Ö:: به‌ڕێوه چوونی سه‌رکه‌وتوانه‌ی سمینارێک بۆ یادی کۆماری کوردستان له‌ ئوسترالیا

حیزبی دێمۆکڕاتی کۆردستان- ئێران

به‌ڕێوه چوونی سه‌رکه‌وتوانه‌ی سمینارێک بۆ یادی کۆماری کوردستان له‌ ئوسترالیا
ڕۆژی یه‌ک شه‌ممه28/01/2007 له شاری بریزبن
له ئوسترالیا کۆمیته‌ی حیزبی دێمۆکراتی کوردستان سمینارێکی بۆ به‌ به‌ڕیز کاک سه‌لاح پوورئه‌سه‌د به‌رپرسی کۆمیته‌ی حیزب له‌م شاره پێک هێنا.

سمیناره‌که سه‌عات‌ 3ی پاش نیوه‌ڕۆی ئه‌م ڕۆژه به‌ به‌شداری کوردانی دانیشتووی ئه‌م شاره‌و کاک ئالان کوردۆ نوێنه‌ری یه‌کێتی نیشتمانی کوردستان له‌ شاری بریزبن به یه‌ک ده‌‌قیقه بێ ده‌نگی بۆ ڕێز گرتن له‌ شه‌هیدانی کوردستان ده‌ستی پێکرد.

سمیناره‌که له‌ دوو به‌ش پێک هاتبوو، به‌شی یه‌که‌م باس له‌سه‌ر کۆماری کوردستان و به‌شی دووهه‌م باس له‌ سه‌ر جووڵانه‌وه‌ی گه‌لی کورد له‌ ڕۆژهه‌ڵاتی کوردستان و حیزبی دێمۆكڕات بوو.

کاک ئالان کوردۆ نوێنه‌ری یه‌کێتی نیشتمانی کوردستان وێڕای به‌ خێر هاتنی به‌شدارانی سمیناره‌که،باسێکی کورتی له‌ سه‌ر سمیناره‌که‌ و شێوه‌ی به‌ڕێوه‌ چوونی پێشکه‌ش به‌ به‌ به‌شداران کرد و دوا به‌ دوای ئه‌م دا کاک سه‌لاح پوور ئه‌سه‌د باسێکی گرینگ و به‌ که‌ڵكی له‌ سه‌ر کۆماری کوردستان و مێژووی ئه‌م کۆماره  پێش که‌ش به‌ به‌شداران کرد.
کاک سه‌لاح له باسه‌كه‌ی دا وێڕای ئاماژه‌ پێکردن به‌ ڕۆڵی پێشه‌وای نه‌مر قازی محمد له‌ دامه‌زرانی کۆماری کوردستان دا گووتی: قازی محمد یه‌کێک له‌م ڕێبه‌ره مه‌زنانه‌ی کورده که‌ بۆ هه‌میشه ده‌بێ شانازی پێوه‌ بکه‌ین چوون پێشه‌وا ڕێبه‌رێک بوو که خۆی فیدای خه‌ڵك کرد نه‌ک خه‌ڵک فیدای خۆی بکا.

هه‌ر وه‌ها ئاماژه‌ی به‌ کاره‌ گرینگه‌كانی کۆمار له‌م ماوه‌ کورته دا کرد که کۆماری تێدا بوو و هه‌ر وه‌ها خاڵه لاواز و به‌ تواناکانی کۆماری بۆ به‌شداران شی  کرده‌وه‌.

له به‌شی دووهه‌می سمیناره‌که دا کاک سه‌لاح وێڕای باس له‌ سه‌ر جووڵانه‌وه‌ی کورد له‌ ڕۆژهه‌ڵاتی کوردستان باسێکی گرینگی له‌ سه‌ر دووله‌ت بوونی حیزبی دێمۆكراتی کوردستانی ئێران و هۆکاره‌کانی دووله‌ت بوونی ئه‌م حیزبه و هێڵه گشتی یه‌كانی حیزبی دێمۆکڕاتی کوردستان پێشکه‌ش به‌ به‌شداران کرد، کاک سه‌لاح نه‌بوونی دێمۆکراسی و پاوان کردنی حیزب به‌ ده‌ست جیناحی کاک مسته‌فا هیجری و چه‌ند هۆکارێکی دیکه‌ی وه‌ک گه‌وره‌ترین هۆکاره‌كانی دووله‌ت بوونی حیزب ده‌ست نیشان کرد.

له به‌شێکی دیکه‌ی سمیناره‌که دا به‌شداران چه‌ندین پرسیار و پێشنیاری به‌ که‌ڵكیان هێنایه‌ ئاراوه‌ که‌ له لایه‌ن کاک سه‌لاحه‌وه به‌ وردی وه‌ڵامی دانه‌وه‌.

پێشنیاری به‌شدارانی سمیناره‌که‌ ئه‌وه بوو که نه‌هێڵن ئه‌زموونی شه‌ری براکوژی و دوژمنایه‌تی له‌ سه‌ر دابه‌ش کردنی ئیمکاناتی حیزب دووباره‌وه‌ بێته‌و‌ه.  به‌شدارانی سمیناره‌که به تێکڕای ده‌نگ ڕووداوه‌کانی ئه‌م دوایانه‌ی بنکه‌کانی حیزب که له و دا به چه‌قۆ که‌وتبوونه له‌شی پێشمه‌رگه‌وه به‌ توندی مه‌حکوم کردو به‌کارێکی زۆر زۆر دواکه‌وتوانه و دڕندانه  وه‌سف کرد.

له کۆتایی سمیناره‌که دا کامڕان سوهرابی ئه‌ندامی کۆمیته‌ی حیزب له‌ بریزبن و هه‌واڵنێری کۆمیته‌ی حیزب له‌ ئوسترالیا سوپاسی به‌شداری گه‌رمی خه‌ڵکه‌که‌ له‌ م سمیناره دا کرد .ئه‌م سمیناره 3 کاتژمێر درێژه‌ی هه‌بوو.

حیزبی دێمۆكڕاتی کوردستانئێران کۆمیته‌ی بریزبن

29/01/2007


جێژنی ڕێزگرتن له‌ کۆماری کوردستان له‌ شاری ئادلایدی ئوسترالیا به شێوه‌یه‌کی که‌م وێنه به‌ڕێوه چوو

بۆ ڕێزگرین له‌ شه‌ست و یه‌که‌مین ساڵیادی دامه‌زرانی کۆماری کوردستان و بۆ نیشاندانی ئه‌مه‌گناسی به‌رامبه‌ر به‌ دامه‌زرێنه‌ران و به‌ڕێوه‌به‌رانی کۆمار، کۆمیته‌ی حیزبی دێمۆکڕاتی کوردستان له شاری ئادلایدی ئوسترالیا، شه‌وئاهه‌نگێکی به‌ شکۆو پڕ له‌ شادیان بۆ کوردانی دانیشتووی ئه‌م شاره وه‌ڕێ خست.
ساڵۆنی ڕێ و ڕه‌سمه‌که به‌ وێنه‌ی 3 شه‌هیدی گه‌وره‌ی حیزبه‌که‌مان قازی و قاسملوو و شه‌ڕه‌فکه‌ندی وئارمی گه‌وره‌ی حیزب و ده‌یان دروشمی نه‌ته‌وه‌یی ڕازابۆوه.

کاتژمێر 8ی ئێواره‌ی شه‌ممه 27 ی ژانویه‌ی 2007 به‌ به‌شداری سه‌دان که‌س له‌ دانیشتوانی کورد له هه‌موو پارچه‌کانی کوردستان و نوێنه‌ری حیزب و ڕێکخراوه سیاسی یه‌کانی کورد به ڕاگرتنی 1 خوله‌ک بێده‌نگی و سروودی نه‌ته‌واییه‌تی ئه‌ی ڕه‌قیب ده‌ستی پێکرد.

به‌ڕێز کاک چه‌کۆ باران شاعیر و هه‌ستیاری کورد وه‌ک یه‌کێک له‌ به‌ڕێوه‌به‌رانی به‌رنامه‌که‌ پارچه‌ په‌خشانێکی هه‌ست بزوێن وپڕناوه‌رۆکی له سه‌ر کۆماری کۆردستان پێشکه‌ش کرد ، که به‌ گه‌رمی له‌ لایه‌ن به‌شدارانی جێژنه‌که وه پێشوازی لێکرا.

تیپی هه‌ڵپه‌رکێی کۆمار که‌ پێکهاتوه له‌ کوڕان و کچانی نیشتمان په‌روه‌ر به‌ ڕیزه هه‌ڵپه‌رکێیه‌کی جوان به‌رنامه‌که‌یان ڕازاوه‌تر کرد و دوابه‌دوای ئه‌م دا  له‌ لایه‌ن دوو کچه‌کوردی ده‌ست ڕه‌نگین به‌ ناوه‌کانی سه‌فین و شلێر تاجه‌گوڵێکی جوان که ژماره‌ی 61 ی به مۆم تێدا نه‌خشرابوو پێشکه‌ش به‌ ڕێ وڕه‌سمه که کرد.

ئه‌م جار شه‌هلا پیروان وه‌ک به‌ ڕیوه‌به‌رێکی دیکه‌ی به‌رنامه‌که وێڕای به‌ خێرهاتن و سوپاسی خه‌ڵک له‌ به‌شداریان له‌م جێژنه‌ پێرۆزه دا داوای له‌ به‌ڕێز کاک هه‌یاس کاردۆ به‌رپرسی کۆمیته‌ی حیزب له ئادلاید کرد که‌ په‌یامی کۆمیته‌ی حیزب پێشکه‌ش بکات.

کاک هه‌یاس له‌ په‌یامه‌که‌ی دا وێڕای وه‌بیرهێنانه‌وه‌ی دامه‌زران و کار وکرده‌وه وئامه‌نجه‌کانی  ئه‌م کۆماره، ئاماژه‌ی به‌وه‌کرد که‌ کۆماری کوردستان به‌شی هه‌موو کوردی پێوه‌یه‌و هه‌موو کوردێک کۆمار به‌ ده‌سکه‌وتی ‌خۆیان ده‌زانن، به‌شداری به‌ڕیز مه‌لا مسته‌فا بارزانی و هاوڕێیانی سه‌لماێنه‌ری ئه‌م ڕاستی‌یه‌یه‌.

دواتر به‌رپرسی کۆمیته‌ی حیزب گرینگی دایه پێویستی خه‌بات بۆ وه‌دیهێنانه‌وه‌ی ئامانجه‌کانی کۆمار به‌ڵام له‌ پانتاییه‌کی به‌رین و به‌ به‌شداری هه‌موو خه‌ڵکی کوردستان.کاک هه‌یاس له‌ به‌شێکی دیکه‌ی وتاره‌که‌ی دائاماده‌یی حیزبی دێمۆکڕاتی بۆ هاوکاری و هاوفکری ده‌گه‌ڵ هه‌موو لایه‌نێکی دڵسۆزی کورد ڕاگه‌یاند و داوای له‌ هه‌موو لایه‌ک کرد که‌ یارمه‌تی ڕه‌وتی نوێ کردنه‌وه‌ی حیزب بکه‌ن.

دوای په‌یامی کۆمیته‌ی حیزب ئه‌م حیزب و ڕێکخراوانه‌ی خواره‌وه په‌یامی خۆیان به‌ بۆنه‌ی 2ی ڕێبه‌ندانه‌وه پێشکه‌ش کرد

  1. په‌یامی هاوڕێیانی یه‌کێتی نیشتمانی کوردستان له‌ لایه‌ن به‌ڕێز کاک نیاز ره‌شید به‌رپرسی که‌رتی ڕێکخستنی یه‌کێتی نیشتمانی له‌ ئادلاید و هه‌ر وه‌ها تاجه‌ گوڵێکی جوان و به‌نرخیان وه‌ک دیاری پێشکه‌ش به‌ جێژنه‌که‌ کرد.
  2. په‌یامی کۆمه‌ڵه‌ی زه‌حمه‌تکێشانی کوردستان له‌ لایه‌ن به‌ڕیز کاک تاهیر حوسینی.
  3. په‌یامی ژنانی دێمۆكڕات له‌ لایه‌ن به‌ڕێز شه‌هلا پیره‌وان.
  4. په‌یامی کۆمه‌ڵه‌ی کورد له‌ باشووری ئوسترالیا له‌ لایه‌ن به‌ڕێز کاک خالید په‌رده‌دار.
  5. په‌یامی یه‌کیه‌تیی لاوانی دێمۆكڕاتی کوردستانی ئێران له‌ لایه‌ن به‌رێز به‌هار ساڵحی.
  6. په‌یامی کۆمه‌ڵه – لقی حیزبی کۆمونیستی ئێران له‌ لایه‌ن به‌ڕێز کاک قادر ڕه‌حیمی.

به‌شی دووهه‌م کۆتایی ڕێو ڕه‌سمی 2ی ڕێبه‌ندان به‌شایی و هه‌ڵپه‌رکێی به‌شدار بوان هه‌تا 12ی نیوه‌شه‌و درێژه‌ی هه‌بوو.
لاوی ده‌‌نگ خۆشی کورد ئاکام مه‌حموود زاده به‌ ده‌نگه‌ به‌ سۆزه‌که‌ی خۆی به‌رنامه‌که‌ی ئه‌وه‌ندی تر ڕازانده‌وه‌.

له ناو خۆشی و شادی بێ پایانی به‌شدارانی ڕێو ڕه‌سمه‌که جێژنی 2ی ڕێبه‌ندان  له نیوه‌ شه‌و داکۆتای پێهات.

جێگای خۆیه‌تی که‌ سوپاسی زه‌حمه‌ت و ماندوو بوونی هه‌موو ئه‌و که‌سانه بکه‌ین که‌ له به‌ڕێوه‌ بردنی ئه‌م جێژنه‌ دا هاوکاریان کردین.

حیزبی دێمۆکڕاتی کۆردستان- ئێران کۆمیته‌ی ئادلاید ئوسترالیا

27/01/2007

















 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.