Ö:: نامه‌یه‌ک بۆ نه‌نه‌ ئامه‌ی پاڵه‌وانی چیرۆکه‌که‌ی دوێنێم

نووسینی: م . حه‌مید عه‌زیز

که‌ سوڵتانێکی لووت به‌رز و له‌خۆبایی به‌لاتدا تێپه‌ڕی بزانه‌ تا دوێنێ سواڵ که‌ربووه‌ .
چی له‌و ‌بێ هه‌ستی یه‌ ناخۆشتره‌ که‌ تۆ عه‌یامێکی زۆر دوورو درێژ مۆم و ڕووناکی و ئاسمان و دنیای ڕۆح سووتان بوو بیت له‌ پێناوی سبه‌ینێی باشتربووندا بۆ ژین و هه‌ناسه‌ی سه‌ربه‌ستی نیشتمان و نه‌ته‌وه‌یه‌ک. چی له‌ پێی زووڵم و سته‌می پیاو ‌قورس و ڕه‌ق و ناخۆشتره‌‌ که‌جه‌سته‌ی ناشرینی پیاوه‌تی خۆی به‌سه‌ر پشتی ماندووی تۆدا تێپه‌ڕاندبێ .. ساڵانێکی زۆریش عه‌بدو پردی جێ پێ و هێڵی په‌ڕینه‌وه‌ی چه‌کداری پاکو ناپاکی پێشمه‌رگه‌ بوویت به‌ ئاگرو ئاسنی هه‌ردوولاش سووتاوو شه‌که‌ت و بریندارو کووتراویت . چ کاره‌ساتێکی گه‌وره‌یه‌ له‌ برسێتی و نه‌هامه‌تی ژیانی سه‌رتاپا تاڵی و سوێری وه‌کو هه‌زاران شه‌وی خه‌وزڕان و ناسروشتی ژین و ژیانت بووبێت .. خۆت نانی ده‌می پێشمه‌رگه بووبیت هه‌م پاسه‌وان و جل شۆریش‌ هه‌م خزمه‌تکارو خه‌م خۆر . چی له‌وه‌ ناخۆشتره‌‌ ڕه‌نجه‌کانی بێ به‌رهه‌می ژیانی کڵۆڵی و داچڵه‌کین و شه‌ونخوونی خورپه‌ی ده‌روونی ژنێتیت له‌ دنیای پیاو ئاغایی و مێشک ووشکه‌ڵاتووه‌کانی ئه‌م جه‌ورستانه‌ ڕۆڵی نه‌بووبێت هه‌تا ئێستاش هه‌ر زه‌عیفه‌ بیت له‌ چاوانی پیاوانی ترسنۆک و بێ وه‌فای ئه‌م چه‌رخی سه‌رمایه‌داری و نامرۆیی یه‌دا که‌ له‌ سه‌رده‌مه‌کانی مرۆڤی کۆنی چاخی ناوه‌ڕاست ده‌چن . دڵسۆزی و کوردایه‌تی و مه‌ردایه‌تیت بۆ پیاوی بێ وه‌فا ته‌مه‌نێک بوو پایزوو وه‌رینی ڕه‌ووشت بوو له‌ ناخه‌ ڕه‌ش و درۆزنه‌کانی به‌ناو شۆڕش و شۆڕشگێڕی پیاوانی ناپاکی خۆ به‌ پێشمه‌رگه‌زان و به‌ناو پیاو چاک بوو. ته‌مه‌ن به‌سه‌رچوو په‌شیمانیش به‌فریای ئه‌و دڵه گه‌رمه‌ت ناکه‌وێ.. به‌ڵام پیرۆزی یه‌ک  هه‌یه‌ له‌هه‌موو پیرۆزی یه‌کانی دی گرنگتره‌ ئه‌ویش ئه‌وه‌یه‌ .. به‌س نی یه‌ وویژدانت ئاسووده‌یه به‌رامبه‌ر میلله‌تی خۆت‌.. تۆ وه‌ک و فیرعه‌ونه‌کان ژیانت له‌ خۆت و خه‌ڵکی تاریک و تێک نه‌داوه‌ تا به‌ ترس و له‌رزو پاسه‌وانه‌وه‌ بخه‌وی نه‌نه‌ گیان.. زاڵم زه‌واڵی بۆ ئه‌بێت داینێ بۆ ڕۆژی خۆی. ماڵه‌ ته‌نه‌که‌ ساردوو سڕه‌که‌ی تۆ له‌کۆشکه‌ گه‌رم و گووڕه‌ خوێناوی و بۆن سارده‌که‌ی ئه‌وان باشترو جوانتره‌ لای من‌ .. من دیواری به‌ گوێنی و په‌ڕۆ هه‌ڵپه‌سێراوت ماچ ده‌که‌م، من بۆ پالیسی ده‌ووری خێمه‌ دڕاوه‌که‌ی‌ ماڵت سووجده‌ ده‌به‌م .. کورد نه‌ته‌وه‌یه‌کی دڵپاک و هه‌ژاره‌ ڕاستی فه‌رمووه‌ ده‌ڵێ : ڕۆژان ڕۆژی له‌ دووایه، که‌سیش تا سه‌ر ژیان و هه‌موو خۆشی یه‌کان بۆخۆی نابات .. مرۆڤایه‌تی و کاری باشیش زۆرجار ده‌که‌وێته‌ نه‌نگی و نشووستی یه‌وه‌.!. ئه‌یچۆن زاڵمێتی و بێ ویژدانی و سته‌م هه‌تا سه‌ره‌.؟. ژیان بۆیه‌ خۆشه‌ چی بچێنی ئه‌وه‌ ئه‌دووریته‌وه‌ نه‌نه‌ گیان. به‌ڵام گرنگ ئه‌وه‌یه‌ ئاده‌میزاد له ژێر که‌وتنه‌کاندا نه‌پاڕێته‌وه‌ و له‌‌سه‌رکه‌وتنه‌کاندا ساده‌و به‌خشنده‌بێت. ڕاستیشیان ووتوه‌: کێو به‌ کێو ناگات ئاده‌میزاد به‌ ئاده‌میزاد ده‌گات. چاک و خراپ هه‌مووش به‌یه‌ک ده‌گه‌ین مرۆڤی ڕاسته‌قینه‌ی نا مادی پڕ له‌ سۆزو میهرو خۆشه‌ویستی ده‌یباته‌وه‌.!. تۆ ئه‌گه‌ر هه‌موو شتێکت نه‌وێ له‌ژیاندا دڵنیابه‌ وواتای وایه‌ هه‌موو شتێکت هه‌یه‌ و ده‌ووڵه‌مه‌ندی، به‌ڵام ئه‌گه‌ر ده‌ووڵه‌مه‌ند بیت و هه‌موو شتێکیشت بوێ وواتای وایه‌ تۆ هه‌ژاری.!. دنیای سه‌رده‌می نابووتی و هه‌وکردن و بۆگه‌ن کردنی ڕه‌ووشتی ( مۆڕاڵ ) مرۆڤه‌و شێوه‌ی قێزه‌وونی پیاوی خراپ و سپڵه‌ و له‌بیرخۆ چووه‌ وا له‌ئاده‌میزاد ده‌کات پێی خۆش بێت ئه‌مڕۆ لابه‌ن و دنیای دووێنێی بۆ بگه‌ڕێنیته‌وه‌و له‌ چاکه‌ کردنه‌کانی بۆ پشیله‌ و ئاده‌میزاده‌ سپڵه‌کان په‌شیمان بێت‌. سپڵه‌یی و بێ وه‌فایی که‌ له‌ گیانداری سه‌گیشدا نی یه‌ که‌ گیاندارێکی که‌م هه‌سته‌ له‌چاو مرۆڤدا ( له‌گه‌ڵ ڕێزم بۆ مرۆڤی ڕاسته‌قینه‌و ڕۆح پاک ) بێ وه‌فایی و خۆ له ‌بیرچوون له ‌ئێمه‌ی ئاده‌میزاددا هه‌یه‌ که‌ ژیرترین و جوانترین بوونه‌وه‌رین ‌.. بۆیه‌ نه‌نه‌  گیان نه‌تاریکی بوو به‌ سوپاس بۆ ڕووناکی و خۆ سووتانت، نه‌ سه‌رکرده‌و پێشمه‌رگه‌یه‌ک سه‌ری چه‌مانه‌وه‌ بۆ گه‌وره‌ییت، نه‌ ڕۆح له‌به‌رێک هاوڕێی زووقم و برسێتیت بوو.. که‌چی ئێستاش هه‌ر هاواری پێشمه‌رگه‌ته‌و دووعای ڕه‌حمه‌تیان بۆ ده‌که‌یی و ده‌ڵێی خوایه‌ گیان من هیچم ناوێت له‌ ته‌مه‌نی منیش بخه‌ره‌ سه‌ر ته‌مه‌نی ئه‌وان ته‌نها پێشمه‌رگه‌ سه‌رکه‌وێت به‌سه‌ر دووژمندا من به‌سمه‌، به‌ڵام ئه‌بێ بپرسی کام دووژمن.؟. ئێمه‌ خۆمان و هاوزمان و پیاو چاک و شۆڕشگێڕه‌کانمان بوونه‌ته‌ دووژمنمان. دووعای چی ده‌که‌ی نه‌نه‌ گیان هه‌مووی ترشاوه‌ به‌سه‌ر یه‌کدا پیاو خراپ و ناپاکی دووێنێ ئه‌مڕۆ به‌چه‌پڵه‌ ڕێزان پێشوازی لێ ده‌کرێ و شۆڕشگێڕو دڵسۆزیش له‌دوواوه‌ن و به‌جێی دێڵن.. تۆ هه‌موو ژیانی خۆت ته‌رخان کردوو دڵ و ڕۆحی خۆت سووتاند بۆ شۆڕش و پێشمه‌رگه‌.. ئه‌وانیش بۆ چرکه‌یه‌ک ژیان و به‌رژه‌وه‌ندی خۆیان ئاوڕیان له‌تۆی پیرو هه‌ژار نه‌دایه‌‌وه‌‌، که تۆ‌ دووێنێ وه‌ک ژنه‌ پێشمه‌رگه‌یه‌ک ده‌روونی ماندووی خۆت ده‌کرده‌ قوربانیی بۆ ژیان و سه‌ربه‌ستی ئه‌وان و بچووک و خزمه‌تکار بوویت له‌ به‌رپێیاندا. زوویر مه‌به‌ له پیاوانی‌ ووشک و بێ فه‌ڕو ناحاڵی که‌ شک نابه‌ن‌ هه‌ستێکی جوان یان وه‌فایه‌کی جوان بۆ تۆی شه‌که‌ت و نه‌حه‌ساوه‌. له‌ تۆ وایه‌ هه‌ستی مرۆیی و ناسکیی و دادپه‌روه‌ری لای هه‌موو ئاده‌میزادێک هه‌یه‌. من چاوو ده‌سته‌کانت ماچ ده‌که‌م نه‌نه‌ ئامه‌ گیان ئه‌زانم چه‌ند غه‌مباری، هێنده‌ی چاوو دڵی غوربه‌تیی یه‌ک عه‌وداڵی نیشتمانی، به‌ڵام تۆش دڵپاک بوویت و ساویلکه، توخوا لێم زویر مه‌به‌ که‌ وائه‌ڵێم .. توخوا لێم تاڵ مه‌به‌ که‌وات بۆ ئه‌نووسم.. بمبووره‌ نه‌نه‌ گیان که‌ تووڕه‌م. من له‌ سێبه‌ری باڵای درۆزنی و بێ وه‌فایی ئه‌وان چاوم گلی کردووه‌ ، دڵنیابه‌ ئه‌ی سومبولی دایکایه‌تی و خۆبه‌خشیی من له‌تۆ دڵ شکاوترم ‌بۆتۆ بۆ خۆت. بڕوا بکه‌ من هه‌رده‌م ناڕه‌حه‌تم بۆ پێخاووسان و بێ خه‌وان و برسییانی  ووڵاته‌که‌م ئینجا چۆن ناگریم بۆ به‌سه‌رچوونی ته‌مه‌نی بێ وواتایی تۆ، بۆ بێ وواتاکانی جارانی ده‌وری سفره‌ی چه‌ورت، که‌چی ئێستا سفره‌یه‌کی دڕاوی فڕێ دراو چه‌تری ماڵ و حاڵ و خێمه‌ی ژیانته‌.‌ ئه‌و سواڵکه‌ره‌ی نان و به‌رماوه‌ی خۆتت ده‌دایێ ده‌تشارده‌وه‌ له‌کایانی مه‌ڕو بزنه‌کانداو خه‌وی لێ ده‌زڕاندی و.. هتد. ئێستا ئه‌و سواڵکه‌ره‌ ده‌ورو زه‌مانی گۆڕین کردوویه‌ به‌ فیرعه‌ون و پاشای ئه‌مڕۆی گه‌ڕه‌که‌ برسی یه‌کانی شاره‌، نه‌که‌ی به‌به‌رقاپیاندا بڕۆی چونکه‌ ئه‌وان دووژمن دارن یه‌کسه‌ر په‌لامارو قاچت ده‌گرن دووایش چاوه‌کانت هه‌ڵده‌کۆڵن چونکه‌ سه‌یری کۆشکه‌کانیان ده‌که‌ی.. بیریان چوو هه‌ژارانی ووڵات داڵده‌و به‌خێویان کردن، ئه‌مڕۆ ده‌ڵێن هه‌ژارانی ووڵات چاوپیسن با سه‌یری کۆشک و ژن و ئۆتۆمبیلمان نه‌که‌ن. له‌ دڵ پیسی و هه‌ناو پیسی و هۆش پیسی خۆیان و ده‌وروبه‌ریان دیواری ماڵه‌کانیان هێنده‌ به‌رزه‌ به‌خۆیان نازانن کۆشکه‌کانیان له‌ خۆیان کردۆته‌ زیندان و به‌سه‌قه‌تی ژینی مرۆیی خۆیان ده‌به‌نه‌ سه‌ر تیایدا. ئه‌گه‌ر ئاده‌میزادی سه‌قه‌ت و گێل و چاوچنۆک به‌برسێتی گه‌وره‌ بوون هه‌رگیز تێر بوونیان نابێت ، بۆیه‌ سووڵتانه‌ برسی یه‌کان هه‌میشه‌ هه‌ڵپه‌یانه‌و هه‌ر پێ ڕاناگه‌ن. ئه‌م سوڵتان و ئاغا‌ ته‌زویرانه‌‌ی ئێمه‌ش نه‌ له‌کۆشک و نه‌له‌ ژن و نه‌له‌ پاره‌و نه‌ له‌ زه‌وی و له‌هیچ شتێک تێربوونیان نی یه‌ چونکه‌ به‌ که‌می و ڕه‌زیلی و پیسکه‌یی ژیاون بۆیه‌ ڕووبارێکی لیخنن له‌ بێ وه‌فایی و سپڵه‌یی بۆ نه‌ته‌وه‌یان و بۆتۆش نه‌نه‌ گیان. من دڵنیام هێزی ده‌روون و شه‌ره‌فت هێنده‌ به‌رزه برسیشت بێت داوای نانێ له‌و سووڵتانه‌ چاوچنۆکه‌ ناکه‌ی چونکه‌ زۆر بچووک ده‌یبینی و تاڵه‌ ڕووی گرژو عه‌بووسی ئه‌و‌ له‌لای تۆ، خۆتیش ده‌زانی به‌برسێتی و چاوچنۆکی گه‌وره‌ بووه‌ باوه‌ڕناکه‌ی له‌ دڵی بێت نانێک بدات به‌ هه‌ژارێک. نه‌نه‌ گیان بڕوات هه‌بێ ئه‌م ڕۆژگاره‌ش ده‌گوزه‌رێ و ده‌ڕوات تۆیه‌ک که‌به‌هۆی ئه‌مانه‌وه‌ خورابووی، تۆیه‌ک ماڵ و حاڵ بووبیت بۆیان، تۆیه‌ک که‌نان و ئاو بووی له‌ڕۆژانی مه‌رگ و برسێتیدا، تۆیه‌ک هه‌موو ژیان و ماڵ و که‌س و کارت له‌پێناوی ئه‌مان داناوه‌ .. ده‌بووایه‌ له‌ئاڵتوون و زێڕت بگرن بتکه‌نه‌ چیرۆکی شۆڕشگێڕی و سه‌رفرازی بۆ نه‌وه‌ی داهاتوو.. که‌چی له‌سایه‌ی ئه‌مانه‌وه‌ ماڵێک له‌ته‌نه‌که‌ بوو به‌ کۆشک و ته‌لارو هه‌ناسه‌یه‌کی سارد و گیانێکی برسی بوو به‌ ژیان و گوزه‌رانت. بڕوابکه‌ نه‌نه‌ ئامه‌ ئه‌ڵێی درۆیه‌و ئه‌فسانه‌یه‌ ئه‌م چیرۆکه‌ له‌ڕاستی و ویژدانی مرۆڤ ناچێت.!. ئه‌و برسی یه‌ی تۆ ئه‌تژیان ئه‌و ترسنۆکه‌ی تۆ ئه‌تشارده‌وه‌ ئه‌و گیرفان به‌تاڵه‌ی تۆ جگه‌ره‌ت بۆ ده‌کڕی .. ئێستا ئه‌وه‌ فیرعه‌ون و سوڵتانه‌ . هه‌تا تۆ خاوه‌نی مه‌ڕوماڵات و جێ و شوێنی خۆت بووی ئه‌مانه‌ کرێچی و له‌تێ نان و خێمه‌یه‌کیان نه‌بوو، ئێستا ماڵ و ژن و دۆلار له‌ ژماردن نایه‌ت، که‌چی که‌س نی یه‌ بڵێ ئه‌مه‌تان له‌کوێ بوو.؟. هه‌تا تۆ نان و ماڵت هه‌بوو که‌م که‌س خاوه‌نی ژورێک بوو ئێستا خۆت بێ ماڵ و بێ نان و بێ ژیانیت . ئه‌و سوڵتانه‌ی ئه‌مڕۆ که‌ دووێنێ سواڵکه‌ر بوو، له‌ قاپی تۆی ده‌دا بۆ نانێ که‌چی ئێستا به‌لاتا تێ ئه‌په‌ڕێ به‌قافڵه‌یه‌ک سه‌ربازو ئۆتۆمبیله‌وه‌ ( ئه‌ڵێی بووک ئه‌به‌ن بۆ مانگی هه‌نگوینی ) ناتناسێته‌وه‌ هه‌ر ئه‌ڵێی ئه‌ویش نه‌بووه‌ که‌ دیووته‌. مرۆڤی باش و به‌ ویژدان به‌م ڕووداوه‌ ده‌ڵێ ئه‌فسانه‌یه‌و نه‌نه‌ ئامه‌ پاڵه‌وانه‌که‌یه‌تی چونکه‌ هۆش و دڵی ئاده‌میزادی سروشتی سوڵتانێکی سواڵکه‌رو ڕه‌زیل و بێ وه‌فای قبووڵ نییه‌. دنیا هه‌روا بووه‌ نه‌نه‌ گیان له‌ ووڵاته‌ نه‌خوێنده‌وارو داماوه‌کانی دنیادا چه‌ند که‌سانێک ده‌خه‌ڵه‌تێن و ئاغایه‌ک پێ ده‌گا دوواییش هه‌ر خۆیان چه‌پڵه‌ی بۆ لێ ده‌ده‌ن‌ . ئه‌ی تۆ نه‌تزانی شه‌هیده‌کان بڕیاریان دا ئیدی ببن به‌ ژان و نه‌خۆشی بچنه‌ گه‌روی بێ ویژدانی ئه‌م ڕابردوو خراپ و له‌بیرچووانه‌ی که‌ هه‌رگیز باوه‌ڕناکه‌ن ئه‌مه‌ ژیان و ڕاستی بێت که‌ له‌ چ سه‌ڵته‌نه‌ت و به‌هه‌شتێکدان. خۆیان گووته‌نی له‌کاتی سه‌رخۆشی و مێز ڕازانه‌وه‌یاندا ده‌ڵێن: ( به‌خوا جوانه‌ پاشه‌ڵمان.. ئێمه‌ له‌ کوێ و ئه‌م ته‌نته‌نه‌و فه‌نتازی‌یه‌‌ له‌ کوێ، به‌خوا باوکم ئه‌ترسین خه‌به‌رمان بێته‌وه‌، هه‌ر ئه‌ڵێی خه‌وه‌..!! . هیچ پادشایه‌ک و گه‌وره‌یه‌ک ئاوا ناژی به‌و سه‌ڵته‌نه‌ته‌ی ئێمه‌وه‌ ) .

نه‌تزانیووه‌ نه‌نه‌ گیان..!. هه‌رچی کووڕی باو بۆران و ڕۆژانی سه‌ختی ئه‌وسا بوو ڕه‌ویان کرد بۆ مه‌نفاو سه‌ری خۆیان هه‌ڵگرت و شه‌رم گرتنی.. له‌ تاو ئه‌و هاوکێشه‌ سه‌قه‌ته‌ی کورده‌واری که‌ هه‌میشه‌ لاسه‌نگه‌.. که‌ بینیان هه‌زاران هه‌ژارانی ئه‌م گه‌له‌ خه‌بات و خوێنیاندا ئێستا بێ ماڵ و حاڵن به‌ڵام سه‌د مخابن سه‌رمایه‌داران و چاوچنۆک و بۆرجوازه‌کان خواردیان . ئه‌م ژیان و نیشتمان و سه‌رکردانه‌ی خۆشمان وه‌کو ئه‌و چیرۆکه‌ی ( باوه‌پیاره‌ ) وایه‌ که‌ باس له‌ باوکێک ده‌کات خۆی زۆر پۆشته‌و په‌رداخه‌، به‌ڵام منداڵه‌کانی ژنه‌که‌ی له‌برسا شه‌و خه‌ویان لێناکه‌وێ .

ئه‌و باوه‌پیاره‌یه‌ میرو ده‌سه‌ڵاتی نیشتمانی ئێمه‌یه‌ بۆیه‌ خه‌ڵکه‌که‌ی به‌جێی دێڵێ نه‌نه‌ گیان.

* نه‌نه‌ ئامه‌: ئافره‌تێکی پیری پاشماوه‌ی ئه‌نفاله‌و پاڵه‌وانی سه‌ر‌ماوسۆڵه‌ی چیرۆکێکی خۆمه‌و کاتی خۆی زۆر یارمه‌تی پێشمه‌رگه‌ی داوه‌، به‌ڵام ئێستا که‌م ده‌ست و هه‌ژاره‌ وه‌ک و هه‌زاران خه‌ڵکی کوردی ڕه‌ش و ڕووتی تر.

نووسینی: م . حه‌مید عه‌زیز

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.