Ö:: ڕاگه‌یاندراوێک بۆ کۆچی دوایی مام حه‌سه‌ن خدری

حیزبی دێموکراتی کوردستان- ئێران. کۆمیته‌ی سوئێد

ڕاگه‌یاندراوێک بۆ کۆچی دوایی مام حه‌سه‌ن خدری
کۆچی دوای مام حه‌سه‌ن خزری کوڕی خدر قوربانی
مام حه‌سه‌ن، ئه‌ندامی کۆنی حیزبه‌که‌مان که‌ ته‌مه‌نی له‌ سه‌ره‌وه‌ی 70 ساڵ بوو له‌ ڕۆژی 24/ 01/ 2007 به‌ نه‌خۆشی‌یه‌کی له‌ناکاو کۆچی دوایی کرد.
مام حه‌سه‌نی خدری قوربانی ئه‌ندامێکی چالاک و هه‌ڵسوری حیزبی دێمۆکراتی کوردستان بوو، ناوبراو هه‌ر له‌ ده‌ورانی شا دا دووجار له‌ سه‌ر کار کردن بۆ حیزبی دێموکرات که‌وته‌ زیندانه‌کانی حه‌مه‌ڕه‌زا شای په‌هله‌وی و له‌ زیندانه‌کانی شا دا که‌وته‌ به‌ر ئازار و ئه‌شکه‌نجه‌، دیاره‌ دوای ئازاد بوونیشی له‌ زیندان چه‌ندین جار له‌ لایه‌ن ساواک و پاسگاکانی ناوچه‌وه‌ بانگ هێشتن کراوه‌ و به‌ تایبه‌ت له‌ لایه‌ن پاسگای گوندی مه‌زرا و بنێوخه‌ڵێف ده‌که‌وته‌ به‌ر ئازار و ئه‌شکه‌نجه‌ و چه‌ندین جار به‌ شێوه‌ی نامرۆڤانه‌ له‌ لایه‌ن مۆره‌کانی سه‌ر به‌ پاسگا و فه‌رمانده‌کانی بێ حورمه‌تی پێکراوه‌ و به‌ ده‌یان جار به‌ شه‌لاق و دار هێرشی کراوه‌ته‌ سه‌ر و زۆرجار سه‌ر و ده‌م‌وچاویان له‌ سه‌ر کوردایه‌تی له‌ خوێن دا شه‌ڵاڵ کردوه‌. ڕێژیمی په‌هله‌وی و سیخوره‌کانی له‌ ناوچه‌ی سه‌رده‌شت هه‌موو کاتێک مام "حه‌سه‌ن خزری" یان ده‌خسته‌ ژێر چاوه‌دێری و به‌ تاوانی هاوکاری کردن له‌ گه‌ڵ شۆرشگێرانی حیزبی دێمۆکرات ده‌یان خسته‌ ژێر لێکۆلینه‌وه‌ و ته‌نانه‌ت داوای چه‌کیان لێده‌کرد بۆ ئه‌وه‌ی چیدی ئازار و ئه‌شکه‌نجه‌ی نه‌ده‌ن. له‌ گه‌ڵ ئه‌وه‌دا که‌ مام حه‌سه‌ن مرۆڤێکی که‌م داهات و ده‌ست کورت بوو به‌ ناچار و به‌ زۆر چه‌کێکیان به‌ 6000 هه‌زار تمه‌نی ئه‌و کات پێ کری و ئه‌و جار تا ڕاده‌یه‌ک له‌ کۆڵی بوونه‌وه‌.

مام حه‌سه‌ن مرۆڤێکی له‌ سه‌رخۆ و هێمن و به‌ ده‌سته‌وه‌ بوو، ئه‌و پیاوێکی میوان دۆست و ده‌ست و دڵ ئاواڵا بوو، هه‌ر ئه‌و میوان دۆستی‌یه‌ش بوو به‌ هۆی ئه‌وه‌ که‌ خه‌ڵکێکی زۆر بیناسن. مام حه‌سه‌ن هاوکاری‌ خۆی له‌ گه‌ڵ دۆستانی حیزبی توند و قائیم‌ترده‌کرد. مام حه‌سه‌ن له‌گه‌ڵ کادره‌کانی حیزب وه‌ک " شه‌هید مه‌لا ئاواره‌، مه‌لا ڕه‌حیم عه‌باسی، حاجی حه‌مه‌ده‌مین حه‌سه‌ن‌پور و مه‌لا ئه‌حمه‌د خاڵه‌یی ناسراو به‌ مه‌لا له‌تکه‌" و ده‌یان که‌سی دیکه‌ که‌ جیا له‌وانه‌ش به‌ریزان کاک حاجی حوسێن حه‌دداد و کاک که‌ریم حه‌دداد که‌ کاری حیزبی‌یان له‌ ناوچه‌که‌ دا ده‌کرد هاوکاری نزیکی ده‌کرد.

دوای شۆرشی گه‌لانی ئێران، مام حه‌سه‌ن وه‌ک مرۆڤێکی ئازادی خواز و نیشتمان په‌روه‌ر به‌ هه‌ست کردن به‌ ئه‌رکی نیشتمانی چه‌ک له‌ شان ده‌چێته‌ ناو ریزه‌کانی هێزی به‌رگری و شان به‌ شانی هاورێیانی حیزبی دێموکرات ده‌ستی کرد به‌ خه‌بات به‌ دژی داگیرکه‌ران و کۆماری ئیسلامی ئێران. مام حه‌سه‌ن له‌ زۆربه‌ی شه‌ره‌کانی ناوچه‌ دا به‌و په‌ری فیداکاری‌یه‌وه‌ به‌شداری ده‌کرد و له‌ ئه‌رکه‌ پێسپێردراوه‌کانی حیزبی دا دریغی نه‌ ده‌کرد و به‌ دڵ فراونی‌یه‌وه‌ ئه‌رک و مه‌ئموریه‌ته‌کانی حیزبی به‌رێوه‌ ده‌برد.

مام حه‌سه‌نی شۆرشگێر و چاو نه‌ترس، خۆشه‌ویستی کۆمه‌ڵانی هه‌راوی ناوچه‌ی سه‌رده‌شت، به‌ دڵ گه‌رمی‌یه‌وه‌ بۆ ئازادی و سه‌ربه‌خۆیی کوردستان خه‌باتی ده‌کرد. هه‌ستی شۆرشگێرانه‌ی مام حه‌سه‌ن به‌ راده‌یه‌ک بوو که‌ ‌بنه‌ماڵه‌که‌شی خستبۆ ژێر کاریگه‌ری خۆی  و به‌ گشتی ته‌واوی ئه‌ندامانی بنه‌ماڵه‌که‌ی وه‌ک نیشتمان‌په‌روه‌ر و گه‌ل دۆست بۆ گه‌له‌که‌ی پێگه‌یاندن. مام حه‌سه‌ن چه‌ند کوڕ و نه‌وه‌ی له‌ ڕیزه‌کانی حیزبی دێمۆکرات دا خه‌باتیان ده‌کرد. به‌ داخێکی زۆر گرانه‌وه‌ ته‌نیا له‌ ماوه‌ی یه‌ک شه‌و و ڕۆژ دا مام حه‌سه‌ن دوو کوڕی قاره‌مان و شۆرشگێری له‌ سه‌نگه‌ری به‌رگری دا له‌ به‌رامبه‌ر دوژمنان دا به‌ ناوه‌کانی محه‌ممه‌د و خدر شه‌هید بوون و گیانیان به‌ختی ئازادی کورد و کوردستان کرد. مام حه‌سه‌ن هه‌ر ئه‌و کاتیش وه‌ک ئه‌وه‌ که‌ کوره‌کانی بۆ شۆرش کردن گه‌وره‌ کرد بن، خه‌م داینه‌گرت و له‌ کاتی شه‌هید بوونی جگه‌رگۆشه‌کانی دا هیچ وره‌ی دانه‌به‌زی، به‌ڵکوو کوڕێکی دیکه‌شی به‌ ناوی ئیبراهیم خزری هان دا که بچێته‌ ڕیزی تێکۆشه‌رانی دێمۆکرات و فێری کرد که‌ میراتگری ڕاسته‌قینه‌ی‌ شه‌هیدانی کوردستان بێت، که‌ به‌ داخه‌وه‌ ئه‌ویش له‌ کاتی به‌رێوه‌بردنی ئه‌رکی حیزبی دا که‌وته‌ به‌ر گولله‌ و پرینچکی چه‌که‌کانی ده‌ستی دوژمن و به‌ سه‌ختی بریندار بوو و دوایه‌ش وه‌ک که‌م‌ئه‌ندام له‌ لایه‌ن حیزبه‌وه‌ ڕه‌وانه‌ی ده‌ره‌وه‌ کرا. ئیبراهیم تا ئێستاش قورس و قائیم له‌ سه‌ر ڕێبازی شه‌هیدان و حیزبی دێموکراتی کوردستان دا ماوه‌ته‌وه و‌ درێژه‌ به‌ خه‌بات ده‌دا به‌ دژی زوڵم و زۆری و به‌ دژی کۆماری ئیسلامی ئێران‌. شایانی باسه‌ که‌ مام حه‌سه‌ن جیا له‌ کوره‌کانی دوو نه‌وه‌شی به‌ ده‌ستی ڕێژیمی کۆماری ئیسلامی ئێران شه‌هید کراون.

مام حه‌سه‌ن له‌ ماوه‌ی ژیانی دا هه‌میشه‌ وه‌ک مرۆڤێکی راست بێژ و قسه‌ خۆش و به‌ وره‌ و به‌ ئیمان له‌ لایه‌ن خه‌ڵکه‌وه‌ سه‌یری ده‌کرا، ئه‌و به‌ هۆی خه‌باتی خۆی له‌ ناوچه‌که‌ دا وه‌ک سیمبولی بنه‌ماڵه‌ی‌ شه‌هیدان سه‌یری ده‌کرا و ببوو به‌ جێگای متمانه‌ی خه‌ڵکی ناوچه‌ی سه‌رده‌شت. مام حه‌سه‌ن جیا له‌ کوره‌کانی به‌شێک له‌ سه‌روه‌ت و سامانی خۆشی بۆ ئازادی کوردستان له‌ ده‌ست دا، به‌ڵام هیچ کات ناوچاوانی گرژ نه‌کرد و منه‌تی به‌ سه‌ر که‌س دا نه‌کرد و که‌سی به‌ قه‌رزداری خۆی نه‌زانی و به‌ پێچه‌وانه‌ هه‌موو کات ده‌یگووت که‌ بریا چه‌ند کوڕی دیکه‌ هه‌بان، بۆ ئه‌وه‌‌ی زیاتر خزمه‌ت به‌ خه‌باتی رزگاریخوزانه‌ی گه‌لی کورد بکه‌ن.

ئێمه‌ وێڕای به‌داخ بوون بۆ کۆچی دوایی مام حه‌سه‌ن خدری به‌ناوی کۆمیته‌ی سوئێد و هه‌موو ئه‌ندامان و لایه‌نگرانی حیزب له‌م وڵاته‌دا سه‌ره‌خۆشی خۆمان ئاراسته‌ی کاک ئیبڕاهیم و بنه‌ماڵه‌یان ده‌که‌ین و خۆمان به‌ شه‌ریکی خه‌میان ده‌زانین و داوای سه‌بوورییان بۆ به‌ ئاوات ده‌خوازین.

ڕوحی شادبێ

حیزبی دێموکراتی کوردستان- ئێران

کۆمیته‌ی سوئێد

24/1/2007

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.