ebraim_jehangiri.jpg"کارم بە کاری کوردستانی ئێران نەداوە"    

 کاک خالید مەحەمەدزادە دۆست و هاوڕێیم لە تازەترین بابەتیدا لە ڕۆژنامەی "کوردستان وکورد" دا دەنووسێ : "تایتلی‌ ئه‌م نوسینه‌م له‌ وڵامدانه‌وه‌یه‌كی‌ هه‌ژار موكریانی‌ وه‌رگرتووه‌ له‌«چێشتی‌ مجێوه‌ر».

ره‌نگه‌ هه‌ژار تا ئێستا راشكاوانه‌ترین كه‌س بێ‌ كه‌ گوتویه‌«كارم به‌ كاری‌ كوردستانی‌ ئیران نه‌داوه‌«! ئه‌گه‌ر 50 ساڵ پێش ئێستا هه‌ژار به‌‌وه تۆمه‌تبار ده‌كرا كه‌ بووه‌ به‌ به‌شێك له‌ شۆرشی‌ باشوور و تێكه‌ڵ به‌ ململانێی‌ حیزبه‌كان بووه‌، ئه‌مرۆ زیاد له‌ حیزبێك‌و زیاد له‌ كه‌سێك، له‌ ئاراسته‌یه‌دا هه‌ژاریان تێپه‌راندووه‌و به‌ ته‌واوی‌ بۆیان گرنگ نیه‌ له‌ رۆژهه‌ڵاتی‌ كوردستان چ ده‌گوزه‌ری‌. ئه‌مڕۆ ئه‌م قسه‌یه‌ هه‌ژار به‌مجوره‌ ته‌رجومه‌ ده‌كرێته‌وه‌:» من كوردستانیم»‌و « من ئێرانی‌ نیم»!

کاک خالید بێ ئەوەی لە هیچ کوێ ئەو بابەتەیدا ئاوڕێکی سەرپێی لە هۆکاری ئەو ڕوانگەیەی مامۆستا هەژار موکریانی بداتەوە لانی کەم ئاماژە بەیک هۆکاری ئەو بیرۆکەی مامۆستا هەژار بکات، راست چۆتە سەر بابەتی خۆی و ئەو قسەیەی بە وتەیەکی سەرپێی و ساکار وەرگرتووە و وای داناوە کە مامۆستا هەژار لە گۆترە و هەر وا بە کەیفە ئەو هەڵوێستەی گرتووە،  باوەڕی بە کوردستانی ئێرانی ئەو کات و رۆژهەڵاتی کوردستانی ئێستا نەبووە. جارێ هەر ئەمە خۆی غەدرێکی گەورەیە لە مامۆستا هەژار کە وا لە خەڵک بگەیەنی کە هەژار باوەڕی بە کوردستانی ئێران نەبووە!

 بەڵام بۆ و بە چ هۆیەک دەبێ هەژزار وای کوتبێ، ئەوەندەی منیش لەبیرم بێ ئەو قسەیەی مامۆستا هەژار لەوەڕا هات کە هاوڕێیانی حیزب داوای لێدەکەن بگەڕێتەوە ناو حیزب و کار و تێکۆشانی خۆی لەو حیزبە دا درێژە پێبدا. ئەویش کە دەبینێ حیزب لە ئێستا خەراپتر بە سەر سێ حیزب دا دابەش بووە ، دەڵێ نا من کارم بە سەر کوردستانی ئێران نەداوە. کە مێژووی حیزب دەخوێنییەوە و ئەوکات دەگەڵ ئێستا بەراورد دەکەی وێکچوونێکی سەیر لە ئارادایە، ئەگەر ئەو کات حیزبی دێمۆکڕای بە سەر سێ حیزب دا دابەش ببوو، بەشێک لایەنگری توودە بوون، بەشێک مەلایی بوون  وبەشێک جەلالی بوون ، ئەوا ئێستا حیزب بە سەر دوولایەن دابەش بووە، هەردووک دێمۆکڕات ئێستا و پێش ئێشتاش واتە ئەو کاتەی هەر یەک دێمۆکڕات بوون دوودەستەن، هەندنێکیان لایەنگیری پارتی و هەندێکیان لایەنگیری یەکیەتی. بەتایبەتی کاتێ حیزب بە هۆی هەلوومەرجی داسەپاو دیسان وەک ساڵانی بەرێ و ئەو ساڵانەی مامۆستا هەژار کوتویە " من کارم بە کوردستانی ئێران نەداوە" لە باشووری کوردستان سڕ بووە و لە چوارچێوەیەکی تەسکی تەشکیلاتی دا و هەر لە باشوور بە شێوەی ئاشکرا و ئاکتیو تێکۆشانی هەیە پێشگیری لەو دابەشبوونە ئاستەمە.

کاک خالید پاشان ئاماژە بە یەک شتی دیکەی جێگای سەرنج دەکات کە گۆیا کوردەکانی رۆژهەڵات کەمتر ئاوڕ لە رۆژهەڵات دەدەنەوە، ئەو ئاماژەیەکی دروست دەکا کە کوردەکان ئەوەندەی باشوور و رۆژئاوایان بۆ گرینگە ئاوڕ لە ڕۆژهەڵات نادەنەوە، ئەوە تاڕادەیەک ڕاستە بەڵام دیسان بەلای هۆکارە سەرەکیەکە دا نەچووە و ئەو بابەتە گرێدەداتەوە بە حەز و ئارەزووی شەخسی و دروشمی کوردایەتی و سەربەخۆ خوازی بەشێک لە خەڵک و رووناکبیران کە دەڵین ئێمە ئێرانی نین و ئەوە ئێرانی نەبوونەیان کردۆتە بەهانەیەک بۆ ئەوەی خۆ لە پرسەسەرەکیەکە واتە رۆژهەڵات و گرینگیبدان بەکاروباری رۆژهەڵات بدزنەوە.

 من لێرە دیسان عەداڵەتێک لەو نووسینەدا نابینم، باسێک لە هۆکاری ئەو روانگەیە نەکراوە، کاک خالید دەنووسێ:

"له‌ رۆژهه‌ڵات، هه‌ڵاتن له‌ ئێرانی بوون، گه‌ڕانه‌وه‌ بۆ كوردبوون له‌ رۆژهه‌ڵات نابێ‌، وه‌ك چون»كورستانی‌ بوونی»یش رۆژهه‌ڵات تیادا نابێ‌ به‌ بناغه‌ی‌ كار‌و تێفكرین.  به‌ڵكو به‌ گشتی‌ ماڵاوایی‌ ده‌بێ‌ له‌م به‌شه‌ی‌ كوردستان به‌ جۆرێك كه‌ ته‌فسیر‌و ته‌عبیری‌ كوردستانی‌ بوون ئاوێته‌ ده‌بێ‌ به‌روانینی‌ بزووتنه‌وه‌ سیاسییه‌كان له‌ به‌شه‌كانی‌ دیكه‌ی‌ كوردستان به‌رامبه‌ر به‌ رۆژهه‌ڵات تا ئاستی‌ حیزب دروستكردن‌و خاڵیكردنه‌وه‌ی‌ وزه‌ی‌ سیاسی‌ رۆژهه‌ڵات، به‌  هه‌مان شێوه‌ش ژێستی‌ ئێرانی‌ نه‌بوون به‌ پله‌ی‌ یه‌كه‌م پشتكردن له‌ رۆژهه‌ڵاتی‌ كوردستان ده‌بێ‌، تا دژایه‌تیه‌كی‌ گه‌وره‌ بێ‌ له‌ گه‌ڵ  جه‌وهه‌ری‌ ئێرانی‌ بوون له‌ سه‌ر بنه‌مای‌ فۆرماتكردنه‌وه‌ی‌ كوردبوون. ره‌نگه‌ ئه‌مه‌ش بۆ ئه‌وه‌ بگه‌ڕێته‌وه‌ كه‌ له‌ ئێستا ميزاجى‌ شه‌خسی‌‌و به‌رژه‌وه‌ندی مه‌حفه‌لی‌ جێگه‌ی‌ خۆی‌ داوه‌ به‌ به‌رژه‌وه‌ندییه‌ گشتی‌‌و هاوبه‌شه‌كان به‌ جۆرێك كه‌ له‌ ئێستا دا هیچ شتێك نیه‌ كورده‌كانی‌ رۆژهه‌ڵات له‌ سه‌ر مێحوه‌ریه‌تی‌ رۆژهه‌ڵاتی‌ بوون كۆبكاته‌وه‌."

ئەمن نازانم بەڕێزیان باسی کامە رۆژهەڵات دەکات، ئەگەر باسی ئەو پارچەی رۆژهەڵاتی کوردستان دەکا و وەک بەشێکی جوغرافیای کوردستان لەسەری دەدوێ ئەوە هەموومان وەک یەک بۆی خەمبارین، خەمبارین لەبەر ئەوەی بە کردەوە هیچی بۆناکەین، بزووتنەوەیەک لەوێ لە ئارادانییە، بە پێچەوانەی بەشەکانی دیکەی کوردستان. بەڵام جارێ کوردی رۆژهەڵات بمان هەوێ و نەمانهەوێ تا ئێستاش ئەگەر تەشکیلاتیش نەبێ بەهەست و سۆزەوە دەگەڵ دێمۆکڕاتەکان و کۆمەڵەکانە، ئەوان مێژوویەکی پڕ لە خوێن وقوربانیدانیان لە پاشەخۆیان بەجێ هێشتوووە خۆ ناکرێ هەر وا هاسان لەبیر بکرێن. بەڵام  راستیەکەی ئەوەیە کە ئەگەر باسی شۆڕش و بەرخۆدان و مقاومەتی خەڵک و هێزەسیاسیەکان بێ ئەوا رۆژهەڵاتی کوردستان جووڵەی لێبڕاوە و بە پێچەوانە لە ٣ پارچەکەی دیکە بە تایبەتی لە رۆژئاوا و لە باشوور خەباتی خوێناوی و شەڕی ئاستەم لەگەڵ داگیرکەر و دوژمنانی ئازادی لە ئارادایە. کاک خالید نەدەبوو گلەیی لە کەس بکات چوونکە هەر حیزبەکان بوون لە سەرەتای هێرشی داعش بۆ سەر باشوور بە بەیاننامەی ڕەسمی داوایان کرد کە رێگایان پێبدرێ تا بە پێی ئیمکان لە سەنگەری دیفاع لە کوردستان دا ئەرکی خۆیان بەجێ بگەیەنن و ئەوە کارێکی گەورەو هەستێکی نیشتمانی پیرۆز بوو کە بێگومان مێژوو ئەو هەڵوێستەی کوردی رۆژهەڵات و حیزبەکانیان لەبیر ناکات. جا کە وایە بۆ دەبێ گلەیی لە خەڵک بکەین کە زیاتر باسی باشوور و رۆژئاوا دەکەن؟ زیاتر بەلای ئەواندا شکاونەوە تا ڕۆژهەڵات؟ جا ئەگەر بگەڕێنەوە سەر بارودۆخی هەژار کە ئەو کات لە ئیعلام و بەشی ڕاگەیاندنی پارتیدا خەریکی کار بووە ئەو پرسیارە دەبێ لە کاک خالید بکەم کە ئایا ئێستا چەند کەس لە ئەندامانی دێمۆکڕات و کۆمەڵە وازیان لە حیزبەکان هێناوە و لە ڕاگەیاندنەکانی باشووری سەر بە پارتی و یەکیەتی خەریکی کار کردنن و بە کردەوە وازایان لە ڕۆژهەڵات و کوردستای ئێران ‌هێناوە( ئەگەرچی من لەوە دڵنیام هەموویان دڵیان لە رۆژهەڵاتە). هەر بۆخۆی کاک خالید تا ماوەیەک لەمەوبەر لە کوردستانی نوێ یەکیەتی نیشتمانی کوردستان دا  ئیشی دەکرد و لە رۆژنامە ئەهلیەکانی دیکەش جار جارە سەرەتەقەیەکی کردووە.

 لە مێژە دروشمی رۆژهەڵات میحوەری لە لایەن هاورێیانی حدک هاتۆتە ناو تەوەرە سیاسیەکانی رۆژ بەڵام ئەگەر لە من دەپرسی ئەو بابەتە تا ئێستاش هەر لە چوارچێوەی دورشمدا ماوەتەوەو لەوە زیاتر تێپەڕی نەکردووە. هۆکارەلەشی زۆر سادەیە، هێزێکی ئاکتیو لە رۆژهەڵات نییە تا خەڵک و رووناکبیران لە دەروی ئەو دروشمە بەجێیە کۆ کاتەوە. تا ئێستا کێشەی دێمۆکڕاتەکان وەک گەورەترین هێزی رۆژهەڵاتی کوردستان نەک چارەسەر نەبووە بەڵکوو هەر وەک سەرەتای لەت بوون وایە بەوتەفاوەتەی کە ئێستا سەردانی یەک دەکەن و ئیتر شەڕە دندووکەی سەر ماڵپەڕەکان وەک ڕابردوو نەماوە، ئەو وەزعیەتە لە ناو کۆمەڵەش دا هەر وەک خۆیەتی و لەوێ بگرە خەراپتریش بووە، جا کاتێ حیزبەکان وەک هێزی تەشکیلاتی و ئورگانێکی ئاکتیوی گۆڕەپانی سیاسەت خۆیان چاویان بەسەر ڕاستیەکانی رۆژهەڵات و پێداویستیەکانی خەڵک نووقاندووە و بە جیدی ئاوڕ لە ڕۆژهەڵاتی تەنیا و بێئەنوا نادەنەوە گلەیی چی لە تاک و چەند کەسێکی دیاری ناو توێژی رۆژنامە نووس و رۆشنبیری کورد دەکەی؟

ئاوڕ دانەوە لە ڕۆژهەڵات بە نووسین لە سەر لاپەڕی فەیسبووک و لەسە لاپەڕی رۆژنامەحیزبیەکان و باسی سەر تی ڤییەکانیان ناکرێ. ئاوڕدانەوە لەرۆژهەلات بە بەرنامە و کاری هاوبەشی هێزە خاوەن دەسەڵاتدارەکان دەکرێ، جا کە ئەوان خەمی خەڵکیان لەبەر نەبێ دایبنێ با چەند کەسێکیش وەدوای ئارەزووە شەخسیەکانیان کەون و بەروانگە تاکەکەسیەکانی خۆیانەوە سیاسەت بکەن! گەڕانەوەی ئەو چەند کەسەش بۆ سەر بابەتی ڕۆژهەڵاتمیحوەری کوا کاریگەری دەبێ؟  لە رۆژهەڵاتی کوردستان مادەی هۆشبەری شیشە بڕستی لە لاوان بڕیوە، رۆژ نییە لە کووچە و شەقامی شارەکان گەنج و لاوی کورد بە بێگیانی نەدۆزرێنەوە، رێژیم بە بەرنامە کاری خۆی دەکات و بۆ دابەشکردنی کۆمەڵگای کوردەواری و پەرت و پەرەوازەکردنی زیاتری هەوڵی خۆی چڕتر کردۆتەوە،  موعتادکردن یەکێک لە مەترسیدارترین پیلانەکانی رێژیمە ، ساز کردن و ئیمکانی دروست بوون و گەشەکردنی هێزە مەسەبیەکان،(سەلەفی و داعشی) لە بەرنامەی چڕ و پڕی دەوڵەت دایە، بەرنامەیەک کە بەر ساڵی ١٣٧٥ بە شێوەیەکی ئاشکرا کاری بۆدەکا. تەنیا بۆ ئەوەی ناسیونالیسم و هەستی نەتەوەیی لە ناو کورد دا کز بێ و حیزبیش بە هەموو جۆرەکانیەوە پاڵی لێداوەتەوە و تا ئێستا لە جەغزی سیاسەتەکان و ڕوانگەکانی ٣٠ ساڵ لەمەوبەر دا خول دەخوا و بۆ یەک جاریش ئاوڕی جیدییان لەو بابەتانە نەداوەتەوە.

ئەگەر ئێمە راستیەکان وەک خۆیان نەبینین، ئەگەر هۆکاری هەڵەکان، هۆکاری سستی و خەمساردیەکان، وەک خۆیان نەبینین و تەنیا بە هەوەسی شەخسی و بە میزاجی شەخسی و لە چوارچێوەیەکی دیاریکراوی سیاسیی _ تەشکیلاتی دا بدوێین و لێکی دەینەوە هەڵەی قەرەبوو نەکراو دەکەین و ئەوەی لە مێشکی خۆماندا وەک ئارەزوو بە بەرنامەمان داناوە تاقە یەک بست بەرەو پێش ناچێ. ئاوڕدانەوە لە رۆژهەڵات هەنگاوی بە کردەوەی دەوێ، بەر لەهەموو شتێک یان یەکگرتنەوەی هێزەسیاسە لێک هەڵبڕاوەکان، یان کۆبونەوەیان لە بەرەیەکی دێمۆکڕاتیکدا پێویستی ئان و ساتە، ئەوە وزە و رووحی شۆڕشگێری لە باری ڕەوانییەوە دەگەڕێنێتەوە ناو دەمارە خەواڵووەکانی ڕۆژهەڵات. ئەوجار بەرنامەی کار و کردار دەتوانێ کاریگەری راستەوخۆی هەبێ و ئەو دەمە دەبێتە کێبەرکێی نووسینو  دوان و ئاوڕدانەوە لە ڕۆژهەڵات. من تەنیا یەک نموونە دێنمەوە، لە چەند مانگی ڕابردوودا، بە چوونەوەی چەند تیمی حدک بۆ ناوخۆی وڵات و چەند کردەیەکی چەکداری خۆت دەزانی شۆڕشێکی بەرین لە هەست و ئیرادەی سەربزێوی و بەرەنگاربوونەوە لە ناو تێکڕای خەڵکی ناوخۆ و دەرەوەدا دروست بوو، رۆژهەڵات بووژابۆوە! بەڵی خەڵک چاوەڕێی کردارە نەک نووسین و دروشم، نوسین و دروشمێک کە کرداری دەگەڵ نەبێ هەر ئاوای پێشوازی لێدەکرێ کە تا ئێستا لێێ کراوە.

لە باسی کوردایەتی و سەربەخۆییدا کاک خالید باسی باشوور دەکات و دەڵێ لەوێ کورد دەگەڵ عێراق سیاسەت و شەڕاکەت دەکات کەچی کوردی لای ئێمە بە میزاجی شەخسی هەوڵی وەدی هاتنی خەیاڵپڵاوی سەربەخۆیی دەدات، لە حاڵێکدا ئەو باسە هێندە کۆن نییەو کاک خالید باش دەزانێ ئەوەی هەستی سەربەخۆیی لەبار برد لە ماوەی چەند مانگی ڕابردوو ئەوە یەکیەتی نیشتمانی بوو، یەکیەتی بوو چون پۆستی سەرۆک کۆماری پێبڕاوە دەستی لە سەر بەخۆیی بەردا بە خاتری ئیمتیازی سەرۆک کۆماری، بەڵام ئەو بابەتە لە باشوور نەبڕاوەتەوە و ئەو ویستە هەر لە جیگای خۆیەتی، داوای سەربەخۆبوون داوایەکی قورسە، گرانە، هەڕەشەکانی ئێرانت لە باشوور و لە حکوومەتی هەرێمی کوردستان لەبیر نەماوە؟ ئایا پێت وانیە ئەوەی داعشی بە پارەیەکی زۆر بە گژ کورد دا کرد تا بیری سەربەخۆیی بە مێشکیان دا نەیە ئەوە ئێران و مالیکی بوون؟ لەبیرت نییە هەندێ لایەن چ سمکۆڵێکێان دەکرد بۆشەڕ دەگەڵ داعش و حکوومەتی هەریمیش هەر خۆی لەشەڕ دەدزیەوە و دەیگوت ئەو شەڕە پێوەندی بە کوردەوە نییە و ئەوە شەڕی تایفییە کورد ناچێتە ناو ئەو شەڕەوە؟ ئاگات لێیە ئێران ئەو کات کە رۆژهەتا ئێوارێ بەگژ حکوومەتی هەرێم دادەهات کە بۆ شەڕی داعش ناکات؟ ئێستا کە شەڕەکە لە کوردستان گەرمە لە هەواڵەکانیشیدا باسی ناکات؟ ئەوان بە هاوکاری هەندێ کورد تا ئێرە پیلانەکەیان سەری گرتووە و بە خەیاڵی ئارام پاڵیان لێداوەتەوە بەڵام دڵنیا بە ئەگەرچی کورد تووشی ماڵوێرانی بوو ، خوێن و قوربانیەکی زۆریدا ، بەڵام هەستی سەربەخۆیی لە جاران زیندووترە.

قسەی کۆتاییم سەبارەت بە ئێرانی بوون و کوردبوونە،من لەسەر ئەو باوەڕەم کە کێشەی کورد لە هیچ پارچەیەک  دەگەڵ ناوەند چارەسەر نابێ، ئەوان ئەگەر کزبوون دایدەشکێنن و ئەگەر بەهێز بوون بە هیچت نازانن، ئەوە مێژوو سەیری کەن!  لە ئێرانب بە تایبەتی هەرگیز نە حکوومەت و نە ئوپۆزپسیسیۆن بە سیکۆلار و مەسەبییەوە بۆ تاقە یەکجاریش دانیان بە کورد و بە مافی کورد نەناوە جگە لە یەک نموونەدەگمەن لە هەلوومەرجی تایبەتدا و بەزیرەکی قاسملووی نەمر. ئەوەی راست بێ من نە دەگەڵ خەڵکی ئاسایی و عەوامی فارس و نەدەگەڵ ئەوی هەرەسیاسیان باوڕم بە گفتگۆ و دەمەتەقەی سیاسییش نییە چ دەگا بەوەی کە داوی مافیان لێبکەم! لەیەکەمیان دا بەهیچ جۆرێ هیچت بۆ ناسەلمێنرێ و ئەوان هەر ئەوە دووپات دەکەنەوە کە سیاسەتی گشتی رێژیمە.  ئەوان کورد وەک ئێرانێکی بێ مافی ئێرانی بوون سەیر دەکەن، لە تەواوی ژیانی سیاسیی کورد تا بە ئەمڕۆ هیچ لایەنێکیان ئامادە نین دان بە بچووکترین مافی کورددا بنێین، لە بەشی دووهەمیشیان دا من هەر دیسان باوەڕم بە شەڕاکەت دەگەڵیان نییە، تەنانەت باوەڕم بە گفتگۆ کردن دەگەڵیان لەسەر مافی کوردیش نەماوە، بەوهۆیە کە لە هەموو مێژووی کورد دا بۆ یەک جاریش ئێران و حکوومەتی ناوەند دەگەڵ کورد رووراست نەبووە و تاقە یەک نموونەی سەرکەوتوویی ئەو گوتوبێژانە لە هەموو مێژووی کورد دا بە زەڕەبینیش بۆی بگەڕێی نایدۆزییەوە، هەمووی هەر دەهۆ و هەر کڵاو لەسەر نان و هەر کوشتن و ترۆری رێبەر و سەرکردەکانە. هەمزە ئاغای مەنگووڕ،سمکۆی شکاک، قاسملوو رێبەر نموونەی دیاری ئەو گوتوبێژانەن. ئەگەرچی رەد کردنەوەی گفتگۆ و دیالۆگ بە شێوەی موتڵەق هەرگیز بەڕاست نازانم بەڵام بێباوەڕیم بەرامبەر بە ئێران لەو هەڵوێستەی نزیک کردومەوە.

باوەڕی من ئەوەیە کە بێ ئەوەی دۆژمنایەتی هیچ نەتەوە و گەلێک بکەین دەبێ خوازیاری ئەوە بین کە داگیرکەر لە خاک و نیشتمانی کوردان بچێتەدەر. هیچی دیکە، نە دروشمی رووخان و نە دروشمی ئیتیحاد و برایەتی دەگەڵ حکوومەتە مەرکەزیەکان لە ئێران ولە عێراق و لە سوریا و لە ئێستادا لەجێگای خۆیاندانین. لە ئێران کێ لەتاران حکوومەت دەکات، شایە یان خومەینی پێوەندی بە منەوە نییە ، من دەمهەوێ نیشتمانم ئازاد بێ، خۆم بە شڕی و بە فەقیری و بە ساوابوون لە دەوڵەتداری خۆم ڕازیم، بەڵام بە ژێردەستەیی بە هیچ جۆرێ ڕازی نیم، چۆنم ئەو خواستە بۆدەچێتەسەر، چۆن ئەو باوەڕە دەبێتە باوەڕێکی نەتەوەیی ئەوە پێوەندی بە فارس و عەڕەب و بە تورکەوە نییە.  ئەگەر کورد و حیزبی کوردی دەست لەکۆڵ بەرژەوندی حیزبی بکاتەوە و بۆ ئەو ئیدەیە هەوڵ بدا دڵنیا بن کورد هەر ئێستا دەوڵەتە. ئەگەر ئێمە هەر چواردەورمان گیراوە، ئەگەر هەر چوارددورمان دوژمنە، بەڵام بائەو راستیەش بزانین کە ئەو دوژمنە ئەوی ساڵانی پێشوو نییە، داگیرکەر خۆی وەزعی لەهەموو بارێکەوە لە کورد شڕترە. بەتایبەتی ئێران لە ئەگەری هەر ئاڵووگۆڕێکدا ئاداری لەسەر پاداری نامێنێ ، کەواتە کورد لە ئێران بەتەمای چییە؟ پاراستنی یەکپارچەیی خاکی ئێران؟! حیزبەکانی رۆژهەڵات دەبوو بێ سێ و دوو دروشمی سەربەخۆیی وەک بلووچەکان، وەک عەڕەبەکان، وەک تورکەکان بکەن بە دروشمی ستراتیژی و تاکتێکی هەر ئێستایان با لە دواڕۆژدا قەرزداری مێژو نەبن! جگە لەمە هەرگیز چاوەڕێی ئەمە مەبە کە سەربەخۆیی لە لایەن داگیرکەرەوە بخرێتە سەر کەشەفێکی زێڕین و پێشکەس بە هیچ نەتەوەیەکی ژێردەستە بکرێ.

کورد و خەڵکی کوردستان بە پێێ ئاڵووگۆڕەکانی جیهان لانی کەم لە باری ڕوانین و هزرەوە  ئاڵوگۆڕیان بە خۆیانەوە بینییەوە بائەو گۆڕانە و ئەو هەستە نەتەوەییەی بە گشتی لە ناو هەست و نەستی کۆمەڵگای کوردەواریدا هەیە و ڕۆژ بەڕۆژ ڕوو لەزیادبوونە بە هێند وەربگیرێ.

 لینکی بابەتی هاوڕێم کاک خالید محەمەدزادە

http://www.Al25instanukurd.com/ku/wtar.php?id=1261

شەهید پێشەوا قازی محەممەد

شەهید پێشەوا قازی محەممەد
شەهید پێشەوا قازی محەممەد یەکەم سەرۆک کۆماری کوردستان.