Ö:: حیزبی‌ دیمۆكراتی‌ كوردستان له‌ به‌رده‌م نوێبوونه‌وه‌دا

ماڵپه‌ری‌ كوردستان وكورد

حیزبی‌ دیمۆكراتی‌ كوردستان له‌ به‌رده‌م نوێبوونه‌وه‌دا.
گفتوگۆیه‌ك له‌ گه‌ڵ چه‌ند كه‌سایه‌تیه‌كی‌ حیزبی‌ دیموكراتی‌ كوردستان و ره‌وتی‌ ریفۆرمی‌ نێو ئه‌م حیزبه‌
هه‌ر چه‌شنه‌ كۆسپ و ته‌گه‌ره‌یه‌كی‌ سه‌ر رێگه‌ی‌ ریفۆرم له‌ حیزبدا له‌ قاوده‌ده‌ین و له‌ كه‌سیش ناترسین

كۆیه‌: به‌رێز كاك عه‌وڵا به‌هرامی‌ وه‌ك یه‌كه‌م پرسیار، حیزبی‌ دیموكراتی‌ كوردستان به‌ دروشمی‌ گۆڕانكاری‌ و نوێكردنه‌وه‌ قۆناغی‌ نوێ‌ خه‌باتی‌ خۆی‌ ده‌ست پێكردوه‌ ئه‌و پێویستی‌ و هه‌لوومه‌رجه‌ تازانه‌ی‌ كه‌ ئێوه‌ی‌ بۆ گۆرانكاری‌ هانداوه‌ چین؟

عه‌وڵا به‌هرامی‌: ئه‌وه‌ كه‌ حیزبی‌ دیموكراتی‌ كوردستان به‌ دروشمی‌ پێكهێنانی‌ گۆڕانكاری‌ و نوێخوازانه‌وه‌ ئه‌م قۆناغه‌ نوێیه‌ له‌ مێژووی‌ 61 ساڵه‌ی‌ خۆی‌ دست پێ‌ كردوه‌ به‌ بڕوای‌ من ده‌گه‌رێته‌وه‌ بۆ ئه‌و بۆشاییانه‌ی‌ له‌م بواره‌دا به‌ هه‌موو لایه‌نه‌كانی‌ پێكهاته‌ و سیاسه‌ت و شێوازه‌كانی‌ كاركردنی‌ ئه‌م حیزبه‌وه‌ دیارن. جگه‌ له‌وه‌ش ئه‌گه‌ر هێندێك بگه‌رێینه‌وه‌ بۆ دواوه‌ ده‌بینین كه‌ یه‌كێك له‌ هۆكاره‌ سه‌ره‌كییه‌كانی‌ ئه‌م قه‌یرانه‌ نێو رێكخراوه‌ییه‌ش كه‌ له‌م دواییانه‌دا له‌ حیزبی‌ دیموكراتی‌ كوردستانی‌ ئێراندا گه‌یشته‌ چله‌پۆپه‌ی‌ خۆی‌ و له‌تبوونی‌ ریزه‌كانی‌ ئه‌م حیزبه‌ی‌ لێكه‌وته‌وه‌ بریتییه‌ له‌ چه‌قبه‌ستوویی‌ و خۆدزینه‌وه‌ له‌ نوێبوونه‌وه‌ و پێكهینانی‌ گۆڕانكاری‌ پێی‌ به‌ پێی‌ باری‌ سه‌رده‌م و پێشكه‌وتنه‌كان و ئه‌و گۆڕانكارییه‌ سیاسییانه‌ی‌ كه‌ له‌ ئاسته‌كانی‌ جیهان و ناوچه‌ و ئێران دا روویان داوه‌.

به‌ گشتی‌ ده‌توانم بڵێم له‌ مێژه‌ پێكهێنانی‌ گۆڕانكاری‌ و نوێكردنه‌وه‌ی‌ سه‌رجه‌م بواره‌ پێوه‌ندیداره‌كان به‌ ژیانی‌ سیاسی‌ و رێكخراوه‌یی‌ حیزبی‌ دیموكرات ببوو به‌ پێویستییه‌ك. به‌ڵام هه‌روه‌ك ده‌زانین چه‌قبه‌ستوویی‌ له‌ رابردوودا و ململانێی‌ نێوخۆیی‌ و ده‌سته‌گه‌رایی‌ و زۆر دیارده‌ی‌ ناشارستانییانه‌ی‌ دیكه‌ ببوونه‌ كۆسپی‌ گه‌وره‌ له‌م پێوه‌ندییه‌دا و له‌ راستی‌دا  پرۆسه‌ی‌ گۆڕانكاری‌ و نوێبوونه‌وه‌یان په‌ك خستبوو.

هه‌چه‌ند نوێبوونه‌وه‌ و به‌ خۆداهاتنه‌وه‌ پێداویستییه‌كی‌ ژیانه‌كییه‌ بۆ هه‌ر ئۆرگانیزم و رێكخراوێكی‌ سیاسی‌، ده‌توانم بڵێم ئه‌م پێداویستیه‌ لانیكه‌م له‌ سه‌ره‌تاكانی‌ ده‌یه‌ی‌ 1990ه‌وه‌ واته‌ دوای‌ راوه‌ستانی‌ چالاكیی‌ چه‌كدارانه‌ی‌ هێزی‌ پێشمه‌رگه‌ زۆر به‌ زه‌قی‌ خۆی‌ ده‌رخستبوو به‌ڵام وڵامی‌ شیاوی‌ پێ نه‌درایه‌وه‌. به‌ چه‌شنێك كه‌ ئه‌م حیزبه‌ له‌ لای‌ زۆر له‌ رووناكبیران و لایه‌نگرانی‌ و به‌ره‌ی‌ نوێوه‌ ته‌نیا به‌ رابردوویه‌كه‌یه‌وه‌ ده‌ناسرایه‌وه‌ و بۆیه‌ش به‌رده‌وام ره‌خنه‌ی‌ لێده‌گیرا كه‌ چی‌ دیكه‌ له‌ رابردوودا نه‌ژی‌ و شانازییه‌كانی‌ پێشووی‌ له‌ كارنه‌كا و به‌ پێناسه‌یه‌كی‌ دیكه‌وه‌ له‌ گۆڕه‌پانی‌ سیاسیی‌دا ده‌ركه‌وێ‌.

كه‌واته‌ ده‌كرێ‌ بێژم هه‌م دواكه‌وتنی‌ پرۆسه‌ی‌ گۆڕانكاری‌ و نوێكردنه‌وه‌ و نوێبوونه‌وه‌ و هه‌میش چاوه‌ڕوانییه‌كانی‌ خه‌ڵكی‌ كوردستان و به‌ تایبه‌ت به‌ری‌ نوێ‌ و رووناكبیران له‌ حیزبی‌ دیموكرات و پێویستیی‌ چالاكتر كردن و كارا كردنی‌ رێكخراوه‌كانی‌ حیزب ئێمه‌یان گه‌یانده‌ ئه‌و بڕوایه‌ كه‌ كار كردن به‌و میتۆدانه‌ی‌ پێشوو ( ئه‌گه‌رچی‌ له‌وانه‌یه‌ بۆ سه‌رده‌می‌ خۆیان پێشكه‌وتوو بووبن) و خۆدزینه‌وه‌ له‌ گۆڕانكاری‌ به‌ بایی‌ ناكاریگه‌ر بوونی‌ هه‌رچی‌ زیاتری‌ حیزب له‌ گۆڕه‌پانی‌ سیاسی‌ و رێكخراوه‌یی‌دا ته‌واو ده‌بێ‌ و زیانی‌ قورستر به‌ رابردووی‌ دوورو درێژی‌ خه‌باتكارانه‌ی‌ ئه‌م حیزبه‌ ده‌گه‌یه‌نێ‌ و گۆڕانكاری‌ و نوێبوونه‌وه‌ پێویستییه‌كی‌ ژیانه‌كییه‌ .

كۆیه‌: گۆڕانكارییه‌كان و نۆێكردنه‌وه‌ چ به‌شگه‌لێك له‌ خۆ ده‌گرن و پرۆژه‌تان بۆ ئه‌و گۆڕانكارییانه‌ چیه‌؟

عه‌وڵا به‌هرامی‌: هه‌روه‌ك پێشتر ئاماژه‌م پێكرد، سه‌رجه‌م بواره‌كانی‌ ژیانی‌ سیاسی‌ و رێكخراوه‌یی‌ حیزب پێویستی‌ به‌ نوێكردنه‌وه‌ هه‌یه‌ و وه‌ك له‌ " هێڵه‌ گشتییه‌كانی‌ رێبازی‌ ئێمه‌"شدا گوتراوه‌ باوه‌ڕمان وایه‌ كه‌ ده‌بێ‌ له‌ هه‌موو بواره‌كانی‌ وه‌ك پێكهاته‌ی‌ رێكخراوه‌یی‌، سیاسه‌ت و ستراتیژی‌، رێكخستن و راگه‌یاندن، بارهێنان، دیپلۆماسی‌ و ... گۆرانكاری‌ پێك بێ‌. دیاره‌ وه‌ك باسم كرد ئه‌و پێویستیه‌ به‌ ته‌واوی‌ هه‌ست پێكراوه‌ و ده‌روه‌ستییه‌كی‌ زۆریش به‌ جێ‌به‌جێ‌ كردنی‌ ئه‌م دروشمانه‌ هه‌یه‌ و به‌ دڵنیاییه‌وه‌ له‌ كۆنگره‌ی‌ داهاتوودا (كه‌ به‌ نزیكی‌ ده‌بینم) پرۆژه‌ی‌ جۆراوجۆر بۆ پێكهێنانی‌ گۆڕانكاری‌ له‌ سه‌رجه‌م ئه‌م بوارانه‌دا دێنه‌ گۆڕێ‌.

كۆیه:  وه‌ك ده‌زانین ره‌وتی‌ ریفۆرمی‌ حیزبی‌ دیموكراتیش له‌گه‌ڵ ئێوه‌ كه‌وتوون، پرۆژه‌كه‌ی‌ ئه‌وان تا چ راده‌یه‌ك به‌ ئه‌رێنی‌ ده‌زانن و چه‌نده‌ له‌گه‌ڵ به‌رنامه‌كانی‌ ئێوه‌ بۆ گۆڕانكاری‌ گونجاون و شایانی‌ جێبه‌جێكردنن؟

عه‌وڵا به‌هرامی‌: ئه‌وه‌ش كه‌ ره‌وتی‌ ریفۆرم له‌گه‌ڵ ئێمه‌ كه‌وتوون هه‌ڵگری‌ دوو واتای‌ گرینگه‌. یه‌كه‌م ئه‌وه‌ كه‌ ئه‌م ره‌وته‌ توانیویه‌تی‌ وێكچوونی‌ زۆر له‌ نێوان بۆچوونه‌ ریفۆرمیستییه‌كانی‌ خۆی‌ و حیزبی‌ دیموكراتی‌ كوردستاندا بدۆزێته‌وه‌. ئه‌وه‌ش به‌و مانایه‌یه‌ ئێمه‌ش هه‌م بڕوامان به‌ گۆڕان و ریفۆرم هه‌یه‌ و هه‌میش توانایی‌ ئه‌م كاره‌ قورسه‌ له‌ خۆماندا به‌دی‌ ده‌كه‌ین. دووهه‌م ئه‌وه‌كه‌ ئێمه‌ش له‌م روانگه‌یه‌وه‌ كه‌ هه‌ستمان به‌ پێویستییه‌كانی‌ گۆڕانكاری‌ و نوێبوونه‌وه‌ كردوه‌، پێویستمان به‌ فكر و بۆچوون و گه‌ڵاڵه‌ ریفۆرمیستییه‌كانی‌ ئه‌وان هه‌یه‌ و له‌ راستی‌دا بوونی‌ ئه‌وان له‌ نێو ئێمه‌دا له‌ لایه‌ك ده‌روه‌ستیی‌ ئێمه‌ به‌ گۆڕانكاری‌ و ریفۆرم زیاتر ده‌كا و له‌ لایه‌كی‌ دیكه‌وه‌ ئه‌م ره‌وته‌ و گه‌ڵاڵه‌ و پرۆژه‌ ریفۆرمیستییه‌كانی‌ یارمه‌تییه‌كی‌ گه‌وره‌ن بۆ ئێمه‌ له‌ پێناوی‌ پێكهێنانی‌ گۆڕانكاری‌ له‌ تێكرای‌ بواره‌كاندا.

هه‌ر له‌م روانگه‌یه‌وه‌ ده‌توانم ئاوا وڵامی‌ به‌شی‌ دووهه‌می‌ پرسیاره‌كه‌تان بده‌مه‌وه‌ كه‌ هه‌روه‌ك به‌رێزانی‌ ره‌وتی‌ ریفۆرم به‌ پێی‌ لێكدانه‌وه‌ و وردبینیی‌ خۆیان گه‌یشتنه‌ ئه‌و باوه‌ڕه‌ كه‌ خۆیان له‌ حیزبی‌ دیموكراتی‌ كوردستاندا ده‌بیننه‌وه‌، رێبه‌رایه‌تیی‌ حیزبیش به‌ پێی‌ موتالایه‌كی‌ وردی‌ به‌رنامه‌ و پرۆژه‌ گشتییه‌كه‌ی‌ ره‌وتی‌ رێفۆرم پێشوازیی‌ له‌ هاوڕێیانی‌ ئه‌م ره‌وته‌ كرد و ئه‌وه‌ش به‌و واتایه‌یه‌ كه‌ گونجاویی‌ زۆر له‌ نێوان پرۆژه‌ و به‌رنامه‌ گۆرانخوازانه‌كانی‌ هه‌ر دووك لادا هه‌یه‌ و هه‌ر به‌م پێیه‌ش من وای‌ ده‌بینم به‌ هه‌وڵ و ماندووبوونی‌ هه‌موولایه‌ك به‌ پێی‌ توانا بتوانین به‌شی‌ به‌رچاوی‌ ئه‌و پرۆژه‌ و به‌رنامانه‌ جێ‌به‌جێ‌ بكه‌ین.

كۆیه: جه‌نابت وه‌كوو كادرێكی‌ به‌ ئه‌زموون كه‌ رۆژه‌ سه‌خته‌كانی‌ خه‌باتی‌ شاخت ئه‌زموون كردوه‌ چۆن ده‌ڕوانیته‌ ئه‌گه‌ره‌كانی‌ گۆڕانكاری‌ له‌ حیزبی‌ دیمۆكراتدا و به‌ گشتی‌ حیزبی‌ دیموكرات چه‌نده‌ به‌ گۆڕان هه‌ڵگر ده‌زانی‌؟

عه‌لی‌ قۆیتاسی‌: مه‌سه‌له‌ی‌ گۆڕان له‌ حیزبێكی‌ سیاسی دا، چ ژیانی‌ رۆژانه‌ و ئاسایی‌ خه‌ڵكی‌دا. شتێكی‌ حه‌یاتی‌یه‌. به‌ ویستی‌ خۆت نیه‌. زۆر جار ئالووگۆره‌كان هێندی‌ شتی‌ تازه‌ت به‌ سه‌ردا ده‌سه‌پێنن كه‌ تۆ له‌وانه‌یه‌ هیچ كات بیرت لی‌ نه‌كردبێته‌وه‌. له‌ كۆنگره‌ی‌ شه‌ش، حیزبی‌ دیمۆكرات سوسیالیزمی‌ دیموكراتیكی‌ وه‌كوو ئامانجی‌ دوارۆژ هه‌ڵبژارد و په‌سه‌ندی‌ كرد. ئه‌وه‌ زه‌رووره‌تی‌ سه‌رده‌م بوو.حیزب هه‌تا ئێستا گه‌لی‌ جاران هه‌وڵی‌ گۆرانی‌ داوه‌. له‌وانه‌یه‌ هیچ كام له‌و هه‌وڵانه‌ به‌ره‌و گۆرانێكی‌ بنه‌ره‌تی‌ نه‌رۆیشتبن، به‌ڵام ئه‌مجاره‌یان چه‌ندین فاكته‌ری‌ فشار هاوكات زه‌رووره‌تی‌ ئه‌م گۆڕانه‌یان هێناوه‌ته‌ پێش. فاكته‌رگه‌لی‌ وه‌ك: گۆرانكاری‌ له‌ ستراتیژی‌ زلهێزه‌كان له‌ رۆژهه‌ڵاتی‌ ناڤین له‌ چاو ده‌یه‌ی‌ 80 و 90ی‌ زایینی‌دا. چوونه‌ سه‌ری‌ ئاستی‌ هوشیاری‌ نه‌ته‌وه‌یی‌ خه‌ڵكه‌ كوردستان و به‌رز بوونه‌وه‌ی‌ پله‌ی‌ خوێنده‌واری‌ خه‌ڵك. نه‌مانی‌ دیكتاتۆری‌ به‌عس و به‌ ئاكام گه‌یشتنی‌ جووڵانه‌وه‌ له‌ به‌شێكی‌ كوردستان و لاواز بوونی‌ كۆماری‌ ئیسلامی‌ به‌ هۆی‌ نه‌مانی‌ پێگه‌ی‌ جه‌ماوه‌ری‌ له‌ نێو خه‌ڵكدا.

كۆماری‌ ئیسلامی‌ به‌ زه‌بری‌ چه‌ك و چۆڵ و سه‌ركوت خۆی‌ راگرتووه‌ و له‌ ئاستی‌ ده‌ره‌وه‌شدا به‌ دانی‌ به‌رتیل و هێزی‌ ئابووری‌ و نه‌وت.

به‌ گشتی‌ ته‌واوی‌ ئه‌و فاكته‌رانه‌ به‌ رای‌ من كاتالیزوری‌ گۆرانن له‌ حیزبی‌ دیموكراتدا و ئه‌م حیزبه‌ هه‌ستی‌ به‌ زه‌رووره‌تی‌ گۆران كردوه‌ و ده‌زانێ‌ چه‌قین له‌ رابردوودا داهاتووی‌ لێ ده‌شێوێنێ‌ و هه‌ر بۆیه‌ش پێویسته‌  له‌ سیستمی‌ ته‌شكیلاتی‌ و شێوازی‌ كاری‌ دیپلۆماتیك و مكانیزمه‌كانی‌ كار ده‌گه‌ڵ ئه‌حزابی‌ كوردستانی‌ گۆڕانكاری‌ بنه‌ره‌تی‌ پێك بهێنێ‌ و دیسكۆرس و گفتمانی‌ سیاسی‌ خۆی‌ نه‌ته‌وه‌یی‌تر و خه‌ستتر بكاته‌وه‌.

كۆیه: رۆڵ و پێگه‌ی‌ ره‌وتی‌ رێفۆرم له‌م قۆناغه‌ تازه‌یه‌ و له‌ نێو حیزبی‌ دیموكراتی‌ كوردستاندا چۆن ده‌بینی‌ و ئه‌گه‌ری‌ پێشوازی‌ ئه‌ندامانی‌ دیكه‌ی‌ حیزب له‌م ره‌وته‌ و پرۆژه‌كه‌ی‌ چه‌نده‌؟

 مه‌نووچهر ئاته‌ش پووش: به‌ بڕوای‌ من ئه‌گه‌ر بێین و له‌ لایه‌ك چاوێك به‌ ره‌وتی‌ رووداوه‌كانی‌ ناوچه‌ و جیهان و شێوه‌ی‌ خه‌بات بۆ وه‌ده‌ست هێنانی‌ مافه‌ ره‌واكان و ئالووگۆره‌ سیاسی‌، كۆمه‌ڵایه‌تی‌ و ئه‌وانی‌ دیكه‌ وه‌ك پێوه‌رێك بۆ چالاكیی‌ و تێكۆشانمان سه‌یر بكه‌ین و له‌ لایه‌كی‌ دیكه‌ش، به‌له‌به‌ر چاو گرتنی‌ چالاكیه‌كانی‌ ئه‌م ماوه‌یه‌ی‌ ره‌وتی‌ رێفۆرم بۆ پێكهێنانی‌ ئاڵ و گۆر و نوێ بوونه‌وه‌ و خودی‌ ئه‌و پێشنیارانه‌ كه‌ ره‌وت له‌ چوارچێوه‌ی‌ پرۆژه‌یه‌كدا گه‌ڵاڵه‌ی‌ كردوه‌، و ئه‌م كه‌م و كوری‌ و بێ به‌رنامه‌یی‌یه‌ كه‌ له‌ شێوازه‌ كۆنه‌كه‌ی‌ حیزبی‌ پێشوودا هه‌بووه‌، به‌و ئاكامه‌ ده‌گه‌ین كه‌ ره‌وتی‌ رێفۆرم ده‌توانێ‌ رۆڵی‌ سه‌ره‌كی‌ و تایبه‌تی‌ له‌ خۆ نۆژه‌نكردنه‌وه‌ و هه‌وڵدان بۆ به‌ره‌وپێشچوونی‌ حیزب و گه‌یشتن به‌ ئامانجه‌كان و سیاسه‌ته‌كانی‌ بگێرێ‌. كه‌ وایه‌ ئه‌م ره‌وته‌ و پرۆژه‌ گه‌ڵاڵه‌ كراوه‌كه‌ی‌ وه‌ك پێویستی‌یه‌ك له‌م قۆناغه‌ی‌ خه‌باتمان ده‌ژمێردرێ‌ و به‌ دڵنیایی‌یه‌وه‌ پێگه‌ی‌ تایبه‌تی‌ ده‌بێ‌، هه‌م له‌ نێو حیزبی‌ دیمۆكراتی‌ كوردستاندا و هه‌م له‌ نێو كۆمه‌ڵانی‌ خه‌ڵكی‌ رۆژهه‌ڵاتی‌ كوردستاندا.

به‌ موتاڵای‌ ناوه‌ورۆكی‌ ئه‌م پرۆژه‌یه‌، خۆگونجاندن له‌گه‌ڵ ویسته‌كانی‌ هه‌نووكه‌یی‌ خه‌ڵك و شێوازێكی‌ نوێ‌ و سه‌رده‌میانه‌ بۆ خوبات و به‌ربه‌ره‌كانی‌ به‌ دژی‌ سه‌ره‌كی‌ترین دوژمنانمان واته‌ كۆماری‌ ئیسلامی‌ ده‌رده‌كه‌وێ‌. دیاره‌ گۆران له‌ باروودۆخی‌ ئێستادا به‌ شێوه‌ی‌ به‌ره‌به‌ره‌ و ناوبه‌ناو ده‌كرێ‌، مه‌به‌ستم ئه‌وه‌یه‌ كه‌ له‌ ماوه‌یه‌كی‌ كورتدا ناكرێ‌ و له‌ داهاتوودا، رۆڵ و كاریگه‌رییه‌كانی‌ ئه‌م ره‌وته‌ زیاتر به‌رچاو ده‌كه‌وێ‌ و ده‌توانرێ‌ باسی‌ لێبكرێ‌. به‌ خۆشی‌یه‌وه‌ تا ئێستا خه‌ڵكێكی‌ زۆر( له‌ باشووری‌ كوردستان و هه‌م له‌ رۆژهه‌ڵاتی‌ كوردستان) پێشوازی‌ و پشتگیری‌ خۆیان له‌ هه‌ڵوێستی‌ ره‌وت بۆ هه‌ڵبژاردن و تێكه‌ڵاو بوون به‌ حیزبی‌ دیموكراتی‌ كوردستان راگه‌یاندووه‌. جێی‌ ئاماژه‌یه‌ كه‌ به‌ راستی‌ ئه‌م خه‌ڵكه‌ هیوایه‌كی‌ زۆریان به‌ ئه‌م ره‌وته‌ و به‌رنامه‌كانی‌ هه‌یه‌ و چاوه‌روانن به‌ زوویی‌ ده‌ره‌نجامی‌ هه‌وڵه‌كان ببینن. سه‌باره‌ت به‌ نێو خۆی‌ حیزبیش ده‌بێ‌ بلێم كه‌ هه‌ر به‌م شێوه‌یه‌، به‌ گشتی‌ پێشوازیان له‌ ئه‌م پرۆژه‌یه‌ كردووه‌، هه‌ر چه‌ند ئێمه‌ له‌ به‌رنامه‌مان دایه‌ كه‌ زیاتر له‌سه‌ر ناوه‌رۆك و خاڵه‌كانی‌ ئه‌م پرۆژه‌یه‌ بۆ ئه‌ندامانی‌ حیزب بدوێین، چ به‌شێوه‌ی‌ كۆبوونه‌وه‌ی‌ گشتیی‌ و سمینار بێت، چ به‌ شێوه‌ی‌ نووسینی‌ وتار و بڵاوكردنه‌وه‌یان له‌ رۆژنامه‌ و سایته‌كانی‌ حیزبێ. پێشم خۆشه‌ ئه‌وه‌ش بڵێم كه‌ ئێمه‌ به‌ شه‌فافیه‌ت و روونی‌ باس له‌ پێشنیار و به‌رنامه‌كانمان ده‌كه‌ین و بانگه‌شه‌ی‌ بۆ ده‌كه‌ین، دڵنیام كه‌ به‌م شێوه‌یه‌، پێشوازی‌ ئه‌ندامانی‌ حیزبی‌ له‌م ره‌وته‌ زیاتر و زیاتر ده‌بێ‌. به‌ سه‌رنجدان به‌ "هێڵه‌ گشتی‌یه‌كانی‌ رێبازی‌ ئێمه‌" كه‌ رێبه‌رایه‌تی‌ حیزبی‌ دیموكراتی‌ كوردستان دیاری‌ كردوه‌، به‌ رای‌ من، زۆر ناخه‌یه‌نێ‌ كه‌ ئه‌م حیزبه‌ ده‌توانی‌ وه‌ك حیزبێكی‌ نوێگه‌را و نوێخواز ده‌ركه‌وێ‌ و وه‌ك زۆربه‌ی‌ ئه‌و حیزبه‌ موَدێڕنانه‌ كه‌ له‌ وڵاته‌ پێشكه‌وتووه‌كاندا چالاكن،خۆ ده‌ربخا.

كۆیه‌: ره‌وتی‌ رێفۆرمخوازی‌ نێو حیزبی‌ دیمۆكراتی‌ كوردستان تا چه‌نده‌ توانیویه‌تیی‌ ویست و چاوه‌ڕوانیه‌كانی‌ رووناكبیر و گه‌نجانی‌ رۆژهه‌ڵاتی‌ كوردستان له‌ نێو ئه‌م حیزبه‌دا بێنێته‌ گۆڕێ‌ و بیان خاته‌ روو؟

 ره‌سووڵ سوڵتانی‌: چاوخشاندنێك به‌و پلاتفۆرمه‌ی‌ كه‌ خوازیارانی‌ ریفۆرم پێشكه‌ش به‌ هه‌ر دوو لایه‌نیان كرد و ته‌نیا حیزبی‌ دیموكراتی‌ كوردستان به‌ گه‌رمی‌ پێشوازی‌ لێكرد، ده‌ری‌ ده‌خا كه‌ ئه‌وه‌ی‌ له‌و پلاتفۆرمه‌دا هاتووه‌ هه‌رچه‌ند بێ كه‌م و كووری‌ نیه‌ به‌ڵام هه‌ڵگری‌ چاوه‌روانی‌ و په‌یامی‌ به‌ره‌ی‌ ئه‌مڕۆیی‌ خه‌ڵكی‌ كردووه‌. مه‌به‌ستم توێژی‌ لاو و رووناكبیره‌. توێژێك كه‌ كوڕی‌ ئه‌مڕۆیه‌ و نیازه‌كانیشی‌ ئه‌مڕۆیین. ئه‌م توێژه‌ ئیتر گوێ‌ بۆ گێرانه‌وه‌ مه‌زنه‌كان راناگرێ‌. ئه‌م نه‌سله‌ له‌ حه‌قایه‌ت بێزاره‌. نه‌سلێكی‌ نوستالۆژیك نیه‌. ره‌نگ بێ‌ زۆر كه‌س به‌ ته‌شه‌ره‌وه‌ به‌م جیله‌ بڵێن، نه‌سلی‌ خه‌یاڵاتی‌ و فانتازی‌ و ئایدیالی‌ و ... قه‌یناكا. دیاره‌ كێ‌ وا به‌ ئێمه‌ ده‌ڵێ‌. كه‌سانێك كه‌ بێزیان له‌ كتێب هه‌ڵده‌ستێ‌ ئاوا له‌ ئێمه‌ ده‌ڕوانن. به‌ڵام ئه‌وه‌ی‌ راستی‌ بێ‌ ئه‌م نه‌سله‌ به‌ رێزگرتن له‌ رابردوو، وێرای‌ رێزدانان بۆ ده‌سكه‌وته‌ مێژووییه‌كان ره‌خنه‌گرانه‌ له‌ مێژوو ده‌ڕوانێ‌ و بۆێرانه‌ قامك له‌سه‌ر لایه‌نه‌ لاوازه‌كانی‌ داده‌نێ‌ چونكی‌ ده‌زانێ‌ به‌ بێ‌ ده‌ستنیشان كردنی‌ لایه‌نه‌ لاوازه‌كان ناتوانێ‌ سه‌ركه‌وتن و پێشكه‌وتنی‌ خۆی‌ مسۆگه‌ر بكات. ره‌وتی‌ ریفۆرم به‌ روانگه‌یه‌كی‌ ره‌خنه‌گرانه‌وه‌ كه‌ ئه‌م روانگه‌یه‌ خاوه‌نی‌ ژێرخانێكی‌ مه‌عریفی‌یه‌ ده‌روانێته‌ واقیعی‌ دوێنێ‌ و ئه‌مڕۆی‌ خۆی‌ و ده‌یهه‌وێ‌ داهاتوو له‌سه‌ر بناخه‌یه‌ك دامه‌زرێنێ‌ كه‌ هه‌نووكه‌یه‌.

ئه‌گه‌ر تۆ هه‌نووكه‌ی‌ خۆت، ئێستای‌ خۆت واقیع بینانه‌ دانه‌رێژێت و بێ‌ به‌زه‌ییانه‌ ره‌خنه‌ی‌ لێنه‌گرێ‌ و تۆكمه‌ی‌ نه‌كه‌ی‌، به‌ڵكوو ئێستای‌ خۆت له‌ سه‌ر بناخه‌ی‌ قه‌ول و به‌ڵێنی‌ میتافیزیكی‌ دامه‌زرێنێ‌ و ئیراده‌ی‌ خۆت ببه‌ستیته‌وه‌ به‌ ئیراده‌ی‌ تاكه‌ كه‌سێك كه‌ له‌ سه‌ره‌وه‌ خودایانه‌ حوكمت له‌ سه‌ر بكا و تۆش به‌ شانازییه‌وه‌ وه‌كوو " به‌نده‌" هه‌موو شته‌كانتی‌ ئه‌و ته‌نانه‌ت هه‌ڵه‌كانیشی‌ به‌ موعجیزه‌ و ( امر خارق العاده‌) دانێی‌، ئه‌وا داهاتووشت هه‌ر داهاتوویه‌كی‌ ئاسمانی‌ ده‌بێ‌ و هیچ كۆڵه‌كه‌یه‌كی‌ له‌سه‌ر زه‌مینی‌ واقیع نامێنێ‌.

ره‌وتی‌ ریفۆرم به‌وه‌ها روانگه‌یه‌كه‌وه‌ هاتۆته‌ نێو واقیعی‌ كایه‌كانه‌وه‌ و به‌ش به‌ حاڵی‌ خۆم پێم وایه‌ تا راده‌یه‌كی‌ زۆر ـ ناڵێم ته‌واو ـ توانیوێتی‌ له‌ ئاسۆی‌ چاوه‌ڕوانییه‌كانی‌ گه‌نجان و رووناكبیران نزیك بێته‌وه‌ كه‌ ئه‌ویش خستنه‌ رووی‌ كه‌مووكوڕییه‌كان و كاركردنه‌ بۆ پێكهێنانی‌ كه‌شوهه‌وایه‌كی‌ ره‌خنه‌یی‌ و هه‌وڵ دان بۆ جیگیر كردنی‌ بیرۆكه‌ی‌ ره‌خنه‌ و ریفۆرم. دڵنیاشیان ده‌كه‌ینه‌وه‌ هه‌ر چه‌شنه‌ كۆسپ و ته‌گه‌ره‌یه‌كی‌ سه‌ر رێگه‌ی‌ ریفۆرم له‌ حیزبدا له‌ قاوده‌ده‌ین و له‌ كه‌سیش ناترسین.

 

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.