لە پەراوێزی پەیامی لێخۆشبوونی سكرتێری حدكا بۆ چهکدارهکان و هاودەستانی كوردی رێژیم دا)
مەسەلەی چۆنیەتیی خۆئامادە كردن بۆ رووبەرووبوونەوە لەگەڵ ئاڵوگۆڕەكان و، ئیدارەو بەڕێوەبردنی كوردستان لە ئەگەری پەرەئەستاندنی خەباتی جەماوەری و لاواز بوونی دەسەڵاتی ناوەندی یا گۆڕانی دەسەڵات لە ئێران دا،
لە مێژە لە لایەن حیزبی دێموكراتەوە گرنگی پێدراوە. یەكێك لە هۆیەكانی هەوڵدانی رێبەریی حیزبی دێموكرات لە نیوەی دووهەمی دەیەی حەفتای هەتاوی و سەرەتاكانی ئەم دەیەیەدا بۆ پێكهێنانی هاوكاری لە نێوان حیزب و رێكخراوەكانی رۆژهەڵاتی كوردستان دەركی گرنگی و بایەخی ئەم مەسەلەیە بووه. لەو پلاتفۆرمە پێشنیارییەش دا كە ئەو كات رێبەریی حیزب، بۆ باس لەگەڵ رێكخراوەكانی دیكە ئامادەی كردبوو، ئیدارەو بەڕێوەبردنی كوردستان لە قۆناغی تێپەڕین (گـذار) لەم نیزامەوە بۆ نیزامێكی دیكە، بایەخێكی تایبەتی پێدرابوو.
لەراستی دا هەر سیناریۆیەك بۆ داهاتووی كوردستان و ئێران پێشبینی بكەین، كۆمەلێك پرس هەن كە بریاردان لەبارەیانەوە، كاری تاقە حیزب و رێكخراوێك نیە. ئەو پرسانە پێوەندییان بە هەموو خەڵكی رۆژهەڵاتی كوردستانەوە هەیە. بۆیە چۆنیەتیی بەرەورووبوون لەگەڵیان و بڕیار دان لەبارەیانەوە، دەبێ بەهاوبەشیی هەموو حیزب و رێكخراوەكان و بە رەزامەندی و پشتیوانیی سەرجەم خەڵكی كوردستان بێ. لەمەش دا گومانێك نیە كە ئەگەر ئەمڕۆ بوارەكانی هاوكاری و هاوفكری لە نێوان ئەم حیزب و رێكخراوانەدا خۆش نەكرێ و، ئەوان ئێستا لەسەر ئامانجەكان و چوارچێوەی هاوپەیمانەتییەك ساغ نەبنەوە، سبەینێ درەنگ دەبێ. لەم حاڵەتەدا، نە دەتوانن لە دەرفەتەكان بە قازانجی نەتەوەكەیان كەڵك وەربگرن و وەك كورد بە قازانجی خۆیان شوێن لەسەر رەوتی رووداوەكان دابنێن، نە دەشكرێ وڵامێكی گونجاو و دروست بە پرسە گشتی و هاوبەشەكان بدرێتەوە.
پرسی ئەو كەسانەی خزمەتیان بە دامودەزگا سەركوتكەرەكانی ئەم رێژیمەو خەیانەتیان بە نەتەوەو نیشتمانی خۆیان كردوە، یەك لەم پرسە گرنگانەیە. لە درێژایی 30 ساڵی رابردوودا، هەمووكات، كەسانێك بە بیانوو و ناوی جۆراوجۆرەوە لە خزمەت سیاسەتی سەركوتكەرانەو بەرنامەو ئامانجە دژی گەلییەكانی كۆماری ئیسلامی دا بوون و، شانبەشانی كاربەدەستان و هێزە جینایەتكارەكانی رێژیم، جاری واشبووە لە پێشەوەی ئەوان، هەڵیان كوتاوەتە سەر خەڵك و نەك هەر سەرەتاییترین ماف و ئازادیەكانی دانیشتووانی كوردستانیان پێشێل كردوە، بەڵكوو تاوان و جینایەتیان لە دژی ئەوان ئەنجام داوەو لە دژایەتیكردنی بزووتنەوەی ئازادیخوازانەو دوژمنایەتیی بەشداران و هاوكارانی خەباتی رزگاریخوازانەی خەڵكی كوردستان درێغیان نەكردوە. هەر ئێستاش لە هەموو ناوچەكانی كوردستان ژمارەیەكی بەرچاو لەو كەسانە هەن كە بە ئاشكرا یا نهێنی، هاوكارو هاودەستی تاوان و جینایەتەكانی ئەم رێژیمەن.
پەیامەكەی بەڕێز مستەفا هیجری لەم پێوەندییەدا كە رۆژی 25/10/1388 لە تەلەڤیزیۆنی تیشك و دواتر لە سایتەكانی حیزبی دێموكراتی كوردستانی ئێران دا بڵاو بۆوە، لە چەند بارەوە شیاوی هەڵوێستە لەسەر كردنە. لەم بارەیەوە كە ئەو كەسانەی لە خزمەت سیاسەتی سەركوت و تاوانی ئەم رێژیمەدان دەبێ وریا بكرێتەوەو هان بدرێن بۆ ئەوەی واز لە خەیانەت بە نەتەوەكەیان و هاودەستی لەگەڵ ئەم رێژیمە بێنن، پەیامەكەی سكرتێری حدكا بەشتێكی باش دەزانم. هیچ كامێكمان چ وەك حیزب و چ وەك تاكێكی ئازادیخوازی نابێ لەم وریا كردنەوانە غافل بین و، پێویستە هەرچی زیاتر كار بكەین بۆ ئەوەی ئەم رێژیمە بەتایبەتی لە كوردستان، لە نێو خەڵك دا تەریك بكەوێتەوەو، ئەو كەسانەی بە دەورەوە نەمێنن كە لەژێر ناوی جۆراوجۆردا، بۆ سەركوت و جاسووسی لە دژی خەڵك، لە خۆی كۆ كردوونەوە. بەڵام لە دوو لایەنی دیكەوە، ئەم شێوە پەیڤین و پەیام ناردنە، شیاوی رەخنە لێگرتنی جیددییە:
یەكەم: نە كاك مستەفا هیجری و حیزبەكەی، نە هیچ كەسایەتی و حیزبێكی دیكە، بۆیان نیە لەسەر پرسێك كە پێوەندیی بە هەموو حیزب و رێكخراوەكان و سەرجەم خەڵكی كوردستانەوە هەیە، یەك لایەنەو بەتەنیا، بڕیار بدەن. كێشەی نێوان حدكاو گرووپێك چەكداری دژ بەم حیزبە نیە تا رێبهریی ئەم حیزبە چۆنی بۆخۆی پێی باشە، لەگەڵیان پێك بێ و لە ئێستاوە مەسەلەكە ببڕێنێتەوە!
دووهەم: لایەنێك كە بە گوتاری یەكتر بەخشین و لەیەكتر بوردن بەرەورووی ئەو كەسانە دەبێتەوە كە بە هەر هۆیەك لە خزمەت رێژیم و لەبەرەی دژ بە نەتەوەكەیان دان، حەق ئەوەیە لە پێوەندی لەگەڵ حیزبێكیش دا كە لە هاوسەنگەران و هاوڕێیانی چەندین ساڵەی خۆیان پێك هاتوە، چاو بە هەڵوێستی خۆی دا بخشێنێتەوەو نەرمی بنوێنێ. "لەیەكتر خۆشبوون و سینگ فرەوانی" و "خۆ گرێنەدان بە رابردوو" و وەلانانی "فكری تۆڵە كردنەوە"، که له پهیامهکهی بهڕێز هیجری دا هاتوون پێش ئەوەی لە رووبەروو بوونەوە لەگەڵ هاودەستان و خزمەتكارانی كوردی رێژیمی جینایەتكاری كۆماری ئیسلامی دا كەڵكیان لێ وەربگیرێ، پێویستە لە پێوەندی و موناسباتی حیزب و رێكخراوەكانی رۆژهەڵاتی كوردستان، بەتایبەتی لە روانگەو خوێندنەوەی حدكا بەرامبەر بە حیزبی دێموكراتی كوردستان دا خۆی دەربخا. لەم حاڵەتە دایە كە دەتوانین "بیركردنەوەی لە ئێستاوەی" كاك مستەفا هیجری "لە داهاتووی كوردستان" بە جیددی بگرین.
