خه‌رمان...

 

حه‌لێو نییه‌ ، نازداره‌ بنه‌به‌ستووه‌که‌ی                                                       

کۆچی کاروانی سووتان!                                                                          

خه‌رمانی ئه‌م چاوداگرتنه‌ی گزنگه‌کانی بزه‌ی لێوه‌ ته‌ڕه‌کانی تۆ                       

له‌ لێزمه‌ی شه‌مه‌نده‌فه‌رێکی زووڕۆی                                                         

به‌هاره‌ بارانێکی ره‌ویو ده‌چێ و                                                                

قه‌تیسی چاوه‌ مه‌نگه‌کانی تۆ                                                                   

پڕه‌ له‌ راز و درکاندنیش                                                                        

له‌ ژێر چه‌تری چه‌تره‌ خوار بووه‌کانی درۆوه‌                                                

بۆ به‌یانی شه‌فه‌قێکی هه‌ناسه‌ته‌ڕ                                                              

که‌وتۆته‌ چنگه‌ پرچه‌ و                                                                            

نامۆیی بووه‌ به‌ ته‌م و  دووکه‌ڵانی مزی فه‌وتاو                                            

ئێستاشی له‌ گه‌ڵ بێ،                                                                            

عه‌وداڵی هه‌رده‌و هه‌ردی کیشوه‌ره‌ وونه‌کانی                                                

ئامانه‌!                                                                                             

بڕۆ له‌ سۆفی‌یه‌ک بپرسه‌ و نهێنی‌یه‌کانی  ووشکایی که‌ناره‌کانی لێو و                  

ویسکه‌ ویسکی چپه‌ی، له‌ پاچاڵی پله‌ گۆشتێکی پڕ له‌ رازی  بۆ                          

هه‌ڵێنجه‌!                                                                                          

بڕۆره‌وه‌ به‌ ووشه‌کانی خوادا                                                                    

ئه‌قیانووسی ئه‌م سه‌رسووڕمانه‌ی لێوه‌رگره‌ و                                               

سه‌مفۆنیای حه‌زه‌کانت له‌ جیهانی گڵاویی  درۆدا                                          

قووتار بکه‌!                                                                                         

خه‌رمانێک کۆ بکه‌وه‌ بێ چقڵ                                                                  

ئاسمانێک بکه‌  به‌ ئاوێنه‌ بێهه‌ور بێت و                                                     

له‌ ئاوێک بخۆوه‌ بێ ڕیا بێ!                                                                   

چاو له‌ چاوانی شه‌و مه‌بڕه‌ و به‌ هه‌رێمی سۆزی رۆژیشدا                                 

هه‌نگاو مه‌نێ!                                                                                      

با  هزر، بنه‌ی کۆچی تێگه‌یشتنت بۆ بپێچێ و                                              

گۆزروانی ئه‌م لێره‌واره‌ی مانت ،                                                              

با بێ پرچ نه‌بێت!                                                                                 

تۆ له‌ بازنه‌ی نوێ بوونه‌وه‌ی هه‌ر ساڵێکدا                                                   

شین بۆ دوا هه‌ناسه‌کانی " رۆح" ده‌که‌ی!                                                      

"رۆح" ی تۆ هه‌نبانه‌ی خه‌رمانێک له‌ سۆز و                                                 

ئاسمانێک له‌ ئه‌ستێره‌یه‌!                                                                      

کامی خه‌یاڵه‌کانی تۆ                                                                             

جیهانێک له‌ به‌زه‌ی و دارستانێک له‌ ئه‌ڤینه‌!                                               

له‌ خاڵێکه‌وه‌ ده‌ست پێکه‌وه‌ و خه‌رمانێک له‌، داهاتوو ، کۆ که‌ره‌وه‌و                   

ئه‌مجاره‌یان ئیدی هه‌نیسک مه‌ده‌ به‌ ده‌م باوه‌ و                                            

هزریش له‌ ئاشی ئاو  مه‌که‌!                                                                   

٢٧−١٢−٢٠٠٤

مه‌نسوور عه‌زیزی