hishmet_xosrewi.jpgچه‌ن رووژ وه‌ر له‌ ئیسه و هاووه‌خت وه‌گه‌رد نیشاندان به‌ڕێز "جه‌ڵال تاڵه‌بانی" له رێ کاناڵ کوردساتووه، قه‌یه‌رێک وه‌ مه‌ردم خانه‌قین له خوه‌شیا له ماڵه‌ێل خوه‌یان هاتوینه ده‌یشت وله یه‌کیک

وه‌ خه‌یاونه‌ێل شار، جه‌ژن وشادی سازکردیان، وه‌لێ وه‌داخوه خوه‌کوژێک له ناو مه‌ردمه‌که‌دا خوه‌ێ ته‌قاندوه وئه‌نجامه‌گه‌ی بی وه هۆکار گیان له ده‌ستدان فره وه ٢٥ نه‌فه‌ر وزامار بین ده‌یان نه‌فه‌ر تره‌گ.

سه‌رچه‌مه‌گه‌ێل ڕه‌سانن باس له وه ‌که‌ن که ئتماڵه‌ن ئی کرده‌وه تروریستیه وه لایه‌ن ده‌وڵه‌ت ئسلامی ئه‌راق و شام (داعش) وه، ئه‌نجام دریایوی.

له ڕاستیدا من نیه‌چمه ناو وردیله کاره‌ێل ئه‌منیه‌تی ئی رویداوه وئی کاره که‌فێته بان شان ده‌زگاگه‌ێل ئه‌منیه‌تی ئه‌راق وهه‌رێم باشوور کوردستان کهمینه‌وانی مه‌یدانی له سه‌رێ ئه‌نجام بیه‌ن ئه‌ڕا ئه‌وه جارێک تره‌گ ئی کاره‌ساته دواره نه‌وتووه.

وه‌ێره  توام باس له کۆمه‌لێک راسی سه‌واره‌ت وه شار خانه‌قین بکه‌م که بێگومان هاوپه‌یکی دێرێت گه‌رد حاڵ ورووژ مه‌ردم ئی شاره.

خانه‌قین هاوساێ سه‌رپێل وقه‌سر شیرینه له خوه‌رهه‌ڵات کوردسان و هه‌ست که‌م ‌ته‌مام ئه‌و که‌سه‌ێله که له‌ی کاره‌ساته گیانیان له ده‌ستدانه‌س، به‌شێکن له خوه‌م وهه‌ر وه‌ی خاتره هاوده‌ردی وسه‌رسڵامه‌تی خوه‌م پێشکه‌ش وه بنه‌ماڵه وکه‌سوکاره‌ێلیان که‌م وداواێ خوه‌شبینه‌وه‌‌ی زه‌خم زاماره‌کانیچ که‌م.

زه‌مانێک  که جوور پێشکه‌شوانێک له تلیزوون نه‌وروز کار وخه‌بات ڕه‌سانن ئه‌نجامدام، تا شونێگ ده‌سم بچیاتا و هاز و وچان له به‌ده‌نم بیاتا، باس گیچه‌ڵه‌ێل وخوه‌شیه‌ێل خانه‌قینیچ جوور یه‌ی قه‌سپ نه‌ته‌وه‌یی و ئه‌خلاقی هاوردیامه ناو به‌رنامه‌ی " ڕاوێژ" وبێ له وه‌رچه‌وگرتن  بنه‌وا ومنبه‌ر ناوچه‌گه‌رایی و  دووچه‌وه‌کی کردن، ئه‌وسا و ئسه‌یچه له سه‌ر سه‌ر ئی باوه‌ڕه بیمه‌س که خانه‌قین، سه‌رپێل و قه‌سر شرینه‌گه‌ی داڵکم، جوور ئاو وماسین.

هاوبه‌شی زووان داڵکی هۆکار سه‌ره‌کی بی ئه‌ڕا حالی بین له جه‌فا وخه‌مه‌ێل هاوبه‌شمان وهه‌ر وه‌ی خاتره ئێره‌نگه خوازم هه‌ر وه‌ی زووانه باس له کاره‌ساته‌گه‌ی خانه‌قین بکه‌م.

فره جار یه‌ێ پرسیار له ناو ویر و زه‌ینم خلخواردوه که ئه‌ڕا چه‌ گشت که‌س خانه‌قین وه کوردستان زانێت، وه‌لێ که‌س ئاماده نیه گوش له داخوازییه‌لیان بگرێت؟

وه‌تیام ئیمه چوی توێنیم هه‌زاران کیلومتر له دویر خانه‌قینووه، خه‌مه‌ێل ئی شاره بوینینم، وه‌لێ ئه‌وانه‌ێل گه‌زاف مه‌ردایه‌تی و کوردایه‌تی له لێ ده‌ن ،چه‌وه‌ێلیان له هه‌ناێ خانه‌قین به‌سیاس.

هه‌ر وه‌خت باس و خواست  هه‌ڵوژاندن بووت خانه‌قین بووت وه   باوان ڕه‌نگ سه‌وز  و کار و پلان ئه‌ڕا سه‌ندن ده‌نگ و ویژدان مه‌ردم خانه‌قین له ژێر ناو قه‌وڵ و به‌لێنیه‌لێک که هوویچ وه‌خت ده‌رفه‌ت ئه‌نجام دانێ نیه، ده‌س وه‌پێکه‌ێد. له حاڵێکدا ئه‌و که‌سه‌ێله ده‌‌نگ و ڕه‌نگ خانه‌قین وه‌رگرن ئه‌ڕا ئه‌وه نیه که مه‌جلس ئه‌راق بکه‌ن وه شون دێبات و گفتگوو سیاسی ئه‌ڕا هه‌ڵه‌وگه‌ردانن شار خانه‌قین ئه‌ڕا ناو نه‌خشه‌ێ ئداری هه‌رێم باشوور کوردسان. یا ئه‌ڕا ئه‌وه نیه که پلان توکمه وه مه‌به‌س پاراستن ئاسایش و ئه‌منیه‌ت  شار دابنه‌ن.

ئه‌ڕا ئه‌وه نیه که به‌ش بوویچکێگ وه شرکه‌ته‌ێل دهۆک، هه‌وڵێر وسلێمانی بارن ئه‌ڕا خانه‌قین ومه‌وج بێکاری وه خانه‌قین که‌مه‌و بکه‌ن. ته‌نانه‌ت ئه‌ڕا ئه‌وه نیه که له رێ پارته‌که‌ی "مالکی " که فره ها له ژێر کاریگه‌ری ده‌وڵه‌ت ئسلامی ئێران، فشار بخه‌نه سه‌ر کاروه‌ده‌سه‌ێل ئێران ئه‌ڕا ئه‌وه سه‌د یا به‌نداو له وه‌ر ده‌م ئاو خانه‌قین دروس نه‌که‌‌ن.

له ڕاسیدا ده‌نگ مه‌ردم خانه‌قین چدن ئه‌ڕا باندێک که ئه‌وقه‌ره هان له ویر گیرفانه‌ێل خوه‌یان، باوه‌ڕ نیه‌که‌م یه‌ێ توزه له ویر وخه‌یاڵ ئه‌و که‌سه‌ێله بوون که وه کوڵێک خوزیه وئاواتووه ده‌نگ دانه‌سه پێان.

هه‌رچی وه سه‌ر خانه‌قین هاتیه‌س له سه‌ر مه‌سه‌ڵه‌ی کوردایه‌تی بیه‌س. له‌ وه‌ر هاوکاریی کردن مه‌ردم ئی شاره ، گه‌رد پارته‌ێل سیاسی وه تایبه‌ت یه‌کیه‌تی نیشتمانی کوردسان بیه‌س.

ماوه‌ێکه کادره‌ێل یه‌کیه‌تی و وه تاێبه‌ت مه‌لا" به‌ختیار" ئه‌ندام ده‌فته‌ر سیاسی یه‌کیه‌تی که خوه‌ێ خه‌ڵک گه‌رمه‌سێره، باوش ناز و نێمه‌ت ئه‌ڕا مه‌ردم خانه‌قین واز کردیه‌س و ئه‌گه‌ر تا ده‌م و زه‌مانێک وه‌رجه ئیسه ته‌نیا له سلێمانیوه  نوڕستیا وه شاره‌که‌ێوه، وه‌لێ ئیسه له‌وه‌ر ململانیه‌ێل سیاسی و ئاڵشت بین نه‌خشه‌ێ سیاسی هه‌رێم باشوور کوردسان که‌فتنه‌سه ویر شار خانه‌قین و ته‌نانه‌ت ٢٥ نه‌فه‌ر و له گشتی ناخوه‌شتر چه‌ن دویه‌ت و کوڕ که هه‌مراێ پڕ دڵ خو‌ه‌یان له  بان خاک گه‌رمه‌سێر گه‌مه نه‌کردنه‌سه، بوون وه قوروانی ده‌س دروشمه‌ێل سه‌وز یه‌کیه‌تی.

ئیسه من توام ئی پرسیاره‌ێله وه یه‌کیه‌تی وبه تاێبه‌ت شه‌خس مه‌لا به‌ختیار بکه‌م:

١.به‌ڕێز مه‌لا به‌ختیار جه‌نابت وپارته‌که‌ت له کوره بین وه‌ختێک ئی ته‌قینه‌وه رویدا؟

٢. جه‌نابت ونونه‌ره‌ێل خانه‌قین له ساڵ ٢٠٠٣ وه‌یلاوه چه کردینه‌س ئه‌ڕا ڕزگارکردن ئداره‌ێ خانه‌قین له ده‌س ئوستان دیاڵه؟

٣.ئیوه تا ئیسه چه‌ن ده‌رسه‌د له بوجه‌ێ پارته‌که‌تان یا به‌شه که‌ێکه‌که‌تان له حوکمه‌ت، ئه‌ڕا په‌یاکردن یا ره‌خسانن کار له به‌ین جه‌وانه‌ێل خانه‌قین ته‌رخان کردینه‌س؟

٤.ئایا ئیوه له کوره بین وه‌ختێک ئاو ئه‌ڵوه‌ن وه لایه‌ن کۆمار سێداره‌ی ئێرانوه، نوا له لێ گریا؟

٥.ده‌زگاییه‌ێل ڕه‌سانن یا ڕاگه‌یاندن ئیوه له کوره بین وه‌ختێک باخه‌ێل خانه‌قین له بێ ئاوی وشک بین؟

٦.خۆ سه‌رۆک کۆمار ئه‌راق هه‌م له ئیوه بی وهه‌میچ قه‌وم جه‌نابت. ئه‌ێ ئه‌ڕا چه هوویچ ئه‌ڕا خانه‌قین نه‌کردیت؟

کاک مه‌لا به‌ختیار ده‌رد وژانه‌ێل ئه‌و که‌سه‌ێله که چه‌ن رووژ وه‌رجه ئیسه ئه‌زیز ترین که‌سه‌ێل خوه‌یان له ده‌سدان وه پویل و مۆمۆمێنت چاره سه‌ر نیه‌وت، به‌ڵکوو ته‌نیا وه ڕاستگویی ودانان پڵان وپرۆژه‌ وبوجه‌ی ده‌م درێژ ئه‌ڕا پاراستن ئاسایش خانه‌قین ودواره زنێ کردنه‌وه‌‌ێ خانه‌قین له بوار ئابووریدا،  ده‌وا بووت؟

چوینکه ئه‌گه‌ر ئی گیچه‌ڵه‌یله وه دروس کردن یه‌ێ مۆمۆمێنت دومایی به‌هاتا، ئه‌وه ئیسه ته‌ویسا گیچه‌ڵ و نه‌هامه‌تیه‌ێل پارێزگای هه‌ڵه‌بجه زووی تا ئیسه چاره‌سه‌ر بویاتا؟!

ده‌رد مه‌ردم خانه‌قین وه هه‌ڵه‌وگه‌رداننێ ئه‌ڕا سه‌ر هه‌رێم باشوور کوردسان ودیاریکردن بوجه‌ێ تاێبه‌ت له که‌ێکه گه‌پ وگه‌وره‌که ئه‌ڕا دروس کردن ژێر خان ئابووری ودواره هازدان وه دار وباخه‌ێل له ناوچی ئی شاره، ده‌رمان بوودن، ئه‌گه‌ینا وه قسه و دروشم ئه‌ڕا بردنه بان ده‌نگه‌ێل یه‌کیه‌تی له وه‌رانوه‌‌ر هێزه‌ێل تره‌گ، چاره‌سه‌ر نیه‌وت.

شەهید پێشەوا قازی محەممەد

شەهید پێشەوا قازی محەممەد