لایحەی ئامانجداركردنی یارانەكان دوای پەسەندكرانی لەلایەن مەجلیسی شووڕای ئیسلامی و شووڕای نیگابانەوە لە ساڵی نوێی هەتاوییەوە دەخرێتە رۆژەڤی كاری دەوڵەتەوە، بەڵام هێشتا كێشهی سەرەكهی نێوان دەوڵەت و مەجلیس لەسەر بڕی داهاتی
دەوڵەت لە شوێنی ئامانجدار كردنی یارانەكان نەبڕاوەتەوە. هەرچی مەجلیسە بڕی 20 هەزار میلیارد تمەنی بۆ ئەو مەبەستە لەبەر دەستی دەوڵەت داناوە، بەڵام دەوڵەتی ئەحمەدی نژاد دەڵێ بە كەمترلە 40هەزار میلیارد تمەن ناتوانێ ئەو پڕۆژەی بخاتە بواری جێبەجێ كردنەوە. ئەو بڕە پووڵەش لە شوێنی بردنە سەرێی نرخەكان و ئازاد كردنی قیمەتەكان دابین دەكرێ، هەر بۆیەش لەوانەیە لە ئاكامی رێكنەكەوتنی مەجلیس و دەوڵەت دا، دەوڵەت لە درێژەدانی جێبەجێ كردنی ئەولایحەیە پاشگەز بێتەوە.
بەڵام جیا لە خاڵە ناكۆكییەكانی مەجلیس و دەوڵەت لەسەر ئاراستە حقووقی، قانوونی و سیاسییەكانی ئەو لایحەیە، كۆمەڵە لایەنێكی شاراوەی ئەو پرۆژەیە سەر لێشێواوی و خاڵی جێی پرسیاری لەلای كۆمەڵانی خەڵك دروست كردوە.
ئەوەی كە ئەو خوشە بەندییانه بە پێی چ پێوەرو پێودانگێك كراوە كە زۆربەی هەرە زۆری خەڵك لە خوشەی سێ دا جێیان گرتوە كە تایبەت بەو كەس و بنەماڵانەن كە دەوڵەمەند و خۆش بژێون؟ ئەو بڕە پەرداختییە نەغدییە چەندەیە و لە كەیەوە یارانەكان لەسەر شمەك و خزمەتگوزارییەكان هەڵ دەگیرێ؟
راگەیاندنی خوشە بەندییەكان لە زۆر لاوە نیگەرانی و سەر سووڕمانی لەلای خەڵك و كارناسە ئابوورییەكان دروست كردوە. دەوڵەت لە حاڵێك دا ئیدعا دەكا زۆرترین كاری كارناسیی لەسەر ئەو لایحەیە كردوە،بەڵام دەرنجام و دەركەوتەكان شتێكی جیاواز و ناتەبا لەگەڵ ئەوەیان دەرخستوە. ئەوەی لەو نێوەدا دیارو ئاشكرایە كە جێ گرتنی خەڵك لە خشتەی خوشەبەندییەكان دا بە پێی رادەی حەقدەست و مووچەی مانگانە دیاری كراوە، نەك بە لەبەرچاو گرتنی تێچووەكانی ژیان و پێوەر گەلێكی گرینگی وەك كرێ خانوو و گەڕاندنەوەی قیستە بانكییەكان. لێرە دا پرسیاری سەرەكی ئەوەیە كە چەند لە سەدی خەڵك لە خوشەكانی یەك و دوو دا جێ دەگرن كە دەبێ یارمەتیی نەغدییان پێ بدرێ؟ دەوڵەت ئیدعا دەكا كە دەمێك ساڵە كاری كارناسی لەسەر ئەو لایحەیە دەكا، كە چی ئێستاش روون نیە لە یارانەی نەغدی بە هەر كام لە خوشەكان چەندە دەدرێ؟ یان ئەوەی وەك باس دەكرێ هیچ بڕە پارەیەك بە بنەماڵەكانی نێو خوشەی 3ش دەدرێ یا نا؟ یان ئەوەی كەنرخەكان ئازاد دەكرێن، چۆن و بە چ شێوەیەك یارانەكان لە سەر هەڵ دەگیرێ و لە یەكەم ساڵی جێ خستنی ئەو پرۆژە بڕیارەدا نرخی برق، گاز، بێنزین و كاڵاكانی وەك ئارد و قەند و رۆن و شەكر دەگاتە چەندە و لە سۆنگەی چەند هێندە بوونی نرخی بێنزین نرخی شمەك و كاڵاكانی بازار چی لێ بەسەر دێ؟
بانكی ناوەندی هێڵی هەژاریی بنەماڵەیەكی 6 كەسیی ژێر 780 هەزار تمەن راگەیاندوە. بە پێی ئەو ئامارە 30 میلیون كەس لە خوشەی یەك دا جێیان گرتوە كە بریتین لە ئەندامانی ئەو بنەماڵەیەی كە لە خێزانێكی 6 كەسی دا لە مانگ دا كەمتر لە 470هەزار تمەن داهاتیان هەیە. 17 میلیون كەسیش ئەندامانی ئەو بنەماڵانەن كە لە خێزانێكی 6 كەسی دا لە مانگ دا لەنێوان 470 هەزار تا 780 هەزار تمەن داهاتیان هەیە. بەو پێیە 47 میلیون كەس لە خەڵكی ئێران لە ژێر هێڵی هەژاری دا دەژین و لە خوشەی یەك و دوو دا جێ دەگرن.
بەڵام خاڵی جێی سەرنج ئەوەیە كە جێگری ئەحمەدی نژاد رایگەیاندوە كە لەوانەیە مانگی 15هەزار تمەن یارانەكان نەغدی لەمانگ دا بەو كەسانە بدا كە لە خوشەی یەك دا دانراون و ئەو بڕە پارەیە بۆ كەسانی نێو خوشەی دوو لەوە كەمتر دەبێ. كارناسانی ئابووری پێیان وایە تەنانەت هەر ئەوەندە پووڵەش كە دیاری كراوە لەوانەیە دەوڵەت تووشی كەسریی بودجە بكا، ئەوە لەحاڵیك دایە كە ئەحمەدی نژاد لە كاتی پڕوپاگەندەكانی هەلبژاردن دا رایگەیاندبوو كە لە ئەگەری پەسندكرانی لایحەی ئامانجداركردنی یارانەكان دا بڕی 70 هەزار تمەن لە مانگێك دا ئەویش بۆ تاك تاكی خەڵكی ئێران دەبڕدرێتەوە. ئەوەی كە چۆنە لە ماوەی تەنیا 7مانگ دا 70 هەزار تمەن بۆ خوار 15 هەار تمەن دابەزیوەو هەر لە بنەڕەت دا چەندە ئەو لایحەی لە بەرژەوەندیی خەڵكی ئێران دایە، با لە جێی خۆی بمێنێ!
خاڵێكی دیكەی جێی سەرنج لە پێوەندی لەگەڵ راگەیاندنی خوشە بەندییەكانی ئەو لایحەیە ئەوەیە كە زۆربەی خەڵكی كوردستان كە هەژارو كەم داهات و لە دواكەوتوویی ئابووری دا راگیراون، لە خوشەی سێ دا دانراون، واتە ئەو كەسانەی خۆش بژێوو دەوڵەمەندن. ئەوەش لەگەڵ ئەوەی ناڕەزایەتیی زۆری خەڵكی لێ كەوتۆتەوە، پەرەی بەو نیگەرانیەش داوە كە لە كاتی ئازاد كردنی قیمەتەكان دا و چوونە سەرێی زیاتری نرخی"تورم" و گرانی تر بوونی نرخی شمەك و كاڵاكان، خەڵكی هەژارو بێ داهات و كەم داهاتی كوردستان چۆن بەرگەی ئەوشەپۆلە نوێیەی گرانی دەگرن كە لەوانەیە سۆنامییەكی لێ بكەوێتەوە. هەر بۆیەش وای كردوە كە خەڵك لەنێو خۆیان دا بڵێن "حاشا لە گۆشتی كەروێشك و ......!
