خۆشه‌ویستی یان ئازادی سێكسی و ئایدیای فیمینزمی؟

كازیوه ساڵح

(ئه‌گه‌ر خۆشه‌ویستی وون بوو ، ئه‌وا هه‌موو

ئه‌و شتانه وون ده‌بن كه پێویسته هه‌بێت)

شكسپیر

 

مامۆستاكه‌م له درێژه‌ی پرسیاره‌كانیدا كه له هه‌موومانی ده‌پرسی ، نۆبه هاته سه‌ر ئه‌و هاورێ پۆله‌م كه ته‌نها چه‌ند مانگێك بوو وڵاتی جوبه و عه‌مامه‌ی به جێ هێشتبوو، پرچه‌كانیشی ته‌نها ئه‌و چه‌ند مانگه هه‌وای ده‌ره‌وه‌ی حیجاب و جوبه‌ی هه‌ڵمژی بوو ده‌پرسێت :

-          تۆ په‌یوه‌ندی خۆشه‌ویستیت له گه‌ڵ هیچ كوڕێكدا هه‌یه له‌وه‌ته‌ێ هاتوویته ئێره؟

ئه‌ویش وه‌لامی مامۆستاكه‌مان ده‌داته‌وه :-

-          نه‌خێر من هیچ كه‌سێكم خۆش ناوێت .

-          مامۆستا : به‌ڵام تۆ دوێنێ گوتت من له گه‌ڵ هاوڕێ كوڕه‌كه‌م boy friendدا ده‌ژیم ! ،كه وابزانم ئه‌مه جورئه‌تێكی باشه بۆ خه‌ڵكانی لای ئێوه چونكه قوتابیه‌كانی دی بۆیان باس كردووم كه ژن لای ئیوه ئه‌و مافه‌ی نیه؟

-          قوتابی : به‌ڵێ وایه من له گه‌ڵ هاوڕێ كوڕه‌كه‌م ده‌ژیم ، به‌ڵام خۆشم ناوێت وه من نامه‌وێت پیاوم خۆش بوێت چونكه فیمنستم.

-          به خۆم نه‌بوو كه زۆر به توڕه‌ی لێی هاتمه وه‌ڵام كه فیمنست له‌و وون بوونه‌ی ئه‌و بێ به‌ریێه‌و ، ئه‌و تاوانه چۆن ده‌داته پاڵ فیمنست.

-          مامۆستاكه‌مان گووتی تۆ یارمه‌تیم بده من پێم خۆشه لێی بپرسم كه ئه‌و نایه‌وێت پیاو خۆش بوێت له ژێر ناوی هه‌ر بیانوویه‌كدا بێت ، ئه‌ی به چ بیانوویه‌ك له گه‌ڵ ئه‌و كوڕه‌دا ده‌ژی ؟

زۆر به متمانه بوون به خۆ و به ده‌نگێكی نێرانه گووتی :

-          له گه‌ڵیدا ده‌ژیم به به‌رژه‌وه‌ندی فیزیكی خۆم ، له‌شم پێویستی پییه‌تی .

منیش لێی ده‌پرسم :

-          باشه په‌یوه‌ندی له‌شی بێ په‌یوه‌ندی ڕۆحی په‌یوه‌ندێكی ئاژه‌ڵیانه نیه ،ئه‌ی لای كوڕه‌كه خۆشیدا به‌م شێوه قسه ده‌كه‌یت یان ده‌ڵێیت خۆشم ئه‌وێیت ؟!

-          به‌ڵێ ئه‌ڵێم خۆشم ئه‌وێت بۆ به‌رژه‌وه‌ندی خۆم .

لێره‌دا هه‌ر یه‌ك واز له گفتووگۆكردنه‌كه ده‌هێنین چونكه ده‌زانین به‌ره‌و قێزه‌ونی ده‌چێت و هێڵی سور ده‌بڕێت به‌ره‌و ناشیرین كردنی هه‌سته جوانه‌كان و ڕاستگووی .

ئه‌و وتوێژه‌ی كورته‌ی سه‌ره‌وه وبانگه‌شه‌ی هه‌ندێ خانمی كورد كه به‌و دوایه‌ له واده‌ی زماوه‌ند كردنی نوێمان له گه‌ڵ عێراقدا په‌یدا بوون و له ڕۆژنامه‌كانه‌وه ناوی خۆیان ده‌ڵێن و دان به‌وه‌دا ده‌نێن له‌ش فرۆشن گوایه جه‌سورییه ، پاڵنه‌ر بوون بۆ نووسینی ئه‌م بابه‌ته ، تێگه‌شتن له خۆشه‌ویستی لای فیمینزم و مرۆڤی فیمنستی وه‌كو ئه‌وه‌ی كه هه‌یه ، نه‌ك وه‌كوو ئه‌وه‌ی خواستی ناچیزه‌ێ مرۆڤه‌كان چوارچێوه‌ی بۆ داده‌ڕژێت و به‌هانه‌یه‌كی بۆ ده‌دۆزنه‌وه كه ئه‌و خواسته نه‌شیاوه‌یان له خۆ بگرێت ، ژنی ڕۆژهه‌ڵاتیش چونكه خاوه‌نی بیر و خۆینده‌واری و ئه‌ندیشه‌ی دژواره و له فكری فیمینزمی و مرۆڤی فیمینست تێناگات ، له بنه‌مادا فكره‌كه‌ش به مرۆڤی ڕۆژهه‌ڵاتی نامۆیه ، بۆیه په‌نا ده‌باته به‌ر ئه‌و چه‌مكه وه‌كو پاڵپشت بۆ هه‌ڵه‌كان و ناچیزه‌كانی ژیانی خۆی به كاری ده‌هێنێت.

 

چه‌مكی خۆشه‌ویستی ؛

چه‌مكی خۆشه‌ویستی كه پێكهاته‌ی گرنگی ژیانی مرۆڤه ، هه‌ر یه‌ك له زانایان و پسپۆڕان و ده‌روون ناسان ڕاڤه و لێكۆڵدنه‌وه‌و شرۆڤه‌ی خۆیان هه‌بووه ده‌رباره‌ی ئه‌و چه‌مكه و هه‌میشه‌ش به پێی گۆڕانكاریه ئابووری و شارستانیه‌كان گۆڕانكاری به سه‌ر زۆرێك له ڕاڤه كردنه‌كاندا هاتوو ،هه‌ڵبه‌ت بۆ دۆزینه‌وه‌ی هێڵی سه‌ره‌تای هه‌ر چه‌مكێك پێویسته بگه‌رێنه‌وه بۆ شارستانیه‌تی ده‌وڵه‌مه‌ندی یونان كه هه‌میشه فڵچه‌ی یه‌كه‌می ئه‌ده‌بی و فكری و فه‌لسه‌فیان له‌و چه‌مكانه داوه ، هه‌ر وێنانیه‌كانیش بوون هێڵی جوان و ناشیرینی خۆشه‌ویستیان دیاری كرد و پۆلێنیان كرد بۆچه‌ند جۆر له‌وانه ؛

-          خۆشه‌ویستی سۆزداری یان ڕۆمانسی

-          خۆشه‌ویستی لۆژیكی .

-          خۆشه‌ویستی هاوریه‌تی

-          خۆشه‌ویستی تاكه ‌كه‌س .

-          خۆشه‌ویستی پشت به‌ستوو به به‌رانبه‌ر .

نامه‌وێت بچمه سه‌ر شیته‌ڵكردنی جۆری خۆشه‌ویستیه‌كان ، هێنده‌ی مه‌به‌ستم ماهیه‌تی خۆشه‌ویستیه لای مرۆڤ ، هێنده مه‌به‌ستم شاره‌زایی له به‌شه‌كانی نیه ، جونكه له بنه‌مادا هه‌موو جۆره‌كان لام دابه‌ش ده‌بن به سه‌ر دوو ته‌وه‌ردا یان به سه‌ر ته‌وه‌ر و دژه ته‌وه‌ردا، ئه‌وانیش خێر و شه‌ڕ و ڕاست و درۆیه ، به‌و واتای هه‌ندێك خۆشه‌ویستی ده‌كات له پێناوی سۆزێكی مرۆڤانه وزه به‌خش به توانا و جوانكار بۆ ژیان ، خۆشه‌ویستی ته‌‌نها له پێناوی خۆشه‌ویستیدا ده‌كات ، هه‌ندێكی دی خۆشه‌ویستی ده‌كات له پێناوی مه‌به‌ستێكی دیاری كراودا و نواندی خۆشه‌ویستی ناڕاست ده‌كات به‌ ئامراز له پێناوی گه‌شتن به ئامانجان ، ئه‌و ئامانجه‌ش له كه‌سی ( من ناوی ده‌نێم فریودراو ) به دی دێت بۆ كه‌سی فریوده‌ر نه‌ك خاوه‌ن سۆزی مرۆڤانه . به‌ڵام سه‌رجه‌م ڕاڤه‌كان ناتوانێت ئه‌وه له هزری مرۆڤی خاوه‌ن سۆزدا بسڕێته‌وه كاتێك بیری بۆ لای ته‌وه‌ری یه‌كه‌می خۆشه‌ویستی ده‌فرێت واتای قوربانی دان ، لێبوردن ، چاوپۆشین له هه‌ڵه و كه‌م و كوڕیه‌كانی خۆشه‌ویست ، چاودێریكردن بۆ پاراستن و هه‌وڵدان بۆ به‌خته‌وه‌ر كردنی به‌رانبه‌ر ، رازی كردن و هه‌وڵدان بۆ باڵاكردنی پله و پایه‌ی خۆشه‌ویست و به‌رزڕاگرتنی مادی و مه‌عنه‌وی ئه‌و خێزانه‌ی خۆشه‌ویست له خۆ ده‌گرێت و ته‌نانه‌ت له هه‌ندێ باردا ده‌ست به‌ردان له‌و خۆشه‌ویسته له پێناوی ڕاگرتنی به‌رژه‌وه‌ندی خۆشه‌ویستدا و ...تاد به هزریدا گوزه‌ر نه‌كه‌ن . ئه‌گه‌ر خه‌یاڵیشی به لای ته‌وه‌ری دووه‌مدا ڕۆشت ده‌روونی سه‌غڵه‌ت نه‌بێت به گوومانی دوو ڕووی ، درۆ ، بێ وه‌فای ، غه‌در كردن و بێ متمانه‌یی و سه‌رجه‌م گومانه نه‌شیاوه‌كانی دی كه به‌ ته‌واوی خاڵی دابڕ ده‌بێی له نێوان هه‌ردوو لایه‌ندا به واتای خێر و شه‌ڕ هزری داگیرنه‌كه‌ن .

ئه‌گه‌ر له چه‌مكی خێر و شه‌ڕیش وردبینه‌وه ده‌زانین ئه‌و چه‌مكه‌یه زۆربه‌ی زانایان تیوره‌كانی خۆیان له سه‌ر بونیاد ناوه‌و هه‌ر له سه‌ره‌تای سه‌رهه‌ڵدانی فه‌لسه‌فه‌شه‌وه داهێنه‌رانی فه‌لسه‌فه له فه‌لسه‌فه‌ی خۆشه‌ویستی دواون ، سوكراتی یه‌كه‌م داهێنه‌ری فه‌لسه‌فه له‌و مێزگرده به ناوبانگه‌دا كه به " المادبه " ناسراوه ، سه‌باره‌ت به تێڕوانینی سوكراته بۆ خۆشه‌ویستی پله‌كانی خۆشه‌ویستی ده‌رده‌خات كه خۆشه‌ویستی له‌شی و ڕۆحی و نموونه‌یی هه‌یه ، وه پێی وابوو خۆشه‌ویستی نموونه‌یی ئه‌قڵی مرۆڤ ده‌توانێت تێدا باڵا بێت به سه‌ر جیهانی هه‌ست و ڕۆحدا كه به‌ستراوه به خه‌ڵكه‌وه بۆ جیهانی جوانی ڕه‌ها و نموونه ، ئه‌و خۆشه‌ویستی یه ش لای ئه‌فلاتۆن بوو به ئامانجی ئامانجه‌كان .چونكه لای ئه‌فلاتۆن خۆشه‌ویستی له جوانی هزر و زه‌ینه‌وه گه‌ڵاله‌ ده‌بێت و باڵا ده‌بێت بۆ كرداری جوان ، شێوه‌ی جوان ، بۆ بیرو باوه‌ڕی جوان هه‌تا بیرو باوه‌ڕی جوانی ڕه‌ها . ئه‌مه‌یه كه پێی ده‌گوترێ خۆشه‌ویستی ئه‌فلاتۆنی .به پێوه‌ری فه‌لسه‌فی كه سه‌رجه‌م پێوه‌ره مۆڕاڵی و هزری و شیاوی وجوانی ده‌گرێته‌وه ته‌وه‌ری دووه‌می خۆشه‌ویستی كه په‌یوه‌ندی نێوان فریوده‌ر و فریودراوه له پێناسه‌ی خۆشه‌ویستیدا زه‌مینه‌ی نیه و سه‌رجه‌م ئه‌و چه‌مكه پیرۆزانه‌ی سه‌ره‌وه كه له چه‌مكی خۆشه‌ویستیدا تواونه‌ته‌وه ڕێگه به هیچ پێناسه‌یه‌كی دژ نادات خۆی بخزێنه‌ته نێو مه‌ودا فراوانه‌كانی ، ئه‌وه‌شی پێناسه‌ و چه‌مكێكی دی بداته پاڵ جگه له خۆ ده‌ربازكردن به‌ره‌و كه‌ناری خۆ رازی كردن به لۆژیكی ناڕاست ناچێته چوارچێوه‌ێ پێناسێكی دییه‌وه .

 

ئایه خۆشه‌ویستی نموونه‌یی یان خاوێن بوونبووه یان تیور ؟!

 

هه‌مووان كۆكین له سه‌ر ئه‌وه‌ی كه خۆشه‌ویستی له عه‌قڵی ناوه‌وه دروست ده‌بێت له میانه‌ی په‌یوه‌ندی تاكه كه‌سه‌وه به ده‌وروپشت ، ئه‌گه‌ر له (سوشر)ی زاناش بپرسین پێمان ده‌ڵێ :" كێ یاسا بۆ خۆشه‌ویستی داده‌نێت ، خۆشه‌ویستی له هه‌موو یاساكان مه‌زنتره كه مرۆڤ بۆ دانیشتوانی سه‌ر ڕووی زه‌وی داڕشتووه " ، به‌ مه‌به‌ستی گه‌شتن به‌و ده‌ربڕینه و زانینی هه‌بوون و نه‌بوونی خۆشه‌ویستی بێگه‌رد پێویسته بگه‌رێنه‌وه بۆ داستان و چیرۆكه دیرۆكیه‌كان ، كه دیاره عه‌ره‌ب خۆی ده‌كات به خاوه‌نی ئه‌و به‌خشنده‌ییه و له سه‌رچاوه‌ و وتوووێژه‌كانیاندا شانازی به‌وه‌وه‌ ده‌كه‌ن كه خۆشه‌ویستی بێگه‌رد (العذري ) له قه‌بیله‌ی ( بني عذرة )وه سه‌رچاوه‌ی گرتووه كه نیشته‌جێی باشوری حجاز له ( وادی القری ) بوون ، كه‌وتوه‌ته نێوان ( تێما و خیبر )ی پڕ له دارخورما و دارستان و سه‌وزایی ,گوایه به هۆی ئه‌و دیمه‌ن سیحر ئامێزه‌ی و به‌خته‌وه‌رییان له ڕووی بژیوی ژیان و بێ شه‌ڕو شۆڕی له ناوچه‌كه‌یاندا ، خه‌ڵكی ئه‌و هه‌رێمه خه‌ڵكانیكی هه‌ستیار بوون ، له به‌ر ئه‌و هۆیه هه‌ر له‌ویشه‌وه شیعری لیریك سه‌ری هه‌ڵداوه ، گۆرانیه‌كانیان پڕ له سۆز و غه‌م بوون به‌رانبه‌ر به خۆشه‌ویستی و ئه‌و سۆزه به تینه‌ش پاڵنه‌ر بوو بێت بۆ ئه‌وه‌ی مردنی به كۆمه‌ڵیان تێدا بڵاو بێته‌وه له پێناوی خۆشه‌ویستیدا ، ئه‌وه‌شیان له میانه‌ی ئه‌و پرسیار كردنه‌وه دێت كه جارێك له پیاوێكی ( بني عذرة ) به ناوی عروه بن حزام العزری ده‌پرسن : تۆ له چ قه‌بیله‌یه‌كیت ؟ئه‌ویش له وه‌ڵامدا ئه‌ڵێ من له‌و قه‌بیله‌یه‌م كه عاشق بن ده‌مرن . به‌رانبه‌ره‌كه‌شی سوێندی ده‌دات كه ڕاسته ئه‌وان خاوه‌نی ناسكترین و هه‌ستیارترین دڵن ، له وه‌ڵامدا ده‌ڵێ به‌ڵێ سوێند به خودا سی (30) لاوم به جێ هێشت كه مه‌رگ دایپۆشیبوون و هیچ ده‌رمانێكیشیان نه‌بوو جگه له خۆشه‌ویستی ،پرسیار كه‌ریش پێی ده‌ڵێ چۆنه عه‌شق ده‌تان كوژێت ئه‌ی كۆمه‌ڵی بنی عزری ؟! له وه‌ڵامدا ئه‌ڵێ چونكه بێگه‌ردمان ده‌كاته‌وه‌و بێگه‌ردیش ده‌مانكات به خاوه‌‌نی دڵی ناسك و عیشقیش خۆشه‌ویستیه پاك (عذري )یه‌كه‌مان ده‌نه‌خشێنی یه

(یاخۆد ده‌ڕازێنێته‌وه ).

 

ئه‌گه‌ر له ناوه‌ڕۆكی ئه‌و گفتو گۆیه وورد بینه‌وه بۆمان ده‌رده‌كه‌وێت كه هه‌مان تیوری ئه‌فلاتۆن كه چاندنی خێر و په‌سه‌ندیه له مرۆڤدا به‌ره‌ و نموونه‌ی بردن ، به‌ڵام لای ئه‌فلاتۆن به تیور داڕێژراوه و لای ئه‌و قه‌بیله عه‌ره‌بیه به كردار ، گه‌رچی من له گه‌ڵ ئه‌وه نیم ئه‌وان سه‌رچاوه‌ی ئه‌و بێگه‌ردی و خۆشه‌ویستیه به تینه بن ، چونكه ئه‌گه‌ر باسی نێوان ( ترستان و ئه‌یزوڵد ) كه یه‌كه‌م داستانی ئه‌ورۆپییه‌ بكه‌ین بۆمان ده‌رده‌كه‌وێت له‌و خۆشه‌ویستییه‌ی لای به‌نی عه‌زره هه‌‌بووه لای هه‌ردوو پاڵه‌وانی ئه‌و داستانه به هێزتر و بێ گه‌رد تر بووه ، ئه‌ویش له میانه خۆشه‌ویستی نێوان چێنه جیاوازه‌كانی كۆمه‌ڵه‌وه سه‌ر هه‌ڵده‌دات ، ئه‌و كاته‌ی پاشایه‌ك به‌ ناوی (مارك ) ،( ترستان ) ده‌نێرێت به شوێنی ئه‌یزۆڵد دا بۆ ئه‌وه‌ی بیگه‌یه‌نێت به كۆشكی پاشایه‌تی له‌وێ له گه‌ڵ پاشادا زه‌ماوه‌ند ساز بكه‌ن ، به‌ڵام خۆشه‌ویستی ده‌که‌وێته نێوان هه‌ردوو لایان واته ترسان و ئه‌یزۆڵد وه یاساكانی كۆمه‌ڵ و جیاوازیه چینایه‌تیه‌كان و ئه‌و بێگه‌ردێی خۆیان ئه‌و خۆشه‌ویستیه‌ش ناگه‌یه‌نێت به ئاكام . وه‌كو له چیرۆكه‌ك‌‌دا هاتووه كاتێك ده‌گه‌ن به جێگه‌یه‌ك كه هه‌ردووكیان به یه‌كه‌‌‌وه ده‌خه‌ون شمشێرێك ده‌خه‌نه نێوان هه‌ردووكیان هێما به بێ گه‌ردی یاخود پاكی ، ڕۆمانی مردن له بوندوقیه‌ی نووسه‌ری ئه‌ڵمانی تۆماس مان هه‌مان جۆر خۆشه‌ویستی ژیانی پاڵه‌وانه‌كه‌ی به مه‌رگ ده‌سپێرێت ، مه‌دام ‌بۆڤاریش (فلۆبیر ) به‌و كولێره‌ێه نه‌مرد كه هه‌لنه‌ده‌هات له به‌ری به‌ڵام هێنده به دووی ئه‌و خۆشه‌ویستیه ڕۆمانسیه‌دا گه‌را كه ده‌رباره‌ێ خۆیندبیه‌وه و به دوویدا گه‌را بوو تا دوا جار له ئه‌نجامی به واقع نه‌بوونی ئه‌و خه‌ونه خۆی كوشت . هه‌روه‌ها ئه‌و داستانه لای كورد یش به مه‌م و زین و خه‌ج و سیامه‌ند و وه‌لی دێوانه‌ و شه‌م و لای دراوسێكان به لیلی و مه‌جنون و شیرین و فه‌رهاد ، شێخی سه‌نعان ، جه‌میل و بوسه‌ینه ،قه‌یسی دریح و عروه‌ی حه‌زام ...هتد.كۆتایی دێت .

كه‌واته هه‌ر له سه‌ره‌تای مێژووی مرۆڤایه‌تی و هه‌ست كردنی به ژیانی هاوبه‌ش هه‌ر دوو چه‌مكی خێر و شه‌ڕ لای مرۆڤ له خۆشه‌ویستیدا به‌ر جه‌سته بووه ، هه‌ر یه‌ك له‌م نموونانه‌ش راستی و دروستی تیوره‌كه‌ی ئه‌فلاتۆن و خۆشه‌ویستی ئه‌فلاتۆنی و خۆشه‌ویستی بێگه‌رد ده‌سه‌لمێنن كه لای سه‌رجه‌م نه‌ته‌وه‌كان هه‌بووه و لای هه‌مووشی یه‌ك سنوور بێ گه‌ردی خۆشه‌ویستیه‌كه‌ی كێشاوه ،ئه‌ویش به یه‌ك نه‌گه‌شتن و دوور خستنه‌وه‌ی جه‌سته بووه له خۆشه‌ویستی ، هیچ كام له‌و پاڵه‌وانانه له ڕووی جه‌سته‌ییه‌وه نه‌گه‌شتوون به یه‌ك و بێ گوومان گه‌ر بشگه‌شتنایه به یه‌ك نه‌ده‌بوون به پاڵه‌وان و ده‌بوون به ژیانێكی ئاسایی كه لای هه‌زاران كه‌س ئاماده‌گی هه‌یه ، ئیتر تا چه‌ند ئه‌و داستانانه هه‌قیقه‌تن یان ته‌نها نووسراو ئه‌مه شێتێك له تیوره‌كه به باش یان خراپ ناگۆڕێت ، چونكه لێره‌دا مه‌به‌ست له‌و هه‌سته‌ و له‌و خواسته‌یه كه هه‌بووه بۆ خۆشه‌ویستی و شێوه‌كانی ئه‌گه‌ر له ڕوانگه‌ی نووسه‌رێكیشه‌وه بێت ، داوای ناتوانین ئه‌و داستانانه ته‌نها به نووسراو بزانین نه‌ك به هه‌قیقه‌ت ، چونكه وه‌كو ده‌بینین له شارستانیه‌تی ئه‌وروپی و یونان و كورد و عه‌ره‌ب و فارسیسدا هه‌ر یه‌ک بابه‌ت بووه به هێمای خۆشه‌ویستی بێگه‌رد (عذري )ئه‌ویش یاساغی و به یه‌ك نه‌گه‌شتنی خۆشه‌ویسته‌كانه ، كه‌واته له زه‌مه‌نی یاساغی و نائاشكرایدا به‌ها ڕۆحیه‌كانی خۆشه‌ویستی بێگه‌ردی داڕشتووه ،نرخیشی زیاتر بووه ، ئه‌و كاته‌ی خۆشه‌ویستی ئاشكرا ده‌بێت و فشار و یاساغیه‌كانی له سه‌ر هه‌ڵده‌ماڵرێت ئه‌و به‌هایه له ده‌ست ده‌دات ، به‌لام ئایه ته‌نها ئاشكرا بوون و ئاسایی بوونی خۆشه‌ویستی به‌س بوو بۆ ئه‌وه‌ێ مرۆڤ جوانترین هه‌ستی مرۆڤایه‌تی له چوارچێوه‌ی به‌رژه‌وه‌ندی جه‌سته‌یی و مادیه‌كاندا ببینێته‌وه ؟!یاخود ئازادی سێكس یه‌كێك بوو له هه‌لوه‌شێره‌وانی فه‌ڵسه‌فه‌ی خۆشه‌ویستی ؟.

دژ و ته‌بایی خۆشه‌ویستی و سێكس .

به پێی بیرو بۆچونی زۆرێك له زانیان و پسپۆڕان و شاعیرانی سه‌رده‌می كۆنیش هه‌ر یه‌ك به شێوه‌یه‌ك گوزارشتی له خۆشه‌ویستی كردووه ، هه‌ندێكیان خۆشه‌ویستی له سێكس جیا ده‌كاته‌وه‌ و هه‌ندێكیشیان سێكس به بناغه‌ی خۆشه‌ویستی ده‌زانێت . كه دیاره له هه‌ردوو دۆخدا به پێوه‌ری كیشه شارستانی ئابووریه‌كان به‌رزی و نزمی له‌و بۆچونانه‌دا ڕووی داوه ،به‌لام له بنه‌مادا هه‌ردوو چه‌مك خزمه‌تی په‌یوه‌ندی مرۆڤایه‌تی و دۆزی ژیان و پێویستیه مرۆڤایه‌تیه‌كان ده‌كه‌ن ،ده‌كرێ له پراكتیكدا و له ڕووی مێژووییه‌وه سێكس به‌ر خۆشه‌ویستی كه‌وتبێت ، به‌ڵام ئه‌و كاته پرۆسه‌ێ ئه‌‌نجامدانی به‌ربه‌ریانه و وه‌حشیگه‌ریانه بووه و سه‌ره‌تای دۆزینه‌وه‌ێ هه‌ست كردن به پێداویستیه له‌شیه‌كان بووه لای مرۆڤ ، كه زۆر جار ئه‌و كرده‌یه به شێوه‌ێ زۆر و داسه‌پاندن بووه ، واته زۆر كردنی پیاو بۆ به زۆر دابین كردنی ئه‌و پێویستیه له شێوه‌ێ ئیختسابدا ،چونكه سه‌ره‌تای دۆزینه‌وه‌ی ئه‌و پێداویستیه هه‌ستێكی به ڕێكه‌وت خولقاو بووه و ئه‌نجامدانی پرۆسه‌كه‌ش له بنه‌مادا له پێناوی له‌زه‌ت وه‌رگرتندا بووه نه‌ك وه‌كو پرۆسه‌یه‌كی مرۆیی نێوان دوو كه‌س كه پنته‌كانی ژیانی له سه‌ر وه‌ستاوه‌ و ئه‌نجامدانی ئه‌و پرۆسه‌یه ده‌بێت به هۆی دروست بوونی مرۆڤێكی دی ، ته‌نانه‌ت زۆر دره‌نگ زانیویانه كه ژنیش له‌و پرۆسه‌یه چێژ وه‌رده‌گرێت ، كاتی زۆركردنی پیاوان وایان زانیوه پرۆسه‌یه‌كی یه‌ك لایه‌نه‌یه . بۆیه پرۆسه‌ی سێكس به بێ بنه‌ما قوڵه‌كانی خۆشه‌ویستی هه‌تا ئێستاش هه‌ر به‌و به‌ربه‌رێته ده‌درێته قه‌ڵه‌م ، به‌شی دووه‌ـی خۆشه‌ویستیش كه ده‌توانم ته‌نها ناوی بنێم به‌رژه‌وه‌ندی خواست له به‌رگی خۆشه‌ویستیدا و ئاره‌زووی وه‌حشیگه‌ریانه له سیمای سۆزداریدا جگه له دووباره كردنه‌وه‌ێ ئه‌و پرۆسه سه‌ره‌تاییانه كه مرۆڤ تێدا نائاگا بووه له سه‌رجه‌م پرۆسه‌كانی ژیان ،به‌ربه‌ریانه‌ش ژیاوه هیچی دیكه نیه و ته‌نانه‌ت كاتێكیش فرۆید هه‌موو هه‌ڵس و كه‌وتێكی مرۆڤی وامه‌زه‌نده كرد كه پاڵنه‌رێكی سێكسی له پشته ، پاش ماوه‌یه‌ك تیوره‌كه‌ی ڕه‌تكرایه‌وه‌و هه‌تا ئێستاش تیوره‌كه متمانه به‌خش نیه هێنده‌ی یه‌ك چیرۆكی پڕ له سۆز و خۆشه‌ویستی وه‌کو ڕۆمیو جولێت ، دۆن كیشوه‌ت و دلینیا به زیندووی له هزر و ئه‌ندیشه‌ی مرۆڤدا نه‌مایه‌وه و كاریگه‌ری نه‌بوو .

مرۆڤ به ته‌واوی هه‌ست به‌و دوو فاقیه‌ته ده‌كات كه به‌رانبه‌ر چه‌مكی خۆشه‌ویستی و زایه‌ندی له میژووی كۆن و نوێدا دروست بووه ،گه‌ر به مێژووی كۆنیشدا وورد بینه‌وه ، ده‌زانین له سه‌ده‌ی حه‌وته‌مه‌وه پاڵه‌وانێكی خۆشه‌ویستی پاك و بێگه‌رد هزری خوێنده‌وارانی ئه‌و سه‌رده‌مه‌ی برده‌وا بۆ فه‌زا جوانه‌كانی سۆز و جیهانێكی یوتوبی كه مرۆڤ به خه‌ونیه‌وه ده‌ژی هه‌تا ئه‌و سه‌رده‌مه‌ی به زله‌ی واقعێكی دی به ئاگا دێت ، ئه‌ویش ناوبانگی ئیرۆس بوو كه وه‌كو خودا مه‌زه‌نده كراوه ئه‌و كاته‌ی شاعیری ئه‌غریقی ( هستۆد ) ووتی " كرنیۆس " كه گیانی رۆژگار وزه‌مانه‌ بووه ئیرۆسی لێ كه‌وته‌وه " له‌و كاته‌وه ئیرۆس بوو به هێمای خۆشه‌ویستی ، ئه‌و هێمایه كارێگه‌رێكی وای له هه‌ستی خه‌ڵك و چینی ڕۆشنبیرانیشدا هه‌‌بوو كه( هۆمیرۆس)ی شاعیر له ( ئه‌لیاده ) د له میانه‌ی خۆشه‌ویستی نێوان ( ئه‌خیل و نیترس )ا جارێكی دی دایڕشته‌وه به‌ڵام به‌ره‌و نزمتر له‌و ئاسته‌ی هستۆد به ڕۆحی به‌خشیبوو كه دووه‌میان ته‌نها به خوداوه‌ندی ئاره‌زووی چواندبوو ، ئه‌و چواندنه‌ش له گه‌ڵ شاعره‌كانی دیدا به‌ره‌و نزمتر و نزمتر ڕۆشتووه ، هه‌تا گه‌یاندیان به‌و چیرۆكانه‌ی خیانه‌تی هاوسه‌ری و له‌شفرۆشی به ڕه‌زامه‌نی میرد و پاڵه‌وانی ئه‌و داستانانه‌ی كه ژنی هاورێكه‌ی ده‌ڕفێنێ و كاتێكیش ده‌گه‌رێته‌وه وه‌كو ئه‌وه‌ی هیچی نه‌كردبێت به شێوه‌ی ئاسای مێرده‌كه‌ی مامه‌ڵه‌ی له گه‌ڵدا ده‌كات ، واته گه‌یاندیان به‌و ئاسته‌ێ ئێستا به سێوه‌یه‌كی فراوان بڵاوه له نێو كه‌ڵچه‌ره جیاوازه‌كاندا ، ئیتر ئه‌و نووسین و داستانانه‌ی ئه‌وان ڕووداوی ڕاستی و واقعی كۆمه‌ڵی خۆیان بوو بێت ،یان پێشبینی به ڕوودان و ئاسایی بوونه‌وه ئه‌و چه‌مكانه ،ئه‌وانه به هه‌ردوولایان پاڵنه‌رێك بوون بۆ ئه‌وانه‌ی كه ئه‌و ئاره‌زووه ده‌كه‌ن كه خه‌ڵكانێك هه‌یه و هه‌بووه وه‌كو ئه‌وان ، نوقڵانه‌یه‌كیش بوو بۆ ئه‌و ئالوده بوونه‌ێ ئێستا كۆمه‌ڵگاكان ئالوده‌ی بوون ، سه‌رجه‌م هزری زانایان و فاكته‌ره یاسایه‌كان وهێزی پۆلیسیش نه‌یتوانیوه چاره‌سه‌رێكی شیاوی بۆ ئه‌و دیارده‌یه پێبێت و شتێك له‌و هه‌موو كێشه‌یه‌ی له ناو كۆمه‌ڵدا به هۆیه‌وه دروست بووه كه‌م بێته‌وه ، یان لایه‌نی كه‌م وای لێبكرێت قازانج و زیانه‌كانی یه‌كسان بكرێت ،نه‌ك هه‌میشه زیانه‌كانی هه‌زار بار بێت .

 

له‌شفرۆشی ، ئازادی سێكسی یان خیانه‌تی هاوسه‌ری :

ئه‌و سێ فاكته‌ر هه‌ر سێكی ده‌رئه‌نجامی كۆمه‌ڵێ فشاری ده‌روونی وكۆمه‌ڵایه‌تی و ئابووری و قه‌یرانی ڕۆشنبیریه‌وه تووشی مرۆڤ ده‌بێت،ئه‌نجامده‌ری هه‌رسێ فاكته‌ریش نێرو مین به تێكڕا به‌ڵام زیاتر مێینراوه واته (تانيث) كراوه و به به‌ری ژن بڕاوه ، ئه‌مه‌ش له شارستانێتیه‌كه‌وه بۆ یه‌كی دی جیاوازه ، بۆ نممونه ووڵاتێكی ئه‌وروپیدا كه‌متر به تاوان یان به كرده‌یه‌كی ژنانه ده‌ژمێردرێت هه‌تا وووڵاتانی دواكه‌وتوو له نێویشیاندا كورد كه به‌و دوایه ئه‌و سێ فاكته‌ره له ناو كۆمه‌ڵیدا ته‌شه‌نه‌ی كردووه .

له‌ش فرۆشی ؛له گه‌ل ئه‌وه‌ی له‌ش فرۆشی به كۆنترین دیارده‌ ناوزه‌دكراوه‌و هه‌ر له سه‌رده‌می بابلێون و سۆمه‌ریه‌كان له كه‌س هه‌وای پێشوازی مه‌لیكانه‌دا به كارهاتووه بۆ ڕێز گرتن له میوانه پاشا ، هه‌روه‌ها له نێو قوبرسدا باندی سێكس فرۆشی هه‌بووه و نارده‌ وهاورده‌یان له گه‌ڵ ڕۆمانیای ناسراو به سێكس فرۆشی كردووه ،پاشان قوبرس له‌م ڕوه‌وه ناوبانگێكی ده‌ركردوه له میانه‌ی بازرگانی سێكسیه‌وه ناویان ناوه " ده‌فری بازنه‌یی " مه‌به‌ست له‌وه بوو كه وه‌كو بازنه‌یه‌ك هێڵی بازرگانی سێكسی كێشابوو به چوارده‌وری جیهاندا وته‌نها ووڵاتێك بوو كه ته‌نها به 600 هه‌زار كه‌ش دانیشتوانه‌وه زیاتر له 100 یانه‌ی سێكس فرۆشی تێدا بوو ، جگه له‌ گه‌وره‌ترین باندی هاورده و برده‌ی بازرگانی سێكسی و دابه‌سكردنیان به پێی مۆدیلی ناوچه‌كان به سه‌ر ژنی سپی وژنی گه‌نم ڕه‌نگدا ،به‌و شێوه‌ێه نیوه‌ی ژنان و كچانی پێشاندراوی نێو جامخانه‌كانی قوبرس له ووڵاتانی تایله‌ند ، بولگاریا ، پۆڵۆنیا ودانمارك و فلیپین پێك هاتبوون ، هه‌تا ئه‌و بازرگانیه به هێزه‌ی قوبرس زۆرێك له‌و ووڵاتانه‌ی كه بازرگانی له گه‌ڵدا كردبوون بوون به سیمبولی ئه‌و كارانه ته‌نها له فلپیندا 550 هه‌زار ژن كاری سێكس فرۆشیان ده‌كرد و سویسرا به به‌هه‌شتی مه‌لها ناسرا وتایله‌ند به به‌هه‌ستی سێكس له جیهاندا و ووڵاتانی دی ئه‌وروپا وه‌ ئیسرائیلش له‌و دیاردانه‌یبێ به‌ش نه‌بوون ، ئه‌و بازرگانیه‌ش دوای جه‌نگی جیهانی یه‌كه‌م زیاتر ته‌شه‌نه‌ی كرد . كه‌واته بازرگانی سێكسی وله‌ش فرۆشی پلانێكی برجوازیانه‌ی بازرگانه‌كان بووه بۆ وه ده‌ست هێنانی ئه‌و سه‌فقانه‌ی كه هێزی برجوازێت باڵاتر و مرۆ ئامێر بوونیش له به‌رده‌م ئه‌و هێزه‌دا شه‌رعیه‌تی زیاتر وه‌رده‌گرێت ، به‌ها نزمتر ده‌نوێنێت ، به قازانج كردن و قۆستنه‌وه‌ی هه‌ل مه‌رجه ئابوری و كۆمه‌لایه‌تیه‌كان ، ئه‌و پرۆسه‌شیان ناو نا ئازادی سێكسی، به‌ مێژووی ته‌شه‌نه كردنیشیدا بۆمان ده‌رده‌كه‌وێت كه باری ژیان ونائارامیه ده‌رونیه‌كان به‌ هۆی شه‌ڕ و لایه‌نی ئابوووری ده‌ستێكی باڵای هه‌بووه له به‌رجه‌سته كردنی ئه‌و دیارده‌یه له نێو كۆمه‌ڵه جیاوازه‌كاندا .ئه‌و كاته‌ی مرۆڤ گیرفانی به هۆی چنگی بازرگانه‌كانه‌وه ده‌دورێت و ناتوانێت یه‌كه‌ی كڕین وفرۆشتنی تێدا بدۆزیته‌وه له‌سی ده‌خاته پێناوی‌ ژیانه‌وه ، به تێبینی ئه‌وه‌ی كه بازرگانیان ته‌نها به ژنانه‌وه نه‌ده‌كرد به‌ڵكو به كۆمه‌ڵێ كوڕی هه‌رزه‌كار ومناڵیشه‌وه ده‌كرد و هه‌تا ئێستاش هه‌ر به‌رده‌وامه..،هه‌ر له‌وێشه‌وه ئه‌و ووشه‌یه هه‌ڵقوڵاوه چونكه گه‌ر له ووشه‌كه بنواڕین :له‌ش +فرۆش یان فرۆشی واته له دوو ووشه برگه‌ی واتادار پێك هاتووه كه یه‌كه‌میان ئاماده‌بوونی له‌شێكه له وێنه‌ێ كاڵایه‌كدا بۆ ده‌سته‌به‌ر كردنی ئامانجێك ، بڕگه‌ێ دووه‌م كه دۆزینه‌وه‌ی كریاره بۆ فرۆشتنی ، ئه‌م پرۆسه‌یه‌ش پێم وایه ئاره‌زوو ڕۆڵ نابینێت هێنده پێویستیه ئابووریه‌كان ڕۆڵ ده‌بینێت ، جگه له چه‌ند هۆكاری دی كه ئه‌وانه زیاتر له ووڵاتانی ڕۆژئاوا و ئه‌مه‌ریكادا كاران ، له‌وانه‌ش مه‌جبور كردنی ژن به كاری له‌شفرۆشی یاخود سێكس فرۆشی ، وه‌كو هه‌ندێك له‌و ژنانه كه ڕێكخراوێكی دیاری كراو له ووڵاتێكی پڕ شه‌ڕ برسیه‌تیه‌وه هێناوێتی ، به‌ڵام كاتێك ده‌گه‌یه‌نرێن به ووڵاتی مه‌به‌ست كه ووڵاتانی ڕۆژئاوایه بۆیان ده‌رده‌كه‌وێت ئه‌و ڕێكخراوه خێر خوازی نیه به‌ڵكو باندێكی سێكس فرۆشیه و له ژێر ئه‌‌‌و ناوانه‌دا كاریان كردووه هه‌تا ئه‌و ژنانه ده‌گه‌یه‌نن به شوێنی مه‌به‌ست و له‌وێ ده‌یانخه‌نه ژێر باری قه‌رزی زۆر و توند و تیژی و چه‌وساندنه‌وه و به كارهێنانیان وه‌كو باندی سێكس فرۆشی و بازرگانی كردن ، هه‌روه‌ها هه‌ندێك به هۆی خه‌لكانی سێكس فرۆش له غه‌فڵه‌تدا تووشی تلیاك خواردن ، هه‌ندێكیشیان خۆیان به ئاره‌زوو تووشی خوادنی ده‌رمانه سڕ كه‌ره‌كان بوون ، ته‌نها ڕێگه چاره‌ش بۆ ئه‌وه‌ی له‌و ده‌رمانه دانه‌برێت خۆفرۆشتن و سێكس فرۆشتنه ،هه‌ندێ جاریش به هۆی زۆری پیاوه‌یه وه‌كو له ناو كۆمه‌ڵی كوردیدا چه‌ندین جار دانپێدانانی ژنانم خوێندوه‌ته‌وه رێژه‌یه‌كیان دان به‌وه‌دا ده‌نێن كه هاوسه‌ره‌كه‌ی پاڵنه‌رێتی یان زۆری لێده‌كات ، وه هه‌ندێكیان مه‌ترسی ئه‌وه‌یان له سه‌ر ئه‌گه‌ر ئه‌و پێشنیازه له هاوسه‌ره‌كانیان قبوڵ نه‌كه‌ن ئه‌وا له ناو كه‌س وكار وكۆمه‌ڵدا ئه‌و تاوانبار ده‌كات به داوێن پیس و ته‌ڵاقی ده‌دات و كۆمه‌ڵیش باوه‌ڕ به‌و ده‌هێنێت ، ماده‌م هاوكێشه‌كه‌س وا ده‌كه‌وێته‌وه با له‌شفرۆش بم و لای مێرده‌كه‌م باش بم بۆ ئه‌وه‌ێ كومه‌ل باشم پێ بڵێت هه‌تا ئه‌وه‌ی به كه‌رامه‌ته‌وه بژیم و به هۆی قسه‌ی مێرده‌كه‌م خراپم پێ بڵێن .ئه‌م جۆره خۆ فرۆشتنه لای من ئازادی سێكسی ناكات ،ئه‌و گرێ ده‌روونیه‌س نیه كه چاره‌سه‌ر نه‌كرێت .تاوانیشی ا له شانی ده‌سه‌لاتی سیاسی و یاسایه به‌ر له یاسا كۆمه‌ڵایه‌تی و فه‌رهه‌نگیه‌كان .

 

ئازادی سێكسی :

هه‌ندێكی دی له ژنان به خۆڕایی له پێناوی له‌زه‌تدا سێكس ده‌كه‌ن ده‌توانم ئه‌مه‌یان ناو بنێم ئازادی سێكس به‌لام ئه‌ویش هه‌تا ئه‌و سنوره‌ی كه ناگات به فره‌یی واته كاتێك سێكس له یه‌ك تێده‌په‌رێت بۆ چه‌ندین كه‌سی جیاواز لای ژن بێت یان پیاو ئه‌وه‌یان غه‌ریزه‌ێ وه‌حشیگه‌ریانه‌یه ،ئاره‌زوویه‌كی ده‌ره‌وه‌ی لۆژیكی مرۆڤانه‌یه بۆیه كاتێك مرۆڤێك ژن بێت یان پیاو ڕێگه به خۆی ده‌دات چه‌ندین په‌یوه‌ندی سێكس هه‌بێت و ناوی ده‌نێن ئازادی سێكس به بڕوای من هیچ په‌یوه‌ندێكی نه به ئازادییه‌وه هه‌یه نه به په‌یوه‌ندێكی سێكسی مرۆڤانه‌ش ، پێویسته مرۆڤ چ پیاو بێت یان ژن جیاوازی له نێوان ئازادی و به‌ره‌ڵای ، بێ پرۆگرامی و بێ هه‌بوونی دیدێكی مه‌عریفی بكات ، بزانێت ئه‌وه‌ی ناوی ناوه ئازادی سێكس جگه له په‌رده‌پۆشكردنی ده‌روونێكی ناساغ چی دیكه نیه ، وه من له بنه‌مدا باوه‌ڕم به ووشه‌یه‌ك نیه ناوی ئازادی سێكسی بێت ،مادام هیچ كام له ئێمه بۆ هاوسه‌ره‌كه‌ی یان خۆشه‌ویسته‌كه‌ی ئه‌و ئازادییه ناخوازێت ، بۆ خۆی نه‌بێت ، واته ئه‌و ژنه‌ی پراكتیكی ئازادی سێكسی ده‌كات له هه‌مان كاتدا پێی خۆش نیه هاوسه‌ره‌كه‌ی ئه‌و كاره بكات ، هه‌روه‌ها سه‌باره‌ت به پیاو نه‌ك هه‌ر ڕاستگۆ نین له‌و مه‌سه‌لانه‌دا به‌ڵكو تا ئه‌و په‌ڕی مه‌وداكان كه‌سایه‌تی دووفاقیشن ،جونكه ده‌بینین ئه‌و پیاوانه‌ی له گه‌ڵ ژنێكدا باش له ئازادی سێكسی ده‌كه‌ن بۆ ئه‌وه‌ی له گه‌ڵیدا ده‌سته‌به‌ری بكه‌ن له هه‌مان كاتدا ئاماده نیه ئه‌و كه‌سه‌ ببێت به خێزانی یان هه‌مان ئازادی بۆ خوشك وكچ و دایك و خێزانی خۆی ، كه‌واته ئازادی سێكسی شه‌رعیه‌تێكی باوه‌رپێكراوی له ده‌روونی هیچ ڕه‌گه‌زێكدا نیه جگه له شه‌رعیه‌تی غه‌ریزه‌یی كاتی و نادروست ،جگه له‌وه‌ی هه‌ر مرۆڤێك هێنده‌ی هۆشیاری هه‌بێت بزانێت ئه‌وه‌ێ ناوی ناوه ئازادی سێكسی بازرگانی سێكسیه وبه پلانی ده‌زگا گه‌وره برژوازیهكان دانراوه بۆ كویله كردنی مرۆڤ له داوێنی سیستمه مادی و بازرگانیه‌كانه كه واتای بوون و به‌رژه‌وه‌ندی ئه‌وان ده‌كات هه‌رگیز باوه‌ر به‌و پرۆسه‌یه و مل بۆ ئه‌و پرۆسه‌یه نادات ، پێ له سه‌ر هه‌مان ڕای خۆم داده‌گرم و ئه‌و كێشانه‌ی ئه‌مڕۆ ووڵاته پێشكه‌وتووه‌كانی پێدا تێده‌په‌رێت وه‌ یاد ده‌هێنمه‌وه له نه‌خۆشی كوشنده و مناڵی نامه‌شروع له به‌ر هه‌لوه‌شاندنه‌وه‌ی خێزان و ژیان و جۆره‌ها نه‌خۆشی ده‌روونی و له به‌ها كه‌وتنی پیرۆزییه‌كانی ژیان ، كه له ئاكامی سێكس فرۆشی و ئازادی سێكسیه‌وه هاتووه چ به‌رژه‌وه‌ندێكی مرۆڤ و مرۆڤایه‌تی تێدا بووه جگه له قازانجی ئه‌و كۆمپانیا گه‌ورانه‌ی كه له هه‌موو كارێكی دی زیاتر قازانج له فرۆشتنی ده‌رمانه‌كانی كۆنتۆڵی سك پڕی وله باربردن ونه‌خۆشیه‌كانی ئه‌ندامی زاوزێ ونه‌خۆشیه سێكسیه‌كان و كۆندوم ده‌فرۆشن . بۆیه ده‌بینین ژماره‌یه‌كی باشی ئه‌وروپیه‌كان به‌و ڕاستیان زانیوه كه جیاوازی نێوان به‌ره‌ڵای ده‌روونی وه‌حشیگه‌رایانه و ئازادی سێكسی و له‌ش فرۆشی چیه و گه‌راونه‌ته‌وه بۆ ژیانێكی نۆرماڵ و دوور له درۆكانی بازرگانانی مۆدێرنه كه گوایه ئازادی سێكس زۆر كێشه‌ی ده‌روونی و ئازادیه‌كانی دی چاره‌سه‌ر ده‌كات و خۆیان و مناڵه‌كانیان له سه‌ر ژیانێكی دروست دوور له‌و وه‌همانه ڕاهێناوه و بایه‌خیان خستووه‌ته سه‌ر به‌ها ڕۆحی و مرۆیه‌كان كه خۆشه‌ویستی وقه‌ناعه‌تی پاكه ، ته‌نانه‌ت له‌م ووڵاتانه‌دا هێنده له نرخی كه‌م نه‌كراوه كه بگووترێ سێكس كردن به‌ڵكو ده‌گوترێت خۆشه‌ویستی دروست بكه‌ین ، واته ئه‌وه‌ی لای كورد پیێ ده‌گوترێ له‌ش فرۆشی یان فره سێكسی لای خۆرئاواش هه‌ر نه‌فره‌ت لێكراوه‌و پێی ناڵێن خۆشه‌ویستی دروست كردن به‌ڵكو پێی ده‌ڵێن prostiute واته سێكس فرۆش یان sex work یان سێكس كار . لێره‌وه ده‌لێم به‌وانه‌ی كه شتێكی نابه‌جێ ده‌كه‌ن و ناوێكی بۆ ده‌دۆزنه‌وه له چه‌مكه ڕۆژئاوایه‌كانن گوایه ئه‌وه‌ێ كردوویه‌تی له پێشكه‌وتنه‌وه‌یه ئه‌وه هیچ ڕاست نیه ته‌نها بیانوویه‌كه بۆ خه‌له‌تاندنی خۆیان نه‌ك ده‌وروبه‌ریشیان . چونكه ده‌وروپشت زانیوێتی بووه به خۆراكی كام جۆره پلانی دژ به مرۆڤایه‌تی .

 

خیانه‌تی هاوسه‌ری :

جۆرێكی دی سێكس كردنی نامه‌شروع له ڕێگه‌ی خیانه‌تی هاوسه‌رییه‌وه‌یه ،ئه‌م جۆره‌ش لای پیاوان باوتره هه‌تا ژنان ، كه‌چی ژانی زیاتر پێ تاوانباره هه‌تا پیاوان ، كه ئه‌وه‌ش پابه‌ندی ڕاده‌ی پێشكه‌وتن و دواكه‌وتنی فه‌رهه‌نگیه‌وه هه‌یه ،لای ژنانیش پاڵنه‌ر وهۆكاری زۆر هه‌ن به‌ڵام لای پیاوان زیاتر به هۆی چاوچڵێسی و ماف دانه به خۆی گوایه پیاوه‌تی خۆی تێدا تاقی ده‌كاته‌وه وه وچه‌ندین هۆی دی كه كاری من نیه له‌م نووسینه‌دا ، به‌ڵكو ده‌مه‌وێ ئاماژه بۆ ئه‌و پاڵنه‌رانه بكه‌م كه ژن له خیانه‌تی هاوسه‌ری نزیك ده‌كه‌نه‌وه ، لێره‌دا قسه‌یه‌كی دكتۆر عادل حسێن عه‌بدووڵا م وه‌بیر دێته‌وه كه له دیدارێكدا زۆر ساكارانه ده‌ربڕینێكی زانستی قوڵ ‌ده‌خاته ده‌ستی پیاوان و گوزارشته‌كه‌ وایه كه (ژن خیانه‌ت ناكات ئه‌گه‌ر پیاو گه‌واد نه‌بێت ) ئه‌م ده‌ربڕینه به ته‌واوی به شێوه‌یه‌ك ده‌ربڕاوه كه پیاوێكی نه‌خۆێنده‌واریش تێبگات ژنه‌كه‌ی خیانه‌ت ناكات ئه‌گه‌ر ئه‌و مرۆڤ بێت ، ئه‌و خاوه‌نی كرداری دروست ، هه‌ڵسوكه‌وتی دروست بێت ، ئه‌م بۆچونه‌ش له هه‌ڕه‌مه‌كیه‌وه نه‌هاتوه‌ و قسه‌ی كه‌سێكی پسپۆڕی ئه‌و لایه‌نه و سه‌رجه‌م زانایان و زانستی ده‌روونیش ئه‌و ڕاستیه‌ی سه‌لماندوه كه خیانه‌تی هاوسه‌ڕی له لایه‌ن ژنه‌وه 100% هاوسه‌ره‌كه‌ی تاوانباره ، بۆ ئه‌وه‌ی زیاتر جه‌خت له سه‌ر چۆنیه‌تی تاوانبار بوونی بكه‌ین و پیاوانێك وا نه‌زانن ته‌نها ڕایه‌كی هه‌ڕه‌مه‌كیه پێم خۆشه پێداویستیه ڕۆحی و گیانیه‌كانی نێوان مرۆڤ كه له چه‌ندین كرده و فاكته‌ر و جوڵه پێك دێت بكه‌م به چه‌ند خانه‌یه‌كه‌و چونكه مرۆڤ جوڵه‌یه‌ك ، ووشه‌یه‌ك به‌ره‌و خۆشه‌ویستی ده‌بات له هه‌مان كاتدا جوڵه‌یه‌ك ووشه‌یه‌ك به‌ره‌و ڕق و خیانه‌تیشی ده‌بات ..گه‌ر بڵێین ئه‌و خانانه پێك هاتووه له 12 خاڵ ، ده‌بینین له هه‌موو خاڵه‌كان گرنگتر خانه‌ی په‌یوه‌ندی سێكسه.

په‌یوه‌ندی سێكس له نێوان ژن و مێردا له سه‌رجه‌م خانه‌كان وخاڵه‌كانی دی هاوپێچه‌كانی زیاتر كارێگه‌رییان بۆ سه‌ر په‌یوه‌ندی وخۆش به‌ختی وبه‌دبه‌ختی ژیانیان هه‌یه وه ئه‌گه‌ر ژن له گه‌ڵ هاوسه‌ره‌كه‌ێدا له ڕووی سێكس و مه‌سه‌له ڕۆحیه‌كاندا به‌خته‌وه‌ر بێت هه‌رگیز بیر له خیانه‌ت ناكاته‌‌وه ئه‌گه‌ر مه‌سه‌له مادیه‌كانی له لوتكه‌ێ قه‌یرانیشدا بێت، ئه‌و پیاوانه‌ی ڕۆشنبیری سێكسی و ڕۆشنبیری خۆێندنه‌وه‌ی ده‌روونی ژنیان كه‌مه هه‌رچیه‌ك بێت پایه وپله و خۆینده‌واریان تووشی ئه‌و خیانه‌ته ده‌بنه‌وه چونكه په‌یوه‌ندی نێوان ژن و مێرد كرداره‌كانی نێوان خۆیان ده‌ست نیشانی ده‌كات نه‌ك كار و پیشه و بڕوانامه‌ و ...هتد ، زۆریشن ئه‌وانه‌ی خاوه‌نی بڕوانامه‌ی به‌رز و شێوه‌ێ جوان و ڕه‌زامه‌ندی كومه‌ڵن ناتوانن ژنه‌كانیان ڕازی بكه‌ن به‌ڵام كه‌سێك به زۆر ده‌توانێت ئه‌ڵف وبێ له یه‌ك جیا بكاته‌وه ژنه‌كه‌ی به‌خته‌وه‌ر ده‌كات ، ئه‌مه‌شیان من ده‌یگه‌ڕێنمه‌وه بۆ بنه‌مای خۆشه‌ویستی لای پیاو به‌رانبه‌ر ژنه‌كه‌ی ، ئه‌و پیاوه‌ی ژنه‌كه‌ی خۆش ده‌وێت هێنده‌ش به دووی زانسته‌كاندا ده‌گه‌رێت بزانێت چون مرۆڤێكی خاوه‌ن عه‌قڵێك بێت كه ژنه‌كه‌ی لێی ڕازی بێت ، یان له ده‌ستی نه‌دات ، یان ڕووبه‌ڕووی خیانه‌تی هاوسه‌رێتی نه‌كاته‌وه كه له‌م خاڵانه‌ی خوار‌ه‌وه پێك هاتوون .

 

1- نوێكردنه‌وه‌ی هه‌میشه په‌یوه‌ندی له گه‌ڵ ژنه‌كه‌ی له رێگه‌ی ڕۆژانه ده‌ربڕینی نوێی خۆشه‌ویستی ، وه‌كو ئه‌وه‌ی پیاوێك له خۆی بپرسێت ڕۆژی چه‌ند جار به ژنه‌كه‌ی ده‌ڵێی خۆشم ده‌وێت ، چه‌ند جار ده‌ڵێ به قوربانت بم ، چه‌ند جار ده‌ڵێ هه‌موو شتێكی له ژیانمدا و ...تاد .

2- جۆری پراكتیكی سێكسی كه زۆر جار پیاو ته‌نها وه‌كو ئامێرێك ژن به‌كار ده‌هێنێت بۆ به‌تاڵكردنه‌وه‌ی غه‌ریزه‌كانی خۆی و گوێ نادات به خواستی ژنه‌كه‌ی یان تێر بوونی ژنه‌كه‌ی ، به تایبه‌ت بۆ پیاوی كورد گوێ نادات به‌وه‌ی كه ژنه‌كه‌ی له نێو كه‌لتوورێكدا گه‌وره بووه كه‌لتووری شه‌رم و بڤه هه‌رچه‌نده ناڕازیش بێت له جۆری سێكس كردن له گه‌ڵیدا ده‌ری نابڕێت به‌لكو ته‌نها به ڕۆخسار ومامه‌له‌یه‌وه دیاره .

3- زۆرێك له پیاوان هه‌تا ئێواره دڵی ژنه‌كه‌یان ڕه‌نجاندووه ، به‌لام له ئێواره‌دا ده‌یانه‌وێت ژنه‌كانیان ببێت به پاڵه‌وانی فیلمه ڕۆمانسیه‌كان و جوانترین جووت بوونی له گه‌ڵدا بگوڕێته‌وه .

4- هه‌ندێك له پیاوان خۆیان توانای سێكسیان كه‌مه و هه‌موو تاوانه‌که‌ش ده‌ده‌نه ئه‌ستۆی ژنه‌كه‌یان ، سوكایه‌تی كردن پێیان كه ژنانێكی نه‌زاندوون له په‌یوه‌ندی ژن ومێردایه‌تیدا .

 

5- جۆرێكی دی پیاوان تا ئێواره به هیوات وكار و خۆزگه‌كانی خۆیان خه‌ریكن و ژنه‌كه‌یان فه‌رامۆش كردوه ئێواره‌و كاتی جووت بوون ، ده‌یانه‌وێت ژنه‌كه‌یان له پڕ ببێت به خاوه‌ن هه‌ست وخه‌یاڵی نه‌چێت به لای پاڵه‌وانێك كه خه‌یاڵی خۆی دروستی كردووه و بۆشایه‌كانی بۆ پڕ ده‌كاته‌وه ، یان هاوسه‌ری ئه‌و هاوه‌ڵه‌ێ كه باسی مێرده‌كه‌ێ بۆ كردووه چه‌ندی خۆش ده‌وێت وچۆن خۆشه‌ویستی له گه‌ڵ ده‌گۆڕێته‌وه وبایه‌خی پێده‌دات .

6- هه‌ندێك له پیاوان كاتیان بۆ سێكس داناوه له چ كاتێكدا بێت به پێی ئاماره‌كانیش زۆربه‌یان جووت بوون ده‌خه‌نه شه‌وه‌ وه ، با مرۆڤ له خۆی بپرسێت كاتێك هه‌موو ڕۆژێك ده‌وامی هه‌یه و هه‌موو به‌یانێك له هه‌مان كاتدا ده‌چێت بۆ ده‌وام چه‌ند لێی بێزار ده‌بێت وچه‌ند چاوه‌روانی پشوو هه‌فته ده‌كات ؟ ئایه به گاڵته و بێ بۆچوونی پسپۆڕان ئه‌و پشو هه‌فته‌یه دانراوه ؟ یان بۆ ئه‌‌‌وه‌ێ خۆی له‌و ڕۆتێنه ڕزگار بكات كه هه‌فته‌كه تووشی هاتووه ؟ سه‌یر نیه خه‌لك به‌شێكی گرنگی ژیانی خۆی كه فاكته‌ره‌كانی دی له سه‌ر ده‌وه‌ستێت بكات به هه‌مان ڕۆتێن و وه‌كو ئه‌‌‌وه‌ی چۆن سێ ژه‌مه له كاتی خۆیدا نان ده‌خوات وكار ده‌كات و بۆ دیندار نۆێژ ده‌كات ئه‌وا كاتێكی فه‌رمی كراویشی هه‌یه سێكسی تێدا ده‌كات ، لای ژنه‌كه‌ی ده‌یكات به‌و ڕۆتینه‌ كه واجبێكی خۆی جێبه‌جێ بكات نه‌ك هه‌ست بگۆڕێته‌وه له گه‌ڵیدا .

7- په‌یوه‌ندی به‌ر له هاوسه‌ری یه‌كێكه له‌و فاكته‌رانه‌ی ده‌بێت به هۆی خیانه‌تی هاوسه‌ڕی لای ژن ، له‌وانه‌ش زۆرێك له‌و پیاوانه‌ێ كه ڕۆشنبیریان لاوازه گۆڕانێكی زۆر له كرداریاندا پێش هاوسه‌ری ودوای هاوسه‌ڕی ڕووده‌دات ، له‌وانه‌ش :

ا به‌ر له هاوسه‌ڕی به‌رده‌وام ووشه‌ی خۆشم ئه‌وێ و قوربانیدانی له سه‌ر زمانه و پاش هاوسه‌ری ده‌گورێ بۆ سه‌رزه‌نشت گله‌یی وا ده‌كات ژنه‌كه‌ێ پێش پاش هاوسه‌ری به په‌یوه‌ندی نێوان ڕاوچێ و نێچیر تێبگات .

ب- به‌ر له هاوسه‌ڕی له‌وانه‌یه له شوێنی كاره‌كه‌یه‌‌‌وه ده‌یان جار ته‌له‌فونی بۆ كردبێت ،پاش هاوسه‌ری یان ئه‌و مه‌سه‌له‌ێه به ته‌واوی فه‌رامۆش ده‌كات ، یان جارێك ده‌یكات ، خۆ هه‌ندێ له پیاوان ئه‌و جاره‌ش بۆ ئه‌وه‌ی ده‌كه‌ن بزانن چیان هه‌یه بۆ خواردنی نیوه‌رۆ یان ئێواره .وا ده‌كات ژنه‌كه‌ی هه‌ست بكات درۆی له گه‌ڵ كردووه خۆشی ناوێت ، یان كه‌سێكی دی له ژیانیدایه و له‌م بێزاره .

ج- زۆر جار پیاو به‌ر له هاوسه‌ری جۆره‌ها دیاری و یادگار پێشكه‌ش به ژنه‌كه‌ێ ده‌كات ، كه ده‌گات به هاوسه‌ری سه‌رجه‌میان ده‌سڕێته‌وه وهه‌رگیز به ده‌ستی به دیاری ڕوو له ژنه‌كه‌ی ناكات ، پیاوان هه‌ڵه‌شن وابزانن ژن دیاری له نرخه‌كه‌ێدا ده‌بینن ، به‌ڵكو له‌وه‌دا ده‌یبینن كه تا چه‌ند له بیری مێرده‌كه‌یدا بووه .

د- زۆرێك له پیاوان به‌ر له هاوسه‌ڕی هه‌موو شتێكی ژنه‌كه‌یان لا جوانه له پۆشاك پۆشین هه‌تا مامه‌ڵه و ڕوخسار ،داوای هاوسه‌ڕی قه‌ده‌رێك هه‌مووی ده‌گورێ ده‌یكات به نه‌شیاو وناشیرین ، ئه‌مه‌ش وا له ژن ده‌كات به دووی كه‌سێكی تردا بگه‌رێت كه ئه‌می پێ په‌سه‌ند بێت نه‌ك پیاوێك كه هه‌تا پێ گه‌شتن ئه‌وی لا په‌سه‌ند بێت ،چونكه ئه‌و كاته سه‌رجه‌م سۆزی پیاوه‌كه‌ی به كه‌ف وكوڵێكی سێكسی كاتی بۆ پێگه‌یشتنی ده‌زانێت كه له پێگه‌یشتنیدا كۆتاییان هات بۆیه ئه‌ویش ده‌یه‌وێت به خیانه‌ت تۆڵه‌ی ئه‌و درۆیه‌ی لێ بكاته‌وه و وابكات له‌و سێكسه‌دا كه هاوسه‌ره‌كه‌ێ ئه‌وی به ته‌نها تێدا بینیه‌وه كه‌سانی دیشی تێدا به‌شدار بكات وه‌كو ئه‌وه‌ی پێی بڵێ عافێتی ناكه‌یت .

8- كۆمه‌لێكی پیاوان پاش هاوسه‌ری هیچ بایه‌خ به پاك وخاوێنی و بوون خۆشی نێو پێخه‌فی نووستنی خۆیان ناده‌ن و له‌ ناو جێگه‌شدا سۆزی بۆ ژنه‌كه‌ی هه‌ر هه‌تا پاش جووت بوونه و كۆتای دی هه‌تا پرۆگرامه ڕۆتینیه‌كه‌ێ خۆی و شه‌وی داهاتوو .

9- ژماره‌ی ئه‌و پیاوانه چه‌ندن كه وا له ژنه‌كانیان ده‌كه‌ن كه وا هه‌ست بكه‌ن شتێكی ته‌واو به نرخ و تایبه‌تن له ژیانی مێرده‌كانیاندا و ناگۆڕیته‌وه به هیچ شتێكی تر ، هه‌تا چاوه‌ڕوانی خیانه‌ت له ژنه‌كه‌ی نه‌كات .؟.

10- زۆرێك له پیاوان خۆیان په‌یوه‌ندی تریان له ده‌ره‌وه هه‌یه و واده‌زانن ژنه‌كانیان نازانێت ، به‌ڵام به پێی زانستی ده‌روونی هه‌سته‌وه‌رترین مرۆڤ ژنه به‌رانبه‌ر كه‌سه نزیكه‌كانی ژماره‌ێ ئه‌‌و دایكانه كه‌م نین كه زانیویانه ودڵی پێی گووتوه كوڕه‌كه‌ی یان هاوسه‌ره‌كه‌ی ده‌كوژرێت ، ئایه پیاوان پێیان وایه په‌یوه‌ندی هاوسه‌رێتی نزیك تر نیه وزووتر به‌وه نازانێت و بێ ئیراده ئه‌ویش به لای ئه‌و خیانه‌ته‌دا ناگه‌رێت .

11 ژماره‌یه‌كی زۆری پیاوان چاو له ده‌رن و هه‌میشه چاو ده‌گێڕن ، ئه‌و چاو گێڕانه به مه‌به‌ست بێت یان بێ مه‌به‌ست ، واته ئه‌و پیاوه به دوای شتێكدا ده‌گه‌رێت له ده‌ره‌وه‌ێ ژنه‌كه‌ێ خۆی ، یان به شتێكی ژنه‌كه‌ی ڕازی نیه و بۆ به‌دیلی ده‌گه‌ڕێت ، كام ژن كه ئه‌و جۆره كرداره له پیاو ببنێت هه‌ست به دڵنیایی ده‌كات و بیری ئه‌ویش بۆ لای پیاوی دی ناچێت .؟ .

12- جۆرێكی دی له پیاوان له ڕووی ئابوری و بۆ سه‌رف كردنه‌وه ژنه‌كه‌ێ پاش هه‌موو شتێك دێت ، پاش خۆی ، پاش مناڵ و شتی ناو ماڵ و ته‌نانه‌ت كه‌س و كاری خۆشی . كام ژن هه‌ست بكات پله سێ وچواره له ژیانی مێرده‌كه‌یدا به تایبه‌ت له كه‌س كاری خۆشی گه‌ر به كرده‌وه‌ش پێی نه‌كرا بیری بۆ خیانه‌تی هاوسه‌ری ناچێت ؟ .

13- كه‌م پیاو له كاتی هاوبه‌شی جێگه‌دا گۆێ ده‌دات به شێوازی ڕاكشان و پرخه و بوونی هه‌ناسه و..تد ، هه‌وڵ ده‌دات هه‌میشه ئه‌و مرۆڤه بێت كه ژنه‌كه‌ی ده‌یه‌وێ زیاتر و زیاتر لێی نزیك بێت .

14- هه‌ندێك له پیاوان لای كه‌س كاری خۆیاندا هیچ نرخێك بۆ ژنه‌كه‌یان دانانێن .هه‌ر هه‌ڵه و كه‌م كورێك هه‌بێت باسی ده‌كه‌نه‌وه یان وه‌كو ئه‌وه‌ێ له ماڵه‌وه كرداری له گه‌ڵ ده‌كات لای كه‌س و كاریدا نایكات ، به‌ڵكو لای ئه‌واندا توندوتێژ تر ونامرۆڤانه تر ده‌جوڵێته‌وه ، خۆ جۆرێك له پیاوان هه‌یه له سه‌ر قسه‌ی كه‌س و كاری سوكایه‌تیش به ژنه‌كه‌ی ده‌كات ،یاخود كه‌س كاری وه‌كو براو باوك ودایك ده‌بن به بڕیار ده‌ری ژیانی ئه‌و ، ئایه ئه‌م جۆره پیاوه چاوه‌ڕوانن ژنه‌كه‌یان خیانه‌تیان لێ نه‌كات ؟له كاتێكدا هاوبه‌شه‌كه‌ێ ژیانی به پله دوو سه‌یری ده‌كات ، ئایه كورد له‌وه‌ته‌ی له چوار پارچه ماره بڕاوه و به پله دووش سه‌یر كراوه هه‌میشه به خیانه‌تی نه زانیوه‌وه هه‌وڵی خیانه‌ت و تۆڵه‌ی له برانبه‌ره‌كه‌ێ نه‌كردوه‌ته ؟ ده دڵنیابه پیاوی غه‌فڵتگیر ئه‌م مه‌سه‌له‌یه‌ش هه‌ر وایه .

15- كه‌م له پیاوان ده‌توانن خۆشه‌ویستی نۆێ بكه‌نه‌وه له گه‌ڵ ژنه‌كانیاندا هه‌ر وه‌كو چۆن جل وبه‌رگ و شوێن نوێ ده‌كرێته‌وه ، بزانن كه ژنان زیاتر بایه‌خ به خۆشه‌ویستی ڕۆحی ده‌دات و پیاو به له‌شی ،كه‌واته چی بكات بۆ ئه‌وه‌ی ژنه‌كه‌ێ هه‌میشه وا هه‌ست بكات ئه‌و كچه‌یه كه خۆشی ویستووه به‌ر له هاوسه‌رێتی ویستویه‌تی . نه‌ك وا هه‌ست پێ بكات كه ژنێكه بۆ جێبه‌جێكردنی ئه‌ركه‌كانی ، ئه‌و سه‌رده‌مه تێپه‌ڕی .

16- جۆرێكی دی پیاوان ئه‌گه‌ر ژنه‌كه‌یان خاوه‌نی برێك بێت له مافه سه‌ره‌تاییه‌كانی خۆی وه‌كو خۆێندن و كار و دیارده شارستانیه‌كانی دی منت به سه‌ر ئه‌رزدا ده‌كات ، وای پیشان ده‌دات كه ئه‌وی مه‌زن هێنده ڕۆشنبیر و تێگه‌شتوه ئه‌و به‌خشنده‌یه‌ی هه‌بووه به‌رانبه‌ر ژنه‌كه‌ی نه‌ك وه‌كو ئه‌وه‌ی كه ئه‌و ژنه مافی خۆیه‌تی هه‌موو مافێكی هه‌بێت ئه‌گه‌ر پێشتریش نه‌یبووه له بچووكی ونامه‌عریفی ئه‌وانه بووه كه ڕێگری بوون، ئه‌مه‌شیان هه‌میشه پیاوه ڕێگره له به‌رده‌م ژندا ئیتر چ باوك بێت یان براو و هاوسه‌ر و.. هتد.

17- ژماره‌یه‌كی ڕۆشنبیری لاواز له پیاوان كاتێك هاوكارێكی ژنه‌كانیان ده‌كه‌ن له ماڵه‌وه وه‌كو ئه‌وه سه‌یری ده‌كه‌ن كه كارێكی ئێجگار گه‌وره‌ی كردبێت ودیسان ده‌یكه‌نه منه‌ت به سه‌ر ژنه‌كانیانه‌وه كه ئه‌و كاری بۆ ئه‌وی ژن كردووه ئه‌مه‌ش قوربانیه‌كی گه‌وره‌یه چونكه كاری ئه‌ومی پیاو نیه ،به‌ڵام ئه‌م له پێناویدا ئه‌وا ئه‌و كاره‌شی كرد وا ده‌كات یه‌ك كاره‌كه لای ژنه‌كه‌ێ هیچ واتا و ڕێزێكی نه‌مێنێت ،له‌وه‌ش گه‌وره‌تر وا ده‌كات ژنه‌كه‌ی وا هه‌ست بكات خۆی له بیابانێكدا به ته‌نها ده‌ژی و ئه‌و كه‌سه‌ی كه ناوی ناوه هاوسه‌ری ژیانی خۆی به هاوبه‌شی هه‌موو شتێكی ئه‌و نازانێت .

18 - هه‌ندێ له پیاوان متمانه‌ی ئابووری به ژنه‌كانیان ناكه‌ن یه‌ك هه‌میشه خه‌ریكی حساب و ئاماركردنن چه‌ندی سه‌رف كردوه وه به چی داوه ، وه‌كو ئه‌وه‌ی ئه‌و مافه‌ێ نه‌بێت ، دوو : ژنه‌كانیان ئاگایان له لایه‌نی ئابووری ئه‌و نیه بۆی ئاشكرا ناكات وته‌نانه‌ت ئاماده‌یه پاره لای خۆشك وبرا وكه‌س كار حه‌شار بدات بۆ ئه‌‌‌وه‌ێ ژنه‌كه‌ی به ته‌واوی نه‌زانێت چه‌ندی هه‌یه ، نه‌خێر له‌مه‌ش زیاتر له دادگاكاندا زۆر جار دوو برا كێشه‌یان هه‌بووه له سه‌ر ئه‌وه‌ێ هه‌میشه پاره‌ی په‌لكێش كردووه بۆ براكه‌ێ گوایه قه‌رزارێتی ،به‌ڵام كاتێك كێشه‌یه‌كیان هه‌بووه ده‌سته‌كه‌ی ئاشكرا بووه ، ئه‌م مێژووه ڕه‌شانه لای ژنان به چی تۆمار ده‌كرێت جگه له خیانه‌ت هه‌تا بیری بۆ خیانه‌ت نه‌چێت ؟

19- هه‌ندێك له پیاوان خۆیان روو له سه‌رجه‌م شوێنه خۆشه‌كان وگه‌شت وگوزار وسه‌فه‌ر و باڕ وسه‌ماخانه‌و كۆبونه‌وه ودانیشتن له گه‌ڵ هاوڕێكانیان ده‌كه‌ن ، به بێ ئه‌‌‌وه‌ێ به‌شداری ژنه‌كه‌ێ بكات ، واته ژنه‌كه‌ی له گه‌ل خۆی به‌رێت ، یان هه‌مان ماف به ژنه‌كه‌ێ بدات كله گه‌ڵ هاوڕێكانیدا ، ته‌نانه‌ت هه‌ندێ جار ژنێك بچێت هاورێكی ژنی ببینێت یان پیاوه‌كه له گه‌ڵی ده‌ڕوات یان كاتی مانه‌وه‌كه‌ی بۆ ده‌ستنیشان ده‌كات ، یان كه هاته‌وه‌ی پرسیاری هه‌موو قسه‌و گفتوگۆكانیان ده‌كات ، پیاوانێك به‌و هه‌موو هه‌ست به كه‌می كردنه‌وه بژین ،چۆن باوه‌ر ده‌كه‌ن سۆزی ژنه‌كه‌یان ته‌نها له گه‌ڵ ئه‌واندایه .

20 هه‌ندێك له پیاوان ڕووی خۆش به ژنه‌كانیان ناده‌ن وپێیان وایه ئه‌و كاته ژنه‌كه‌ی وه‌كو مرۆڤێكی خاوه‌ن كه‌سایه‌تی و پیاو سه‌یری ده‌كاتكه قه‌پۆز پڕ كه‌م قسه‌ و دوو بێت ،هه‌تا له ده‌رئه‌نجامدا ووشكی ئه‌و به‌ره‌و لای زمان ته‌رێك ڕایده‌كێشێت .

21- كۆمه‌ڵێكی دی پیاوان زۆر له مافی كرداری جوان له ژنه‌كانیان تابۆ ده‌كه‌ن و ده‌ڵێن با فێر نه‌بێت و پێیان وایه ئه‌گه‌ر هاتنه خواره‌وه‌یه‌ك له په‌یژه‌ی غروری ڕوویدا ئیتر ئه‌و په‌یژه ده‌شكێت وژنه‌كه‌شی پێی فێر ده‌بێت كه هه‌میشه له غرور بیهێنێته خواره‌وه له كاتێكدا هه‌ر هه‌بوونی ئه‌و غروره خۆ خه‌ڵه‌تێنه شاهیدی دۆڕاوی ئه‌ون ،هه‌رئه‌وه‌ش وا ده‌كات ژنه‌كه‌ێ بیر له كه‌سێك بكاته‌وه كه به ساكاری وخۆڕسكی ژیانی لێ وه‌رگرێت نه‌ك به‌و عه‌قڵیه‌ته دواكه‌و تووه‌ی ژنه‌كه‌ی له به‌خته‌وه‌ری بكه‌یت بڵێیت با فێر نه‌بێت .

22- جۆرێكی دی پیاوان ڕێگه‌ێ پێگه‌شتن وپێشكه‌وتن له ژنان ده‌گرن ، نه‌ك هه‌ر ئه‌وه به‌ڵكو ده‌س وه‌رده‌ده‌ن له هه‌موو خواستێكیان وته‌نانه‌ت پۆشاكیش پێویسته به ئاره‌زووی ئه‌وان بپۆشن نه‌ك خۆیان .

23- هه‌ندێك له ژنان به ئاره‌زووی خۆیان شوو ناكه‌ن و به شێوه‌ی زۆر ملێ وجه‌خت كردن هاوسه‌ره‌كه‌ی هه‌ڵده‌بژێرێت ،بێ گومان هه‌رگیز دڵی له گه‌ڵی نابێت

24 هه‌ندێك له پیاوانه به خاتری ڕوخسار یان به‌رژه‌وه‌ندی مادی ومه‌عنه‌وی یان له به‌ر ئه‌وه‌ێ خوشك وكچی فڵان وفیساره كه كه‌س وكاریان ناویان هه‌یه له ناو كۆمه‌ڵدا ژنه‌كه‌ی خواستووه ، ئاشكرایه ئه‌و ڕوخسار وشێوه‌یه جگه له‌وه‌ی گیانی مردنه به ماوه‌یه‌كی كه‌میش له چاویدا كۆن ده‌بێت ،به دوای وێنه‌ێ نوێدا ده‌گه‌ڕێت .

25- هه‌ندێ له پیاوان له كاتی گفتوگۆ له سه‌ر كیشه‌یه‌ك هێنده چڵێسانه په‌لاماری مه‌سه‌له‌كه ده‌ده‌ن و هه‌رچی لایه‌نه سلبیه‌كانی نێوانیان هه‌یه دیده‌نه پاڵ ژنه‌كه ، كه ئیتر سارد بێته‌وه له هه‌موو هه‌وڵێك بۆ چاره‌سه‌ركردن و ئاسایی كردنه‌وه‌ی په‌یوه‌ندیه‌كه‌یان ، بۆیه باشتترین چاره له لای ده‌بێت به ڕاكردن بۆ جیهانێكی دی كه درۆ وتۆمه‌ت و تاوانبار كردنی مێرده‌كه‌ی بیر باته‌وه و گوێ لێ بگرێت. .

26- پیشه‌یه‌كی دی پیاوان كه پاڵنه‌رێكی زۆر ئاكتیڤه له خیانه‌تكردنی ژندا جنێودان و سوكایه‌تی پیاوه ، سه‌یره پیاوێك به ژنه‌كه‌ی بڵێت بێ ڕه‌وشت یان سۆزانی یان خراپه‌كار وهه‌ر ووشه‌یه‌كی دی چاوه‌ڕوانی ئه‌وه نه‌كات ژنه‌كه‌ی بكه‌وێته ژێر كاریگه‌ری ئه‌وه‌ی كه بڵێت خۆ هاوسه‌ره‌كه‌م هه‌ر پێم ده‌ڵێ ڕه‌وشت نزم و خراپه‌كار ئیتر بۆچی خراپه‌كار نه‌بم پیشانی نه‌ده‌م خراپه‌كاری یانی چی ؟

27- پیاوانێك هه‌ن هه‌ر له سه‌ره‌تای ژیانه‌وه كۆمه‌ڵێ كرده‌وه‌ی نابه‌جێ وتوندوتیژی له مامه‌ڵه‌ و حساب نه‌كردن بۆ خواست وبۆچوونی ژن پراكتیك ده‌كه‌ن ، گوایه ده‌یانه‌وێ قسه‌ی دوای بڕیاری دوایی لای ئه‌وان بێت و خۆیان ئێداره‌ی ماڵ و ژیانی هه‌ردولا بكات یان ده‌سه‌ڵاتی یه‌كه‌می ماڵ بێت ،به‌وه‌س هه‌ر له سه‌ره‌تاوه په‌رده‌ێه‌كی ئه‌ستوور له نێوان هه‌ردوو لادا دروست ده‌كات كه نه‌ك ته‌نها ئیداره‌كردنی ماڵه‌وه به‌ڵكو لابردنی ئه‌و په‌رده‌یه‌ش زۆر زه‌حمه‌ت بێت ، ئه‌مه‌ش واده‌كات ژن له گه‌ڵ مێردیدا هه‌ست به غه‌ریبی بكات ، په‌نا بۆ ئاشنا به‌رێت .

28- جۆرێكی دی پیاوان ته‌نها ژن ومێردایه‌تیان له گه‌ڵ ژندا هه‌یه و هاورێیه‌تی له گه‌ڵدا دروست ناكه‌ن و باسی كه‌م وكوڕی وهه‌ڵه‌كانی خۆیان لای ژن ناكه‌‌ن ،به تایبه‌ت لای ژنی خۆیان هه‌رگیز فرمێسك ناڕێژن ، به‌ڵام ئاماده‌‌ن له سه‌ر كۆشی خۆفرۆشێك هه‌رچی دانپیادانیان هه‌یه وه‌كو به‌رده‌می كه‌نیسه به‌تاڵ بكات‌‌وه ، نازانێت كه ژن ده‌زانێت مرۆڤ بێ هاورێ نابێت ،گه‌ر له گه‌ڵ ئه‌و هاوڕێ نییه واته هاوڕییه‌كی له ده‌ره‌وه‌ی ئه‌و هه‌یه و ئه‌می ژنیش هه‌مان كار دووباره ده‌كاته‌وه .

29- ژماره‌یه‌كی زۆری پیاوان له ڕوانگه‌ی عه‌شایه‌ری و په‌یوه‌ندی نێوان ئاغ و ده‌ره‌به‌گ له ده‌ست ماچ كردن ده‌نواڕن ، به كه‌می وهاتنه‌خواره‌وه‌ی ده‌زانن گه‌ر ده‌ستی ژنیان ماچ بكه‌ن ، له كاتێكدا به پێوه‌ری خۆشه‌ویستی ماچ كردنی پشتی ده‌شت واته ڕێز لێ گرتن وماچ كردنی ناو له‌پ واته من موڵكی تۆم یان بۆ تۆم ، ئه‌گه‌ر پیاوێك به ووشه‌و به هێما ژنه‌كه‌ی تێنه‌گه‌یه‌نێت كه بۆ ئه‌وه چۆن ده‌یه‌وێت ژنه‌كه‌ی ته‌نها بۆ خۆی بێت .

30- پیاوانێكی دی هه‌میشه منه‌تی كاركردنی خۆیان به‌سه‌ر ژنه‌كانیان ده‌كه‌ن ووای بۆ ده‌رده‌خات ماده‌م ئه‌و كارده‌كات و پاره ده‌هێنیته‌وه، ئه‌می ژن پێویسته خزمه‌تكاری بكات و مافی دی له‌سه‌ری نیه ،یان نازكردنی توانایه‌ك كه هه‌بێت، پێچه‌وانه‌كه‌شی هه‌ر ڕاسته كه‌م نین ژماره‌ی ئه‌و ژنانه‌ێ خاوه‌نی تایبه‌تمه‌ندی و توانانن پیاوه‌كانیان هه‌میشه هه‌وڵ ده‌ده‌ن له به‌هایان لای خۆیان بهێننه خواره‌وه به كه‌م سه‌یری تواناكه‌یان بكه‌ن و ئیره‌یان پێ ده‌به‌ن .

هه‌موو ئه‌وانه‌ی سه‌ره‌وه واتای خۆشه‌ویستی و سێكس ده‌كات لای ژن، سه‌رجه‌میان ئه‌و خاڵه گرنگانه‌ن كه كاریگه‌ری ڕاسته‌وخۆ له سه‌ر ڕۆح و ژیانی ڕۆحی ژن ده‌كه‌ن، كێ ده‌ڵێ ژن ته‌نها به سێكس كردن ڕازی ده‌بێت هه‌تا پیاوان ئه‌گه‌ر له گه‌ڵ ژنه‌كانیان ئه‌نجامیان دا ئیتر له‌وه‌ دڵنیا بن كه‌م وكوڕییان نیه به‌رانبه‌ر ژنه‌كانیان و ژنه‌كانیان گه‌یاندووه به چێژ وه‌رگرتن و ڕووبه‌رووی دژواری نابێته‌وه

پیاو ئه‌گه‌ر سه‌یری ئه‌وه بكات ویستم هه‌ڵه‌كانی ته‌نها له ١٢ خاڵدا چر بكه‌مه‌وه‌و گه‌شتم به ٣٠ بیرم هاته‌وه ١٢م گووتوه و هیشتا زۆریش ماوه پێویسته بزانێت كه ڕۆشنبیری هاوبه‌شی چه‌ند لاوازه‌ و چه‌ندی كه‌م وكوڕی تێدایه... چه‌ندین نموونه‌ی دیكه‌ش كه له‌وانه قێزه‌ونترن جا با هه‌موو پیاوێك كه ئه‌وخاڵانه‌و چه‌ندین خاڵی دی فه‌رامۆشكراویش ده‌بینێت به خۆیدا بچێته‌وه، بزانێت چه‌ندی له‌م خاڵانه تێدایه ،ئه‌وجا ده‌زانێت بۆچی ژنه‌كه‌ێ هه‌میشه په‌سته و ڕوو گه‌شیه‌كانی په‌ریوه؟، یان بۆچی خیانه‌تی لێكردووه؟، زانستی ده‌روونی سه‌لماندوویه‌تی ئه‌و ژنانه‌ی هۆكارێك له ژیانی سۆزداریاندا هه‌یه كه ده‌بێت به هۆی ناڕه‌زایی به تایبه‌ت ئه‌و خاڵانه‌ێ سه‌ره‌وه هه‌میشه په‌ست وتووڕه و غه‌مبار وره‌نگ زه‌رده (له‌مه‌وه‌یه به ژنی ڕونه‌قدار ده‌گوترێ به‌خته‌وه‌ر)، هه‌تا وای لێدێت تووشی گرفتی ده‌روونی ده‌كات به‌وه‌ش سه‌رجه‌م میكانیزمی په‌روه‌رده كردنی لا ده‌شێوێت و مناڵانێكی توند وتێژو دواكه‌وتوو و گرێدار په‌روه‌رده ده‌كه‌ن وه‌كو ئه‌و هه‌موو نموونه‌ی له كوردستاندا هه‌ن، یان ده‌رئه‌نجامی ئه‌و فشاره ده‌روونیه به‌ره‌و خیانه‌تی هاوسه‌رێتی ده‌به‌ن چه‌نده به هێزیش بێت، چونكه فاكته‌ره ده‌رونێكان كاریگه‌ریان له فاكته‌ره عه‌قڵیه‌كان له سه‌ر مرۆڤ زۆرتره... بۆیه پێویسته به‌ر له‌وه‌ی بڵێین ئه‌م دیاردانه بۆ زۆره و له ناو كوردیشدا ته‌شه‌نه‌ێ كردووه پیاوان سۆڕشێكی ڕۆشنبیری خێزانی له ناو خۆیاندا دروست بكه‌ن، ئه‌و پیاوانه‌ی كاتێك ژنه‌كه‌یان به‌ر تۆمه‌تی خیانه‌تی هاوسه‌ری ده‌ده‌ن، زیاتر له مه‌وداكانی عه‌قڵی خۆی شه‌رمه‌زار بێت و بزانێت كه پیاوه‌تی وبیرو هۆش ڕۆشنبیری خۆی چه‌ند لاكه‌وته وئاست نزمه كه پاڵی به ژنه‌كه‌یه‌وه ناوه خیانه‌ت بكات، ئه‌و پیاوانه‌ی به تاوانی شه‌رف ژنه‌كانیان ده‌كوژن یان هانی براو که‌‌س وكاری لێده‌دات كه كچ یان خوشكه‌كه‌ێان بكوژن گوایه شه‌ره‌فی ڕۆشتووه، جوانتره شه‌ره‌فی خۆی نه‌بات هه‌موو كه‌س له‌وه ئاگادار نه‌كات كه ئه‌و هه‌موو كه‌م و كوریه‌ی شه‌ره‌فی تێدایه كه پاڵی به خۆشكه‌كه‌ی، كچه‌كه‌یه‌وه ناوه له سروشتی ڕابردووی خۆی ده‌رچێت به‌ره‌و سروشتێكی ناڕێكی جیاواز.كام پیاو به تایبه‌ت پیاوی ‌كورد كه چوارمێخه‌ی عه‌قڵی به ووشه‌ی شه‌ره‌ف دراوه ڕاڤه‌ی ئه‌وه‌ی كرد، ژنه‌كه‌ی پێشتر و به‌ر له‌وه‌ی ببێت به هاوسه‌ری ئه‌و نه خۆفرۆش بووه و نه خیانه‌تكار پاش هاوسه‌ركردنی ئه‌و شه‌ره‌فه چیه له ئه‌وی پیاوی وه‌رگرتووه تا ببێت به خۆفرۆش و خیانه‌تكار، ئایه ئه‌گه‌ر خۆفرۆش بوایه ئه‌و ده‌یكرد به هاوسه‌ر؟ بێ گوومان نه‌خێر ... كه‌واته به‌ر له ناسینی ئ‌‌و خۆفرۆش وخیانه‌تكار نه‌بووه. گه‌وره‌رترین شه‌رمه‌زاری به نێو چه‌وانی پیاوانه‌وه به تایبه‌ت پیاوانی كوردیش كه ئه‌م مه‌سه‌له‌یه بووه به دیارده له ناو كوردستاندا ئه‌وه‌یه كه هێنده ناته‌واون له هه‌موو ڕوه‌كانه‌وه بوون به هۆی ئه‌وه‌ی ئه‌و هه‌موو خۆفرۆشی وخیانه‌ته بڵاو بێته‌وه له كاتێكدا هیچ ژنێك له دنیادا بێ ڕه‌وشت نیه وه‌كو ئه‌وه‌ی پیاوان بانگه‌شه‌ ده‌كه‌ن بۆ هۆكاری خیانه‌ته‌كان به‌ڵكو هه‌میشه پیاوێكی گه‌مژه و كاڵ فام له پشت ئه‌و كرده‌وه‌یه .

 

به‌ڵام له گه‌ل هه‌موو ئه‌وانه‌شدا پێویسته ژن بگات به ئیراده‌یه‌كی له‌وه به‌ هێزتر، ده‌روونێكی له ده‌روونی ئه‌و جۆره پیاوه ساغ تر، یه‌كه‌م هه‌وڵ بدات بۆ چاره‌سه‌ری كیشه‌كه‌ و ئه‌گه‌ر زانی هاوسه‌ره‌كه‌ی له‌و جۆری خاڵی (٢۵ و ٢٦)ه ئه‌وا ،سڵ له ته‌ڵاق وه‌رگرتن نه‌كاته‌وه چونكه هه‌موو كاتێك ته‌ڵاق وه‌رگرتن له خیانه‌تی هاوسه‌ری په‌سه‌ند تره، هه‌ندێ جار ده‌گه‌م به قه‌ناعه‌تێك كه هه‌موو ژنێكی كورد پێویستی به‌وه‌یه دوو جار شو كردن هه‌یه، جارێك بۆ ته‌ڵاق و جارێك بۆ هاوسه‌ری، مرۆڤ ئه‌و بێ ئومێدیه‌ی له‌وه‌وه تووش ده‌بێت كه ژنی ئێمه هێنده له پیاوه‌وه دووره ته‌نها به هاوسه‌رێتی ده‌توانێت هێنده پیاوێك ببینێت كه بتوانێت بزانێت هه‌ڵه و ڕاسته‌كان و درو ساخته‌كانی پیاو له كوێدا به‌رجه‌سته ده‌بێت، چونكه ژنی كورد چ له ڕووی خوێنده‌واری و چ له رووی كه‌لتورییه‌وه هێنده دابڕاوه كه زۆر جار ئاگاداری فاكته‌ره‌كانی چه‌وساندنه‌وه‌ی خۆشی نیه، ته‌نانه‌ت نازانێت ره‌نگ زه‌ردی و توڕه‌ی و ناڕه‌زایی هه‌میشه‌یی له‌و فاكته‌رانه‌ی سه‌ره‌وه سه‌رچاوه‌ی گرتووه. دیسان پیاوی كورد هێنده ناڕۆشنبیره كه‌میان هه‌یه له گه‌ڵ ئه‌و كه‌سه‌ی هه‌ڵده‌بژێرن ١٠٠% ڕاستگۆ بن، بۆ ئه‌وه‌ی له پاشدا ناڕاستیه‌كانی تووشی گرفتی نه‌كات وژن به‌ر له هاوسه‌ر بوون به ڕاستی و وه‌كو خۆی بیناسێت، چونكه پێی وایه ئه‌وی پیاو پێویستی به عه‌قڵێكی له كار كه‌وتووه، با ئێستا عه‌قڵی له خشته به‌رێت پاش هاوسه‌ری ناچاره هه‌موو شت په‌سه‌ند بكات ، نازانێت ئه‌و عه‌قڵه له كار كه‌وتووه به‌ره‌و رێگه‌ێ تری ده‌بات .

 

ئایه فیمینزم باوه‌ڕی به ئازادی سێكسی هه‌یه ؟.

 

به بێ ئه‌وه‌ی بچمه سه‌ر هیچ پێشه‌كی و سه‌رچاوه‌یه‌ك راسته‌و خۆ ده‌ڵێم ئه‌وانه‌ی له سه‌ره‌وه باسكران و ئه‌وانه كه هه‌ر پرۆسه‌یه‌كی ده‌ره‌وه‌ی سروشتی مرۆڤایه‌تی ده‌كات هیچ مافێكی به سه‌ر فیمنزمه‌وه نیه، مرۆڤی فیمنست هه‌ڵگری ئه‌و جۆره ئاكاره نیه ، ناڵێم بیر وباوه‌ڕ چونكه له بنه‌مادا هیچ پابه‌ندیه‌كیان له گه‌ڵ فكردا نیه و ته‌نها هاوبه‌شی ده‌رده و گرێ ده‌روونی جیاوازه‌كانن و دیارترین هۆكاره‌كانی ئه‌و پاڵنه‌ره ده‌روونیانیه‌شمان دیاری كرد. له بنه‌مادا هه‌وڵی فیمنست پێویسته ده‌رچوون بێت له بن ده‌ستی و چه‌وساندنه‌وه جیاوازه‌كان ته‌نانه‌ت له جۆری چه‌وساندنه‌وه‌ی خود بۆ خودیش، من ئه‌مه ده‌كه‌م به په‌یامی نوێ فیمنستی كوردی و پێویسته ئه‌وه بزانرێت كه دیارده‌ی لیزبێنیش (سێكس كردنی هاوڕه‌گه‌ز، واته ژن له گه‌ڵ ژندا به‌ هه‌مان هه‌ڵه و پاڵنه‌ری ده‌ڕوونی لای مرۆڤه‌كانه سه‌ڕی هه‌ڵداوه‌و به‌ڵام ته‌نانه‌ت له ئه‌وروپاشدا هه‌ندێ سه‌ر لێشێواو ئه‌و پرۆسه‌یه ئه‌نجامده‌ده‌ن گوایه فیمنستیه، به‌ڵام له ڕاستیدا وانیه و به لێكدانه‌وه‌ی ساكاری هه‌ر مرۆڤێكی ساكاریش دوور له هه‌موو به‌هایه‌کی ڕۆشنبیری گه‌ر بگووترێ چه‌مكێك خۆی ده‌نوێنی بۆ گۆڕینی ژیانی ژن له گووتاری پارتیاركیه‌وه بۆ گوتاری ژنانه، تێده‌گات كه مه‌به‌ستی هه‌لاواردن ولابردنی سه‌ڕجه‌م چه‌وساندنه‌وه‌كانه له سه‌ڕ ژن، ژنیش هه‌تا هۆشیار نه‌بێت نازانێت جۆری چه‌وساندنه‌وه‌كان چۆنن بۆ ئه‌وه‌ێ قه‌ڵاچۆیان بكات ،كه بوو به خاوه‌نی ئه‌و لێكدانه‌وه‌یه‌ش ئه‌و كات ده‌زانێت ته‌نانه‌ت بیر ڕۆشتنی خۆشی به‌لای مه‌سه‌له‌یه‌كی وه‌كو لیزبێندا تاوان وچه‌وساندنه‌وه‌یه‌كی نوێیه، ئه‌م جۆره‌یان نه كۆمه‌ڵ پاڵنه‌رێتی نه كه‌لتوری كۆمه‌ڵایه‌تی، ته‌نها و ته‌نها بیری نادروست و كاركه‌ره ده‌روونیه‌كان پاڵنه‌ری ئه‌و مه‌سه‌له‌یه‌ن، وه‌ ئه‌گه‌ڕ له من بپرسیت ئه‌و جۆره مرۆڤانه‌ی سێكسی هاوڕه‌گه‌ز ئه‌نجام ده‌ده‌ن چییانه ڕاسته‌و خۆ ده‌ڵێم نه‌خۆشی ده‌روونیان هه‌یه .

 

بۆ زیاتر جه‌خت كردن له سه‌ر ئه‌وه‌ی كه فیمنست واته ئازادی سێكسی و خۆفرۆشی و خیانه‌تی هاوسه‌ری ناكات، ده‌چمه‌وه سه‌ر به‌سێك له ژیانی گه‌وره دانه‌ری تیوری فیمنستی ،سیمون بۆڤوار ئه‌وكاته‌ی له ساڵی ١٩٤٧ ده‌چێت بۆ وانه گووتنه‌وه له زانكۆكانی ئه‌مه‌ریكا ، ئه‌و كاته بۆڤوار ته‌مه‌نی ٣۵ ساڵ بوو ،وه له لوتكه‌ی ناوبانگدا بوو له كه پاریسه‌وه ڕووی كرده ئه‌مه‌ریكا و له شیكاگۆ بوو به هاوڕێی نووسه‌ری به‌ناوبانگی ئه‌مه‌ریكی (نلسۆن گرنیه )خاوه‌نی ڕۆمانی (ئه‌و پیاوه‌ی دوو باڵی ئاڵتوونینی هه‌بوو)، هه‌ر له‌وێ له گه‌ڵ بۆڤواردا په‌یوه‌ندی خۆشه‌ویستی ده‌كه‌وێته نێوانیان و هه‌تا ساڵی ١٩٦٤ نامه‌یان گۆریوه‌ته‌وه ،به‌ڵام پاشان سیمۆن به ژن هێنانی نلسۆن گرنیه له ژنێكی دی تووشی شۆك ده‌بێت، به تایبه‌ت كه خۆشه‌ویستی بۆڤوار بۆ گرنیه خۆشه‌ویستی كاتی و ناڕاست نه‌بووه، بۆیه بۆڤوار ده‌گه‌رێته‌وه پاریس له‌وێ له دوو تۆی كتێبێكدا به‌ ناوی (پیاوه خۆشه‌ویسته‌كه‌ی شیكاگۆ، نامه‌كان بۆ نیسلۆن گرنیه) سه‌رجه‌م ئه‌و نامانه‌ی بڵاوكرده‌وه كه بۆ گرنیه‌ی نووسیوه، ئیتر له‌و كاته‌وه په‌یوه‌ندی خۆشه‌ویستی له ژیانی بۆڤاردا سڕایه‌وه وه‌كو ئه‌وه‌ێ خۆی باسی لێكردووه و نزیكترین پیاویش لێوه‌ی سارتری هاوڕێی بوو كه خاوه‌نی درێژخایه‌نترین هاورێتی نێوان نووسه‌ران و بلیمه‌تانن، ئه‌م هاوڕێیه‌تیان ۵٢ ساڵی خایاند به بێ ئه‌وه‌ی هاوسه‌ری بكه‌ن، به‌ڵام له هه‌موو ئه‌مانه گرنگتر ماوه‌ێ ئه‌و ۵٢ ساڵه هاوڕیه‌تیه و هه‌موو ته‌مه‌نی بۆڤواریش هه‌تا مردنی ئه‌و ئه‌نگوستیله‌ی نیلسۆن گرنیه پێی به‌خشیبوو هه‌ر له په‌نجه‌یدا بوو .

 

مرۆڤ گه‌ر له‌و هه‌لوێسته بڕوانێت كه بۆڤوارێكی یاخی له سه‌رجه‌م بۆچوونه‌كانی سه‌رده‌می خۆی وگه‌وره داهێنه‌ری فه‌لسه‌فه‌ی بوونگه‌رایی له گه‌ڵ سارتری هاوڕێی و گه‌وره‌ترین نووسه‌ری سه‌رده‌می خۆی به‌رانبه‌ر مرۆڤێك كه خیانه‌تیشی لێ كردووه. ده‌زانێت ئه‌م خۆشه‌ویستیه‌ی بۆڤوار زۆر له‌وانه‌ی خێڵی عه‌زره مه‌زنتر و پاك تره، چونكه ده‌كرێ پاڵه‌وانانی خێڵی عه‌زره خۆشه‌ویستیان كردبێت ته‌نها به هه‌بوونی سۆز به‌ڵام بۆڤوار به هه‌بوونی سۆز و ئاوه‌ز و هزر ، ئه‌گه‌ر ئه‌وانه‌ێ یه‌كه‌م ته‌نها داستان و چیرۆكی خه‌یاڵی بن، ئه‌وا دووه‌میان كه بۆڤواره كه‌سێكی ڕاسته‌قینه‌ ودانه‌‌ری تیوری ژیانه، كه‌واته لای فیمینزم خۆشه‌ویستی ئه‌و پیرۆزی و واتای هه‌یه كه به‌رابه‌ر ناكرێت له گه‌ڵ واتاكانی ئازادی سێكسی و له‌شفرۆشی و خیانه‌ت. ئایه بۆ كه‌سێكی وه‌كو سیمۆن بۆڤوار له كۆمه‌لگایه‌كدا نه‌بوو ئازادانه رێگه جۆبه‌جۆره‌كان بخاته به‌رده‌می؟ ئایه هزر و بۆچونی ڕێگه‌ی پێنه‌ده‌دا كه ئه‌و كاره‌ساته به ئاسایی وه‌ربگرێت؟ نه‌یده‌توانی بیر له تۆڵه بكاته‌وه گورزی كوشنده له گرنیه بدات له بری ئه‌وه‌ی ڕاستگۆیانه له ئه‌و به‌ڵگانه بڵاو بكاته‌وه كه له هه‌موویاندا باسی خۆشه‌ویستی خۆی بۆ گرنیه ده‌كات، هه‌روه‌ها له پاشاندا باسی وه‌فا و پابه‌ندبوونی هاوڕێیانه‌ی به سارته‌ره‌وه ده‌كات، هه‌ر ئه‌م خۆشه‌ویستیه‌ش په‌یوه‌ندی زۆری به نووسینی كتێبی ڕه‌گه‌زه‌كه‌ی تر كه به‌رجه‌سته‌ی خۆشه‌ویستی وا ده‌كات گه‌وره‌ترین داو بێت بۆ ژن، كه‌واته سیموون له ژێر كاریگه‌رێكی زۆری ئه‌و په‌یوه‌ندیه خۆشه‌ویستێدا بووه. لێره‌وه ده‌توانم بڵێم ئه‌‌و بۆچونانه‌ش كه له سه‌ر سیمۆن ده‌گووترێت گوایه لیزبێن بووه، واته پرۆسه‌ی سێكسی له گه‌ڵ قوتابیه كچه‌كانی خۆیدا هه‌بووه كه من ناتوانم ئه‌مـه بە‌ ته‌واو وه‌ربگرم چونكه سه‌رچاوه‌یه‌كم له به‌ر ده‌ستا نیه ئه‌‌و مه‌سه‌له‌یه ڕاست بكاته‌و دیسان ئه‌و ژنه وه‌كو خه‌باتكارێكی یاخی سه‌رده‌می خۆی ده‌كرێت زۆر ناحه‌زی هه‌بووبێت وئه‌وانه گووتراوه ته‌نها بۆ لێدانی بووبێت به تایبه‌ت له‌و كاته‌دا تازه بزوتنه‌وه‌ی لیزبێنی به ئاشكراو به هێزه‌وه ده‌رده‌كه‌وێت و لای ڕۆژئاوایه‌‌كانیش به پرۆسه‌یه‌كی نه‌فره‌ت لێكراو ناوزه‌د كراوه .

 

به‌ڵام له هه‌مان كاتدا ئه‌گه‌ر ئه‌و مه‌سه‌له‌یه ڕاستیش بێت ، سیموون كاتێك ئه‌وه‌ی نه‌كردووه كه خۆی قوتابی بووه به‌لكو كاتێك بووه كه قوتابی هه‌بووه واته مامۆستا بووه ، له‌و كاته‌شدا تووشی شۆك بووه به‌رانبه‌ر به مرۆڤێك كه به ڕاستی خۆشی ویستووه ساڵانێكی ته‌مه‌نی له به‌ر خاتری ئه‌و له ئه‌مه‌ریكادا به سه‌ر بردووه ،كه‌وتوه‌ته ژێر ئه‌و كاریگه‌رێ گه‌وره‌ش كه گه‌وره‌ترین شاكار بنووسێت كه ئه‌ڵقه‌كه‌ی تا مردن له په‌نجه‌دا بێت و نامه‌كان بڵاو بكاته‌وه، كارێكی ئاساییه كه‌وتبێته ژێر كاریگه‌ری ئه‌وه‌ی كه متمانه‌و خۆشه‌ویستی بۆ پیاو نه‌مێنێت و به‌ره‌و لادان بچێت چونكه وه‌كو گووتمان ڕاسته ئاسته فكریه‌كان كاریگه‌ری گه‌وره‌یان له سه‌ر كاریگه‌ریه ده‌رونیه‌كان و هێزی ئیراده هه‌یه ،به‌ڵام له هه‌مان كاتدا پاڵنه‌ره ده‌روونیه‌كان كاریگه‌ریه‌كی ئێجگار گه‌وره‌تر‌یان هه‌یه .بۆیه بۆڤواریش وه‌كو هه‌ر ژنێكی دی ده‌كرێ كه‌وتبێته ژێر ئه‌و كاریگه‌ریه ده‌روونیانه‌ی كه پێشتر به چه‌ندین خاڵ باسمان لێوه كرد ، چونكه له ژیانی بۆڤوار و ئه‌و كاروانی خۆشه‌ویتێیدا كه ماوه‌یه‌كی درێژی خایاندوه كۆمه‌لێك له‌و خاڵانه ئاماده‌ی خۆی ده‌نوێنێت. به‌لام هه‌رگیز ئه‌وه واتای فیمنستێت ناكات وبۆڤوار له هیچ سه‌رچاوه‌یه‌كدا ئاماژه‌ی به‌وه نه‌كردوه وه ته‌نانه‌ت ئه‌گه‌ر ئه‌و مه‌سه‌له‌یه ڕاست بێت وبۆڤوار كه‌سێكی لیزبێنیش بووبێت له هیچ سه‌رچاوه‌یه‌كم نه‌بینیوه ئاماژ‌‌ه‌ی پێ بكات وشانازی پێوه بكات ، یان دانی پێدا بنێت كه به ڕاشكاوانه باسی له قۆناغه‌كانی ژیانی كردووه. خۆ گه‌ر بۆڤوار نه‌یزانیبایه بۆچون و كرده‌یه‌كی هه‌له‌یه گوزارشتی لێ ده‌كرد، یان گه‌ر بیزانیبا له نێو چوارچێوه‌یه‌كی فكری دیاری كراودا به تایبه‌ت فكرێكی وه‌كو فیمنستی جێگای ده‌بێته‌وه بێ گوومان ڕاڤه‌ی ده‌كرد چونكه شتێك بوو خۆی كردوویه‌تی بڕواشی پێی هه‌بووه.

 

ژنی كورد پێویسته ئه‌وه بزانێت ته‌نانه‌ت ئه‌گه‌ر ڕۆژێ له ڕۆژان فیمنیزم بوون واتای لیزبێنی وئازادی سێكسیش كردبێت، ئه‌و هه‌ر پێویستی به سیستمێكی فیمنستیه به‌و واتای جیهان بینی ژن، نه‌ك به واتای جێگه كردنه‌وه‌ی ئه‌و نه‌رێته یان ده‌رد و گرێ ده‌روونیانه ، به‌ڵكو تیورێك له سه‌ر بنه‌مای دروستی ده‌روونی وزانستی و پسپۆڕی له جیهانبینی ژندا دامه‌زرابێت و باوه‌ڕی مرۆڤێش به‌ره‌و كایه‌ی مه‌عریفی ئه‌و پرۆسه‌یه‌ی به ئاسانی تێیدا به‌رجه‌سته بێت .باوه‌ڕی به‌وه هه‌بێت كه دینامێكیه‌تی ده‌ره‌وه كاریگه‌ری هه‌یه له سه‌ر په‌یوه‌ندی كردار و په‌رچه‌كردار ، له‌وێشه‌وه مرۆڤ مل ده‌نێت به‌ره‌و دۆخێكی نوێ كه ده‌كرێ پزه‌تیڤ بێت یان نه‌گه‌تیڤ ،پێچه‌وانه‌ی مانای ئه‌وه ده‌گه‌یه‌نێت كه كه‌سی گرفتار یه‌كه‌یه‌كی نیه بۆ سه‌نترالیزم بوونی خود. به هۆی به كارهێنانی عقڵی له كاركه‌وتوو .

 

له كار كه‌وتنی عه‌قڵی به‌ كار نه‌هێنراو .

ژن ئه‌و مرۆڤه ساویلكه نیه هه‌ست به چه‌وساندنه‌وه‌ی خۆی نه‌كات ،هه‌وڵی ڕزگار بوونیش ده‌دات به‌ڵگه‌ش ئه‌وه‌یه ژنێكی لادێ نشینی نه‌خۆێنده‌وار كه له چه‌وساندنه‌وه‌كانی خۆی یاخی ده‌بێت مێرده‌كه‌ی به جێ ده‌هێڵێت وڕوو ده‌كاته ماڵی باوكی، كه ئه‌وه ته‌نها ڕێگه چاره‌ی ئه‌وه، له ماڵی باوكیشدا هه‌ر چه‌وساوه‌یه، ته‌نانه‌ت ئه‌و ژنانه‌ی كه به پێی ئاستی ڕۆشنبیری خۆیان بۆ لای دوعا كه‌ر و جادووگه‌ره‌كان ده‌چن دیسان له پێناوی ڕزگار بوون و كۆتایی هاتن به چه‌وساندنه‌وه ده‌رۆنه ئه‌و جیگانه له وه‌همێدا بۆ چاره ده‌گه‌رێن، هه‌تا ئه‌و ژنانه‌‌‌ی له هاوسه‌ره چه‌وسێنه‌رانه‌كه‌یان جیا ده‌بنه‌وه و ... هتد، به‌ڵام هۆشیاری نه‌گه‌شتووه به ئاستێك بزانێ كه‌م كوڕیه‌كان له كوێ‌دایه، ئه‌و كه‌م زانین و ناڕۆشنبیریه‌شی زاده‌ێ سروشتی خۆی نیه و به ته‌نها زاده‌ی فه‌ره‌نگ و كه‌لتوری په‌روه‌رده‌كار و ئاماده‌یی نه‌رێته كۆمه‌لایه‌تیه دواكه‌وتووه‌كانه، چونكه هه‌ردوو ڕه‌گه‌ز به هه‌مان ئاماده‌یی خۆرسكی ،ئاست و شێوه له ڕووی توانا وزیره‌كیه‌وه دێنه دنیاوه ، به‌ڵام ئه‌و وزه وتوانانه لای مناڵی كوڕ هه‌ر له مناڵیه‌وه ئاكتڤه‌ و به كاری ده‌هێنێت و لای مێینه‌ش هه‌ر له مناڵیه‌وه ده‌چه‌پێنێرێت و رێگه له گه‌شه سه‌ندنی ده‌گیرێت، له‌مه‌شدا به ته‌واوی باوه‌ڕم وایه كه وزه وهزر وعه‌قڵێك به‌كارت نه‌هێنا زووش له كارده‌كه‌وێت ،چونكه مرۆڤێكی پسپۆڕ چۆن هه‌تا زیاتر لێكولینه‌وه بكات دۆزینه‌وه‌ی زیاتر به ده‌ست ده‌هێنێت، قوتابیه‌ك چۆن هه‌تا زیاتر كۆشش بكات نمره‌ی زیاتر وتوانای زیاتر له وانه‌كانیدا به ده‌ست ده‌هێنێت هزرو ئاوه‌زی مرۆڤیش به هه‌مان شێوه‌یه ، هه‌تا مرۆڤ راڤه و تێبیری زیاتری هه‌بێت به‌رانبه‌ڕ ده‌ركه‌وته‌كان زیاتر هزرو ئاوه‌زی گه‌شه ده‌كات، هه‌تا هه‌مان پرۆسه كه‌متر بێت ئاستی ئاوه‌ز وهزریش به‌ره‌و پوكانه‌وه‌و فه‌وتانی ته‌واو ده‌چێت ، ئه‌گه‌ر سه‌یری ئه‌و به‌شه‌ی ژیانی ژن بكه‌ێن كه هه‌ر له مناڵیه‌وه ئاكتیڤ ده‌كرێت له هزریدا و ورێگه به گه‌شه‌كردنی ده‌درێت به‌شی شووكردن ومناڵ به‌خێو كردن و ماڵدارییه به كۆمه‌لێك گرێی ده‌روونی و ترس و تۆقینه‌وه، هه‌ر ئه‌م فاكته‌رانه وا ده‌كه‌ن ژن زیاتر به لای نه‌زانی و شه‌ر‌منی وكه‌م هزریدا ئاقار بگرێت كه ( ژنی شه‌رمن شارێك ده‌هێنێت ) لای نه‌ته‌وه دواكه‌وتووه‌كانی وه‌كو كورد، به‌ بێ هزرو ئاوه‌زیش شارێكی هێنا هێنده‌ی تر ده‌چێته ژێر كاریگه‌ری ساویلكه‌یی وترس له‌وه‌ێ ژنێكی تر له‌و شه‌رمن تر كه‌م بێ ئاوه‌زتر هه‌بێت وگره‌وی شاره‌كه‌ی لێ باته‌وه، ئاشكرایه ئه‌و كاته‌ێ ترس وشه‌رم و بێ ئاوه‌زیش ئاماده‌یی ده‌بێت به‌رگری نامێنێت، به‌م شێوه‌یه ژن له بازنه‌یه‌كی به‌تاڵدا ده‌خولێته‌وه تا ده‌گات به‌و ئاسته‌ی كه جه‌سته‌ی خۆی په‌روه‌رده بكات له پێناوی ڕازی كردنی پیاوێكدا له چوارچێوه‌ی ته‌نها یه‌ك ئامانجدا ئه‌‌‌ویش ژیانه، ژیانێك بێ هزر وتێفكرین وڕاو پایه‌گه‌ تێدا ، ئه‌می هه‌میشه‌ ڕازی به هه‌موو شتێك و بێ ڕاو وبێ ده‌نگ ئه‌و جه‌سته‌یه پێشكه‌ش به‌و پیاوه ده‌كات كه ده‌یژێنێت وناوی ناوه هاوسه‌ڕ یان هاوبه‌ش ئه‌وی هاوسه‌ڕیش ده‌چێت كارده‌كات له پێناوی ئه‌و جه‌سته‌دا پاره‌ی بۆ ده‌هێنێته‌وه، چونكه كاتێك په‌یوه‌ندی ڕۆح، فكر وڕا نامێنێت، ته‌نها په‌یوه‌ندی له‌ش ده‌مێنێته‌وه به بێ به‌ها مرۆیه‌كان، لێره‌وه‌یه جه‌سته‌یه‌كی سێكس ئامێز ده‌توانێت گاره‌نتی زیاتری مانه‌وه‌یی ژیانی بدات، ئه‌گه‌ر مرۆڤ به ویژدان و به ووردی سه‌یری ئه‌و پرۆسه‌ بێ ڕۆحه‌ش بكات دیسان له پرۆسه‌ێ له‌شفرۆشی ده‌چێت ، به‌ڵام له‌ش فرۆشێكی له ژێر په‌رده‌ی هاوسه‌رێتیدا شه‌رعیه‌ت پێدراو ،ئه‌و پرۆسه‌یه‌ش لای هه‌ردوو لا ده‌چێته خانه‌ی داگیركاری وده‌ست به سه‌را گرتن ئه‌مه‌ش هه‌ڵه‌ێ تێگه‌شتنی پیاوه له ژن ، كه پێی وایه مادام جه‌سته‌ی هه‌یه بۆ سێكس وه گه‌ڕایه‌وه ماڵه‌كه‌ی پاكه‌و نانیش ئاماده‌ێه بیخوات ئیتر مانای ئه‌وه‌یه كه هه‌ست و سۆزی ئه‌‌و ژنه‌ی داگیر كردووه وبه ته‌نها هه‌ڵگری هه‌ست و سۆزی ئه‌وه ، به‌ڵام له ڕاستیدا چه‌ند پیاوان هه‌ڵه‌ن هێنده‌ش ژنان خۆیان چێژ له‌و ئاسته ژیانه وه‌رده‌گرن ،ژیانێكی بێ به‌رهه‌م دوور له هه‌موو چالاكیه‌كی هزری وئاوه‌زی و هۆشمه‌ندی ،چونكه له بنه‌مدا هزر و هۆشیاریان هه‌ر ئه‌وه‌یه كه پراكتیكی ده‌كه‌ن .

 

مرۆڤ هه‌ر له سه‌ره‌تاوه دوو هه‌ڵبژارده‌ی له به‌رده‌مدایه كه پێی بژی ، یه‌كێكیان :

ژیانه له ئاستی پێداویستیه سه‌ره‌كیه‌كانی وه‌كو خواردن وخواردنه‌وه سێكسی تێدا سه‌قامگیر بێت كه له گه‌ڵ ژیانی ئاژه‌لێكدا جیاوازی نیه وئاژه‌ڵانیش هه‌ر واده‌ژین ،دوو : ژیانێك كه له نێو پێكهاته هزری وڕۆحی و مرۆیه‌كاندا به‌ردی بناغه هه‌ڵده‌كۆڵێت، به‌ڵام ئه‌گه‌ر سه‌یری ژن بكه‌ین یه‌كه‌میان هه‌ڵده‌بژێرێت له پێناوی پاراستنی ئه‌و هێلانه‌ی كه تێدا ده‌ژی و مافی هه‌بوونی خواردن و خواردنه‌وه‌و سێكسه‌كه‌ی ده‌داتێ .به‌ڵام غه‌فڵتگیری پیاوان كه‌م ئاستی ئاوه‌زیان له‌وێدا ئاشكرا ده‌بێت كه زۆر جار ئه‌م جۆره ژیانه ده‌بێت به هۆی ئه‌وه‌ی له ناكاودا زله‌ی واقع به‌ر ڕوومه‌تی ئه‌و ژنه بكه‌وێت په‌نا بۆ پڕكردنه‌وه‌ی بۆشایه‌ ڕۆحیه‌كان لای پیاوانی تر بدات .

 

ئه‌و ژنانه‌ی هه‌ر له سه‌ره‌تاوه به‌و هێنده به‌شه‌ كارای ئاوه‌زیان ژیانیان خۆێندووه‌ته‌وه كاتێك به‌ هه‌ر شێوه‌یه‌ك بێت له ده‌ستی چه‌وسێنه‌ره‌كه‌یان دێنه ده‌ره‌وه ، ئه‌مانیش ده‌بن به چه‌وسێنه‌رێكی دی جارێكی چه‌وسێنه‌ری جه‌سته‌یی خۆیان و جارێك چه‌وسێنه‌ری ڕه‌گه‌زی به‌رانبه‌ڕ ، ته‌نها ئه‌گه‌ر هاوپۆله‌كه‌ی خۆم به نموونه وه‌ربگرم ئه‌وا هه‌موو هه‌ڵس و كه‌وته‌كانی ئه‌وه ده‌سه‌لمێنن كه ئه‌و مرۆڤه زۆربه‌ی خاڵه‌كان و فاكته‌ره هه‌ڵه‌كانی به‌شی پێشووی نێوان ژن وپیاوی له نیوان خۆی ئه‌و هاوسه‌ره‌ی كه له گه‌ڵ دوو مناڵ‌‌كه‌یدا به جێیهێشتبوو تاقی كردووه‌ته‌وه ، واته ئه‌و به عه‌قڵیه‌تی له كاركه‌وتوو له گه‌ڵ پیاوێكی غافڵگیر له‌وانه‌ی كه ته‌نها له ژیانه ئاژه‌ڵێكه‌دا ژن ده‌بیننه‌نه‌وه ،له ناكاودا كه جامی پڕ بووه راسته‌وخۆ به جێهێشتنی كاردانه‌وه‌ی هه‌بووه و ووڵات به ووڵات گه‌راوه هه‌تا به‌و دوایه له‌م ووڵاته‌دا نیشته جێ بووه ، وه له به‌ر ئه‌وه‌ی خاوه‌نی ئاوه‌زی ناكارا و باوه‌ربوو به خۆشه‌ویستی پشت به‌ستووه به به‌رانبه‌ره . ئه‌و جۆره خۆشه‌ویستیه‌ی كه رێژه‌یه‌كی زۆری ژنانی كورد متمانه ده‌خه‌نه سه‌ر ئه‌و جۆره خۆشه‌ویستی یه ، واته نواندی خۆشه‌ویستی ده‌كه‌ن له به‌رده‌می پیاوێكدا له پێناوی ژیاندا وه‌كو له پێشه‌وه گووتمان له ئه‌م پێشكه‌ش كردنی جه‌سته‌ و له ئه‌ویش پاره و خزمه‌ت به جیاوازی هێلێكی باریك له نێوان ڕۆژهه‌ڵات ورۆژئاوادا ، ئه‌ویش یه‌كه‌میان ده‌بێت به له‌ش فرۆشی هه‌ر رۆژه‌ی ره‌نگێك، فره‌یی، دووه‌میان ده‌بێت به خۆفرۆشی تایبه‌ت هه‌روه‌كو سه‌رمایه‌ی تایبه‌ت ئه‌ویش له ڕێگه‌ی مه‌شروعیه‌تی هه‌بوونی Boy Friend واته پێكه‌وه ژیانی له گه‌ڵ هاوڕێی كوڕ ،دیاره من دژی ئه‌و پرۆسه‌یه نیم به‌و شێوه‌یه كه ناوی بنێم له‌ش فرۆشی ێ ئه‌گه‌ر بۆی فرێند گرتنه‌كه‌ی له سه‌ر بنه‌مای خۆشه‌ویستی بێت ، به‌ڵام كاتێك ده‌بێت به به‌رژه‌وه‌ندی گۆڕینه‌وه‌ی جه‌سه‌دی و مادی یه‌كه‌م لای ژنه‌وه‌و دووه‌م لای پیاو ئه‌مانه‌یان ده‌بێت به له‌ش فرۆشی له ژێر ناوێكی دیدا ، وه به هیچ شێوه‌یه‌ك ئه‌و بۆچوون و كردانه له گه‌ڵ بۆچوون و هزری فیمنستیدا وێك ناگرێته‌وه و ئه‌وه‌ی ئه‌و كردانه ده‌كات به به‌هانه‌ی هه‌ڵگری ئه‌و بیروبۆچونه ته‌نها ووشه‌كه‌ی بینیوه‌و نازانێت واتای چیه ، جگه له‌وه‌ی هه‌وڵ ده‌دات شه‌رعیه‌تێك بۆ ئه‌و كاره بدۆزێته‌وه كه خۆی ده‌زانێت هه‌ڵه‌یه و به‌ڵام به سه‌ر خۆی ناهێنێت و هه‌میشه له هه‌وڵی گه‌ڕاندایه بۆ دۆزینه‌وه‌ی پاساوێكی سڕێنه‌ر .

مرۆڤ ، خود ، سه‌نترالیزمی بوون:

له ڕوانگه‌ی سه‌نترالیزم بوونی مرۆڤه‌وه له جیهاندا ،ده‌توانین بلێین هه‌ندێ مرۆڤ خاوه‌نی عه‌قڵی كاراش نه‌ك په‌ككه‌وته به‌ڵام ڕووبه‌ڕووی هه‌مان چاره‌نووسیش ده‌بنه‌وه ،وه ده‌توانین بڵێین سه‌نته‌ری جیهان بۆ هه‌ر مرۆڤێك خود ( ذات ) ی خۆیه‌تی ،چونكه جیهان هێنده ئیدراك و مه‌زنده‌ی تۆ بۆی بوونی هه‌یه ،كه بێ گوومان ئه‌و ئیدراك كردنه‌ش مه‌رجه مادی و مه‌عنه‌ویه‌كانی تێده‌كه‌وێت به شێوه‌یه‌ك ده‌توانین بڵێن جیهان هێنده‌ی دروستی بینینی تۆ و ساغی چاوه‌كانت واته به پێی بینینی تۆ بوونی هه‌یه . كه ده‌كرێت بینین و جیهانبینی تۆی مرۆڤ جیهانی جوانتر یان ناشیرین تر به‌رجه‌سته بكات ، هه‌ر ئه‌و بینینه‌ش ده‌بێت به هۆی تێروانینی و ڕاڤه كردن و بۆچونه‌كان سه‌باره‌ت به ژیان و جیهان كه سه‌نترالیزمی تۆی مرۆڤی تێدا ده‌رده‌كه‌وێت .ئه‌مه سه‌باره‌ت به هه‌سته‌وه‌ره‌كانی تریش هه‌ر وایه ، لێره‌وه‌ێه كه ئیدراكی زانایه‌ك له گه‌ڵ نه‌زانێك و مناڵێك له گه‌ڵ گه‌وره‌یه‌ك و برسیه‌ك له گه‌ڵ تێرێك و هه‌ست كردن به ته‌واوی پنته هه‌سته‌وه‌رێكانی مرۆڤ جیاده‌كرێته‌وه ، هه‌ر به پێی ئه‌و تێگه‌شتن و ئیدراك كردنه‌ش مرۆڤ یاخود خودی ده‌توانێت سه‌نترالیزمێكی كارا بێت یان پك كه‌وته

ئه‌و خوده‌ش ته‌نها له بۆشاییدا هه‌ست به سه‌نترالیزمی بوونی خۆی ناكات ، یاخود ته‌نها به تێكه‌ڵاو بوون و ئنتما بوونی بۆ ڕه‌گه‌زه‌كه‌ی تر، به‌ڵكو پێویستی به ئنتما بوون به دایك و باوك ، خزم و دوست و هاورێ و شار و كوچه و كۆڵانه‌كانی مناڵیش هه‌یه، پێویستی به‌و كۆمه‌ڵه‌ێه كه ئاشنای باوه‌ڕ و یاسا و پڕه‌نسپه مرۆڤایه‌تیه‌كانن، جگه له ژینگه و كاریگه‌ریه‌كانی كه سه‌رجه‌م ئه‌وانه به‌شێكن له كاریگه‌ریانه له سه‌ر یه‌ك خود و جیهان كه جودی ئه‌و ده‌بێت به سه‌نتالیزمی ، هه‌تا ده‌گات به‌ كاریگه‌ری گۆڕێنه‌ری نێوان مرۆڤ و ئه‌و ژینگانه ، به شێوه‌یه‌ك مامه‌ڵه‌یان له گه‌ڵ ده‌كات وكاریگه‌ریان له سه‌ر ده‌بێت و كاریگه‌ری ده‌بێت له سه‌ریان ،به‌و شێوه‌یه وه‌كو یه‌كه‌یه‌كی یه‌كگرتووی لێ دێ كه نه‌توانرێت به شێوه‌ی ڕه‌ها جیاوازی نێوان من (الانا ) من نا ( اللاانا ) بكات لێره‌وه‌یه كه من _الانا له گه‌ڵ جیهاندا یه‌ك ده‌گرێت له میانه‌ی گه‌شتن به‌و ئاشكرا كردنی نهێنیه‌كانی ئه‌و جیهانه مرۆڤ ده‌توانێت بگات به پنته‌كانی من- الانا و دۆزینه‌‌وه‌ی ناوه‌رۆك.

كه‌واته مرۆڤ پێویسته له جیهان و له خودی خۆی و له سروشت و پشتی سروشت بگات هه‌روه‌ها په‌یوه‌ندیه‌كانی ئه‌و جیهانانه به یه‌كه‌وه، بۆ دۆزینه‌وه‌ی ئه‌و په‌یوه‌ندیانه‌ش پێویسته مرۆڤ بگات به پێویستیه بنه‌مایه‌كانی متمانه به‌خشی به مانه‌وه‌ ،ئه‌وانه‌ی لێكۆڵیاری ئه‌مه‌ریكی ماسلۆ به‌ خواردن و خواردنه‌وه‌ و سێكس دایانده‌نێت , كه دیاره ئه‌میش خۆشه‌ویستی ته‌نها به سێكس چواندووه... به‌ڵام به ڕای ئێمه سێكس له ده‌ره‌وه‌ی خۆشه‌ویستی كرده‌یه‌كی به‌ربه‌رییانه ده‌به‌‌خشێت، پێم وایه ئه‌و دڵنیاییانه‌ی كه خۆشه‌ویستی ڕاست ده‌یبه‌خشێت له په‌یوه‌ندی سۆزداریدا هه‌یه له دۆخی په‌یوه‌ندی بێ خۆشه‌ویستی سۆزدا نیه. ئه‌و هه‌ست كردنه‌س ئه‌م پێداویستیانه له گه‌ڵ پێداویستیه سه‌ره‌كیه‌كان یه‌كسان ده‌كات. له‌وانه :

-          هه‌ست به ئه‌مان كردن .

-          هه‌ست به ئنتیما كردن .

-          هه‌ست به دان پێدانان له لایه‌ن كۆمه‌ڵه‌وه .

-          هه‌ست به به‌های خودی كردن .

-          هه‌ست كردن به ئنتما بۆ جیهانی یوتوبی خۆشه‌ویستی .

 

مرۆڤ هه‌رگیز ناگات به چیژی ژیان هه‌تا ئه‌و پێداویستیانه‌ی نه‌هێنێته دی له هه‌مووشیان زیاتر هه‌‌ست كردن به ئه‌مان به دڵنیایی كه ئه‌مه یه‌كێكه له فاكته‌ره ئیجابیه‌كان، پاڵ به مرۆڤه‌وه ده‌نێت بۆ به‌ره‌و پێش چوون، هه‌روه‌ها مامه‌ڵه كردن له گه‌ڵ كاره‌ساته‌كان وه‌كو كه‌سێك كه متمانه‌ی به خۆی هه‌یه و هه‌ست به دڵ نه‌وایی و بته‌وی بڕیاره‌كانی ده‌كات، چونكه شوناسی تاك له ناو كۆمه‌ڵدا له سه‌ڕ بنه‌مای متمانه خودیه‌كانی ده‌ست نیشان ده‌كرێت، له‌وێوه دان پێدانانی كۆمه‌ڵ بۆ ئه‌و كه‌سه ده‌سته به‌ر ده‌بێت، پێچه‌وانه‌ی فاكته‌ره نه‌گه‌تیڤه‌كانی وه‌كو ترس و غه‌م. ( بگه‌ڕێوه بۆ ڕه‌هه‌‌ندی چواره‌م لای ژنانی ئه‌‌فال .... كاریگه‌ری غه‌م ).

له نێوان ته‌وه‌ری یه‌كه‌م و دووه‌م، پۆزه‌تیڤ و نه‌گه‌تیڤ، یه‌كه‌میان ده‌توانێت په‌یوه‌ندی یه‌كسانی وجدانی له گه‌ڵ به‌رانبه‌ردا هه‌بێت كه دیداری نێوان دوو شوناس ده‌كات، واته ئاماده‌گی دوو به‌ره، خۆ ئه‌گه‌ر ئه‌و فاكته‌ر ئاماده نه‌بوو واته لایه‌نگری له یه‌كێكیان و ده‌سه‌لاتخوازی و ووشكی له گه‌ڵ هه‌بوونی نواندنێكی ڕوخساری لای یه‌كێكی دییان، كه ئه‌و په‌رده‌یه‌ش زوو هه‌ڵده‌درێته‌وه ،ئه‌وه‌ش هه‌رگیز پێكگه‌شتنی هه‌ردوو شوناس ناكات، ئه‌وه‌ش جگه له‌وه‌ی كۆڵه‌كه‌ی شوناسی ئه‌وی نوێنه‌ر هه‌ڵده‌كه‌نێت ،باوه‌ڕی ئه‌وی دیش له‌ق ده‌كات شوناسی خۆشه‌ویستی له‌وێدا پێ ده‌دۆڕێنێت. شوناسه جیاواز‌‌ه‌كانی دی جێگه‌ی ده‌گرنه‌وه.

 

 

جه‌نیوه‌ری ٢٠٠۵ كه‌نه‌دا

www.kaziwasalih.com