به‌ڕێوه‌چوونی جێژنی 2 ی رێبه‌ندان له‌ وڵاتی نورویژ.

 

رۆژی شه‌ممۆ ٢٢-٠١-٢٠٠۵ی زایینی جێژنی ٢ ی رێبه‌ندان، ۵٩ یه‌مین ساڵرۆژی دامه‌زرانی کۆماری کوردستان له‌ شاری مه‌هاباد، به‌ هاوکاری کۆمه‌ڵه‌ی کولتووری کورد له‌ ئوسلۆ و کۆمیته‌ی حیزبی دیموکراتی کوردستانی ئێران و یه‌کێتی لاوانی دێموکراتی کوردستانی ئێران و یه‌کێتی ژنانی دێموکراتی کوردستانی ئیران له‌ وڵاتی نورویژ ، به‌ڕێوه‌چوو.

به‌ڕیوه‌به‌رانی به‌رنامه‌، کاک ناسر فه‌تاحی و خوشکه‌ گه‌لاوێژ ئه‌رکی به‌ڕێوه‌به‌ری جێژنه‌که‌یه‌یان له‌ ئه‌ستۆ بوو. سه‌ره‌تای به‌رنامه‌که‌ له‌لایه‌ن کاک ناسر فه‌تاحی یه‌وه‌ به‌ پێشکه‌ش کردنی پارچه‌ هه‌ڵبه‌ستێک کرایه‌وه‌ . پاشان له‌ لایه‌ن کۆڕی سروودی یه‌كێتی لاوانی دێموکراتی کوردستانی ئێران له‌ شاری لیله‌سترۆم، سروودی نه‌ته‌وایه‌تی ئه‌ی ره‌قیب پێشکه‌ش کرا و دوابه‌دوای سروودی نه‌ته‌وایه‌تی ئه‌ی ره‌قیب ، خوله‌کێک بێده‌نگی بۆ رێزگرتن له‌ گیانی پاکی شه‌هیدان راگه‌یه‌ندرا.

 

له‌ به‌شی یه‌که‌می به‌رنامه‌که‌ داوا کرا له‌ به‌رێز دوکتۆر حوسێنی خه‌لیقی که‌ چه‌ند خوله‌کێک له‌ سه‌ر ٢ی رێبه‌ندان بۆ ئاماده‌ بووان بدوێت. دوکتۆر حوسێنی خه‌لیقی ئاماژه‌ی دا به‌ کاریگه‌رییه‌کانی کۆماری کوردستان له‌ سه‌ر دۆزی کورد به‌ گشتی و رۆڵگێڕی حیزبی دێموکراتی کوردستانی ئێران له‌ دامه‌زرانی کۆمار و هۆکانی رووخانی ئه‌و کۆماره‌ و له‌ هه‌مان کاتدا تێڕوانینی خۆیشی بۆ داهاتووی تێکۆشانی گه‌لی کورد، پێشکه‌ش کرد.

نۆره‌ گه‌یشته‌ پێشکه‌ش کردنی په‌یامه‌کان و به‌م شێوه‌یه‌ی خواره‌وه‌ پێشکه‌ش کران:

  1. په‌یامی حیزبی دێموکراتی کوردستانی ئێران له‌ نورویژ ، له‌ لایه‌ن کاک ئیبراهیم لاجانی. په‌یامی یه‌کێتی ژنانی دێموکراتی کوردستانی ئێران له‌ نورویژ له‌ لایه‌ن خوشکه‌ ره‌عده‌ پاڵانی، به‌رپرسی  گشتی یه‌کێتی ژنان له‌ نورویژ.
  2. په‌یامی یه‌کێتی لاوانی دێموکراتی کوردستانی ئیران له‌ نورویژ ، له‌ لایه‌ن کاک  مه‌نسوور عه‌زیزی، به‌رپرسی گشتی یه‌کێتی لاوانی دێموکرات  له‌ نورویژ.
  3. په‌یامی حیزبی سوسیال چه‌پی نورویژ له‌ لایه‌ن نوێنه‌ری ئاماده‌ بووی ئه‌و پارته‌ له‌و رێوره‌سمه‌، به‌ڕێز کنووت.
  4. په‌یامی کۆمه‌ڵه‌ی شۆڕشگێڕی زه‌حمه‌تکێشانی کوردستانی ئێران ، له‌ لایه‌ن به‌رێز بیهرۆزی کوردستانی.
  5. بروسکه‌ی پارتی دێموکراتی کوردستانی ئێران، لێژنه‌ی نورویژ.
  6. په‌یامی یه‌کێتی نیشتمانی کوردستان له‌ لایه‌ن به‌ریز شه‌مال عه‌بدوڵقادر.
  7. بروسکه‌ی ( ئار کۆ ئار) ی نورویژی  له‌ لایه‌ن خوشکه‌ ئه‌وین عه‌زیزی یه‌وه‌.
  8. په‌یامی حیزبی شیوعی کوردستان، له‌ لایه‌ن به‌ڕێز، شاهۆ.
  9. په‌یامی حیزبی شیوعی عێراقی له‌ لایه‌ن به‌ریز ئاسۆ.
  10. په‌یامی یه‌کێتی لاوانی دێموکراتی له‌ کوردستان ، له‌ لایه‌ن به‌ڕێز دڵشاد.
  11. په‌یامی پارتی دێموکراتی کوردستان_ باکوور ، له‌ لایه‌ن به‌ڕیز روودی.          
  12. په‌یامی ئاربایده‌ پارتی له‌ لایه‌ن نوێنه‌ری ئاماده‌ بووی ئه‌و پارته‌ له‌و بۆنه‌یه‌دا.
  13. بروسکه‌ی کۆمیته‌ی سکاندیناوی یه‌کێتی شۆڕشگێڕانی کوردستان.
  14. کورته‌ دووانێکی کاک ره‌حیم ره‌شیدی ، به‌رپرسی یه‌کێتی لاوانی دێموکراتی  کوردستانی ئێران له‌ وڵاتی سووئد له‌ سه‌ر ٢ ی رێبه‌ندان.

دوابه‌دوای په‌یامه‌کان، هه‌ڵبه‌ستی' دووبه‌ره‌کی' ی مامۆستا عه‌بدووڵا په‌شێو، له‌ لایه‌ن خووشک و برای لاو، ته‌وار و تۆڵه‌ ئه‌لیاسی، دوو ئه‌ندامی یه‌کێتی لاوانی دێموکراتی کوردستانی ئێران، پیشکه‌ش کرا.

پاشان سیاچه‌مانه‌ له‌ لایه‌ن کۆڕی سیاچه‌مانه‌وه‌ پێشکه‌ش کرا و سه‌رنجی به‌شدار بووانی بۆ لای خۆی راکێشا.

دوابه‌دوای به‌زمی سیاچه‌مانه‌، پشوویه‌کی چه‌ند خووله‌کی له‌ لایه‌ن به‌ڕیوه‌به‌رانی به‌رنامه‌که‌وه‌ راگه‌یه‌ندرا.

له‌ به‌شی کۆتایی به‌رنامه‌که‌ نۆره‌ گه‌یشته‌ هوونه‌رمه‌ندان کاک قادر ئه‌لیاسی و ده‌لال و نه‌جمه‌دین غوڵامی.

سه‌ره‌تا له‌ لایه‌ن هوونه‌رمه‌ند کاک قادر ئه‌لیاسی یه‌وه‌ ده‌ستکرا به‌ پێشکه‌ش کردنی گۆرانی و ئه‌و هوونه‌رمه‌نده‌ به‌ڕێزه‌ کۆڕی هه‌لپه‌ڕکێی گه‌رم کرد و توانی به‌ ده‌نگه‌ شاد و به‌ سۆزه‌که‌ی سه‌رنجی هه‌ست و رۆحی به‌شداربووان بۆ لای خۆی راکێشێت.

دوابه‌ دوای کاک قادر نۆره‌ گه‌یشت به‌ هونه‌رمه‌ندی به‌ڕێز، ده‌لال و ئه‌و هونه‌رمه‌نده‌ کۆڕی گه‌رمی هه‌لپه‌ڕکێکه‌ی زیاتر رازانده‌وه‌.

پاش هونه‌رمه‌ند ده‌لال ، نۆره‌ گه‌یشت به‌ هونه‌رمه‌ند نه‌جمه‌دین غوڵامی و ئه‌و هونه‌رمه‌نده‌ش تا کۆتایی به‌رنامه‌که‌ هه‌روا به‌رده‌وام کۆڕی گه‌رمی هه‌لپه‌ڕکێکه‌ی به‌ گه‌رمی راگرت و تا کاتژمێر ٢٤، کۆڕی سه‌ما و هه‌لپه‌رکێی به‌شدار بووانی ئه‌و بۆنه‌یه‌، به‌رده‌وام بوو.

سه‌رکه‌وتوو بن!

 به‌شی راگه‌یاندنی یه‌کێتی لاوانی دێموکراتی کوردستانی ئێران له‌ وڵاتی نورویژ.

رێکه‌وتی ٢٣-٠١-٢٠٠۵ی زایینی