jemal_aliali.jpgئەو رۆژانە پانتای سیاسی مێزۆپۆتامیا بە گشتی و کوردستان بە تایبەتی بۆتە جێ ڕاوگەی داعش، گرووپێکی نەک بچووک کە داخوازی دامەزراندنی حکومەتی ئیسلامە لەو شۆێنە کە زۆربەی پانتایی مێزۆپۆتامیا دەگرێتەوە خۆی.

ئەم گرووپە لای وایە کە هەر بەو زووانە ڕۆژی "حەشر" دەکرێ و هەرچی حەشیمەتی سەر زەویە لەوێندەرێ کۆ دەبنەوە بۆ ئەوەی کە بە سەر پردی سیراتدا تێپەڕن هاوکات کە خواوەندگار حوکمیان دەدات. بابەتێکیتر کە لەوبوارەدا گرینگی تایبەتی هەیە، بیر و باوەڕی داعشە. بە لای داعش تەنانەت هیچ چاک و پیر و زیارەتگا بۆی نیە بمێنێتەوە چونکە ئەوە شەریک دۆزینەوە بۆ خواوەندگارە، کەواتە لە ئەگەری بە حوکم گەیشتنی داعش، لەوانەیە زیارەتگایەک بۆ دەرمان نادۆزرێتەوە هەڵبەت ئەگەر لە سەر بیر و باوەڕی خۆیان بمێننەوە. دیارە خۆێندنەوەیەکی مێژوویی لە سەر پەرەسەندنی ئایدیۆلۆژییکان لە پڕۆسەی بەرەوپێش چوونی کۆمەڵگا بێ کەلک نیە بەڵام ئەو خاڵانە هیچیان دەرمانی سەرئێشەی ئێستاکە نین و با جارێ خۆی لێ بپارێزین، گرینگ ئەوەیە کە کورد لەو ناوەدا چ بژاردەیەکی لە ئەگەری هەڵایسان وپەرەگرتنی ئاگری شەڕ دەگەڵ داعش دەبێت.

لە ئاکامی ئەو باوەڕەی داعش، حکومەتی ئێران بە مافی خۆی دەزانێت کە هاوکاری عێراق بکات لە دژی داعش، هەر نەبێ بۆ پاراستنی زیارەتگاکانی سامەرا و نەجەف و کەەربەلا... هەر ئەو مافە بە چەشنێکیتر بۆ تورکیا هەیە. کەواتە ئەو دوو داگیرکەرە بە هێزە دەتوانن لە دۆخەکە کەلک وەرگرن و بە تیرێک دوو نیشان بپێکن، هەم لە داعش بدەن و هەم لە کوردستان بدەن. سوریا و عێراق وەکوو دوو هێزی داگیرکەر، لاوازن و هەر بەو هۆیەوە زەحمەتە بتوانن لەو بوارەدا کارێکیان لە دەست بێت ئەگەر بێتو پشتیوانی ڕاستەوخۆی زڵهێزەکانیان نەبێت، دابینکردنی پشتیوانی پێویست بۆ ئەو مەبەستە، بۆ سوریا و عێراق لە کات و ساتی ئەوڕۆدا هاسان نیە.

لێرەدا نەتەوەی کورد تەنیا یەک بژاردەی بۆ دەمێنێتەوە. ئەو بژاردەیە زۆر نەخوازراوە بەڵام ئەگەر نەتەوەی کورد بە گشتی و سازەکانی سیاسی بەتایبەت، لە سەر یەکبوون بو بەرژەوەندیی نەتەوەیی هاوهەنگاو بن، ئەو کات بژاردەکە نەخوازراو نامێنێتەوە و بگرە دەبێتە بە وزەیەکی لە ناکاو و پڕتاو. تێگەیشتنی مەسەلەکە زۆر زەحمەت نیە، هەر چوار هێزی داگیرکەر دەگەڵ دوو جۆرە ناکۆکی لە ململانیدان، یەکەم ناکۆکیەکانی ناو خۆیی، دووهەم ناکۆکییەکانی ناوبەینی ئەو چوار داگیرکەرە. پێویستە هێزەکانی کوردی پێداگری لە سەر ئەو دوو جۆرە ناکۆکیانە بکەن و لە وزەی ئەو ناکۆکیانەی ناو و نێوان داگیرکەرەکان کەڵک وەرگرن لە پێناو دابینکردنی وڵاتێکی ئازاد و دێمۆکراتیک. بۆ گەیشتن بەو ئامانجە تەنیا یەک کەرەستە پێویستە ئەویش "یک گوتاری" گشت لایەن و تاکەکانە، واتە یێکێتیی نەتەوەیی، هەر بە شێوازی داگیرکەرکان کە لە سەر پاکتاوکردنی نەتەوەی کورد یەک گوتارن. لایەنێکیتری ئەو کەرەستەیە ئەوەیە کە سەنگ و بارتەقایی کوردستانیان لە ئاستی ناودەوڵەتیدا بە گۆێرەیەکی بەرچاو بەرز دەکاتەوە، تا ئەو رادەیە کە تەنانەت کۆمەڵگای ناودەوڵەتیش چ چارەیەکی جگە لە دانپێنان بە نەتەوەی کورد بۆ نامێنێتەوە، بەرهەمی ڕاستەوخۆی ئەو هەڵوێستە جگە لە هەڵوەشاندنەوەی "لۆزان"ە نووسراو و نەنووسراوەکان نیە.

دۆخی هەنووکەیی مێزوپوتامیا ئەرکێکی تایبەتی دەخاتە سەر شانی نەک هەر نەتەوەی کورد بەڵکو سەرجەمی کوردستانیان، بە تایبەت سەرۆکایتی سازەکانی سیاسی کورد. با لەوە گەڕێین چۆن حەشیمەتی سەر زەوی لە سەرەتاوە تا ئێستا (لە وانەیە سەر لە ٤٠-٥٠ ملیارد بدات) ڕادەگۆێزرێنە مێزۆپوتامیا! با لەوەش گەڕێین چۆن ئەو حەشیمەتە زەبەلاحە دەگوازرێتەوە مێزۆپوتامیا! لە بڕی ئەوە با هەر کەس لە خۆی پرسیار بکات: "من وەکوو تاکی ئازاد ئێستا چم پێ دەکرێ؟"

جەماڵی عەڵیاڵی ٢٤/٠٦/١٤

شەهید پێشەوا قازی محەممەد

شەهید پێشەوا قازی محەممەد