Ö:: ڕه‌وشت و ڕاستگۆیی له سیاسه‌ت دا

نووسینی : موکریان نستانی

سیاسه‌ت تێکه‌ڵێکه له ئیدۆلۆژی، مێژوو و ئه‌زموون، به‌ڵام به ‌ته‌نیاهیچکامیان نیه. ئه‌وانه‌ی ده‌ڵێن سیاسه‌ت درۆیه، ئه‌وانه‌ن که باش له مێتۆدۆلۆژی شڕۆڤه‌کردنی ڕووداوه‌کان، شاره‌زا نین. هێندێک جار له ڕووی نه‌زانی‌یه‌وه یان بۆ مه‌به‌ستێکی خوازراو، ڕووداوه‌کان ده‌شێوێنرێن و به هه‌ڵه لێکده‌درێنه‌وه. له‌م نووسینه‌ دا لێدوانی به‌ڕێز حه‌سه‌نزاده، له کۆبوونه‌وه‌ی پێش وه‌سه‌ریه‌ککه‌وتنه‌وه‌ی بنه‌ماڵه‌ی گه‌وره‌ی دێموکرات دا، ده‌خرێته ژێر لێکۆڵینه‌وه.

له‌ سه‌ره‌تا دا، ڕوونکردنه‌وه‌ی چه‌ند خاڵێک، که گرینگیی مێژوویی، سیاسی و بابه‌تی‌یان هه‌یه، پێویسته.

  1. کۆبوونه‌وه‌کان ئه‌نجامی بڕیاری وه‌سه‌ریه‌ککه‌وتنه‌وه‌ی بنه‌ماڵه‌ی گه‌وره‌ی دێموکرات بوون، نه‌ک بڕیاری وه‌سه‌ر یه‌ککه‌وتنه‌وه‌ی بنه‌ماڵه‌ی گه‌وره‌ی دێموکرات ئه‌نجامی کۆبوونه‌وه‌کان، بێ.
  2. مه‌به‌ستی سه‌ره‌کی کۆبوونه‌وه‌کان، باسکردنی ناکۆکی و جیاوازییه‌کان بوو، نه‌ک خاڵه هاوبه‌شه‌کان.
  3. بابه‌ته‌کان له ئاستی ڕێبه‌ری دا باسکرابوون، کۆبوونه‌وه‌کان بۆ ئاگادارکردنه‌وه‌ی ته‌واوویه‌تی- به‌ده‌نه-  حیزب بوون.
  4. له ئاستی ڕێبه‌ری دا بڕیار ئاشکرا بوو، له کۆبوونه‌وه‌کان دا ده‌ویسترا بیروبۆچوونی ته‌واوویه‌تی حیزب، وه‌ربگیردرێ و له‌و کۆبوونه‌وانه‌ دا ئه‌ندامان بتوانن به ئازادی و بێ سانسۆر بیروڕای خۆیان ده‌رببڕن.

به ‌سه‌رنجدان به‌و خاڵانه ئه‌گه‌ر له خۆمان نه‌گۆڕین نابێ چاوه‌ڕێ بین له‌و جۆره کۆبوونه‌وانه‌دا باسه‌کان ستایش کردن و ئافه‌رین وتن بن. ناتوانین مێژوو بگۆڕین، 10 ساڵێک بوو حیزب جیابوونه‌وه‌ی تێکه‌وتبوو، زۆر ئاسایی بوو که کۆمه‌ڵێک کێشه و جیاوازی بۆچوون درووست ببن، ئه‌و کێشانه هه‌ر به‌وه چاره‌سه‌ر نه‌ده‌کران که باسنه‌کرێن و په‌رده‌پۆش بکرێن. من پێموایه ئه‌و کۆبوونه‌وانه‌ن که ڕه‌وشت و ڕاستگۆیی له سیاسه‌ت دا و دێموکرات بوونی حیزب ده‌سه‌لمێنن، نه‌ک ئه‌و ڕووداوانه‌ی دوای کۆنگره‌ی 13، ڕووده‌ده‌ن.

به‌ڕێز حه‌سه‌نزاده، زۆر ڕاستگۆیانه و به ڕاشکاوی باس له ناکۆکی و جیاوازی‌یه‌کان ده‌کا، نه‌ک بۆ ئه‌و مه‌به‌سته‌ی که کێشه‌کان قووڵتر بکاته‌وه، به‌ڵکو بۆ چاره‌سه‌رکردنی بنه‌ڕه‌تی کێشه‌کان. به‌ دوای ئه‌و کۆبوونه‌وانه‌ دا، تێگه‌یشتنی زیاتر له نێوان لایه‌نه‌کان درووست بوو، له ئه‌نجام دا وه‌سه‌ریه‌ککه‌وتنه‌وه‌ی بنه‌ماڵه‌ی گه‌وره‌ی دێموکرات، ئه‌و ڕاستی‌یه ده‌سه‌لمێنێ. وا درووستتر بوو که لێدوانی به‌ڕێز گادانی‌ش بڵاوبکرێته‌وه، من له کۆبوونه‌وه‌که‌دا ئاماده‌بووم و ده‌توانم بڵێم که وه‌ک چۆن قسه‌کانی به‌ڕێز حه‌سه‌نزاده له قسه‌کانی به‌ڕێز گادانی‌ جیاواز بوون به‌ هه‌مان شێوه قسه‌کانی به‌ڕێز گادانی‌ش له قسه‌کانی به‌ڕێز حه‌سه‌نزاده، جیاواز بوون، به‌ڵام قسه‌کانیان دژی یه‌کتر نه‌بوون. بۆ‌ئه‌وه‌ی که‌سێک بتوانێ باش له‌م بابه‌ته تێبگا، وا پێویست ده‌کا، گوێ له قسه‌کانی هه‌ر دوو لا بگرێ.

نامهه‌وێ شته‌کان دووباره‌بکه‌مه‌وه، به‌ڵام به‌ ووردی گوێ له قسه‌کانی مامۆستا بگرن، ده‌ڵێ: ڕه‌نگه منیش لیستی فیکسم پێ شتێکی باش نه‌بووبێ له‌به‌ر ئه‌وه‌ی ته‌رکیبی کۆمیته مه‌رکه‌زی‌یه‌که‌م پێ زه‌عیف بوو، هه‌موو لایه‌ک باش ده‌زانن که کێشه‌ی سه‌ره‌کیش هه‌ر ئه‌وه بوو، که مامۆستا زۆر ژیرانه و سیاسی‌یانه قه‌بووڵی ده‌کا.

دوای 10 ساڵ و درووست له‌ دوای له‌تبوونی حیزب، بڵاوکردنه‌وه‌ی ئه‌و لێدوانانه، بۆ کێشه درووستکردن و چه‌واشه ‌کردن زیاتر شتێکی دیکه، نیه. لێره وا ده‌رده‌که‌وێ که به‌ڕێز هیجری و هاوبیرانی هه‌ر ئه‌وه‌نده له سیاسه‌ت تێده‌گه‌ن یان پێیانوایه که ئاستی ئاگایی خه‌ڵک ئه‌وه‌نده نزمه که به هه‌ڵه له ڕووداوه سیاسی و مێژووی‌یه‌کان تێبگه‌ن. ئه‌گه‌ر ئه‌و کۆبوونه‌وه و لێدوانانه ئه‌و کات، ببوایه‌ن به هۆی کێشه و لێک دوورکه‌وتنه‌وه، ده‌کرا ڕه‌خنه له‌و مێتۆده بگیردرێ، به‌ڵام له کاتێک دا ئه‌نجامێکی سه‌رکه‌وتوویان هه‌بووه بۆ قۆناغێکی مێژوویی _ سیاسی، زۆر بێ ئه‌زموونانه‌یه له قۆناغی ئێستا بۆ مه‌به‌ست و به‌رژه‌وه‌ندی تایبه‌تی که‌ڵکی خراپیان لێوه‌بگیردرێ.

جیا له‌وانه، کام تیئۆری سیاسی و هزری، پشتیووانی له‌وه ده‌کا ڕووداوه مێژووییه‌کان، له ڕوانگه‌یه‌کی ئه‌مڕۆییه‌وه بخوێندرێنه‌وه و هه‌ڵبسه‌نگێنرێن؟ نامهه‌وێ له باسه‌که دوورکه‌ومه‌وه به‌ڵام هه‌ر چه‌ند ساڵێک پێش وه‌سه‌ریه‌ککه‌وتنه‌وه‌ی بنه‌ماڵه‌ی گه‌وره‌ی دێموکرات، نه‌ک هه‌ر قسه‌ی جیاواز له‌ یه‌کتر، به‌ڵکو ته‌قه‌ش ده‌کرا! بۆیه باسکردن له ڕووداوه مێژووی‌یه‌کان شاره‌زایی و ڕۆشنبیری‌یه‌کی سیاسی فراوانی ده‌وێ و ده‌بێ بزانرێ له کوێ دا کام نموونه به به‌ڵگه ده‌هێنرێته‌وه و هۆکاری بابه‌تی هه‌بن که پێویست بوونی ئه‌و نموونه به به‌ڵگه‌هێنانه‌وه‌یه، بسه‌لمێنن.

ئه‌نجامی کۆتایی.
ئه‌و لایه‌نانه‌ی که پڕووپاگه‌نده‌ی ناڕاست، ده‌که‌ن و ڕاستی‌یه‌کان چه‌واشه ده‌که‌ن، ڕوویان له خه‌ڵکانی ڕوناکبیر و تێگه‌یشتوو نیه، چوونکه ده‌زانن که ناتوانن ئه‌وان فریوبده‌ن، به‌ڵکو که‌ڵکی خراپ له بێ ئاگایی و ساده‌یی خه‌ڵکانێک وه‌رده‌گرن، که به جێگه‌ی سه‌رلێشێواندن، پێویستی‌یان به فێرکردن و تێگه‌یاندن، هه‌یه. له کۆتایی دا ئه‌م جۆره پڕووپاگه‌ندانه ناتوانن ئه‌نجامێکی سه‌رکه‌وتوویان هه‌بێ، له‌به‌ر ئه‌وه‌ی خێرایی پێوه‌ندییه‌کانی ده‌رفه‌تێکی پێک هێناوه که ڕاستی و نا ڕاستیی‌یه زووتر ئاشکرا ده‌بن و سه‌رده‌می ئه‌و سیاسه‌ته به‌سه‌رچووه، که ده‌ڵێ: (درۆ بکه درۆ بکه تا باوه‌ڕت پێده‌که‌ن).

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.