من و رێبه‌ندان

 

نووسینی: حشمه‌ت خوسره‌وی

 

فره‌وه‌خته‌ مانگ رێبه‌ندان بیه‌سه‌ قه‌شه‌نگترین هه‌ساره‌ و له‌ ماڵه‌کانمانا شه‌وقده‌یتووه. فره‌وه‌خته‌ ئاره‌زوه‌کان دڵ خوه‌م و گشت منداڵیه‌ل فه‌قیر کوردستان وه‌ ناو لاپه‌ڕه ته‌ڵاییه‌کان ‌رێبه‌نداناوه‌ ‌دویایا گه‌ردیه‌م.

رێبه‌ندان له‌وه‌رز سه‌ردسیر زمسان له‌ داڵک بی، وه‌لێ خه‌ونیه‌ل دایه‌‌گه‌وره‌م له‌ ناو ئی وه‌رزا له داڵک بی و، پاگرت.

له‌ رێبه‌ندابی که‌، ئه‌ڕا ئه‌وه‌ڵ جار روح ئازادی له‌ میلکان خه‌وه‌یه‌ل سه‌وز داڵکم ده‌ستی له‌‌مل ‌دویه‌تیه‌ل و کوریه‌ل سابڵاغی ‌کرد له‌ رێبه‌ندان دابی که‌، ته‌مام گوڵه‌ قشه‌نگه‌کان دیار کوردیه‌ل دواره‌ له‌ داڵک بین و، ئاشقیه‌ل ‌و جوانیه‌ل کورد ئه‌را ئه‌وه‌ڵ جار وه‌ ئازادی گوڵ دان له‌ سه‌ر سینه‌ی هاوده‌مه‌کانیان. و هه‌ر له‌ی مانگه‌ بی که‌ دویتیه‌ل وکوریه‌ل ئاشق ئه‌را ئه‌وه‌ڵ جار ماچ ئازادی کردنه‌ قه‌شه‌نگترین دیاری له‌ شه‌ویه‌ل خوه‌ماشارکیا.

له‌ ریبه‌ندانا بیکه‌، مه‌لوویچکه‌ باڵشکیایه‌کان میلکان داڵکم دواره‌ هاتنووه‌ ئه‌را لانه‌کان خوه‌یان و فستیواڵ سه‌روه‌خویی به‌رپاکردن. له‌رێبه‌ندانا بی که‌، پارچه‌ له‌ت له‌تکریایه‌کان کوردستان هاتنووه‌ و، له‌ مه‌یان چوارچراخ سروودی پێشه‌وا کردنه‌ خه‌ڵات ئه‌ڕا منداڵیه‌ڵ گشت کوردستان. له‌ رێبه‌ندانا بی ئه‌را ئه‌وه‌ل جار وه‌ زوان داڵکم نویسام: داڵکه‌ خوه‌شم وه لیت تێ... خوه‌شم وه‌ لیت تێ، چوینکه‌ ئیوه‌ داڵکیه‌ل ئیمه‌ بین‌ که‌ له‌ باوش خوه‌تان پێشه‌وایه‌کتان گه‌وره‌کرد‌ ئه‌را ئه‌وه‌یه‌که ‌، ‌کوردستان له‌ ژیر چه‌پووک ‌فارس شوینیست نجات بیه‌یت.

هه‌رچه‌ن رێبه‌ندان له‌وه‌ر چه‌‌و ملیون مناڵ کورد خنکیاو هه‌ناسه‌کانی وه‌کار‌که‌فت، وه‌لی ساڵیه‌ل فره‌یه‌که‌ هه‌ناسه‌ وه‌جیمایه‌کان پێشه‌وا بیه‌‌سه‌ ده‌رس دیروکمان. ئاخر تازه‌ ئه‌و بیه‌سه حه‌قیقه‌تێک له‌ عه‌کسیه‌ل دویه‌که‌و ئیسه‌و شه‌وه‌کیمان. چوارچراخ هه‌مویشه‌ قیبله‌ی ئازادییه ئه‌را ئه‌و که‌سیه‌ل له‌ ری ئازادیا کۆچ کردن و چه‌قڵ چه‌و‌ه ئه‌‌را ته‌مام ئه‌و که‌سیه‌له‌ که‌ له‌ ئازادی ترسیه‌ن.

ئه‌گه‌ر چوارچرا نه‌وایاته‌ ئه‌ی ئیسه‌ چ جوری له‌ سابلاغ ئی یه‌مکه‌ که‌پووه‌ هه‌رچی روژه‌ سروود ئازادی خوه‌نن؟ ئه‌گه‌ر ئیمرو له‌ هه‌ر مالیکی کوردستان باس له‌ ئازادی کریه‌ت ئه‌و ده‌رسێکه‌ کوماره‌ جوانه‌مه‌ریه‌که‌ی کوردستان(۵۹) رێبه‌ندان له‌یه‌و وه‌ر یایمان دا.. ئه‌گه‌ر ئیسه‌ هه‌زران ده‌نگ له‌ ناو زیندانه‌کان ئیسلام خوینو شمشیرا، وه‌قه‌له‌مه‌کانیان ده‌فاع له‌ چوارچراخ که‌ن، ده‌ررسێکه‌ تابڵووه‌ ترسناکه‌کان (۵۹) خاکه‌ڵیوه له‌یه‌و وه‌ر له‌ سابڵاغ نیشانماندایه‌ی.

ئاخر پێشه‌وا و کۆمار‌ ئه‌زیزترین داسستانیکه‌ که‌، بایه‌د شه‌وانه‌ مناڵه‌کانمان وه‌ده‌م خوه‌ندنه‌وه‌ی ئی داستانووه‌ بخه‌فنیمن