Ö:: هه‌ڵمه‌تی چه‌قۆکێشی کاره‌ساته‌ یان دیارده‌ی پێ هه‌ڵگوتن؟

نووسینی: پێشمه‌رگه‌یه‌ک

هه‌ڵمه‌تی چه‌قۆکێشی کاره‌ساته‌ یان دیارده‌ی پێ هه‌ڵگوتن؟
پێش ئه‌وه‌ی وه‌ڵامی کاک مه‌نسوری به‌ڕێز بده‌مه‌وه‌، ‌حه‌ز ده‌که‌م به‌ کورتی هێندێک له‌سه‌ر هونه‌ری شایه‌ری و پێ هه‌ڵگوتن باس بکه‌م.  پێ هه‌ڵگوتنی گۆرانیبێژانی کورد له‌ شایی زه‌ماوه‌ندان و له‌ بۆنه‌ جۆراوجۆره‌کان به‌ که‌سایه‌تیه‌ ناسراو و نه‌ناسراوه‌کان بۆته‌ دیارده‌یه‌کی کۆمه‌ڵایه‌تی و تان و پۆی ئه‌و دیارده‌یه‌ ( به‌ باش یان خراپ) رۆچۆته‌ ناخی کولتور و داب و نه‌رێتی کۆمه‌ڵگای کورده‌واری و‌ تایبه‌ت ‌نییه‌ به‌مڕۆ و به‌و ساده‌ییه‌ش کۆتایی پێ نایات که‌ کاک مه‌نسور قۆڵی لێ هه‌ڵماڵیوه‌.

ئه‌و هونه‌ره‌ له‌وانه‌یه‌ ره‌گ ریشه‌ی بۆ سه‌دان  ساڵ له‌وه‌پێش بگه‌رێته‌وه‌ له‌ نێو گه‌لانی رۆژهه‌ڵات دا.  له‌ نێو عه‌ره‌ب و فارسه‌کان به‌ ''مدح'' ناسراوه‌ و ته‌نانه‌ت شاعیری ناسراوی عه‌ره‌ب ''المتنبی'' له‌ پێش ئیسلام ناوبانگی هه‌یه‌ له‌ هونه‌ری پێ هه‌ڵگوتن و له‌وانه‌یه‌ هه‌ر له‌سه‌ر ئه‌وه‌ش بێ که‌ کوژرا. ئه‌گه‌ر ''مدح'' له‌ شێعری عه‌ره‌ب لابه‌ری، له‌وانه‌یه‌ که‌س ئه‌ده‌بیاتی عه‌ره‌ب نه‌ناسیته‌وه!

فۆرم و شێوه‌ی  پێ‌هه‌ڵگوتن له‌ هه‌ر نه‌ته‌وه‌یه‌که‌وه‌ بۆ نه‌ته‌وه‌یه‌کی دیکه‌ جیاوازی هه‌یه‌. له‌ نێو کورد دا ئه‌و هونه‌ره‌ خۆی خزاندۆته‌ نێو گۆرانی. جاران به‌ گورانی بێژێک که‌ به‌ خه‌ڵکی هه‌ڵگوتبا، ده‌یان وت ''لۆتی'' و ئه‌وه‌ش وه‌ک وشه‌یه‌کی سوک سه‌یری ده‌کرا. بۆ نمونه‌ ''لۆتی چه‌قو'' له‌ هێندێک ناوچه‌ی کوردستان زۆر ناسراوه‌ و چۆن ئه‌و ناوه‌ی به ‌سه‌ر دا بڕاوه‌ له‌وانه‌یه‌ چیرۆکی خۆی هه‌بێ که‌ من نایزانم. ئه‌و ناوه‌ به‌ هه‌مان ناوه‌رۆک هێدی هێدی گۆڕانی به‌سه‌ردا هاتووه‌، وه‌ک ''قام بێژ''، ''شایه‌ر'' و ''گۆرانی بێژ'' ناوی ده‌هات و ئێستاش وه‌ک ''هونه‌رمه‌ند'' ناوی ده‌رکردووه‌.

 ئه‌گه‌ر سه‌یری به‌ره‌وپێش چوون و گۆڕانی ئه‌و ناوه‌ بکه‌ین ده‌بینین به‌ره‌به‌ره‌ ئه‌و که‌سه‌ی به‌ خه‌ڵک هه‌ڵده‌ڵێ، ناو و ئیعتبارێکی کۆمه‌ڵایه‌تی په‌یدا ده‌کا. ئه‌گه‌ر جاران وه‌ک لۆتی سه‌یری ده‌کرا، ئێستا کۆمه‌ڵگا پله‌ی هونه‌رمه‌ندی پێ به‌خشیوه‌ و رێزی تایبه‌تی لێده‌گرێ.  ئه‌وه‌ نیشان ده‌دات که‌ پێهه‌ڵگوتن دیارده‌یه‌کی کۆمه‌ڵایه‌تییه‌ له‌ کوردستان دا و ئه‌گه‌ر سێ چوار ده‌یه‌ له‌مه‌وبه‌ر تایبه‌ت بوو به‌ ناوچه‌یه‌کی به‌رته‌سک له‌ کوردستان، ئێستا ئه‌و دیارده‌یه‌ له‌ زۆربه‌ی ناوچه‌کانی کوردستان بره‌وی هه‌یه‌ و له‌م ساڵانه‌ی دوایی دا که‌ڵکی سیاسیشی لێ وه‌رده‌گیرێ که‌ دوایی باسی لێ ده‌که‌م.

خوالێخۆشبوو قادر مامه‌ندی له‌ پێدا هه‌ڵگوتن دا ده‌ستی باڵای هه‌بوو و شاعیری به‌ تواناش یارمه‌تییان داوه‌ له‌ که‌ره‌سه‌ی شێعری. سه‌ید عه‌لی سه‌ده‌شتی، برایم گڵێنانی، برایمی قادری، ره‌حمان کارتۆن، ره‌سوی نادری، سمایلی سه‌رده‌شتی و ده‌یان هه‌نه‌رمه‌ندی دیکه‌ له‌ هونه‌ری پێ هه‌ڵگوتن شاره‌زایی باشیان هه‌یه‌ و کۆڕی شایی و زه‌ماوه‌ندی  سه‌دان  کوڕ و کچی کوردیان رازاندۆته‌وه‌ و کوڕانی ''دۆ'' به‌ده‌ست شاباشیان داوه‌ کاتێک ئه‌و هه‌نه‌رمه‌ندانه‌ ئاوڕیان لێ داونه‌ته‌وه‌ و به‌ یه‌ک به‌یت و دوو به‌یت به‌سه‌ریان کردونه‌ته‌وه‌. هونه‌ری پیهه‌ڵگوتن وای لێهاتووه‌ که‌ ئه‌و کاره‌ نه‌ بۆ هونه‌رمه‌نده‌که‌ به‌ که‌سری شان حیساب ده‌کرێ و نه‌ ئه‌و که‌سه‌ی که‌ پێی هه‌ڵده‌گوترێ هه‌ست به‌ شه‌رمه‌زاری ده‌کات، جا ئه‌و که‌سه‌ی پێی هه‌ڵگوتراوه‌ حه‌ز ده‌که‌ی ''شا'' بێ یان ''گه‌دا''. به‌ مانایه‌کی دیکه‌ که‌س نه‌که‌وتۆته‌ به‌ر‌ تانه‌و ته‌شه‌ری که‌سانی دیکه‌ که‌ کاکی هونه‌رمه‌ند پێی هه‌ڵگوتووه‌، چونکه‌ ئه‌وه‌ وه‌ک نۆرمێکی کۆمه‌ڵایه‌تی سه‌یر کراوه‌و و که‌سێش تا ئێستا هه‌وڵی له‌ ریشه‌‌هه‌ڵکێشانی ئه‌و دیارده‌ کۆمه‌ڵایه‌تییه‌ی نه‌داوه‌.

من شه‌خسه‌ن خۆشیم له‌ پێهه‌ڵگوتن نایات  له‌ گۆرانی دا، به‌ڵام به‌ ناڕه‌وای ده‌زانم  شانه‌ی ئه‌و دیارده‌ کۆمه‌ڵایه‌تییه‌ له‌ سه‌ری که‌سێک دا بشکێنین و بیکه‌ینه‌ بیانوو بۆ هێڕش کردنه‌ سه‌ر که‌سایه‌تییه‌کی ناسراوی کورد، هۆیه‌که‌شی  ئه‌وه‌ بێ‌ که‌ له‌ جه‌ژنیک له‌ وڵاتێک که‌ مامۆستا حه‌سه‌نزاده‌ به‌ سه‌دان کیلۆمێتر له‌وێ دووره‌، هومه‌رمه‌ندێکی پارچه‌یه‌کی دیکه‌ پێی هه‌ڵگوتووه.‌ به‌ڵام کاک مه‌نسور ئه‌وه‌ ده‌کات به‌ بیانو بۆ هێرش و تێک هه‌ڵکێشی ده‌کات له‌گه‌ڵ نوێ بوونه‌وه‌یه‌ک که‌ حیزبی دێموکڕاتی کوردستان باسی ده‌کات. له‌ راستی دا من ئه‌وه‌ هه‌ر به‌ بیانوو ده‌زانم بۆ هێرش کردنه‌ سه‌ر که‌سایه‌تی مامۆستا حه‌سه‌نزاده‌، ده‌نا ئه‌وه‌نده‌ی نه‌‌ده‌هێنا کاک مه‌نسور بابه‌تی له‌سه‌ر ساز بکات!

25ی گه‌لاوێژی 1362 له‌ گوندی بنوخه‌له‌ف جێژن ده‌بێ. له‌و کاته‌دا هونه‌رمه‌ند عومه‌ر بۆکانی به‌وێدا تێده‌په‌ڕێت و گۆرانی ده‌ڵێ. له‌وێ دا چه‌ند جار به‌ دکتۆر قاسملوو هه‌ڵده‌ڵێ و هیچیش ناقه‌ومێ. ئه‌وکاتیش د. قاسملوو وه‌ک ئێستای مامۆستا له‌ شوێنه‌که‌ نابێ که‌ پێی هه‌ڵده‌ڵێن. ئایا کاک مه‌نسور ئاماده‌یه‌ ئه‌و قه‌زاوه‌ته‌ی له‌سه‌ر مامۆستای ده‌کات له‌ سه‌ر د.قاسملووشی بکات؟  خۆ ئه‌گه‌ر تاوان بی بۆ هه‌ر دووکیان تاوانه‌ به‌لام دڵنیام هه‌م د. قاسملوو و هه‌م مامۆستا حه‌سه‌نزاده‌ پێ هه‌ڵگوتنیان پی خۆش نیه‌.

مامۆستا حه‌سه‌نزاده‌ و حیزبه‌که‌ی یه‌که‌م هیز و که‌سایه‌تی سیاسی نیه که‌ هونه‌رمه‌ندانی کورد پێی هه‌ڵده‌ڵێن و به‌ دڵنیا‌ییشه‌وه‌ ئاخرین هیزو که‌سایه‌تی نابن، به‌ڵام نازانم بۆ کاک مه‌نسور ئه‌وه‌ با کاره‌سات ناو ده‌با؟

من زۆر له‌سه‌ر سه‌ردێره‌که‌ی کاک مه‌نسور نارۆم چۆنکه‌ هه‌ر خۆی پێی وایه‌ که‌ '' بێگوومان سه‌ردێڕێکی ئاوا بۆ بابه‌تێکی سیاسی له‌وانه‌یه‌ هێنده‌ په‌سند نه‌بێت'' نه‌ک په‌سند نیه‌ بگره‌ زۆریش ناپه‌سنده‌. هه‌ر دوای ئه‌وه‌ درێژه‌ ده‌دات که‌ '' به‌ڵام بۆ ئه‌وه‌ش ده‌بێت، بچینه‌ نێو  باسێک که‌ تایبه‌ته‌ به‌ خه‌ڵکانێک و ده‌رگایه‌کی باشه‌ بۆ وردبوونه‌وه‌ له‌ بیری هه‌ندێک که‌س و شرۆڤه‌ی بیری ئه‌وان!''  له‌و باره‌وه‌  کاک مه‌نسور زه‌حمه‌تی داوه‌ به‌ خۆی و هه‌وڵ ده‌دات  بیری هونه‌رمه‌ند و چۆنیه‌تی وه‌سف کردن له‌ لایه‌ن هونه‌رمه‌نده‌وه‌ ''شرۆڤه‌'' بکات و وه‌ک ته‌وقێک بیخاته‌ ئه‌ستۆی ئه‌و که‌سه‌ی که‌ وه‌سفیان کردووه‌. وادیاره‌ کاک مه‌نسوور له‌وباره‌وه‌ شاره‌زایی نییه‌ هه‌ر بۆیه‌ پێویسته‌ ئه‌وه‌ ‌بزانێت که‌ هونه‌رمه‌ند سه‌ربه‌سته‌ له‌ چۆنیه‌تی پێ هه‌ڵگوتنی ئه‌و که‌سه‌ی مه‌به‌ستێتی. هیچ کات و له‌ هیچ شوێنێک هونه‌رمه‌ند ئه‌وه‌نده‌خۆی به‌ که‌م به‌هره‌ نه‌زانیوه‌ که‌ پرس بکات، ئه‌رێ چۆنت پی هه‌ڵبڵێم و هونه‌رمه‌ند سه‌ربه‌خۆیی ئه‌وه‌ی هه‌یه‌ چۆن هۆنراوه‌که‌ی بهۆنێته‌وه‌ و وه‌زن و قافیه‌که‌ی رێک و له‌بار  بکات و له‌ راستیش دا هونه‌ره‌که‌ی هه‌ر له‌وه‌ دایه ده‌نا‌  پێیان نه‌ده‌وت هونه‌رمه‌ند یان شایه‌ر. له‌ دێر زه‌مانه‌وه‌ تا ئێستا که‌س هێرشی نه‌کردۆته‌ سه‌ر که‌سێک که‌ هونه‌رمه‌ندێک پێی هه‌ڵگوتبێ.

لێره‌دا نموونه‌یه‌ک دێنمه‌وه‌ که‌ ره‌سوی نادری باسی ده‌کا. چه‌ند ساڵ پێش ره‌سوی نادری دێته‌ نێو حیزب و له‌ به‌رنامه‌یه‌ک دا به‌ کادر و پێشمه‌رگه‌مان و رێبه‌رانی حیزب هه‌ڵده‌ڵێ. پاشان ده‌گه‌رێته‌وه‌ بۆ ئێران و له‌وێ فشاری بۆ ده‌ێنن. ئه‌ویش ده‌ڵێ: من له‌ هه‌ر شوێنێکی بم  به‌ خه‌ڵکی هه‌ڵده‌ڵێم و شاباشی خۆم وه‌رده‌گرم و ئێوه‌ش ئه‌گه‌ر پێتان خۆشه‌ شاباشیم پێ بده‌ن پێتان هه‌ڵبڵێم. ره‌سوی نادری وایان پی هه‌ڵده‌ڵێ که‌ به‌ زه‌ره‌ری ته‌ره‌فه‌که‌ ته‌واو ده‌بێت و وازی لێ دێنن. ئه‌و نموونه‌یه‌ زۆر شت روون ده‌کاته‌وه‌. یه‌که‌م ئه‌وه‌ که‌ پێهه‌ڵگووتن بۆته‌ دیارده‌یه‌کی باو له‌ نێو کۆمه‌ڵ دا و رێژیمێکی دڕنده‌ی وه‌ک کۆماری ئیسلامی که‌سی له‌سه‌ر ئێعدام ناکات و هونه‌رمه‌ند زۆر به‌ ئاسانی خۆی له‌و داوه‌ قوتار ده‌کا. دووه‌م له‌به‌ر ئه‌وه‌ی هونه‌رمه‌ند به‌ هه‌موو که‌س هه‌ڵده‌ڵێ، که‌سی پێ هه‌ڵگوتراو ته‌نانه‌ت ئه‌گه‌ر شه‌خشی، کاک مه‌سعود بارزانی، مام جه‌لال، مامۆستا و کاک مسته‌فاش بن هیچ ده‌سکه‌وتی سیاسی نابێ و لاینگر به‌وه‌ کۆ ناکرێته‌وه‌ که‌ خۆی پێوه‌ ناراحه‌ت بکه‌ین!

کاک سمایل سه‌رده‌شتیش کاتێک له‌ نێو خۆی وڵات بوو به‌ ده‌یان کاسێت به‌ کادر و پێشمه‌رگه‌ و که‌سایه‌تی سیاسی هه‌ڵگووت و هه‌ر جاره‌ی ماوه‌یه‌ک ده‌که‌وته‌ زیندان و ئازاد ده‌کرا. که‌م نین ئه‌وانه‌ی له‌ ده‌ره‌وه‌ی وڵات بوون پاره‌یان بۆ کاک سمایل ده‌نارده‌وه‌ که‌ پێیان هه‌ڵبڵێت و کاک سمایل به‌وپه‌ڕی ئیفتخاره‌وه‌ ئه‌وکاره‌ی ده‌کرد و ته‌نانه‌ت له‌ نه‌ورۆزی پار له‌ کۆیه‌ سمایل سه‌رده‌شتی به‌ مامۆستای هه‌ڵگوتبوو و مامۆستا پێی ناخۆش بوو و به‌ڵام له‌به‌ر ئه‌وه‌ی به‌ کاک مسته‌فای هه‌ڵنه‌گوتبوو دواتر بیانووتان پی گرت و له‌ حیزب ده‌رتان کرد.

هه‌ر هونه‌ری پێ هه‌ڵگوتن بوو که‌ به‌ ده‌نگی کاک سمایل سه‌رده‌شتی له‌ کاتی هه‌ڵبژاردنه‌کان دا که‌ڵکی لێوه‌رده‌گیراو زۆر که‌سی هێنایه‌ سه‌ر سندوقه‌کانی هه‌ڵبژاردن به‌ قازانجی لیستی هاوپه‌یمانی کوردستان و که‌سانی وه‌ک کاک مه‌نسور نه‌ک به‌ کاره‌ساتیان نێو نه‌ده‌برد به‌ڵکوو ئه‌گه‌ر قه‌ڵه‌میان هاتبا گۆ، تێر و ته‌سه‌ل وه‌سفی هونه‌رمه‌ندیی ئه‌و به‌رێزه‌یان ده‌کرد.

وادیاره‌ کاک مه‌نسور له‌ بیری چۆته‌وه‌ که‌ هونه‌رمه‌ند نیاز شه‌یدا له‌ گۆرانێکی دوور و درێژ دا به‌ بۆنه‌ی یه‌کگرتنه‌وه‌ی حکومه‌تی هه‌رێمی کوردسان به‌ ناوی ''یه‌کگرتن موباره‌ک له‌ هه‌مووتان'' نێوی زۆربه‌ی ریبه‌رانی زیندوو و شه‌هیدی کورد دێنێ و پێیان هه‌ڵده‌ڵێت و له‌وانه‌شه‌ ئه‌و گۆرانیانه‌ی نه‌بیستبن که‌ به‌ بارزانی و کاک مه‌سعود هه‌ڵده‌ڵێن!! ده‌نا خۆی ئه‌وه‌نده‌ سه‌خڵه‌ت نه‌ده‌کرد و پێ هه‌ڵگوتنی ئه‌مجاره‌ی نیاز شه‌یدای به‌ کاره‌سات نه‌ده‌زانی!

زۆر سه‌یره‌ کاک مه‌نسور له‌و رۆژانه‌ باس له‌ کاره‌سات ده‌کات به‌ڵام ئاوڕێک له هه‌ڵمه‌تی ئه‌و چه‌قوکێشیانه‌ ناداته‌وه‌  که‌ ئه‌ندامانی حیزبه‌که‌ی ئه‌و ده‌ستیان پی کردووه‌ بۆ سه‌ر جیابیرانی خۆیان و هاوسه‌نگه‌رانی دوێنێیان. یان گه‌ره‌کته‌ حه‌ماسه‌ و کاره‌ساتێک که‌ چه‌قوکێشان و قه‌مه‌به‌ده‌ستانی هاوبیرت خوڵقاندوویانه‌، بیهێنیه‌ رێزی گۆرانیه‌که‌ی نیاز شه‌یدا؟

ئه‌گه‌ر باس له‌ ته‌ک په‌رستی و فه‌رد په‌رستی ده‌که‌ی چۆنه‌ باسێک له‌ به‌رنامه‌ی تیشک تێ ڤێ ناکه‌ی که‌ زۆربه‌ی ئه‌و که‌سانه‌ی زه‌نگتان  لێدا به‌ بۆنه‌ی 2ی رێبه‌ندان پیرۆباییتان له‌ شه‌خسی کاک مسته‌فا هیجری کرد؟ له‌وانه‌یه‌ وه‌ڵامت ئه‌وه‌ بێ که‌ ده‌می خه‌ڵک نابه‌سرێ. به‌ڵام چۆنه‌ به‌ته‌مای ده‌می هونه‌رمه‌ندێک ببه‌ستی که‌ ئه‌وه‌ی له‌ ده‌می هاتۆته‌ ده‌ر بابی ته‌بعی تۆ نییه‌؟

کاک مه‌نسوور باس له‌ متینگی شاری مهاباد ده‌کات به‌لام ئه‌و ئازایه‌تییه‌ به‌ خۆی نادات که‌ کێ ئه‌و مه‌سه‌له‌یه‌ی باس کردووه‌. ئایا خودی مامۆستا حه‌سه‌نزاده‌ نه‌بوو که‌ ئه‌وه نموونه‌ی گێراوه‌ له‌سه‌ر دروشمی ''درود بر قاسملو''؟   به‌ڵام وادیاره‌ ئه‌گه‌ر ئه‌مه‌گناسی به‌کار بێنێ له‌ گێرانه‌وه‌ی ئه‌و‌ نموونه‌یه‌، ریسه‌که‌ی لێ ده‌بێ به‌ خۆری، چۆنکه‌ مامۆستا به‌ کرده‌وه‌ سه‌لماندوویه‌تی که‌ دژی فه‌رد په‌رستیه‌ له‌ حیزب دا و هه‌ر به‌ پێداگری ئه‌و بوو له‌ کۆنگره‌ی11 دا که‌ که‌س ناتوانێ له‌ 2 ده‌وره‌ زیاتر له‌سه‌ر یه‌ک سکرتێر بێ و ئه‌وه‌ش کرا به‌ به‌ندێکی ئه‌ساسنامه‌ که‌ ئێستا به‌ڕێز کاک مه‌نسور ''په‌یره‌وی'' لێ ده‌کا. هه‌ر بۆیه‌ دڵنیام  به‌ڕێز حه‌سه‌نزاده‌ زۆری پێ ناخۆشه‌ که‌ هونه‌رمه‌ند نیاز شه‌یدا پێی هه‌ڵگوتووه‌ به‌ڵام چار چیه‌ ئه‌و له‌ کوردستان و ئه‌و له‌ فینلاند.

هه‌موو هه‌وڵ و ته‌قه‌لای کاک مه‌نسور ئه‌وه‌یه‌ ‌که‌ مه‌سه‌له‌که‌ گرێ بداته‌وه‌ به‌ نوێ بوونه‌وه‌یه‌ک که‌ حیزبی دێموکڕاتی کوردستان باسی لێ ده‌کات و ئه‌وه‌ش وه‌ک گوناحێکی نه‌به‌خشراو له‌سه‌ر حیزبی دێموکڕاتی کوردستان حیساب ده‌کات. کاک مه‌نسوور پێی وایه‌ هه‌ر که‌س باسی له‌ نوێ بوونه‌وه‌ کرد، باس باسی جل و به‌رگه‌ و حیزبی دێموکڕاتی کوردستان تاوانبار به‌وه‌ ده‌کات که‌ پێیوایه‌ حیزب له‌ جل و به‌رگی سیاسی کۆن دابووه‌. ده‌کرێ ئه‌وه‌ روانینی کاک مه‌نسوور بێ له‌ نوێ بوونه‌وه‌. بێ گومان ئه‌گه‌ر له‌سه‌رده‌می رینێسانسیش دا ژیابا و خاوه‌نی فکره‌ی ئێستای بوایه‌ هه‌ر له‌ ریزی ئه‌و که‌سانه‌ دا ده‌بوو که‌ حوکمی ئێعدامیان به‌سه‌ر گالیله‌ و هاوبیره‌کانی دا سه‌پاند، چونکه‌ ئه‌وانیش هه‌ر باسیان له‌ نوێ بوونه‌وه‌ و نوێگه‌ری ده‌کرد!

هه‌ر ئه‌و کاک مه‌نسوره‌ی ئه‌وا دژی نوێ بوونه‌وه‌ چۆکی داداوه‌، ئه‌گه‌ر له‌ شوێنێکی دیکه‌ و له‌ باسێکی دیکه‌ دا باس باسی ئیسلام بێت، له‌وانه‌یه‌ ده‌لیلی کاک مه‌نسوور بۆ هێرش کردنه‌ سه‌ر ئیسلام ئه‌وه‌ بی که‌ دینێکی نه‌گۆڕه‌ و 1400 ساڵه‌ هه‌ر وه‌ک خۆی ماوه‌ته‌وه. زۆربه‌شمان ئه‌و نه‌زه‌ره‌مان له‌ کام مه‌نسوور بیستووه‌ و هه‌روه‌ها زۆر جار هێرش ده‌کاته‌ سه‌ر سوننه‌ت به‌ڵام ئه‌گه‌ر هێزێک باسی گۆڕان بکات کاک مه‌نسور به‌ دڵی خۆی ته‌فسیری ده‌کات و ئه‌گه‌ر مه‌جالی هه‌بێ به‌ خیانه‌ت به‌ رابردووی سه‌یر ده‌کا!!‌

کاک مه‌نسوور ده‌ربڕینی وشه‌ی نوێ بوونه‌وه‌ بۆ حیزبی دێموکڕاتی کوردستان به‌ تاوان ده‌زانێ و پێی وایه‌ ئه‌وه‌ یانی خستنه‌ ژێر پێی  هه‌موو مێژووی حیزبی دێموكڕاتی کوردستان، به‌ڵام نازانم بۆ له‌ بیری نه‌ماوه‌ که‌ دروشمگه‌لی ''جه‌وانگه‌رایی''، ''شایسته‌ سالاری''، نوێگه‌رایی'' و ''خۆ گونجاندن له‌گه‌ڵ سه‌رده‌می'' ئه‌وان  بۆ ئه‌و مانایه‌یان نه‌ده‌دا؟ به‌ پێی بیر کردنه‌وه‌ی کاک مه‌نسور جێی خۆیه‌تی بپرسین بۆ حیزبی دێموکڕات تا کاتی کۆنگره‌ی 13 جه‌وانگه‌را و شایسته‌ سالار و نوێخواز و له‌گه‌ل سه‌رده‌م ‌گوونجاو نه‌بوو؟ یان حه‌ققه‌ بپرسین بۆ کاک مسته‌فا و تاقمه‌که‌ی تا ئه‌و کات باسی ئه‌و دروشمانه‌ی نه‌ده‌کرد؟ ئه‌وانه‌ کۆمه‌ڵێک پرسیارن که‌ شێوه‌ بیر کردنه‌وه‌که‌ی کاک مه‌نسوور دروستیان ده‌کات به‌لام سه‌یر ئه‌ه‌ویه‌ کاتیک خۆیان باسی ئه‌وه‌ بکه‌ن  ئه‌وه‌ ده‌رک و خوێنده‌وه‌یه‌کی نوێ و سه‌رده‌میانه‌یه‌ به‌لام بۆ لایه‌نی به‌رانبه‌ر  دادڕینی جل و به‌رگی کۆن و پشت کردن له‌ رابردوویه‌.

ناکرێ هه‌مان شت بۆ کاک مه‌نسور و هاوبیره‌کانی ره‌وا بی، به‌ڵام دوای سی ساڵ بۆ جیابیرانی خۆیان ناڕوه‌ا.  هه‌موومان ده‌زانین که‌ دانی ئه‌و دروشمانه‌ نه‌ کاتی کۆنگره‌ی 13 تاوان بوو و نه‌ ئێستا. تاوان ئه‌وه‌یه‌ که‌ ئه‌وانه‌ ته‌نیا له‌ چوارچێوه‌ی دروشم دا بمێننه‌وه و به‌ کرده‌وه‌ جێ به‌جێ نه‌کرێن. به‌ داخه‌وه‌ دروشمه‌کانی کۆنگره‌ی 13 که‌ له‌ لایه‌ن کاک مسته‌فا هیجری و هاو جه‌ناحیه‌کانی به‌رز ده‌کرانه‌وه‌ نه‌ک به‌ کرده‌وه‌ جێبه‌جێ نه‌کران، به‌ڵکوو دڵی زۆر له‌ لایه‌نگرانی خۆیان سارد کرده‌وه‌ و جه‌وێک به‌سه‌ر حیزب دا حاکم بوو که‌ به‌داخه‌وه‌ به‌ره‌و له‌تبوونی برد.‌  ئێستاش لایه‌نی به‌رانبه‌ری کاک مه‌نسوور باس له‌ نوێ بوونه‌وه‌ ده‌کات. پێویست ناکات خۆمان ناراحه‌ت بکه‌ین که‌ هێز و لایه‌نێک باس له‌ نوێ نوونه‌وه‌ و هه‌ر چه‌مکێکی دیکه‌ بکه‌ن، به‌ڵام به‌جێیه‌ چاوه‌ڕێ بین که‌ ئه‌و لایه‌نه‌ چه‌نده‌ وه‌فادار به‌ قسه‌ی خۆی ده‌مێنیته‌وه‌. من به‌ بێ ئه‌وه‌ی ته‌عه‌سسوب به‌ خه‌رج بده‌م، ره‌مزی سه‌رکه‌وتن و سه‌رنه‌که‌وتنی  حیزبی دێموکراتی کوردستان به‌ وه‌فادار مانه‌وه‌یان به‌و واده‌و به‌ڵێنیانه‌ له‌ داهاتوو دا گرێ ده‌ده‌م که‌ تا ئێستا باسیان لێ کردوون. که‌واته‌ با چاوه‌ڕێی به‌ کرده‌وه‌ی حیزبی دێموکڕاتی کوردستان بین له‌ داهاتوو دا و له‌ چوارچێوه‌ی ئه‌و باسانه‌ی له‌ ''هێڵه‌ گشتیه‌کانی رێبازی حیزب''دا هیناویانه‌ته‌ گۆرێ، نه‌ک ''شرۆڤه‌'' کردنی ئه‌وه‌ی که‌ ئه‌و قسانه‌ یانی جل و به‌رگی کۆن فرێ دان و جێرۆکی له‌و جۆره‌.

له‌به‌ر ئه‌وه‌ی کاک مه‌نسور جارجاره‌ ''نبض''ی شاعیرانه‌ی لێده‌دا ده‌بوایه‌ دیققه‌تی کردبا له‌ پیاده‌ کردنی تێکسته‌که‌ و له‌ جیاتی ''... مامۆستامان بۆ بمێنێ''، نه‌ینووسیبا ‌‌''... مامۆستامان بۆ بێنێ''.

هه‌روه‌ها کاک مه‌نسور له‌ سه‌ره‌تای نووسینه‌که‌ی  ته‌عبیری '' یادی 2ی رێبه‌ندانی لاده‌ران له‌ رێبازی قاسملووی نه‌مر'' به‌ کار دێنێ. ئه‌و ده‌ربڕینه‌ی کاک مه‌نسور وه‌ک باقی نوسراوه‌کانی دیکه‌ی چه‌نده‌ له‌ باره‌ی رێزمانی یه‌وه‌ راست و دروستن، وه‌باڵی به‌ ئه‌ستۆی خۆی به‌لام ئه‌وه‌ی په‌یوه‌ندی به‌ ناوه‌رۆکه‌که‌ی هه‌بێ من شه‌ڕی ئه‌وه‌ له‌گه‌ڵ کاک مه‌نسوور ناکه‌م که‌  کێیه‌ درێژه‌ ده‌ری ڕیبازی قاسملووی نه‌مر، به‌ڵام ئه‌گه‌ر کاک مه‌نسوور ئاماده‌یه‌ دوای هه‌ڵمه‌تی چه‌قو کێشی و به‌رنامه‌ له‌ پێشتر دارێژراوه‌که‌ی هه‌ر سه‌وداو مه‌عامه‌له‌ به‌ ناوی د.قاسملوو بکات و خۆی به‌ ناوی ئه‌و هه‌ڵواسێ، هه‌م زۆڵمێکی گه‌وره‌ی له‌ قاسملوو کردووه‌ و هه‌م چیدیکه‌ خۆی بۆ له‌ بن ئه‌و ناوه‌ گه‌وره‌ پێ حه‌شار نادرێ. به‌ڵام ئه‌وه‌نده‌ی په‌یوه‌ندی به‌ وشه‌ی ''لاده‌ر'' هه‌یه‌ هه‌ر له‌سه‌ره‌تاوه‌ لاده‌ر له‌ نۆرم و با‌یه‌خه‌ ئه‌خلاقی و کۆمه‌ڵایه‌تیه‌کان دیاره‌ و ته‌نانه‌ت لادان له‌و ئیدعایانه‌ی که‌ سه‌ررۆکه‌کانتان باسیان له‌ لێک جیابوونه‌وه‌ی شارستانی و ''متمدنانه‌'' ده‌کرد، به‌ روون و ئاشکرایی خۆی ده‌رخستووه‌ و نووکی چه‌قۆکانتان سه‌لماندی چه‌نده‌ شارستانیانه‌  خوازیاری کۆتایی هاتنی کێشه‌کانن. وێده‌چێ هه‌ر ئه‌وه‌نده‌ که‌ شاعیرێکی گه‌وره‌ی وه‌ک عه‌بدڵا په‌شێو فێر بووبن که‌ '' نووکی چه‌قۆکانتان تیژ که‌ن''.

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.