Ö:: راپۆرتی سيمیناری کۆمیته‌ی یۆتۆبۆری بۆ به‌رێز کاک سه‌عید به‌گزاده‌ ئه‌ندامی کۆمیته‌ی ....

حیزبی دێموکراتی کوردستان کۆمیته‌ی سوئێد

راپۆرتی سيمیناری کۆمیته‌ی یۆتۆبۆری بۆ به‌رێز کاک سه‌عید به‌گزاده‌ ئه‌ندامی کۆمیته‌ی ناوه‌نديی حیزبی دێموکراتی کوردستان و به‌رپرسی کۆمیته‌ی ده‌ره‌وه‌ی وڵات له‌سه‌ر هۆیه‌کانی له‌تبوونی حیزبی دێموکراتی کوردستانی ئێران
رۆژی شه‌ممه‌ رێکه‌وتی 24/02/2007 کۆمیته‌ی یۆتۆبۆری حیزبی دێموکراتی
کوردستان سێمینارێکی سیاسی له‌ شاری یۆتۆبۆری بۆ به‌رێز کاک سه‌عید به‌گ‌زاده‌ ئه‌ندامی کۆمیته‌ی ناوه‌ندی حیزبی دێموکراتی کوردستان  و به‌رپرسی کۆمیته‌ی ده‌ره‌وه‌ی وڵات له‌سه‌ر هۆیه‌کانی له‌تبوونی حیزبی دێموکراتی کوردستانی ئێران و هێندک رونکردنه‌وه‌ی هێڵه‌ گشتی‌یه‌کانی حیزبی دێموکراتی کوردستان پێک هێنا.

کۆبوونه‌وه‌که‌ کاتژمێردوو نیوی پاش نیوه‌ڕۆ به‌ سروودی نه‌ته‌وایه‌تی ئه‌ی ره‌قیب له‌ لایه‌ن کاک عومه‌ر گه‌ردی ده‌ستی پێ‌کرا. پاشان بۆ رێزگرتن له‌ گیانی پاکی شه‌هیدان یه‌ک ده‌قیقه‌ بێده‌نگی راگه‌یاندرا. دواتر هاورێ نه‌به‌ز عه‌لیدوست له‌ لایه‌ن کۆمیته‌ی یۆتۆبۆری حیزبی دێموکراتی کوردستان به‌خیر هاتنی به‌شدارانی کۆبوونه‌وه‌که‌‌ی کرد.

پاشان نۆره‌ گه‌یشته‌ کاک سه‌عید  به‌گزاده‌ که‌ سه‌ره‌تا به‌ خێرهاتنێکی گه‌رمی ئاراسته‌ی به‌شدارانی کۆبوونه‌وه‌که‌ کرد. دواتر باسێکی تێرو ته‌سه‌ل و هه‌مه‌ لایه‌نه‌ی له‌سه‌ر هۆیه‌کانی له‌ت بوونی حیزبی دێموکراتی کوردستانی ئێران و هێڵه‌ گشتی‌یه‌کانی حیزبی دێموکراتی کوردستان پێشکه‌ش کرد. دوای باسه‌کانی کاک سه‌عید پشوویه‌ک راگه‌یه‌ندرا.

دواتر کاک سه‌عید وێرای گوێ گرتن له‌ نه‌زه‌رات و بۆچوون و پرسیاری به‌شداران، وڵامی پرسیاره‌کانیانی به‌ شێوه‌یه‌کی روون و ئاشکرا دایه‌وه‌.

له‌ وڵامی پرسیاری یه‌کێک له‌ به‌شدارانی کۆبوونه‌وه‌که‌ دا که‌ پرسی: ئایا نه‌ده‌کرا که‌ تا کۆنگره‌ی 14ی حیزب راوه‌ستابان؟ کاک سه‌عید له‌ وڵام دا گوتی: به‌داخه‌وه‌ ده‌ره‌تانی هیچ رێگایه‌کی له‌و چه‌شنه‌یان بۆ ئێمه‌ نه‌هێشتبۆوه‌ که‌ بتوانین تا کۆنگره‌ی 14 راوه‌ستین. ئه‌وان به‌ وته‌ی خۆیان بیریان له‌ چه‌ندی و چۆنی به‌شدارانی کۆنگره‌ی 14ش کردبۆوه‌. ئێمه‌ ئاماده‌ بووین ته‌واوی بڕیاره‌کانی رێبه‌رایه‌تی به‌ڕێوه‌به‌رین. به‌شدارانی کۆنگره‌ی 13 ده‌نگی مه‌شروعیان به‌ کۆنگره‌ دابوو و ئێمه‌ش رێزمان بۆ ئه‌و ده‌نگه‌ هه‌بوو و هه‌یه‌. به‌ڵام نه‌ته‌نیا ئیمکانی کارکردنمان بۆ نه‌مابۆوه‌ به‌ڵکو ده‌ره‌تانی به‌یه‌که‌وه‌ ژیانیشیان لێ بڕیبووین. ئه‌و کارانه‌ی که‌ زۆرینه‌ی کۆمیته‌ی ناوه‌ندی، له‌و ماوه‌یه‌ دا ئه‌نجامی دابوون، بۆ ئیسپاتی ئه‌و قسانه‌ی ئێمه‌ ره‌نگه‌ کافی بێ، هه‌ر له‌ ته‌بلیغ، ته‌وبیخ، هه‌ڵپه‌ساردن و ده‌ر کردن را تا ده‌گاته‌ زیندانی کردنی هاوڕێیانی حیزبی.

له‌ پرسیارێکی دیکه‌ی به‌شدارانی سێمیناره‌که‌ که‌ پرسی: بۆ ناوی خۆتان ناگۆرن؟ کاک سه‌عید گوتی: ئێمه‌ له‌ رابردوی حیزبی دیموکراتی کوردستانی ئێران و هه‌وڵ و تێکۆشانی ده‌یان ساڵه‌ی خۆمان له‌و حیزبه‌ دا ده‌ست هه‌ڵناگرین. ئێمه‌ له‌ ته‌واوی شکست و سه‌رکه‌وتنه‌کانی ئه‌و حیزبه‌ دا خۆمان به‌ شه‌ریک و به‌شدار ده‌زانین. ئه‌وه‌ تێکۆشه‌ران و رێبه‌رانی ناو ریزه‌کانی ئێمه‌ن که‌ ئه‌و حیزبه‌یان به‌ ده‌یان قۆناخی سه‌خت و ئاسته‌م دا گه‌یاندۆته‌ ئێره، نه‌شمان گوتوه‌ که‌ هاورێیانی پێشومان به‌شیان به‌ حیزبی دێموکراتی کوردستانه‌وه‌ نییه‌. هه‌تا ئێره‌ وه‌ک یه‌ک خاوه‌نی حیزبی دێموکراتی کوردستانی ئێرانین. بۆ داهاتوش با به‌رنامه‌ وکارو تێکۆشان و خه‌ڵکی کوردستان دیاری بکه‌ن که‌ کێ حیزبی دێموکراته‌. بۆیه‌  بیرمان له‌وه‌ نه‌کردۆته‌وه‌ که‌ ناوی خۆمان بگۆرین. به‌ڵام ناوی حیزبی ئێمه‌ حیزبی دێموکراتی کوردستانه‌ و ناوی حیزبی ئه‌وان، حیزبی دێموکراتی کوردستانی ئێرانه‌ که‌ وابێ ناوه‌کان فه‌رقیان له‌گه‌ڵ یه‌ک هه‌یه‌.

پرسیارێک کرا که‌ ئایا ئێوه‌ش خوازیاری ئه‌وه‌ن که‌ ئه‌مریکا بێتو سناریۆی عێراق له‌ ئێران دووپات کاته‌وه‌؟کاک سه‌عید له‌وه‌ڵامدا وتی: ئێمه نامان هه‌وێ که‌ سناریۆی عێراق له‌ ئێراندا دووباره‌ بێته‌وه‌، ئێمه‌ پێمان وایه کێشه‌ی ئێران مه‌سه‌له‌ی خه‌ڵکان و نه‌ته‌وه‌کانی ئێرانه‌ و ده‌بێ‌ خۆمان چاره‌سه‌ری گرفته‌کانمان بکه‌ین. ئه‌گه‌ر گه‌لانی ئێران بتوانن له‌ناوخۆیاندا یه‌کگرتووبن و ده‌ست بده‌نه‌ ده‌ستی یه‌ک، ده‌توانن پلانی روخانی رژێم به‌ ئاکام بگه‌یه‌نن. به‌لام نابێ ئه‌وه‌شمان له‌ بیربچێ که‌ ئێمه‌ پێویستیمان به‌ دۆست و هاوپه‌یمان هه‌یه‌ که‌ وه‌ک یاریده‌ده‌ر و فاکته‌ری ده‌ره‌کی که‌ڵکی لێوه‌ربگرین بۆ کۆمه‌گ به‌ پێشکه‌وتنی گرفته‌کانمان. به‌ڵام ئێمه‌ له‌ گه‌ڵ په‌لکێشکردنی هیچ هێزێکی بێگانه‌ نین بۆسه‌ر وڵاته‌که‌مان. کاتی خۆی کاتێک به‌رێز کاک مسته‌فا هیجری داوای له‌ سه‌رۆکی وڵاته‌یه‌کگرتووه‌کانی ئه‌مریکا کرد که‌ بێتوو ده‌ست له‌کاروباری ئێران وه‌ربداو رژێم برووخێنێ. ئێمه‌ هه‌ر ئه‌وکاتی ره‌خنه‌مان ئاراسته‌ی کاک مسته‌فاکرد که‌ نه‌ده‌بووایه‌ ئه‌و هه‌ڵوێسته‌ی وه‌رگرتبا ،چونکه‌ ئه‌و هه‌ڵوێسته‌ ده‌گه‌ڵ ئه‌وه‌ی سیاسه‌تێکی دروست نییه‌ قه‌ت سیاسه‌تی حیزبی ئێمه‌ نه‌بووه‌ و زۆریش له‌سه‌رمان به‌گران که‌وت. ئێمه‌ پێمان وایه‌ به‌رله‌ هه‌موو شتێک ده‌بێ گرینگی به‌ هێزی خۆمان بده‌ین، که‌ئه‌ویش گه‌لانی ئێرانن. نابێ ئه‌وه‌شمان له‌ بیربچێ که‌ بوونی ئه‌مریکا له‌ ناوچه‌ و وڵاتی ئێمه‌دا به‌ پێخۆشبوونی من و ئێوه‌ نییه‌، ئه‌مریکا به‌ شوێن به‌رژه‌وه‌ندی خۆیه‌تی، ئێمه‌ش ده‌ به‌رژه‌وه‌ندی خۆمانیدا نابینین که‌ لێ یان بچینه‌ ده‌ سه‌نگه‌رێ.

سه‌باره‌ت به‌ به‌ره‌ی کوردستانی کاک سه‌عید به‌م جۆره‌ هاته‌ ئاخاوتن: ئێمه‌ پێمان وایه‌ که‌ کورد له‌ کوردستانی ئێران پێویستی به‌ یه‌کگرتنێک یان به‌ واتایه‌کی تر به‌ره‌یه‌ک هه‌یه‌ که‌ بتوانێ له‌ داهاتووی وڵاته‌که‌ماندا کاریگه‌ری خۆی هه‌بێ له‌سه‌ر ره‌وتی رووداوه‌کان، به‌و جۆره‌ی که‌ هه‌موو چین و توێژێکی کۆمه‌ڵی کورده‌واری به‌ هه‌ر چه‌شنه‌ بیروو بۆچوون و سه‌لیقه‌یه‌که‌وه‌ له‌ ده‌وری یه‌ک کۆ ده‌کاته‌وه‌. له‌و نه‌زه‌ره‌شه‌وه‌ به‌ره‌ گرینگه‌ که‌ ئێمه‌ بتوانین یه‌ک ده‌نگی خۆمان له‌ پێوه‌ندی له‌گه‌ڵ مافی نه‌ته‌وه‌که‌مان و داهاتووی وڵاته‌که‌مان دا زووتر یه‌ک لا که‌ینه‌وه‌، چونکه‌ هه‌ر چه‌شنه‌ ناکۆکی و ئیختلافێک له‌ نێوان ریزه‌کانی گه‌لی کورد دا ده‌بێته‌ هۆی دواکه‌وتنی مافه‌کانمان. هه‌ر وه‌ها پێویسته‌ هه‌موو لایه‌ک بزانن که‌ ئێستا و زۆر پێشتریش حیزبی ئێمه‌ ئه‌و خاڵانه‌ی لابردوون که‌ وه‌ک پێش شه‌رت داندرابوون‌ بۆ پێک هێنانی به‌ره‌. ئێمه‌ پێمان وایه‌ که‌ هه‌موو حیزبه‌کانی مه‌یدانی خه‌باتی کوردستانی ئێران ده‌توانن به‌ مافی به‌رابه‌ر له‌و به‌ره‌یه‌دا به‌شداری بکه‌ن. هه‌ر وه‌ها پێمان وایه‌ که‌ پێویسته‌ که‌سایه‌تییه‌ سیاسی و سه‌ربه‌خۆکانیش له‌و‌ به‌ره‌یه‌ دا به‌شدار بن بۆ ئه‌وه‌ی هه‌ر که‌س به‌ قه‌ده‌ر توانایی خۆی سه‌نگ بخاته‌ سه‌ر ره‌وتی کارو چالاکی‌یه‌کانی میلله‌ته‌که‌مان.
دوای ته‌وا بوونی سێمیناره‌که‌ کۆبوونه‌وه‌یه‌کی گشتی تایبه‌ت به‌ ئه‌ندامانی حیزبی هه‌ر له‌و ساڵۆنه‌ پێک هات. له‌و کۆبوونه‌وه‌یه‌ دا کاک سه‌عید ولامی پرسیاری ئه‌ندامانی حیزبی دایه‌وه‌.

هه‌روه‌ها خوێنه‌رانی به‌رێز ئاگادار ده‌که‌ینه‌وه‌ که‌ ده‌قی قسه‌کانی کاک سه‌عید له‌ داهاتوویه‌کی نزیک دا بلاو ده‌که‌ینه‌وه‌.

حیزبی دێموکراتی کوردستان
کۆمیته‌ی
سوئێد

28/02/2007

 سه‌ره‌وه‌. ده‌سپێک.

ئه‌م بابه‌ته‌ چاپ بکه‌!

   ئه‌م بابه‌ته‌ بۆ هاوڕێکه‌ت بنێره:

© www.giareng.com
All rights reserved 2005.