jala_malaksha.jpgکە خۆم ناسی!
وتم دایە: ئەمن کێم و چیم؟
خەڵکی کام شار،

کام وڵاتی سەر زەویم؟!

وتی: ڕۆڵە!

تۆ کوردی و دیل و هەژاری

نیشتمانت کوردستانە!

بەڵام ناوی نیشتمانت

لەسەر نەخشەی جوغرافیای جیهان نییە، بێ نیشانە!

وتم: دایە! باوکم کوانێ؟

بۆچی هەرگیز دەستی حەزی نەگووشیوم؟

بە کام تاوان من هەتیوم؟

وتی: ڕۆڵە!

ڕۆژێ کاتێ داگیرکەران شاریان سووتاند!

تفەنگی مافی کردە شان

ڕووی کردە ئاسۆی سەربەستی

لێزمەی خوێنی گەشی لەشی

بەسەر لێوی خاکا پژاند!

وتم: دایە! ئەی براکەم؟

شەپۆلی خەم، ئاوی ماتەم

گۆمی چاوی پڕ کرد لە ئەستێرەی فرمێسک

وتی: ڕۆڵە!

لە کازیوەی وەرزی ڕەشا

لاشەیان کردە نیشانە

سەری کاسی خەمەکانی بردە ژێر خاک

گیانی پاکی کردە فیدای،

سەربەستی ئەو کوردستانە!

وتم: دایە!

ئەی من چ بکەم؟

هەستا سەر پێ،

تفەنگێکی بڕنۆ کورتی بزمارڕێژی دایە دەستم

وتی: ڕۆڵە!

ئەی هەی هۆی ئاوات و مەبەستم!

دەیان ساڵە لە چوار لاوە

کوردستان دیل و یەخسیرە

دەست و پێ زنجیر کراوە

ڕێبازی خوێن بگرە و بڕۆ

دۆعای گەلی چەوساوەی کورد،

لە پشتی تۆ!

سنوورەکان بشێوێنە

کوردستانم بۆ بێنەوە

با بە دەوریا بسووڕمەوە

کوردستانم بۆ بێنەوە

با دانیشم لەتە لەتە وڵاتەکەم بدوورمەوە!

شەهید پێشەوا قازی محەممەد

شەهید پێشەوا قازی محەممەد
شەهید پێشەوا قازی محەممەد یەکەم سەرۆک کۆماری کوردستان.