مه‌یدانیین، كه‌سانێك  به ئاره‌زووی خۆیان ته‌عبیریان له‌و حیزبه كردووه و چ له پێوه‌ندی له‌گه‌ڵ خه‌ت و رێبازه سیاسی‌یه‌که‌یدا و چ سه‌باره‌ت به كار و به‌رنامه‌کانی داهاتووی، كۆمه‌ڵێك هه‌ڵسه‌نگاندنی ناڕاستیان ئاراسته كردووه كه ئه‌گه‌ر نه‌شیانخه‌ینه خانه‌ی دژایه‌تیی مه‌سڵه‌ت هه‌ڵنه‌گر، لانیكه‌م بێسه‌بری  و پێشوه‌ختی‌یان پێوه‌ دیاره.  

ئه‌وجۆره شیكردنه‌وانه نه‌ك هه‌ر هۆوییه‌تی سیاسیی ‌حیزب و پلانی كاری، به‌ڵكوو خاڵی سه‌ره‌تای ئه‌و ره‌وته نوێیه واته رووداوی له‌تبوونی حیزبیشیان گرتۆته‌وه. بۆ نموونه، به وه‌کاله‌تی تێكۆشه‌رانی حیزبی دێموكڕاتی كوردستان - ئێران، ئه‌‌نگیزه‌ی هه‌ڵوێستی 6ی دێسامبری 2006‌ به جۆرێكی دیكه پێناسه ده‌کرێته‌وه و ئه‌و ئیدیعایه به تێكۆشه‌رانی ئه‌و حیزبه نیسبه‌ت ده‌‌درێ كه گۆیا هۆكاری هه‌وه‌ڵی له‌‌تبوونی حیزب ئه‌و شته نوێیانه‌‌ن كه ئێستا پێشڕ‌‌ه‌وانی حیزبی دێموكڕاتی كوردستان مه‌تره‌حیان ده‌که‌ن. ئه‌وه له حاڵێكدایه‌ كه پێشڕه‌وانی حیزبی دێموكڕاتی كوردستان بوعدی ئه‌سڵیی له‌تبوونی حیزبیان ئاوا نه‌خستۆته ڕوو و‌  له ماوه‌ی یه‌ك مانگ و نیوی رابردوودا، واقعبینی و سه‌داقه‌ت له‌گه‌ڵ خه‌ڵك هه‌میشه‌ ئه‌وه‌ی به‌وان دیكته كرد‌وه كه هۆكاری ئه‌سڵیی ئه‌و لێكترازانه وه‌ك هه‌یه نیشان بده‌ن، واته ئه‌وه كه ئه‌وه سه‌ره‌ڕۆیی و "ئاپارتایدی حیزبی" بوو كه به پله‌ی یه‌که‌م بوو به هۆی له‌تبوونی حیزب.

به‌ڵام هه‌رله‌و كاته‌دا، ئێمه ده‌ڵێین ئێستا كه به‌داخه‌وه حیزبی دێموكڕات له‌ت بووه، ده‌رفه‌‌تێكی له‌بار بۆ كۆمه‌ڵێك پێداچوونه‌وه‌ی سیاسی و چاكسازیی رێكخراوه‌یی و راسیۆنالیزمی ته‌شكیلاتی پێك‌هاتووه.  ئه‌وه كه هۆكاری ئه‌سڵیی له‌‌تبوونی حیزب به‌ پله‌ی یه‌که‌م قه‌تیسمانه‌وه‌ی حیزب له قالبه سووننه‌تییه‌که‌یدا نییه هیچ له جیدییه‌ت و هه‌ققانییه‌تی ئه‌و بڕیاره كه‌م ناكاته‌وه كه پێویسته حیزبی دێموكڕات به‌كرده‌وه له‌و قالبه بهێندرێته ده‌ر و له‌گه‌ڵ سه‌رده‌م بگونجێندرێ.‌ به‌ڵام ئه‌گه‌ر پرۆژه‌ی ئه‌و پێداچوونه‌وه و چاكسازی‌یه هێشتا هه‌ر له حاڵی شكڵ گرتندایه له‌به‌ر ئه‌وه‌یه كه له‌تبوونی حیزب گوزینه‌یه‌کی دڵخواز و له‌پێشدا هه‌ڵبژێراوی ئێمه نه‌بوو و له‌راستیدا حیزبی دێموكڕاتمان به‌سه‌ردا له‌تبوو.

با هه‌ر لێره‌‌دا ئه‌وه‌ش بگوترێ كه هاتنه ده‌ر له قالبی سووننه‌‌تییش به هیچ‌ جۆر به مانای دووركه‌وتنه‌‌وه له شانازی‌یه مێژوویی‌یه‌كان و به‌ها بنه‌ڕه‌تی‌یه‌کانی خه‌‌باته‌که‌مان نییه و بۆ نموونه به‌پێچه‌وانه‌ی ته‌عبیره "من در آ‌وردی‌"یه‌كه‌ی لێكۆڵه‌ره‌وه‌یه‌كی كۆمار و پێشه‌وا، مه‌به‌ستی ئێمه له هێنانی شتی نوێ نه‌ك هه‌ر سڕینه‌وه‌ی ئه‌و به‌ها و شانازی‌یه نه‌ته‌وه‌یی‌یانه نییه، به‌ڵكوو رێك به‌پێچه‌وانه‌،‌ ئێمه ده‌مانه‌وێ ‌نوێ كردنه‌وه و نوێ خوێندنه‌وه بكه‌ینه چه‌كی هه‌ره كاریگه‌ری ژیاندنه‌وه‌ و تۆز له‌سه‌ر لادانی ئه‌‌و به‌ها و شانازی‌یانه.‌

چاكسازی و نوێگه‌رایی چه‌مكه‌كانی پرۆسه‌یه‌كی دوور و درێژ و فره‌ڕ‌‌ه‌‌هه‌ندن. ئه‌وانه‌ی  زوومی روانین و نووكی پێنووسیان له وه‌ها پرۆسه‌یه‌ك ده‌گرن ده‌بێ به چاو و بیرێكی ئاگا و ئاشنا به زه‌مینه كۆمه‌ڵایه‌تی‌یه‌کانی ئه‌و پرۆسه‌یه هه‌‌نگاوه‌كان هه‌ڵسه‌نگێنن.

هه‌روه‌ك چۆن موشاركه‌تی دێموكڕاتیك له حیزبێكی سیاسی‌دا نابێ ببێته هۆی سڕینه‌وه‌ی ئینسجامی ته‌شكیلاتی، هه‌ر به‌و چه‌شنه‌ش‌ نابێ به‌فكری كردن و نوێ كردنه‌وه‌ی هزریی حیزب ببێته هۆی ئه‌وه‌ی حیزبی سیاسیمان له‌گه‌ڵ كلووبی فیكری لێ تێك بچێ.‌ حیزبێكی شیاوی سه‌رده‌م ‌‌‌ ده‌بێ هه‌ڵوێست و كرده‌وه‌ی خۆی له‌سه‌ر بنه‌مای قایمی فیكری دابڕێژێ و به‌پشت به‌ستن به مێتۆد و لێكدانه‌وه‌ی زانستی هه‌نگاو هه‌ڵێنێته‌وه.  به‌ڵام ئه‌وه نابێ به‌و مانایه بێ كه چاوه‌ڕوانیی بێجێمان له شۆڕشگێڕانی مه‌یدانی خه‌بات هه‌بێ و پێمان وابێ كه له سیاسه‌تی رۆژ به ‌رۆژیاندا ده‌بێ راست به‌و زمانه قسه‌ بكه‌ن كه فه‌یله‌سووفێكی سیاسی یان تیئۆریسیه‌نێكی زانستی به‌ڕێوه‌‌بردن قسه‌ی پێ ده‌کا.

گرینگ زۆرتر سیاسه‌تی به‌کرده‌وه‌یه نه‌ك روومای تیئۆریكی شته‌كان. ئه‌و رۆژه‌ی سیاسه‌تمه‌داری كورد له مه‌یدانی كرده‌وه‌دا هه‌مان ئه‌و هه‌‌نگاوانه‌ هه‌ڵدێنێته‌وه كه پسپۆڕ‌ه‌کانمان له ئاكامگیری‌یه‌کانیاندا باسی ده‌كه‌ن، ئه‌وده‌م خوازیارانی ریفۆرم و نوێكردنه‌وه گره‌وی خۆیان بردۆته‌وه.

هه‌ر سه‌باره‌ت به حیزبی دێموكڕاتی كوردستان ئه‌م رۆژانه لێره و له‌وێ بۆچوونێكی دیكه‌ش ده‌بیسین كه ده‌ڵێ مادام پێشڕه‌وانی حیزبی دێموكڕاتی كوردستان - ئێران له سه‌رده‌می ده‌سه‌ڵاتی خۆیاندا ئه‌و هه‌نگاوانه‌یان هه‌ڵنه‌هێناوه‌ته‌وه كه ئه‌مڕۆ باسی ده‌كه‌ن، هه‌ڵوێسته‌کانی ئێستاشیان جیددی نین. ئه‌مه روانینێكه كه له داكترینی "سكێپتیسیسم" (به‌گوومانبوون و ره‌شبینی) هه‌ڵدێنجێنێ. پێشفه‌ڕزییه‌كه‌شی ئه‌وه‌یه كه له بنه‌ڕه‌‌ت‌ڕا سیاسه‌تمه‌دار كه‌سێك نییه كه بتوانین متمانه‌ی پێ بكه‌ین! به‌ڵام ئه‌مه له راستیدا پێشبینی كردنێكی سه‌قه‌ت و رۆخیی ره‌فتاری ئێلیتی سیاسی‌یه، چونكه ئه‌و جۆره دیتنه : 1.‌  به‌رپرسیارێتیی كه‌موکوڕی‌یه‌کانی رابردوو له ‌سه‌ر حیسابی  ته‌‌نیا به‌شێك له ئه‌كته‌ره‌كانی ئه‌و رابردوویه ده‌نووسێ، 2.  ره‌فتاری ئێلیتی باسكراو ته‌‌نیا له رووی تایبه‌تمه‌ندی‌یه گۆیا زاتی‌یه‌کانی ئه‌و ئێلیته‌وه شی ده‌کاته‌وه و هیچ پارامێترێكی دیكه له ئانالیزی خۆیدا ده‌خیل ناكا، 3.‌ هیچ جێگایه‌ك بۆ شوێندانانی هه‌لومه‌رج و سه‌رده‌م له‌سه‌ر باوه‌ڕ و كرده‌وه‌ی ئێلیتی سیاسی قایل نییه،  4.‌ ته‌نانه‌ت هێزی هزر و په‌یڤی خۆیشی به‌ كه‌م ده‌گرێ و ئه‌و راستی‌یه پشت گوێ ده‌خا كه ده‌سكه‌وت و پێشكه‌وته‌ سیاسی‌یه‌كان هیچیان به‌رهه‌می بڕیارێك نین كه له‌سه‌ر بنه‌مای هه‌ڵبژاردنێكی ئه‌خلاقی درابێ، به‌ڵكوو له ئاكامی مشتومڕ و دانوستاندنی هێزه‌كانی نێو كۆمه‌ڵگادا وه‌دی هاتوون. 

له‌ سۆنگه‌یه‌كی نزیك له‌و روانینه‌وه‌یه كه ته‌نیا چه‌ند رۆژ پاش له‌تبوونی حیزبی دێموكڕاتی كوردستانی ئێران یه‌كێك له‌و به‌ڕێزانه‌ی له نێوه‌ڕاستی ساڵه‌کانی نه‌وه‌دی زایینیدا له باشووری كوردستان "ئه‌نجومه‌نی قه‌ڵه‌می كوردستانی ئێران"یان دامه‌زراندبوو، به فۆرمووله كردنی چه‌ند پرسیارێك له سكرتێری پێشووی حیزبی دێموكڕاتی كوردستانی ئێران ده‌رخۆنه‌ی له‌سه‌ر باسێك هه‌ڵدایه‌وه كه به‌خۆشی‌یه‌‌‌وه دیالۆگێكی پێشتر نه‌دیتراوی لێ كه‌وته‌وه كه هه‌ر ئه‌وه بۆخۆی به سه‌ركه‌وتنێكی مایه‌ی دڵگه‌رمی‌ داده‌‌نێم. وه‌ك كه‌سێك كه هه‌م ئه‌‌ندامی حیزبی دێموكڕاتی كوردستانم و هه‌م خۆشم له كۆڕ و كۆمه‌ڵه رووناكبیری‌یه‌كان به نزیك ده‌زانم، حه‌ز ده‌كه‌م له‌و پێوه‌ندییه‌دا بۆچوونی خۆم ده‌رببڕم.

ئه‌وه‌ كه ئه‌وانه‌ی ئه‌و باسه‌یان هێنایه‌‌وه گۆڕێ چه‌ند كه‌سن و چ كه‌سانێكن هیچ گرینگ نییه، گرینگ نێوه‌رۆكی باسه‌که‌یه. ئه‌من كه پێم وا بووه ئه‌و باسه شایانی سه‌رنجپێدانی تایبه‌تی‌یه له به‌ر ئه‌وه‌ بوو كه به باوه‌ڕی من بابه‌تی باسه‌که بایه‌خێكی سه‌مبولیكی هه‌یه. بایه‌خه‌كه‌شی له‌وه‌دایه كه به درێژایی مێژووی خۆی، حیزبی دێموكڕاتی كوردستانی ئێران له‌گه‌ڵ ئه‌وه كێشه‌ی هه‌بووه كه به چ‌‌  شێوه‌یه‌ك له‌گه‌ڵ خه‌ڵكی ده‌ره‌وه‌ی خۆی یان كه‌سانی جیاواز له بافتی سووننه‌تیی خۆی (مه‌به‌ستم رووناكبیران و ئه‌و كوردانه‌ی رۆژهه‌ڵاتی كوردستانه كه ئه‌ندامی حیزبی دێموكڕات نین) مامه‌ڵه بكا‌. سه‌رنجدان به‌و مه‌سه‌له‌یه‌ به‌بێشك یه‌كێك له‌و هه‌‌نگاوانه‌یه كه هه‌ڵگرانی ئاڵای ریفۆرم و نوێ‌كردنه‌وه پێویسته هه‌ڵی‌بێننه‌وه.

ره‌خنه و گازنده‌كانی برایانی ئه‌نجوومه‌نی قه‌ڵه‌م پێوه‌‌ندیی به شێوازی مامه‌ڵه‌ی رابردووی حیزبی دێموكڕاتی كوردستانی ئێران له‌گه‌ڵ ئه‌و ئه‌نجوومه‌نه و هه‌روه‌ها له‌گه‌ڵ ئه‌و په‌نابه‌رانه‌وه هه‌یه كه به هۆی نائه‌منی و قات و قڕیی ئابووریی باشووری كوردستان له نێوه‌ڕاستی نه‌وه‌ده‌كاندا بڕیاریان دا روو له هه‌نده‌ران بكه‌ن. هه‌ر ئه‌وه‌ كه پێشڕه‌وانی حیزبی دێموكڕاتی كوردستان باس له پێداچوونه‌وه و نوێ كردنه‌وه ده‌که‌ن، ئه‌وه بۆخۆی جۆرێك دانپێداهێنان به كه‌موكورتی‌یه‌کان و قبووڵ كردنی ئه‌و راستی‌یه‌یه‌ كه شێوه‌ كار كردنی دوێنێ به ئه‌مڕۆ ناخوا. به‌ڵام ئه‌گه‌ر وردتر سه‌رنج بده‌ینه باسه‌كه‌ی ئه‌نجووومه‌نی قه‌ڵه‌م، مادام ئێستا له حیزبی دێموكڕاتی كوردستاندا ئه‌ندام به‌ تاوانی ره‌خنه‌گرتن و ده‌ربڕینی بۆچوون ده‌رناكرێ یان هه‌ڵناپه‌سێردرێ،  جودا له ورده‌کاریی نوسراوه‌كانی برایانی ئه‌نجوومه‌نی قه‌ڵه‌م، سه‌‌باره‌ت به كاکڵی ره‌خنه‌كانیان ده‌ڵێم:

1. ناكرێ بڵێین هیچكام له‌و شتانه‌ی له ساڵانی رابردوودا سه‌باره‌ت به هه‌ڵوێستی  حیزب له‌گه‌ڵ په‌نابه‌راندا گوتراون بوختانی ناڕه‌وایان تێدا نه‌‌بووه، به‌ڵام ئه‌وه‌ش هه‌ر حاشا‌هه‌ڵنه‌گره كه به‌ڵێ حیزبی دێموكڕاتی كوردستانی ئێران به‌تایبه‌تی له‌ سه‌ره‌تای په‌ره‌گرتنی دیارده‌ی كۆچبه‌ریی ئه‌ندامانی خۆی بۆ وڵاتانی ده‌ره‌وه‌دا هێندێك هه‌ڵوێستی هه‌بوون كه به ته‌واوی به هه‌ڵه‌یان ده‌زانم.

2.‌ ناكرێ مه‌سه‌له‌ی ره‌فتاری حیزب له‌گه‌ڵ جه‌ماوه‌ری ده‌ره‌وه‌ی خۆی هه‌روا ساده و یه‌كلایه‌نه هه‌ڵسه‌نگێنین، به‌ڵام ئه‌وه‌ش نكوولیی لێ ناكرێ كه به‌ڵێ حیزبی دێموكڕاتی كوردستانی ئێران نه‌یزانی ده‌ستی ئه‌نجوومه‌نی قه‌ڵه‌م بگرێ و ئه‌وه‌شی هه‌ر هه‌ڵه‌ بوو.

سه‌ره‌ڕای ئه‌وه‌ش، به باوه‌ڕی من ئه‌گه‌ر برایانی ئه‌نجوومه‌نی قه‌ڵه‌م ئامانجیان دابه‌ستنی دیالۆگێكی سالم و به به‌رهه‌مه، هێندێك تێبینی هه‌ن كه‌ ده‌بوایه له نووسراوه‌كانیاندا  وه‌به‌رچاوی بگرن :

1.‌ هه‌موو دیالۆگێك بۆ ئه‌وه‌ی درێژه بكێشێ و شتی باشی لێ بكه‌وێته‌وه پێویستیی به كۆمه‌ڵێك زه‌رافه‌تكاری له ده‌ربڕیندا هه‌یه، 2. ‌له‌حاڵێكدا كه له وه‌زعییه‌تی پاش له‌تبوونی حیزبدا لایه‌نی به‌رامبه‌ری ئه‌و كه‌سانه‌ی ئه‌نجوومه‌نی قه‌ڵه‌م ره‌خنه‌یان لێ ده‌گرێ ساده‌ترین شت به قازانجی تایبه‌تیی خۆی ده‌قۆزێته‌وه و خۆراكی ته‌بلیغاتی چه‌واشه‌كارانه‌ی خۆی پێ دابین ده‌کا، برایانی ئه‌نجوومه‌نی قه‌ڵه‌م ئه‌گه‌ر (وه‌ك كردوویانه) هه‌ڵه و كه‌موكوڕی‌یه‌کانی ئه‌و ده‌ورانه‌یان له‌سه‌ر حیسابی ‌ته‌نیا لایه‌كی حیزبیش ده‌نووسی، خۆ لانیكه‌م ده‌یانتوانی به هێنانی یه‌ك رسته له سه‌ره‌تای نووسراوه‌كانیاندا پێشگیری له‌وه بكه‌ن كه كه‌ڵكی خراپ له‌ بۆچوونه‌کانیان وه‌ربگیرێ، ‌3.‌ به‌ڕێزانی ئه‌نجوومه‌نی قه‌ڵه‌م كه له‌وه دڵگرانن كه سكرتێری پێشووی حیزب به‌و جۆره‌ی ئه‌وان چاوه‌ڕوانی‌یان هه‌بووه دانی به هێندێك هه‌ڵه‌ی دیاریكراودا نه‌ناوه، بۆخۆشیان حازر نین هه‌ڵه‌کانی خۆیان كه به شێوه‌ی شه‌فاهی دانی پێدا ده‌نێن بهێننه‌ سه‌ر كاغه‌ز، 4 .‌ برایانی ئه‌نجوومه‌نی قه‌ڵه‌م له راده‌به‌ده‌ر خۆیان له كۆمه‌ڵگای كوردی و ئه‌و حیزبه‌ی ئه‌وان ره‌خنه‌ی لێ ده‌گرن بێگانه نیشان ده‌ده‌ن و كه‌مترین ده‌ركێك بۆ بێ ئیمكاناتی و نائه‌منیی زاڵ به‌سه‌ر هه‌لومه‌رجی ئه‌وكات قایل نین.‌ (ده‌رك و عوزر دوو شتی لێك جودان، لانیكه‌م یه‌كه‌میان پێویست بوو)، 5.‌ له‌نێو خودی ئه‌‌و كه‌سانه‌دا كه‌ پێشتر له ئه‌نجوومه‌نی قه‌ڵه‌مدا بوون ریوایه‌ت و ته‌فسیری نالێك هه‌یه.

هه‌روه‌ک له‌سه‌ره‌وه باس كرا ریفۆرم له كۆمه‌ڵدا بڕیاری كه‌سێك و كرده‌ی ساتێك نییه، به‌ڵكوو به‌ وێنه‌ی ئازادی و دێموكڕاسی، پرۆسه‌یه‌کی به‌رده‌وام و  قۆناغ به قۆناغه كه له هه‌مان كاتدا هه‌موو رۆژێ هێندێكی وه‌دی دێ، به‌ڵام قه‌تیش هه‌مووی وه‌دی نایه و هیچیشی بۆ هه‌میشه ده‌سته‌به‌ر نییه، هه‌ربۆیه پشووی درێژ و كار بۆ كردنی شێلگیرانه و چاوه‌دێریی بێ‌پسانه‌وه‌‌ی ده‌وێ.

له‌لای هه‌موو ده‌سه‌ڵاتێك هێندێك شت هه‌ن كه پێویستییان به تێپه‌ڕینی زه‌مان هه‌یه بۆ ئه‌وه‌ی فێریان بێ و پێیان رابێ. بۆ نموونه ئازادیی راده‌ربڕین له‌ مێدیاكانی فه‌ڕانسه‌دا هه‌مووی بیست ساڵ نابێ كه بواری به‌كرده‌وه‌ی به‌ شێوه‌ی كامڵ بۆ ره‌خساوه. ته‌نیا چه‌ند ساڵێك پێش ئه‌وه‌ی خه‌ڵكی فه‌ڕانسه دوو سه‌ده‌مین ساڵوه‌گه‌ڕی شۆڕشی 1789 جێژن بگرن،  فرانسوا میتران كه پاش ناردنی نامه‌یه‌كی پڕ له به‌ڵێنی له بواری ئازادی‌یه تاكه‌كه‌سی‌یه‌‌كاندا به‌ناوی "101‌پێشنیار بۆ خه‌ڵكی فه‌ڕانسه" ده‌سه‌ڵاتی گرتبووه ده‌ست، له‌گه‌ڵ یه‌کێك له قه‌یرانه سه‌خته‌كانی ده‌وره‌ی یه‌كه‌می سه‌ركۆماریی خۆی به‌ره‌‌و‌ڕوو بوو.  مه‌سه‌له‌كه به‌م جۆره بوو كه له سه‌ره‌تای هه‌شتاكاندا حكوومه‌تی فه‌ڕانسه بڕیاری دا شه‌پۆلی رادیۆیی "ئێف ئێم" ئازاد بكا و جگه له رادیۆ ده‌وڵه‌تی‌یه‌کان، رادیۆگه‌لی خسووسییش بتوانن به‌رنامه‌ بڵاو بكه‌نه‌وه. به‌ڵام ته‌نیا چه‌ند مانگێك پاش ئه‌وه‌ی ئێف ئێم ئازاد كرا و رادیۆ‌ غه‌یره ده‌وڵه‌تی‌یه‌كان گه‌شه‌یان كرد، حكوومه‌تی ئه‌و كاتی فه‌ڕانسه دوای ئه‌وه‌ی گوێبیستی هه‌موو ئه‌و قسانه بوو كه له‌و رادیۆ خسووسی‌یانه‌دا به‌دژی ئه‌و حكوومه‌ته ده‌گوتران، له بڕیاره‌که‌ی خۆی پاشگه‌ز بۆوه و دیسان شه‌پۆلی ئێف ئێمی له رادیۆ غه‌یره ده‌وڵه‌تی‌یه‌كان به‌ر‌‌‌به‌ست كرده‌وه!

راسته له كۆمه‌ڵی ئێمه‌دا كه به‌پێچه‌وانه‌ی نموونه‌ی سه‌ره‌وه كۆمه‌ڵگایه‌كی نیهادییش نییه، رووناكبیر نابێ به هیچ جۆر ته‌ساموح له‌گه‌ڵ ده‌سه‌ڵات بكا، به‌ڵام ئه‌گه‌ر به‌ڕاستیش ئامانجی ئه‌وه‌یه كه ده‌سه‌ڵات (مه‌به‌ستم ده‌سه‌ڵاتی كوردی‌یه) گوێی لێ بگرێ، نابێ خۆی له ده‌سه‌ڵات بێگانه بكا و به مه‌حكووم كردنی جارێك بۆ هه‌میشه‌ی، له قوژبنی هه‌ڵه‌كانیدا به ته‌نیا به‌جێی بێڵێ و لێ‌گه‌ڕێ دیواره چنراوه‌كان به‌رزتر و ئه‌ستوورتر ببنه‌وه. ره‌خنه‌گری ده‌سه‌ڵاتی كوردی له جیاتی بێهیوایی و بێمتمانه‌یی باشتر وایه حه‌رفی خوودی ئه‌و ده‌سه‌ڵاته به شاهید بگرێ و به‌پێی قسه و به‌ڵێنه‌كانی خۆی نمره بۆ ره‌فتاری له‌مه‌ودوای دابنێ. له‌و پێناوه‌شدا نابێ قه‌‌ت ره‌خنه‌كه‌ی له كۆنتێكستی ره‌خنه‌ گرتنه‌كه‌ی جیا بكاته‌وه و پێویسته پێ به پێ له‌گه‌ڵ ده‌سه‌ڵات بچێته پێش.‌

ئه‌وانه‌ی وا گۆشكراوی وتاری یه‌کده‌ستكردنن و به‌شێوه‌ی سروشتی كه‌وتوونه‌ته خانه‌ی دژایه‌تی له‌گه‌ڵ حیزبی دێموكڕاتی كوردستان - ئێران گله‌یی‌یه‌کی ئه‌وتۆیان لێ ناكرێ.‌ به‌ڵام هه‌موو ئه‌و كه‌سانه‌ی خه‌مخۆری چاكسازی له‌نێو حیزبه كوردی‌یه‌کاندان و دڵنیام برایانی ئه‌نجوومه‌نی قه‌ڵه‌م له جومله‌ی وانن، پێویسته له خۆیان بپرسن داخوا به چ شێوه‌یه‌كی گونجاو ده‌توانن به نۆره‌ی خۆیان یارمه‌تی به سه‌رخستنی پرۆسه‌یه‌ك بكه‌ن كه ئاكامه‌كه‌ی ده‌توانێ سه‌رخستنی بۆچوونه‌كانی خۆیان بێ.

هه‌روه‌ک هۆگرێكی دیكه‌ی چاكسازیی ‌نێو حیزبه‌ كوردی‌یه‌کان له‌م رۆژانه‌دا فه‌رمووی، جاری وا‌یه ره‌وتێكی زۆر باش و به‌نرخیش ئاراسته‌یه‌كی غه‌یره عه‌قلانی ده‌گرێته به‌ر، چونكه له‌ ده‌وروبه‌رێكی هانابه‌خشدا ناچێته پێش و ته‌ئسیری خراپ له ئه‌كته‌ره‌کانی دیكه‌ وه‌رده‌گرێ. هه‌ر ئێستا به‌داخه‌وه به‌رپرسانی حیزبی دێموكڕاتی كوردستانی ئێران له رێگای كه‌ڵكی خراپ وه‌رگرتن له هێندێك پارامێتری كاتی و رواڵه‌تی هه‌وڵ ده‌ده‌ن ئه‌و ئاراسته غه‌یره عه‌قلانی‌یه بكه‌نه نۆڕمی پاش له‌تبوونی حیزب.

جا بۆیه چ له برایانی "ئه‌نجوومه‌نی قه‌ڵه‌م" و چ له هه‌موو خوازیارانی چاكسازیی به‌كرده‌وه ئه‌و چاوه‌ڕوانی‌یه ده‌کرێ كه نه‌‌هێڵن شانسێك كه بۆ پێداچوونه‌وه و چاكسازی هاتۆته پێش ببێته قوربانیی نۆڕمی ناعه‌قلانی.

به هه‌وڵ و هیممه‌تی هه‌‌موو لایه‌ك ده‌كرێ هیوادار بین  كه له‌و وێرانه‌یه‌دا گه‌نجینه‌ی سیاسه‌ت كردنێكی دروست و به قازانجی گه‌ل سه‌ر وه‌ده‌ر بنێ و ئاسۆی دواڕۆژی  گه‌له‌كه‌مان  رووناكتر بكاته‌وه.‌ با هه‌موومان پێكه‌وه بۆ كۆتایی هێنان به‌و مه‌نتالیته‌یه‌ش ‌ تێ‌بكۆشین كه پێی وایه ئازادیی تاكی كورد كاریته‌یه‌ بۆ نێو چه‌‌رخی ئازادیی نه‌ته‌وه‌ی كورد.

رێز و سۆز بۆ موخاتبینی ئه‌م دێرانه.

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.