Ö:: ڕووی ڕاسته‌قینه‌ی خوێنه‌رێک بناسن

نوسینی: ئێقباڵ سه‌فه‌ری

ڕووی ڕاسته‌قینه‌ی خوێنه‌رێک بناسن
پاش نوسین و بلاو بوونه‌وه‌ی بابه‌تێک له‌ ژێر ناوی دیموکراسی به‌ شه‌رتی چه‌قۆ له‌ لاێان منه‌وه‌، خوێنه‌رێک که‌ به‌ مه‌داحی ئه‌رباب ناسراوه‌،
(عادڵ ئه‌لیاسی ناسراو به‌ ئاکۆ) بابه‌تێکی وه‌ک دژکرده‌وه‌ له‌م پێوه‌ندیه‌دا نوسیبو، که‌ له‌ سایتی پێشمه‌رگه‌کان له‌ ڕێکه‌وتی 2007-02-11 بڵاو کراوه‌ته‌وه‌.

کاک عادڵ ئه‌لیاسی له‌ هه‌مان سایتدا هه‌ڵبه‌ستێکی له‌ ژێر ناوی قه‌ده‌ردا نوسیوه‌ وئه‌وانه‌ی پێیان خۆشبێ، ده‌توانن به‌ خوێندنه‌وه‌ی ئه‌و هه‌ڵبه‌سته‌، له‌ جوری بیرکردنه‌وه‌ی ئه‌م تیئوریسیونه‌ی خه‌باتی نه‌ته‌وایه‌تی! ناوبراو ئاگادار بنه‌وه‌.
به‌ر له‌ هه‌موو شتێک ئه‌م بابه‌ته‌ وڵام به‌و به‌ڕێزه‌ نییه‌ و ته‌نیا ناساندنی منتالیته‌ت وکه‌لتۆرێکه‌ که‌ جوره‌ مرۆڤێک وه‌ک کاک عادڵی ئه‌لیاسی فێر کردوه‌، که‌ مانه‌وه‌ی خۆی له‌ نه‌مانی ئه‌وانی دیکه‌دا ده‌بینن.
کاکی به‌ڕێز: ئه‌گه‌ر ڕاستیه‌که‌ت ده‌وێ ته‌نیا خوێنه‌رێک بواێای هیچم نه‌بوو تا بۆتی بنوسم، چوونکه‌ خوێنه‌رێک که‌ له‌ ده‌ره‌وه‌ی گرفته‌کانی نیوخۆی حیزبیکی سیاسی وه‌ک حیزبی دیموکراتدا، عه‌شیره‌یی و ناوچه‌ییش بیربکاته‌وه‌، هێنده گله‌یی له‌ سه‌ر نییه‌. به‌ڵام کاک ئاکۆ به‌ نوسینی ئه‌و بابه‌ته‌ ڕووی ڕاسته‌قینه‌ی خۆتت ده‌رخستوه‌ و ته‌واوی ئه‌و بۆختان و تاوانانه‌ی که‌ به ناحه‌ق له‌‌ پاڵ خه‌ڵکی دیکه‌ت داون‌، هه‌ربۆ خۆت نه‌ک له‌ به‌ر سداقه‌ت، به‌ڵکوو له‌ به‌رنوقوم بوون له‌ زاتی بێهاوتای ناوچه‌گه‌رایدا، دانت پێدا ناوه‌ن. نوسیوته‌ که‌ ئێقباڵ خه‌ڵکی زه‌رده ‌و داڵه‌هۆیه‌‌، چکارێکی داوه‌ به‌ ناوه‌ندی و ناوه‌ند بازی!!؟. پاش نوسینی ئه‌م ڕه‌سته‌ جوانه‌! که‌ له‌ قۆڵایی دڵته‌وه‌ هاتوه‌ته‌ ده‌ر و نه‌گ هه‌ر بۆ خۆت به‌ڵکوو ئه‌و که‌سانه‌ش که‌ وه‌ک خۆت بیرده‌که‌نه‌وه‌ باوه‌ڕیان پێیه‌، ده‌توانی ئینکاری ئه‌وه‌ بکه‌ی که‌ چه‌نده‌ له‌ عه‌شیره‌ت و ناوچه‌گه‌راییه‌وه‌ به‌ دووری؟. به‌ڵگه‌ له‌وه‌ش ڕوون و ئاشکه‌راتر هه‌یه‌ تا وه‌ک نمونه‌ بۆتی بهێنمه‌وه‌. هه‌ڵبه‌ت به‌ سه‌رنجدان به‌وه‌ی که‌ له‌ یه‌کیک له‌ وڵاته‌ هه‌ره‌ پێشکه‌وتوه‌کانی ئوروپادا ده‌ژیت وبه‌و بنکه‌ مه‌ده‌نیه‌ی په‌ره‌پێدانی ئه‌و جوره‌ دیموکراسیه‌شت که‌ بۆ خۆت به‌ نوسینی هه‌ڵبه‌ستی قه‌ده‌ر ده‌رتبڕیوه‌، جێگای شک بۆ کاسانێکی وه‌ک من ناهێڵێته‌وه‌، تاکوو به‌ جورێکی دیکه‌ بیرت له‌ سه‌ر بکه‌مه‌وه‌‌.‌ ئه‌گینا ئه‌وه‌ چ جوره‌ هزر و بیرێکه‌ که ئه‌تۆی کردوه‌ته‌ سوارچاک وشۆڕه‌سواری خه‌باتی نه‌ته‌وایه‌تی وپێشکه‌وتخۆازی و تاوانی خه‌یانه‌تیش ده‌ده‌یته‌ پاڵ ڕه‌که‌به‌ران و جیابیرانی خۆت، له‌ حاڵێکدا له‌به‌ر تاریکای زه‌ینی خۆتدا به‌ خۆل ده‌ستنوێژ ده‌گری، بۆ خه‌ڵوه‌ت کردن له گه‌ڵ‌ خۆدای عه‌شیره‌یی و ناوچه‌گه‌رایی. لای من هیچ جیاوازیک له‌ نیوان گونده‌کانی زه‌رده‌ و ئه‌لیاسی، له‌ گه‌ڵ سۆما و برادوس و مه‌نگوڕدا نییه‌. کوردستان بۆ من کوردستانه‌ به‌ باکۆر و باشۆر وناوه‌نده‌وه‌. ئه‌گه‌ر کاک ئاکۆ ئه‌لیاسی ڕه‌خنه‌، یان تێبینی له‌ سه‌ر بابه‌ته‌که‌ هه‌یه‌، مافی خۆیه‌تی ڕه‌خنه‌کان به‌ شێوێکی شارستانیانه‌ و به‌ دوور له‌ ده‌مارگرژی، به‌ره‌و ڕووی نوسه‌ره‌که‌ی بکاته‌وه‌. به‌ڵام ناتوانێ و ئه‌و مافه‌ی نییه‌ بۆخۆ هه‌ڵکیشان و هه‌روژاندنی بیروڕای خه‌ڵک، تاوانی سۆکایه‌تی به‌ بنه‌ماڵه‌ی گیانبه‌ختکردوانی بداته‌ پاڵ، ئه‌ویش ترسه‌نوکانه ‌و له‌ ژێر ناوی خوێنه‌رێکدا. ئه‌گه‌ر له‌ خۆت نه‌گۆڕی و جارێکی دیکه‌ هه‌ڵبه‌سته‌ بڵاو کراوه‌که‌ی خۆت له‌ ژێر ناوی قه‌ده‌ر دا، که‌ له‌ سایتی پێشمه‌رگه‌کان و له‌ به‌شی هۆنراوه‌، چاو لێ بکه‌یته‌وه‌، ڕێک دێیته‌ سه‌ر ئه‌و باوه‌ڕه‌ که‌ئه‌و دیموکره‌سیه‌ی ئه‌تۆ جاڕی بۆ ده‌ده‌ی، نه‌گ به‌ شه‌رتی چه‌قۆ، به‌ڵکوو به‌ شه‌رتی قه‌مه‌یه‌.

کاکی به‌ڕێز: ئه‌وه‌ی تۆ بانگه‌وازت بۆ کردوه‌ ته‌پڵی شه‌ڕه‌ و ئاماده‌کاریکه‌ بۆ خوین ڕژاندن، که‌ به‌داخه‌وه‌ مێژۆی ئێمه‌ وه‌ک کورد پڕه‌ له‌و جوره‌ ڕووداوانه‌. ئه‌وه‌یان ئیتر ئاشکه‌رایه‌ و هه‌ن که‌سانێک که‌ به‌های ئه‌و جوره‌ دیموکراسیه‌یان داوه‌ و ئێستاش به‌ گورچیله‌ێکه‌وه‌ ده‌ژین. بۆ ئه‌م داوایه‌م به‌ڵگه‌ی زیندو به‌ ده‌ست وخه‌ت و ئیمزای یه‌که‌م ماموستای دیموکراسی دڵخۆازی خۆت، له‌ به‌رده‌ست دایه‌ و نه‌ خۆت و نه‌ هیچکه‌سی دیکه‌ش ناتوانێ هاشای لێبکا. 

من زۆر تێکوشام به‌ڵکوو له‌ ڕووانگه‌یێکه‌وه‌ چاو له‌ سوارچاکی و شۆڕه‌سوار بوونی خۆت ونیوه‌ڕۆکی‌ نوسراوه‌که‌تدا بکه‌م و بێمه‌ سه‌ر ئه‌و باوه‌ڕه‌ که‌ ده‌رسه‌دیکی له‌و منتالیته‌ته‌ی سوارچاکیته‌ بده‌مه‌ به‌ر چاوی خوینه‌راندا، به‌ڵام به‌ داخه‌وه‌ بێجگه‌ له‌ ده‌هۆڵ کوتان به‌ مێکوتی ناوچه‌گه‌ری و ئه‌شیره‌گه‌ری و سکت بیرکردنه‌وه‌، هیچی دیکه‌م لێ ده‌ست نه‌که‌وه‌ت.

واته‌ ئه‌تۆ به‌ نوسینی ئه‌و دوو بابه‌ته‌، ڕوخساری خۆتت له‌وێ به‌ جوانی ده‌رخستوه‌ و نیشانت داوه‌‌ چه‌نده‌ له‌ منتالیته‌تی پێشمه‌رگایه‌تی و حیزبایه‌ته‌یکه‌ی خۆیشت به‌ دووره و چه‌نده‌ش ڕێزت بۆ گیانبه‌ختکردوانی نه‌ته‌وه‌که‌ت هه‌یه‌. له‌ گه‌ڵ هه‌موو ئه‌وانه‌ش، ده‌ڵێم ئه‌گه‌ر ئه‌من ڕابردوم به‌ دژایه‌تی کردن له‌‌ گه‌ڵ شیوه‌ی به‌ڕێوه‌به‌ری عه‌شیره‌یی و ناوچه‌گه‌رایی و سه‌ره‌ڕووی ده‌شوردرێته‌وه‌، نه‌ک جارێک، به‌ هه‌زاران جار، له‌و ڕابردوه‌ی که‌ ئه‌تۆ مه‌به‌ستته‌ هاشامه‌. ئه‌وه‌یان با پێشکه‌ش به‌و که‌سانه‌ی بێ، که‌ کاریان به‌ به‌ژنوباڵادا هه‌ڵکوتنه‌ و جیاوازی نیوان سه‌ره‌ڕووی ودیموکراسی، له‌ وشه‌و ده‌سته‌واژه‌دا ده‌بینن و له‌ سه‌ده‌ی بیستویه‌که‌مدا به‌ چه‌کێک دێنه‌ گوڕه‌پانی جیاوازی بیروباوه‌ڕو دژبه‌ره‌کیه‌وه‌، که‌ لای زۆر که‌س له‌ مێژه‌ له‌ گۆڕ نراوه‌‌‌. بێگۆمان ئه‌وه‌شت لا پرسیار نییه‌ که‌ چۆن بنکه‌ و باره‌گاکانی سه‌رکردایه‌تی خه‌ریکن دابه‌ش ده‌کرێنه‌ سه‌ر چه‌ند کۆنه‌ لاده‌ر و که‌سێکدا که‌ ڕێبازی نه‌مرانیان به‌ جێ هێشتوه‌!.  باشتر وایه‌ که‌ ئاوا هاوسه‌نگه‌رانی پێشوی خۆت نه‌ده‌یته‌ به‌ر تانه‌ و تاوان و هێندیک به‌ خۆتدا بێیته‌وه‌ و قبۆڵ بکه‌ی که‌ نه‌ کوردستان موڵکی ئه‌من و تۆیه‌ و نه‌ش شۆڕشه‌که‌ی له‌ پاوانی که‌سماندایه‌. ئه‌وه‌ به‌ خۆت بقه‌بۆڵێنه‌ که‌ واقعیه‌تی سیاسی و کۆمه‌ڵایه‌تی کوردستان به‌ گشتی و ڕۆژهه‌ڵاتی کوردستان به‌ تایبه‌تی گوڕاوه‌ و ئێمه‌ش ده‌بێ به‌ پیری ئه‌و گۆڕانکاریانه‌وه‌ بچین. که‌وابێ گوڕانی هاوچه‌رخ ودمکراتیک به هێزی عه‌شیره‌ت و ڕه‌مه‌ێ ئینسانی بێ تولرانت و ناوچه‌گه‌را، شتێکی نامومکنه. جا با هه‌زاران مه‌داحی هه‌لپه‌ره‌ست، شعر و په‌خشان بو ئه‌م ڕیبازه‌ هه‌ر‌ه‌‌س‌هێناوه دابڕێژن.

براێ شاعیر!، ئه‌گه‌ر ئه‌ده‌ب وهونه‌ر مه‌به‌سته و ئستراتژی نه‌ته‌وه‌ی بو ئێوه گرینگه، وه‌رن با هه‌موومان پێکه‌وه به‌ گژی ئه‌و کۆلتۆره‌ قه‌ڵه‌ته‌دا بچینه‌وه‌ که‌ ئێمه‌ی گه‌یاندوه‌ته‌ ئه‌وڕۆژ، نه‌ک به‌ پێچه‌وانه‌وه‌. که‌ وابێ بابه‌تی دیموکراسی به‌ نرخی چه‌قۆ، نه‌ک هه‌ر له‌ جێی خۆیه‌تی، به‌ڵکوو ڕووی ڕاست له‌ جوری بیرکردنه‌وه‌ و منتالیته‌تی خۆت و که‌سانێکه‌ که‌ وه‌ک خۆت له‌ سه‌ر ناکۆکیه‌کانی خه‌باتی سیاسی سه‌رده‌م  بیرده‌که‌نه‌وه‌و هه‌ڵویست ده‌گرن، نه‌ک نه‌مرانی گه‌ل. ئێستا و به‌ دووای نوسینی ئه‌و دوو بابه‌ته‌ که‌ نوسیوتن، خۆت تاقی که‌وه‌ و بزانه‌ ئه‌و بابه‌ته‌ کاڵای به‌ باڵاته‌ یان نا. ماوه‌ته‌وه‌ بڵێم ئه‌من سواڵی به‌رپرسایه‌تی و ده‌سه‌ڵاتم نه‌کردوه‌ و قه‌تیش نایکه‌م، چوونکه‌ ئه‌گه‌ر وابوایا، بێگومان واده‌ی هه‌ر له‌ ئه‌ندامی ده‌فته‌ری سیاسی و کومیته‌ مه‌رکه‌زی لای خۆته‌وه‌ بگره‌، تا گه‌وره‌ به‌رپرسانی ده‌ره‌وه‌تانم قبۆڵ ده‌کرد و ئێستاش وه‌کو کاک ئاکۆ به‌ ئاهه‌نگێک سه‌مام ده‌کرد، که‌ بۆ خۆت سه‌رچۆپیه‌که‌ی ده‌کیشی. نه کاکه‌ گیان، بۆ خۆت باش ئاگاداری که من ئه‌م شورشه‌ نه‌ته‌وایه‌تیه‌م به‌ هه‌رزان بۆ ته‌واو نه‌بووه، تا به‌ نرخی ئێوه‌ بیفروشم وناوی شه‌هیدانی سه‌ربه‌رزی نه‌ته‌وه‌که‌م و هاوسه‌نگه‌ره‌کانم بکه‌مه ده‌سمایه‌ بو په‌رینه‌وه له پردی ئاواته شه‌خسیه‌کانم. باش وایه‌‌ له‌و ئه‌قڵیه‌ته‌ بێنه ده‌ر و خوتان تێکه‌ڵی کاروانی نه‌ته‌وه‌یی بکه‌نه‌وه و چاو له‌ ده‌وه‌رو به‌ره‌که‌تان بکه‌ن و بزانن له‌ گه‌ڵ کێ به‌ره‌و ڕوون و قۆناخی شۆڕش به‌ کوێ گه‌یشتووه‌. چونکه‌ به‌ پێچه‌وانه‌ی بۆچوونه‌کانی تۆ، واقعیه‌تی ئه‌مڕۆژ، گه‌ڵێک جیاوازتره‌ له‌و کاته‌ی که‌ ئیمه‌ پێمان وابوو ته‌نیا هێزی ڕزگاری ده‌ری خه‌ڵکی کوردستانین. بێشک ئه‌و‌کات بۆ خۆیشتان له‌و ته‌سک بیرکردنه‌وه‌ رزگارتان ده‌بێ و تاوانی نه‌کراویش ناده‌نه‌ پاڵ که‌سانی تر، که‌ نه‌ به‌و ته‌پڵه‌ شه‌ڕیان پێ ده‌کرێ و نه‌ به‌و ئاهه‌نگه‌ش سه‌ما. 

2007-02-25

دێموکراسی به‌ شه‌رتی چه‌قو!!.

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.