Ö:: رامبۆد لوتفپوورى: ئێستا به‌ستێنی هزرى بۆلێک نزیکبوونه‌وه‌ی هێزه‌ کوردییه‌کان زۆر له‌بارتره‌(1-2)

سه‌رچاوه‌:خۆرهه‌لات نیوز

له‌ درێژه‌ى لێکدانه‌وه‌ى ته‌وه‌رى قه‌یرانى گوتارى هاوبه‌ش
له‌ناو پارته‌کانى رۆژهه‌ڵاتى کوردستاندا، ئه‌م پرسیارانه‌مان ئاراسته‌ى "سمایل بازیار" (ئه‌ندامى کومیته‌ى ناوه‌ندى حیزبى دیموکراتى کوردستان کرد، به‌ڵام ناوبراو دواتر ئاگادارى کردینه‌وه‌ که‌ وڵامى پرسیاره‌کان ناداته‌وه‌. بۆیه‌ ئه‌م پرسیارانه‌مان سپارد به‌ "رامبۆد لوتف پوورى"(نوێنه‌رى حیزبى ناوبراو له‌ سلێمانى) ئه‌مه‌ش ده‌قى وڵامه‌کانى ناوبراوه‌.

خۆرهه‌ڵات نیوز: هۆکارى ئه‌و لێکدابڕانانه‌ى پارته‌کانى رۆژهه‌ڵاتى کوردستان ده‌گه‌ڕێته‌وه‌ بۆ چى؟مه‌به‌ست له‌و لێک دوورکه‌وتنه‌وه‌یه‌، دابڕانى فیکرىو گوتارییه‌؟
وڵام: بێ گومان دابڕانی پارته‌کانی کوردستان شتێکی تازه‌ نییه‌،ئه‌گه‌ر چاو له‌ رابردووش بکه‌ی به‌ ده‌گمه‌ن قۆناغێکت بۆ ده‌سنیشان ده‌کرێ که‌ ئه‌م پارتانه‌ و به‌ تایبه‌ت دوو پارتی به‌ ته‌مه‌نتر، واته‌ حیزبی دێموکرات و کۆمه‌ڵه‌، هاوخه‌بات و هاو پرۆژه‌ بووبێتن. ته‌نانه‌ت سه‌رده‌مێک له‌ شه‌ڕی براکوژیشیان ئه‌زموون کردووه‌.که‌ وابوو دابڕان تا ئاستی شه‌ڕکردنیش له‌ نێو پارته‌کانی رۆژهه‌ڵاتی کوردستان دا دیارده‌یه‌کی تازه‌ نییه‌، به‌ڵام هۆکاره‌کانی دابڕان به‌ پێی قۆناغ جیاوازیان هه‌بووه‌. سه‌ره‌تا کێشه‌که‌ هزرى و ئایدۆلۆژیکی بوو، بۆ وێنه‌ دابڕان و ته‌نانه‌ت شه‌ڕی نێوان دێموکرات و کۆمه‌ڵه‌، تا راده‌یه‌کی زۆر سه‌رچاوه‌ی له‌ هزر و ئایدۆلۆژیا و بۆچوونی سیاسییه‌وه‌ ده‌گرت.

من حه‌ز ده‌که‌م بڕێک راشکاوانه‌ قسه‌ بکه‌م و ره‌خنه‌شم له‌ هه‌موو حیزبه‌کان و ته‌نانه‌ت حیزبه‌که‌ی خۆشم هه‌یه‌، بۆیه‌ هیوادارم دڵی که‌سم لێ خه‌وش دار نه‌بێ. ئه‌و کاته‌ لایه‌نێک به‌ هه‌ڵگرتنی ئاڵای خه‌باتی چینایه‌تی و پشتبه‌ستن به‌ ئایدۆلۆژیای مارکسیزم، ته‌نیا رێگای به‌خته‌وه‌ری له‌ له‌ گوتاری خۆی دا ده‌دیت و هێزه‌که‌ی دیکه‌ی که‌ خه‌باتی نه‌ته‌وه‌یی ـ دیمۆکراتیکی هه‌ڵبژاردبوو به‌ نۆکه‌ری بورژوازی و ئیمپریالیزمی جیهانی ده‌زانی. رووبه‌ڕوو بوونه‌وه‌ی ئه‌و دوو گوتاره‌، ره‌نگێکی ته‌واو هزری و سیاسی به‌ ململانێیه‌کان به‌خشیبوو. بۆیه‌ ده‌توانم بڵێم ئه‌گه‌ر هۆکاری دیکه‌ش له‌ ئارادا بووبێ، که‌وتبووه‌ په‌راِوێزی فاکته‌ری هزرییه‌وه‌. به‌ڵام ئێستا و له‌و قۆناغه‌ نوێیه‌ دا، هۆکاری هه‌ژمونیک هزر و گوتار نییه‌.

ئێستا به‌شێک له‌و هێزانه‌ش که‌ پێشتر دژ به‌ خه‌باتی نه‌ته‌وایه‌تی و دیمۆکراسیخوازی بوون، دروشمه‌کانیان گۆڕیوه‌ و وه‌ک هێزێکی نه‌ته‌وه‌یی هاتوونه‌ته‌ نێو بزاڤی کورده‌وه‌، هێندێک هێزی دیکه‌ش هاتوونه‌ته‌ نێو گوڕه‌پانه‌که‌وه‌ که‌ ئه‌وانیش هه‌ڵگری دروشمی نه‌ته‌وه‌یین و ره‌نگه‌ رادیکاڵتر له‌ حیزبی دیمۆکراتیش بن. که‌ وابوو ئێستا به‌ستێنی هزرى بۆ لێک نزیکبوونه‌وه‌ی هێزه‌ کوردییه‌کان زۆر له‌بارتره‌ له‌ هه‌ر سه‌رده‌مێکی دیکه‌. به‌ڵام ئه‌وه‌ی که‌ ئێستا بۆته‌ هۆکاری لێکدابڕان و دوور که‌وتنه‌وه‌ی ئه‌و پارتانه‌ له‌ یه‌کتر، هه‌ژمۆن خوازی، پاوانخوازی، خۆبه‌زلزانی و ناڕاست بوونی ئه‌م هێزانه‌یه‌ به‌رامبه‌ر به‌ یه‌کتر.

به‌ تایبه‌ت حیزبه‌ به‌ ته‌مه‌نه‌کان که‌ پێیان وایه‌ کوردستان موڵکی تۆمار کراویانه‌ و ئه‌وانیش تاقه‌ ده‌مڕاستی نه‌ته‌وه‌ی کوردن له‌ رۆژهه‌ڵاتی کوردستاندا، ده‌سته‌واژه‌کانی حیزبی پێشه‌نگ و نوێنه‌ری راسته‌قینه‌ی خه‌باتی.... هه‌موو له‌و مه‌زنخوازییه‌وه‌ سه‌رچاوه‌ ده‌گرن. ئه‌من خۆم پێشتر و به‌ پێی کاری حیزبیم، ئه‌و ده‌سته‌واژانه‌م به‌کار هێناوه‌ به‌ڵام نه‌ ئه‌و ده‌م و نه‌ ئێستاش بڕوام پێی نه‌بووه‌ و نییه‌. ره‌نگه‌ له‌و قۆناغه‌ دا که‌ پێشتر باسم کرد، دوو حیزبی دیمۆکرات و کۆمه‌ڵه‌ نوێنه‌رایه‌تی دوو شێوه‌ خه‌باتی نه‌ته‌وه‌یی و چینایه‌تییان کردبێ به‌ڵام له‌ قۆناغی ئێستا دا به‌ کار هێنانی ئه‌و ده‌سته‌واژانه‌ به‌ هیچ شێوه‌یه‌ک له‌ جێی خۆیاندا نین.

خۆرهه‌ڵات نیوز: پێتان وانیه‌ که‌ ئێوه‌ له‌ گوتارێکى شۆڕشگێڕانه‌ى موحافیزه‌ کاره‌وه‌ گه‌ڕاونه‌ته‌وه‌ بۆ گۆتارێکى ته‌واو موحافیزه‌ کارانه‌؟
وڵام: پرسیارێکی جوانه‌. به‌ڵام من وای لێده‌که‌م: له‌ گوتارێکی شۆرشگێرانه‌وه‌ گه‌ڕاوینه‌ته‌وه‌ بۆ گوتارێکی کۆنسێرڤاتی (موحافیزه‌کارانه‌) به‌ رواڵه‌ت شۆرشگێڕانه‌. تا ئه‌و ده‌م که‌ له‌ شاخ بووین و خه‌باتی چه‌کداری له‌ گۆرێدابوو، گوتار و ئاکاری ئێمه‌ به‌ ته‌واوی شۆڕشگێڕانه‌ بوو، ته‌نانه‌ت ئه‌گه‌ر باس له‌ ئاشتی و دیالۆگیش ده‌کرا، به‌ پاراستنی بنه‌ماکانی شۆڕش و راست له‌ پێناو سه‌رکه‌وتنی شۆرش دا بوو. به‌ڵام دواتر که‌ تووشی ژیانی ئوردوگایی بوین به‌ره‌ به‌ره‌ له‌ بنه‌ماکانی شۆڕش و گوتاری شۆڕشگێڕانه‌ دوور که‌وتینه‌وه‌ و به‌ره‌و کۆنسێرڤاتیزم چووین، له‌ شۆڕشگێڕیی پراکتیکه‌وه‌ تووشی شۆرشگێڕیی نووسراوه‌یی بوین. واته‌ ته‌نیا له‌ رۆژنامه‌ و وتاره‌کاندا، جاربار باسی شۆڕش و بنه‌ماکانی ده‌کرا که‌ ئه‌ویش له‌ به‌ر چه‌ند هۆیه‌ک که‌ باسی ده‌که‌م به‌ره‌ به‌ره‌ که‌مڕه‌نگ بۆته‌وه‌.

نیشته‌جێ بوون و ئوردوگا نشینی بۆ حیزبێکی شۆڕشگێڕ وه‌ک قه‌فه‌س بۆ پڵینگ وایه‌، تووشی سستی و ژیانی رۆژانه‌ى ده‌کات. ئه‌م بارودۆخه‌ زۆربه‌ی پارته‌کانی رۆژهه‌ڵاتی کوردستانی گرتۆته‌وه‌. له‌م بارودۆخه‌ دا حیزب بۆ پاراستنی خۆی و به‌ڕێوه‌ بردنی ژیانی رۆژانه‌ی شۆڕشگێڕه‌کانی، ده‌بێ به‌ پێکهاته‌یه‌کی وه‌ک ده‌وڵه‌ت و حکومه‌تی که‌مپه‌کانی به‌ ده‌سته‌وه‌ ده‌گرێ به‌ شێوه‌یه‌ک که‌ ژووری سکرتاریا ده‌بێته‌ کۆشکی سه‌رکۆماری و به‌رپرسه‌ حیزبییه‌کان ده‌بن به‌ ئه‌نجومه‌نی وه‌زیرانی که‌مپه‌کانیان و ئۆرگانه‌کان رۆڵی وه‌زاره‌تخانه‌ له‌و کۆمه‌ڵگا حیزبییه‌ دا ده‌گێڕن، پێشمه‌رگه‌ و شۆڕشگێڕه‌کانی تریش ده‌بن به‌ فه‌رمانبه‌رى ئه‌و وه‌زاره‌تانه‌. به‌رپرسانی حیزب پێیان وایه‌ ده‌بێ هه‌موو هێزه‌ شۆڕشگێڕه‌کان له‌و که‌مپانه‌ دا کۆ بکه‌نه‌وه‌ بۆ رۆژێک که‌ ده‌رفه‌تی له‌ باریان بۆ هه‌ڵکه‌وێ که‌ ئه‌و ده‌سه‌ڵاته‌ بچووکه‌ بکه‌ن به‌ ده‌سه‌ڵاتێکی گه‌وره‌تر. ئه‌م بارودۆخه‌ کۆمه‌ڵێک نه‌خۆشی و ده‌ره‌نجامی نیگه‌تیڤی لێده‌که‌وێته‌وه‌ که‌ هۆکاری کۆنسێرڤاتیزه‌ بوونی حیزبن.

له‌م قۆناغه‌ دا به‌ره‌ به‌ره‌ شه‌ڕی پارتیزانی، ئه‌ده‌بیاتی شۆرَشگێڕانه‌، ژیانی ساده‌ی شۆڕشگێڕی، دیسیپلینی نیزامی، و ویستی به‌ کۆمه‌ڵ، جێگای خۆیان ده‌ده‌ن به‌ به‌رگرییه‌کى په‌رچه‌کردارانه‌ له‌ به‌رامبه‌ر تیرۆر، ئه‌ده‌بیاتی کۆنه‌ پارێزانه‌، ژیانی ره‌نگاو ره‌نگ و پڕ چاوه‌ڕوانی شار، بوروکراسییه‌کی بۆش و بێ بنه‌ما و ویستی تاکه‌که‌سی. لێره‌ دا چه‌ندایاتی جێگای چۆنایه‌تی ده‌گرێته‌وه‌ له‌ کاتێکدا که‌ رێکخراوه‌یه‌کی شۆڕشگێڕ، که‌ هه‌وڵی گۆڕانی قووڵ و پێکهاته‌ شکێن ده‌دات، پێویستی به‌ هێزی په‌روه‌رده‌کراوی به‌ که‌یفییه‌ت هه‌یه‌ و ته‌نیا فاکته‌ری به‌ هێزی له‌ به‌رامبه‌ر داگیرکه‌ر دا باوه‌ڕمه‌ندی و که‌یفییه‌تی هێزه‌کانێتی. به‌رپرسانی حیزبی به‌ بردنه‌ سه‌ره‌وه‌ی رێژه‌ی نه‌فه‌رات و گرینگی دان به‌ چه‌ندایه‌تی ده‌که‌ونه‌ هه‌وڵێکی نه‌زۆک و بێ ئاکامه‌وه‌ بۆ راگرتنی باڵانسی چه‌ندایه‌تیی هێزه‌کانیان له‌ گه‌ڵ دوژمن دا. ئه‌مه‌ش له‌ خۆیدا حیزب به‌ره‌و سانتڕالیسم و گه‌شه‌ی بروکراسی و قه‌ڵه‌وی ده‌بات که‌ توانایی جموجووڵی که‌م ده‌کاته‌وه‌ و له‌ بیر و کرده‌وه‌ دا تووشی سستی ده‌کات.

له‌ هه‌لومه‌رجێکی ئه‌وتۆ دا که‌ پارت بۆ نیشان دانی هێزی خۆی و به‌ ده‌ست هێنانی ره‌وایی له‌ هه‌وڵی قه‌ڵه‌و کردنه‌وه‌ی خۆی و بردنه‌سه‌ره‌وه‌ی چه‌ندایه‌تییه‌که‌ی دایه‌ رێگا له‌ هه‌ر چه‌شنه‌ ره‌خنه‌ و دروست بوونی بیرێکی جیاواز ده‌گرێ، چونکه‌ پێی وایه‌ له‌ ره‌واییه‌که‌ی که‌م ده‌کاته‌وه‌ و ده‌بێته‌ کۆسپ بۆ بردنه‌ سه‌ره‌وه‌ی چه‌ندایه‌تی.

بۆ ئه‌و مه‌به‌سته‌ حیزب و رێبه‌رانی پیرۆز ده‌کرێن که‌ که‌س رێگای ره‌خنه‌ لێ گرتنیان به‌ خۆی نه‌دات. حیزب له‌ دۆخی ئامراز بوون دێته‌ ده‌رێ و ده‌بێ به‌ ئامانج واته‌ حیزبایه‌تی ده‌که‌وێته‌ سه‌رووی نه‌ته‌وایه‌تییه‌وه‌. هه‌موو کێشه‌ و نه‌خۆشییه‌کانی حیزب له‌ ژێر دروشمی رووکه‌ش دا ده‌شاردرێنه‌وه‌ و به‌ ده‌ستی ده‌ره‌کییه‌وه‌ ده‌به‌سرێنه‌وه‌، بۆیه‌ هه‌ر که‌س یا لایه‌نێکیش بیهه‌وێ په‌رده‌ له‌ سه‌ر ئه‌و نه‌خۆشیانه‌ لابدات و ره‌خنه‌یان لێ بگرێت، به‌ نفوزی و پیاوی دوژمن تاوانبار ده‌کرێت و ده‌بێ له‌ نێو ببردرێ.

ئه‌م دژایه‌تییه‌ نێو خۆییه‌ ورده‌ ورده‌ جێگای خه‌بات بۆ نه‌ته‌وه‌ و گۆڕینی باری ئارایی کۆمه‌ڵگا ده‌گرێته‌وه‌ و به‌رپرسانی حیزبی له‌ هه‌ندێک بۆنه دا نه‌بێ که‌ باس له‌ دوژمن و کۆمه‌ڵگای کوردستان بکه‌ن، ته‌نیا خۆیان خه‌ریکی ئه‌و کۆمه‌ڵگا چووکه‌ حیزبییه‌ ده‌که‌ن که‌ ده‌سه‌ڵاتدارییه‌که‌یان به‌ ده‌سته‌وه‌ گرتووه‌.هه‌ست کردن به‌ به‌رپرسیارێتی به‌رامبه‌ر به‌ پاراستن و دابین کردنی تاکه‌کان و هاورێکیی ئه‌و که‌مپانه‌ و که‌ڵکه‌ڵه‌ی دابین کردنی ژیانی رۆژانه‌، حیزب تووشی واقیع گه‌راییه‌کی موحافیزه‌کارانه‌ ده‌کات که‌ ئارمانج خوازیی شۆڕشگێڕانه‌ ده‌سڕێته‌وه‌ و وه‌ک هه‌ستێکی که‌م بایه‌خی هه‌ڵنه‌سه‌نگێندراو له‌ قه‌ڵه‌می ده‌دات و هه‌ر چه‌شنه‌ هێز و بیرۆکه‌یه‌کی گۆڕانخواز له‌ نێو حیزبدا به‌ تێکده‌ری باری ئارایی حیزب و هاوڕێکیی کۆمه‌ڵگا ده‌زانێ و سه‌رکوتی ده‌کا.

بۆ بردنه‌ سه‌ره‌وه‌ی چه‌ندایه‌تی و پاراستنی ئه‌و حکوومه‌ته‌ پووشاڵییه‌، حیزب له‌ هه‌ر چه‌شنه‌ ریسک و کرده‌وه‌یه‌کی هێرشبه‌رانه‌ خۆ ده‌بوێرێ. شه‌ڕ له‌ سه‌ر کورسییه‌کانی ئه‌و حکوومه‌ته‌ ده‌بێته‌ که‌ڵکه‌ڵه‌ی هزری به‌رپرسه‌کان و ده‌بنه‌ شه‌یدای ئه‌و مانۆڕه‌ نیزامی و ته‌شکیلاتییانه‌ی که‌ جاروبار له‌ بۆنه‌یه‌کی حیزبی دا به‌ڕێوه‌ ده‌چێ. سکرتێر کاتێک که‌ به‌ به‌رده‌م 200 یا 300 پێشمه‌رگه‌ دا ده‌ڕوا و رێزی لێ ده‌گرن، خۆی وه‌ک سه‌رکۆمارێک دێته‌ به‌ر چاو که‌ 10 ملیۆن کوردی له‌ به‌رده‌مدا راوه‌ستاون. ئه‌مه‌ ئه‌و نه‌خۆشییه‌ کوشنده‌یه‌ که‌ رێبه‌رانی ئێمه‌ى تووشی وه‌همێکی ده‌روونی کردووه‌ و نایانهه‌وێ به‌ ریسک و کرده‌وه‌ی رادیکاڵ ئه‌و ده‌سه‌ڵاته‌ وه‌همییه‌یان بکه‌وێته‌ مه‌ترسییه‌وه‌.

خۆویستی جێگای خۆبه‌خشی ده‌گرێته‌وه‌، بۆ نموونه‌ ده‌ڵێم له‌ حیزبی دێموکراتی کوردستانی ئێران دا پێش کۆنگره‌ی سێزده‌، سکرتێری ئه‌و کاتی حیزب پێشنیار ده‌کات که‌ ئه‌ندامانی کۆمیته‌ی ناوه‌ندى به‌ نۆره‌ بچنه‌وه‌ ناوخۆی کوردستانی رۆژهه‌ڵات بۆ چالاکی. ئه‌مه‌ له‌ خۆیدا پێشنیارێکی شۆڕشگێڕانه‌ بوو. به‌ڵام ئه‌ندامانی کۆمیته‌ی ناوه‌ندی ره‌دیان کرده‌وه‌ و ته‌نانه‌ت یه‌کێک له‌ ئه‌ندامانی کۆمیته‌ی ناوه‌ندی که‌ ماوه‌یه‌ک پاش کۆنگره‌ی سێزده‌ بوو به‌ ئه‌ندامی ده‌فته‌ری سیاسی، له‌ وڵامدا ده‌ڵێ: "مامۆستا ده‌تهه‌وێ به‌ کوشتنمان ده‌ی".

ئه‌مه‌ ئه‌و نه‌خۆشییه‌یه‌ که‌ باسم کرد. ئه‌و که‌سه‌ی که‌ ساڵه‌ها له‌ گه‌رمه‌ی شه‌ڕێکی خه‌ستی چه‌کداریدا بووه‌ و له‌ مه‌رگ نه‌ترساوه‌، ئێستا ژیانی ئاسووده‌ی که‌مپه‌کانی کۆیه‌ و سه‌یاره‌ی علوج و ده‌سه‌ڵات، وا به‌ ژیانییه‌وه‌ ده‌نووسێنێ که‌ ئه‌و ئامانج و پاڵنه‌ره‌ی راکێشی شۆڕش و خه‌باتی کرد له‌ بیر ده‌چێته‌وه‌ و نایهه‌وێ ریسک بکا.

یه‌کێکی دیکه‌ له‌ نیشانه‌کانی کۆنسێرڤاتیزه‌ بوونی حیزبێکی شۆڕشگێڕ ئه‌وه‌یه‌ که‌ له‌ به‌ها ره‌سه‌نه‌کانی خۆی دوور ده‌که‌وێته‌وه‌ و پشت له‌ هێزی گۆڕانخواز و سه‌ره‌کیی شۆڕش ده‌کات و له‌ جیاتی ئه‌وان پشت به‌ دوژمن و هێزی ناشۆڕشگێڕ ده‌به‌ستێ. بۆ نموونه‌ پشت به‌ هێزێکی مه‌زنخوازی ئێرانی ده‌به‌ستێ که‌ له‌ جێدا کورد به‌ نه‌ته‌وه‌ نازانێ یا له‌گه‌ڵ هێزێکی تورک دۆستایه‌تی ده‌کات که‌ چاوی ته‌مای بڕیوه‌ته‌ خاکه‌که‌ی و نه‌ک هه‌ر پشتیان پێ ده‌به‌ستێ و دۆستایه‌تییان له‌ گه‌ڵ ده‌کات، به‌ڵکوو به‌ که‌یفی ئه‌وانیش ده‌ڵێ و بڕیار ده‌دات. که‌چی له‌ولاوه‌ پشت له‌و هێزانه‌ ده‌کات که‌ هاو خه‌می ئه‌ون و ئامانجی ئه‌وانیش له‌ شۆڕش هه‌ر ئه‌و شته‌یه‌ که‌ ئه‌و ئامانجیه‌تی. ئه‌وه‌ش راست له‌ به‌ر ئه‌وه‌یه‌ که‌ هه‌وڵدان بۆ گۆڕانکاری جێگای خۆی داوه‌ به‌ هه‌وڵدان بۆ ده‌سه‌ڵات واته‌ ئه‌و حیزبه‌، زیاتر له‌وه‌ی که‌ له‌ خه‌می سه‌رکه‌وتن به‌ سه‌ر نه‌یار و هه‌ڤڕکه‌ هزرییه‌که‌یدایه‌، له‌ خه‌می وه‌لانان و له‌ نێو بردنی ئه‌و هێزانه‌دایه‌ که‌ وه‌ک خۆى بیر ده‌که‌نه‌وه‌. یانی له‌ ئاڵته‌رناتیڤ ده‌ترسێ. زۆر جاریش بۆ وه‌لانان و ناکاریگه‌ر کردنی ئه‌و هێزانه‌، هانا بۆ هێندێک شێواز و کۆمه‌ڵێک هزری دژه‌بیر ده‌بات که‌ له‌ بنه‌ماکانی خۆی دووری ده‌خه‌نه‌وه‌ و بێ نێوه‌رۆکی ده‌که‌ن. بۆیه‌ من ئه‌و قسه‌یه‌تان پشتراست ده‌که‌مه‌وه‌ که‌ حیزبه‌کانی کوردستانی رۆژهه‌ڵات به‌ره‌و کۆنسێرڤاتیزم رۆیشتوون.

خۆرهه‌ڵات نیوز: بۆچى ئه‌و په‌لامارانه‌ى که‌ کۆمارى ئیسلامى رۆژانه‌ ده‌یانکاته‌سه‌ر خه‌ڵکى رۆژهه‌ڵاتى کوردستان، تا ئێستا ئه‌و گرنگایه‌تییه‌یان له‌ لایه‌ن پارته‌کانه‌وه‌ پێ نه‌دراوه‌، به‌و مانایه‌ ئه‌مه‌ بۆچى نه‌بۆته‌ هانده‌رێک بۆ لێک نزیک بوونه‌وه‌ى پارته‌کان له‌ رووى گوتارییه‌وه‌؟
وڵام: حیزبه‌کانی ئێمه‌ له‌ خه‌ڵک دوور که‌وتوونه‌ته‌وه‌. ئه‌وانه‌ ئه‌و حیزبانه‌ نین که‌ له‌ شه‌سته‌کاندا(هه‌تاوی) له‌ نێو دڵی کوردستان و له‌ جه‌نگه‌ی رووداوه‌کان دا بوون. ته‌نیا له‌ دووره‌وه‌ رووداوه‌کان ده‌بیسن، که‌ وابوو به‌ راده‌ی پێویست هه‌ست به‌ قووڵی و به‌ربڵاوی رووداوه‌کان و گۆڕانکارییه‌کان ناکه‌ن. که‌مپ نشینی و پیر بوونی شۆڕش، حیزبه‌کانی ئێمه‌ی تووشی نه‌خۆشی ئاسایی بوونه‌وه‌ کردووه‌. واته‌ په‌لاماره‌کانی کۆماری ئیسلامی بۆ سه‌ر خه‌ڵکی کورد و رووداوه‌کانی کوردستانیان زۆر به‌ لاوه‌ گرینگ نییه‌ و هه‌ست ناکه‌ن خه‌ڵکی کورد و بۆخۆشیان له‌ دۆخێکی نائاسایی دا ده‌ژین. زۆر ئه‌م قسه‌یه‌م بیستووه‌ که‌ شۆڕش به‌ په‌له‌ ناکرێ. ره‌نگه‌ هێندێک جار بۆ گاڵته‌ بیڵێن، به‌ڵام ئه‌مه‌ لایه‌نی سایکۆلۆژی هه‌یه‌ و له‌ کرده‌وه‌یاندا ره‌نگی داوه‌ته‌وه‌. به‌ پێچه‌وانه‌ی ئه‌و قسه‌یه‌، شۆڕش گۆڕانکارییه‌کی خێرایه‌ بۆیه‌ ده‌بێ په‌له‌ی تێدا بکرێ. شه‌ست ساڵه‌ له‌ شۆڕشداین که‌چی نه‌ک هه‌ر سه‌ر نه‌که‌وتووین به‌ڵکوو وه‌ک پێشتریش باسم کرد، له‌ بنه‌ما سه‌ره‌کییه‌کانی شۆڕش دوور که‌وتووینه‌ته‌وه‌. ئه‌و کولتوور و میکانیزمه‌ی دوژمنانمان بۆ سه‌رکوتی خه‌ڵک به‌ کاری دێنن، ئێستا بۆته‌ کولتوور و میکانیزمی حیزبه‌کانی ئێمه‌ش بۆ سه‌رکوتی جیا بیرانی ناو خۆیان. ئێستا پێشمه‌رگه‌ بۆ پێشمه‌رگایه‌تی و شۆڕش په‌روه‌رده‌ ناکرێ، به‌ڵکوو بۆ داره‌ده‌ستی و چه‌قۆ کێشی رایدێنن.

حیزبه‌کانی ئێمه‌ ئه‌وه‌نده‌ی خه‌ریکى خۆخۆری و شه‌ڕی ده‌سه‌ڵاتن له‌ نێو خۆیان و ئه‌وه‌نده‌ی له‌ نێوان یه‌کتر دا حاشا له‌ یه‌ک ده‌که‌ن، نیوه‌ی ئه‌وه‌ش بیر له‌ کوردستان ناکه‌نه‌وه‌. راپه‌ڕینێک له‌ کوردستان ده‌ست پێ ده‌کات. له‌ مهاباده‌وه‌ ورده‌ورده‌ شاره‌کانی دیکه‌ش ده‌گرێته‌وه‌ و پتر له‌ مانگێک ده‌خایه‌نێ، حیزبه‌کانی ئێمه‌ که‌ له‌وپه‌ڕی بێ پرۆژه‌ییدا به‌ سه‌ر رووداوێکی ئه‌وتۆ دا ده‌که‌ون، تا ماوه‌یه‌ک هه‌ر حه‌په‌سابوون و هیچ هه‌ڵوێستێکیان نه‌بوو. که‌ هه‌ڵوێستیشیان گرت هه‌وڵیان دا راپه‌ڕینه‌که‌ دامرکێنن. یه‌ک مانگ بوو خه‌ڵک هاتبووه‌ ده‌نگ و شه‌هیدی ده‌دا که‌چی حیزبه‌کانی ئێمه‌ کێشه‌ى ئه‌وه‌یان بوو که‌ ئه‌م راپه‌ڕینه‌ به‌ بۆنه‌ى شه‌هید بوونى شوانه‌ى سه‌ید قادره‌وه‌ بوو یا ساڵرۆژى شه‌هیدبوونى دکتۆر قاسملو. گرینگ ئه‌وه‌یه‌ خه‌ڵک راپه‌ڕیون، به‌ڵام گرینگ بۆ حیزبه‌کانى ئێمه‌ ئه‌و هه‌ڤرکییه‌ ناپیرۆزه‌ى نێوانیانه‌، خه‌ڵک به‌ شێوه‌یه‌کى خۆڕسک کردوویه‌تى که‌ چى ئه‌مان که‌ یه‌ک هه‌نگاویشیان بۆ هه‌ڵنه‌گرتووه‌، هه‌وڵده‌ده‌ن بیکه‌ن به‌ هى خۆیان.

نموونه‌ی زۆرن، به‌ڵام ئه‌من ته‌نیا ئاماژه‌ به‌ نموونه‌یه‌کی دیکه‌ ده‌که‌م، زستانی پار خه‌ڵکى ماکۆ له‌ ساڵیادی رفاندنی ئۆجه‌لان و ده‌ستگیر کردنی له‌ لایه‌ن تیرۆریستیه‌ مرۆڤ رفێنه‌کانی تورکیاوه‌ هاتنه‌ سه‌ر شه‌قام و راپه‌رینێکیان ساز کرد که‌ ورده‌ ورده‌ خه‌ریک بوو، شاره‌کانی دیکه‌شی ده‌گرته‌وه‌، ئه‌و راپه‌ڕینه‌ به‌ ته‌واوه‌تی نه‌ته‌ویی بوو ومه‌به‌ستێکی نه‌ته‌وه‌یی له‌ پشته‌وه‌ بوو که‌ ئه‌ویش پرۆتێستۆ کردنی ئه‌و کرده‌وه‌ نامرۆڤانه‌یی ده‌وڵه‌تی تورکیا و داکۆکی له‌ عه‌بدوڵڵا ئۆجه‌لان بوو . که‌چی له‌ راگه‌یاندراوی کۆمیسیۆنی رێکخستنی حیزبی دیمۆکراتی کوردستانی ئێران به‌و بۆنه‌وه‌ هاتووه‌ که‌ ئه‌و راپه‌ڕێنه‌ له‌ سه‌ر کێشه‌ی سوته‌مه‌نی بووه‌، ئه‌مه‌ ئه‌و په‌ڕى سووکایه‌تى بوو به‌و خه‌ڵکه‌ى هاتنه‌ سه‌ر شه‌قام و شه‌هیده‌کانى ئه‌و راپه‌ڕینه‌، له‌ جێدا سووکایه‌تى بوو به‌و ئامانجانه‌ى که‌ حیزبى دیموکراتى له‌ رۆژى یه‌که‌مه‌وه‌ بۆ دامه‌زرا.

ئه‌مه‌شیان بۆیه‌ والێکرد که‌ دان به‌وه‌دا نه‌نێن که‌ ئه‌و خه‌ڵکه‌ بۆ پشتگیرى له‌ ئۆجالان هاتوونه‌ته‌ سه‌ر شه‌قام، ده‌ڵێن ئێمه‌ له‌ سیاسه‌تماندا نیه‌ "pjak وpkk" زه‌ق بکه‌ینه‌وه‌، ئه‌مه‌ هه‌ر ئه‌و شته‌یه‌ که‌ پێشتریش باسمان کرد بۆ سڕینه‌وه‌ى یه‌کتر ته‌نانه‌ت ئاماده‌ن ئاو به‌ ئاشى دوژمن و سووکایه‌تى به‌ نه‌ته‌وه‌که‌شیان بکه‌ن . بۆیه‌ نه‌ک هه‌ر خه‌باتی خه‌ڵکی کورد و په‌لاماره‌کانی رژێمی ئێران نه‌بۆته‌ هانده‌رێک بۆ نزیک بوونه‌وه‌یان له‌ یه‌کتر له‌ باری گوتارییه‌وه‌، به‌ڵکوو له‌ پێناو نه‌هێشتن ه‌و حاشاکردن له‌ یه‌کتر گۆتارێکی ژه‌هراوییان هه‌ڵگرتووه‌ که‌ ته‌نیا له‌ به‌رژه‌وه‌ندی نه‌یارانی کوردایه‌.

خۆرهه‌ڵات نیوز: ئێمه‌ ده‌بینین خه‌ڵکى رۆژهه‌ڵاتى کوردستان رۆژبه‌رۆژ لێک نزیکتر ده‌بنه‌وه‌، به‌و مانایه‌ هه‌نگاو بۆ پێکهێنانى گوتارێکى هاوبه‌ش یا با بڵێین بۆ زاڵتر کردنى گوتارێکى "ناسیوناڵ ـ لیبراڵ" هه‌ڵده‌گرن، به‌ڵام به‌ پێچه‌وانه‌وه‌ پارته‌کان له‌و رووه‌وه‌ رۆژ به‌ رۆژ لێک دوور ده‌وکه‌ونه‌وه‌، لێره‌دا پرسیار ئه‌وه‌یه‌که‌ ئه‌و چالاکییانه‌ى پارته‌ کوردییه‌کان له‌ چ پێناوێک دایه‌؟
وڵام: دیسان ده‌ڵێمه‌وه‌ حیزبه‌کانی ئێمه‌ وه‌ک ئه‌سحابی که‌هفیان لێ هاتووه‌، له‌ خه‌ڵکی کورد و له‌ گوتاری تازه‌یان دورن، هه‌ر سه‌رقاڵی رابردوون و به‌ پێوه‌ری ئه‌و کات مامه‌ڵه‌ له‌ گه‌ڵ ئیستا دا ده‌که‌ن، هێشتاله‌ ده‌وری کۆمه‌ڵێک بۆچوونی سواو و ئایدۆلۆژیای پاسیڤ کۆبوونه‌ته‌وه‌ و به‌وانه‌ کۆمه‌ڵگای ئیستای کوردستان شرۆڤه‌ ده‌که‌ن و به‌ عه‌قلی شاخه‌وه‌ خه‌باتی شار هه‌ڵده‌سه‌نگێنن. گوتاری زاڵ به‌ سه‌ر کۆمه‌ڵگای ئێمه‌ گۆڕاوه‌، به‌ پێچه‌وانه‌ی پێشوو که‌ گوتارێکی سوسیالیستی و مارکسی زاڵ بوو، ئیستا گۆتاری خه‌ڵک نه‌ته‌وه‌ی ـ دیمۆکراتیه‌.

من ئه‌و ته‌عبیره‌ی ئێوه‌ش که‌ ده‌ڵه‌ی ناسیۆنال ـ لیبراڵه‌ به‌ راست ده‌زانم به‌ڵام پێویسته‌ روون بکرێته‌وه‌. تێگه‌یشتنی به‌شێکی زۆر له‌ خه‌ڵکی ئێمه‌ له‌ ناسیۆنالیزم و لیبرالیزم هه‌ڵه‌یه‌. ناسیۆنالێزمی مۆدێرن به‌ پێچه‌وانه‌ی ناسیۆنالیزمی کلاسیک که‌ له‌ سه‌ر بنه‌مای سروشتی و میژوو و کولتوور دامه‌زرا، له‌ سه‌ر بنه‌مای ئیراده‌ و ویستی ئازاد داده‌مه‌زرێ . ویستی هاووبه‌شی تاکه‌کانه‌ که‌ نه‌ته‌وه‌یه‌ک پێک دێنێ، نه‌ته‌وه‌ پێکهاته‌یه‌کی عه‌قلانییه‌ که‌ له‌ ئاکامی ماف و ویستی ئازاد و دڵخوازی کۆمه‌لێک تاک و به‌ رێککه‌وتنێکی کۆمه‌ڵایه‌تی درۆست ده‌بێت .رێنان ده‌ڵێ " بوونی نه‌ته‌وه‌ ده‌نگدانی رۆژانه‌ی گشتییه‌ " واته‌ نه‌ته‌وه‌ نه‌ ئه‌زه‌لی و نه‌ ئه‌به‌دی، به‌ڵکوو ئۆرگانیزمێکه‌ که‌ تاکه‌کان تێیدا خۆیان پێناسه‌ ده‌که‌ن ، شوناسی خۆیان هه‌ڵده‌بژێرن و و چوارچێوه‌یه‌ک بۆ پاراستنی خۆیان بنیاد ده‌نێن .

که‌وابوو لێره‌دا ویستی تاک پارێزراوه‌، لیبرالیزمیش به‌ماناى ده‌روه‌ست نه‌بوون له‌ به‌رامبه‌ر پێکهاته‌ کۆمه‌ڵایه‌تییه‌کاندا نیه‌، واته‌ دژه‌ کۆمه‌ڵ نیه‌، به‌ڵکوو فه‌لسه‌فه‌ى لیبرالیزم جه‌خت له‌ سه‌ر ئازادى و به‌رپرسیاره‌تى تاک له‌ چوارچێوه‌ى یاسا و کۆمه‌ڵگادا ده‌کات واته‌ به‌رژه‌وه‌ندى تاکه‌ سه‌ربه‌ست و به‌رپرسیاره‌کان گرێده‌دات به‌ به‌رژه‌وه‌ندى گشتییه‌وه‌. بۆیه‌ به‌راستى له‌م سه‌رده‌مه‌دا پێویسته‌ ناسیۆنالیزم له‌ روانگه‌ى لیبرالیزمه‌وه‌ بخوێندرێته‌وه‌، وه‌ک خوێندنه‌وه‌ى که‌سانێکى وه‌ک "جان ئیستوارت میل"و "ئایزایا بێرلین"، ده‌نا ناسیۆنالیزمى کلاسیک که‌ سه‌روه‌رى به‌نه‌ته‌وه‌یه‌ک ده‌دات و حوکمى ده‌خاته‌ ده‌ست و له‌ سه‌ر کۆمه‌ڵێک بنه‌ماى نه‌گۆڕى سروشتى و کولتوورى داده‌مه‌زرێ، سیستمگه‌لێکى وه‌ک به‌عس یان ده‌سه‌ڵاته‌ شۆڤێنه‌کانى ئێران و تورکیا به‌رهه‌م دێنێ که‌ له‌ سه‌ر بنه‌ماى سه‌رده‌ستى نه‌ته‌وه‌یه‌ک و ژێرده‌ستى و سڕینه‌وه‌ى ئه‌وانى دى داده‌نرێت، له‌کاتێکدا که‌ گیانى نه‌ته‌وه‌ له‌ ناسیۆنالیزمى مۆدێڕندا ویستى ئازادى تاکه‌کانه‌ بۆ پێکه‌وه‌ بوون. بۆیه‌ منیش پێموایه‌ گوتارى رووناکبیریى خه‌ڵکى کورد ئێستا به‌ره‌و گوتارێکى "ناسیونال ـ لیبرال" رۆیشتووه‌.

له‌ کاتێکدا حیزبه‌کان تازه‌ بۆ سیستمه‌ کۆن و ئیکسپایه‌ره‌کان گه‌ڕاونه‌ته‌وه‌، خه‌ڵک داواى ئۆتۆریته‌ى عه‌قڵانى و دیمۆکراتیک ده‌کات که‌ چى ئه‌وان کاریزمایان بۆ دروست ده‌که‌ن، خه‌ڵک بۆ شرۆڤه‌ىجیهان، کۆمه‌ڵگا و پێکهاته‌ و پێوه‌ندییه‌ کۆمه‌ڵایه‌تییه‌کان مێتۆدى عه‌قڵانییه‌تى ره‌خنه‌گرانه‌یان هه‌ڵبژاردووه‌ که‌چى ئه‌وان باس له‌ هێڵى سوورو پیرۆزه‌کان ده‌که‌ن، خه‌ڵک له‌ ئێستادا ده‌ژى و رووى له‌ داهاتوویه‌ که‌ چى ئه‌وان له‌ رابردوودا ماونه‌ته‌وه‌، خه‌ڵک داواى به‌شدارى و دابه‌شکردنى ده‌سه‌ڵات ده‌که‌ن که‌چى ئه‌وان پاوانخوازى و سانترالیزم پێڕه‌و ده‌که‌ن، خه‌ڵک فره‌چه‌شنى و پلۆرالیزمیان ده‌وێ که‌ چى حیزبه‌کان کار بۆ پێکهاته‌ى یه‌کده‌ست و ده‌سه‌ڵاتى مۆنۆپۆل ده‌که‌ن. بۆیه‌ رۆژبه‌رۆژ لێک دوور ده‌که‌ونه‌وه‌. چالاکییه‌کانیان له‌ پێناو پاراستنى ئه‌و ده‌سه‌ڵاته‌ وه‌همییه‌ى که‌مپه‌کانیان و سڕینه‌وه‌ى یه‌کتر و نه‌هێشتنى هه‌ڤرک و ئاڵته‌رناڵتیڤه‌کانیاندایه‌. به‌ ئێستایه‌کى ئیفلیجه‌وه‌ خه‌ون به‌ کورسییه‌کانى داهاتوویانه‌وه‌ ده‌بینن. بێ پرۆژه‌ و پاسیڤن، به‌جێگه‌ى پێگه‌یاندنى نه‌ته‌وه‌که‌یان و به‌هێزکردنى بزاڤه‌که‌یان، بۆ گه‌یشتن به‌ ئامانج و هێنانه‌دى دروشمه‌کانیان په‌نا بۆ دوژمنه‌ جه‌وهه‌رییه‌کانیان ده‌به‌ن و له‌ ده‌رکه‌ى پان ئێرانیست و سه‌ڵته‌نه‌ت خوازه‌کان ده‌ده‌ن. ده‌یمین، به‌جێگه‌ى ئه‌وه‌یکه‌ پشت به‌ سه‌رچاوه‌ى هێزى خه‌ڵکه‌که‌یان ببه‌ستن، چاویان له‌ لێزمه ‌بارانێکى ره‌حمه‌ته‌!! که‌ له‌ ئاسمانى ده‌سه‌ڵاته‌ گه‌وره‌کانى دنیاوه‌ به‌سه‌ریاندا ببارێ.

هێشتا نه‌یانتوانییوه‌ هه‌ڵگرى گوتارێکى نه‌ته‌وه‌یى رێک وپێک بن و به‌شه‌رمه‌وه‌ باس له‌ مافه‌کانى کورد ده‌که‌ن نه‌کا دڵى برا فارسه‌کانیان لێ بێشێت.هێشتا له‌ نێوان دوو شوناسى کوردستانى بوون و ئێرانى بووندا گیریان کردووه‌و خۆیان بۆ یه‌کلایى ناکرێته‌وه‌. بۆیه‌ ده‌توانم بڵێم بارته‌قاى چالاکییه‌کانیان له‌ هه‌ندێک هه‌ڵوێستى په‌رچه‌کردارانه‌ى جاروبارو لاوازو چاوه‌ڕوانییه‌کى کوشنده‌ تێپه‌ڕ نابێت.

خۆرهه‌ڵات نیوز: نه‌بوونى دیسکۆرسى هاوبه‌ش له‌ نێوان پارته‌کاندا، به‌پێى ئه‌و لێک نزیک بوونه‌وه‌ى خه‌ڵک که‌ له‌ سه‌ره‌وه‌ ئاماژه‌مان پێ دا، ئه‌وه‌مان پێده‌سه‌لمێنێت که‌ له‌ کۆمه‌ڵگاى ئێمه‌، خه‌ڵک له‌ پارته‌کان پێشکه‌وتووترن، واته‌ به‌ پێچه‌وانه‌ى وڵاتانى دى له‌ کۆمه‌ڵگاى ئێمه‌دا پارته‌کان پاشکه‌وتوون و ئه‌مه‌ش دژ به‌و به‌ها مۆدێڕنانه‌یه‌ که‌ ئه‌وڕۆ باڵى به‌سه‌ر کۆمه‌ڵگادا شۆڕ کردۆته‌وه‌، ئایا ئه‌مه‌ تراژیدیایه‌کى سیاسى نییه‌ بۆ به‌ره‌و قه‌یران بردنى دۆزى کورد؟
وڵام: به‌ڵێ وایه‌. به‌ داخه‌وه‌ حیزبه‌کانى ئێمه‌ له‌ خه‌ڵکه‌که‌یان وه‌دواکه‌وتوون، به‌ڵام ئه‌گه‌ر مه‌به‌ستیان ئه‌وه‌یه‌ که‌ ئه‌م حیزبانه‌ یا خود حیزبێکیان ده‌بوو پێشه‌نگى خه‌ڵک بووباین با بڵێم وه‌ک پێشتریش ئاماژه‌م کرد من له‌ جێدا بڕوام به‌ حیزبى پێشه‌نگ نیه‌. ئه‌و چه‌مکه‌ یه‌که‌م جار له‌لایه‌ن لێنینه‌وه‌ هاته‌ ئاراوه‌ و ته‌نیا بۆ ڕه‌وایى به‌خشین و پاساو هێنانه‌وه‌ بۆ حیزبى کۆمۆنیست بوو که‌ له‌لایه‌ن که‌سانێکى وه‌ک پۆلخانۆفه‌وه‌ که‌وتبووه‌ به‌ر ره‌خنه‌.

ئه‌وان ده‌یانگوت هوشیاریى چینایه‌تى کۆمه‌ڵگاى ئێمه‌ هێشتا نه‌گه‌یشتۆته‌ ئه‌و قۆناغه‌ى که‌ شۆڕشى پرۆلیتاریایى تێدا بکرێت. ئه‌م بۆچوونه‌ که‌ بڕواى به‌ گوران و پێگه‌یشتنى سروشتى کۆمه‌ڵگابوو به‌ قوتابخانه‌ى خۆرسکى (spontaneity school) ناسرا بوو. لێنین له‌ به‌رامبه‌ر ئه‌مانه‌دا رۆڵێکى پێشه‌نگى به‌ حیزبى کۆمۆنیست ده‌دا که‌ کرێکارو وه‌رزێڕه‌کان بۆ شۆڕش په‌روه‌رده‌ ده‌کات و پێویست ناکات که‌ چاوه‌ڕوانى شۆڕشى بورژه‌وازى بکرێت و ئینجا بوار بۆ شۆڕشى پرۆلیتاریایى خۆش ببێ، واته‌ پرۆلیتاریایه‌کى چووکه‌ى هوشیار ده‌توانێ پێشه‌نگایه‌تى هه‌موو چینى کرێکار بکات و پێش ئه‌وه‌یکه‌ سه‌رمایه‌دارى به‌ قۆناغى گوڕان و پێگه‌یشتوویى بگات، شۆڕشى پرۆلیتاریایى بکات. بۆیه‌ پێشه‌نگ بوونى حیزب به‌ته‌واوه‌تى چه‌مکێکى مارکسیست ـ لێنینیستییه‌. به‌ڵام حیزب له‌ پێناسه‌ى خۆیدا و له‌ هه‌موو روانگه‌کانى دیکه‌وه‌ شتێکى دیکه‌یه‌. چ له‌ روانگه‌ى نۆرمییه‌وه‌و چ له‌ روانگه‌ى ته‌وسیفیه‌وه‌ حیزب پێناسه‌یه‌کى دیکه‌ى هه‌یه‌.

به‌ کورتى حیزب ده‌بێ له‌گه‌ڵ خه‌ڵکدابێ، واته‌ حیزبه‌کان زمانحاڵى نۆرم، به‌ها، بڕوا، ئارمانج و ئه‌وله‌وییه‌ته‌کانى خه‌ڵکن که‌ له‌ چوارچێوه‌ى رێباز و پرۆگرام و سیاسه‌ته‌کانیاندا ده‌یانگونجێنن، حیزبه‌کان پردێکن له‌ نێوان خه‌ڵک و ده‌سه‌ڵاتدا که‌ خواسته‌ جۆربه‌جۆره‌کانى خه‌ڵک یه‌کده‌خه‌ن و به‌شداریى جه‌ماوه‌رى ده‌که‌ن به‌ به‌شدارییه‌کى رێکخراو وئامانجدار. بوونى حیزبه‌کان پێش به‌ دێسپۆتیزمى ژاکۆ بۆنى و دێسپۆتیزمى تاکه‌که‌سى ده‌گرێت، به‌ڵام ده‌بینى حیزبه‌کانى ئێمه‌ له‌ گه‌ڵ خه‌ڵکدا نین، ئارمانج و ئه‌وله‌وییه‌ته‌کانى خه‌ڵکى ئێمه‌ گۆڕاون، که‌چى حیزبه‌کانى ئێمه‌ هه‌ر له‌جێى خۆیاندان و بگره‌ پاشه‌کشه‌شیان کردووه‌، پێشتر ئاماژه‌م به‌ نموونه‌کانى دا بۆیه‌ چیتر باسیان ناکه‌مه‌وه‌. دیسکۆرسى هاه‌به‌شیان نیه‌ له‌به‌ر ئه‌وه‌یکه‌ هه‌موو خۆیان به‌ حیزبى پێشه‌نگ و سه‌ره‌کى و جه‌ماوه‌رى ده‌زانن.
خۆ ئه‌گه‌ر پێشه‌نگ بوونیشمان قبووڵ بێت ئه‌وه‌ پێویستى به‌ په‌روه‌رده‌ هه‌یه‌.
لینین باس له‌ په‌روه‌رده‌ى شۆڕشگێڕ
ٍانه‌ و بژارده‌یه‌کى هوشیار ده‌کات که‌ خه‌ڵک تێده‌گه‌ینن، په‌روه‌رده‌یه‌ک که‌ له‌ لاى حیزبه‌کانى ئێمه‌ زۆر لاوازو سه‌ره‌تاییه‌. په‌روه‌رده‌ى کۆمه‌ڵگاى ئێمه‌ زۆر پێشکه‌وتووتره‌ له‌و په‌روه‌رده‌یه‌ى فێرگه‌کانى حیزبه‌کانمان، باس له‌ بژارده‌یه‌کى هوشیار ده‌کات که‌ ده‌که‌وێته‌ پێش خه‌ڵک و له‌ماف و ئازادییه‌کانیان تێیان ده‌گه‌یه‌نێت، ده‌ى تۆ چاو له‌و بژارده‌یه‌ بکه‌ له‌ حیزبه‌کانى ئێمه‌ دان و رێبه‌رى خه‌ڵک ده‌که‌ن، کاره‌ساته‌، براده‌ر باس له‌ مافى نه‌ته‌وایه‌تى خه‌ڵکه‌که‌ى ده‌کات که‌ چى هێشتابۆ خۆى جیاوازى قه‌وم و نه‌ته‌وه‌ نازانێ، باس له‌ خه‌باتى دیموکراتیک ده‌کات له‌ کاتێکدا ده‌ڵًێ هیچ بۆچوونێکى جیاواز به‌ فه‌رمى ناناسم، باس له‌ سوسیالیزم و مافى کرێکاران و شۆڕشى پرۆلیتاریایى ده‌کات که‌ چى ئاوڕێک له‌ کۆمه‌ڵگاکه‌ى ناداته‌وه‌ که‌ یه‌ک له‌ سه‌دیشى کرێکار تێدا نیه‌ و...به‌داخه‌وه‌ ئاستى تێگه‌یشتنى ئه‌م بژاردانه‌!! زۆر له‌ ئاستى هوشیارى خه‌ڵک نزمتره‌. پێکهێنانى حیزبى جه‌ماوه‌رى به‌ بێ په‌روه‌رده‌ کاره‌ساتى لێده‌که‌وێته‌وه‌، واته‌ به‌ بێ په‌روه‌رده‌ له‌ سه‌ر به‌ستێنى کۆمه‌ڵێک جیاوازیى خێڵه‌کى، ئایینزایى و ناوچه‌یى حیزبێکى جه‌ماوه‌رى دروست ده‌بێ که‌ دواتر ده‌بێته‌ گۆڕه‌پانى ململانێیه‌کى خێڵه‌کى و ناوچه‌یى.

حیزبه‌کانى ئێمه‌ ئێستا وان. باس له‌ خه‌باتى نه‌ته‌وایه‌تى و ته‌نانه‌ت چینایه‌تیش ده‌که‌ن له‌ کاتێکدا ئه‌گه‌ر چاو له‌ ململانێیه‌ نێوخۆییه‌کانیان ده‌که‌ى به‌شێکى خێڵه‌کى و ناوچه‌ییه‌، ململانێى هه‌ورامى و سۆرانى و کورمانجى یا ململانێى باکوورى و ناوه‌ندى و باشوورى. ئه‌مه‌یه‌ ئه‌و کاره‌ساته‌ى به‌سه‌ماندا هاتووه‌و به‌ڕووى خۆماندا ناهێنین. حیزب ده‌بێ نوێنگه‌ى ویست و پێویستییه‌کانى کۆمه‌ڵگاى سه‌رده‌م بێت نه‌وه‌ک حیزبه‌کانى ئێمه‌ که‌ هه‌ر له‌ شه‌سته‌کان(هه‌تاوى) و وه‌همه‌ ئایدۆلۆژییه‌کانى خۆیاندا ده‌ژین. بۆیه‌ ئه‌مه‌ تراژدیایه‌که‌ دۆزى کوردى به‌ره‌و قه‌یران بردووه‌.
خۆرهه‌ڵات نیوز: ئه‌تۆ بۆ خۆت له‌ حیزبێکى کوردستانیداى که‌ چى وه‌ک که‌سێکى ده‌ره‌وه‌ى حیزب قسه‌ده‌که‌ى، پێت وانییه‌ بۆ خۆت به‌شێک له‌و کێشانه‌ى، چۆن وڵامى ئه‌م پارادۆکسه‌ ده‌ده‌یته‌وه‌؟
وڵام: راسته‌ من له‌ حیزبى دیموکراتى کوردستاندام، به‌ڵام بابه‌کورتى بۆتان روون بکه‌مه‌وه‌ که‌ یه‌که‌م: من وه‌ک خۆم قسه‌ده‌که‌م نه‌وه‌ک حیزب. دووهه‌م: ئه‌من له‌گه‌ڵ کۆمه‌ڵێکى دیکه‌ له‌ ئه‌ندامانى حیزبى دیموکراتى کوردستانى ئێران که‌ هه‌ستمان به‌و کێشانه‌ کردبوو به‌مه‌به‌ستى ریفۆرم و چاره‌سه‌رکردنى ئه‌و گرفتانه‌ بونیادى ره‌وتێکى هزریمان له‌ حیزبدا دانا به‌ناوى "ره‌وتى ریفۆرم"، ئێمه‌ هه‌موو هه‌وڵ و تێکۆشانى خۆمان خسته‌ گه‌ڕ بۆ ئه‌وه‌ى چاره‌سه‌رییه‌ک بۆ هه‌موو ئه‌و گرفته‌ هزرى و پێکهاته‌ییانه‌ى بدۆزینه‌وه‌ که‌ پێشتر ئاماژه‌م پێکردن، هه‌وڵمان ئه‌وه‌ بوو که‌ حیزب نوێ ببێته‌وه‌و له‌شێرپه‌نجه‌ى ئوردوگانشینى و ململانێى ده‌سه‌ڵات و خێڵگه‌رایى وناوچه‌گه‌رى رزگار بێت، به‌ڵام به‌داخه‌وه‌ ئه‌و بژارده‌ هوشیاره‌ى!!! رێبه‌رى ئه‌و حیزبه‌ى به‌ده‌سته‌وه‌ بوو، خووى به‌تاریکى گرتبوو و له‌ رووناکایى ده‌ترسا، بۆیه‌ نه‌ک هه‌ر رێگه‌ى پێ نه‌داین و هاریکارى نه‌ده‌کردین، به‌ڵکوو به‌گیانێکى بژارده‌ کوژییه‌وه‌ که‌وتنه‌ دژایه‌تیمان و رێگایان لێ گرتین، چى له‌و عه‌قڵییه‌ته‌ى ده‌که‌ى که‌ رۆشنفکر به‌ رۆشنکفر ناوده‌بات، ئه‌مه‌ راست ته‌عبیرێکه‌ یه‌کێک له‌ بژارده‌کانى!! رێبه‌رى حیزب به‌کارى هێنا بوو.

بۆیه‌ ئه‌و کات سه‌ره‌ڕاى هه‌موو هه‌وڵ و ماندووبوونمان ده‌ستکه‌وته‌کانمان زۆر که‌م بوون. به‌ڵام ئێستا و له‌ دواى له‌تبوونى ئه‌و حیزبه‌، که‌ ئه‌و له‌تبوونه‌ش راست ده‌گه‌ڕێته‌وه‌ بۆ ئه‌و هۆکارانه‌ى باسم کردن، به‌شى هه‌ره‌زۆرى ره‌وتى ریفۆرم له‌ گه‌ڵ حیزبى دیموکراتى کوردستان که‌وتین، بۆیه‌ ده‌ڵێم به‌شى هه‌ره‌زۆر چونکه‌ دوو سێ که‌سێکمان بڕیارى وازهێنان له‌ حیزبیان دا که‌ به‌خۆشییه‌وه‌ هه‌ر پێوه‌ندیى هزریمان له‌گه‌ڵیان هه‌یه‌ و به‌رده‌وام ئاڵ وگۆڕێ بیروڕایان له‌گه‌ڵ ده‌که‌ین، بێ گومان ئه‌وبه‌شه‌ش که‌ ئێمه‌ له‌گه‌ڵى که‌وتین له‌و کێشه‌ و رابردووه‌دا به‌شدار بوو، به‌ڵام ئاراسته‌یه‌کى نوێ و هیوا به‌خشى بۆ گۆڕانکارى تێدا ده‌بینرا. وه‌ک بڵێى ده‌یهه‌وێ پێدا چوونه‌وه‌یه‌ک به‌ خۆیدا بکات و قۆناغێکى نوێ ده‌ست پێبکات. ئه‌مه‌ تا راده‌یه‌کى زۆر له‌ قسه‌و کرده‌وه‌یاندا ده‌رکه‌وتبوو، بۆیه‌ ئێمه‌ پاش وتووێژ له‌ گه‌ڵیان و هه‌ڵسه‌نگاندنى راوبۆچوونه‌کانیان و به‌ له‌ به‌رچاوگرتنى ئه‌وه‌ى که‌ لایه‌نه‌که‌ى دیکه‌ نیشانى دابوو به‌ ته‌واوه‌تى نه‌گۆڕو چه‌قبه‌ستوویه‌، به‌مه‌به‌ستى گۆڕانکارى و ده‌ستپێکردنى خه‌باتێکى نوێ له‌ گه‌ڵیان که‌وتین.

ئێستا ئێمه‌ له‌ سه‌ره‌تاى حه‌ره‌که‌تێکى نوێداین. پێویسته‌ له‌ بوارى پێکهاته‌یى، په‌روه‌رده‌یى و گوتاریدا خۆمان نوێ بکه‌ینه‌وه‌ و وه‌رزێکى نوێ له‌ مێژووى حیزب و خه‌باته‌که‌ماندا دروست بکه‌ین. نه‌ک هه‌ر ئێمه‌ به‌ڵکوو هه‌موو حیزبه‌کانى دیکه‌ش. ئه‌مه‌ گۆڕانێکى ناچاریی و له‌ دایک بوونه‌وه‌یه‌که‌ ده‌بێ ژانه‌که‌شى قبووڵ بکه‌ین، ده‌نا ده‌که‌وینه‌ بازنه‌یه‌کى تیکرارى و خه‌ڵکه‌که‌شمان له‌ خۆمان وخه‌باته‌که‌مان ناهۆمێد ده‌که‌ین. ئێمه‌ نابێ له‌ ره‌خنه‌ بترسین، به‌ڵکوو ده‌بێ پێشوازى لێ بکه‌ین وته‌نانه‌ت خۆمان ره‌خنه‌ له‌ خۆمان بگرین، ئه‌مه‌ ئێستا له‌ حیزبى ئێمه‌دا خه‌ریکه‌ وه‌ک پڕه‌نسیپێک جێگیر ده‌بێت

سه‌رچاوه‌:خۆرهه‌لات نیوز

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.