ته‌رمی کاک عه‌لی ئیبراهیمی ناسراو به "عه‌لی سووری بێوران" له‌ ناو غه‌م و په‌ژاره‌ی خه‌ڵکی ناوچه‌ی سه‌رده‌شت دا به‌ خاک سپێردرا

 

ته‌رمی خوا لێخۆشبوو کاک عه‌لی ئیبراهیمی ناسراو به‌ " عه‌لی سووری بێوران" ، پێشمه‌رگه‌ی پێشووی حیزبی دێمۆکراتی کوردستانی ئێران که‌ له‌ وڵاتی سوئێد به هۆی کاره‌ساتی وه‌رگه‌رانی ماشێن گیانی له‌ ده‌ست دا بوو، له‌ ناو پێشوازی گه‌رمی پڕ له‌ کوڵ و ماته‌مینی خه‌ڵکی شاری سه‌رده‌شت و ناوچه‌ی سه‌رده‌شت و به‌ تایبه‌ت گوندی بێوران به‌ خاک سپێردرا.

به‌شداری زۆر وبه‌رفراوانی خه‌ڵک له‌و ڕێ‌وڕه‌سمه‌ دا بوو به‌ هۆی ئه‌وه‌ که،‌ هێزه‌ سه‌رکوتکه‌ره‌کانی ڕێژیم به‌ تایبه‌ت هێزه‌کانی " ئیتلاعات " ی ڕێژیم فه‌رمان بده‌ن که‌ ته‌رمی کاک عه‌لی سوور به‌ ناو شار و شه‌قامی گشتی دا به‌ره‌و شوێنی به‌ خاک سپاردنی نه‌به‌ن، هه‌ر بۆیه‌ ته‌رمی کاک عه‌لی سوور به‌ ڕێگای ده‌ره‌وه‌ی شار دا به‌ره‌و زێدی له‌ دایک بوونی ( بێوران ) خوارێ، راگوێزرا. ئه‌وه‌ش نیشان ده‌دا که‌ ڕێژیم هه‌ر وه‌ک جاران له‌ خه‌ڵکی شۆرشگێر و به‌ تایبه‌ت هێزی بوێر و فیداکاری پێشمه‌رگه‌ی کوردستان‌ ده‌ترسێ و هه‌ر بۆیه‌ش وا ترسه‌نۆکانه‌ ڕێگه‌ له‌ هێنانی ته‌رمی کاک عه‌لی سوور به‌ ناو شار دا ده‌گرن.