mohammad_suleimani.jpgئۆردۆغان و حکوومەتەکەی بۆ پەراوێزخستنی پرسی سیاسی و نەتەوەی گەلی کورد ئامادەیە لە گەڵ نەیارترین دوژمن و ڕەکەبەریخۆیان لە ناوچەکەدا دەست تێکەڵ بکەنەوە و پاش کڕنۆش بردنی لە بەردەم " کریملین" دا لە

دەمێشقێش دەستی" ئەسەد"یان ماچکرد و بۆ نەزاو پاڕانەوەیان، روویان لە کاربەدەستانی تیرۆریستی ڕێژیمی ئاخوندی ئێران کردوە، هەتا بەدژی کوردی ڕۆژئاوا پشتگیرییان لێبکرێ و حکوومەتی سوریان بەگژدابکات. هەرلەو پەیوەندیەشدا " عەبادی" ش پاش هێرشەسەربازییەکەی حکوومەتی سوریە بۆ سەر حەسەکە لە رۆژئاوای کوردستاندا، ڕایگەیاندوە کە دەبێت هێزەکانی پێشمەرگە بگەڕێنەوە شوێنەکانی پێش هێرشی داعش بۆ سەر هەرێمی کوردستان و ئێراق. رووداوەکانی ئەو چەند رۆژەی ڕابردوو ئاماژەن بە سیاسەتە چوار قۆڵیەکانی ئەو چوار وڵاتەی کە کێشەی کوردیان تێداهەیە و بە چارەسەرنەکراوی ماوەتەوە. پێش روخاندنی ڕێژیمی سەدام لە ئێراق ، کۆبوونەوەی چوار قۆڵی هەر جارە و لە وڵاتێکدا بەڕێوە دەچوو و، ئامانجیش لەو دیدار و کۆبوونەوانە، دژایەتی گەلی کوردبووە. دیارە ئەو پیلانە ترسەناکە بەهێواشی خەریکە لە نێوان ئەو وڵاتانەدا گەشە دەستێنێ و" هەتا دوێنی حکوومەتی تورکیە هەوڵی لادانی ئەسەدیان لە پۆستەکەیدەدا، بەڵام ئێستا بە مەبەستی دیاریکراویان لایەنگری مانەوەی دەکەن" . بەداخەوە کورد و سەرکردایەتی سیاسی هەر چوار بەشی کوردستان لە جیاتی هاوکاری و یارمەتیدانی یەکدی، هەریەك و بەجۆرێك خۆی بە نەیاری ئەوی تریان دەزانێ و زۆر ساویلکە و هەرزەکارانە، یەکیان پاڕێزگاری لە سیاسەتی تاران و ئەوەیتریان لە ئانکارا و بەغدا دەکات. بەڵام با بۆ جارێکی دیکەش ئەوەی بخەمەوە بەرچاوی تێکۆشەرانی ڕێگایڕزگاری گەلی کورد کە " دوژمنی خاك و خوێن و نەتەوەی، هەرگیز نابێتە دۆست و هاوپەیمانی خەڵکی کوردستان" کەوابوو دەوڵەتانی داگیرکەری کوردستان هەریەکەو بەجۆرێك وێرای پشت گوێ خستنی بەرژەوەندیە سیاسی و ئابووری و بازرگانیەکانیان، لە گەڵ یەکدیدا ئامادەی سازشن بۆ دژایەتی و لە نێوبردنی پرۆسەی سیاسی کورد. دیارە چاوەڕوانناکرێت ئەو جار سیاسەت و پیلانە سێبەر و چوارقۆڵیەکان بەدژی جووڵانەوەی ڕزگاریخوازی کورد ئەوەندە کاریگەری لەسەر سیاسەتی نێونەتەوەی و زلهێزەکانی دونیا هەبێت. تورکیە ئێستا لە قۆناخی پەراوێزخستندایە و لە رووی سیاسی و سەربازییەوە قورسای خۆی لە دەستداوە و ئێرانیش جێگای باوەڕ و متمانەی سیاسی و دیپڵۆماسی نیە و سوریە و ئێراقیش گەیونەتە لێواری دابەشبوون و پارچەبوونی سیاسی و نەتەوەی و جوگرافی . کورد لە ئێستادا وەك هێزێکی دێمۆکڕات و دژی تیرۆر و داعش لە ئاستی گێتیدا ناوبانگی دەرکردوە و بارودۆخی سیاسی و ئەمنی کوردستان، زلهێزەکان دەیپارێزن و بۆجارێکی دیکە دەمێشق و بەغدا ناتوانن حوکمی هەوڵێر و قامیشلۆ بکەنەوە، هەر ئەوەش حکوومەتی تورکیەی ئەوەندە سەخڵەتکردوە کە هەوڵبدات سەر بە هەموو کونێكدا بکات هەتا لایەك بەگژکوردی ڕۆژئاوادا بکا و، بۆ ئەو مەبەستەش هەر ئەسەد شك دەبات. دیارە ئەو سیاسەتەی تورکیە کاتێک دەستیپێکردوە کە دڵنیابوون لە لاوازی داعش لە بەرانبەر پێشڕەویەکانی کوردی ڕۆژئاوادا. لەو ماوەیەدا وێكکەوتنێكی میدیای لە نێوان هێزەکوردیەکانی بەشەکانی کوردستاندا روویدا و هەرلایەك هەوڵیدەدا پشتیوانی لە سیاسەتی حکوومەتەداگیرکەرەکانی کوردستان بە پاساوی بێبنەما بکا و بەوجۆرە زیان بە مێژوو و خەباتی هاوبەشی نەتەوەی کورد بگەیەنرێت. ئەو وڵاتانەی کوردستانیان بەسەرخۆیاندا دابەشکردوە، هیچیان لەوەیدیکەیان بۆکورد باشتری نەکردەوە و وەك یەك و بە گوێرەی ژینگەی سیاسی و کۆمەڵایەتی، سیاسەتی لە نێوبردن و قەڵاچوکردنیان بەڕێوەبردوە و هەموو ڕێگاکانی جینۆساید و قڕکدنیان ئەنجامداوە. سەیربکەن، کاربەدەستانی تورکیە بەئاشکرای دیفاع لە ئەسەد و حکوومەتەکەی دەکەن، بۆچی؟ بە دڵنیایەوە تەنیا لە بەر دژایەتی و پەراوێزخستنی مەسەلەی کورد لە ڕۆژئاوای کوردستاندایە، ئەگینا ئانکارا و دەمێشق خاڵی دژبەیەك و دوژمنایەتیان یەكجار زۆرن، بەڵام بۆ دژایەتی کورد، هەموویان بەلاوەناون و هەوڵدەدەن پیلانی هاوبەش دژی پێشڕەویەکانی گەلی کورد لە ڕۆژئاوا دەدەڕێژن. پێویستە هێزە سیاسی و وڵات پارێزەکانی کوردستان چاو بەئاستی پەیوەندیەکانیاندا بگێڕن و سیاسەت و هەڵوێستەکانیان زیاتر یەکبخەن و بەهاوبەشی دژی پیلانگێڕیەکانی وڵاتانی دەروبەر تێبکۆشن و ناکۆکیە نێوخۆیەکان بەلاوەبنرێن لە پێناوی ئامانجی گەورەی سیاسی و نیشتیمانیدا. دەبینین بۆدژایەتیکردنی پرسی سیاسی کورد ئانکارا و دەمێشق و تاران و بەغدا لە ژێرەوە خەریکی بنکۆڵکردنی بارودۆخی ئەمنی و سیاسی ناوچەکەن لە برژەوەندیخۆیاندا و ئەگەر بۆیان بکرێ، هێزە کوردیەکانیش بەگژیەکدا دەکەنەوە. گەلی کورد بەگشتی یەکڕیزی و کۆدەنگی دەوێت و کەس پشتگیری سیاسەتی ناکۆکی و هەڵاواردنی نێوماڵی کوردی ناوێ و پەسەندناکات.
محمد سلێمانی
22.08.2016

شەهید پێشەوا قازی محەممەد

شەهید پێشەوا قازی محەممەد
شەهید پێشەوا قازی محەممەد یەکەم سەرۆک کۆماری کوردستان.