Ö:: با هه‌موومان یه‌ک ده‌نگ بین به‌رامبه‌ر به‌ هه‌ره‌شه‌ی تورکیا بۆ سه‌ر خاکی کوردستان

عارف باوه‌جانی. سکرتێری گشتی پارتی سه‌ربه‌ستیی کوردستان

با هه‌موومان یه‌ک ده‌نگ بین به‌رامبه‌ر به‌ هه‌ره‌شه‌ی تورکیا بۆ سه‌ر خاکی کوردستان.
ماوه‌یه‌كه‌ حكومه‌تى توركیا به‌ ڕاشكاوانه‌ هه‌ڕه‌ِشه‌ى هێرشی سه‌ربازى ده‌كات بۆسه‌ر خاكى هه‌رێمى كوردستان و بۆئه‌و مه‌به‌سته‌ش برِوبیانوى جیاواز ده‌هێنێته‌وه،حکومه‌تی تورکیا له‌ لایه‌كه‌وه‌ باسى ئه‌وه‌ ده‌كات كه‌ ده‌توانێ به‌ ئه‌نجامدانى له‌شكركێشیه‌ك بۆسه‌ر خاكى هه‌رێمى كوردستان په‌كه‌كه‌ له‌ ناو به‌رێت، ئه‌وه‌ش له‌ كاتێكدایه‌ كه‌ توركیا له‌ خاكه‌كه‌ى ژێر ده‌سه‌ڵاتى خۆیدا نه‌یتوانیوه‌ ئه‌و كاره‌بكات و باش ده‌زانی ڕؤله‌کانی کوردستان له‌ باکور هه‌رگیز واز له‌ داخوازی مافه‌کانی خۆیان ناهێنن،که‌وابێت له‌ خاكێكى دیكه‌شدا هه‌رگیز ناتوانێ ئه‌و كاره‌سه‌ربخات ،له‌وه‌ش زیاتر به‌رپرسانى ئه‌نقه‌ره‌ باش ئاگادارن له‌وه‌ى كه‌ مه‌سه‌له‌ى كورد له‌ توركیا به‌ هێرشى سه‌ربازى چاره‌سه‌ر نابێت وپێویسته‌ چاره‌یه‌كى دیكه‌ى بۆبدۆزنه‌وه،‌ گومان له‌وه‌ دانیه‌ كه‌ بیانوو هێنانه‌وه‌ بۆهه‌بونى بنكه‌كانى په‌كه‌كه‌ له‌ باشورى كوردستان، مه‌به‌ستى دیكه‌ى له‌پشته‌وه‌یه‌و ئه‌وه‌ش ئه‌وه‌یه‌ كه‌ توركیا به‌ هه‌مو شێوه‌یه‌ك دژایه‌تى حكومه‌تى هه‌رێمى كوردستان ده‌كات وئه‌وه‌ش به‌ هه‌ره‌شه‌ بۆسه‌ر خۆى ده‌زانێ، توركه‌كان ده‌وڵه‌تى نه‌ته‌وه‌یى خۆیان له‌سه‌ر بناخه‌ى ره‌تكردنه‌وه‌ى كورد دامه‌زراندوه‌ و به‌ هیچ شێوه‌یه‌ك رازى نابن به‌ دروستبونى ده‌سه‌لاتێكى كوردى كه‌ یه‌ كێک له‌ سه‌ره‌تایی ترین مافه‌کانی کورده .‌

له‌ لایه‌كى دیكه‌شه‌وه‌ حكومه‌تى توركیا باسى پێشێلكردنى ماقى توركمانه‌كان ده‌كات و ئه‌وه‌ش له‌ كاتێكدایه‌ بۆخۆى له‌ كاتی ڕێژیمی پێشوی ئێراقدا به‌ هیچ شێوه‌یه‌ك باسى مه‌سه‌له‌ى كه‌ركوك و توركمانه‌كانى نه‌ده‌كرد،ئه‌مه‌ش ناكۆكیه‌كى گه‌وره‌یه‌ له‌ لایه‌كى دیكه‌وه‌ حكومه‌تى توركیا له‌ كاتێكدا باسى مه‌سه‌له‌ى كه‌ركوك ده‌كات كه‌ بۆخۆى به‌ خراپترین شێوه‌ زیاتر له 20 ملیۆن كورد ده‌چه‌وسێنێته‌‌وه‌و مافه‌كانیان پێشێل ده‌كات.

ده‌ستورى هه‌رێمى كوردستان به‌ شێوه‌یه‌كى فراوان مافى توركمانه‌كانى ره‌چاو كردوه‌ و رێگه‌شى نه‌داوه‌ هیچ ولاتێك ئه‌وه‌ بكاته‌  بیانویه‌ك بۆده‌ست وه‌ردان له‌ كاروبارى ناوخۆى کوردستان، توركیا هه‌رگیز ناتوانى هه‌بونى توركمانه‌كان بكاته‌ بیانویه‌ك بۆپه‌ره‌پێدانى سیاسه‌تى دژه‌ كورد و سێبه‌ریش بخاته‌ سه‌ر كوردستانى بونى كه‌ركوك.

كه‌ركوك خاكى كوردستانه‌و ئیدى ئه‌رۆژانه‌ تیپه‌ر بووه‌ كه‌ ولاتێكى ناوچه‌كه‌ بتوانێ به‌ شێوه‌یه‌كى ئازادانه‌ مافه‌كانى كورد پێشێل بكات و زوڵمى لێ بكات ،گومانیش له‌وه‌ دا نیه‌ كه‌ كه‌ هه‌رجۆره‌ ده‌ست وه‌ردانێکى سوپاى توركیا بۆسه‌ر خاكى كوردستان ته‌نیا نابێته‌‌ هۆى ناره‌زایى كورده‌كانى باشور، به‌ڵكوده‌بێته‌ هۆى ناره‌زایى كوردى پارچه‌كانى دیكه‌ى كوردستان و ده‌سكه‌وته‌كانى كورد له‌ باشورى كوردستان هیوایه‌كه‌ بۆهه‌مویان و وه‌كو ناوه‌ندێکى سیاسى چاوى لێده‌که‌ن.
 من له‌ ڕێگه‌ی ئه‌م نووسراوه‌دا داوکارام له‌ گشت پارت و لایه‌ن و ڕێکخراو که‌سانی نیشتمان په‌روه‌ر و ڕۆشنبیری کوردستانی : که‌ با له‌ کۆنفرانسێکی نه‌ته‌وه‌یی کوردستانی تایبه‌ت له‌سه‌ر هه‌ڕه‌شه‌ ناڕه‌واکانی وڵاتی تورکیا کۆبینه‌وه‌ و یه‌ک ده‌نگی و یه‌ک بوونی خۆمان به‌ رامبه‌ر به‌ دوژمنان بسه‌لمێنین، له‌ هه‌مان کات دا بانگێشه‌ی سه‌رجه‌م کورده‌کانی ده‌ره‌وه‌ی کوردستان بکه‌ین که‌ بۆ نیشان دانی ده‌نگی ناڕه‌زایی ڕێپێوانی ئارام له‌به‌ر ده‌رکی په‌رله‌مانی وڵاتانی ئوروپایی وئه‌مریکا وئوسترالیا وسه‌رجه‌م باڵۆێزه‌‌کانی ده‌وڵه‌تی تورکیا له‌و وڵاتانه‌ ڕێک بخه‌ین.

 یه‌ک ده‌نگی ویه‌کریزی ئێمه‌ به‌رامبه‌ر به‌ پلانی داگیرکه‌رانی کوردستان،زه‌نگێکی هوشیار کردنه‌وه‌یه‌ به‌ گۆی داگیرکه‌رانی ئیستا و ئاینده‌مان، بۆ ئه‌وه‌ی باش بزانن که‌ گه‌لی کورد  چی دیکه‌ ڕێگا به‌ داگیرکه‌ران نادات نیازی گڵاوی خۆیان به‌ دی بێنن.
من لێرده‌ا به‌و په‌ڕی شانازییه‌وه‌ ‌بۆ خۆم وه‌ک تاکێکی کوردستانی ئاماده‌ی خۆم ده‌رده‌بڕم که‌ بۆ هه‌ر چه‌شنه‌ جوڵانێکی ده‌وڵه‌تی تورکیا بۆ باشووری کوردستان،ئاماده‌م بچمه‌ ڕیزی پێشمه‌رگه‌کانی به‌رگری له‌ خاکی کوردستان و وه‌ک ئه‌رکێکی نیشتمانی به‌رگری له‌و به‌شه‌ ڕزگارکراوه‌ی کوردستان بکه‌م،
هه‌روه‌ها بانگێشه‌ی کورده‌ نیشتمان په‌روه‌ره‌کانی ڕۆژهه‌ڵاتی کوردستان ده‌که‌م له‌ ناوخۆی وڵات و ئه‌وانه‌ش که‌ دانیشتووی باشوری کوردستان و وڵاتانی ده‌ره‌وه‌ ن، وه‌ک ئه‌رکێکی نیشتمانی نه‌ته‌وه‌یی بۆ به‌رگری له‌ خاک ونیشتمانیان درێغی نه‌که‌ن.
پێویسته‌ ئێمه‌ هه‌موومان ئه‌وه‌ باش هه‌ڵسه‌نگێنین که‌ پشتگیری کردن له‌ خاکی کوردستان مانای پشتگیری کردن له‌ هیچ پارت و لایه‌نێکی تایبه‌تی کوردستانی نییه‌، با له‌م ڕۆژه‌ گرنگ وحه‌ساسه‌دا واز له‌ هیندێک گڵیی وگازنده‌ی نێۆ حیزبی وناوچه‌یی بێنین و به‌ یه‌ک ده‌ست  ویه‌ک ده‌نگ و به‌ وه‌زنێکی  قورس وقایم وڵامی دوژمن و داگیر که‌ر بده‌ینه‌وه‌.
خه‌ڵکی هه‌ر گه‌ل و نه‌ته‌وه‌یه‌ک پشتگیری له‌ خاک و زێدی خۆی نه‌کات ناتوانێ دڵسۆزی بۆ خاک و نه‌ته‌وه‌که‌ی بسه‌لمێنێ.
بژی یه‌کگرتووی ڕیزه‌کانی کوردستانیان،
عارف باوه‌جانی. سکرتێری گشتی پارتی سه‌ربه‌ستیی کوردستان.

 5 ی ڕێبه‌ندانی 2706 ی کوردی .

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.