reza_shwani.jpgلە باشووری کوردستاندا، لە شاری هەڵەبجەی قەشەنگ و جواندا، لە باخ و سەیرانگای گوڵانی رەنگیندا، لە سەرەتای مانگی ئاداری ساڵی ( ١٩٨٨) دا، پەپوولەیەکی بچکۆلە و خونچە گوڵەباخێک،

لە رۆژێکدا لە دایک بوون .. بەرە بەرە گەورە بون .. پەپوولە بچکۆلەکە، لە ناو باخی گوڵاندا دەستی بە فڕین و گەڕان کرد .. چاوی بە خونچە گوڵەباخە جوانەکە کەوت .. کە خرپن ببوو، رەنگە پەمەییەکەی بۆنێکی زۆر خۆشی لێوەدەهات .. پەپوولە بچکۆلەکە لە بەردەم خونچە گوڵەباخەکەدا نیشتەوە .. هۆگری جوانی و بۆنە خۆشەکەی بوو .. خونچە گوڵەباخەکەش بە رەنگینی و نەرم و نیانی پەپوولە بچکۆلەکە سەرسام بوو .. بوون بە دوو هاوڕێی دڵسۆزی گیانی بە گیانی و، بەبێ یەکتری هەڵیان ناکرد .. رۆژ لە دوای گەورەتر و جوانتر و رەنگینتر دەبوون .. پەپوولەکە لە گەڵ گەورەبوونیدا رەنگەکانی زیاتر دەکرانەوە و نەخشینتر دەبوو .. خونچە گوڵەباخەکەش دەمی کردەوە و، بوو بە شکۆفەیەکی رەنگ گەشتر و جوانتر بۆنخۆشتر .. بۆنێکی خۆشتری بە دەوروبەرەکەی دەبەخشی .

هاوڕێتی نێوان پەپوولەکە و گوڵەباخەکە تا دەهات خۆشتر دەبوو . هەموو باڵندەکان و هەنگەکان و دار و درەختەکانی باخی گوڵان بە هاوڕێتی نێوان پەپوولەکە و گوڵەباخەکەیان زانێ . چۆلەکەیەکی شاعیریش، ئەم هۆنراوەیەی بۆ ئەو هاوڕێتییە پاکەی نێوان پەپوولەکە و گوڵەباخەکە دانا .. بولبولێکی جوان و دەنگخۆشیش، ئاوازی بۆ هۆنراوەکەی دانا و، کردی بە گۆرانی و، هەموو رۆژێک لەسەر لقی دار هەرمێیەکی بەرزدا، گۆرانییەکەی دەچڕی :

لە باخـی گـــــوڵانی رەنــگین باخـی هەڵەبجـــــەی شــیرین پەپــــــوولەیەکی نەخشـــــین باڵەکەکـانی سوور و شـــــین لەگەڵ گـــــوڵە باخێـــــــــکدا بێ وێـــــــنە لە جوانیــــــــدا بەستـیان پەیمـــــانی پیــرۆز بوون بە دوو هاوڕێی دڵسۆز دوو هاوڕێی دڵـپاک و جـوان بە خۆشـی و شــادی دەژیـان چیرۆکــیان بوو بە داســــتان بە گــــۆرانی و بە حەیــــران لە رۆژی ( ١٦/٣ / ١٩٨٨) دا، لە دەوروبەری کاتژمێری یانزەی نیوەڕۆدا، پەپوولەکە و گوڵەباخەکە، باسی نیاز و رازی خۆیان بۆ یەکتری دەگێڕایەوە .. لەم کاتەدا چەند فرۆکەیەکی رژێمی بەعسی دڕندە و رەگەزپەرستی عێراق ، بێ بەزەییانە شاری هەڵەبجەی جوانیان بە ژەهری کیمیاوی بۆردوومان کرد .. چەند پەڵە دووکەڵێکی ژەهراوی بەری ئاسمانی هەڵەبجەیان گرت ..     پەڵە دووکەڵێکیان ئاسمانی باخی گوڵانی پۆشی .. باڵندەکان لە قیژە قیژ و لە جریوەجریو و لە خوێندن کەوتن .. هەنگەکان گێژبوون و کەوتن .. بە دەیان باڵندە و بە هەزاران هەنگ کەوتنە بن دارەکانی باخی گوڵان و شەهیدبوون .. پەپوولەکەش هەناسەی لێبڕاو شەهید بوو .. گوڵەباخەکەش ملی لارەوەبوو .. هەموو پەلکە جوانەکانی وەرین و کەوتنە سەر لاشەی پەپوولەکەی هاوڕێی .. ئەمیش شەهید .. پەپوولەکە و گوڵەباخەکە، پیکەوە لە دایک بوون و، پێکەوە ژیان و، پێکەوەش شەهیدبوون .. بەڵام چیرۆکی دڵسۆزی و هاوڕێتی پاکیان، لە یاد نەکراوە .. تا ئەمڕۆش، دەیگێڕنەوە و .. دەیگێڕنەوە .

رەزا شوان  / نەرویج  ٧ /٣ / ٢٠١٥

شەهید پێشەوا قازی محەممەد

شەهید پێشەوا قازی محەممەد
شەهید پێشەوا قازی محەممەد یەکەم سەرۆک کۆماری کوردستان.