Ö:: ولامێکی کورت به‌ کاک ئیقبالی سه‌فه‌ری, خوێنه‌رێک

خوێنه‌رێک

ماوه‌یه‌ک له‌مه‌ و‌به‌ر کاک ئیقباڵ سه‌فه‌ری نووسراوه‌یه‌کی به‌ڵاو کرده‌وه‌ له‌ ژێر نێوی دیموکراسی به‌ شه‌رتی چه‌قۆ! سه‌ره‌تا زۆر به‌ داخه‌م له‌وه‌ی که‌ کاک ئیقباڵ سه‌فه‌ری به‌ بێ بیرکردنه‌وه‌ که‌وته‌ شوێن ئه‌و تاقمه‌ ده‌سلاتخوازه و‌ رابردووی خۆی که‌ جێگه‌ی شانازی بوو بۆ خۆی و هه‌واڵانی له پارێزگای کرماشان و به‌تایبه‌ت‌ ناوچه‌ی داڵاهۆ شۆرده‌وه‌ و لای هه‌واڵانی رێز و حورمه‌تی خۆی له‌ ده‌ست دا. تا ئه‌و جێگه‌ی من بزانم ناوبراو له‌ زۆر که‌س باشتر ده‌زانێ ئه‌وانه‌ی که‌ له‌ حیزب دابران ناتوانن ببنه خاوه‌نی نێوی‌ حیزبی دیمووکراتی کوردستانی ئێران، هه‌ر وه‌کوو چۆن تاقمه‌ دابراوه‌کان له‌ کۆنگره‌ی 4 و کۆنگره‌ی 8 نه‌یانتوانی هه‌ڵگری ئه‌و نێوه‌ پیرۆزه‌ بن، ئه‌و نێو و رێبازه‌ ته‌نیا که‌سانێ خاوه‌نین که‌ له‌ کۆنگره‌کانی حیزبی دیموکراتدا مه‌شروعیه‌ت وه‌رده‌گرێ ، نه‌ هه‌ر که‌س و تاقمێک که به‌ هه‌ر بیانوویه‌ک‌ له‌ حیزب جیا بێته‌وه‌ ئه‌و نێوه‌ له‌سه‌ر خۆی دانێ، ئه‌گه‌ر وابا ئێستا چه‌ند حیزبی دیموکراتمان هه‌بوو .

دیاره‌ ئه‌و به‌رێزه‌ شایه‌ت له‌ چه‌ند که‌س له‌ رێبه‌رایه‌تی حیزب دڵنگرانی هه‌بێ ، به‌لام ئیدی ئه‌وه‌ زۆر ناهه‌قییه‌ ئا به‌و شێوه‌یه‌ ته‌وهین و قسه‌ی ناشیرین به‌ رێبازێ به‌کا، که‌ به‌ هه‌زاران که‌س له ڕۆڵه‌ به‌ نرخه‌کانی گه‌لی کورد گیانی خۆیان بۆ فیدا کردووه‌. زۆر سه‌یره‌ کاک ئیقباڵ سه‌فه‌ری تاوانی چه‌قۆ کێشی ده‌داته‌ پاڵ حیزبێک که‌" زیاتر له‌ پێنج هه‌زار کادر و پێشمه‌رگه‌ی قاره‌مانی لێ شه‌هید بووه‌، به‌ هه‌زاران بنه‌ماله‌ی سه‌به‌رزی شه‌هید هه‌یه‌، هه‌زاران زیندانی سیاسی هه‌یه‌، که‌ چاوه‌روانی ئه‌وه‌ ده‌که‌ن درێژه‌ ده‌رانی رێگه‌ی شه‌هیدانیان که‌ ئه‌ویش حیزبی دیمووکراتی کوردستانی ئێرانه‌" تۆڵه‌ی رۆله‌کانیان، براکانیان، مێرده‌کانیان، باوکه‌کانیان خۆشکه‌کانیان له‌ رێژیمی کورد کوژی کۆماری ئاخۆنده‌کانی ئێران بۆ بکه‌نه‌وه‌!. زۆر سه‌یره‌ ناوبراو به‌ رۆژی روون ته‌وهین به‌ هه‌زاران کادرو پێشمه‌رگه‌ی هاوسنگه‌ری خۆی ده‌کا، ته‌وهین به‌ که‌سانێ ده‌کا که‌ له‌ کاتی شه‌ری داسه‌پاو به‌ سه‌ر کوردستاندا بریندار بووه‌ و‌ سه‌ریان له‌ سه‌ر ڕانی ناوبراو داناوه‌ و تا دوا هه‌ناسه‌ داوایان لێ کردووه‌ رێگه‌که‌یان تا گه‌یشتن به‌ ئامانجه‌کانیان که‌ ئه‌ویش رزگاری کوردستانه‌ له‌ ژێر ده‌سلاتی داگیرکه‌ران به‌رنه‌دا. به‌رێز کاک ئیقبال ئه‌گه‌ر باوه‌ر به‌و نووسینه‌ی من ناکه‌ی، جنابت ده‌توانی ته‌نیا له‌ وڵاتی سوئید که‌ له‌وێ ده‌ژی راپرسیه‌ک بکه‌ی بزانن چه‌ند له‌ سه‌دی ئه‌و کوردانه‌ی که‌ له‌وێ ده‌ژین،‌ ئه‌و تاقمه‌ ده‌سڵاتخوازه‌یان وه‌کوو حیزبی دیموکرات کوردستان ئێران قه‌بووله‌؟ که‌چی ئێستا ئاوا بێ مه‌سوولانه‌ ده‌ڵێ: دیمووکراسی به‌ شه‌رتی چه‌قۆ و هێرش ده‌که‌یته‌ سه‌ر ئه‌و رێبازه‌ی که‌ رێبه‌رانی شه‌هیدمان قازی، قاسملوو و شه‌ره‌فکندی گیانی خۆیان بۆ فیدا کردووه‌.

کاکی خۆم نووسراوه‌یه‌کی زۆر کاڵ و کرچت نووسیوه، هاتووی حیزبی خۆشه‌ویستی کۆمه‌ڵانی خه‌ڵکی کوردستانی ئێرانت وه‌کوو شووتی فرۆشی سه‌رشه‌قام و کۆلانه‌کان له‌ قه‌ڵه‌م داوه‌، یانی ئه‌و هه‌موو خوێنه‌ پاکانه‌ که‌ رژاوه‌ته‌ سه‌ر خاکی کوردستان بۆ شووتی فرۆشان بووه‌ نه‌ک بۆ رزگاری کوردستان. جنابت له‌ باتی ئه‌وه‌ی لێکۆڵینه‌وه‌یه‌کی سیاسیانه‌ و عادیلانه‌ت له‌ سه‌ر کێشه‌کانی نێو حیزبی دیمووکراتی کوردستان ئێراندا کردبا، که‌چی به‌ داخه‌وه‌ ئه‌و شه‌کره‌ت شکاندووه‌.

بۆ ئه‌وه‌ی ئه‌و تاقمه‌ باش بناسی، حه‌ز ده‌که‌م بیره‌وه‌ریه‌کی خۆمت بۆ بگێرمه‌ له‌ کاتی هاتنه‌وه‌ی جماعه‌تی رێبه‌رایه‌تی به‌ نێو شۆرشگێر بۆ نێو ریزه‌کانی حیزبی دیمووکراتی کوردستانی ئێران" ساڵی 1997 له‌ سیمینارێک به‌شدار بووم له‌ کولنی ئه‌لمان، له‌ گه‌رانه‌وه‌مدا بۆ ماڵ میوانی ماڵێکی ئه‌و به‌رێزانه‌ بووم، خاوه‌ن ماڵ که قسه‌ی ده‌کرد‌ وایده‌زانێ منیش له‌ خۆیانم ده‌ستی کرده‌ قسه‌ و باس، رووی ده‌می کرده‌ خه‌ڵکه‌که‌ ووتی: خه‌م مه‌خۆن که‌ به‌و شێوه‌یه‌ گه‌راینه‌وه‌ بۆ نێو تاقمی شه‌ره‌فکندی و قاسملوو، کاک حه‌سه‌ن رستگار وتی: مادام رێگه‌که‌ خۆش کراوه‌ و ئه‌و دوو سه‌ر زله نه‌ماون،‌ مه‌به‌ستی( دوکتور قاسملوو و شه‌ره‌فکندیه‌) ئیدی ئه‌وانی دی به‌رگه‌ی ئێمه‌ ناگرن و ئه‌گه‌ر پا له‌ به‌ری خۆیان درێژ که‌ن به‌شه‌ق وه‌ده‌ریان ده‌نێنین له‌ حیزبی دیمووکراتی کوردستان، جا کاکی برا که‌سانێک به‌و ئامانجه‌وه‌ کار بکا هه‌ر ئه‌وه‌ی لێ ده‌وه‌شێته‌وه‌ که‌ کردیان.

ئه‌وه‌ چۆن ویژدانێک بوو بۆ تۆ ئه‌ی کاکی پێشمه‌رگه‌!! ئه‌وه‌ی بۆ من و هه‌زارانی وه‌کوو من بووه‌ به‌ پرسیار ئه‌وه‌یه‌ که‌ زۆر که‌س ئه‌گه‌ر نه‌چووبایه‌نه‌ نێو ریزی حیزبی دیمووکراتی کوردستان ئێران ئه‌وه‌ نه‌ده‌بوون که‌ ئێستا هه‌ن یان ده‌بوونه‌ شووتی فرۆشی سه‌رشه‌قام....... . به‌رێز" ئه‌گه‌ر باوه‌ر ناکه‌ی که‌ ته‌وهینت کردووه‌؟ ده‌توانی پرسیار له‌ بنه‌ماڵه‌ی سه‌ر به‌رزی شه‌هیدان به‌ گشتی و بنه‌ماڵه‌ی شه‌هیدانی پارێزگای کرماشان بکه‌ی؟ بزانه،‌ چۆن وڵامێک وه‌رده‌گریته‌وه‌؟! بۆ ئه‌وه‌ی به‌رێزت و ئه‌وانه‌ی وه‌کوو تۆ بیر ده‌که‌نه‌وه‌ و ته‌نیا دیمووکراسی به‌ شه‌رتی ده‌سلات و کورسی بۆ خۆیان قه‌بووڵ ده‌که‌ن ئه‌گه‌ر له‌ ده‌سڵاتدا نه‌بن دیمووکراسی هیچ مانا بوونێکی نییه‌، ئه‌گه‌ریش باوه‌ریان پێ بێ ئه‌ویش ئه‌و دیمووکراسیه‌یه‌ که‌ ئێستا له‌ زۆر وڵاتانی ناوچه‌ی ڕۆژهه‌ڵات باوی هه‌یه‌.

به‌رێز بۆ ئه‌وه‌ی بزانی که‌ به‌ راستی ئه‌وه‌ی له‌و نووسراوه‌یه‌دا نووسیووته‌ ڕاست نییه‌، حه‌ز ده‌که‌م ئاماژه‌ به‌ چه‌ند خاڵی گرینگ بکه‌م بۆ ئه‌وه‌ هه‌م جنابت و هه‌م ئه‌و که‌سانه‌ی که‌ وه‌کوو تۆ بیر ده‌که‌نه‌وه‌ بزانن کام لایه‌ن حیزبی دیمووکراته، کام لایه‌ن ده‌یه‌وێ به‌ شه‌ڕ ده‌سڵاتی خۆی به‌سه‌ر حیزبی دیموکراتی کوردستانی ئێراندا بسه‌پێنێ؟ حیزبی دیمووکرات ئه‌و حیزبه‌یه‌ که‌ خاوه‌نی سێ سه‌رکرده‌ی شه‌هید، قازی، قاسملوو و شه‌ره‌فکندی یه‌. حیزبی دیموکرات خاوه‌نی سه‌روه‌ریه‌کانی کۆماری کوردستانه‌ له‌ مهاباد، حیزبی دیمووکراتی کوردستانی ئێران ئه‌و حیزبه‌یه‌ که‌ ئیستا ئه‌ندامی رێکخراوی ئه‌نترناسیوناڵ سۆسیالیسته‌، حیزبی دیمووکراتی کوردستانی ئێران ئه‌و حیزبه‌یه‌ که‌ پێکهێنه‌ری کۆنگره‌ی نه‌ته‌وه‌کانی ئێرانه‌، حیزبی دیموکرات ئه‌و حیزبه‌یه‌ که‌ ئێستا ئه‌ندامه‌ له‌ رێکخراوی نه‌ته‌وه‌ بێ ولاته‌کان.

له‌ کۆتایدا به‌و به‌رێزانه‌ی که‌ هاوبیری کاک ئیقباڵن ده‌ڵێم: حیزبی دیمووکرات ئه‌و حیزبه‌یه‌ که‌ کۆنگره‌ی 13 شه‌رعیه‌تی پێ داوه‌. نه‌ وه‌کوو ئه‌وانه‌ی به‌ شه‌رتی ته‌مه‌ن و ریشی سپی ده‌سڵات و کورسی دیمووکراسیان ده‌وێ!!!!!!ڕه‌نگه‌ تاقمی ده‌سڵاتخواز واده‌ی سه‌نه‌ڵییان به‌ ئابرا ئه‌قباڵ دابێ، هه‌ر بۆیه‌ ئه‌میش ئاوا که‌وتووه‌ته‌ باڵه‌مه‌له‌و تێزی مه‌لا ره‌ستگار گادانییانه‌ ده‌نووسێ و ڕابردووی خۆی ده‌باته‌ ژێری پرسیاره‌وه‌. کاکی برا هه‌ر هیچ نه‌بێ جه‌نابت ئه‌و بانده‌ له‌ هه‌موو که‌س چاکتر ده‌ناسی، شه‌ڕی ئه‌وان شه‌ڕی ناوچه‌گه‌رایی و ده‌سڵاتخوازی و خۆبه‌زلزانینه‌، ئه‌دیی جه‌نابت له‌ زه‌رده‌ و داڵه‌هۆ چت داوه‌ به‌ ناوه‌ند و ناوه‌ندبازی. با ئه‌وه‌ش بزانی کۆمه‌ڵانی خه‌ڵکی کوردستان تاکوو کاتێک که‌ ئه‌ندامی ئه‌و حیزبه‌یه‌ ڕێز له‌ که‌سایه‌تی هه‌ر که‌سێک ده‌گرن، کاتێک بزانن ئه‌و که‌سه‌ به‌ ناڕه‌وا له‌و حیزبه‌ ده‌رچووه‌و هێرشی ناڕه‌واش ده‌کاته‌ سه‌ر حیزب ئیتر ئه‌و که‌سایه‌تییه‌ ڕێزی ئه‌وتۆی لای کۆمه‌ڵانی خه‌ڵکی کوردستان نامێنێ.

تا دوێنێ خه‌ڵک ڕێزی له‌ کاک عه‌ولای حه‌سه‌ن زاده‌ ده‌نا، به‌ڵام ئێستا که‌وتووه‌ته‌ به‌ر نفرینی کۆمه‌ڵانی خه‌ڵکی کوردستان. مه‌بینه‌ هه‌ندێک لاده‌ری کۆن و ناوچه‌گه‌رای ناوه‌ندی که‌ کاروپیشه‌یان له‌ نێو حدکادا ئاژاوه‌گێڕی بووه‌ ئه‌مڕۆ ته‌پڵی جیابوونه‌وه‌ی لێ ده‌ده‌ن. كاکه‌ ئیقباڵ گیان نووکی قه‌ڵه‌می جه‌نابت و هاوڕێکانت تیژتر له‌ هی زۆر که‌سی تر نیه‌! ئه‌ی ئه‌وان چییان لێ هات. حیزبی دیموکرات وه‌کوو خۆی باقییه‌ و ئه‌م فه‌رعانه‌ش دێن و ده‌چن.

به‌و هیوایه‌ که‌ رۆژیک کاک ئیقباڵ سه‌فه‌ری و ئه‌وانه‌ی وه‌کوو ئه‌و بیر ده‌که‌نه‌وه،‌ نه‌که‌ونه‌ شوێن که‌سانێک که‌ ته‌نیا ئامانجیان وه‌دست هێنانی کورسیه . هه‌روه‌ها هیوادارم رۆژێک کاک ئیقبال سه‌فه‌ری به‌ خۆیدا بچێته‌وه‌ و‌ داوای لێبووردن هه‌ر نه‌بێ له‌ بنه‌ماڵه‌ی سه‌ربه‌رزی شه‌هیدانی حیزبی دیمووکراتی کوردستانی ئێران بکا. هیوادارم ته‌مه‌ن درێژ بێ له‌به‌ر ئه‌وه‌ی ڕاستیه‌کان هه‌م به‌ چاو و هه‌م به‌ گوێ ببینێ و ببیسێ. 11.02.07 خوێنه‌رێک
 

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.