Ö:: په‌یامی‌ ده‌فته‌ری‌ سیاسیی‌ حیزبی‌ دێموكراتی‌ كوردستان ‌بۆ كۆڕی يادكردنه‌ی‌ 3ی‌

حیزبی‌ دێموكراتی‌ كوردستان

په‌یامی‌ ده‌فته‌ری‌ سیاسیی‌ حیزبی‌ دێموكراتی‌ كوردستان ‌بۆ كۆڕی يادكردنه‌ی‌ 3ی‌ ره‌شه‌مه‌ی 1377و‌ سنه‌و 27ى رێبه‌ندانى ‌ماكۆ، له ‌لایه‌ن به‌ڕێز حه‌سه‌ن قادرزاده‌ ئه‌ندامی‌ ده‌فته‌ری‌ سیاسیی‌ حیزبه‌وه‌ پێشكێش كرا
خوشک و برایانی‌
به‌ڕێز!
کادر و پێشمه‌رگه‌ تێکۆشه‌ره‌کانی حیزب!
به‌شدارانی به‌ڕێزی کۆڕی بیره‌وه‌ریی ڕووداوه‌ تاڵ و خوێناوی یه‌کانی شاری سنه‌ی خۆڕاگر و ماکۆی ئازاو قاره‌مان و گشت شارو ناوچه‌ سه‌ربه‌رزه‌کانی کوردستان!
ئه‌مڕۆ لێره‌ کۆ بووینه‌وه‌ بۆ ڕێز گرتن له‌ خه‌بات وفیداکاریی رۆڵه‌ به‌ وه‌ج وگیان له‌ سه‌رده‌سته‌کانی کوردستان که‌ هیچ هه‌ل ومه‌رجێکی سه‌خت و دژوار چۆکی پێ دا نه‌داون وله‌ به‌رامبه‌ر دوژمنان دا بۆپاراستنی ماف و مه‌وجوودیه‌تی گه‌له‌که‌یان له‌ مردن نه‌ترساون وله‌ هه‌ر ده‌رفه‌ت و بۆنه‌یه‌کدا به‌ گژده‌سه‌ڵاتی زوڵم وکۆنه‌په‌رستی دا چوونه‌وه و به‌ خوێنی خۆیان دیفاعیان له‌ ماف وئازادی یه‌کانیان کردوه‌ .

هه‌شت ساڵ له‌مه‌وپێش به‌ڕێز "عه‌بدوڵڵا ئۆجه‌لان" سه‌رۆکی پارتی کرێکارانی کوردستانی تورکیا رۆژی 26ی ڕێبه‌ندانی ساڵی 1377ی هه‌تاوی له‌ لایه‌ن ده‌زگا جاسووسی و ئه‌منییه‌تی یه‌کانی تورکیا به‌ هاوکاری و پیلانی چه‌ندلایه‌نه‌، به‌ شێوه‌یه‌کی زۆر نامرۆڤانه‌ ودوور له‌ هه‌ر ڕێوشوێنێکی ئه‌خلاقی و په‌یماننامه‌و پره‌نسیپه‌ نێونه‌ته‌وه‌یی یه‌کان گیراو، به‌ره‌و تورکیا رفێندرا. نیشاندانی چۆنیه‌تیی گیران و چاو به‌ستن وقۆڵ به‌ست کردنی، بوو به‌ هۆی بریندار بوونی هه‌ست و ویژدانی نه‌ته‌وه‌یی کورد وئه‌م ره‌فتاروکرده‌وانه‌ بوونه‌ هۆی ده‌ربڕینی ناڕه‌زایه‌تی وتووڕه‌یی خه‌ڵک وبه‌هێز بوونی ناڕه‌زایه‌تی له‌ نێو خه‌ڵکی کوردستان دا.

له‌ ڕۆژهه‌ڵاتی کوردستان ئه‌م تاوانه‌ دژی ئینسانیه‌له‌ گه‌ڵ مه‌حکووم کردن، بةرةوروو بوو به‌ هه‌ل و ده‌رفه‌تێک وده‌ستپێکی حه‌ره‌که‌تێکی گشتی وهه‌مه‌لایه‌نه‌ی گه‌لی کورد، بۆ هێنانه‌ گۆڕی ویست و داخوازه‌ ره‌واکانی ئه‌م گه‌له‌ زوڵم لێکراوه ‌ودژایه‌تی کردن له‌ گه‌ڵ سیاسه‌تی سه‌رکوت و له‌ ژێر پێ نانی ماف و ئازادی یه‌کانی کورد. له‌ سه‌ره‌تادا رێژیم رێگای دا که‌ خه‌ڵک بۆ مه‌حکووم کردنی گیرانی سه‌رۆکی پارتی کرێکارانی کوردستان، رێپێوان بکه‌ن، دیاره‌ ئه‌وه‌ش به‌ مه‌به‌ستی تایبه‌تی خۆی بوو، بۆ ئه‌وه‌ی وا نیشان بدا که‌ له‌ ئێران دا مه‌سه‌له‌یه‌ک به‌ ناوی مه‌سه‌له‌ی کورد نیه‌ و کوردی ئێران هه‌موومافه‌کانیان دابین کراوه‌، ئه‌وه‌ کورده‌کانی به‌شه‌کانی دیکه‌ی کوردستانن که‌ زوڵملێکراون و ئه‌ویش پشتیوانی یان لێ ده‌کا! به‌ڵام کاتێک مه‌سیر و رێبازی رێپێوانه‌کان به‌ پێچه‌وانه‌ی ویست و ئاره‌زووی رێژیم گۆڕا وکوردستان بوو به‌ گۆڕه‌پانی خه‌بات وبه‌ربه‌ره‌کانێ دژی خۆی و مه‌حکووم کردنی سياسةت و رةفتارةكانى ده‌رحه‌ق به‌ خه‌ڵکی کوردستان، کۆماری ئیسلامی ده‌ستووری سه‌رکوتی خۆپێشاندانه‌کانی به‌ به‌کرێگیراوانی دا و، له‌ هه‌موو جێیه‌ک بزووتنه‌وه‌ی ئیعتڕازیی خه‌ڵک له‌ خوێن وه‌ردرا .

رۆڵه‌ خه‌باتگێڕه‌کانی کوردستان له‌ رۆژی 3ی ره‌شه‌مه‌دا، له‌ به‌رامبه‌ر ئه‌و هه‌موو زوڵم وبێ به‌شيیانه‌ی که‌ پێیان ڕه‌وا بینراوه‌، به‌ هه‌ستێکی پیرۆز و رقێکی شۆڕشگێڕانه‌ ده‌نگی ناڕه‌زایه‌تی و تووڕه‌یی خۆیان به‌ دروشمی دژی ڕێژیم ده‌ربڕی، ئه‌مه‌ش بوو به‌ هۆی ئه‌وه‌ی که‌ هێزه‌ سه‌رکوتکه‌ره‌کانی ڕێژیم دژ کرده‌وه‌ نیشان بده‌ن و بۆ کپ کردنی هه‌ر ده‌نگێکی ئازادی خوازی و حه‌ق بێژانه‌، به‌ شێوه‌یه‌کی دڕندانه‌ هێرشیان کرده‌ سه‌ر رێپێوانی هێمنانه‌ی شاره‌کانی کوردستان و لاوانی کوردیان شه‌ڵالی خوێن کرد. له‌ ئاکام دا ده‌یان که‌س شه‌هید و بریندار بوون و ده‌یان که‌سیش گیران و ڕه‌وانه‌ی سیاچاڵه‌کانی رێژیم کران و ئازار و ئه‌زیه‌ت دران و به‌شێکی به‌رچاویش له‌و ئازادیخوازانه‌ له‌ترسی گیران و بۆ پاراستنی گیانیان ، ماڵ و ژیانی خۆیان به‌ جێ هێشت و ئاواره‌ی هه‌نده‌ران بوون .

ئه‌مڕۆ هه‌شت ساڵ به‌سه‌رکوشتاری لاوانی شاری سنه‌ی خوێناوی له‌ رۆژی 3ی ڕه‌شه‌مه‌ی ساڵی 1377ی هه‌تاوی و ساڵێک به‌ سه‌ر ڕووداوی جه‌رگبڕی رۆژی 27ی ڕێبه‌ندانی ساڵی 1384ی هه‌تاویی شاره‌کانی " ماکۆ" و " پولده‌شت " و "شووت" دا ڕاده‌برێ . ئه‌مساڵیش  هاوکات له‌ گه‌ڵ ساڵوه‌گه‌ڕی رووداوی ئه‌م شارانه‌ له‌ رۆژه‌کانی 26و27ی ڕێبه‌ندان دا شاری "مه‌هاباد" ی پێشه‌نگ شاهیدی به‌ربه‌ره‌کانێ و خه‌بات له‌ دژی هێزه‌ به‌ کرێگیراوه‌کانی کۆماری ئیسلامی بوو.  رۆڵه‌ تێکۆشه‌ره‌کانی شاری قازی یه‌کان و سه‌دان شه‌هیدی سه‌ربه‌رزی دیکه‌ به ‌به‌خه‌ت کردنی گیانی خۆیان لاپه‌ڕه‌یه‌کی زێڕینی دیکه‌یان له‌ مێژووی خوێناویی خه‌باتی نه‌ته‌وه‌که‌مان دا تۆمار کرده‌وه‌ .

لێره‌دا پێویسته‌ ئاماژه‌ به‌وه‌ بکه‌ین که‌ کۆماری ئیسلامی، سه‌ره‌ڕای ئه‌وهه‌موو جینایه‌ت و خوێن ڕشتنه‌ له‌ شاری "ماکۆ" به‌ پێی به‌رنامه‌یه‌کی گه‌ڵاڵه‌ بۆ داڕێژراو خه‌ریکی پیلانگێڕی بوو و زۆربێ شه‌رمانه‌ بۆ به‌ گژیه‌کدا کردنی هه‌ر دوو گه‌لی کورد و ئازه‌ری، به‌مه‌به‌ستی دروست کردنی ناکۆکی و دوژمنایه‌تی له‌ نێوانیان دا، حه‌ولی دا ئه‌م جینایه‌ته‌ بخاته‌ پاڵ ڕۆڵه‌کانی ئه‌م گه‌له‌ و به‌ قازانجی خۆی که‌ڵکی خراپی لێ وه‌رگرێ ، به‌ڵام ڕۆڵه‌ وشیار و وریاکانی ئه‌م  دوو گه‌له به‌ هه‌ست به‌ به‌رپرسایه‌تی کردن و به‌ بوونی ئه‌زموونی هاوکاری و هاوپه‌یمانیی له‌ مێژینه‌ به‌ تایبه‌تی له‌ سه‌رده‌می کۆماری کوردستان و حکوومه‌تی نیشتمانیی ئازه‌ربایجان دا، نه‌که‌وتنه‌ داوی پیلانی به‌کرێگیراوانی رێژیم و یه‌کڕیزی و برایه‌تیی خۆیان پاراست . ئه‌م دوو گه‌له‌ له‌ قۆناغه‌ جۆراوجۆره‌کانی خه‌بات دا پشتیوان و هاوکاری یه‌کتر بوون و ده‌یان پیلانی له‌و بابه‌ته‌یان له‌ ڕابردوودا پووچه‌ڵ کردۆته‌وه‌. ڕاستی یه‌کی حاشا لێ نه‌کراوه‌ که‌ رۆڵه‌کانی کورد به‌ درێژایی مێژوو بۆ پاراستنی بست به‌ بستی خاکی کوردستان و له‌ پێناو وه‌دی هاتنی ئامانجه‌کانی گه‌لی کورد دا و بۆ پارێزگاری کردن له‌ خاک و شه‌ره‌ف و که‌رامه‌تی کورد به‌ره‌وپیلی مه‌رگ چوون و گیانیان له‌م پێناوه‌دا به‌خت کردوه‌. ده‌کرێ رۆژێک له‌ پێناوی به‌رژه‌وه‌ندی نه‌ته‌وه‌یی دا ده‌ست له‌ هێندێک به‌رژه‌وه‌ندی ته‌سکی حیزبایه‌تی هه‌ڵ گرین، به‌ڵام ده‌سکه‌وته‌ نه‌ته‌وه‌یی یه‌کان وخاکی نیشتمان بۆ واز لێ هێنان و هه‌رزان فرۆش کردن نابن .

به‌رێزان!
لێره‌دا
جێی خۆیه‌تی، له‌م بۆنه‌ تایبه‌تی یانه‌دا له‌ گه‌ڵ ڕێزدانان بۆ خه‌بات و قوربانیدانی رۆڵه‌کانمان به‌ دوای هه‌ل و ده‌رفه‌تێکی له‌بارتروگونجاوتردا بگه‌ڕێین بۆوه‌دیهێنانی ئاوات و ئامانجه‌کانمان و بۆ هه‌رچی زیاتر له‌ قاودان و شه‌رمه‌زارکردنی سه‌ره‌ڕۆیی و ئازادیکوژیی کۆماری ئیسلامی له‌ لایه‌ک و ئاوڕدانه‌وه‌یه‌ک له‌ ڕابردوو و پێداچوونه‌وه‌یه‌ک به‌ کار و ئه‌رکه‌کانمان دا و دانانی به‌رنامه‌یه‌کی دیاری کراو بۆکاروتێکۆشانمان له‌ ئاینده‌ دا به‌ تایبه‌تی گرینگیدان به‌ شێوه‌کانی خه‌بات و که‌ڵکوه‌رگرتن  له‌ هه‌موو شێوه‌کان به‌ پێی هه‌لومه‌رج مومکین له‌ بواره‌کانی سیاسی، دیپلۆماسی، ته‌بلیغاتی، ته‌شکیلاتی وهه‌رچی زیاتربه‌ نێو نه‌ته‌وه‌یی کردنی مه‌سه‌له‌ی کورد له‌ ناوه‌نده‌ بڕیاربه‌ده‌سته‌کان و ڕێکخراوه‌ نێونه‌ته‌وه‌یی یه‌کان و کۆڕ و کۆمه‌ڵه‌ جیهانی وبه‌شه‌ردۆسته‌کان و ڕێکخراوه‌کانی پارێزگاری له‌ مافه‌کانی مرۆڤ دا و بۆ راکێشانی سه‌رنج و بیروڕای ئه‌وان و پشتیوانی کردنیان له‌ مافه‌ نه‌ته‌وه‌یی و ئینسانی یه‌کانی نه‌ته‌وه‌ی کورد له‌ هه‌ر چوار پارچه‌ی کوردستان له‌ لایه‌کی دیکه‌ .

له‌ نیوخۆی کوردستان دا بۆ زیاتربه‌ره‌وژووربردنی راده‌ی وشیاریی سیاسی و کۆمه‌ڵایه‌تی وبه‌ هێزکردنی هه‌ستی نه‌ته‌وایه‌تی وتۆخ کردنی ئه‌و خه‌باته‌ له‌ شێوه‌ی خه‌باتی جه‌ماوه‌ری دا وبۆهه‌رچی زیاتر به‌شداریکردنی هه‌موو چین وتوێژه‌کانی خه‌ڵکی کوردستان، یه‌ک ده‌نگی و یه‌کخستنی هه‌ڵوێست و بیرو بۆچوونه‌کان،  دوور له‌ چوارچێوه‌و بیروبۆچوونی ته‌سکی حیزبایه‌تی وپاوانخوازی که‌ ده‌بێته‌ هۆی لاوازکردنی ئه‌و شێوه‌ خه‌باته‌. پێویسته‌ بۆیه‌ ئه‌رکی هێزه‌ سیاسی یه‌کانی کوردستانه‌ نه‌خشی به‌رچاویان هه‌بێ له‌ هه‌ماهه‌نگ کردن و ڕێکخستنی جه‌ماوه‌ردا و وه‌کوو دینامیزمی جووڵانه‌وه‌ وپێشه‌نگ بوونی خه‌بات وپێوه‌ندیی توند وتۆڵ وپشتیوانی کردن له‌ ڕێکخراوه‌ سینفی و کۆمه‌ڵایه‌تی و فه‌رهه‌نگی یه‌کان که‌ له‌ حه‌ره‌که‌ته‌ ئیعتڕازی یه‌کان دا کاریگه‌ریی خۆیان هه‌یه‌ و ئه‌وه‌ش پێوێستی به‌ به‌رنامه‌یه‌کی روون و دیاری کراو هه‌یه‌، کاتێک ته‌واوی ئه‌و به‌ستێنانه‌ فه‌عال و هه‌ڵسووڕ بوون، له‌و قۆناغه‌ چه‌قبه‌ستووه‌ رزگارمان ده‌بێ و به‌ره‌و قۆناغێکی نوێ له‌ خه‌باتی جه‌ماوه‌ری هه‌نگاو ده‌نێین. گه‌یشتن به‌و قۆناغه‌ دڵنیامان ده‌کا که‌ خه‌باتی کۆمه‌ڵانی خه‌ڵک به‌ره‌و پێشه‌وه‌ چووه‌ و ئاماده‌یی هه‌یه‌ بۆ به‌ره‌نگار بوونه‌وه‌ی هه‌مه‌ لایه‌نه‌ له‌ به‌رامبه‌ر هێزه‌ دژی گه‌لی و کۆنه‌په‌رسته‌کان دا و وه‌کووهێزێکی گه‌وره‌ی ماددی و مه‌عنه‌وی رێگا خۆش ده‌کا بۆ وه‌دیهاتنی دێموکڕاسی ومافه‌ نه‌ته‌وایه‌تی یه‌کان .

حیزبی دێموکڕاتی کوردستان بۆ وه‌دیهاتنی ئه‌و ئامانجانه‌، بڕوایه‌کی ته‌واوی به‌ خه‌باتی ئاشتیخوازانه‌ و مه‌ده‌نی هه‌یه‌ وبۆ ئاڵوگۆڕه‌ بنه‌ڕه‌تی یه‌کان له‌ ئێران دا ودابین بوونی ماف و ئازادی یه‌کانی خه‌ڵکی کوردستان ئه‌م ڕێگایه‌ به‌ باشترین شێوه‌ی خه‌بات ده‌زانێ و له‌ گه‌ڵ ئه‌وه‌شدا هیچ کام له‌ شێوه‌کانی خه‌بات ره‌ت ناکاته‌وه‌ وبه پێی ده‌رفه‌ت و ئیمکان که‌ڵکیان لێ وه‌رده‌گرێ . ئێمه‌ هه‌مووحیزب و رێکخراوه‌ ناسراو و سه‌ربه‌خۆکانی کوردستانی ئێران به‌ دۆست وهاوخه‌باتی خۆمان ده‌زانین و بۆ زیاتر لێک نزیک بوونه‌وه‌یان تا گه‌یشتن به‌ پلاتفۆرمێکی هاوبه‌ش هه‌وڵه‌کانمان به‌رده‌وام ده‌بێ، پێکهێنانی هاوپه‌یمانه‌تی یه‌کی کوردستانی له‌ ژێرهه‌رناوێک دا به‌ ئه‌رکێکی به‌ په‌له‌ وداخوازێکی کۆمه‌ڵانی خه‌ڵک ده‌زانین وله‌وپێناوه‌دا له‌هیچ تێکۆشانێک درێغی ناکه‌ین.

ئه‌م هه‌نگاوانه‌ و زۆرهه‌نگاوی تر یارمه‌تیده‌رن بۆهه‌رچی باشتربه‌ڕێوه‌چوونی خه‌باتی ڕه‌وای گه‌له‌که‌مان و پاڵپشتی کردن له‌ خه‌باتی جه‌ماوه‌ریی خه‌ڵکی کوردستان و چاندنی تۆوی هیواوهومێد له‌ ناودڵیان وهاتنه‌وه‌ی ڕوحێکی تازه‌ وه‌به‌ر جووڵانه‌وه‌ی رزگاریخوازانه‌ی گه‌له‌که‌مان . 

هاوڕێیانی به‌ڕێز !

رۆژهه‌ڵاتی نێوه‌ڕاست وبه‌تایبه‌تی ئێران به‌ قۆناغێکی زۆرناسک و ئاسته‌م دا تێپه‌ڕ ده‌بێ. وه‌زعێکی نائاسایی و ئاڵۆز باڵی به‌سه‌ر ناوچه‌که‌دا کێشاوه‌ و رووبه‌رووی نائارامی یه‌کی زۆر بۆته‌وه‌، ئه‌م هه‌ل و مه‌رجه‌ بۆته‌ هۆی ئه‌وه‌ی ئاڵ و گۆڕی  خێرا له‌ ئارادابن، دیاره‌ فاکته‌ره‌ ده‌ره‌کی و نێوخۆیی یه‌کان ده‌توانن کاریگه‌ری یان له‌ سه‌ر ڕه‌وتی رووداوه‌کان هه‌بێ وبه‌ پێچه‌وانه‌ش ده‌کرێ ره‌وتی رووداوه‌کان به‌ بوارێکی دیکه‌دا بگۆڕێ، به‌ڵام له‌ هه‌رحاڵ دا، ئه‌م ته‌ئسیراته‌ کارده‌که‌نه سه‌رئێران وجووڵانه‌وه‌ی ڕزگاریخوازانه‌ی گه‌لانی ئێران . کۆماری ئیسلامیی ئێران به‌شێکه‌ له‌و قه‌یران و گیروگرفتانه‌ی ناوچه‌که‌ و زیاتر له‌ هه‌ر کات و زه‌مانێک له‌ ژێرهه‌ڕه‌شه‌ و مه‌ترسیی ئاڵ وگۆڕه‌کان دایه‌ و، ئه‌م ڕێژیمه‌ به‌ پێی فه‌لسه‌فه‌ی بوونی خۆی له‌ نێوه‌رۆک دا توانای هیچ ئاڵ و گۆڕێکی له‌ خۆی دا نیه‌ و له‌ به‌رامبه‌ر رووداوه‌کان دا دژ کرده‌وه‌ له‌ خۆی نیشان ده‌دا. له‌ ماوه‌ی 28 ساڵ ته‌مه‌نی دا ته‌نیا له‌ بازنه‌یه‌کی به‌رته‌سکی فکری و ئیدئۆلۆژی دا خولاوه‌ته‌وه‌.

له‌ هه‌لومه‌رجێکی ئه‌وتۆدا ڕێژیم رووبه‌رووی گوشارێکی زۆری نێوده‌وڵه‌تی بۆته‌وه‌. له‌ لایه‌ک ڕێکخراوی نه‌ته‌وه‌ یه‌کگرتووه‌کان، به‌ هۆی هاوکاری نه‌کردنی ئاژانسی نێونه‌ته‌وه‌یی وزه‌ی ئه‌تۆمی و درێژه‌دان به‌ پیتاندن و به‌رهه‌م هێنانی ئۆرانیۆم، بۆ ده‌ست راگه‌یشتن به‌ چه‌کی ئه‌تۆمی و بۆپاشگه‌ز بوونه‌وه‌ی ڕێژیم له‌و کاره‌ بڕیاری سه‌پاندنی گه‌مارۆی ئابووری به‌ سه‌ردا جێ به‌جێ کرا، وله‌ پێشنیارێکی دیکه‌دا له‌ لایه‌ن ئاژانسه‌وه‌ بۆ ئه‌نجومه‌نی ئاسایشی ڕێکخراوی نه‌ته‌وه‌یه‌کگرتووه‌کان به‌ پێی بڕیارنامه‌ی1737، ئاژانسی نێونه‌ته‌وه‌یی وزه‌ی ناوکی سه‌دی په‌نجای یارمه‌تی یه‌ تةکنیکی یه‌کانی خۆی بۆ ئێران که‌م کردۆته‌وه‌. ئه‌مه‌ش په‌یامێکی نوێی دیکه‌یه‌ که‌ ده‌بێ ئێران چاو به‌ به‌رنامه‌ کانی خۆی به‌ تایبه‌تی پیتاندنی ئۆرانیۆم بۆ وه‌ده‌ست هێنانی چه‌کی ئه‌تۆمی دا بخشێنێته‌وه‌ .

سه‌ره‌ڕای ئه‌م وه‌زعه‌، به‌رپرسان و کاربه‌ده‌ستانی کۆماری ئیسلامی هه‌روا درێژه‌ به‌ سیاسه‌ته‌کانی خۆیان ده‌ده‌ن و به‌ بێ له‌به‌رچاوگرتنی بیروڕای گشتی وچاوه‌ڕوانی یه‌کانی کۆمه‌ڵگای نێوده‌وڵه‌تی، هه‌روا سوورن له‌ سه‌رپه‌ره‌پێدانی به‌رنامه‌کانی خۆیان، که‌ ئه‌مه‌ زیانێکی زۆر گه‌وره‌ی بۆ خه‌ڵکی ئێران به‌ دواوه‌یه وده‌بێ باجه‌که‌شی بده‌ن، له‌م باره‌وه‌ ده‌بێ چاوه‌ڕوانی رووداو و پێشهاته‌کانی ئاینده‌ بکه‌ین.

له‌ کۆتایی دا جارێکی دیکه‌ له‌ یاد و بیره‌وه‌ریی خه‌بات وقوربانی دانی رۆڵه‌ له‌ خۆبوردووه‌کانی گه‌له‌که‌مان دا سه‌ری ڕێز و نه‌وازش داده‌نه‌وێنین و سڵاو ده‌نێرین بۆ هه‌موو شه‌هیدانی ڕێگای رزگاریی کوردستان به‌ تایبه‌تی شه‌هیدانی 3ی ڕه‌شه‌مه‌ی ساڵی 1377ی هه‌تاوی شاری سنه‌ و27ی ڕێبه‌ندانی ساڵی 1384ی هه‌تاويی شاری ماکۆ.

سڵاو له‌ شه‌هیدانی ڕێبه‌رمان پێشه‌وا قازی محه‌ممه‌د، دوکتورقاسملوو و دوکتور شه‌ره‌فکه‌ندی

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.