Ö:: میدیا کوردی‌یه‌کانی باشوور– تێکدان یا بووژاندنه‌وه‌ی ئه‌ده‌ب‌و چاندی کوردی؟

نووسینی: عه‌بدوڵڵا ئیبراهیمی

میدیا کوردی‌یه‌کانی باشوور– تێکدان یا بووژاندنه‌وه‌ی ئه‌ده‌ب‌و چاندی کوردی؟
پێکهاتنی حکوومه‌تی هه‌رێمی کوردستان‌و ئازادی‌و ئۆقره‌گرتنێکی هه‌رچه‌ند ناته‌واویش به‌ڵام بێوێنه‌ی گه‌لی کوردله‌ پارچه‌یه‌کدا، زنجیره‌یه‌کی به‌رچاوی میدیای کوردیی لێ له‌دایک بوو. ئه‌وه ‌بوو به‌ هۆی پێکهاتنی گۆڕه‌پانێکی به‌رفره‌وانی ده‌نگ‌و ڕه‌نگ‌و نووسین
‌و ده‌ربڕینی ڕاو په‌روه‌رده ‌کردنی چاندو تۆره‌ی کوردی. به‌تایبه‌تی تلویزیۆنه‌کانی کوردی له‌وناوه‌دا ده‌ورێکی گه‌وره‌و به‌رچاویان پێ‌بڕاو سنووریان به‌زاندن‌و ده‌هیچ پاڵێوه‌رێک نه‌وه‌ستان‌و خۆیان گه‌یانده‌ ماڵی هه‌موو خوازیارانی تینووی پێشکه‌وتنی فه‌رهه‌نگی کوردی. هه‌رچه‌ند ڕۆژنامه‌و گۆڤاره‌کانیش به‌ که‌لک وه‌رگرتن له‌ تۆڕی ئینتێرنێت، سنووریان نه‌هێشت، به‌‌ڵام بێگومان تلویزیۆن له‌ پله‌ی یێکه‌م‌و ڕادیۆکان له‌ پله‌ی دووهه‌مدا له‌و ناوه‌دا ده‌وری سه‌ره‌کی‌یان که‌وته‌ده‌ست -  که‌ گۆڕه‌پانێکی به‌ربڵاوتریان هه‌بوو و به‌هۆی ده‌ست ئاواڵه‌یی‌و شێوه‌ی تایبه‌تیی گه‌یاندنه‌که‌ی خۆیان،‌ تێگه‌یشتنه‌که‌یان بۆهه‌مووکه‌س ( خوێنده‌وارو نه‌خێنده‌وارو...) - زۆر هاسانترو کارتێکردنه‌که‌یان به‌رچاوتر بوو. به‌ وه‌کار که‌وتن‌و په‌ره‌ئه‌ستاندنی ئه‌و دوو هۆیه‌ی ڕاگه‌یاندن، ‌ئه‌ هیوا مه‌زنه‌ که‌وته‌ دڵی هۆگرانی ئه‌ده‌ب‌و چاندی به‌ سه‌دان ساڵ خنکێندراوو له‌ به‌ره‌وپێشچوونی شیاوی خۆی بێبه‌شکراوی کوردی، که:‌ ”ئیدی کورده‌ مه‌یدان مه‌یدانی خۆته‌و تاده‌توانی‌و هه‌لت له‌ده‌ستدایه‌ ئه‌سپی خۆت لینگده‌“ هه‌ق بڵێین که‌میش نه‌کراو ڕۆڵه‌کانی گه‌لمان ئه‌وه‌ی بۆیان کرا له‌ هه‌موو ئه‌و شوێنانه‌ ڕا که‌ چه‌ند کوردێکی (به ‌ئاواره‌یی یا له‌ماڵه‌خۆ) لێ نیشته‌جێ بوو و بڕوای به‌خۆ بوو که‌ کارێکی پێ ده‌کرێ کردی. ئه‌و ئه‌رک‌و گرنگی‌و خۆماندووکردنه‌ی میدیا ناوبراوه‌کان له‌که‌س شاراوه‌ نیه‌و ئه‌و خزمه‌ته‌ گه‌وره‌ی به‌تایبه‌تی ته‌له‌ڤیزیۆنه‌کان کردیان جێگای ڕێزلێگرتن‌و شانازی پێکردنمانه‌، به‌‌ڵام به‌داخه‌وه‌سه‌ره‌ڕای ئه‌وه‌ش هێندێک دیارده‌ی ناله‌بارو تێکده‌ر له‌ناو ئه‌و ده‌نگ‌و بزاوه‌داخۆیان جێ کردۆته‌‌وه‌، که‌ چاو لێ پۆشینیان به‌دووره‌ له‌ هه‌ستی به‌رپرسیاری. 

وه‌ک ده‌زانین هه‌ر زمانێک ڕێزمان‌و شێوه‌ گۆتنی تایبه‌تیی خۆی هه‌یه‌، که‌ تاڕاده‌یه‌کی زۆر له‌ زمانی دیکه‌ی جوێ ده‌کاته‌وه‌. هه‌ر زمانێکی زیندووی ئه‌وڕۆ که‌ خزمه‌تی کراوه‌و پشتیوانی باشی هه‌بووه‌ ئه‌و شێوازه‌ تایبه‌تی‌یه‌ی خۆی پاراستووه‌و کاری پێده‌کا. به‌داخێکی گرانه‌وه‌ کورد به‌زۆر هۆ له‌و بواره‌دا دواکه‌وتووه‌، که‌ به‌شێکی زۆری تاوانه‌که‌ی ده‌که‌وێته‌ ئه‌ستۆی هه‌لومه‌رج‌و بارو دۆخی مێژوویی‌و ڕامیاری‌و ئابووریمان. بۆ وێنه‌: نه‌بوونی ڕێنووسی هاوبه‌ش، نه‌بوونی زمانی یێکگرتووی خوێندن‌و نووسین، نه‌بوونی فه‌رهه‌نگستان‌و ده‌زگایه‌کی شیاوو ده‌سته‌ڵاتداری ساغکه‌ره‌وه‌ی زمان‌و له‌ هه‌موان تێکده‌رتریش بیرکردنه‌وه‌ به‌ زمانی داگیرکه‌رانی کوردستان‌و نووسینی به‌زمانی خۆمان. ئه‌وه‌ی تا ڕاده‌یه‌کی زۆر سووچی خۆمانی تێدا به‌دی ده‌که‌م، ئه‌و به‌شه‌ی دوایی‌یه‌.

دوژمنانی نه‌ته‌وه‌مان زۆریان حه‌ول داوه‌ زمان‌و بۆچوون‌و ویستی خۆیانمان به‌سه‌ردا بسه‌پێنن. له‌و ڕێگایه‌شدا له‌ ده‌کارکردنی هیچ شێوه‌و هۆکارێکی گونجاو خۆیان نه‌پاراستووه‌. به‌شێک له‌و زنجیره‌ پیلانانه‌ی داگیرکه‌رانی کوردستان بۆ تواندنه‌وه‌مان دایان ڕشتوون، ئه‌وانه‌ن: حاشاکردن له‌ بوونمان وه‌ک نه‌ته‌وه‌، سووکایه‌تی کردن به‌ چاندو تۆره‌و فه‌رهه‌نگمان، خزاندنی تێکده‌رانه‌ی ئاسه‌واری فه‌رهه‌نگی خۆیان ده‌نێو ئی ئێمه‌و ورده‌ورده‌ به‌تاڵ کردنی فه‌رهه‌نگمان له‌ ڕه‌سه‌نایه‌تی‌یه‌که‌ی خۆی، ڕێگا نه‌دان به‌ خوێندن به‌ زمانی زگماکی بۆ کورد یا دانانی شێوه‌ خوێندنێکی کوردی که‌ کوردی‌و کوردایه‌تی‌یه‌که‌مان وه‌ها ورده‌ورده‌ له‌بیر باته‌وه که‌ کاتێک به‌خۆمان بزانین که‌ به‌ خشکه‌ خزیوینه‌ نێوه‌ڕاستی گێژاوی خنکێنه‌ری دوژمن‌‌و.... به‌ڵام بزانانه‌و یا نه‌زانانه‌، بۆخۆشمان ڕێگا بۆ ئه‌و مه‌به‌سته‌ی دوژمنان خۆش ده‌که‌ین. به‌داخه‌وه‌ ئه‌من ئه‌و ده‌وره‌ له‌ باشوور، به‌ زه‌قی ده‌ میدیای کوردی دا ده‌بینم. ڕاسته‌ ئێمه‌ له‌ ڕۆژی یێکه‌می چوونه‌ قوتابخانه‌وه‌ ڕاهێندراوین ئه‌گه‌ر بمانه‌وێ شتێک بڵێین به‌ زمانی داگیرکه‌ر بیری لێ بکه‌ینه‌وه‌، پاشان وه‌ریگێڕینه‌وه‌ سه‌ر زمانی خۆمان‌و جا ئه‌وجار ده‌ری بڕین. ئه‌وه‌ تا ڕاده‌یه‌کی زۆر له‌ ئاخافتنی کوردانه‌ دوورمان ده‌خاته‌وه‌. ئه‌وه‌ی به‌و چه‌شنه‌ له‌ ده‌ممان دێته‌ده‌ر یا به‌نووکی پێنووسمان دێته‌ سه‌ر قاقه‌ز، له‌ تێکه‌ڵاویی وشه‌کان ڕا بگره‌ تا ڕێزمان‌و شێوه‌ی گۆتن، زۆرتر وه‌ ئی داگیرکه‌ره‌که‌ ده‌چێ تا ئی خۆمان. واته‌ هه‌واڵ یا بابه‌ته‌که‌ی له‌ عه‌ره‌بی ڕا وه‌رده‌گرن، به‌بێ ئه‌وه‌ی زه‌حمه‌ت بده‌نه‌ به‌ر خۆو بیهێننه‌وه‌ سه‌ر ڕێزمانی کوردی، هه‌ر وشه‌ به‌ وشه‌ وه‌ک خۆی وه‌ری ده‌گێڕنه‌وه‌. له‌و چه‌شنه‌ گۆتنه‌دا، ئه‌وه‌ی سه‌وادی عه‌ره‌بیی نه‌بێ زۆر به‌ئاسته‌م لێی تێده‌گا، خۆ ئه‌گه‌ر گۆتنه‌که‌ بڕێک درێژتر بێ ئه‌وجار گوێگر تا ده‌سته‌واژه‌که‌ ته‌واو ده‌بێ‌و ناوی به‌جێهێنه‌ری فه‌رمانه‌که‌ (بکه‌ر) ده‌بیسێ، له‌بیری ده‌چێته‌وه‌ چ کراوه‌. (باوه‌ڕ بفه‌رموون بۆخۆم چه‌ندجارم وا به‌سه‌ر هاتووه‌).  چاوێک له‌ هه‌واڵه‌کانی ته‌له‌ڤیزیۆنه‌ کوردی‌یه‌کانی باشووری کوردستان بکه‌ن: ”له‌ میانه‌ی گه‌شته‌که‌یدا بۆ سین به‌مه‌به‌ستی هه‌ڵسه‌نگاندنی ڕۆڵی پێشانگای هه‌ولێری نێوده‌وڵه‌تی له‌ بازرگانیی جیهانیدا، له‌به‌رده‌م نوێنه‌رانی حیزبی کۆمۆنیستی ئه‌و وڵاته‌دا له‌ به‌کین، به‌ڕێز مام هۆرتک گوتی....“

ڕۆژنیه‌ له‌ هه‌واڵ‌و بابه‌ته‌کانی ته‌له‌ڤیزیۆنه‌کانی کوردستانی باشووردا گوێتان له‌‌ ده‌یان ده‌سته‌واژه‌ی دوورو درێژو هه‌ڵه‌ی دوور له‌ شێوه‌گۆتنی کوردانه‌ی له‌و بابه‌ته‌ نه‌بێ. ئه‌و گۆتنه‌، قسه‌یه‌کی خۆشی براده‌رێکم وه‌بیر دێنێته‌وه‌ که‌ له‌ ڕۆژانی پێشمه‌رگایه‌تیدابۆی گێڕامه‌وه‌.

”کابرایه‌ک کوتی خه‌مه‌ڕه‌زا‌و غه‌لیڕه‌زا هه‌رسێکیان کچی شای عه‌ره‌بستانی سعوودی بوون!“

یێکێک له‌ولای ڕا لێی وه‌جواب هات‌و گوتی: ”خوا ماڵت خرا نه‌کا، ئه‌وانه‌ی باسیان ده‌وکه‌ی خه‌مه‌ڕه‌زا‌و غه‌لیڕه‌زا نه‌بوون، حه‌مه‌ڕه‌زا‌و عه‌لیڕه‌زا بوون، سێش نه‌بوون دوو بوون، کچیش نه‌بوون کوڕبوون، ئی شای عه‌ره‌بستانی سعوودیش نه‌بوون ئی ڕه‌زاشا بوون، ئه‌ویش پادشای عه‌ڕه‌بستانی سعوودی نه‌بوو، شای ئێران بوو، لانی که‌م یێکێکیانت به‌ڕاست کوتبا“

به‌ هه‌موو ڕێزمه‌وه‌ بۆ ئه‌رک‌و تێکۆشانی کارمه‌ندانی ئه‌و ته‌له‌ڤیزیۆنانه‌، ده‌بێ بڵێم ده‌سته‌واژه‌که‌ی ئه‌و به‌ڕێزانه‌ش چی وا له‌ کوتنه‌که‌ی ئه‌و کابرایه‌ ڕاستتر نین.  ده‌سته‌واژه‌‌که‌ هه‌موو یاساکانی ڕێزمانی کوردیی تێک داوه‌. نموونه‌یه‌کی بچووکتان به‌دوو‌ ڕسته‌ی ساکار بۆ دێنمه‌وه‌. له‌ کوردی دا که‌س ناڵێ ”زه‌ویه‌که‌ی کێڵاو تۆوی پێوه‌کرد حه‌سه‌ن“ یا: ”چووه‌ هه‌ولێرێ بۆ کڕێنی هێندێک که‌لوپه‌لی نێو ماڵێ له‌ کۆیه‌ ڕا مام هۆرتک“ ئه‌گه‌ر ئه‌من کوردیم له ‌بیر مابێ ‌و به‌هه‌ڵه‌ نه‌چووبم!؟ کوردان ئه‌و دوو ڕسته‌ی ئاوا ده‌ڵێن: ”حه‌سه‌ن زه‌ویه‌که‌ی کێڵاو تۆوی پێوه ‌کرد“ یا ”مام هۆرتک بۆ کڕینی هێندێک که‌لوپه‌لی نێوماڵ(ێ) چووه‌ هه‌ولێر(ێ)“ هه‌واڵه‌که‌ی ته‌له‌ڤیزیۆنی گۆرینیش‌ ئه‌گه‌ر وه‌ری گێڕینه‌وه‌ سه‌ر کوردی ده‌ڵێ: ”مام هۆرتک له‌ (له‌میانه‌ی) سه‌ردانه‌که‌یدا بۆ سین (چین)، له‌به‌رده‌م نوێنه‌رانی حیزبی کۆمۆنیستی ئه‌و وڵاته‌دا له‌به‌کین (پێکه‌ن)، به‌مه‌به‌ستی هه‌ڵسه‌نگاندنی ڕۆڵی پێشانگای نێوده‌وڵه‌تیی هه‌ولێر له‌ بازرگانیی نێوده‌وڵه‌تیدا، گوتی....“ دیاره‌ به‌داخه‌وه‌ که‌مته‌رخه‌می‌یه‌که‌ هه‌ر به‌وه‌نده‌ش کۆتایی پێ نایه‌. له‌ باسی ناوی شوێنه‌کانیشدا کوتنی شێوه‌ عه‌ره‌بی به‌کوردی هه‌ر به‌ورده‌وامه‌. بۆوێنه‌ به‌ فڕۆکه ‌خانه‌ی هه‌ولێر ده‌ڵێن: ”فڕۆکه‌خانه‌ی هه‌ولێری نێوده‌وڵه‌تی“ به‌ڕێزان ئه‌وناوه ‌شاری ”هه‌ولێر“ی کردۆته‌ نێوده‌وڵه‌تی نه‌ک فڕۆکه‌خانه‌که‌ی. ئه‌و شێوه‌ گوتنه‌ ڕه‌نگه‌ له‌ عه‌ره‌بیدا به‌جێ بێ، به‌ڵام له‌کوردیدا هه‌ڵه‌یه‌کی گه‌وره‌ی ڕێزمانی‌یه‌. کورد ناوی له‌و چه‌شنه‌ ئاوا ده‌ڵێ: ”فڕۆکه‌خانه‌ی نێوده‌وڵه‌تیی هه‌ولێر“. واته‌ په‌سنی نێوده‌وڵه‌تی بوونه‌که‌ ئی فڕۆکه‌ خانه‌که‌یه‌، که‌ به‌ نێو ده‌وڵه‌تی ناسراوه‌، ده‌نا هه‌ولێر هه‌ر وه‌ک خۆی پێته‌ختی کوردستانه‌و شارێکی نێوده‌وڵه‌تیش نیه‌. یا ده‌ڵێن پێشانگای هه‌ولێری نێوده‌وڵه‌تی. ئه‌و ناوه‌ش له‌کوردیدا وا ده‌گه‌یێنێ که‌ هه‌ولێر شارێکی نێو ده‌وڵه‌تی‌یه‌و پێشانگایه‌کی تێدا کراوه‌ته‌وه‌، نه‌ک ”پێشانگایه‌کی نێوده‌وڵه‌تی“ له ‌هه‌ولێر کرابێته‌وه‌. ‌

عه‌ره‌ب (چ)یان به‌ فه‌رمی بۆ ناکوترێ، هه‌رچه‌نده‌ به‌ نافه‌رمی ده‌یڵێن، بۆیه‌ ناچارن ”چین“ بکه‌ن به‌ ”صین“، به‌ڵام خۆ ئێمه‌ هه‌مانه‌و کوتنی”چ“مان بۆ به‌سێنه‌یی‌یه‌، بۆ نابێ لاسای عه‌ره‌بان نه‌که‌ینه‌وه‌و نه‌ڵێین ”چین“، که‌ ڕاستتره‌؟ ئایا دروسته‌ چونکه‌ عه‌ره‌ب ”پ“یان نیه‌و له‌ کوتنی‌ ئینگلیسیدا به‌” پارکینگ“ واته‌ ”شوێنی ترومبێل لێ ڕاگرتن“ ده‌ڵێن ” بارکینغ“، ئێمه‌ش هه‌ر وا بڵێین؟ ده‌زانن ”بارک‌و پارک“ له‌ ئینگلیسیدا چه‌ند لێک دوورن؟ بۆئاگاداریی ئه‌وانه‌ی نازانن ده‌ڵێم: ”بارک کردن“ واته‌ ”وه‌ڕین“و ”پارک کردن“ ڕاگرتنی ترومبێله‌.

هه‌موومان باش ده‌زانین هیچ زمانێک له‌ دنیای ئه‌وڕۆدا له‌ وشه‌ی بێگانه‌ بێ‌نیاز نیه‌. هه‌رچی زانست‌ ده‌چێته‌پێش وشه‌ی تازه‌ی زۆرتریش دێنه‌ گۆڕو ده‌خزێنه‌ نێو هموو زمانانی دنیا. ئێمه‌ی کوردیش پێویسته‌ ئه‌و وشانه‌ وه‌رگرین‌و له‌شوێنی خۆیاندا ده‌کاریان که‌ین. ئه‌من ناڵێم زمان ده‌بێ به‌بێ هه‌ڵسه‌نگاندنێکی دروست، له‌ هه‌موو وشه‌کانی بێگانه‌ پاک بێته‌وه‌. ئه‌وه‌ بێگومان تووشی هه‌ڵه‌و زیانی زۆرمان ده‌کا، به‌ڵام ده‌ڵێم له‌و شوێنه‌ی دا که‌ وشه‌ی جوانی کوردیمان هه‌یه‌ بۆ ده‌بێ وشه‌ی نامۆی بێگانه‌ ده‌کار که‌ین؟. بۆ وێنه‌ کاتێک ده‌توانین بڵێین ”ئاهه‌نگێکی جوان یا جوان‌و ڕازاوه‌“ بۆ بڵێێن ”ئاهه‌نگێکی قه‌شه‌نگ“و خۆمان به‌ ”ق“ی ئه‌و ”قه‌شه‌نگ“ه‌ بخنکێنین که‌ له‌ تورکی وه‌رگیراوه؟‌.

له‌به‌ر ئه‌وه‌ی به‌داخه‌وه‌ زۆرینه‌ی خوێنده‌وارانی گه‌له‌که‌مان یا به‌زمانی بێگانه‌ خوێندوویانه‌و یا ئه‌گه‌ر به‌ کوردیش خوێندبیان، ئه‌و ده‌ره‌تانه‌ ته‌نیا له‌ پارچه‌کوردستانی به‌رده‌ستی عێراقدا – ئه‌ویش زۆر به‌نیوه‌چڵی –  هه‌بووه‌. به‌ڵام ئه‌وه‌ش کارتێکردنێکی زۆر تێکده‌رانه‌ی زمانی نه‌ته‌وه‌ی زاڵی له‌سه‌ر هه‌بووه‌. زۆرمان ڕه‌نگه‌ نه‌زانین زمانه‌که‌مان چه‌نده‌ ده‌وڵه‌مه‌نده‌و له‌ ئاخافتندا زۆر که‌م پێویستیمان به‌ وشه‌ی بێگانه‌ هه‌یه‌. ڕاگه‌یێنه‌ره‌گشتی‌یه‌کانی کوردستان ئه‌رکی سه‌رشانیانه‌ که‌‌ شێوه‌ ئاخافتنی خۆیان به‌ وردی هه‌ڵسه‌نگێنن. ده‌بێ ئه‌گه‌ر به‌ڕێوه‌بردنی به‌رنامه‌یه‌ک به‌ که‌سێکیش ده‌سپێرن بۆ ڕاستکردنه‌وه‌ی شێوه‌ گۆتنه‌که‌ی ڕێنوێنیی پێویستی بکه‌ن. چاو له ‌به‌رنامه‌ی ئاشپه‌زی‌یه‌کانی ته‌له‌ڤیزیۆن بکه‌ن. باوه‌ڕ بکه‌ن فارس زۆرتریان لێ تێده‌گه‌ن تا کورد. ئه‌وه‌ش تاوانی ئه‌و خانمه‌ به‌ڕێزانه‌ نیه‌ که چێشت لێنان فێری خه‌ڵک ده‌که‌ن. ئه‌وان به‌ فارسی خوێندوویانه‌. له‌ وڵاتێکدا ده‌ژین که‌ زمانه‌که‌یان زۆر به‌خه‌ستی که‌وتۆته‌ ژێر گوشاری به‌فارس کردن. سووکایه‌تیی پێکراوه‌و ده‌کرێ. به‌ زمان ناوی نابه‌ن‌و تا ڕاده‌ی زاراوه‌یه‌کی ناوچه‌یی زمانی فارسیشی دێننه‌ خوار. به‌داخه‌وه‌ له‌ژێر ئه‌و گوشاره‌دا وایان لێکردوون که‌ ته‌نانه‌ت له ‌ڕوویان هه‌ڵنه‌یه‌ به‌دایکیان نه‌ڵێن مه‌مان، بڵێن دایه‌و به‌میمکیان نه‌ڵێن ئه‌ممه‌، بڵێن پوورێ‌و.... و قسه‌کردن به ‌کوردیی ڕه‌وان‌و ڕاستی‌یان پێ دواکه‌وتوویی‌و نه‌خوێنده‌واری بێ. به‌داخه‌وه‌ ئه‌ودیارده‌ ناحه‌زو دژه‌کوردانه‌ له ‌کوردستانی پارچه‌ی ئێراندا زۆر بڕه‌وی ئه‌ستاندووه‌. ئه‌رکی کاربه‌ده‌ستانی ته‌له‌ڤیزیۆنه‌که‌ له‌وبواره‌ودا به‌ساکاری هه‌ر ئه‌وه‌نده‌یه‌ ئه‌وان تێ‌بگه‌یێنن که‌ کورد چۆن باشتریان لێ تێده‌گه‌ن. بۆ وێنه‌ پێ‌یان بڵێن له‌جێگای ”ئه‌لانی“ له‌ عه‌ره‌بی ڕا په‌ڕیوه‌ نێو فارسی، ئه‌گه‌ر بڵێن ”ئێستا“ جوانتره‌.   

ڕاسته‌ ئێمه‌ به‌ناچاری به‌زمانی بێگانه‌ ڕاهێندراوین، به‌ڵام ئێستا که‌ پارچه‌یه‌کی وڵاته‌که‌مان که‌وتۆته‌وه‌ به‌ر ده‌سته‌ڵاتی خۆمان‌و سه‌ره‌ڕای ئه‌وه‌ی ده‌ڵێین به‌شێکین له‌ عێراقی فیدراڵ، هه‌ر بڕیارێکی به‌غدا ئه‌گه‌ر به‌زیانی کورد بێ ”نا“ی بۆ ده‌ڵێین، بۆ هه‌وڵ ناده‌ین نووسین‌و ئاخافتنی خۆمان له‌ژێر چه‌پۆکی فه‌رهه‌نگی نه‌ته‌وه‌ی فه‌رمانڕه‌وای پێشوو ده‌رێنینه‌وه‌. ئایا به‌جێ‌یه‌و ڕه‌وایه‌ هه‌روا ده‌ست له‌سه‌رده‌ست دانێین‌و چۆنمان بۆ هاسانتره‌ وابکه‌ین؟ ئایا کاتی ئه‌وه‌ نه‌هاتووه‌ ته‌کانێک بده‌ینه‌خۆو زنجیری کۆیله‌تیی فه‌رهه‌نگی له‌ شان‌و ملی خۆمان داماڵین؟

ئه‌و هه‌ویره‌ ئاوێکی زۆر هه‌ڵده‌گرێ‌، به‌ڵام پێموایه‌ هه‌ر به‌وه‌نده‌ش شه‌مێکم داوه‌ته‌ ده‌ستی ئه‌وکه‌سانه‌ی هه‌ست‌و سۆزی خۆشه‌ویستیی وشه‌ی کوردی وره‌ی پێوانی ئه‌و ڕێگا ئاسته‌مه‌یان ده‌داتێ‌و ده‌توانن له‌به‌ر ترووسکایی که‌می ئه‌و ڕووناکیده‌ره‌ لاوازه‌شدا ڕێگای خزمه‌ت به‌ زمانی نه‌ته‌وه‌یی خۆیان بدۆزنه‌وه‌.

نووسینی: عه‌بدوڵڵا ئیبراهیمی

‌1/1/2007

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.