Ö:: ئاوڕ دانه‌وه‌یه‌ک له‌ شانۆ نامه‌ی 87 خوێندکار

نووسینی: برایم جەهانگیری

ئاوڕ دانه‌وه‌یه‌ک له‌ شانۆ نامه‌ی 87 خوێندکار
ئەو رۆژانە دیسان
 کاک مستەفاوهاورێیانی لە کردەوەیەکی دیکەی هەلنەسەنگینراو و دوور لە مەنتیق دا شانۆ نامەیەکیان بلاو کردەوە لە ژێر ناوی" نامه‌ی‌ 87 خوێندكاری‌ كورد له‌ زانكۆكانی‌ ئێران بۆ سكرتێری‌ گشتیی‌ حیزبی‌ دێموكراتی‌ كوردستانی‌ ئێران " لەو نامە دا بەروونی دەردەکەوێ کە دووبارە هەوڵەکانی کاک مستەفاو هاورییانی هەر وەک پێشوو خەوش دار کردنی  هەلوێستی شۆرشگێرانەی حیزبی دێمۆکراتی کوردستان_ه کە لە بەرامبەر سەرەرۆیی و  پاوانخوازی بەشێک لە ڕێبه‌ری هەلبژیردراوی کۆنگرەی 13 دا راوەستان و دیکتاتۆری زۆربەیان وەک بیدعەتێکی تازە لە ناوخۆی حیزبدا قەبوول نەکرد.  ئەم هه‌وڵه‌ی کە تا ئێستا بەشی هەرە زۆری دەزگا راگەیەنەرە گشتییەکانی ئەو دۆستانەی سەرقال کردووە. دووبارە ئەو "چەند کەسەی چوون" بوونەتە لەمپەر لەبەر دەم تێکۆشانی ئەو هاورێیانە و هەموو فکرو زکریان بۆتە تەبلیغات لە دژی ئەو چەند کەسە؟! تۆ بلێی خه‌ڵکی کوردستان وردە وردە ئەو پرسیارە لە خۆشیان و لەو هاورێیانەش نەکەن کە ئەگەر بەراستی ئەو هاورێیانەی بە نێوی حیزبی دیمۆکراتی کوردستان کار دەکەن هەر چەند کەس کادرو پێشمەرگەن ئەدی ئەو هەموو پیلان و قسەو قسە لۆکانە بۆ چین؟ ئەو هاورێیانە ترسی چیان لێ نیشتووە کە بە شێوه‌ی زۆر ناعادیلانە و دوور لە ئینساف و داد خەریکن ئەوەی دەتوانایان دا هەیە لە بوختان و تۆمەت بۆ ئەو هاورێیانەی هەلیبەستن؟  شانۆ ساز دەکەن و دەوری هونەرپیشە کارامەکان دەگێرن تا بەڵکوو بتوانن قین و بوغزی چەند ساڵەیان بە تەواوی هەڵرێژن و هیچ کات  بیریان لەوە نەکردۆتەوە کە بە شێوه‌یەکی دوور لە خەیال راستییەکان لە بەر چاو بگرن، ولانی کەم ئاورێک لە کردەوەی خۆیان و بەرهەمەکانی ئەو شیوازو رەفتارە بدەنەوە کە دوای هەڵوێستی شۆرشگێرانەی حیزبی دێمۆکراتی کوردستان دەبەرامبەر ئەوان دا کردوویانە و بەرهەمەکەشیان هەڵگرتۆتەوە!

نامەی 87 خوێندکار کە بە ناوی ئەوانەوە نوسراوە بە بروای من هیچ پیوەندییەکی بە خوێندکارانەوە نییە و لە راستی دا لە لایەن یەکێک لە هاورێیانی بەریز کاک مستەفا هیجرییەوە نوسراوە و تەواوی نووسینەکەش بریتییە لە دیفاعی بێ ئەم لاو ئەو لا لە هەموو کردارێک و لە هەموو رەفتارێکی زۆرینەی رێبەری هەلبژێردراوی کۆنگرەی 13. ئەو دیفاعە نەتەنیا شیاوی بزووتنەوەیەکی خوێندکاری گشتگیر نییە به‌ڵکوو بە بروای من ناعەدالەتیەکی گەورەشە کە بە و نێوە پیرۆزە دیفاع لە رێبەرییەک بکرێ کە بە دلنیاییەوە لە ماوەی کورتی رێبەری کردنەکەی دا دوچاری هەڵەی گەورەی سیاسیی بووە و لە نامەی  بە ناو87 خوێندکار دا هیچ ئاماژەیەکی پێ نەکراوە. لەو نامەیە دا ئەوەی بە راشکاوی کوتراوە و دیفاعی لێکراوە لایەنی بەریز کاک مستەفا هیجرییە و بەس، ئەگەر چی لە جێگەیەکی نامەکە دا دەکوترێ کە " وێڕای‌ ئینتقاد‌و ره‌خنه‌ی‌ زۆر‌و به‌جێ‌ له‌ به‌ڕێزتان،" به‌ڵام باس لە وە ناکات لە کوێی و لە کام هەلوێستی کاک مستەفا رەخنە دەگری؟ دیارە لە بەشیکی دیکە دا دەلی کە"كۆمه‌ڵگای‌ خوێندكاری‌ وێڕای‌ ره‌خه‌‌و ئینتقادی‌ زۆر له‌ به‌ڕێزتان، ده‌ڵێت له‌ ماوه‌ی‌ (10) ساڵی‌ رابردوودا وه‌ك ئه‌ندامێكی‌ راستگۆو خاوه‌ن رابردوویه‌كی‌ خاوێن، نه‌تانتوانی‌ یان تێ‌نه‌كۆشان بۆ له‌ ناوبردنی‌ كێشه‌كانی‌ حیزب، تا ئه‌وه‌ی‌ كه‌ رۆحی‌ هاوكاری‌و پێكه‌وه‌ كاركردن له‌ ناو حیزب دا هێدی‌ هێدی‌ له‌ ناوچوو و حیزب تووشی ئه‌و قه‌یرانه‌ بوو". یەک رستەی تەواو ناتەبا و دژ بەیەک، ئەگەر وایە و ئەو رەخنەیە ئاراستەی بەرێز هیجری دەکرێ  کە لە ماوەی 10 سال دا نەی توانیوە یان نەی وێستووە کە کێشە و دووبەرەکییەکان لە ناو بەرێ چۆنە کە مەشروعیەتی کۆنگرەی 13 لە باری دیاری کردنی رێبەرایەتی حیزب ناچێتە خانەی گومانەوە؟ هەر ئەو کێشەیەی کە هاورێیان لە حیزبی دیمۆکراتی کوردستان دا دەگەل ده‌سه‌ڵاتی زیادە خواز و پاوانخوازی زۆرینەی رێبەری حیزب لەرابردوو دا هەی بووە!

نووسەر یان نووسەرانی ئەو شانۆ نامەیە لە پاش ئەم چەند رستەیە دێنە سەر پێ هەڵاگوتن و بە شانو باڵ هەڵدانی مەشروعیەتی کۆنگرەی 13 و خۆیان دەکەن بە نوێنەری تێکرای کۆمه‌ڵگای خوێندکاری و پشتیوانی خۆیان لە مەشرووعێەتی کۆنگرەی 13 رادەگەیەنن. راگەیاندنی ئەو پشتیوانییە لە لایەن هەر کەس و لە هەر حیزب و دەستەیەکی سیاسی خۆی لە خۆی دا هەقێکە کە هێچ مرۆڤیک ناتوانێ لەوی دیکەی زەبت بکات به‌ڵام ئەم راگەیاندنە بەم شێوه‌یە پرە لە ئێشکال، بە تایبەتی کە نووسەر یان نوسەرانی نامەکە لەسەرەتاوە وەک کەسانی بێ‌لایەن و کۆمه‌ڵگای خوێندکاری خۆ دەناسێنن و بە ریز کردنی چەند رستەی لێل و نامۆ بە ئەدەبیاتی و نووسینی کوردی دەلێن:

كۆمه‌ڵگای‌ خوێندكاری‌ (جامعه‌ دانشجویی) كورد بۆ رێزگرتن له‌ پرنسیپه‌ دێموكراسییه‌كان و بۆ سه‌قامگیركردن و هه‌روه‌ها بۆ فێربوون، فێركردنی‌ ئه‌زموونه‌ دێموكراسییه‌كان به‌ كۆمه‌ڵانی‌ خه‌ڵكی‌ كوردستان به‌ قه‌بووڵكردنی‌ شه‌رعییه‌تی‌ كونگره‌ی‌ (13)ی‌ حیزبی دێموكرات، وێڕای‌ ئینتقاد‌و ره‌خنه‌ی‌ زۆر‌و به‌جێ‌ له‌ به‌ڕێزتان، و به‌ پێی‌ باوه‌ڕی‌ قووڵی‌ كۆمه‌ڵگای‌ خوێندكاری‌ به‌ مانای‌ نێوه‌ڕۆكی‌ دێموكراسی، پشتیوانیی‌ خۆی بۆ حورمه‌ت‌و شه‌رعیه‌تی‌ كونگره‌ی‌ (13)ی‌ حیزبی‌ دێموكراتی كوردستاتی‌ ئێران راده‌گه‌یه‌نێت ‌و ئاماده‌یی‌ خۆمان بۆ یارمه‌تیی‌ فیكری‌‌و مه‌عنه‌وی‌ به‌ رێبه‌رایه‌تی‌ حیزب راده‌گه‌یه‌نین و داوا له‌ به‌ڕێزتان ده‌كه‌ین به‌ له‌به‌رچاوگرتنی‌ ئوسووڵه‌ دێموكراسییه‌كان، به‌ دڵێكی‌ ئاوه‌ڵاوه‌ ره‌خنه‌‌و ئێنتقاده‌كان‌و پێشنه‌هاده‌كانی‌ كۆمه‌ڵگای‌ خوێندكاری‌ بۆ هه‌رچی‌ باشتر به‌ڕێوه‌چوونی‌ كاره‌كانی‌ حیزب، كه‌ له‌م خاڵانه‌ی‌ خواره‌وه‌دا دێن له‌به‌رچاوی‌ بگرن.

یەکەم ئێمە هیچ رێکخراو یان تەشەکۆلێکمان بە نێوی کۆمەڵگای خوێندکاری نییەو ئەو نێوە وەک تەشەکول تەنیا بەو نامەیە هاتۆتە مەیدان، پێشتر هیچ کەس یان لانی کەم زۆربەی خەڵکانی هۆگری سیاسەت و رووداوەکانی ناوخۆی ولات و بزووتنەوەی خوێندکاری ناوی ئەو رێکخراوەیان نەبیستووە. جا ئەوە چۆنە کە پاش تێپەر بوونی نزیک بە3 ی مانگ لە لەت بوونی حیزب و ئەهوەن بوونەوەیەکی بە ئاستەمی کێشەکان، راست لەو کاتەدا 87 کەس لە کۆمەڵی خوێندکاری کوردستان وەبیر ئەو کێشەو ناکۆکیانە کەوتوونەوە و خەریکن باوەشینی ئەو پۆلووە دامرکاوانە دەکەن کە ماوەیەکە ژیلەمۆی بێدەنگی بەسەری دا کشاوە!؟ تۆ بلێی ئەو نامەیە هیچ هاودەنگیی و پیوەندییەکی بە وتووێژ و هەرەشە و گورەشەکانی کاک حەسەنی شەرەفی کەسی دووهەمی لایەنی کاک مستەفا هیجری_ یەوە نەبێ کە لە تازەترین دیمانە دا دەگەل ماڵپەری رێنیسانس  باسیان لێوە دەکات و دەیان درکێنێ؟!

لەو نامەیە دا و لە گرینگترین بەشی نامەکە دا نووسەر یان نووسەرانی نامەکە یەک شتی زۆر سەیرو سەمەرە بە نێوی کۆمه‌ڵگای خوێندکارییەوە دێننە بەر باس کە نەتەنیا هیچ پیوەندییەکی بە نوێخوازی و نوێ بوونەوە نییە به‌ڵکوو بەرەو دوا گەراندنەوەیەکی بە ئاشکرای رەوتی بەرەو پێش چوونی حیزبی دیمۆکراتیشی لێ بەدی دەکرێ، کە ئەوە خۆی نیشان دەدا ئەو نامەیە بە هیچ لەونێ فڕی بە سەر دیدو بۆچوونی خوێندکارە وشیارو چاوکراوەکانی خه‌ڵکی کوردستانەوە نییەو دەکرێ مرۆڤ گومانی ئەوە بکات کە بەرنامە دارێژەرانی یەکدەست کردنی حیزب ئەو شانۆنامەیان نووسیوە و چەند ئیمزاشیان لە بن داوە، هیچ دوور نییە ئەو کەسەی کە نامەکەشی بە ئەمانەتەوە گەیاندۆتە دەست بەرێز کاک مستەفاو هاورێیانی ئاگای لە مەسەلەکە نەبێ. بەبارێکی دیکە دا ئەگەر ئەوە روانگەو بۆچوونی خوێندکاری کوردی زانکۆکانی کوردستان و ئێران بێ دەبێ بلێن بەراستی کارەساتە، دووبارەی دەکەمەوە ئەو قسەیە بەو مانایە نییە سبەی یەکێ راست بێتەوە و بڵێ چوونکە دیفاعیان لە کاک مستەفا و هاورێیانی کردووە و کۆنگرەی 13 یان بە مەشرووع زانیوە بۆیە نووسەری ئەم بابەتە وا چووەتە ناو باسەکە و پێی دەلێ کارەسات! به‌ڵکوو بە پێچەوانە چۆن و چەندە هەق بەخۆم دەدەم کە لەو لەت بوون و هەلوێست وەرگرتنە من لایەنگری لە لایەنێک بکەم و بە هەقی خۆمی بزانم کە کام لا هەلبژیرم، هەر بەو پێیەش ئەو هەقە بۆ هەموو ئەو ئینسانانە قایلم کە دلسۆزانە وەدوای لایەنی  بەرامبەر کەوتوون و پێیان وایە کە مەشرووعیەتی کۆنگرەی 13 یان پێیە، به‌ڵام کارەساتەکە دەوە دایە کە ئەو نامەیە و ئەو بۆچوونە بە ناوی کۆمەلی خوێندکاری نوووسراوە و ئەوەش پێشنیاریانە بۆ پێشرەفتی ئەو هاوریێانەو بەرەو پێش چوونی کارو باری ئەوان : 

9. دیاری‌ كردنی‌ كه‌سانێكی‌ شیاو، وه‌ك نوێنه‌ری‌ سكرتێری‌ گشتی‌ بۆ كاروباری‌ لاوان و ژنان له‌ ناوخۆ‌و ده‌ره‌وه‌ی‌ وڵات بۆ راپه‌ڕاندنی‌ كاروباری‌ تایبه‌ت به‌ لاوان‌و ژنان بۆ زیاتر ئاشنا بوون له‌گه‌ڵ ویست‌و داخوازییه‌كانی‌ ژنان‌و لاوان‌و بۆ باس كردن‌و گه‌یاندنی‌ گیروگرفته‌كانی‌ ئه‌و كه‌سانه‌ به‌ سكرتێری‌ حیزب تا به‌ هاوكاریی‌ هه‌موو سعی‌ كه‌ین باشترین میكانیزم به‌كاربێنین بۆ كه‌م كردنه‌وه‌ی‌ گیروگرفته‌كانی‌ تایبه‌ت به‌و كه‌سانه‌.

ئەو رستانە سەرتابە پا ئاماژەیەکن بۆ دواکەوتوویی و پاشاگەردانیی و هەرچی زیاتر کردنی ده‌سه‌ڵاتی سکرتێر و پاوان کردنی لوتکەی ده‌سه‌ڵات لە دەورو بەری سکرتێردا! بە دڵنییاییەوە بەرنامە دارێژەرانی یەکدەست کردنی حیزب و لەت کردنی حیزب ئێستا کە مەیدانی بەرهەڵستکاری و هەڵوێست وەرگرتن لەبەرامبەر خۆیان دا خاڵی دەبینن خەریکی پیادە کردنی ئەو خەیاڵانەن کە لە مێژ ساڵە دەمێشکیان دا چەکەرەی داوە! بەربەرەکانی دەگەڵ ئەم بۆچوونە چەوت و دواکەوتوانە لە پێش هەموو کەس دا ئەرکی ئەو ئەندام و لایەنگرانەن کە بەریز کاک مستەفا و هاورێیانی بە مەشروع دەزانن و حیزبی دیمۆکراتی کوردستان بە نامەشروع! لە مێژووی 61 ساڵەی حیزب دا تا ئێستا لە هیچ قۆناخێک دا سکرتێر نوێنەری تایبەتی نەبووە! به‌ڵکوو هەموو کارو بارەکان هەر لە رێگای رێکخراوەکانی سەر بە حیزب بە شێوه‌ی گشتی بە ئەنجام گەیشتوون، خۆ ئەگەر دوور نەرۆین ئەوە یەکێک لەو تەبلیغاتە نارەوایانەیە کە ئەو دوستانە هەمیشە بۆ ئاوەژوو کردنەوەی راستییەکان لە دژێ ئێمە بەکاریان هێناوە و کوتوویانە کە ئێمە خەریکین پۆستێ سەرۆک دەحیزب دا زیندوو دەکەینەوە!  ئەگەرچی ئەو هاورێیانە لەمەو دوا چۆن و بە چ شێوەیەک حیزبایەتی دەکەن خۆیان دەزانن و رەنگە زۆر پێوەندی بە منەوە نەبێ به‌ڵام ئەوەی کە حیزبی دیمۆکراتی کوردستان هاواری دەهات کە پاوانخوازی خەرێکە برست لە تێکۆشانی حیزبێ دێمۆکرات دەستێنی وا دیارە نیشانەی راستی و درۆستی قسە و باسەکانی هەر لە ئێستاوە خەریکە وەدەر دەکەوێ.

بەشی ئاخری پێشنیارەکانی  شانۆنامەی87 خوێندکار بەو رستانەوە کۆتایی دێ، دیسان خولانەوە و خولانەوە و خولانەوە! هەمان ئەدەبیات و هەمان راوێژ و هەمان شێواز:

13 .ده‌عوه‌تی‌ شه‌رافه‌تمه‌ندانه‌ له‌و كادیر‌و پێشمه‌رگانه‌ كه‌ ده‌رچوون، تا بگه‌ڕێنه‌وه‌ بۆ نێو حیزب (ئه‌وانه‌ی‌ نه‌گڕێنه‌وه‌ كه‌ تووشی‌ بێ‌حورمه‌تی‌ یان سووكایه‌تی‌ ‌و به‌ حیزب و رێبه‌رایه‌تیی‌ گه‌لی‌ كورد بوون).

چەند کەس لە حیزب جوێ بوونەوە! چەند کەس چوون! چەند کەسێک لە کادرو پێشمەرگەکان رەوتێ دابرانیان گرتە پێش و....! ئای ئەو چەند کەسە دەردێکی چەند گرانن...!

تێبینی: رسته‌کانی نوسراوه‌ی 87 خوێندکار هه‌ر وه‌ک خۆی له‌ یه‌کێک له‌ مالپه‌ره‌کانی سه‌ر به‌ به‌رێز کاک مسته‌فا و هاورێیانی کۆپی کراوه‌ و داندراوه‌
 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.